Xanım jurnalist keçmiş icra başçısının “qoçuları” tərəfindən xəstəxanalıq edilib

“Hürriyyət” qəzetinin, eləcə də eyniadlı Hurriyyet.az və “Hurriyyet TV”-nin rəhbəri Vüqar Məmmədov Azərbaycan Respublikasının Daxili İşlər naziri Vilayət Eyvazova müraciət edib. Həmin müraciəti olduğu kimi dərc edirik:

“Cənab nazir!

Bu gün – 05.10.2024-cü il tarixində “Hurriyyet TV”-nin əməkdaşı Vüsalə Nəciyeva bir qrup şikayətçinin müraciəti əsasında ezam olunduğu Ağcabədi rayonu Kəhrizli kəndi ərazisində keçmiş icra başçısı Şamil Əlif oğlu Həsənovun “qoçuları” tərəfindən vəhşicəsinə döyülüb. Buna səbəb əməkdaşımızın Şamil Əlif oğlu Həsənova və onun oğlu, Mədəniyyət Nazirliyinin Ağcabədi Regional Mədəniyyət İdarəsinin rəisi Qalib Şamil oğlu Həsənova məxsus olduğu bildirilən fermaya yaxın ərazidə çəkiliş aparması olub.

Belə ki, jurnalist öz vəzifə borcunu həyata keçirən zaman Ş.Həsənovun bir qrup “qoçusu” onu və ərazidə olan şikayətçiləri vəhşicəsinə döyüblər. Bu zaman digər şəxslərlə yanaşı, xanım jurnalistimiz Vüsalə Nəciyeva da bədən xəsarətləri alıb, üst-başı çırıq-çırıq edilib.

Cənab nazir!

Diqqətinizə çatdırım ki, hadisədən dərhal sonra Ağcabədi rayon Polis Şöbəsinə məlumat verilsə də, o cümlədən 6 dəfə DİN-in “102” xidmətinə müraciət olunsa da, olay yerinə gələn olmayıb. İddia olunur ki, Şamil Əlif oğlu Həsənovun oğullarından biri polis rəisi olduğundan, Ağcabədi polisi şikayətə baxmayıb.

Onu da deyim ki, döyüləndən sonra, təxminən 1 saat müddətində əməkdaşımız ferma ərazisindən girov saxlanılıb. Daha sonra hadisə yerinə Təcili Tibbi Yardım Xidmətinin əməkdaşları dəvət olunduğundan, onu girovluqdan azad etməyə məcbur olublar.

Üstəlik, bu zaman fermaya gələn Şamil Həsənov Təcili Tibbi Yardım Xidməti əməkdaşlarının xanım jurnalisti xəstəxanaya aparmasına mane olmağa çalışıb. Lakin onun vəziyyəti ağır olduğundan, həkimlər keçmiş başçının müdaxiləsinə imkan verməyiblər.

Cənab nazir!

Qarşı tərəf guya, xanım jurnalistin günün günorta çağı fermadan oğurluq etmək istədiyini iddia edib. Halbuki, ərazidə çoxsaylı kameralar var, onun çəkiliş etdiyi üçün döyüldüyü aşkardır.

Bu baxımdan, Sizdən xahiş edirəm ki, hadisəni öz diqqətinizə götürüb, Ağcabədi rayon Polis Şöbəsinə məsələ ilə əlaqədar operativ tədbirlər görülməsi ilə bağlı tapşırıq verəsiniz.

Öncədən Sizə kollektivimiz adından minnətdalıq edirəm”.

Hurriyyet.az

Redaksiyadan: Əlavə məlumat verməyə çalışacağıq.

Naxçıvan səhiyyə sistemində ərizə qalmaqalı bitmək bilmir.
Qeyd edək ki, bir neçə gün əvvəl Naxçıvan Respublika xəstəxanasının işçilərinə müddətli əmək müqaviləsi yazdırmağa çalışan TMİB (Naxçıvanın TƏBİB-i) bu tələbə etiraz edən tibb işçilərinin şikayəti media orqanları tərəfindən işıqlandırılandan sonra geri çəkilmişdi. Respublika xəstəxanasının işçilərinə müddətsiz əmək müqaviləsi imzalatmaqla (tibb işçiləri arasında 40 ildir eyni xəstəxanada işləyənlər də var və onlara yenidən işə girmə ərizəsi yazdırılması hansı zərurətdən doğub anlamaq mümkün deyil) canlarını qurtaran TMİB başbilənləri indi həmin tibb ocağının laboratoriyasının əməkdaşlarına “ilişib”. Respublika xəstəxanasının attestasiya imtahanından 11 bal toplayan (gorun çatlamasın, Mirzə Cəlil) Baş həkimi Ramazan “yoldaş” (Naxçıvanda hələ də sovet müraciət forması dəyişməyib) laboratoriya işçilərini bir araya toplayıb, onların artıq xəstəxanaya aid olmadıqlarını, bir türk şirkətinə satıldıqlarını bildirib. Və israrla tələb edib ki, indi yeni ağalarının adına ərizə yazıb köhnə işlərinə yenidən qayıda bilərlər.
Laboratoriya ilə birlikdə özlərinin də qul kimi satıldıqlarını eşidib xeyli təəccüblənən işçilər tələb ediblər ki, onlara alqı-satqı müqavilələri göstərilsin. Onları narahat edən əsas məsələ isə sabah Türk şirkətini Naxçıvandan qovsalar (ki, Naxçıvan üçün bu olduqca asan məsələdir), laborantların taleyinin necə olacağıdır. Nə illah ediblərsə, işçilərə bu barədə hər hansı məlumat və rəsmi sənəd göstərilməyib. Beləcə, ara qarışıb, dəftər itib. Nəticədə Naxçıvan xəstəxanalarının yeni rəhbəri TMİB sədri Vüsal Məmmədov “yoldaş” laborantların harayına özünü yetirib. O da bu zavallılara çoxdan “satıldıqlarını” etiraf edib, amma yenə də bunu təsdiq edən heç bir sənəd göstərə bilməyib.
İki arada, bir dərədə qalan laborantlar sonunda xəstəxananın Həmkarlar İttifaqının sədri Qəzənfər Abdullayev “yoldaş”a məktub yazıb bu qul hərracına aydınlıq gətirməsini istəyiblər.
Bazar ertəsi günü ünvanına yetişəcək məktubu Qəzənfər müəllimdən əvvəl siz dəyərli Oxucularımızın nəzərinə çatdırırıq.
Heydər Oğuz
TEREF

Nəsimi rayonunda, “Kubinka” adlanan ərazidə yerli sakinlərlə “Vialon” MMC-nin rəhbərliyi arasında qarşıdurma yaşanır. Buna səbəb şirkətin ərazidə bəzi evləri alaraq, söküntü işləri aparmasıdır. Sakinlərin bir qismi verilən məbləğın həddən artıq az olduğunu əsas gətirərək, evlərini satmaqdan imtina ediblər. Şirkət isə onları evlərindən zorla çıxarmaq istəyir.
Bu barədə Bakupost.az -a Cəlil Məmmədquluzadə, dalan 2, ev 6 ünvanında yaşayan Yurşimova Milka Lələ qızı bildirib.

