Hörmətli media, bu dəfə "Bahar" karqoyla bağlı daxil olan şikayətin üzərində durmaq qərarına gəldik. Çünki, müştərinin təqdim etdiyi sübutlar onu deməyə əsas verir ki, sözügedən karqo, aşkar şəkildə istehlakçı hüquqlarını pozur və heç bir qaydaya məhəl qoymur. Digər vətəndaşların bu karqonun "tor"una düşməməsi və maarifçilik adına bu şikayətin mediada getməsini lazımlı və önəmli hesab edirik.
Hər halda müvafiq dövlət qurumuna göndərilən şikayət təəssüf ki,
nəticəsiz qalib. Daha doğrusu. qurumun geridönüş edən əməkdaşı, çox əcaib şəkildə, belə karqo barədə məlumat olmadığını bildirib və bununla bağlı başqa quruma müraciət etməyi tövsiyyə edib.

Halbuki, əgər bir karqo özbaşına fəaliyyət göstərirsə, bu da zatən QANUN POZUNTUSUDUR və həm elə "Antiinhisar" qurumunun məsuliyyət arealına daxil olan bir məsələdir.
Düşünürük ki, bu cür qaydasız karqoların ifşa olunması və layiqli cəzasını alması üçün vətəndaşın ümid yeri, mediadır.
Bundan dolayı da "Bahar" karqonun müştərisi olmuş Loğman Hüseynov adlı vətəndaşın haqlı və dramatik şikayətini, gündəmə gətirməniz üçün sizə təqdim edirik.Təşəkkürlər!

Əvvəla onu bildirməliyik ki, "Bahar karqo" adı daşınma şirkətindən ilk dəfə yayda istifadə etmişdik. Hələ o zaman əcaib bir problemlə qarşılaşmışdıq: yay fəslində "Neftçilər anbarı"nda kondisioner yoxdur!
Şirkətin əməkdaşı problemin tezliklə həll olacağını desə də, sonradan bunun səbəbini, "əlavə xərc olması" ilə əsaslandırdı.
Lakin, artıq bağlama çoxdan sifariş edilib gəlmişdi və tez xarab olan məhsul, zərər görmüşdü. Etirazlardan sonra, şirkət, məhsulun dəyərini qismən kompensasiya etməyə razılaşdı.
Bu qüsur, böyük bir problem demək idi, çünki çoxlu müştəri, yay fəslində qida maddələri və kosmetika məhsulları sifariş edir..
Lakin, məsafə yaxınlığı, vəd edilən qiymətin ucuzluğu səbəbindən, sonradan yenidən "Bahar" karqodan istifadə etməli olduq. Təbii ki, sərinlər düşdüyü zaman. Bu dəfə isə daha dramatik və əcaib problemlə qarşılaşdıq: şirkət, SAYTINDA VƏD ETDİYİ TARİFƏ əməl etmədi! Bağlamanın çəki haqqını çox hesabladı.
Belə ki, rəsmi saytında elan etdiyi tarifə əsasən, 10kq və üstü bağlamaların çəkisini 1,1 dollardan hesablayacağını vəd etsə də, 1,5 dollardan hesabladı. Şirkətə dəfələrlə etdiyimiz xəbərdarlıqlara, məsulu ilə apardığımız telefon danışığına baxmayaraq, inadından və səhvindən dönmədi. Karqo, bu qərarını belə bir absurd arqumentlə əsaslandırdı ki, onlar sosial mediada başqa cür tarif qeyd ediblər və müştəri də saytı deyil, sosial medianı əsas götürməliymiş. (!!)

Halbuki bir şirkət üçün əsas olan məhz saytıdır və üstəlik də 2 fərqli tarif elan etmək, zatən müştəri haqlarını və müvafiq qanunları aşkar şəkildə pozmaqdır! Şirkət bəlkə də bundan sonra sudan quru çıxmaq üçün problemi, hansısa texniki səhvlə əsaslandırmağa çalışacaq, lakin xəbərdarlıqdan sonra da səhvlərini düzəltməmələri, bu arqumenti bəribaşdan inkar edir. Və bu da o deməkdir ki, Ortada, AŞKAR SAXTAKARLIQ VƏ İSTEHLAKÇI HAQLARI POZUNTUSU VAR!

