 |
|
|
Ordumuz dünya ordularının reytinq siyahısında irəlidə
Dünya ölkələrinin hərbi gücünü əks etdirən “Global Firepower” reytinqi yenilənib. Reytinqdə hərbi hissələrin sayından və maliyyə vəziyyətindən tutmuş maddi-texniki imkanlara və coğrafiyaya kimi kateqoriyalar üzrə hər bir ölkə üçün 60-dan çox amil nəzərə alınıb.
2025-ci ildə ilk beşliyə ABŞ, Rusiya, Çin, Hindistan və Cənubi Koreya daxil olub.
Azərbaycan siyahıda 60-cı yeri tutub. Ermənistan 91-ci, Gürcüstan 94-cü yerdədir. Türkiyə reytinqdə 9-cu yeri tutub, İran isə 16-cı yerdədir.
Türk dünyası ölkələrindən Qazaxıstan 57-ci, Özbəkistan 58-ci, Türkmənistan 77-ci, Qırğızıstan 105-ci yerdədir.
Rövşən Məhərrəmov
Hərbi ekspert, polkovnik Rövşən Məhərrəmov “Yeni Müsavat”a bildirdi ki, 145 ölkənin sırasında Azərbaycan Ordusunun 60-cı yerə sahiblənməsi çox yaxşı nəticədir. Əsas məsələ budur ki, Azərbaycan Ordusu gün-gündən güclənir. Bunu müxtəlif digər reytinq hesabatları da təsdiqləyir: “2020-ci ildəki 44 günlük müharibədə Azərbaycan Ordusunun nümayiş etdirdiyi döyüş qabiliyyəti ordumuzu 20-ci əsrin müasir orduları sırasına yüksəltdi. Dünyanın bir sıra hərbi məktəblərində Azərbaycan Ordusunun 44 günlük müharibədəki taktikası, əməliyyatları öyrədilir, nümunə kimi göstərilir. Azərbaycan Ordusunun Türkiyə ordusu modelinə keçidi müharibədən sonra daha da sürətləndirildi. Diqqət edirsinizsə, açıqlanan reytinq siyahısında Türkiyə ordusu dünya üzrə 9-cu yerdədir. Bu, çox böyük nəticədir. Deməli, Azərbaycan Ordusu dünyanın ən güclü 9-cu ordusu modelinə keçir. Azərbaycan Ordusunda komando briqadaları yaradılıb və onların sayı artırılmaqda davam edir. İşğaldan azad edilmiş ərazilərimizdə yeni hərbi hissələr qurulub. Bütün bu və digər addımlar nəticəsində hərbi hissələrimizin sayında və keyfiyyətində yüksəliş olub. Reytinqin yüksəlməsində bu amillər də öz sözünü deyir.
Azərbaycan Prezidenti, Ali Baş Komandan İlham Əliyev yeni il təbrikində də bəyan etdi ki, biz öz hərbi qüdrətimizi artırırıq və artıracağıq, müdafiə büdcəsi bu il daha da artırılıb. Azərbaycan Ordusu dünya miqyasında güclü ordular sırasındadır və beynəlxalq reytinqlər də, həyat da bunu göstərir, bizim hərbi uğurlarımız da buna dəlalət edir. Bu gün Azərbaycan Ordusu ən müasir silahlarla, texnika ilə təchiz edilib, bu proses davam etdirilir. Biz bundan sonra da ən müasir hərbi texnikaları alacağıq, yeni kontraktlar imzalanır. Əvvəlki illərdə imzalanmış kontraktlar əsasında ən müasir silahlar ölkəmizə gətirilir, onların bir hissəsi hərbi paradlarda göstərilib, bir hissəsi göstərilməyib.
Ali Baş Komandan İlham Əliyev dəfələrlə vurğulayıb ki, düşmənin elə bir hərbi və ya strateji obyekti yoxdur ki, Azərbaycan Ordusu onu məhv edə bilməsin.