Onun sözlərinə görə, problem iki il əvvəl yaranıb və hələ də davam edir:
"Mən 1967-ci ildən burada yaşayıram. 4 uşağım bu evdə dünyaya gəlib, böyüyb. İndi hər kəsin ailəsi var. Oğlum Binəqədidə kirayədə yaşayır. Özümün 74 yaşım var və 1983-cü il təvəllüdlü serebral iflic xəstəsi olan qızımla bir yerdə qalıram.
İki il əvvəl “Vialon” MMC şirkətinin işçiləri xoş üzlə gəldi, sakinlərlə mülayimliklə danışıb tanış oldular. Sonra bir-bir insanlara yaxınlaşıb, onlara müəyyən qədər vəsait verəcəklərini bildirdilər. Kimlər ki o ünvanda yaşamırdı, şirkətin verdiyi vəsaitlə razılaşıb evini satdı. Hər kvadratmetrə görə 1700-1800 manat verildi. Onlar razılaşıb çıxdılar. İndisə qalıb bizim evlər. Qonşular evdən çıxan kimi dərhal söküntüyə başladılar. Bizim evlərin damları bir-birinə bitişikdir. Söküntü zamanı mənim evimin damının bir hissəsini uçurublar. Buna görə etiraz etdik. Amma Violon” MMC-dən heç gəlib maraqlanmadılar, evimizi düzəltmədilər. İndiyə kimi oradan başıımıza yağış yağır. Divar da içəridən çatlayıb".
Şikayətçinin sözlərinə görə, bir müddət sonra onun evinin sağ tərəfində də söküntü işləri aparılıb:
"Buldozerlə o tərəfi də dağıdıb tökdülər. Evin qapı-pəncərəsini, divarlarını uçurtdular. Gördülər, bu məni qorxutmur, başladılar bütün evi uçurmağa. Sentyabrın 16-dan evin giriş hissəsini sökdülər. 3 gün evdən bayıra çıxa bilmədim. Sentyabrın 27-sində şəhidlərin Anım günündə gəlib buldozerlə yan qonşumun evinin damını necə uçurtdularsa, dağıntılar qonşu evlərin üstünə töküldü. Qonşularla yığışıb polis çağırdıq. Polis gələndə düşüb qaçırlar. Polis gedən kimi yenidən başlayırlar".
M.Yurşimova vurğulayıb ki, söküntü zamanı səs-küy yarandığına görə, qızı qorxudan qıc olub:
"Uşaq 2-ci qrup əlildir. Təcili yardım çağırdım. Bunlar bizi dəlixanalıq edirlər. Uşağı evdə 1 saatlığa qoyub harasa gedə bilmirəm. Uşaq zəng edib qorxudan ağlayır ki, ana, onlar yenə gəldilər. Qapını bağlayıb gedirəm, gəlib görürəm ki, arxa hissədən çıxıblar dama. Bizə zülm edirlər".
Şikayətçi qeyd edib ki, məsələ ilə bağlı Prezident Adminstrasiyası, Bakı Şəhər İcra Hakimiyyəti və digər qurumlara şikayət etsələr də, vəziyyət dəyişməyib:
"Əvvəl söküntü aparılanda Fövqəlada Hallar Nazirliyinin əməkdaşlarını çağırırdıq, gəlirdilər. Bir aydan artıqdır ki, çağırırıq, onlar da gəlmirlər. Bütün qonşular Fövqəlada Hallar Nazirliyinin rəhbərliyinə müraciət edib ki, bizi qəbul etsin. Hələ ki, bir xəbər yoxdur. Bilmirəm, bizi qəbul edəcək, ya yox. Ombudsmana məktubla müraciət etmişəm. Müsbət cavab verildi və oradan adam gəldi. Onların sayəsində söküntü iki ay saxlanıldı. İndi yenə başlayıblar. Bilmirəm, bu vəziyyət nə vaxta qədər davam edəcək?! Dəfələrlə telekanallar gəlib çəkiliş ediblər. Müraciət etmədiyimiz yer qalmayıb. Amma heç kim bu şirkət barədə tədbir görmür".

M.Yurşimova deyir ki, “Vialon” MMC-nin rəhbəri Ramil Qasımov sakinlərə 1800-2000 mindən artıq pul verməyəcəyini bildirib:
"Deyir, sizə verməyə pulum yoxdur. Şirkət bankrot olub. Bu ərazidəki tut ağaclarını da kəsiblər. Gəlib mənə də deyirdi ki, nə qədər tikinti başlamayıb, girək sizin həyətdəki tut ağcını doğrayaq. Mən də deyirəm, axı həyəti satmamışam ki, siz o ağacı doğrayasınız. Onun üstündə mənimlə prinsipə düşdülər. İstəyirlər ki, söküntü vaxtı bütün ağacları kəssinlər, sonra şirkətə problem yaranmasın.
Mənim evimin 65 kvadratmetrdir. Qiymətləndirmə zamanı onu 56 kvadratmetr hesablayırlar. Amma İcra Hakimiyyəti 63 kvadratmetr hesablayıb.Onlar bu ərzini götürüb özəl məktəb tikmək istəyirlər. Biz də özəl məktəbdəki qiymətləri öyrənmişik. Hər uşağa görə ildə 11 min manat alacaqlar. Bizəsə deyirlər pulumuz yoxdur.
Onlar bilir ki, mənim evimi alıb sökən kimi ətrafdakı qonşular özləri qaçacaq. Onların işi ancaq mənimlədir. Ramil Qasımov dalanda üstümə hücum edib dedi ki, çıx cəhənnəm ol, buradan. Gəlib evimdə məni təhqir edirlər. Bu qədər özbaşınalıq olar? Mən hara getməliyəm? Mənim milliyətcə yəhudiyəm, mənim vətənim buradır. Babam, atam burada yaşayıb".
Məsələ ilə bağlı “Vialon” MMC-nin nümayəndəsi Ramil Qasımovla əlaqə saxladıq. O, Bakupost.az -a sakinlərin şikayətinə cavab olaraq bildirdi ki, deyilənlər əsassızdır:
"Onlara kompensasiya təklif edilir. Sadəcə olaraq, onlar birdən-birə varlanmaq istəyirlər, bu da mümkün deyil. Sakinlər evin hər kvadrat metri üçün 4-5 min manat istəyir. Biz isə ordakı evlərə bazar qiymətinə uyğun pul təklif edirik. 50 minlik evə 70-80 min təklif edirik, razılaşmırlar. Məsələ tezliklə hüquqi müstəvidə həll ediləcək".

