44 günlük Vətən müharibəsində Azərbaycanın qazandığı Şanlı Qələbədən sonra 10 noyabr 2020-ci il tarixində üçtərəfli bəyanatın imzalanmasından sonra Qarabağ bölgəsində nisbi sabitlik yarandı, ölkəmiz 30 il düşmən işğalında olan torpaqlarımızda bərpa-quruculuq işlərinə başladı və bu ərazilərdən didərgin düşmüş soydaşlarımızın doğma yerdlarına qayıdışlarına start verildi. Bu gün azad edilən ərazilərdə geniş quruculuq işləri həyata keçirilir və bu işlər günü-gündən daha geniş vüsət alır.
Təəssüflər olsun ki, üçtərəfli bəyanatın müddəalarına zidd olaraq Azərbaycanın Qarabağ bölgəsindəki Ermənistan silahlı qüvvələrinin birləşmələrinin bir hissəsi hələ də qalmaqdadır və onların mövcudluğu regional sülh və sabitlik üçün ciddi təhlükə mənbəyi idi. Öz mənfur əməllərindən əl çəkməyən ermənilər Azərbaycana qarşı apardığı məqsədyönlü və planlı terror siyasətinin davamı olaraq sentyabrın 19-da Ermənistan silahlı qüvvələrinin Azərbaycanın Qarabağ bölgəsindəki birləşmələrinin kəşfiyyat-diversiya qrupları tərəfindən Əhmədbəyli-Füzuli-Şuşa avtomobil yolunda terror məqsədilə əvvəlcədən quraşdırılmış minanın partlaması nəticəsində Azərbaycan Avtomobil Yolları Dövlət Agentliyinə məxsus nəqliyyat vasitəsi sıradan çıxmış və mülki şəxslər həlak olub. Həmin gün Daxili İşlər Nazirliyinin Daxili Qoşunlarının hərbi qulluqçularını daşıyan nəqliyyat vasitəsinin də Ermənistan silahlı qüvvələrinin kəşfiyyat-diversiya qrupları tərəfindən quraşdırılmış minaya düşməsi nəticəsində hərbi qulluqçularımız həlak olub və yaralanıb.
Bütün bu genişmiqyaslı təxribatların qarşısının alınması, Ermənistan silahlı qüvvələrinin birləşmələrinin tərksilah edilərək ərazilərimizdən çıxarılması, onların hərbi infrastrukturunun zərərsizləşdirilməsi, işğaldan azad edilmiş ərazilərə qayıdan dinc əhali, habelə bərpa-quruculuq işlərinə cəlb olunmuş mülki işçilər və hərbi qulluqçularımızın təhlükəsizliyinin təmin olunması və Azərbaycan Respublikasının konstitusiya quruluşunun bərpa edilməsi məqsədilə sentyabrın 19-da bölgədə lokal xarakterli antiterror tədbirlərinə başlanıldı. Azərbaycan Ordusu bu dəfə də dünyada misli görülməmiş hərbi uğura imza atdı. Əməliyyat nəticəsində 1761 hədəf məhv edildi, amma 1 nəfər belə mülki sakinə zərər dəymədi. Eyni zamanda, revanşist qüvvələrə, ermənilərin arxasında duran dövlətlərə və təşkilatlara gücümüzü göstərdik. Azərbaycanın torpaqlarında gözü olanlara qandırdıq ki, biz güclüyük və basılmazıq.
Azərbaycanın Qarabağ bölgəsində 10 mindən artıq Ermənistan silahlı qüvvələrinin birləşmələri və qeyri-qanuni erməni silahlı dəstələri mövcud idi. Halbuki, məlum üçtərəfli Bəyanata əsasən, Qarabağ ərazisindəki erməni yaraqlıları 3 il əvvəl tərksilah edilməli idilər. Azərbaycan işğala məruz qalan tərəf olsa da Qarabağda baş verən gərginliyin aradan qaldırılması, azərbaycanlılarla ermənilərin birgə yaşayışını təmin edəcək reinteqrasiya prosesinin normal davam etməsi və məsələnin ikitərəfli danışıqlar yolu ilə həllini tapması üçün 3 il müddətində əlindən gələni etdi. Təəssüf ki, ölkəmizin bu tip humanist çağırışlarının əvəzində erməni silahlı qüvvələri Qarabağda sayını artırmaqla, yeni silahlar alıb təxribatlar törətməklə məşğul oldular. Hətta vəziyyət o həddə çatmışdı ki Qarabağda separatçılar müstəqillik iddialarından əl çəkmir, özlərinin qondarma «prezident»lərini seçir, qondarma «parlament»lərinin adından dövlətimizə qarşı sərsəm bəyanatlar verirdilər. Bütün bunlar isə özünü təmkinli aparan Azərbaycan xalqının və Müzəffər Ali Baş Komandanımızın səbir kasasını daşırdı. Nəticədə Qarabağdakı antiterror tədbirləri qaçılmaz oldu. Sentyabrın 20-də separatçılar ağ bayraq qaldıraraq təslim olduqlarını elan etdilər. Xüsusilə Qarabağın erməni sakinlərinin nümayəndələrinin Rusiya sülhməramlı kontingenti vasitəsilə müraciətini nəzərə alaraq, tam atəşkəs haqqında razılaşma əldə olundu və 2023-cü il sentyabrın 20-də saat 13:00-da lokal xarakterli antiterror tədbirləri dayandırıldı.
Bir daha qeyd etmək lazımdır ki, lokal xarakterli antiterror tədbirləri ordumuzun hərbi gücünün, yüksək döyüş hazırlığının və səriştəsinin göstəricisi oldu. Əgər hər günü bir şərəfli tarix olan 44 günlük Vətən müharibəsi zamanı ordumuzun nümayiş etdirdiyi müasir döyüş üslubu dünya hərb tarixində yeni səhifə açmışdısa, bu cür qısamüddətli uğurlu antiterror əməliyyatı ilə o, yenidən tarix yazdığını bütün dünyaya nümayiş etdirdi. İyirmi dörd saatdan da az müddətə sığan və uğurla yekunlaşan antiterror tədbirləri unikal hərbi əməliyyat kimi dünya səviyyəsində böyük heyranlıqla qarşılandı. Bununla da xalqımız ölkəmiz uzun illərdən bəri həsrətində olduğu böyük Qələbə nəticəsində tarixi torpaqları üzərində özünün suverenliyini tam bərpa etmiş oldu. Bir sözlə, Qalib Sərkərdə, Müzəffər Ali Baş Komandan İlham Əliyev canından da çox sevdiyi xalqı üçün həlli mümkünsüz görünən vəzifəni reallaşdırdı.
2023-cü ilin sentyabrın 20-də qazandığımız hərbi qələbə ilə ölkəmizin suverenlini tam bərpa etdik. Bu Azərbaycan xalqının həyatında ən müqəddəs gündür. Məhz elə buna görə də Prezident İlham Əliyevin 19 sentyabr 2024-cü il tarixli Sərəncamı ilə hər ilin sentyabrın 20-si Azərbaycan Respublikasında Dövlət Suverenliyi Günü kimi qeyd ediləcəkdir. Sərəncamda deyilir: «Hər bir xalq üçün öz taleyinə sahib olmaq, müstəqil dövlətini yaradaraq inkişaf etdirmək onun ən böyük nailiyyətidir. Tarixin müxtəlif mərhələlərində üzləşdiyi çətinliklərə, işğala, məhrumiyyətlərə baxmayaraq, heç bir qüvvə xalqımızın müstəqillik, dövlətçilik əzmini sarsıda bilməmişdir. Azərbaycan xalqı bu gün öz müstəqil dövlətinə sahibdir, qəhrəman əsgər və zabitlərimizin, şəhidlərimizin qanı hesabına əldə edilmiş ərazi bütövlüyümüz, suverenliyimiz xalqımızın milli sərvətidir». Prezidentin digər Sərəncamı ilə 20 sentyabr həm də Xankəndi, Xocalı, Xocavənd və Ağdərə Şəhər Günü kuimi qeyd edələcəkdir.