Prezident İlham Əliyevin diqqəti, qayğısı və rəhbərliyi ilə son illər həyata keçirilən kompleks islahatlar nəticəsində Azərbaycan Ordusu Cənubi Qafqazın ən güclü ordusuna çevrilib".
Ekspert qeyd etdi ki, Prezident İlham Əliyevin ordu quruculuğundakı digər mühüm prinsipial siyasəti ölkənin hərbi sənayesinin yaradılması ilə bağlıdır. Azərbaycanın müdafiə sənayesi inkişaf edir, bir çox silahları, mərmiləri özümüz istehsal edirik. PUA-lar istehsal edirik. Biz başqa ölkələrin ordularına da silah-sursat satırıq: “Məhz bu amili vaxtında dəyərləndirən Prezident İlham Əliyev müharibə vəziyyətində yaşayan respublikamızın Silahlı Qüvvələrinin maddi-texniki bazasını milli məhsullar hesabına daha da gücləndirmək məqsədilə 2005-ci ildə Müdafiə Sənayesi Nazirliyini yaratdı. Həmin dövrdən başlayaraq nazirliyin müəssisələrində silah, sursat və hərbi vasitələrin istehsalının genişləndirilməsi və keyfiyyətinin daha da yaxşılaşdırılması istiqamətində məqsədyönlü tədbirlər həyata keçirilir. Bu illər ərzində nazirliyin müəssisələrində ümumi məhsul istehsalının və müdafiə təyinatlı məmulatların həcmi çox ciddi şəkildə artıb. Ən mühüm amil isə odur ki, Azərbaycan dövləti artıq istehsal etdiyi silahları xaricə ixrac edir. Artıq 10-dan çox ölkə Azərbaycan Respublikası Müdafiə Sənayesi Nazirliyinin istehsal etdiyi məhsulları öz silahlı qüvvələrində istifadə etmək, hərbi güclərini artırmaq üçün alır.
Müdafiə sənayemizin davamlı olaraq böyüməsi ilə ölkəmiz xarici ölkələrin silah-sursat asılılığından azad olur. Bu, ölkə üçün çox önəmli amildir. Azərbaycan MDB məkanında dörd ölkədən biridir ki, onun müasir tələblərə cavab verən müdafiə sənayesi mövcuddur. Eyni zamanda qürurverici haldır ki, bu gün ölkəmiz ən müasir silahların ixracatçısıdır. Prezident İlham Əliyev iclasların birində bu barədə deyib ki, bu gün biz hərbi texnikanın istehsalı işində uğurla inkişaf edirik. Azərbaycanda mindən çox adda hərbi təyinatlı məhsul istehsal olunur. Hərbi texnikanın, sursatların istehsalı ilə bağlı bizim yeni planlarımız var və biz onları da həyata keçirəcəyik. Bir sözlə, bu gün ölkəmizin hərbi potensialı ən yüksək səviyyədədir. Ordumuzun döyüş qabiliyyəti də yüksək səviyyədədir. Bizim ordumuz bunu döyüş meydanında da göstərib və nümayiş etdirib".
Polkovnik sonda vurğuladı ki, şübhəsiz, yaxın gələcəkdə Azərbaycan Ordusu reytinq siyahısında daha da irəliləyəcək.
Etibar SEYİDAĞA,
“Yeni Müsavat”
Almaniya yanvar ayının sonuna qədər Ukrayna sərhədinə yaxın yerləşən Jeşuv şəhərində "Patriot" zenit-raket komplekslərini yerləşdirəcək.
Bu barədə Almaniyanın müdafiə naziri Boris Pistorius Kiyevə səfəri zamanı "Strana.ua" nəşrinə bildirib.
“Yanvar ayında şəxsən Jeşuva gedəcəyəm ki, həmin ay orada "Patriot" müdafiə sistemlərinin işə başladığını təmin edim”,– deyə almaniyalı nazir qeyd edib.
Pistorius vurğulayıb ki, Jeşuv Kiyevə yardım göstərilməsi üçün mühüm logistik mərkəz rolunu oynayır.