Mehdiabad qəsəbəsi 1 saylı məktəbdə valideynləri "sağırlar"

Hər il olduğu kimi 5 oktyabr Müəllimlər günü ilə əlaqədar bəzi məktəblərdə yenə pul yığılması prosesinə başlanılıb.

Halbuki Elm və Təhsil Nazirliyi hər il olduğu kimi bu il də 5 oktyabr - Müəllimlər Günü ilə bağlı məktəblərə təlimat göndərib.

Müəllimlər Günü ilə bağlı pul yığılan məktəblərdən biri də Mehdiabad qəsəbəsi 1 saylı tam orta məktəbdir.
TEREF yazır ki, bunu poçtumuza daxil olan məqalədə müəllif yazır. Müəllif daha sonra yazır:
Demək olar ki, bu məktəbi validenylər komitəsi idarə edir.

Təxminən bir həftə əvvəl direktor Pənah Babayev və müəllimlər dedilər ki, Müəllimlər günü ilə bağlı pul yığılmasın, qiymətli əşyalar alınmasın. Kim istəsə ürək sözləri yazılmış kiçik konvertlər, gül gətirə bilər. Amma bu sözdən sonra pul yığımına start verildi.

Mehdiabad qəsəbəsinin 1 saylı məktəbində valideynləri inək kimi sağırlar. Məktəb açılan kimi fond pulu yığdılar. İndi də Müəllimlər Günü pulu yığırlar. İbtidai siniflərdən 10 manat, 5-7 siniflərdən 15 manat, yuxarı siniflərdən isə 20-25 manatdan pul yığılıb. Bütün işləri isə valideyin komitəsi görür.

Dəfələrlə demişik, direktor deyir ki, ad çəkin, mənim xəbərim yoxdur.
QEYD: Qarşı tərəfində mövqeyini dərc etməyə hazırıq!
TEREF

Sosial şəbəkələrdə son dönəmlər bədən şəkilləndirmə əməliyyatları xüsusilə çox yayılıb. Bu cür əməliyyatların qorxusuz, ağrısız, risksiz olduğunu deyən həkimlər insanları şirnikləndirir.

Təəssüflər olsun ki, bədən şəkilləndirmə əməliyyatları arasında uğursuz nəticələnənləri də çoxdur.

Fidan İsmayılqızı da uğursuz nəticələnən estetik əməliyyatın qurbanıdır. O, Bizim.Media-ya qarın gərmə əməliyyatı nəticəsində necə ölümlə üz-üzə gəldiyini danışıb:

“Əməliyyatdan sonra qanaxma başladı”

O, komplekslərindən qurtulmaq üçün aprelin 16-sı “Yasamal Hospital”a üz tutub. Fidan İsmayılqızı deyir ki, klinikanın estetik cərrahı, baş həkimi Elvin Əliyev və komandası ona abdominoplastika, yəni qarın gərmə əməliyyatı ediblər. Əməliyyatdan 1 saat sonra isə Fidan xanımın halı dəyişib.

“Təzyiqim düşdü, gözüm qaraldı, bədənim bumbuz tər oldu, ürəkbulanma, qusma başladı. Bunlar daxili qanaxma əlamətləridir.Yenidən əməliyyat stoluna qaytardılar. 2-ci əməliyyatım çox uzun çəkdi. Bir gün içində iki dəfə əməliyyat olundum. Sağ çıxanda sevindim. Sən demə, 1 həftə sonra daha ağır günlərim başlayacaqdı...”

“Klinika məni qəbul etmədi”

Fidan İsmayılqızı ikinci əməliyyatla sadəcə canını qurtara bildiyini, amma 6 ay ərzində hər gün əziyyət çəkdiyini deyir:

“Çoxlu qan itirmə, eyni nahiyənin 2 dəfə açılıb, tikilməsindən sonra yaramda dərin nekroz (toxuma ve hüceyrələrin qidalanmasının pozulması) başladı. Bir müddət sonra isə yaralarım tamam açıldı, yaradan çoxlu miqdarda seroz maye axdı, bədənim bir yandan qan, bir yandan da maye itirdi. Ağır vəziyyətdə “Yasamal Hospital”a getdim, amma məni qəbul etmədilər. Dərhal başqa özəl xəstəxanaya getdim. 1 həftə orada müalicə aldım”.

Qeyri-estetik əməliyyat...

Fidan İsmayılqızının sözlərinə görə bu qədər əziyyətin nəticəsində bədənində dərin yara izləri, arzuolunmaz görüntü yaranıb:

“Bədənim vizual olaraq çox pis vəziyyətdədir, hələ daha nə qədər əməliyyat olmalıyam. Artıq tükənmişəm. Bu 5 ayı evdən çölə çıxmadım, ancaq yaralarıma sarğı qoymaqla məşğul idim. Təsəvvür edin bitişməyən yara, yarada axıntı, sarğı qoy, üstündən bu istidə. korset bağla, bütün psixologiyam çöküb”.

Məhkəmə prosesi

Fidan İsmayılqızı həkim səhlənkarlığı iddiası ilə Elvin Əliyev barəsində Baş Prokurorluğa şikayət etdiyini bildirib. Prokurorluq isə işi məhkəməyə göndırib. Yasamal Rayon Məhkəməsi cinayət işi başlatmasa da, prokurorluq bu qərarı əsassız sayıb və işin yenidən araşdırılmasını istəyib.

Məsələ ilə bağlı “Yasamal Hospital”ın baş həkimi Elvin Əliyev Bizim.Media-ya açıqlamasında deyib ki, əməliyyatı o etməyib. İddiaları isə əsassız hesab edir.

Onun sözlərinə görə, əməliyyatı vaxtilə “Yasamal Hospital”da onun rezidenti olmuş Mehdi Həsənzadə edib. Hazırda isə Mehdi Həsənzadə həmin klinikada çalışmır. Amma əməliyyat edən vaxt rezident vəzifəsində olub. Rezidentin isə əməliyyatı tək etməsi qadağandır. Mütləq ki, həkim nəzarəti olmalıdır.