Qeyd: Şəkildə gördüyünüz kimi, BHK1450634 nömrəli bağlamanın çəkisi 10kq-dır və tarifə əsasən 11 dollar hesablanmalıydı, lakin 15 dollar hesablanıb!
___
P.S. Məsələnin mediada gündəmə gəlməsindən öncə, bu gülünc saxtakarlıq barədə rəsmi istehlakçı hüquqlarının müdafiəsi qurumunu xəbərdar etsək də, onlar tədbir görmək bir yana, belə bir şirkəti tanımadıqlarını bildirdilər.
Odur ki, ümidimiz siz dəyərli mediayadır!
Sizə, karqoyla yazışmanı və onun əcaib izahını da göndəririk.
Loğman Hüseynov
Teref.az olaraq qeyd edilən iddialarla bağlı qarşı tərəfin mövqeyini dərc edə bilərik!
Teref.az

Teref.az yazır ki, mövzunun aktual olduğunu nəzərə alaraq bu araşdırmanı yenidən saytımızda oxuculara təqdim edirik.
Hər halda meşələrimizin, Vətənimizin ciyərini, kislorod mənbəyini həqiqətən qoruyan məmurları mütləq tanımaq və onları qorumaq lazımdır! Bəs görəsən nəyə görə ona qarşı belə hücumlar düzənlənir? Araşdırmada bunu aydın şəkildə görmək olur!
Beləliklə Teref.az araşdırmanı təqdim edir:
Dünən ölkənin bir sıra saytlarında və sosial şəbəkələrdə Quba Regional Meşə Təsərrüfatı Mərkəzi ilə bağlı bir məlumat yayılıb.
Bir çox həmkarlarımız bu videoya istinad edərək, arxayıncasına məsələnin ictimailəşməsində, bəzi maraqlı qüvvələrə yardımçı olduqlarını bilməyiblər. Ona görə də, mənz belə ciddi saydığımız həmkarlarımızın prolemdən tam agah olması üçün, böyük bir araşdırma aparmışıq, gələn həftə təbii ki, ortalıqda olan bütün sənədlər, sübutlarla geniş bir reportaj təqdim edəcəyik. Hələlik isə, bu gün yayılan qərəzli, məqsədli informasiyaların mənbəyini və məqsədini bildiyimizə görə, reallığı bir neçə kəlmə ilə qısa çatdırmaq istəyirik.
Adıçəkilən idarə ilə, daha dəqiq desək, bu idarənin müdiri Elvin Baxışovla bağlı çoxdandır ki, şimalda reket jurnalistlər və böyük bir “parket mafiyası”nın arasında, amansız savaş gedir.
Bundan nəinki bölgədəki hər kəsin, hətta bildiyim qədər paytaxtda da bəzi qurumların xəbəri var.
Məsələnin mahiyyəti ondan ibarətdir ki, Quba Regional Meşə İdarəsinə bir müddət öncə təyin olunan gənc, gənc olmasına baxmayaraq, hamı tərəfindən savadlı və bacarıqlı kadr kimi xarakterizə olunan Elvin Baxışov, meşələrdəki qanunsuz ağac qırıntılarına konkret qadağa qoyub.
Bundan qəzəblənən “ağac oğruları”, bölgədə fəaliyyət göstərən reket jurnalistlərə müraciət edərək, onlardan yardım istəyib. Onlar da müdirdən, təbii ki, öz xislətlərinə uyğun müəyyən imtiyazlar, pul və sairə tələb ediblər. Doğru işlədiyini, buna görə də heç kəsə bir qəpik də verməyəcəyini vurğulayan gənc meşəçi, bu cavabı ilə reket dəstəsinin hədəfinə tuş gəlib. Durmadan köhnə, saxta, hətta bəzən bir yerin videosunu, köhnə olduğu üçün, başqa bir yer kimi təqdim edərək, bu gənc dövlət qulluqçusuna hücuma keçən reket jurnalistlər, bu gün də öz istəklərinə çatmadıqları üçün, öz dırnaqarası mübarizələrini davam etdirirlər.
Təəssüf ki, bu reket jurnalistlər, bəzi yaydıqları inandırıcı videolarla, ciddi saytların da diqqətini özlərinə çəkə biliblər.
Teref.az

Azərbaycan ordusu Ermənistana qarşı lokal xarakterli antiterror əməliyyatı keçirdiyi dönəmdə ordumuzun 192 əsgər və zabiti qəhrəmancasına torpağlarımızın süverenliyi uğrunda canlarından keçib şəhid oldular.

