Azərbaycan Rusiya sülhməramlılarının yerləşdiyi ərazilərdəki yataqlara nəzarəti bərpa edə bilərsə, separatçı-terrorçu rejim ciddi gəlir itkisinə məruz qalacaq: Xankəndi yolundakı aksiyasının hədəflərindən biri də buna nail olmaqdır;
Sülhməramlıların müvəqqəti nəzarətindəki ərazilərdə qalan “Dəmirli” və “Qızılbulaq” yataqları “Vallex Group”un 2001-ci ildə yaratdığı “Base Metals” şirkəti tərəfindən istismar edilir.
Müharibədən əvvəl bu yataqların istismarı nəticəsində separatçıların əldə etdiyi illik gəlir 18,7 milyard dram – “büdcə”lərinin 1/3 hissəsi olub. Müharibədən sonra isə qızıl və əlvan metalların dünya bazarında qiymətinin artması nəticəsində bu gəlirlər 45 milyard drama çatıb – “büdcə”lərinin 2/3 hissəsi.
Erməni mənbələr “Qızılbulaq” yatağında qızıl və əlvan metalların tamamilə tükəndiyini yazır. “Dəmirli”dən çıxarılan metallar “Qızılbulaq” kombinatında emal edilir.
Bu yataqlara nəzarət edə bilsək, separatçı-terrorçu rejim əsas gəlirdən məhrum olacaq və rejimin “sağ qalması”nı daha da çətinləşdirəcək.

“Mən istisna edirəm ki, azərbaycanlıların tələbləri yerinə yetirilmədən “Artsax”ı Ermənistanla birləşdirən yol açılacaq.

Hurriyyet.Az xəbər verir ki, bunu erməni politoloq Argişti Kiviryan deyib.

O, bildirib ki, Azərbaycan ən azı erməni tərəfinin bu və ya digər vaxtlarda tələbləri yerinə yetirəcəyinə dair vəd almalıdırlar.

“Güc və təşəbbüs onların tərəfindədir, tələblərindən əl çəkməyəcəklər. Məqsədləri barədə açıq danışırlar: Zəngəzur dəhlizi və Qarabağın Azərbaycanın daxili məsələsi kimi təqdim ediləcəyi sülh sazişinə nail olmaq və minimum Laçın dəhlizi və mədən üzərində nəzarət proqram”, – deyə Kiviryan bildirib.

O qeyd edib ki, indi faktiki olaraq Azərbaycan Laçın dəhlizinə nəzarət funksiyasını yerinə yetirir.

“Azərbaycan deyir ki, bu mənim ərazimdir və mənim girib yoxlama aparmaq hüququm var. İndi onlar ya məqsdələrini həyata keçirməyə çalışmalıdırlar, ya da erməni tərəfdən sanballı vədlər almalıdırlar, ya da Rusiya tərəfinin vasitəçiliyi ilə erməni tərəfinin onları hansı müddətdə yerinə yetirəcəyinə zəmanət almalıdırlar”, – deyə politoloq bildirib.

Kiviryanın sözlərinə görə, hazırda rəsmi Bakı Rusiya tərəfinin bəyanatına əsasən, Ermənistanın öz mövqeyini bildirməsini gözləyir.

“Bu tələblərin yerinə yetirilməsi ona gətirib çıxaracaq ki, azərbaycanlılar nəinki sadaladığım tələblərdən geri çəkilməyəcək, həm də artıq möhkəmlənmiş mövqelərdən başqa, digər tələblər irəli sürməyə başlayacaqlar. Azərbaycan bizdən nəsə alanda dayanmır, başqa tələbləri irəli sürməyə davam edir. Ona görə də indi təslim olmaq başqa tələblərə yol açmaq demək olardı” – deyə erməni politoloq əlavə edib. \\KONKRET.az

Xəbər verildiyi kimi, dekabrın 14-ü axşam saatlarında Kəlbəcər rayonunun Çıraq kəndində iki qrup insan minaya düşüb. Minaya düşənlərdən biri həlak olub. Bu barədə Baş Prokurorluq, Müdafiə Nazirliyi və Daxili İşlər nazirliklərinin birgə məlumatında bildirilir.

Əvvəlcə, təmir-tikinti işləri ilə məşğul olan tikinti şirkətinin 4 əməkdaşı minaya düşüb. Ardınca isə onlara köməyə gedən 4 hərbçi də minada partlayıb. Onlardan 3-ü müxtəlif dərəcəli bədən xəsarətləri alıb, bir əsgər isə dünyasını dəyişib.