İlqar Əliyev – Dövlət İdarəçilik Akademiyası

Yeni dərs ilinin başlanması özü ilə bərabər valideynlər üçün də əlavə problemlər gətirib. Yenicə məktəbli geyimləri, çanta, məktəb ləvazimatları üçün xərcə düşən valideynlərdən müəllimlər əlavə dərs vəsaitləri, qayda kitabları, testlər toplusu, iş dəftərləri almağı tələb edirlər. Bu da haqlı olaraq valideynlərin narazılığına səbəb olur.

Valideynlərlə söhbət zamanı bildirirlər ki, elə birinci sinifdən başlayaraq müəllimlər onlardan əsas fənlərdən ən azı bir test, iş dəftərləri, qayda kitabı tələb edir. Narazılıq edəndə isə bildirirlər ki, bunlar sizin uşaqlarınız üçündür, dərs vəsaitləri proqramı tam əhatə etmir. Bu isə valideynlər üçün kifayət qədər əlavə maddi yükdür. Axı elə ailə var ki, iki-üç uşaq məktəbə göndərir...

Digər tərəfdən bu kitablar və sayı, adları bitib-tükənməyən əlavə vəsaitlər təkcə maddi yük deyil, həm də sözün əsl mənasında YÜKdür. Uşaqların daşımağa çətinlik çəkdiyi, əməlli fiziki ağırlıq yaradan YÜK. Bu onların sağlığına da ziyandır. Valideynlərlə söhbət zamanı bildirdilər ki, bu kitabaların içində Elm və Təhsil Nazirliyi tərəfindən təsdiqlənən kitablar olsa da, müəllimlərin çoxu hazırda reklam olunan müxtəlif kursların kitablarını almağı tələb edir.