Ukrayna ilə döyüşlərdə öldürülən Şimali koreyalı gənc bir əsgərin son qeydləri, cəbhədəki əsgərlər üçün tətbiq edilən dəhşətli taktikaları ortaya çıxarıb.
Qaynarinfo xəbər verir ki, Cənubi Koreya kəşfiyyatı Şimali Koreya rəhbərliyinin əsgərlərə Ukrayna ordusu tərəfindən əsir düşməmək üçün özlərini öldürmələri əmri verdiyini iddia edir.
Kursk bölgəsində yaralı əsirlər
Ukrayna ötən həftə Rusiyanın Kursk bölgəsində döyüşən iki Şimali koreyalı əsgəri yaralı vəziyyətdə ələ keçirdiyini açıqlayıb. Ukrayna prezidenti Volodimir Zelenski sosial media hesabında bu əsgərlərin görüntülərini paylaşarkən, beynəlxalq xəbər agentlikləri əsgərlərin üzərində aşkar edilən 2005 və 1999 təvəllüdlü şəxslərə məxsus rus pasportlarının fotolarını yayımlayıb.
"Təlimə getdiyimi düşünürdüm"
Ukrayna Təhlükəsizlik Xidməti yaralı əsgərlərin həyati təhlükəsinin olmadığını və onların Ukrayna, ingilis və ya rus dillərində danışmadığını bildirib. Buna görə də, ifadələr Cənubi Koreyanın kəşfiyyat xidməti ilə əməkdaşlıq əsasında alınıb. Əsgərlərdən biri ifadəsində Ukrayna ilə müharibəyə deyil, Rusiyaya təlim üçün göndərildiyini düşündüyünü bildirib.
Öldürülən əsgərin gündəliyi yayımlandı
Ukrayna Silahlı Qüvvələri cəbhədə həyatını itirən Şimali Koreyalı bir əsgərin qeydlərini yayımlayıb. Adı açıqlanmayan əsgərin gündəliyində Kim Çen Ina olan sevgi, vətəninə qayıtmaq istəyi və cəbhədə istifadə edilən bir döyüş taktikası diqqət çəkib.
"Yem" taktikasının dəhşətli detalları
Gündəliyin bir səhifəsində kobud şəkildə çəkilmiş bir diaqramda, bir əsgərin pilotsuz uçuş aparatını cəlb etmək üçün sığınacaqdan çıxdığı, digər iki əsgərin isə pusuya yataraq dronu vurmaq üçün hazır vəziyyətdə olduğu görünür. "The Wall Street Journal" qəzetinin tərcümə etdiyi yazıda əsgər qeyd edir: "Yem hərəkətsiz qalanda dron dayanacaq və vurulacaq".
Qeydlərin davamında "yem" olaraq istifadə edilən əsgərin pilotsuz uçuş aparatından yeddi metr məsafədə dayanmasının lazım olduğu və bu məsafədən dronun dəqiq atəşlə vurulacağı ətraflı izah edilib.
Hərbi müşahidəçilər və ukraynalı komandirlər bildirir ki, Şimali loreyalı əsgərlər müasir döyüş təcrübəsinə malik deyillər və Ruslar tərəfindən "yem" kimi istifadə olunurlar. "Telegraph" qəzetinin məlumatına görə, Rusiya, Ukrayna müdafiəsini sınaqdan keçirmək üçün zirehli texnika və artilleriya dəstəyi olmadan böyük qrupları önə göndərir, ardınca isə xüsusi təyinatlı daha kiçik qruplar döyüş bölgəsinə daxil olur.
"Özünüzü öldürün" əmri
Cənubi Koreya Kəşfiyyat Xidmətinin (NIS) açıqlamasına görə, Şimali Koreya rəhbərliyi əsgərlərə əsir düşməmək üçün intihar etmə əmri verib. Zelenski son bir ay ərzində təxminən 4 min Şimali koreyalı əsgərin öldüyünü və ya yaralandığını iddia edir. ABŞ rəsmiləri isə dekabrın son həftəsində 1,000-dən çox Pxenyan əsgərinin həyatını itirdiyini bildirir. Cənubi Koreyanın məlumatına görə, ən azı 300 Şimali koreyalı əsgər öldürülüb, təxminən 2,700-ü isə yaralanıb.