Fidan İsmayılqızı deyir ki, kameraların prokurorluğa təhvil verilməsi gecikdirilir, əməliyyatı kimin etdiyi də sual altındadır.

Məhkəmə sənədlərində mə yazılıb?

“Fidan İsmayılqızı "Abdominoplastika" əməliyyatı üçün 07.04.2024-cü il tarixində “Yasamal Hospital”da rezident Mehdi Həsənzadənin qəbulunda olub. Mehdi Həsənzadə ona Sabunçu xəstəxanasında ümumi cərrahiyyə üzrə 4-cü kursda rezident olduğunu bildirib. Fidan İsmayılqızı rezident olduğu üçün ondan müstəqil olaraq əməliyyatı necə icra etdiyini soruşub.

Çünki rezidentlerin həkim nəzarəti olmadan müstəqil olaraq əməliyyat icra etməsi qanunsuzdur. Mehdi Həsənzadə isə əməliyyatların müstəqil deyil, “Yasamal Hospital”ın baş həkimi Elvin Əliyevin nəzarəti altında icra ediləcəyini və əməliyyatlara birlikdə girdiyini deyib. Daha sonra Mehdi ona ümumi qan analizindən keçməyi təklif edib və əməliyyat günü təyin olunub. Bütün bu analizləri verərkən və müayinələrdən keçərkən onu Elvin Əliyevin xəstəsi kimi qeydə alıblar”.

Bu Elvin Əliyevin kariyerasındakı ilk qalmaqal deyil

2018-ci ildə onun etdiyi abdominoplastika əməliyyatından sonra Mehriban Mehdiyeva adlı şəxsin yarasında irin və nekroz yaranıb. Zərərçəkən mediaya verdiyi açıqlamalarında deyib ki, Elvin Əliyevin etdiyi əməliyyat onun həyatını cəhənnəmə çevirib. Həmin dövrdə Elvin Əliyev “İnternational-2” adlı özəl klinikada baş həkim olub.

“Mənə əməliyyat zamanı infeksiya salınıb. İnfeksiya əti, toxumanı yeyir. İnanın, burda cərrahlar yaramı, tikişləri, vəziyyətimi görüb dedilər ki, əminsiniz ki, bunu cərrah edib? Yəni o dərəcədə kobud, qeyri-peşəkar iş idi… Hər gün yaramı qaşıyırlar, ağrıdan ürəyim gedir. Hamının mənə yazığı gəlir.

Bədənimin başqa hissəsindən ət, dəri götürüb tikə bilərlər, amma yara tamam qurumalıdır. Elvin Əliyev isə mənə deyirdi ki, qorxulu heç nə yoxdur, o irin deyil, infeksiya deyil. Bəs nədir? Mənim bütün ətimi yeyir. Azərbaycanda məni heç bir klinika götürmədi, mədəni şəkildə dedilər ki, get kim kəsib, o da müalicə etsin”.

Elvin Əliyevin qeyri-peşəkar işi və səhvi ucbatından bu halda düşdüyünü vurğulayan Fidan İsmayılqızı qarşı tərəfin ona təzminat ödənməsini və sağlamlığını itirməsinə səbəb olan şəxslərin cəzalandırılmasını istəyir.

Yunan filosofu Artisfen yazır ki, yarıtmaza idarəçiliyi həvalə etmək, dəliyə qılınc verməkdən təhlükəlidir. Çünki yarıtmaz adam bütün sistemi iflic edir, inkişafı baltalayır, öz ağlı və mənfəəti ilə hər şeyi ölçür. Biz də göründüyü kimi maşallah olsun ki, yarıtmaz idarəçilər sarıdan korluq çəkmirik. Onlardan müxtəlif qurumlarda, idarələrdə, ayrı-ayrı sahələrə aid strukturlarda kifayət qədər var.
Çox uzağa getməyək, elə götürək 2022-ci ilin dekabrından tibb işçilərinin, həkimlərin, təcrübəli kadrların, professorların qəniminə çevrilmiş Respublika Klinik Xəstəxanasının direktoru, ortoped-travmatoloq Əlviz Qasımovu. Vaxtilə efirlərdən düşməyən, telekanallarda möhkəm reklamı gedən, bəh-bəhlə təriflənən, elə buna görə də xeyli məmur-oliqarxın sevimlisinə çevrilmiş ortoped-travmotoloq Əlviz Qasımov "Respublikanski"nin personalına elə bir "travma" yaşadır ki, gəl görəsən...
TEREF yazır ki, Prezidentə və dövlətin rəhbər şəxslərinə yazılan və bir nüsxəsidə poçtumuza daxil olan şikayətdə şikayətçi yazır. Daha sonra şikayətçi davam edərək yazır:
Məhz həmin reklamın, sonra da daimi həkiminə çevrildiyi həmin ixtiyar sahiblərinin sayəsində karyera yüksəlişi yaşamış Əlviz Qasımov indi direktoru olduğu xəstəxanada işçilərin başında az qala "turp əkir". Cəmi iki ildən bir az zaman içində "Respublikanski"də "ad çıxarmış" Əlviz Qasımov çoxlarını dünyaya gəldiyinə, bu peşəni seçdiyinə peşman edib, necə deyərlər, anadan əmdiyi südü burnundan gətirib. Elə bil cənab Qasımov xüsusi missiya və yaxud qisas əməliyyatı məqsədi ilə bu tibb müəssisəsinə rəhbər göndərilib: Hippokrat sağ olsaydı, sözsüz ki Əlviz Qasımov onda da bir ,,çepe" tapa bilərdi...