Hər müəllim hansı kursla işləyirsə, onların da kitabını tələb edir. Onların sırasında "Hədəf" Kurslarının, "Çinar" Yayımlarının, "İzə" nəşriyyatının, "Güvən" kurslarının, "Dahi" kurslarının, "EduGrata" kurslarının, Namazovun kitabları üstünlük təşkil edir. Bu kitabların çoxu satışda olsa da bəzilərini elə kursların özündən almağa məcbur olurlar.

Kurslar isə qeyd edirlər ki, kitablar nazirliyin təsdiqlədiyi proqrama uyğun çap edilib. Hər kitabın qiyməti isə minimum 5-6 manatdan başlayaraq 15-20 manata qədər artır.

Nəzərə alsaq ki, son dövrlər övladlarını daha "yaxşı məktəbdə" oxutmaq dəb halını alıb, ibtidai sinifdən bu uşaqlar elə həmin kitabların ağırlığı ilə həm zehni, həm də fiziki yüklənir.

Valideynlər deyir ki, özünüz kitab mağazalarına baş çəksəniz, deyilənlərin həqiqət olduğunu müşahidə edərsiniz.

Bu məqsədlə paytaxtın bir çox kitab mağazasında olduq. Satıcılarla söhbət zaman bildirdilər ki, son bir neçə ildir əlavə dərs vəsaitlərinə tələb çox artıb. Bunların arasında elələri var ki, bir-birinin oxşarıdır, amma yenə də müəllimlər tələb edir.

Elə kitab mağazasında övladı bu il 6-cı sinifə gedən valideynlə söhbətimiz zamanı bildirdi ki, artıq onlardan dərsin ilk günlərindən müxtəlif iş dəftəri, kursların qayda kitabı tələb olunub. Bu zaman isə müəllimlər tələb edir ki, həmin vəsaitlər ötən illərin yox, elə bu ilin nəşri olmalıdır.

Burda isə valideyinlərin haqlı sualı yaranır. Əgər dərs vəsaiti müəllimləri qane etmirsə, onun proqrama uyğun olmadığını əsaslandırırlarsa, bir müəllim kimi bu problemi niyə Elm və Təhsil Nazirliyinin qarşısında qaldırmırlar? Nazirlik dərs proqramlarını əhatə edən kitablar nəşr etdirmirsə, bu fərdi kurslar, müxtəlif şəxslər təhsil proqramını tam əhatə etdiklərini deyən kitabları necə çap etdirirlər? Kimdir bu işdə maraqlı tərəf?

Mövzu ilə bağlı Qaynarinfo-ya danışan təhsil eksperti Günay Qurbanova bildirdi ki, məsələ təhsilimizin ən acınacaqlı problemlərindən biridir:

"Lakin görünür, bu, həm Elm və Təhsil Nazirliyinə, həm də müəllimlərə sərf edir. Görünür, burada gizli bir əlin himayəçiliyi var. Satılan bu əlavələr "dərslik mafiyası"nın maraqlarına xidmət edir.

Sizə bir fakt deyim, əvvəllər şagirdlər xarici dillərdə olan lüğətlərini öz əlləri ilə hazırlayırdılarsa, indi müəllimlər bu lüğətlərin də hazır alınmasını tələb edir. Sanki hamı birləşib bir və ya bir neçə nəfərin cibinə işləyir".

G.Qurbanova son olaraq vurğuladı ki, artıq Elm və Təhsil Nazirliyi onların sifarişi ilə və dövlət vəsaiti hesabına dərc edilən dərsliklərin niyə proqramı tam əhatə etmədiyinə bütün şəffaflığı ilə aydınlıq gətirməlidir.

Qaynarinfo olaraq qeyd edək ki, biz də öz növbəmizdə mövzunu təhsil ekspertləri və ictimaiyyət nüməyəndələri ilə davamlı müzakirə edərək, diqqətdə saxlayacağıq.

qaynarinfo

Azərbaycanda ən geniş yayılmış xəstəliklərdən biri də şəkər xəstəliyidir. TəəSsüflə qeyd edirik ki, bu xəstəlikdə yaş həddi yoxdur. Şəkərli diabet insulin ifrazının, insulin təsirinin və ya hər ikisinin pozulması nəticəsində ortaya çıxan, qanda şəkərin miqdarının yüksəlməsi ilə gedən xroniki metabolik xəstəlikdir. Digər xəstəliklərdən fərqli olaraq, şəkər xəstələri hər gün iynə-dərman qəbul etməlidir. Əks halda vəziyyətləri ağırlaşa bilər.