Cənubi Koreya kəşfiyyatının açıqlamasına görə, Şimali Koreyalı əsgərlər müasir döyüş təcrübəsi və texnologiyası ilə bağlı biliklərə malik deyillər. Onlar yararsız döyüş əməliyyatlarında iştirak edərək həyatlarını itirirlər.
Almaniyanın Bavariyadakı hərbi aerodromu üzərində mənşəyi məlum olmayan təxminən 10 dron müşahidə edilib.
Bu barədə "Die Presse" məlumat yayıb.
Nəşrin məlumatına görə, istintaq hadisəni Ukraynadakı vəziyyətlə bağlı casusluq fəaliyyəti ehtimalı ilə əlaqələndirib. Hazırda bu işlə bağlı mümkün şübhəlilər haqqında məlumat verə biləcək şahidlər axtarılır. Araşdırmalar Münhen Baş Prokurorluğu və Bavariya Cinayət Polisi tərəfindən aparılır.
8 yanvarda "Bild" qəzeti Almaniya hakimiyyət orqanlarının təhlükəsizlik sisteminə aid obyektlər üzərində dronlar vasitəsilə casusluqla bağlı şikayətlərin artdığını qeyd etmişdi.
Almaniya Ukraynaya ilk “RCH 155” tipli özüyeriyən artilleriya qurğusunu təhvil verib.
“Report” xəbər verir ki, “Welt” telekanalının yayımladığı mərasim bu döyüş sistemlərini istehsal edən KNDS müdafiə konserninin yerləşdiyi Kasseldə keçirilib.
“Bu, Ukraynanın bizə arxalana biləcəyinə işarədir”, - Almaniyanın müdafiə naziri Boris Pistorius bildirib.
Ümumilikdə Almaniya hökuməti Ukraynaya 54 belə özüyeriyən artilleriya qurğusunu təhvil verməyi planlaşdırır. İlk altı qurğu hələlik Almaniyada qalacaq, Ukrayna hərbçiləri onlarda təlim keçəcəklər.
Ukrayna Prezidenti Vladimir Zelenski, döyüş meydanında əsir götürülən Şimali Koreya əsgərlərinin Rusiyanın müharibəyə olan asılılığını ortaya qoyduğunu bildirib.
Musavat.com xəbər verir ki, Zelenski öz Telegram hesabında paylaşdığı mesajda əsir götürülən əsgərlərin ifadələrinin dünya ictimaiyyətinə təqdim ediləcəyini vurğulayıb və onların vəziyyəti ilə bağlı bir sıra təkliflər irəli sürüb.
Prezidentin paylaşımında qeyd olunur:
“İlk Şimali Koreya əsgərləri artıq əsir götürülüb və şübhəsiz ki, digərləri də olacaq. Bu, yalnız zaman məsələsidir. Heç kimdə şübhə qalmamalıdır ki, Rusiya ordusu Şimali Koreyanın hərbi yardımından asılıdır. Putin üç il əvvəl NATO-ya ultimatumlarla başladı və tarixi yenidən yazmağa çalışdı. İndi isə Pxenyanın hərbi dəstəyi olmadan davam edə bilmir.”
Zelenski Şimali Koreya lideri Kim Çen Ina müraciət edərək bildirib ki, Ukrayna əsir götürülən Şimali Koreya hərbçilərini onların müqabilində Rusiya tərəfindən əsir götürülmüş ukraynalı əsgərlərlə dəyişməyə hazırdır:
“Ukrayna Kim Çen Ina onun əsgərlərini geri qaytarmağa hazırdır, əgər o, onların Ukrayna hərbçiləri ilə dəyişdirilməsini təşkil edə bilsə”.