RKX-na Əlviz Qasımovun direktor təyinatının qaranlıq izləri

Yuxarıda qeyd etdiyimiz kimi artıq iki ilə yaxındır ki, «Respublikanski» kimi tanınan Mirqasımov adına RKX-da rəhbərlik strukturlarına təyinatlar olub. Başda direktor Əlviz Qasımov olmaqla kütləvi şəkildə, xeyli sayda heyət üzvü ET Travmatologiya və Ortopediya İnstitutundan Mirqasımov adına RKX-na köçürülərək mühüm postlara yerləşdiriliblər. Hər kəs üçün maraqlı deyilmi ixtisasca Ortoped-travmatoloq olan Əlviz həkimin qəflətən 2022-ci ilin dekabrın sonu İnstitutdan böyük bir komanda ilə RKX-nə təyinat alsın? Bunun əslində səbəbi nə idi? Hər kəs yaxın tarixə nəzər salsa, hər şeyi çox asanlıqla başa düşmək olar . Bildiyimiz kimi 2023-cü il yanvar ayından bir çox institutlar kimi Tramatologiya instutunun da TƏBİB-dən alınaraq Səhiyyə Nazirliyinin tabeçiliyinə keçməsi haqqında qərar verilmişdir. Belə olduğu halda daima Əlviz həkimin idarıetməsinin problemli olduğunu haqlı olaraq iddia edən hazırda Səhiyyə nazirinin müavini İlqar Qasımovla işlərinin çəpləşməsi qaçılmaz olacaqdır. Odur ki, «asta qaçan namərddir» prinsipi ilə Əlviz həkim «başının dəstəsi» ilə ,,yuxardakı" adamlarının dəstəyi ilə RKX-na transfer edilir. Bütün bunlardan sonra RKX-nın qara günləri başlanır. Başlanır nə başlanır.
Hal hazırda Əlviz Qasımov Mərkəzi Kilinikadan və Tramatologiya inistutundan gətrdiyi heyyətlə xəstəxananı rüsvayedici şəkildə idarə edir. Vüqar Qurbanova sual edirik?- RKX sı dostlar, tanışlar , sevgililər xəstəvanasıdır?( bu kadların hər biri haqqında məlumat verəcəyik) Necə olur ki, Əlviz Qasımov tərəfindən yaxın dostu Murat Ünlü Mərkəzi kilinikadan müavin kimi Tramatologiya inistutuna , ordan da Mirqasımov adına RKX gətirilir. Sonra da məlum olur ki Murat bəyin diplomu Azərbaycanda təsdiq edilməyib. Onun istər Tramatologiya inistutunda , istərsə də Mirqasımov adına RKX da fəaliyyəti qanunsuz olub. Bu iki il müddətindı qanunsuz fəaliyyətə görə kim məsuliyyət daşıyır? Əgır nəzərə alsaq ki bu iki il müddətində hər ay Murat bəy ən azından beş min manat aylıq məvacib alıb, bu ciddi maliyyə pozuntusudur.

