Azərnaycanın Qarabağ iqtisadi rayonunda müvəqqəti yerləşdirilən Rusiya sülhməramlı kontingentinin bölmələri tərəfindən qeyri-qanuni erməni silahlı dəstələrinə məxsus təminat maşınlarının müşayiət edilməsi növbəti dəfə müşahidə olunub.

Bu barədə Müdafiə Nazirliyindən bildirilib.

Xankəndi-Xəlfəli-Turşsu torpaq yolu istiqamətində Rusiya sülhməramlı kontingentinə məxsus 1 ədəd ZTR-82A döyüş maşını, ermənilərə məxsus 3 ədəd tentli URAL və üzərində yanacaq çəni olan KamAZ avtomobilinin, ümumilikdə beş hərbi nəqliyyat vasitəsinin kolonda hərəkəti texniki müşahidə vasitələrimiz tərəfindən qeydə alınıb.

Bir daha bildiririk ki, Rusiya sülhməramlı kontingentinin müşayiəti ilə hərbi daşımaların həyata keçirilməsi üçtərəfli Bəyanatın müddəalarının kobud şəkildə pozulmasıdır və bu qəbuledilməzdir.

Mütəmadi baş verən bu kimi qeyri-qanuni fəaliyyətlər Laçın yolunun Azərbaycan-Ermənistan sərhədinin son nöqtəsində Azərbaycanın sərhəd-keçid və nəzarət məntəqəsinin qurulmasını labüd edir.

Baku TV-də yayımlanan “Qarabağ xronikası” verilişinin yeni buraxılışı efirə gedib.

Verilişin aparıcısı, hərbi müxbir Fərdin İsazadə bildirib ki, son günlər Azərbaycanın Qarabağ iqtisadi rayonunda erməni azlığının yaşadığı ərazilərdə ciddi proseslər müşahidə olunur.

“Müşahidələrimiz onu göstərir ki, Qarabağda qalmaqda olan qeyri-qanuni silahlı dəstələrin mövqeləri hərbi meyarlara uyğun gücləndirilir”, - deyə F.İsazadə qeyd edib.
Ətraflı verilişi təqdim edirik:

Ermənistanın Baş naziri Nikol Paşinyan martın 14-də İrəvanda keçirdiyi mətbuat konfransında deyib ki, sülh sazişiylə bağlı Bakıya göndərdikləri təkliflərə cavab alıblar.

Paşinyan Bakının cavabında sülh sazişinin imzalanması üçün irəliləyiş olduğunu desə də əlavəsini unutmayıb: “Daha çox irəlilədikcə fundamental problemlərin sayı artır”.

Nikol Paşinyan “fundamental problemlər” dedikdə nələri nəzərdə tutub?

Birincisi, Paşinyan Bakıdan aldığı cavabdan bu qənaətə gəlib ki, Azərbaycan sülh sazişi vasitəsilə Ermənistana qarşı ərazi iddialarını reallaşdırmaq istəyir. Yəqin Paşinyan Azərbaycanın Qərbi Zəngəzurun məşkunlaşdırılmasıyla bağlı siyasətini nəzərə tutub. O bunu Ermənistana qarşı ərazi iddiası kimi qəbul edir. Halbuki, söhbət ərazi iddiasından deyil, azərbaycanlıların qovulduqları yerlərə qayıtmaq hüququndan gedir. Qarabağda ermənilər yaşayacaqlarsa, Qərbi Zəngəzurda da azərbaycanlıların yaşaması təmin olunmalıdır. Paşinyan bu ədalətli modelin əleyhinədr.