Zelenski həmçinin əlavə edib ki, geri dönmək istəməyən Şimali Koreya əsgərləri üçün alternativ yollar təqdim edilə bilər:
“Bu əsgərlərdən müharibə haqqında həqiqətləri Koreya dilində yaymaq istəyənlər üçün imkanlar yaradılacaq. Bu, sülhə yaxınlaşmaq üçün bir yol ola bilər.”
Rusiya-Şimali Koreya əməkdaşlığı ifşa olunur
Zelenski, Rusiya ordusunun Şimali Koreyadan hərbi asılılığını dünyaya bir daha sübut etmək üçün bu hadisələrin əhəmiyyətini vurğulayıb. O, Putin rejiminin beynəlxalq səviyyədə zəifləmiş mövqeyini bu əməkdaşlıq vasitəsilə daha da açıq şəkildə nümayiş etdirməyə çağırıb.
Sensasiya: “Müharibədən xəbərimiz yox idi”
Əsir götürülən Şimali Koreya əsgərlərinin ifadələrinə görə, onlar müharibə haqqında məlumatlandırılmadan göndərilib. Əsgərlərdən biri deyib:
“Bizə müharibə haqqında heç nə demədilər. Burada nə üçün olduğumuzu bilmirik.”
Ukraynanın bu açıqlamaları, Rusiya ilə Şimali Koreya arasındakı gizli hərbi əməkdaşlığın ifşası üçün mühüm addım hesab olunur. Eyni zamanda, Zelenskinin əsirlərə dair humanist yanaşması, beynəlxalq ictimaiyyətə Ukraynanın hüquqların müdafiəsi və sülh istiqamətində səylərini göstərmək məqsədini güdür.
Mənbə: Zelenski Official/Telegram.
Musavat.com
Mənbə: Turan
İran yüksək dağlıq ərazidə yerləşən Gilan əyalətində 800 km mənzilli yeni üfüqüstü radar quraşdırıb. O, ölkənin şimal hava məhakının monitorinqi üçün nəzərdə tutulub və İran HHM sisteminə inteqrasiya olunub, xəbəri İranın ISW nəşri yayıb.
Nazi adlı radar 30 km-dən çox yüksəklikdə hədəfləri aşkar etmək iqtidarındadır və pilotsuz uçuş aparatları və qanadlı raketlər kimi aşağı radiolokasiya əksetməli hədəfləri müəyyən edə bilir.
Gilanda Nazir-in quraşdırılması ilə Azərbaycan, Ermənistan, şərqi Türkiyə, Gürcüstan, qərbi Türkmənistan, cənub-qərbi Qazaxıstan və bütün Xəzər dənizi üzərində hava məkanı İran HHM-nin müşahidəsi altında olacaq.
ISW iddia edir ki, 26 oktyabr 2024-cü il tarixində İsrailin aviazərbələri zamanı "Bakıdakı hakimiyyətin iştirakı ilə" İrana zərbə endirilməsi üçün Xəzər dənizinin hava məkanından istifadə olunub.
"İndi, Nazir radarı işə düşdükdən sonra isə Bakı və Xəzər dənizi üzərindəki səmaya istənilən düşməncə hərəkətlərin qarşısını almağa hazır olan İranın müdafiə şəbəkəsi tərəfindən daim nəzarət olunacaq", İranın ISW nəşri belə hesab edir.
Qeyd edək ki, sırf xarici görünüşünə görə radar kifayət qədər primitiv görünür. Lakin o, İsrailin hərəkətlərini izləməyin daha asan olacağı qərbi İranda deyil, Azərbaycanla sərhəddə yerləşən Ərdəbil şəhərinin yaxınlığında quraşdırılıb.
Bu fakt "səmimi dostu və qardaşı" adlandırmağa davam etdiyi şimal qonşusuna qarşı düşmənçiliyini gizlətməyən Tehranın məqsədlərini ən yaxşı şəkildə izah edir.
Ukrayna Rusiyanın Kursk vilayətində ilk dəfə Şimali Koreya hərbçilərini əsir götürüb.
Bu barədə Ukrayna Prezidenti Volodimir Zelenski “X”də yazıb.