Redaksiyamıza şəkərli diabet xəstələrindən çoxsaylı şikayəytlər daxil olur. Şikayətçilər iddia edirlər ki, onlara ayrılan dərmanları hər ay xəstəxanadan çox çətinliklə alırlar: “Bizi get-gələ salırlar, “dərman yoxdur” deyirlər. Nə “Amaril 4” var, nə də əvəzedicisi olan “Mepril 4” (Glimepiride). Yanvarın 5-6-da almalı idik, dedilər ayın 10-dan sonra gəlin, sonra dedilər 15-dən sonra olacaq. Amma hələ də verilmir. Bu gün də gedənlərə deyiblər ki, o dərmanlar hələ yoxdur. Səbəb də demirlər.

Hamımız şəkəri yüksək olan xəstələrik, belə əsəb keçirəndə daha da yüksəlir. Olmaz axı. Bir də görürsən, deyirlər ki, dərman az sayda gəlmişdi, tez gələn xəstələrə çatdı. Biz başa düşmürük ki, bu dərmanlar qeydiyyat sayına uyğun gəlirsə, hara yoxa çıxır?”.

Əlbəttə, xəstələrə maraqlı olduğu kimi, bu sual, yəni dərmanların hara “yoxa çıxması” bizə də maraqlıdır. Doğrudan da, bu dərmanlar xəstələrin sayına uyğun ayrılırsa, niyə çoxları bunu ala bilmir?

Xəstələrin bəziləri iddia edirlər ki, həkimlər dərmanı apteklərdən aşağı qiymətə ağır vəziyyətdə olan xəstələrə satırlar.

Şübhəsiz, redaksiyamıza çox sayda şikayət gəlirsə, mümkün deyil ki, mövcud durumdan Səhiyyə Nazirliyinin xəbəri olmasın. Əgər deyilənlər doğrudursa, Səhiyyə Nazirliyi hansı səbəblərə görə bu şikayətlərə biganə yanaşır?! Maraqlı suallar çoxdur, amma cavab verəcək səlahiyyətli şəxslər yoxdur.

Ümumiyyətlə, şəkərli diabet yaranma faktorlarına görə “Tip 1 DM”, “Tip 2 DM”, hamiləlik diabeti kimi bir neçə tipə bölünür. Əgər insulin çatışmazlığı varsa, yaxud da ümumiyyətlə insulin ifraz olunmursa, bu hal “Tip 1 DM”ə aiddir. Adətən, bu tip 30 yaşa qədər insanlarda rast gəlinir. Bura uşaqlar və yeniyetmələr də daxildir. Bu xəstələrin müalicəsində insulin inyeksiyalarının qəbulu və qidalanmaya diqqət etmək şərtdir. Həmçinin, fiziki aktivlik də önəmlidir. Çünki xəstə müalicə olunmadığı halda diabetik komaya girə, hətta ölə bilər.

“Tip 2 DM” isə insulinə qarşı müqavimətin və ya insulin sekresiyasının azalması il bağlıdır. Daha çox 30 yaşdan yuxarı və artıq çəkidən əziyyət çəkən insanlarda rast gəlinir. Bu tip xəstəlikdə genetik faktor çox böyük rol oynayır. Belə ki, əgər valideynlərdə şəkərli diabet varsa, uşaqlar 38 faiz risk daşıyırlar.

Xəstəliyin fəsadlarını araşdırmaqla bitməz. Bu, həmçinin risqli xəstəlikdir. O cümlədən, qohumları birinci dərəcəli şəkərli diabet olan şəxslər risk qurupuna daxildir. Eləcə də artıq çəkidən və yüksək qan təzyiqindən əziyyət çəkən, 4 kiloqramdan artıq uşaq dünyaya gətirən, az hərəkət edən, yaşı 45-dən yuxarı olan şəxslər də risk qrupuna aiddir.

Genetik faktor mühüm əhəmiyyət kəsb etsə də, şəkərli diabeti yaradan başqa səbəblər də var. Bura artıq çəki, oturaq həyat tərzi, sağlam qidalanmamaq kimi amillər daxildir. Genetik faktor mühüm rol oynadığından birinci dərəcəli qohumlarınız arasında şəkərli diabet xəstəsi varsa, həyat tərzinə, qidaya və çəkiyə xüsusi diqqət yetirməlisiniz. Lakin bu heç də o demək deyil ki, şəkərli diabet xəstəsi olan qohumunuz varsa, siz də mütləq bu xəstəliyə yoluxacaqsınız. Sadəcə, bütün ehtimallara qarşı özünüzü qorumağınızı tövsiyə edirik.

Keçək əsas məsələyə. Bəs bu xəstələr dərmanlarını rahat şəkildə xəstəxanalardan alıb müalicə oluna bilirlərmi?