İkincisi, Nikol Paşinyan hesab edir ki, Azərbaycan Ermənistanla sülh sazişi vasitəsilə “dağlıq Qarabağda etnik təmizləmə mandatı” əldə etmək istəyir. Yəni Paşinyan demək istəyir ki, Ermənistan Azərbaycanın ərazi bütövlüyünü tanıyarsa, Qarabağda ermənilərin kütləvi köçü həyata keçiriləcək və bu halda İrəvan buna mane ola bilməyəcək. Paşinyan bu zaman “genosid” ifadəsini işlədib. Realıqda Qarabağ ermənilərinin Azərbaycan qanunlarına tabe olması şərti mövcuddur.
Ətraflı

Üçüncüsü, Nikol Paşinyan Azərbaycanla sülh sazişi imzalayacağı halda bunun yerinə yetiriləcəyinə dair təminat tələb edib, bunsuz sənədin işlək olmayacağını bildirib və misal olaraq Azərbaycanın 2020-ci ilin 10 noyabr bəyanatına əks olaraq yolun “bağlandığını” göstərib. Paşinyan sülh sazişinə beynəlxalq təminat istəyir. Belə bir təminat Azərbaycanın maraqlarına zidd deyil, sadəcə Ermənistanla sülh sazişi 2020-ci il 10 noyabr üçtərəfli bəyanatından fərqli olacaq.

Dördüncüsü, Nikol Paşinyan Dağlıq Qarabağ ermənilərinin hüquq və təhlükəsizliklərinin İrəvan üçün ilkin əhəmiyyət daşıdığını vurğulayıb. Belə çıxır ki, Paşinyan sənəddə Qarabağla bağlı müddəanın əks olunması fikrindən imtina etməyib. Bu Azərbaycanın maraqlarına ziddir.

Beləliklə, İkinci Qarabağ müharibəsi Nikol Paşinyana dərs olmayıb. Paşinyan sülh sazişini imzalamağa hazır deyil, vaxtı uzatmağa çalışır. Ancaq Ermənistanın baş naziri vaxtı uzadarkən bölgədə müharibə risqinin artdığını da etiraf edib.

“Atlas” Araşdırmalar Mərkəzi

“2021-2025-ci illər üçün BMT və Azərbaycan arasında Dayanıqlı İnkişaf üzrə Əməkdaşlığa dair Çərçivə Sənədi”nin icrası ilə bağlı Hökumət-BMT Birgə İstiqamətləndirici Komitənin iclası keçirilib.

AZƏRTAC xəbər verir ki, tədbirdə Çərçivə Sənədinin 2023-cü il üzrə icrası üçün Birgə İş Planları müzakirə edilərək təsdiqlənib və maliyyə ili üçün büdcə prosesi və strateji istiqamətlər müəyyən olunub.

İclasda çıxış edən iqtisadiyyat nazirinin müavini Sahib Məmmədov Azərbaycanın BMT-nin müxtəlif ixtisaslaşmış qurumları ilə səmərəli əməkdaşlıq etdiyini və sayca 5-ci olan Çərçivə Sənədinin icrası nəticəsində BMT-Azərbaycan əlaqələrinin tərəfdaşlıq mərhələsinə yüksəldiyini vurğulayıb. Qeyd edilib ki, Azərbaycan BMT-nin “Dayanıqlı İnkişaf üzrə 2030-cu il” Gündəliyinə qoşulduqdan sonra ölkədə qəbul olunan 40-dan çox dövlət proqramı, strategiya və fəaliyyət planı Dayanıqlı İnkişaf Məqsədlərinə (DİM) inteqrasiya edilib və hazırda da layihələrin uyğunlaşdırılması prosesi davam etdirilir.

BMT-nin ölkə üzrə rezident əlaqələndiricisi Vladanka Andreyeva ölkəmizlə bir sıra sahələr üzrə səmərəli əməkdaşlığı diqqətə çatdırıb, qurumun işğaldan azad olunmuş ərazilərimizin bərpasında, xüsusilə minatəmizləmə fəaliyyətində Azərbaycan Hökumətinə dəstəyinin davam edəcəyini qeyd edib, ölkəmizin DİM-lərin həyata keçirilməsinə bundan sonra da töhfə verəcəyinə əminliyini vurğulayıb.

Tədbir çərçivəsində sənədin icrası üzrə 5 istiqamətdə Nəticə qruplarının həmsədrləri tərəfindən 2022-ci ilin yekunları və 2023-cü ilin prioritet istiqamətlər üzrə təqdimatlar edilib.