Çıraq kəndi yaxınlığında 8 nəfərin minada partlaması onu göstərir ki, Ermənistanın Azərbaycana qarşı terror aktları hələ də davam edir. Bunu jurnalistlərə Azərbaycan Ordusunun Quru Qoşunlarının zabiti, mayor Ruslan Səmədov deyib.

Onun sözlərinə görə, minaların ermənilər tərəfindən 2020-ci ilin dekabrında qoyulduğu güman edilir.

“Nə birinci Qarabağ müharibəsi zamanı, nə də Vətən müharibəsi zamanı müdafiə xətti Çıraq kəndindən keçməyib. Heç bir hərbi zərurət olmadığı halda insanların öldürülməsi məqsədi ilə bu ərazilərə minaların basdırılması qarşı tərəfin terror fəaliyyətinin sübutudur”, – deyə Səmədov bildirib.

ANAMA-nın Göygöl regional təlim mərkəzinin təlimatçısı Vasif Cəbrayılov da öz növbəsində bildirib ki, ilkin versiyaya görə, Çıraq kəndində tank əleyhinə “TM 62-M” minası partlayıb: “Hadisə yerindən əldə etdiyimiz sübutlar da bu minanın fraqmentlərinə bənzəyir. Qeyd edim ki, “TM 62-M” tank əleyhinə mina təzyiq nəticəsində işə düşür və tərkibində 7,5 kq partlayıcı var”.

Xatırladaq ki, 2020-ci il noyabrın 10-dan 2022-ci il dekabrın 14-dək işğaldan azad edilmiş ərazilərdə artıq 272 nəfər minalarda partlayıb (46 nəfər həlak olub, 226 nəfər yaralanıb).

Təbii ki, bu, Azərbaycanda ciddi hiddətə səbəb olur. Və suallar ortaya çıxır. Baş verənlərə görə kim cavabdehlik daşımalıdır? Mülki şəxslərin ölümlərinin qarşısını necə almaq olar?

Press Klubun suallarını beynəlxalq məsələlər üzrə ekspert, “Cənubi Qafqaz” politoloqlar klubunun rəhbəri İlqar Vəlizadə cavablandırıb:

– Azərbaycan Ərazilərin Minalardan Təmizlənməsi üzrə Dövlət Agentliyinin rəsmi məlumatına görə, işğaldan azad edilmiş bütün ərazilərdə bu prosesin tam şəkildə həyata keçirilməsi üçün 30 il zaman və 25 milyard dollar vəsait lazımdır. Əgər hər il ölkəmizdə onlarla insanın minalardan ölməsi və yaralanması nəzərə alınsa, təsəvvür edin ki, 30 il ərzində bu ərazilərdə nə qədər insan ölə bilər. Bu proses, çox uzun çəkə bilər.

Təəssüf ki, bu gün beynəlxalq humanitar təşkilatlar, ayrı-ayrı dövlətlər Qarabağdakı ermənilərin taleyindən narahatlıq ifadə etsələr də, Azərbaycan ərazilərinin minalanmasından yaranan problemlərə kor, kar, lal olaraq qalırlar. Heç bir qınaq, Ermənistanı minalanmış ərazilərin xəritələrini Bakıya təhvil verməyə məcbur edəcək heç bir hərəkət yoxdur. Bu onu deməyə əsas verir ki, regionumuzda sülh quruculuğu məsələləri ilə məşğul olan bütün bu təşkilatlar və dövlətlər birtərəfli yanaşma sərgiləyirlər və az qala ermənipərəst mövqedən çıxış edirlər. Necə ki, son onilliklər ərzində ermənipərəst mövqe tutublar. Bu bir faktdır.

Biz onlarla necə işləsək, onlara necə təsir etsək də, bütün bu strukturlar, anti-Azərbaycan mövqe tutacaqlar. Bunu etiraf etmək lazımdır. Bu insanlar üçün hər hansı sübutların, arqumentlərin heç bir mənası yoxdur. Onlar üçün yalnız siyasi maraqlar önəmlidir. Bu siyasi maraq da nüfuzlu erməni lobbisi, onların pul kisələri ilə məhsuldar ünsiyyəti diktə edir.

