Ölkənin qanuni lotereya təşkilatçısı və idman mərc oyunları operatoru “Azərlotereya” ASC -a aid olan "Misli.az" lotereya saytı müsabiqə elan edib.

"Azərbaycan Reallığı" xəbər verir ki, müsabiqədə misli hesabına yüklədiyin hər 5 azn hesab sahibinə 1 lotereya şans nömrəsi qazandırır. Hər həftənin bir günü minlərlə nömrədən yalnız 7 nəfər qalib gəlir, onlardan da 4-ü avropaya hər şey daxil səyahət bileti qazanır.

İlk həftənin qalibləri artıq müəyyənləşib. İşin maraqlı tərəfi ondadır ki, bu həftə Avropaya səyahət qazanan qalib Sərxan İslamov şirkətin əvvəlki müsabiqəsində avtomobil qazanan Sərxan İslamov olub.

Maraqlıdır, minlərlə nömrənin içində təsadüfi seçilən nömrə keçən müsabiqənin qalibi necə ola bilib? Bu, Azərbaycanda həmin lotereyanı oynayan yüzminlərlə insanda şirkətin şəffaflığına şübhə yaradıb. İştırakçılar şirkətin əvvəldən müəyyən edilmiş şəxsləri qalib etməklə hədiyyələrin özlərinə qaldığını iddia edirlər.

TEREF olaraq sözügedən qalibin fotolarını təqdim edirik:

“Məhsul” stadionunun direktoru Alik Həsənov və Azərbaycan Həmkarlar İttifaqları İdman Təşkilatları Assosiasiyasının sədri Nadir Əliyevin cinayət işi üzrə məhkəmə prosesi keçirilib.

Teleqraf.com xəbər verir ki, Bakı Ağır Cinayətlər Məhkəməsində hakim Fərid Namazovun sədrliyi ilə keçirilən iclasda zərərçəkmişlərin bir neçəsinin vəkili Aslan İsmayılov vəsatətlə çıxış edib.

Vəkil Azərbaycan Həmkarlar İttifaqları Konfederasiyasının sədri, deputat Səttar Möhbalıyevin dindirilməsini istəyib. Vəkilin sözlərinə görə, işdəki sənəd-sübutlar və səsyazıları da göstərir ki, Səttar Möhbalıyev dövlətin malını - stadionları öz mülkü kimi satıb: "Çox təəssüf edirəm ki, prokurorluq bu sübutlara göz yumdu, onu çağırıb dindirmədi. Bir ildir burada da eyni məsələni qaldırırıq, araşdırılmasını istəyirik".

Deputatın adı həm də Bakının Yasamal rayonundakı “Məhsul” stadionunun satışı ilə bağlı cinayət işində keçir. Stadionun ərazisini satmaq adıyla dələduzluq etməkdə suçlanan Azərbaycan Həmkarlar İttifaqlarının İdman Təşkilatları Assosiasiyasının sədri Nadir Əliyev və “Yasamal” idman-sağlamlıq klubunun direktoru Alik Həsənov iki ilə yaxındır həbsdədir.

İddia olunur ki, onlar bina tikintisiylə məşğul olan bir neçə sahibkarı aldadaraq, həmin əraziyə görə onlardan külli miqdarda pul alıblar. Zərərçəkmiş qismində tanınan sahibkarların təkcə elə birindən beh kimi, 900 min manat pul alınıb.

Nadir Əliyev özünü təqsirli bilmir. O, iddia edir ki, sahibkarları Alik Həsənov aldadıb, onun isə yaşananlardan xəbəri olmayıb.

Alik Həsənov isə əksinə, bu işdə özünün sadəcə, icraçı, vasitəçi olduğunu bildirir. Onun sözlərinə görə, stadionun direktoru olsa da, rəhbər kimi, Nadir Əliyevdən asılı idi, onun göstərişlərini yerinə yetirirdi.

Zərərçəkmiş sahibkarlar da məhkəmədə bildiriblər ki, onlar AlikHəsənovla yanaşı, Nadir Əliyevlə də danışıqlar aparıblar. Yəni onun baş verənlərdən xəbərsiz olması haqda iddiaları doğru deyil.
Məhkəmədə Nadir Əliyevə məxsus olduğu iddia edilən səs yazısı da dinlənilib. Orada danışan şəxs baş verənlərə görə deputatı ittiham edir.

Nadir Əliyev həmin səsyazısının ona məxsus olduğunu təsdiqləsə də, səslənən fikirləri qəbul eləmir.

Zərərçəkmişlərin hüquqlarını müdafiə edən vəkil Aslan İsmayılov deyib ki, Nadir Əliyev məhkəmədə fərqli taktika seçib, bu üzdən deputatın adını çəkmir: “Görünür, söz veriblər ki, “ad çəkmə, səni çıxaracağıq”. Ona görə də Nadir Əliyev əvvəlki ifadəsindən də, dediklərindən də imtina edir. Nadir Əliyev necə davranırsa davransın, həqiqəti ortaya çıxarmaq məhkəmənin borcudur. Gəncədəki, Göygöldəki stadionlar dədə malı kimi necə satılıb?”.