Amma təəsüflər olsun ki, bəzi vəzifəli şəxslər xüsusən də icra hakimiyyətinin məhul və vəzifəli şəxsləri istər şəhidin dəfni zamanı, istər "Anım günü" vaxtı bir neçə dəqiqə olsun üzlərində olan gülüş sevinc hissin saxlaya bilmirlər, sanki yasa yox hansısa övlad uşaqlarının toy məclisinə gəliblər.

"Azərbaycan Reallığı" xəbər veri ki bunlardan birdə "Anım günü" Quba rayon Şəhidlər Xiyabanında keçirilən tədbirdə rayon icra hakimiyyəti başçısının müavini Səidə Abasovanın üzündə olan gülüş hissi tədbirdə iştırak edən media nümayəndələrinin kamerasından yayınmayıb. Maraqlıdır ki, ordumuz bu qədər şəhid verdiyi bir dönəmdə Səidə xanımı bu qədər xoşbəxt edən mövzu nədir ki, belə gülür?

Bu cür xoşagəlməz mənzərə son vaxtlar demək olar neçənci dəfədir ki baş verir. Xəbər saytlarında və sosial şəbəkələrdə dəfələrlə belə halla qarşılaşırıq, tənqid olunsalar da nəticə çıxarmırlar. Nə demək olar, insanda ruh hiss olsun gərək

Qarşı tərəfində mövqeyini dərc etməyə hazırıq... //"Azərbaycan Reallığı"//

“Yaşadığımız bina 2015-ci ildə tikilib təhvil verilsə də, 8 ildən artıqdır ki, tikintini həyata keçirən “Zaman” Elmi-İstehsalat Müəssisəsindən (EİM) onu təhvil ala bilmirik. Həyətimizdə sakinlərin ümumi mülkiyyətinə verilməli olan ofis qanunsuz yollarla şirkət tərəfindən ələ keçirilib. Bütün binanı içməli su ilə təmin edən anbarın üzərində yerləşən ofisin təyinatı dəyişdirilərək yaşayış obyekti edilib, anbara giriş və havalandırma sistemi bağlanıb. Hazırda ərazidə yaşayan 850 sakinin həyatı təhlükə atındadır”.

Bu şikayətlə “Qafqazinfo”ya Binəqədi rayonu, Mirmahmud Kazımovski 54/56 ünvanında yaşayan bir qrup sakin müraciət edib.

Onların sözlərinə görə, binanın həyətindəki ofis 600 kub-metrlik su anbarı və nasosxananın üzərində tikilib. Ərazinin təhlükəsizlik kamerası, komendant və iclas otağı bu ofisdə yerləşir.

Sakinlər iddia edirlər ki, “Zaman” EİM tikinti şirkətinin rəhbərliyi həmin ofisə saxta yolla çıxarış alıb: “Əvvəlcə həmin obyekti kafe kimi işlətmək istəyirdilər, hazırda isə yaşayış yeri kimi istifadə olunur. Hətta həmin ofis binasına arxa tərəfdən giriş qapısı açıblar. Su anbarının havalandırma yeri və giriş-çıxış qapısı tutulub. Biz anbara daxil ola bilmirik, bunun üçün onlardan icazə alıb içəri girməliyik. Bu günərdə su anbarı daşmışdı, onlar da yatmışdılar deyə içəri girə bilmədik. Su boşuna axıb getdi. Ən dəhşətlisi odur ki, həmin yerdə ev heyvanları da saxlayırlar. Bir neçə it və tısbağaları su anbarının girişində, havalandırma sisteminin üzərində gəzirlər. Həmçinin obyektdə hamam, tualet də var ki, oradan anbara çirkab suların sızma ehtimalı var. Qanunvericiliyə görə, sanitar qovşaq, mətbəx içməli su anbarının üzərində yerləşə bilməz. Hazırda çox təhlükəli vəziyyət yaranıb.

Əslində, Mənzil Məcəlləsinin 35-ci maddəsində qeyd olunub ki, 1-dən artıq sakinə xidmət göstərən tikili və qurğular, o cümlədən, zirzəmi, mansard, ofis binası sakinlərin müştərək əmlakıdır və onların icazəsi olmadan sənədləşdirilə bilməz. Tikinti şirkətinin rəhbərliyi həmin obyekti ələ keçirmək üçün Əmlak Məsələləri Dövlət Xidmətinə müraciət etsə də, qanunsuz olduğuna görə oradan imtina vermişdilər. Bu dəfə su hövzəsinin üzərində yerləşdiyini gizlədərək məhkəməyə müraciət etdilər və 1 saylı Bakı İnzibati-İtisadi Məhkəməsinin qərarı ilə çıxarış əldə etdilər. Məhkəmə saxta sənəd əsasında qərar çıxardı”.