Əlbəttə, Azərbaycan minalanmış ərazilərlə bağlı bütün xəritələrin ona verilməsində israr edəcək, amma təəssüf ki, buna böyük ümidlər yoxdur. Çünki Ermənistan tərəfi bu kartlara, bu humanitar vəziyyətə açıq-aydın tüpürən himayədarlarına arxalanır – gəlin, hər şeyi öz adı ilə çağıraq. Və bu tam cəzasızlıq şəraitində Ermənistan minalanmış ərazilərin real xəritələrini Azərbaycana verməkdə maraqlı deyil. Üstəlik, Ermənistan tərəfi xəritələri təhvil verməməklə və bununla da minatəmizləmə prosesini axsatmaqla məcburi köçkünlərin öz yaşayış yerlərinə qayıtmasını, bu ərazilərin bərpasını, Azərbaycanın işğaldan azad edilmiş ərazilərdə möhkəmlənməsini ləngitməyə çalışır. Çox güman ki, ermənilərin himayədarları da bunda maraqlıdırlar, onlar da Azərbaycanın bu ərazilərdə güclənməsini istəmirlər. Əks halda, daha tez hərəkət edərdilər. Onlar əvvəllər Azərbaycanın maraqlarına tüpürürdülər və biz bu gün eyni şeyi bir az fərqli formada görürük.

Rauf Orucov

Azərbaycanın Qarabağ bölgəsindəki terror rejiminin qalıqlarının “dövlət naziri” yeni təxribatlar törətmək üçün ölkəmizin ərazisində olduğunu bir daha sübut edib.

O, dekabrın 17-də qanunsuz olaraq Azərbaycanın faydalı qazıntı yataqlarının qeyri-qanuni istismarı ilə məşğul olan “Base Metal” zavodunda olub.

Müəssisənin işçiləri ilə görüşdə bu azmış kimi o, müharibənin davam etdiyini qeyd edib və işçiləri hərbi əməliyyatlara hazır olmağa çağırıb.

R.Vardanyan sözün əsl mənasında ölkəmizlə müharibənin davam etdiyini bəyan edib. Onun sözlərini Qarabağ bölgəsində yaşayan ermənilərin Azərbaycana qarşı terrora çağırışı kimi də qiymətləndirmək olar.

Xatırladaq ki, Cənubi Qafqazda siyasi vəziyyəti dəyişmək üçün Qarabağa ezam olunmuş Ruben Vardanyan hazırda bölgədəki vəziyyəti öz xeyrinə döndərməyə çalışır.

Ermənilər Ağdərə-Kəlbəcər yolunu bağlayıblar.

Teref.az xəbər verir ki, bu barədə məlumatı erməni jurnalist Qaqik Arutyunyan öz “Facebook” səhifəsində yazıb.

Erməni jurnalist yazıb ki, Ağdərədə yaşayan bir qrup erməni Ağdamdan Kəlbəcərə gedən avtomobil yolunu bağlayıblar.

Xatırladaq ki, dekabrın 12-də səhər saatlarından bir qrup qeyri-hökumət təşkilatı nümayəndəsi, media təmsilçisi və ictimai fəal Rusiya sülhməramlılarının müvəqqəti nəzarətində olan Şuşa-Xankəndi yolunu bağlayıb. Aksiya iştirakçıları Azərbaycanın faydalı qazıntı yataqları, xüsusilə Qızılbulaq qızıl və Dəmirli mis-molibden yataqlarının qanunsuz istismarına etiraz etdiklərini söyləyərək Xocalı və Xankəndi tərəfə keçmək istəsələr də, sülhməramlı kontingent onlara imkan verməyib.

Sözügedən aksiyanın altıncı günü tamamlanmaqdadır və hazırda da davam edir./Yeniavaz.com

Ermənistan mediası azərbaycanlı aksiyaçıların Xankəndi yolundan çadırları daşıdığı haqda məlumatlar yayır:
informasiyanın “təsəlli” xarakteri daşıdığı bəllidir, Ruben Vardanyanın “qaz haqda qələbə” çıxışı və “bu gün yol açıla bilər” açıqlamasından sonra belə məlumatların tirajlanması Qarabağdakı erməni əhalinin sakitləşdirilməsinə hesablanıb;
Halbuki, aksiya yerinə daha böyük çadırlar aparılır. Son məlumatlara görə, kiçik çadırlar yağış və qarlı havada iştirakçılar üçün daha səmərəli olan çadırlarla dəyişdirilir.
Yəni Xankəndi müqaviməti daha uzunmüddətli olacaq.
Asif Nərimanlı
Teref.az

Xəbər verdiyimiz kimi, Qarabağdakı separatçı ermənilərin “dövlət naziri” Ruben Vardanyan sosal şəbəkə vasitəsilə bu gün saat 15.00-da Xankəndidə “blokadadan çıxmaq” şüarı ilə ümummilli yürüş keçiruləcəyini elan etmişdi.

