Gələn il ABŞ-də keçiriləcək prezident seçkiləri üçün namizədliyini irəli sürən Vivek Ramasvamy Azərbaycana qarşı saxta ittihamlarla çıxış edib.

O, təşviqat xarakterli müsahibəsində ermənilər tərəfindən Gəncə və Bərdə şəhərlərinə raket hücumunun kadrlarını nümayiş etdirib.

Lakin o, həqiqətləri gizlədərək, guya bu kadrlarda raket hücumuna məruz qalanların ermənilər olduğunu bildirib.

Belə ki, Vivek Azərbaycanı ittiham edərkən fonda gedən kadrlar Ermənistanın törətdiyi Gəncə və Bərdə terrorundan olub.

Qeyd edək ki, bu görüntülərlə bağlı Azərbaycan Prezidenti İlham Əliyev də danışıb və videosüjeti sərt tənqid edib:

"Dünən mənə bir videosüjet təqdim etdilər. Həmin videoda ABŞ prezidentliyinə namizəd Azərbaycana qarşı ittihamlarla çıxış edir və bu zaman ermənilər tərəfindən Gəncə şəhərinin raket atəşinə tutulması ilə bağlı kadrları nümayiş etdirir. İkinci Qarabağ müharibəsi zamanı Ermənistan münaqişə zonasından yüz kilometrlərlə uzaqda yerləşən şəhərlərimizi uzaqmənzilli artilleriyadan, o cümlədən ballistik raketlərdən atəşə tutdu. Bunun nəticəsində bizim uşaqlar da daxil olmaqla, yüzdən artıq mülki vətəndaşımız həyatını itirdi. Məhz sözügedən həmin namizəd, Azərbaycanı ittiham edərək, ermənilərin Gəncəyə və Bərdəyə hücumlarının kadrlarını nümayiş etdirir. İndi bu insanlarla necə danışmaq olar, onlara nəyi izah etmək olar? Onlar heç nə eşitmək istəmirlər. Onlar mərkəzdən verilən təlimata uyğun hərəkət edirlər”.
Həmin saxta ittihamlara təqdim etdiyimiz videonun 60-cı saniyəsinədək baxa bilərsiniz:

Türkiyənin Xarici işlər naziri Hakan Fidan Almaniyanın xarici işlər naziri Annalena Berbok ilə telefon danışığı aparıb.

Diplomatik mənbələrdən əldə edilən məlumata görə, Fidan Berbok ilə İsrail və Fələstindəki son hadisələri müzakirə edib.

Həmçinin, söhbət zamanı NATO-nun genişlənməsi məsələlərinə də toxunulub. (Mənbə: TRT)

Brüsseldə keçirilən Ramşteyn formatında görüşdə Alyansın bütün üzvləri Ukraynanın gələcəyinin NATO-da olduğunu təsdiqləyiblər.

Bunu NATO-nun Baş katibi Yens Stoltenberq deyib.

O vurğulayıb ki, Ukrayna döyüş meydanında nə qədər güclü olarsa, sülh danışıqları zamanı bu ölkənin mövqeyi bir o qədər möhkəm olacaq.

"Tarix təkrar olunmamalıdır. Buna görə də Alyansın bütün üzvləri Ukraynanın NATO-ya üzv olmasına razılıq verib", - Stoltenberq əlavə edib.

NATO-nun baş katibi qeyd edib ki, Alyansa üzv ölkələr Ukraynaya dəstəyini davam etdirəcək.

Stoltenberq vurğulayıb ki, Ukraynaya daha çox silah-sursat vermək lazımdır.

“Oktyabrın 12-də Rusiya tərəfinin təklifi ilə Rusiya, Azərbaycan və Ermənistan xarici işlər nazirlərinin Bişkekdə görüşü olmalı idi. Biz Rusiya Federasiyasının vasitəçiliyini minnətdarlıqla qəbul edirik, çünki Rusiya bizim qonşumuz, müttəfiqimiz, həmçinin bizim regionda yerləşən, minlərlə kilometr uzaqda olan ölkələrdən fərqli olaraq qonşuluqda yerləşən Ermənistanın da müttəfiqidir. Təbii ki, ölkələrimiz arasında münasibətlərin tarixi, əlbəttə, Rusiya tərəfinin vasitəçiliyini nəzərdə tutur”.