O bildirib ki, iki əsgər yaralı olsa da, sağ qalıb və Kiyevə aparılıb:
“Bu asan məsələ deyil: Rusiya qüvvələri və Şimali Koreyanın digər hərbi qulluqçuları adətən Şimali Koreyanın Ukraynaya qarşı müharibədə iştirakına dair hər hansı sübutu silmək üçün öz yaralılarını öldürürdülər. Bu iki şəxsi əsir götürən hərbçilərimizə minnətdaram. Bütün hərbi əsirlərə olduğu kimi, bu iki Şimali Koreya əsgərinə də lazımi tibbi yardım göstərilir. Mən Ukrayna Təhlükəsizlik Xidmətinə jurnalistlərin bu məhbuslarla görüşməsinə icazə verməyi tapşırmışam. Dünya baş verənlərlə bağlı həqiqəti bilməlidir”.
Ukrayna xarici işlər naziri Andrey Sbiqa isə qeyd edib ki, Şimali Koreya qoşunları Ukraynaya qarşı müharibədə fəal iştirak edirlər: “Bizə, Moskva və Pxenyandakı rejimlərə qarşı maksimum təzyiq lazımdır”.
İranın Ali Milli Təhlükəsizlik Şurasının katibi Əli Əkbər Əhmədian İrəvana səfəri zamanı Ermənistan rəhbərliyinə bir sıra tələblər irəli sürüb ki, onların yerinə yetirilməməsi bu ölkə üçün ağır nəticələrə səbəb ola bilər. Əhmədian həmçinin vurğulayıb ki, İran Ermənistandan AB-nin casus missiyasını başa çatdırmasını gözləyir. İrəvan Tehranın şərtləri ilə razılaşdığı halda İran rəsmisi bunun müqabilində iki ölkə arasında müdafiə paktının bağlanmasını təklif edib ki, bu paktda İran silahlı qüvvələrinin Ermənistan ərazisinə yeridilməsi kimi elementlər də var.
Bu barədə “Caliber”in süjetində bildirilib.
“Amma gəlin, bütün bunlar barədə ardıcıl danışaq. 2023-cü il oktyabrın 7-də Yaxın Şərqdə başlayan böyük müharibə İran İslam Respublikası üçün böyük və hətta bərpası mümkün olmayan itkilərlə nəticələndi. ÇAXAL-ın zərbələri nəticəsində Tehranın onilliklər ərzində yaratdığı “müqavimət oxu” məhv olmağa başladı. Beləliklə, Qəzzada HƏMAS tamamilə məhv edilməsə də, ciddi şəkildə zəiflədi”, – məqalədə qeyd olunur.
Daha ətraflı videoda:
İran mediasının məlumatına görə, İslam İnqilabı Keşikçiləri Korpusunun (SEPAH) Baş Komandanı və Aerokosmik Qüvvələrin rəhbəri ölkənin yeraltı raket bazasına baş çəkiblər.
Musavat.com xəbər verir ki, sözügedən baza, yaxınlarda İsrailə qarşı həyata keçirilən "Düzgün Vəd 2" adlı hərbi əməliyyatda istifadə edilib.
Bu yeraltı baza İranın müdafiə qabiliyyətini nümayiş etdirmək məqsədilə ictimaiyyətə təqdim olunub. İran hərbi rəsmiləri bu bazanın strateji əhəmiyyət daşıdığını və ölkənin raket sistemləri üzrə gücünü artırdığını vurğulayıblar.
Son dövrlərdə İranın hərbi infrastrukturu ilə bağlı bu cür təqdimatlar regiondakı gərginliyi daha da artırır. Təhlükəsizlik ekspertləri hesab edirlər ki, bu cür bazalar İranın müdafiə qabiliyyətini gücləndirməklə yanaşı, mümkün hücumlara qarşı hazırlığını da göstərir.
İran rəsmiləri bəyan ediblər ki, bu baza son texnologiyalarla təchiz olunub və ölkənin milli təhlükəsizliyini təmin etmək məqsədilə mühüm rol oynayır.
Musavat.com