"TRAVMALI" İDARƏÇİLİK

Problemləri, dərdləri respublikanın hüdudlarını aşan, bir qrup karyerist, işbaz adamın əlində əsir-yesir qalan, ölkə qanunlarının işləmədiyi, hər şeyin pulla ölçüldüyü, az qala kriminal aləmə çevrilən, bu xəstəxananın mövcud vəziyyəti sadəcə faciəvidir. İllərdir ki, islahatlar aparıldığı deyilən Azərbaycan səhiyyəsinin bu xəstəxanadan xəbəri yoxdur. Ümumiyyətlə deyəsən bu sahəyə cavabdeh olanlar, məsuliyyət daşıyanlar “Respublikanski”ni ya tamamilə gözdən çıxarıblar, ya da başda Əlviz Qasımov olmaqla bir qrupun şəxsi maraqlarına qurban veriblər.
Xəstəxanada Azərbaycan səhiyyəsi adına tam bir rəzalət yaşanır, tibbi sığorta haqqında qanun ayaqlar altına atılır, nəinki xəstələrin, hətta tibbi personalın belə hüquqları tapdalanır. Elə bir vəziyyət yaranıb ki, TƏBİB belə burada hökm sürən anarxiyaya, hərc-mərcliyə müdaxilə etmək iqtidarında deyil. Bütün el yığılsa belə Əlviz Qasımovun yaratdığı xanədanlığa söz demək iqtidarında deyil !
Bu gün RKX-da yalnız Əlviz Qasımovun yazılmamış qanunları işləyir. Bu qanunlar isə Azərbaycan dövlətinin imicinin tapdalanmasına, cənab Prezidentin, Mehriban xanımın səhiyyəyə göstərdiyi yüksək diqqət və qayğıya zərbə vurmağa, gözdən salmağa hesablanıb. İş o yerə çatıb ki, peşəkar kadrların böyük bir qurupu yarıtmaz idarəçilikdən bezib baş götürüb qaçdılar, yəni başqa xəstəxanalara üz tutdular. Qalan həkimlər isə ,,partizan "kimi direktorun gözündən yayınaraq , çox sıxıcı fəaliyyət göstərirlər. Maraqlısı budur ki bu barədə dəfələrlə cənab prezident İlham Əliyevə və xanımı birinci Vitse prezident Mehriban xanım Əliyevaya müraciət edilsə belə işin icrası aidiyyatı qurumlar tərəfindən həll edilmir. Eyni zamanda bu barədə əvvəlki baş həmkar Səttar Mehbalıyevə həkimlər və tibb personalı tərəfindən rəsmi müraciətlər ünvanlanmışdır. Həkimlər Əlviz Qasımovun xəstəxanada saxta yolla seçdirdiyi heç kəsin normal tanımadığı, direktorun adamı kimi yalnız onun xidmətində duran xəstəxananı biznes maraqlarına çevirən cərrahın birindən , pozulmuş hüquqlarının müdafiəsini necə tələb edə bilərlər. Hər kəs respublikanın yeni baş həmkarı Sahib Məmmədovun vicdanlı adam olduğunu bildirir. Sahib Məmmədovdan da şəxsən məsələni yenidən diqqətinə götürməsini həkimlərin uzaq Bilgəhə sürgün edilməsinin qarşısını alınmasında yardımçı olmasını çox xahiş edirlər.
Hal-hazırda əmirlərin bir qismi daimiləşsə də böyük bir kollektiv, yüz minlərlə insanın ümidlə üz tutduğu xəstəxana “müvəqqəti əmrlə” çalışan məsuliyyətsiz, şəxsi maraqlarını güdən şəxslərin əlində can verdi. Ə.Qasımovun “müvəqqəti əmrlə” idarəetməyə gətirdiyi naşı şəxslər (indi böyük qismi daimiləşib) elə bir anarxiya, korrupsioner sistem, rüşvət mexanizmi formalaşdırdılar ki, yüz TƏBİB gəlsə bu dərdin dərmanını tapa bilməz. RKX-da baş verənləri bütün çılpaqlığı ilə görmək üçün xəstəxananın həyətində beşcə dəqiqə var-gəl etmək kifayətdir. Elin gözü tərəzi olduğu üçün bu tərəzidə Əlviz Qasımovun hansı çəkidə olduğunu görəcəksiniz. Xəstəxanada icbari tibbi sığorta demək olar ki, işləmir, pul verməyən xəstələrə xidmət göstərilmir, ya da başdan edilir. Azərbaycan dövlətinin, cənab Prezidentin ən böyük islahat proqramı burada sabotaj olunur. Və qəribəsi də odur ki, bu sahəyə cavabdeh olanlar baş rejissoru Əlviz Qasımov olan bu tamaşaya seyriçilik edirlər.
Əlviz Qasımov xəstəxanada həyata keçirilən təmir işlərini də öz şəxsi maraqlarına tabe etməyi bacarıb. Təmir işlərini bəhanə edərək böyük bir kollektivi, on minlərlə xəstəni paytaxtdan uzaq Bilgəhə “sürgün” etməyi planlaşdırır. Hamını hər şeyin yaxşı olacağına inandırmağa çalışsa da bu həm tibb personalın, həm də xəstələr üçün çətinliklər yaradacağını hər kəs bilir. Hər şeyin doğrusu, şəhərdə münasib bir binanın ayrılması daha məqsədəuyğun olardı. Eyni zamanda Əlviz Qasımov bütün işçi kollektivinin qarşısında gediş-gəliş avtoservis təminatının olacağını söz versə də hər kəs bunun da mümkünsüz olacağını bildirir. İTS və TƏBİB in iş mexanizimində çox ciddi korrupsiya , maliyyə pozuntularının olması şühbəsizdir. Beləki RKX Terapiya şöbələri beş aydan çoxdur ki xəstə yatışı qəbul etmir. Təmir adı altında beş aydan çox xəstə yatışını saxlamağın adı nədir? Nə baş verir ki həyat , yaşamağ uğurunda mübarizə aparan xəstələr kimlərinsə bizneslərinin qurbanı olurlar.
Xülasə, Əlviz Qasımov Nuh deyir, peyğəmbər demir. Bu yolla arzuolunmaz şəxslərdən asanlıqla yaxa qurtaracağını düşünərək “Bilgəhə sürgün” siyasətindən əl çəkmək istəmir. Zatən bu xəbər çıxandan Terapiya sahəsində çalışanların bir qismi işdən çıxmış , böyük bir qisimi isə özlərinə uyğun yerlərdə iş axtarır. İşin dəhşətli tərəfi odur ki, Əlviz Qasımov özünə yaxın şəxsləri xəstəxananın əsas korpusunda saxlayır, “getmə gözümdən, gedərəm özümdən” prinsipi ilə himayə edir, digərlərini isə Bilgəhə ,,sürgünə" göndərir. Həkimlər bildirir ki, əslində bu “sürgün” onların xəstəxanadan mədəni amputasiyasıdır. Gəldiyindən bəri müxtəlif bəhanələrlə təxminən iki minlik kollektivdən 500-dən çox əməkdaşı işdən çıxaran Əlviz Qasımov Bilgəhdə arzuedilməzlər kateqoriyasına aid etdiyi həkimlərdən də can qurtarmağı planlaşdırır. Özünü guya dürüst, təmiz adam kimi göstərən Əlviz Qasımov əslində böyük korrupsiya mexanizminin açarıdır.