AZƏRTAC xəbər verir ki, bu fikri Azərbaycan Prezidenti İlham Əliyev oktyabrın 11-də MDB-yə üzv dövlətlərin təhlükəsizlik və xüsusi xidmət orqanları rəhbərləri şurasının 53-cü iclasının iştirakçıları ilə görüşdə deyib.

Azərbaycanın bu təklifi müsbət qarşıladığını və xarici işlər nazirimizin Rusiya və erməni həmkarları ilə görüşməyə hazır olduğunu vurğulayan dövlətimizin başçısı bildirib:“Təəssüf ki, erməni tərəfi bu görüşdən imtina etdi. İndi sual yaranır: Ermənistan sülh istəyirmi? Zənnimcə, xeyr, çünki əgər sülh istəsəydi, bu imkandan imtina etməzdi. Ermənistanın baş naziri altı saata Qranadaya uçur, orada Azərbaycansız Azərbaycanın müzakirə edildiyi mənasız görüşdə iştirak edir, amma iki-üç saata Bişkekə uça bilmir, onun mühüm işləri varmış. Bax biz bütün bunları açıq deməliyik. Bütün bunları hamı görür, ancaq bunu danışmaq və nəzərə almaq lazımdır”.

Rusiya Təhlükəsizlik Şurasının katibi Nikolay Patruşevin Bakıya gəlişi Qarabağda olan Rusiya hərbi kontingentinin gələcəyini müəyyənləşdirməklə bağlı ola bilər. Rusiya diplomatları son günlərdə açıqlamalarında hərbi kontingentin Azərbaycan ərazisində qalma müddətinin uzadılmasına işarə edirlər. Bu Azərbaycanın təhlükəsizlik maraqlarına ziddir. Bu arada, Ermənistanın baş naziri Nikol Paşinyan son müsahibəsində deyib ki, Rusiya hərbi kontingenti Qarabağı tərk edəcəksə Ermənistana yox ölkəsinə qayıtmalıdır. Paşinyan bunu təsadüfən deməyib. Çünki Kreml Rusiya hərbi kontingentini Qarabağdan Ermənistandakı bazasına yerləşdirmək planını da nəzərdən keçirir. Ermənistanın baş naziri bu haqda məlumatlıdır. Rusiya hərbi kontigentinin Ermənistandakı bazaya köçürülməsi Qərbə yaxınlaşmaq istəyən Nikol Paşinyanın maraqlarına cavab vermir.
Elxan Şahinoğlu
Teref.az

Hörmətli həmkarlar,
Həqiqətən biz məsələlərə laqeyid yanaşdıqca, gözümüzü yumub ancaq QHT Agentliyinin əlinə baxıb qrant gözləyəcəyiksə, onlar bizi daha çox dolayacaq, Ali rəhbərliyi daha çox aldadacaqlar.
Bir neçə gün əvvəl Agentliyin mətbuat katibinin müsahibəsini oxudum. Heyrətə gəldim həqiqətən. Ya ona Prezident Administrasiyasından hazır müsahibə təqdim ediblər, ya da adamın həqiqətən məsələlərdən xəbəri yoxdur.
Mən bir neçə detalı izah edib, məsələnin mahiyyətinə keçəcəm.

Demək həmin xanımın “inqilabi dəyişikliklər” kimi təqdim etdiyi məsələləri diqqətinizə çatdırıram:

1. Xanım deyir ki, “Azərbaycanda milli donor institutunun mövcud olduğu son 15 ildə keçirilmiş heç bir müsabiqələrlə bənzərlik təşkil etməyəcək. İlk dəfədir ki, Agentliyin müsabiqələri Nazirlər Kabinetinin təsdiq etdiyi qaydalar əsasında elan olunacaq”. Xanıma izah edən olmayıb ki, Azərbaycan milli donor QHT Şurası və ya indi QHT Agentliyi deyil. Nə də bu qaydalar ilk dəfə tətbiq edilmir. Ölkədə Gənclər Fondu, Elm Fondu, habelə ayrı-ayrı nazirliklərin qrantları mövcuddur. Nazirlər Kabineti müvafiq sahələr üzrə də QHT layihələrinin maliyyələşdirilməsi haqqında qaydalar təsdiq edib. Sadəcə bir az bu sahədən başı çıxan adam lazımdır ki, sizlərə düzgün istiqamət versin.