Redaktor.az erməni mətbuatına istinadən xəbər verir ki, o. bu fikrindən daşınıb, yürüşü “ləğv edib”.

Separatçıların rəhbəri Arutyunyan isə 100 min ermənini mitinqə toplaşacağını deyirdi.

Lakin məlimdur ki, həmin ərazidə məskunlaşan ermənilərin sayı heç 20 min deyil.

Bir müddət əvvəl separatçı ermənilər oktyabrın 30-da 50 minlik mitinq keçirdiklərini iddia edirdilər, lakin heç 10 min adam yığılmayıb, o da Ermənistandan gətirilənlərin hesabına.

Belə görünür Vardanyan biabır olacağından qorxaraq yürüşü “ləğv edib”.

Azərbaycanın rus “sülhməramlılar”ın müvəqqəti dislokasiya olunduğu ərazilərdə qızıl yataqlarına nəzarəti ələ keçirtmiş Kremlin “təxribat emissarı” Ruben Vardanyanla silahlı erməni separatçı-terrorçular arasında qarşıdurma dərinləşir... Silahlı erməni terrorçuların rəhbərlərindən olan “generallar”dan birinin əldə olunan xalis gəliri onlarla bölüşməkdən imtina edən Ruben Vardanyanı ölümlə hədələdiyi barədə də ciddi iddialar mövcuddur...

Cənubi Qafqazın “erməni problemi” Laçın dəhlizində həll olunur. Rusiyanın bu regionun inkişaf perspektivlərinə vurduğu “münaqişə düyünü” artıq açılmaq üzrədir. Böyük ehtimalla onilliklər boyu sürən “erməni xəyalları”na da, Rusiyanın son “Vardanyan layihəsi”nə də həlledici zərbə vurulmuş olacaq.

Məsələ ondadır ki, Laçın dəhlizində keçirilən aksiya yeni geopolitik mərhələnin başlanmasına münbit şərait yaratdı. Bundan sonra Azərbaycanın Xankəndi və ətraf bölgəsində olan erməni separatçı-terrorçular və orada müvəqqəti dislikasiya olunan rus “sülhməramlılar” əvvəlki kimi davrana bilməyəcəklər. Çünki rəsmi Bakı hətta “yumşaq güc” tətbiq etməklə belə, bu bölgədə bir çox şeyləri dəyişmək potensialını sübuta yetirdi.

Rusiya “sülhməramlı qüvvələr”inin Laçın dəhlizini bağlaması Kremlin məkrli planlarının köhnəlmiş və artıq real təsiri qalmamış faktorlara söykəndiyini göstərdi. Kreml bundan sonra əvvəlki metod və mexanizmlərlə Azərbaycanın Xankəndi və ətraf bölgəsində Rusiyanın geopolitik maraqlarını təmin etmək şanslarını itirmiş olacaq. Yəni, Kreml Rusiyanın regional maraqlarını düşünürsə, deməli, mütləq Azərbaycanın siyasi dairələri ilə anlaşmaq məcburiyyətindədir.

Əks halda, yaxın vaxtlarda Cənubi Qafqazda Rusiyanın maraqları qalmaz. Kreml rus “sülhməramlılar”ın Azərbaycanın Xankəndi və ətraf bölgəsində dislokasiya müddətini sadəcə, gün hesabı ilə saymaq məcburiyyətində qalar. Və rəsmi Bakının Laçın dəhlizində Azərbaycanın dövlət strukturlarına aid nəzarət-buraxılış məntəqələrini yarada biləcəyi artıq qətiyyən şübhə doğurmur.