Məsələ ilə bağlı Tibbi Ərazi Bölmələrini İdarəetmə Birliyi (TƏBİB) ilə əlaqə saxladıq. Qurumdan sorğumuza belə cavab verildi: “Bildiririk ki, şəkərli diabetdən əziyyət çəkən vətəndaşlar üçün təyin edilən dərman preparatlarının təminatı "Şəkərli diabet xəstəliyinə tutulmuş şəxslərin insulin və digər şəkərsalıcı dərman preparatları, inyeksiya və özünənəzarət vasitələri ilə təminatı Qaydası"nın təsdiq edilməsi haqqında Azərbaycan Respublikası Nazirlər Kabinetinin 87 saylı qərarına əsasən həyata keçirilir. Sözügedən qərara əsasən, şəkərli diabet xəstələri üçün nəzərdə tutulan insulinin həcmi aylıq maksimal 1200 təsir vahidi, həblərinin yekun cəmi isə 60-dır.

Hər ayın sonunda TƏBİB-in tabeliyində olan tibb müəssisələri tərəfindən təqdim edilən tələbnamə əsasında şəkərsalıcı dərman preparatları növbəti ayın əvvəlindən etibarən mərhələli şəkildə respublika üzrə paylanılır. Dərman təminatı tələbatdan asılı olaraq, növbəlilik prinsipi ilə həyata keçirilir”.

Jalə FAMİLQIZI

Redaksiyadan: Mövzu ilə bağlı araşdırmamız davam edəcək.
/hurriyyet.az

Hesablama Palatası 2024-cü ilin İş planına əsasən keçirdiyi nəzarət tədbirləri nəticəsində keçmiş “Azərbaycan Dövlət Bədən Tərbiyəsi və İdman Akademiyası”, hazırda isə Azərbaycan İdman Akademiyası publik hüquqi şəxsdə nöqsanlar aşkar edib.Bu barədə 2024-ci il iyulun 25-də Hesablama Palatasının sədri Vüqar Gülməmmədovun rəhbərliyi ilə növbəti Kollegiya iclası keçirilən zaman məlumat yayıldı.Çox maraqlıdır ki,yayılan bu məlumatda ali təhsil müəssisəsində nə kimi nöqsanların aşkar edildiyi açıqlanmır və “sirr” kimi saxlanılır.Görəsən Hesablama Palatasının bu məlumatları yaymamaqda hansı maraqları var?

Mediatv.az palataya istinadən xəbər verir ki, nəzarət tədbirləri səmərəlilik (performans) auditi ilə birgə keçirilən uyğunluq auditi növündə aparılıb.Audit ötən illərdə Universitet tərəfindən dövlət vəsaitlərinin və digər dövlət əmlakının idarə olunmasının və istifadəsinin hüquqi aktların tələblərinə uyğunluğunun, eləcə də elm və təhsil sahəsində funksional fəaliyyətinin qiymətləndirilməsi məqsədi daşımışdır. Auditin əhatə etdiyi illərdə Universitetə dövlət büdcəsindən, ödənişli təhsildən və digər mənbələrdən vəsait daxil olmuşdur.Təhsil haqqının və təqaüdlərin maliyyələşdirilməsi istiqamətində ayrılmış dövlət vəsaitlərinin icrası prosesində ciddi nöqsanların olduğu daxil olmuş məlumatlar siyahisindədir. Bundan əlavə Mediatv.az xəbər portalı internet üzərindən araşdırma apararaq aşağıdakıları dəqiqləşdirib:

Azərbaycan İdman Akademiyası xarici markalı avtomobillər alınmasına son bir ildə 300 min manat civarında vəsait xərcləyib. “TOYOTA ABSHERON MERKEZI” MMC ilə 101.900 manat məbləğində satınalma müqaviləsi 31.05.2024-cü ildə, “AUTO AZƏRBAYCAN” MMC ilə 76.499 manat məbləğində satınalma müqaviləsi 02.02.2024-cü ildə, “TOYOTA ABSHERON MERKEZI” MMC ilə 76.500 manat məbləğində satınalma müqaviləsi 15.01.2024-cü il, “ROTARY MOTORS” MMC ilə 42.400,01 manat məbləğində satınalma müqaviləsi 07.12.2023-cü il tarixlərində bağlanılıb.Bundan başqa məlum oldu ki, Azərbaycan İdman Akademiyası hər il maşın və avadanlıqların satınalınmasına da külli miqdarda vəsait xərcləyir. Maşın və avadanlıqların satınalınması üzrə “Ultra Technologies” MMC ilə 628.670,96 manat 06.06.2024-cü il, “Isoft” MMC ilə 956.510,42 manat 09.10.2023-cü il, “Ultra Technologies” MMC ilə 709.994,62 manat 22.09.2022-ci il, “Ultra Technologies” MMC ilə 398.945,73 manat 16.08.2021-ci il, “Isoft” MMC ilə 103.972,51 manat 10.11.2020-ci il tarixlərində satıpnalma müqavilələri bağlanılıb ki, ümumi dəyəri 2798091 manat təşkil edib.Bu MMC-lərlə bağlanmış müqavilələrin əksəriyyəti şübhə döğurur. Çünki xüsusi ixtisas və təcrübə tələb edən bu işləri görmək üçün bir neçə ildə yaranan, nəinki rəsmi veb-səhifəyə, hətta sosial şəbəkə hesabına sahib olmayan bu şirkətlərin hansı peşəkarlığa və təcrübəyə sahib olacağı aydın deyil.Qeyd edək ki, “Dövlət satınalmaları haqqında” Qanunun 6-cı maddəsində malgöndərənlərin (podratçıların) ixtisasına dair tələblər yer alıb. Həmin maddənin 6.2.1-ci bəndində açıq şəkildə yazılır ki, satınalma müqaviləsinin icrasını təmin etmək üçün müvafiq sahədə peşəkarlığının, təcrübəsinin, texniki və maliyyə imkanlarının, işçi qüvvəsinin, idarəetmə səriştəsinin, etibarlılığının olması lazımdır.“Dövlət Satınalmaları Haqqında” Azərbaycan Respublikası Qanununda açıq, aşkar qeyd olunur ki, iddiaçının son 1 (bir) ildəki (əgər daha az müddət fəaliyyət göstərirsə, bütün fəaliyyəti dövründəki) maliyyə vəziyyəti barədə bank tərəfindən verilmiş arayış; İddiaçının son 3 (üç) illik iş təcrübəsi, yerinə yetirdiyi işlər və müqavilələr barədə məlumatlar; İddiaçılar müvafiq satınalma müqaviləsini təmin etmək üçün müvafiq sahədə peşəkarlığının, işçi qüvvəsinin (cəlb olunacaq mütəxəssislərin peşə səviyyəsini təsdiq edən sənəd əlavə edilməlidir), texniki imkanlarının olması barədə məlumatlar mütləq olmalıdır. Bunlar olmadıqda iddiaçı tender müsabiqəsinə buraxılmamalıdır.Məsələ burasındadır ki, müsabiqənin qalibi olmuş bu MMC-lərdən vergi borcu olanı olub .İş burasındadır ki, “Dövlət Satınalmaları haqqında” Qanunun 6.2.5-ci maddəsinin tələbləri vergi borcu olan şirkətlərin tenderdə iştirakını istisna edir. Tenderdə iştirak üçün sənədlər təqdim olunarkən Azərbaycan İdman Akademiyasının Tender Komissiyasının üzvləri məgər bunları görməyib?Azərbaycan İdman Akademiyasını belə MMC-lərlə görəsən hansı maraqlar birləşdirir?
Hesablama Palatası Bakı Dövlət Universitetində hansı nöqsanları aşkarladığını yaydığı halda, Azərbaycan İdman Akademiyasında yol verilən nöqsanları tam açıqlamayıb. Yuxarıda qeyd etdiklərimiz İdman Akademiyasının il ərzində keçirdiyi onlarla tender və kotirovka sorğularının bir hissəsidir ki, yol verilən nöqsanlar açıq aydın görsənir. Digər yol verilən nöqsanları isə Hesablama Palatasına ünvanladığımız sorğuya cavab aldıqdan sonra açıqlayacıq.

Davamı var….

Qarşı tərəfin cavab haqqını tanıyırıq.