2. Xanım deyir ki, “İndiyədək qrant müsabiqələri ilin müxtəlif dövrlərində elan olunub, bu isə layihələrin icrasında xeyli çətinliklər, haqlı narazılıqlar yaradırdı. Agentlik ilk dəfə növbəti ilin müsabiqə elanlarını ondan əvvəlki ildə verəcək”. Bildirmək lazımdır ki, QHT Şurası 13 il sizin dediyiniz yeniliklərdəki kimi işləyib. Növbəti ilin qrant elanı əvvəlki ilin noyabr ayında, tam sizin layihə qəbul edəcəyiniz vaxtdan başlayırdı. Bundan da xəbəriniz yoxdursa, ən azından arxivi bir qədər araşdırmağa ehtiyac vardır. QHT Şurasının da zamanında layihələr 1 ay qəbul olunurdu, 1 ay seleksiya və ekpertiza olunurdu, 1 aya yaxın da qərar qəbul olunurdu. Bu indi “inqilabi” dəyişiklik oldu?

3. Xanım deyir ki, “İndiyədək QHT-lərə layihə yazmağa hazırlaşmaq və sənədlərini təqdim etmək üçün heç vaxt bu qədər vaxt verilməyib. Agentlik bu unikal fürsəti yaradıb ki, QHT-lərin keyfiyyət üzərində köklənməyə, plan üzrə işlərini səmərəli qurmağa tam şəraitləri olsun. Hər 3 qrant müsabiqəsinin eyni vaxtda elan edilməsi isə o deməkdir ki, QHT-lər müsabiqələrlə bağlı bütün mənzərəni, mövzuları aydın şəkildə görmək imkanı qazansın, seçim imkanları artsın. Əvvəlki dövrdə növbəti müsabiqənin hansı mövzuda olacağı qaranlıq qalırdı”. Təkrarçılıq olmasın, amma QHT Şurası vaxtında da eyni təcrübə tətbiq olunurdu. QHT-lərin tam vaxtı da çatırdı, üstəlik hələ artıq vaxt da qalır. Səmimi deyim ki, sonuncu cümləyə o qədər gülmüşəm ki. Təsəvvür edin, deyilir ki, guya müsabiqə elan olunub, amma hansı mövzuda olması qaranlıq qalıb. Bu günə qədər hansı müsabiqə olub ki, mövzusu olmayıb? Mövzusuz müsabiqə olur?

Həqiqətən dərinliklərə vardıqca biyabırçılıqlar üzə çıxır.
Tələsik 5 ay sonra nəticələrini elan edəcəkləri müsabiqənin indidən anons edilməsi çox mətləblərdən xəbər verir. Zamanı gəldikdə hansı korrupsiya əməllərinin üzərinin ört basdır edilməsini cəmiyyət üzvlərinə açıqlayacam. Məni tanıyanlar yaxşı bilir ki, heç bir fakt olmadan hansısa məsələnin üzərinə getmərəm.
Sadəcə başqalarından fərqli olaraq dövlətə sevgimiz qarşımızı kəsir.
Amma bu gün diqqətimi daha çox çəkən digər qrant verən qurumlardan fərqli olaraq QHT Agentliyinin qrant elanının bütün mətbuatda, hətta radio kanallarda verilməsi idi. Bayaq 104 FM-də də dinlədim.
Hazırda məni bir sual maraqlandırır: Şuşa şəhərində keçirilən İqtisadi Əməkdaşlıq Təşkilatının Xarici İşlər Nazirləri Şurasının 27-ci iclası əhəmiyyətlidir, yox QHT Agentliyinin qrant elanı?
Bayaqdan izləyirəm, bir neçə saytdan başqa mötəbər tədbir haqqında məlumat verən yoxdur. Amma haranı açırsan qrant elanı reklam olunur.
Samir Adigozelli
Teref.az