Sakinlər bildirirlər ki, problemlə əlaqədar Fövqəladə Hallar Nazirliyinə (FHN) rəsmi məktubla müraciət edilib. FHN-in Tikintidə Təhlüksizliyə Nəzarət Dövlət Agentliyinin əməkdaşları əraziyə baxış keçirərək sakinlərin dediyi nöqsanları təsdiqləyib. Aidiyyəti qurumlara problemin həlli ilə bağlı məktub göndərilsə də, hələ də heç bir tədbir görülməyib: “FHN-dən mütəxəssislər gəldi, həmin yerə baxış keçirildi və məktubda qeyd etdiyimiz bütün nöqsanlar aşkarlandı. Binamızın zirzəmisində qeyri-qanuni mebel sexi fəaliyyət göstərir, zirzəmini bölüblər, yanğın təhlükəsizliyi problemi yaranıb. Bir neçə anbar yeri düzəldib icarəyə veriblər. Bütün siqnalizasiya, yanğınsöndürmə qurğularının hamısının qarşısı bağlanıb. Həmçinin binamızın mansardında konstruksiya dəyişiklikləri olunub və bütün bunlar FHN-in məktubunda öz əksini tapıb. Baxmayaraq ki, FHN həmin problemləri aşkarladı, müraciətimizlə bağlı bizə rəsmi cavab verildi və nöqsanların aradan qaldırılması üçün məktubun bir nüsxəsi BŞİH-ə, Binəqədi İH-yə və hüquq-mühafizə orqanına göndərildi, hələ də heç bir tədbir görülmür”.

Sakinlər həmçinin qeyd ediblər ki, tikinti şirkəti binanı 3 ildir qeydiyyatdan keçirdikləri cəmiyyətə təhvil verməkdən boyun qaçırır: “2021-ci ildən “Binəqədi-28” Mənzil Mülkiyyətçiləri Müştərək Cəmiyyətini (MMMC) təsis etmişik. Ədliyyə Nazirliyində qeydiyyatdan keçdik, vergi orqanında qeydiyyata durduq və qanuni şəkildə fəaliyyət göstəririk. Amma “Zaman” EİM bizə daima maneə törədir, fəaliyyət göstərməyə imkan vermir. Prezidentin sərəncamı da var ki, çoxmərtəbəli yaşayış binası tikilib təhvil verildikdən sonra 1 ay ərzində MTK sakinlərə təhvil verib çıxmalıdır. Lakin “Zaman” rəhbərliyi qanunları saymır. Rəhbərlik tərəfindən bizə deyilir ki, sizə verilən sənədi qəbul etmirik. Müxtəlif bahanələrlə təhvil verməkdən imtina edilər”.

Sakinlər hazırda 1 saylı Bakı İnzibati İqtisadi Məhkəməsinə müraciət etdiklərini deyirlər. Onlar 3-cü tərəf kimi prosesə qoşulduqlarını, məsələnin araşdırılması üçün ekspertizanın təyin olunmasını tələb edirlər.

Problemlə bağlı “Zaman” EİM-nin rəhbəri Elşən Aslanovla əlaqə saxladıq. O, saytımıza açıqlamasında sakinlərin iddialarının əsassız olduğunu bildirdi: “Onu sakinlərin adından bir nəfər deyir, siz gəlin, yoxlayın. Burada obyektlərin hamısının dövlət tərəfindən verilən sənədi var. Su anbarının üzərində tikilən binanın 22 təşkilatdan icazəsi var. Qanunu, hər bir sənədi olan evə irad tuturlar. Əvvəl də şikayət olunub, İcra Hakimiyyətindən, FHN-dən gəlib baxıblar ki, sənədimiz var, üzr istəyib gediblər. Bütün deyilənlər barədə məlumatlıyıq. Sakinlərin iddiaları əsassızdır. Burada sənədsiz heç bir iş görülməyib. Həmin obyektə dövlət tərəfindən çıxarış verilib və özəlləşdirilib. Həmçinin, binanın zirzəmisi, mansardı da özəl yerdir, onların sahibləri var”.