İşdi şayətdi məcbur olub tibbi sığorta şərtləri ilə xəstəxanada müalicə edilməli xəstə olarsa onun işi Allaha qalır. Çünki belə sərfəsiz xəstələrə gözün götürüb baxan olmur, 5 gündən də sonra vəziyyətindən asılı olmayaraq xəstəxanadan çıxarırlar. Hər şeydən dəhşətlisi odur ki, Əlviz Qasımovun göstərişinə əsasən həkimlər yalnız onların təminat üzrə əmr etdikləri diaqnozları təyin edə bilər. Bu dünyada səhiyyə sistemində görülməmiş dəhşətdir. Xəstələrin taleyindən çox birmənalı şəkildə tibbi icbari sığortanın maraqları önəmə gətirilir.
Xəstəxananın liftindən tutmuş reanimasiya otağına qədər hər yerdə rüşvət, qeyri-qanuni pullu xidmət növü baş alıb gedir. Yəni: liftə minmək, ayaqyoluna getmək, xəstəni qəbul şöbəsinə çatdırmaq, Kompüter Tomoqrafiya müayinəsindən keçmək,bütün cərrahi əməlyatlar, analiz vermək, hətta az qala salam vermək belə pullu xidmət hesab edilir.
Bundan başqa, ultrasəs müayinəsinin aparıldığı kabinetdə də konkret tariflər müəyyənləşdirilib. Məsələn, zobdan müayinə olunmaq istəyirsənsə15-20 manat ödəməlisən. Qadınlarda daxili orqanların kompleks müayinəsi isə 150 manata başa gələcək. Bundan başqa burada qanın ümumi analizi 20, qanda qlükozanın müəyyən olunması 10, sidiyin ümumi analizi 10, böyrək analizləri 40, adi həkim müayinəsi 30, ginekoloji yoxlanma 60 manata başa gəlir. Döş qəfəsinin rentgeni üçün 20-30 manat ödəmək lazım gəlir. Daxili orqanların ümumi müayinəsi isə 165 manatdır. Cərrahiyyə şöbəsində Eldar həkimin etdiyi əməlyyatların qiymətləri qandondurucudur. Bu rəqəmlər isə min manattdan başlayır. Beləcə dövlətin vətəndaşlara vəd etdiyi icbari tibbi sığorta Respublika Klinik Xəstəxanasında bazar predmetinə çevrilib. İTS-nin rəhbəri Zaur Əliyev isə bunları görməzdən gəlir.
Özəl müəssisələrlə anlaşan direktorun şəxsən razılığı olmadan özəl kilinikalara müayinə üçün xəstələrə heç bir göndəriş verilmir. Daha doğrusu göndərişlər yalnız direktorun ,,anlaşdığı'' özəl kilinikalara verilir. Xəstələrin istəyi nəzərə alınmır .Bir çox dərman firmaları isə Əlviz Qasımovun ,, xeyir duası" ilə xəstəxanada keyfiyyətsiz dərmanlarının alverini edir.
Direktorun 400-dən çox işə götürdükləri işçilərin də böyük qisiminin ,, anlaşma'' və ,, razılaşma" yolu ilə olduğu şühbəsizdir.
Araşdırma aparılarsa, son vaxtlar xəstəxanada ölüm hallarının artması, yanğınların baş verməsi , karrupsiyanın baş alıb getməsi idarəçiliyin yox səviyyəsini göstərir.
Bahalı və yüngül həyat tərzi yaşayan Əlviz Qasımovun Port-Bakuda dəyəri yüz minlərlə ölçülən ev aldığı (elə orda da nüfuz sahibi olan şəxslə qonşu olması ), rəhbərlik etdiyi xəstəxanaya şəxsi bahalı Porşe avtomobili ilə gəlib-getdiyi bildirilir. (Maraqlı burasıdır ki, rəhbərlik onun yüngül həyat tərzi sürdüyünü, daima ,, işdə məhəbbət macərası " yaşadığını bildiyi halda niyə susur? Bu barədə də məlumat verəcəyik) Xəstəxananın təmiri üçün dövlətin ayırdığı böyük məbləğdə pulun Əlviz Qasımovun iş kabinetinin təmirinə sərf edilmişdir. Hansı ki, bu gün xəstələrin rahatlığı üçün şöbələrdə təmirə daha çox ehtiyac var idi ki, sağ olsun dövlətimiz onu da öz üzərinə götürdü.
Nəhayət, suallar bitmir ki bitmir - Cənablar bəlkə siz cavab verəsiniz: axı niyə illərlə təcrübəsi olan həkimlər bu cür stresslər keçirməli, əziyyət çəkməli, işindən olmalı və ortopedik-travmotoloq Əlviz Qasımovun "travma" lı idarəçiliyinin qurbanı olmalıdırlar?
Əlqərəz, həkimlər başda cənab prezident olmaqla Azərbaycan respulikasının 1-ci Vitse-prezidenti Mehriban xanım Əliyevadan, Azərbaycan Respublikası Prezdentinin köməkçisi Anar Ələkbərovdan, Humanitar-siyasət, diaspor, multikulturalizm və dini məsələlər şöbəsinin müdiri Fərəh Əliyevadan,Azərbaycan Respublikasının baş purakroru Kamran Əliyevdən , Səhiyyə naziri Teymur Musayevdən ,Tibbi İcbari Sığortanın icraçı direktoru Zaur Əliyevdən, TƏBİB-in icraçı direktoru Vüqar Qurbanovdan, Azərbaycan Respublikası Milli Məclisinin Səhiyyə komitəsinin sədri Əhliman Əmiraslanovdan , Azərbaycan Milli Elmlər Akademiyasının akademiki, Azərbaycan Respublikası Səhiyyə Nazirliyi Milli Onkologiya Mərkəzinin Baş direktoru Cəmil Əliyevdən kömək istəyir.
Cənab prezident ,özünü yuxarı ali şəxslərin himayəsində hiss edən Əlviz Qasımovun özbaşnalıqlarına, qanunsuzluqlarına Zaur Əliyev və yaxud Vüqar Qurbanov göz yummaq məcburiyyətindıdir. Siz Allahın yerdə bizim üçün ədalətisiniz. Koma vəziyyətinə düşən Respublika Klinik Xəstəxanasını ölümdən xilas etmək üçün klinik tədbirlər görülməlidir.
Bir daha qeyd etmək istərdik ki, bütün bu baş verən oyunbazlıqlar, hər biri cinayət əməli kimi qiymətləndirilməlidir. Yuxarıda qeyd edildiyi kimi, olan olaylar icbari tibbi sığortanın rəhbəri Zaur Əliyevin və TƏBİB-in icraçı direktoru Vüqar Qurbanovun gözləri qarşısında baş verir. Səhiyyə sistemində islahatların açarı hesab olunan, böyük ümidlər bəslənilən TƏBİB isə öz fəaliyyəti ilə tam bir fiaskoya uğradıb, göstərilən etimadı doğrultmayıb, səhiyyənin dərdlərinə TƏBİB olacağına yeni bir virusa çevrilərək bu sistemi daxildən məhv etməyə başlayıb. Artıq TƏBİB ona göstərilən etimadın oyuncağa çevrilən bir quruma çevrildiyini sübut edir. İctimai sorğu bu qurumun, eyni zamanda İTS ( icbari tibbi sığortanın) ya kökündən ləğv edilməsini, ya da Səhiyyə nazirliyinin tabeçiliyinə verilməsini məqsədə uyğun hesab edir.