Qeyd edək ki, Azərbaycan Respublikası Hökuməti ilə BMT arasında imzalanmış Çərçivə Sənədi Təşkilatın ölkəmizdə fəaliyyətinin planlaşdırılmasında və icrasında mühüm alət olmaqla, 2021-2025-ci illər üçün Azərbaycan Hökuməti və BMT-nin Ölkə üzrə İdarə Heyəti arasında əməkdaşlığa dair strateji istiqamətləri müəyyən edir. Çərçivə Sənədinin icrası üzrə Hökumət və BMT-nin ixtisaslaşmış qurumlarının ölkəmizdə fəaliyyət göstərən nümayəndələrindən ibarət Hökumət-BMT Birgə İstiqamətləndirici Komitə və Sənədin prioritet sahələri üzrə 5 istiqamətdə nəticə qrupları formalaşdırılıb.

Özünü Qarabağdakı qondarma qurumun “rəhbəri” adlandıran Araik Arutyunyanın “istefa verəcəyi” ilə bağlı iddialar səngimir.

Onun “Qarabağ klanı” və Ermənistanın Baş naziri Nikol Paşinyanla da arasında ciddi problemlərin olduğuna dair xeyli xəbərlər yayılıb.

Bütün bu qarşıdurmaların fonunda Araikin qondarma “vəzifə”sindən gedəcəyi gözlənilir.

Hətta özünü Araikin “mətbuat katibi” adlandıran Lusina Avanesyan da bu ehtimalı istisna etməyib:

“Araik Arutyunyanın hazırda öz vəzifələrini yerinə yetirməyə davam edir. Xüsusilə də bu dövrdə istənilən daxili təlatümlər bizim üçün dağıdıcı ola bilər və o, belə halları istisna edəcək. Araik Arutyunyan bir neçə dəfə istefa mövzusu ilə bağlı ictimaiyyətə müraciət edib və dedikləri hələ də qüvvədə qalır. O, hakimiyyətin normal dəyişməsini təmin etməyin mümkün olduğu ilk fürsətdə istefa verəcək. Arutyunyan belə çətin şəraitdə öz məsuliyyətindən yayınmaq niyyətində deyil”.

Xatırladaq ki, Azərbaycanın təzyiqləri nəticəsində separatçı rejimin “dövlət naziri” Ruben Vardanyan “vəzifə”sindən azad edildi. Görünür indi də sıra Araik Arutyunyana çatıb və proseslər onun da “istefaya” getməsinə səbəb olacaq.

TEREF.AZ-ın məlumatına görə, sabiq diplomat, politoloq Fikrət Sadıqov Cebhe.info-ya açıqlamasında bildirib ki, Araikin “istefası” məhz Azərbaycanın təzyiqinin nəticəsi olacaq:

“Ruben Vardanyanın ardından Araik Arutyunyanı da yola salacağıq. Buna şübhə etmirəm, artıq Araik dalana dirənib. Başa düşür ki, ya Azərbaycanın tərkibində yaşamalıdırlar, ya da regionu tərk etməlidirlər. Çünki Azərbaycanın ərazi bütövlüyünü dünya birliyi və beynəlxalq təşkilatlar tanıyır. Həmçinin, Nikol Paşinyan özü də onlara dəstək verməkdən yorulub”.

Politoloq vurğulayıb ki, rəsmi İrəvan da bütün səylərinin boşa çıxdığını başa düşür:

“Ermənistanın əsas məqsədi Azərbaycanla münasibətləri yaxşılaşdırmaq və normal bir vəziyyətə salmaqdır. Təbii ki, Araik Arutyunyan rəsmi İrəvan üçün bu yolda bir maneədir. Düşünürəm ki, təzyiqi artırmalıyıq ki, Araik kimi ünsürlər Qarabağı tərk etsin və Azərbaycan Qarabağda yaşayan əhali nümayəndələri ilə danışıqları davam etdirsin”.

Erməni separatçıları Xankəndi-Xəlfəli-Turşsu torpaq yolundan Ermənistandan rus sülhməramlılarının müvəqqəti nəzarət etdiyi Azərbaycan ərazilərinə qeyri-qanuni olaraq hərbi ləvazimatlar daşıyırlar.