Maraqlıdır ki, bölgədə vəziyyətin ciddi şəkildə dəyişdiyini, rəsmi Bakının siyasi iradəsinin qarşısıalınmaz olduğunu erməni separatçı-terrorçular da anlamağa başlayıblar. Üstəlik, rəsmi Bakının siyasi iradəsi təzyiqləri artırdıqca, Xankəndidə gizlənmiş erməni separatçı-terrorçuların vəziyyəti daha da ağırlaşır. Və bunun məhz belə olduğu erməni separatçı-terrorçuların atdığı son addımlardan da açıq-aşkar nəzərə çarpır.

Məsələ ondadır ki, Xankəndidə “erməni separatçı rejim” ciddi şəkildə qorxuya düşüb. Rus “sülhməramlılar”ın müvəqqəti dislokasiya olunduğu bölgədə “fövqəladə vəziyyət”in elan edilməsi də məhz həmin qorxunun nəticəsi hesab oluna bilər. Çünki erməni separatçılar əhalinin bölgədə sərbəst hərəkətinə, etiraz aksiyaları keçirtməsinə qadağa qoyublar. Və “separatçı rejim”in müdafiə qabiliyyətinin olmağını qabardan informasiya qurumlarının fəaliyyətini dayandırıblar.

Belə anlaşılır ki, Araik-Vardanyan cütlüyü yaranmış vəziyyətə görə Azərbaycanın erməni vətəndaşlarının onlara qarşı ittihamlar irəli sürəcəyindən, etiraz aksiyaları keçirəcəklərindən narahatdırlar. Rus “sülhməramlılar”ın Laçın dəhlizini qapatmasından sonra Xankəndi və ətraf bölgəyə təbii qazın nəqlini dayandıraraq, bundan Azərbaycana qarşı beynəlxalq propoqanda məqsədilə istifadə etməyə çalışan “separatçı rejim” artıq geri çəkilmək məcburiyyətində qalıb. Yəni, rəsmi Bakını günahlandırmağa çalışsalar da, təbii qazın nəqlini bərpa ediblər və yalan məlumatlar yaydıqlarını dolayısı ilə etiraf etmiş olublar.

Ümumiyyətlə, “separatçı rejim”in təmsilçiləri son günlər bir qayda olaraq, yalnız yalan danışmaq məcburiyyətində qalıblar. Kremlin bölgəyə “təxribat ezamiyyəti”nə göndərdiyi erməni fırıldaqçı Ruben Vardanyan özlərinin bağlayıb, sonra da açdıqları təbii qaz nəqlini belə, şəxsi propoqndası üçün istifadə etməyə çalışır. Belə ki, bu “professional fırıldaqçı” təbii qazın nəqlini öz xidməti kimi təqdim edib və rəsmi Bakının heç bir şərt irəli sürmədiyini iddia edib.

Halbuki, Azərbaycanın bu məsələyə heç bir aidiyyatı yoxdur. Üstəlik, rəsmi Bakı Kremlin “təxribat ezamiyyəti”nə göndərdiyi erməni fırıldaqçı ilə ümumiyyətlə, hər hansı mövzuda danışıqlar aparmaq niyyətində deyil. Və bu baxımdan, R.Vardanyanın yalanlarına Azərbaycanın Xankəndi və ətraf bölgəsində yaşayan ermənilərin uzun müddət inanacağı qətiyyən real görünmür.

Digər tərəfdən, R.Vardanyan onu da iddia edib ki, guya rəsmi Bakı Laçın dəhlizini heç bir şərt qoymadan yaxın saatlarda açmağı vəd edib. Bunun erməni fırıldaqçının növbəti yalanı olduğu isə qətiyyən şübhə doğurmur. Çünki Laçın dəhlizi Azərbaycan tərəfindən bağlanmayıb. Bu marşrut məhz R.Vardanyanı idarə edən Rusiyanın “sülhməramlı” qüvvələri tərəfindən qapadılıb. Azərbaycan fəallarının etiraz aksiyasının müddəti isə uzadılıb.

Əslində, bu erməni fırıldaqçının yalanlarına qarşı etirazların başlandığı da müşahidə olunmağa başlayıb. Belə ki, bəzi erməni teleqram kanallarında R.Vardanyanı təkzib edən və ona qarşı ittihamlar olan məlumatlar atmaqda olduğu müşahidə edilir. Ermənilər R.Vardanyanı bu qarışıqlıqdan yalnız öz məqsədləri və təbliğatı üçün istifadə etməkdə suçlayırlar.