Sözügedən binanın illərdir niyə sakinlərə təhvil verilməməsinə gəlincə isə E. Aslanov bildirdi ki, “Binəqədi 28” MMMC özü binanı təhvil almır: “Siz bunu onlardan soruşun. Biz yalvarırıq ki, gəlin təhvil götürün, gəlib götürmürlər. Təhvil-təslim olunmamış, yalandan xəbərimiz olmadan bir firma açıblar və fəaliyyət götərirlər. Biz də deyirik gəlib təhvil götürün, gəlmirlər, uzadırlar”.

Problemlə bağlı Binəqədi Rayon İcra Hakimiyyəti ilə əlaqə saxladıq. Qurumdan sözügedən binalarda yaşayan sakinlərin yuxarı dövlət qurumlarına və Rayon İcra Hakimiyyətinə ünvanladıqları əvvəlki müraciətləri əsasında ərazidə araşdırma aparıldığı bildirildi. Araşdırma zamanı binaların qaz, su, işıq və istilik xətti ilə təchiz olunmasına baxmayaraq, sayğaclaşdırma işlərinin başa çatdırılmadığı və binaların idarə edilməsi ilə bağlı sakinlərlə müəssisə arasında mübahisənin yarandığı məlum olub.

Məsələ ilə əlaqədar sakinlər Rayon İcra Hakimiyətinə dəvət olunub və “Zaman” EİM ilə razılaşdırılaraq bağlanmış müqavilə öhdəlikləri ilə bağlı aralarında yaranmış mübahisəli məsələlərə aydınlıq gətirilməsi üçün aidiyyəti üzrə məhkəməyə müraciət etmələri, kommunal xidmətlərin dəyərinin ödənişində mövcud olan problemlərin araşdırılması və hüquqlarının bərpası barədə qanunvericiliyin tələbləri ətraflı izah edilib: “Göstərilənlərlə yanaşı qaz, su, işıq və istilik sayğaclarının quraşdırılması işlərinin başa çatdırılması, həmçinin baş verə biləcək bədbəxt hadisələrin qarşısının alınması istiqamətində qabaqlayıcı tədbirlərin görülməsi “Zaman” EİM-in rəhbərliyinə tapşırılıb. Yol verilən hüquqazidd əməllərin və digər qanun pozuntularının araşdırılaraq qanunamüvafiq tədbirlərin görülməsi üçün Binəqədi Rayon Polis İdarəsinə məktubla müraciət olunub. Həmçinin əlavə məlumat üçün bildiririk ki, sözügedən tikililərin inşası uzun illər öncə aparılıb və hazırda hər hansı əlavə dəyişikliklərin edilməsi halları müəyyən edilməyib. Rayon İcra Hakimiyyəti tərəfindən qeyd olunan məsələ ilə bağlı hər hansı bir rəy bildirilməyib və heç bir icazə sənədi verilməyib. Gələcəkdə aparılacaq hər hansı qanunsuz tikinti işlərinin qarşısının alınması məqsədilə sahə nəzarətə götürülüb”.

Fövqəladə Hallar Nazirliyindən sorğumuza cavab olaraq bildirildi ki, sözügedən məsələ məhkəmə orqanları tərəfindən araşdırılır: “Hazırda “Zaman” EİM rəhbərliyi ilə "Binəqədi-28" MMMC arasındakı mübahisəli məsələyə məhkəmə orqanları tərəfindən baxılır”.

Saxta sənəd ittihamları ilə bağlı 1 saylı Bakı İnzibati İqtisadi Məhkəməsinə müraciətimizə isə belə cavab aldıq: “Həmin iş icraatdadır və məhkəmə araşdırması davam edir”.