Mənbə:MediaTv.az

On ildən artıq bir müddət ərzində ölkə üzrə qazlaşma səviyyəsinin vəziyyəti ilə əlaqadar hər il təqdim olunan rəqəmlər(95-96%) realdırmı?
Araşdırılmasına ciddi ehtiyac duyulur.
-21.04.2016 Report-2008-ci ildə ölkə üzrə qazlaşma səviyyəsi 80%-ə yaxın olub, 2013-cü ilin sonuna isə ölkə üzrə qazlaşma (təbii qazla təmin olunma) səviyyəsi 89,8% (regionlarda 83,4%) təşkil edib", - deyə bəyanatda bildirilir
-17.03.2023. Vergilər qəzeti:“2010-cu ilin əvvəlində qazlaşmış mənzil sayına görə ölkə üzrə qazlaşma səviyyəsi 62,2 faiz olduğu halda hazırda qazlaşma səviyyəsi 96,3 faiz təşkil edir. Həmin müddətdə təbii qazla təmin olunan əhali abonentlərinin sayı artaraq hazırda 2 milyon 500 minə çatıb”, - deyə R.Əliyev qeyd edib.
-10.07.2012 ( AZƏRTAC)2012-ci il bir iyun tarixinə respublikada qazlaşdırılma səviyyəsi 75,9 %,-ə çatdırılmışdır. Dövlət tapşırığına uyğun olaraq, 2013-cü ilin sonunadək ölkənin qazlaşdırılması səviyyəsinin 95 % -ə çatdırılması üçün müvafiq tədbirlər həyata keçirilir..
-25.11.2012 - Azəriqaz İB sədr müavini Nazim Səmədzadə Ölkə ərazisində qazlaşdırma işi 74 % yerinə yetirilib.2013-cü ilin sonuna qədər bu proses 95 % -ə çatdırılacaq.
-2013-cü illər üzrə “Azərbaycan Respublikasında regionların sosial-iqtisadi inkişafı” Dövlət Proqramları çərçivəsində qaz təchizatının ümumi səviyyəsi tarixdə görünməmiş həddə çatıb. 2009-cu ilin sonuna respublika üzrə ümumi qazlaşma səviyyəsi 62,3 faiz təşkil edirdisə, hazırda ✅90 faizə çatıb.
-Azərbaycanda 2013-cü ildə qazlaşma səviyyəsi 89,8%-( İnterfax-Azərbaycan, 06.02.2014 12:33)
-10 il əvvəl Azərbaycanın yaşayış məntəqələrinin cəmi 40 faizinin qazlaşdırıldığını diqqətə çatdıran SOCAR-ın prezidenti artıq əhali abonentləri üzrə bu göstəricinin 92 faiz təşkil etdiyini bildirib. (Yeni Azərbaycan .-2016.-21 sentyabr-№ 171.-S.11.)
-2009-cu ilin sonunda respublika üzrə ümumi qazlaşma səviyyəsi 62,3% təşkil edirdisə, hazırda bu göstərici 92%-ə qalxıb (2016-cı il SOCAR,davamlı inkişaf haqqında hesabat)
Bu gün ölkə üzrə qazlaşdırma səviyyəsi 95 faizdir.-Bunu SOCAR prezidenti Rövnəq Abdullayev deyib
28 .12.2013. Gündəm -2015-ci ildə Azərbaycanda qazlaşmanın səviyyəsi 99 faizə çatacaq. Bunu ARDNŞ prezidenti Rövnəq Abdullayev ilin yekunlarına həsr edilmiş tədbir çərçivəsində deyib.Onun sözlərinə görə artıq ölkədə qazlaşmanın səviyyəsi 90 %-ə çatıb
-15.03.2016.-Yenı Azərbaycan.-Görülən işlər nəticəsində respublika üzrə qazlaşdırmanın səviyyəsi 90%-ə çatdırılıb
-1news.az - 2016-cı ilin sonuna ölkə üzrə ümumi qazlaşma səviyyəsinin 90 %-ə çatdırılması planlaşdırılır.
-21.04.16 http://xn--xbr-dtbb.az/ -2008-ci ildə ölkə üzrə qazlaşma səviyyəsi 80%-ə yaxın olub 2013-cü ilin sonuna isə ölkə üzrə qazlaşma (təbii qazla təmin olunma) səviyyəsi 89,8% , hazırda ölkə üzrə qazlaşma səviyyəsi 90%-ə çatıb,
-07.09.2017 Xalq qəzeti. № 193. .Ölkə üzrə isə qazlaşdırma 93%-ə çatıbdır
-20.04.2018 Azərbaycanda əhalinin qazlaşdırılma səviyyəsi 93,9%-ə çatıb. Bunu SOCAR-ın vitse-prezidenti Rəhman Qurbanov Energetika Nazirliyində kollegiya iclasında və 27.08.2018-ci ildə Prezident İlham Əliyevin iştirakı ilə İsmayıllı rayonunun Lahıc qəsəbəsinə təbii qazın verilməsi mərasimində deyib.
-28 .06. 2018, İki sahil -ölkə əhalisinin qazlaşması səviyyəsi 93 %-ə çatdırılmışdır. Hədəf 95 %-dir
-27 08. 2018, SOCAR-ın "Azəriqaz" İstehsalat Birliyinin həyata keçirdiyi tədbirlər nəticəsində ölkə ərazisinin qazlaşdırılması göstərici 93 %-ə çatıb. . Bu gün ölkə üzrə qazlaşdırma səviyyəsi 95 %-dir "Rövnəq Abdullayev.
-16.11.2018 - "Azəriqaz" İstehsalat Birliyində keçirilən mətbuat konfransında Əkbər Hacıyev bildirib ki, İlin sonuna kimi isə ölkədə qazlaşdırılma 95,7%-ə çatdırılacaq.