Maraqlıdır ki, bəzi erməni mətbuat qurumları Azərbaycanın Xankəndi və ətraf bölgəsində olar “separatçı rejim”in təmsilçiləri və R.Vardanyan arasında müəyyən problemlərin olduğunu bildirirlər. Əslində, R.Vardanyanın “separatçı rejim”in bəzi təmsilçilərini Azərbaycanın siyasi dairələri ilə gizli təmaslar qurmağa cəhd göstərməkdə suçlaması da həmin məlumatları təsdiqləyir. Halbuki, iddialara görə, R.Vardanyanın suçladığı “separatçı rejim”in təmsilçiləri ilə bu erməni fırıldaqçı arasında “qızıl savaşı” da başlayıb.

Hesab olunur ki, R.Vardanyan Xankəndi və ətraf bölkədəki qızıl yataqlarının qanunsuz istismarına nəzarəti tam şəkildə ələ keçirib. O, əldə olunan gəlirin “separatçı rejim”in digər təmsilçiləri ilə bölüşdürülməsindən imtina edir. R.Vardanyan qazancın rus “sülhməramlılar”ın komandanı, general-mayor Andrey Volkovla bölüşdürülməsini tamamilə yetərli hesab edir. Ona görə də, silahlı erməni terrorçuların rəhbərlərindən olan “generallar”dan birinin R.Vardanyanı ölümlə hədələdiyi barədə də iddialar mövcuddur.

Belə anlaşılır ki, R.Vardanyanın davranışları rus “sülhməramlılar”ın müvəqqəti dislokasiya olunduğu bölgədə gərginliyi ciddi şəkildə artırıb. İndi bölgədə “sərvət savaşı”na başlamış erməni separatçılar arasında kəskin qarşıdurmaların ola biləcəyi də qətiyyən istisna deyil. Buna paralel olaraq, Xankəndi və ətraf bölgədə erməni sakinlərin Araik-Vardsanyan cütlüyündən narazılığının artmaqda olduğu da inkaredilməz reallıqdır.

Elçin XALİDBƏYLİ,

Siyasi ekspert,

“Yeni Müsavat” Media Qrupu

Şuşa-Xankəndi yolunda növbəti dəfə Rusiya sülhməramlılarına məxsus təminat avtomobillərinin hərəkət etməsinə şərait yaradılıb. “Report”un aksiya keçirilən ərazidə olan əməkdaşı xəbər verir ki, nəqliyyat vasitələri maneəsiz şəkildə yolla hərəkətinə davam edib.

Bu, bir daha onu sübut edir ki, yol aksiyanın keçirilməsinə baxmayaraq, humanitar məqsədlər üçün açıqdır.

Belə ki, aksiya iştirakçıları növbəti dəfə də bu mövqeni nümayiş etdirərək sülhməramlılara məxsus təminat avtomobilinin sərbəst şəkildə hərəkət etməsinə şərait yaradıblar.

Xatırladaq ki, Qarabağda faydalı qazıntı yataqlarının qanunsuz istismarı əleyhinə Şuşa-Xankəndi yolunda keçirilən etiraz aksiyası artıq dörd gündür davam edir.

Şuşa ərazisində Rusiya sülhməramlılarının nəzarətində olan yolun bir hissəsində etiraz aksiyası azərbaycanlı aktivistlər və ekologiya üzrə qeyri-hökumət təşkilatlarının (QHT) üzvləri tərəfindən Qarabağ iqtisadi rayonunda ekoloji terrora son qoyulması tələbi ilə keçirilir.

2022-ci il dekabrın 3-də və 7-də Rusiya sülhməramlı kontingentinin komandanlığı ilə aparılmış müzakirələrin nəticəsi olaraq İqtisadiyyat Nazirliyi, Ekologiya və Təbii Sərvətlər Nazirliyi, İqtisadiyyat Nazirliyi yanında Əmlak Məsələləri Dövlət Xidməti və “AzerGold” Qapalı Səhmdar Cəmiyyətinin mütəxəssislərindən ibarət heyət Rusiya sülhməramlı kontingentinin müvəqqəti yerləşdiyi Azərbaycan ərazilərində faydalı qazıntı yataqlarının qanunsuz istismarı, bundan irəli gələn ekoloji və digər fəsadlarla bağlı ilkin monitorinq aparmalı idi. Lakin sülhməramlıların hərəkətsizliyi ucbatından monitorinq baş tutmayıb.