Gülnar Əliyeva

Xatırladaq ki, bir müddət bundan əvvəl Bakıda insanları aldadaraq pul alıb güzəştli şərtlə onlara ipoteka kreditilə ev veriləcəyini vəd edən şirkətlə bağlı polisə şikayət daxil olmuşdu. Şikayətçilərin sayı 30-dan çox idi və vətəndaşlara dələduzluq yolu ilə 250 min manatdan çox ziyan vurulmuşdu. Söhbət Xətai rayonu ərazisindəki Ağ Şəhərin Mərkəzi Bulvar küçəsində fəaliyyət göstərən “Evimiz İpoteka” MMC şirkətindən gedir. “Evimiz İpoteka” MMC şirkətinin təsisçisi Əmrahov Vüqar Rasim oğlu olsa da, ev almaq istəyən vətəndaşlarla müqaviləni qardaşı Əmrahov Ramin Rasim oğlu bağlayırmış. Onun köməkçisi, sənədləri qəbul edən şəxs isə Günel Əmirova olubdu. Həmin vaxtlar sosial şəbəkədə yayılan videodan da göründüyü kimi vətəndaşların polisə şikayətindən sonra Ramin Əmrahov və onun dəstəsi ofisi tərk edərək qaçıblar.
Videoda şikayətçi Günel Vəliyeva deyir ki, Ramin Əmrahov mənə dedi ki, sənə 4 faizlə güzəştli ipoteka krediti düşür və məndən 15 min manat pul istədi. Şikayətçi sonra deyir ki, mən pulu Ramin Əmrahova verdim və müqavilə imzaladıq. Alqı-satqıya 2-3 gün qalmış Ramin telefona cavab vermədi, onda bildim ki, bu adam dələduz imiş…
Başqa bir şikayətçi Cəlal Şükürovun sözlərinə görə, sözügedən şirkətin rəhbərliyi fırıldaqçılıqla məşğuldur. Cəlal Şükürovun şikayətini olduğu kimi təqdim edirik: “Nişanlıyam, 24 yaşım var. Mənzilə ehtiyacımız olduğu üçün valideynlərimlə birgə “Evimiz İpoteka” MMC şirkətinə üz tutduq. Mənzili anamın adına ipoteka ilə almaq istəyirdik. Çünki müəllimlərə 4 faizlik güzəşt tətbiq olunduğu bildirildi. Anam müəllimədir. Mən öz adıma 8 faizlə ala bilərdim. Fevral ayının 2-də şirkətin direktoru Əmrahov Ramin Rasim oğlu ilə müqavilə bağladıq. 7 min manat ödəniş etdik. Şirkətin təsisçisi Əmrahov Vüqar Rasim oğludur. Ancaq bütün müqavilələri Ramin adlı şəxs bağlayır. Qısası, fevralın 18-dən bu günə qədər həmin şəxs zənglərimizə baxmır. Müqavilə bağladığımız yerə də dəfələrlə baxdıq, ancaq heç kimi tapa bilmədik. Valideynlərinin qapısına gedəndə onlar “bizim belə bir övladımız yoxdur” dedilər. Yəni övladları ilə əlaqəni kəsiblər, həmin şəxs valideynlərinin yanında görəsən o dərəcə hörmətini itiribmi? Sonradan bizə məlum oldu ki, bu şirkət ümumi 30 şikayətçidən təxminən 250 min manata yaxın vəsait mənimsəyib”.
Başqa bir şikayətçi Cahid İsmayılov isə deyir ki, güzəştli ipoteka krediti ilə mənzil almaq üçün Ağ Şəhərdəki “Evimiz İpoteka” MMC şirkətindən gedib. Və orada Əmrahov Ramin Rasim oğlu ilə söhbət eləyib, 6 min manat verərək, müqavilə bağlayıb. Sonradan Ramin telefonlara cavab verməyib. Başqa bir şikayətçinin əmisi oğlu Şükürov İlqar bildirir ki, yaxın qohumlarının üç nəfər – Samid, Niyaməddin, Arif ümumilikdə 22 min manat pulu “Evimiz İpoteka” MMC şirkətinin rəhbərinə veriblər. Amma bu günə qədər nə evdən, nə də ki puldan heç bir xəbər yoxdur. Sözün qısası, 30-dan artıq vətəndaşımız dələduz dəstənin qurbanına çevrilibdi.
Qeyd edək ki, bu müraciətdən bir müddət sonra Daxili İşlər Nazirliyi lazımi araşdırmalar apardı və vətəndaşlar haqlı olduğu üçün Nizami RPİ-də cinayət işi başlanaraq Ramin həbs edildi. Aktualxeber.az-a daxil olan yeni məlumata görə artıq bir neçə gündür Raminin atası Rasim zərərçəkənlərə zəng edərək təhdid edir ki, şikayətlərini geri götürməsələr oğlu türmədə intihar edəcək və pulları da batacaq. Beləliklə onlar dələduzluğun yeni formasını tətbiq etməyə cəhd edirlər. Əgər vətəndaşlar şikayətçi olmasalar Raminin azadlığa çıxa biləcəyini düşünürlər. Bütün bu oyunlardan hüquq-mühafizə orqanları da xəbərdardır və ümidvarıq ki, tezliklə günahkarlar cəzalanacaq, vətəndaşlara dəyən ziyan da ödəniləcəkdir.
Qarşı tərəfi də dinləməyə hazırıq.
Aktualxeber.az