TƏBİB -in ,,KÖSTƏBƏYİ" yoxsa ,,ingilis şipyonu"?

TƏBİB demişkən, bu qurumun ictimaiyyətlə əlaqələr şöbəsinin müdiri Zamirə adlı xanımın adını çəkməmək insafsızlıq olardı. Çünki bir qurumun fəaliyyətinin aynası hesab edilən sahəyə rəhbərlik edən şəxsin fəaliyyəti çox önəmlidir. Zamirə Ədilova isə TƏBİB-in ictimaiyyətlə əlaqələr şöbəsindən daha çox İngiltərə ilə əlaqələr şöbəsinin rəhbərinə bənzəyir. Tez-tez uzaq yaşıl adaya səfərlər edən Zamirə Ədilova elə ictimaiyyətlə əlaqələri də ordan saxlayır. TƏBİB rəhbərliyinə xüsusi yaxınlığı ilə tanınan Zamirə Ədilova təkcə ictimaiyyətlə əlaqələrlə kifayətlənmir, yuxarı rəhbərliyə yaxınlığından sui-istifadə edərək ( bu xüsusi yaxınlıq barədə ətraflı məlumat verəcəyik) kadr yerləşdirilməsində , mühüm söz sahibi kimi tanınır.Yəni onun ,,maraqları" çərçivəsində TƏBİB in nəzdində olan yüksək postlara kadırlar yerləşdirilir. Öz həqiqi vəzifəsini unudan Zamirə Ədilova islahatlar adı altında özünə yaxın adamları ,, razılaşma" yolu ilə mühüm postlara yerləşdirir. Amma, bu əlaqələrin nə nazirliyə, nə TƏBİB - ə nə də dövlətimizə heç bir faydası və xeyri yoxdur.
Bütün bunlar isə TƏBİB-in hansı metodlarla idarə olunduğunun göstəricisidir. Vüqar Qurbanov, sizə marağlı gəlmir ki yutub səhifələrində axtarışa vurarkən sizin, müavinlərinizin, digər departament rəhbərləriniz haqqında xoş olmayan məlumatlar çıxır? Əsaslı və ya əsassız. Fərq etməz ...
Sual olunur bu mənfi fikir formalaşdıran paylaşımlar arasında Zamirə Ədilovanın adı niyə yoxdur? Prezidentin köməkçisi Hikmət Hacıyev haqlı olaraq eyni zamanda TƏBİB -lə bağlı gedən yazıların sosial şəbəkələrdən silinməsi ilə əlaqədar tənqidi münasibət bildirmişdir. Silinən yazıların əksəriyyətində isə Zamirə Ədilovanın adının hallanması silinmənin əsas səbəblərindən biri hesab edilir
Xatırlayırsınızsa, az öncə öz guya peşəsinin nə olduğunu başa düşməyən Zamirə Ədilova Vüqar Qurbanovun qız övladının toy şənliyini paylaşmışdı. Onun paylaşımından sonra bu mövzu KİV-lərdə müzakirə mövzusuna çevirildi.
TƏBİB-in İcraçı direktoru Vüqar Qurbanov qızına qiyməti yarım milyon manata başa gələn dəbdəbəli toy etməsi sosial şəbəkələr və medianın gündəminə çevirildi
Toyda ölkənin tanınmış müğənniləri də iştirak etməsi , Röyanın 3-4 mahnıya görə 25 min manat, Aygün Kazımovanın ifa etdiyi 3-4 mahnıya görə Vüqar Qurbanovun 30 min manatından keçməli olması , ümumilikdə isə təkcə ölkə şou-biznes nümayəndələrinə 100 min manata yaxın pul xərclənməsi gündəm olmuşdu.
Məclis Bakının ən dəbdəbəli restoranlarından olan "Böyük Saray"da başlasa da, toya hazılıq və fotosessiya "The Ritz-Carlton Baku” otelində baş tutması, toya qədər bəy və gəlinin hədiyyə və aksesuarları da böyük diqqət çəkmişdi.
Sosial şəbıkələrdə gedən məlumata görə, bəy toya taxdığı qol saatı İsveçrənın məşhur brendi "Longiness"dən olması da xüsusu vurğulanmışdı. Bəyin qolundakı "Longiness" brendinin "Elegant Collection" modelinin qiyməti 105.050 TL-dir (təxminən: 8 min manat).Bəs bütün bunların məsuliyyıtini kimin adına yazaq? Sizcə bütün bunlar sadəlikdən, təcrübəsizlikdən irəli gəlirmi?Sizcə TƏBİB də öz yaxınlarından, dost-tanışlarından ibarət şəbəkə formalaşdıran birisi təcrübəsiz ola bilərmi? Yaxud oturduğu budağı baltalayaraq daha böyük vəzifəyə getmək üçün müxtəlif planlar cızan birisi bu qədər avamca davranarmı? Həmişə özünü Vüqar Qurbanova ən yaxın birisi kimi təqdim edən, demək olar ki min bir hoqqadan çıxan ,amma ilk fürsətdə zərər vermək üçün sabotaj edən şəxs plansız hərəkət edərmi?
Yəqin ki, sualları cavablandırdıqca vəziyyət sizlərə də aydın olur. TƏBİB-in danışmanı danışmasa daha yaxşı olar. Çünkü Vüqar Qurbanova ən böyük zərbəni elə onun öz sözçüsü vurur. Yəqin ki,səlahiyyət sahibləri bütün sadaladıqlarımıza diqqət yetirsələr görərlər ki, Azərbaycan da TƏBİB elə onun öz rəhbərləri tərəfindən uçuruma sürüklənir. Ataların gözəl bir sözü var-“evin sirrini uşaqdan soruş..." Zamirə Ədilova ” TƏBİB-in “xəbərçi uşağı” kimi Vüqar Qurbanov şəxsən sizin, eləcə də digər yüksək vəzifəli məmurlar barəsində, həmçinin paytaxt xəstəxanaları ,onların direktorları , baş həkimləri haqqında kompromat tipli məlumatları mediaya sızdırmaq sahəsində “əvəzsiz mütəxəssisdir.” Verdiyi məlumatların ciddiliyini nəzərə alaraq ciddi bir dövlət qurumunun media sahəsinə rəhbərlik edən şəxsin repartyor xidmətindən təbii ki, heç bir KİV imtina etməz. Amma, bunun Azərbaycan TƏBİB-nə, onun rəhbərinə zərrə qədər də xeyir gətirmədiyinin də fərqindəyik. Məhz bu səbəbdən Vüqar Qurbanov sizə müraciət edərək TƏBİB- in “köstəbək problemi”ni həll etməyə çağırırıq. Bu hər kəsdən əvvəl elə sizin özünüz üçün vacibdir!
Tezliklə müdaxilə olunmazsa, səhiyyəmiz cəzasızlıqdan özünü toxunulmaz hesab edən bir qrupun əlində tələf olacaq. Heç olmasa görəsən bizim mənsəb sahiblərimiz “Fatihə” surəsini düz-əməlli bilirlər? Səhiyyəmizi urvatsız öldürsələr də, heç olmasa urvatsız dəfn eləməsinlər!
Redaksiyadan qeyd: Hörmətli Əlvəz həkimə ulaşa bilmədik. Lakin yenədə qarşı tərəf kimi onunda mövqeyini dərc etməyə hazırıq!
TEREF

COP29 ərəfəsində tikinti işləri həyata keçirmək istəyən şəxslər tərəfindən Yasamal rayonunun müxtəlif yerlərində “abadlıq” adı altında çoxsaylı ağacların kəsilərək götürüldüyü iddia olunur.
Bu barədə Yasamal sakinlərinin Pravda.az-a ünvanladıqları şikayətdə bildirilir ki, rayonun Həsən Məcidov 119 ünvanında növbəti ekoloji soyqırımı baş verib.

Sakinlərin bildirdiyinə görə, ərazidə restoran tikilməsi məqsədilə 12 ədəd çoxillik ağac kəsilib. Onlar iddia edirlər ki, bu işi törədənlər izi itirmək məqsədilə gecə ikən torpağı qazıb, ağacları kökündən çıxararaq ərazidən uzaqlaşdırıblar.

Pravda.az məsələyə aydınlıq gətirilməsi üçün Ekologiya və Təbii Sərvətlər Nazirliyinə, eləcə də Yasamal Rayon İcra Hakimiyyətinə sorğu ünvanlayıb.

ETSN-nin Dövlət Ekoloji Təhlükəsizlik Xidmətindən bildirilib ki, Xidmətin əməkdaşları tərəfindən keçirilən nəzarət tədbirləri zamanı Yasamal rayonu Həsən Məcidov 119 ünvanında müxtəlif cinsli ağacların kəsildiyi müəyyən edilib.

Xidmət rəsmisi Qafar Ağayevin sözlərinə görə, faktla bağlı akt tərtib olunub: "Yaşıllıqlara dəyən ziyanın məbləği cinayət tərkibi yaratdığından məsələyə hüquqi qiymət verilməsi və təqsirkarların müəyyən olunaraq barələrində qanunamüvafiq tədbirlərin görülməsi məqsədilə toplanmış sənədlər hüquq-mühafizə orqanlarına göndərilməsi üçün hazırlanır. Kəsilmiş ağacların əvəzinə yeni ağacların əkilməsi məqsədilə Bakı şəhər Yaşıllaşdırma Təsərrüfatı Birliyinə müraciət olunub”.

Yasamal RİH tərəfindən isə saytımıza hələ ki açıqlama verilməyib.