"Caliber" tərəfindən yayınlanan videolarda Ermənistanın qanunsuz silahlı birləşmələrinin hərbi nəqliyyatı Rusiya sülhməramlı kontingentinin müşayiəti ilə hərəkət etdiyi əks olunub.

Konvoyun əvvəlində Rusiya sülhməramlı kontigentinin 2 "UAZ Patriot" maşını, onun ardınca qanunsuz erməni silahlı birləşmələrinə məxsus brezent "Ural" və su çəni olan "KamAZ", karvanın sonunda isə "BTR-82A" hərəkət edir. Həm 2 "UAZ", həm də "BTR"-in üzərində rus bayrağı qaldırılıb.

Konvoy qanunsuz erməni silahlı birləşmələrinin postlarını ərzaq, su və silah-sursatla təmin etmək üçün hərəkət edir.

Maraqlıdır, Azərbaycanın hərbi rəhbərliyi yaxın zamanda güc yolu ilə bu torpaq yolunu nəzarətə götürə bilər?

TEREF.AZ-ın məlumatına görə, bununla bağlı Cebhe.info-ya açıqlama verən hərbi ekspert Ədalət Verdiyev bildirib ki, Xankəndi-Xəlfəli-Turşsu yolu dövlətin diqqətindən kənarda qalmır:

“Xatırladım ki, Xankəndi-Xəlfəli-Turşsu yolu barədə məlumatları ilk dəfə 2021-ci ilin sentyabrında şəxsi "Facebook" hesabımda paylaşmışdım. Hətta həmin yolun şəklini də çəkmişdim. Belə ki, həmin yol ermənilər üçün o qədər də prioritet deyildi.

Yəni, Laçın şəhərindən keçən yol açıq olduğu üçün ermənilər bu yol vasitəsi ilə istədiyini gətirirdilər, istədiyini aparırdılar. Torpaq yolun aktuallığı Şuşa-Xankəndi yolunda aksiya başladıqdan sonra gündəmə gəldi.

Əvvəllər də qanunsuz erməni silahlı birləşmələrinin mövqeləri həmin yol üzərində yerləşdiyi üçün təzcihat da o yoldan gətirilirdi. Şəxsən Şuşadan Xankəndi-Xəlfəli yoluna müşahidə eləmişəm.Yayda bir saat ərzində təxminən 3-4 maşın bu yoldan keçirdi.

Azərbaycan tərəfi bu yolda qeyri-qanuni daşınmaların qarşısını almaq üçün Ermənistanla sərhədin Laçın giriş hissəsində nəzarət-keçid məntəqəsi qurmalıdır. Hesab edirəm ki, tez bir zamanda bu istiqamətdə addım atılacaq".

Ekspertin fikrincə, Azərbaycan Ordusu yaxın günlərdə qeyri-qanuni erməni silahlı dəstələrinin zərərsizləşdiriməsi üçün hər hansı əməliyyatlar keçirə bilər:

“Həm Müdafiə Nazirliyi, həm də Xarici İşlər Nazirliyi, eləcə də bir sıra hərbi ekspertlərin açıqlamalarına görə, Azərbaycan Silahlı Qüvvələrinin ərazilərimizi erməni silahlılarından təmizlənməsi üçün antiterror, çəkindirici əməliyyatlar həyata keçirməsi qaçılmazdır. Hesab edirəm ki, bu, mütləq baş verəcək.

Erməni separatçılarının ruslarla bizə qarşı birgə fəaliyyəti, rus sülhməramlılarının müşayiəti ilə qeyri-qanuni erməni silahlı birləşmələrinin silah-sursatla təmin olunması və erməni silahlılarının rotasiyası Azərbaycanın təhlükəsizliyinə birmənalı olaraq ziddir. Belə addımların qarşısını almaq güc strukturlarımızın müqəddəs borcudur. Onların bu borcu məharətlə yerinə yetirəcəyinə əminəm”.