-dekabr 2018 - ölkə üzrə əhalinin qazlaşma səviyyəsi 95% icra olunub. Dekabrın 1-nə isə respublika üzrə qazlaşdırma səviyyəsi 95,2 %-ə çatdırılıb.-mətbuat katibi
- 2019-cu ilin martın 30-da Energetika nazirliyində çağırılmış iclasda nazir dedi ki, ölkə üzrə qazlaşma səviyyəsi 95,7%-ə çatdırılıb,
-2019-cu il mayın 3-də Azərbaycan Prezidenti İlham Əliyevin Nazirlər Kabinetinin ilin birinci rübünün yekunlarına və qarşıda duran vəzifələrə həsr olunan iclasında Birliyin baş direktoru Ə.Hacıyev qeyd edib ki, qazlaşma səviyyəsi 95.7 faizə olub.
-22.08.2019-cu Kommersant .az Hal-hazırda ölkədə qazlaşdırma səviyyəsi ümumilikdə 96 %-ə yaxınlaşır.
-04.09.2019 Son statistik göstəricilərə görə, ölkə üzrə 96 % -ə yaxın ərazi qazlaşdırlıb. Bunu "Azəriqaz” İB-nin mətbuat katibi Ceyhun Səfərov deyib.
-28.12.2019 ölkə üzrə əhali sektorunun qazlaşdırma səviyyəsi 96 %-ə çatıb.
-11 01. 2020.Azərbaycan qəzeti :Ölkədə qazlaşdırmanın səviyyəsi 96 faizi ötür
- 18.02.2020 Yeni Azərbaycan qəzeti;Azəriqaz İstehsalat Birliyii 2019-cu ili də uğurla başa vurub. Belə ki, ilin sonunda ölkədə qazlaşma səviyyəsi 96 faizə çatdırılıb .
-04 mart 2020 İki Sahil: Ölkədə qazlaşdırmanın səviyyəsi yüz faizə☝ yaxınlaşır
30.12.2020- Oxu.az.:Azəriqaz” İstehsalat Birliyinin baş direktoru Ruslan Əliyev bildirib ki, artıq ölkə üzrə əhali sektorunun qazlaşma səviyyəsi 96,2 faiz təşkil edir:
-30.06.2021 qafqazinfo.az: Ölkədə əhalinin qazlaşdırılması səviyyəsi 96 faizi ötüb
-30 06, 2021 Bizim yol
Azərbaycanda təbii qazla təminat səviyyəsi inkişaf etmiş ölkələrdəkindən yüksəkdir
Dövlət dəstəyi ilə həyata keçirilmiş qazlaşdırma tədbirləri nəticəsində ölkə ərazisində əhali sektorunun qazlaşdırılması səviyyəsi 96 faizi ötüb.
-03.12.2021 Vergilər qəzeti :Baş nazir Əli Əsədov: Azərbaycanda qazlaşdırmanın səviyyəsi 96,19 faiz təşkil edir
-Socar.az.“Azəriqaz” SOCAR-ın balansına verilən vaxtdan bəri 54.848 km-lik qaz xətləri çəkilib, 11.032 km-lik boru xətti təmir olunub, 1.668 yaşayış məntəqəsinə təbii qaz verilib. 01 iyun 2022-ci il tarixinə olan məlumata görə, işğaldan azad edilən yaşayış məntəqələri istisna olmaqla, ölkə üzrə qazlaşdırma səviyyəsi 96,3% təşkil edir
-02.09.2022. http://xn--hquq-0ra.az/ - “Azəriqaz” İB-nin baş direktoru Ruslan Əliyev: Bu gün ölkə üzrə qazlaşma 96,3 faizdir.
-23. 12. 2022 E-huquq.az Azəriqaz": Ölkə üzrə qazlaşdırma səviyyəsi 96,3 faiz təşkil edir
-13.08.2023 XALQ QƏZETI
Azərbaycan Dövlət Neft Şirkətinin (SOCAR) “Azəriqaz” İstehsalat Birliyinin şöbə rəhbəri Teymur Cəfərovun bildirdiyinə görə, hazırda ölkə ərazisində qazlaşdırıl¬ma səviyyəsi 96,3 faiz təş¬kil edir.
-20.10.2023 Azadmedia- Azəriqaz İstehsalat Birliyi qazlaşma faizini açıqıadı. .
Hazırda qazlaşma faizi 96.4% təşkil edir.
-04.12.2023 Report: Bu il iyulun 1-nə Azərbaycanda qazlaşdırma səviyyəsi 96,34 % təşkil edib. Bu barədə "Report" Azərbaycan Dövlət Neft Şirkətinin (SOCAR) maliyyə hesabatına istinadən xəbər verir.
"SOCAR 2014-2018-ci illəri əhatə edən I qazlaşdırma proqramını tamamladıqdan sonra prosesi yeni “Regionların 2019-2023-cü illər üçün sosial-iqtisadi inkişafı dövlət proqramı” çərçivəsində davam etdirir. Şirkət rəhbərliyi hesab edir ki, ölkədə qalan qazlaşdırma işləri ilə bağlı xərclərin maliyyələşdirilməsini dövlət əsas kapitala yatırımlar vasitəsilə davam etdirəcək", - deyə hesabatda qeyd olunub.
08 .12. 2023 Xəbər xətti
“Azəriqaz” İstehsalat Birliyinin Yeni qazlaşdırma və inkişaf şöbəsinin rəsisi Teymur Cəfərov qeyd edib ki, 2009(rəqəm şirkətin 2016 -ci il üzrə İllik hesabatından götürülüb.)Uğurlu müqayisə deyil
Mirvari Gahramanli
TEREF