Zərərçəkmişlər də, təqsirləndirilən şəxslərdən Alik Həsənov da deputat Səttar Möhbalıyevin çağrılıb dindirilməsi barədə vəsatətin təmin olunmasını istəyib. Amma Nadir Əliyev bunun əleyhinə olub.

Hakimlər deputatla bağlı vəsatəti təmin etməyiblər. Onun adı çəkilən səsyazısına gəlincə, məhkəmə onu qəbul edib və iş materiallarına əlavə olunub. Lakin onun sübut kimi dəyərləndirilməsi məsələsinə sonda hökm çıxarılanda qərar veriləcəyi bildirilib.

İttihama görə, Nadir Əliyev və Alik Həsənov hündürmərtəbəli binaların tikintisiylə məşğul olan sahibkarlara stadion ərazisinin 5 milyon 500 minə satıldığını deyiblər. Ərazini almaq istəyən sahibkarlardan isə həm beh, həm də Konfederasiya rəhbərliyinə vermək adıyla ümumilikdə 900 min manat pul alıblar.

Bundan başqa, Alik Həsənovun özünün ayrıca da daha bir sahibkarı aldadıb pulunu ələ keçirdiyi iddia edilir.

İstintaq zamanı Alik Həsənovun direktoru olduğu stadionun ərazisini başqa bir sahibkara 8 milyon manata sata biləcəyini deməsi, bunun üçün aidiyyəti vəzifəli şəxslərə rüşvət vermək və müvafiq sənədləşdirmə işləri aparmaq adıyla onun 360 min manat pulunu ələ keçirməsinə də əsaslı şübhələr müəyyənləşdirilib.

Nadir Əliyev və Alik Həsənova qarşı Cinayət Məcəlləsinin 178.4 (xüsusilə külli miqdarda ziyan vurmaqla dələduzluq) və 32.4, 312.1 (rüşvət verməyə təhrik etmə) maddələri ilə ittiham irəli sürülüb.
Cinayət işi üzrə 5 nəfər zərərçəkmiş qismində tanınıb.

Bunlar Rauf İsmayılov, Dadaş Umbatov, Həbib Zülfüqarov, Elçin Rüstəmov və Yusif Vəlixanovdur.

Azərbaycanda səhiyyə sahəsində ciddi islahatlar aparılır. Əhalinin sağlamlığının qorunması istiqamətində tədbirlər görülür, yeni tibb müəssisələri yaradılır, insanların səhiyə xidmətinə əlçatanlığı yaxşılaşdırılır.

Naxçıvanda isə bu proses əksinə gedir. Son bir ildə səhiyyə sahəsində aparılan “islahatlar” nəticəsində əhalinin sağlamlığının qorunması sahəsindəki vəziyyət kritik həddə çatıb.

Bu dövrdə Naxçıvan Muxtar Respublikası əhalisinin keyfiyyətli səhiyyə xidmətlərinə əlçatanlığının təmin edilməsi istiqamətində, demək olar ki, heç bir iş görülməyib. Muxtar respublikanın səhiyyə müəssisələri üçün tikilən bəzəkli binaların içində nə normal həkim var, nə də müasir tibbi avadanlıqlardan istifadə edə biləcək mütəxəssis. Naxçıvanda aparılan kadr islahatlarından sonra bu sahədə də ciddi dönüşün olacağı gözlənilirdi. Amma təəssüf ki, Naxçıvan əhalisinin gözləntiləri özünü doğrultmadı. Yeni nazir əvəzi Samiq Sadıxovun vəzifəyə gələn kimi, bu sahədəki “yeniliyi” özünə 130 min manat dəyərində xidməti avtomobil almasıdır.

Muxtar respublika sakinləri yenə də müayinə və müalicə olunmaq üçün ya Bakı şəhərinə, ya da Türkiyəyə üz tuturlar. Bu da insanlar üçün problemlər yaradır. Bakıya və ya Türkiyəyə gedə bilməyənlərin sağlamlığı və həyatı ciddi risk altındadır.

Ali Məclis sədrinin fərmanı icra edilmir

Naxçıvanda səhiyyə sahəsində biabırçı vəziyyət hökm sürür. Muxtar respublikadakı əksər xəstəxanalara heç bir aidiyyəti olmayan Səhiyyə Nazirliyi qanunsuz şəkildə tibb müəssisələrinin işinə müdaxilə edir.

Naxçıvan Muxtar Respublikası Ali Məclisi sədrinin 28 iyul 2023-cü il tarixli fərmanı ilə “Naxçıvan Muxtar Respublikasının Tibb Müəssisələrinin İdarəetmə Birliyi” publik hüquqi şəxsi yaradılıb.

Müəyyən edilib ki, “Tibb Müəssisələrinin İdarəetmə Birliyi” publik hüquqi şəxsə ümumi rəhbərliyi Ali Məclis sədrinin vəzifəyə təyin və vəzifədən azad etdiyi sədrdən və 4 üzvdən ibarət Müşahidə Şurası həyata keçirir.

Müşahidə Şurası Naxçıvan Muxtar Respublikası Ali Məclisi sədrinin vəzifəyə təyin və vəzifədən azad etdiyi sədrdən, səhiyyə nazirinin müavinindən, əmək və əhalinin sosial müdafiəsi nazirinin müavinindən, İcbari Tibbi Sığorta üzrə Dövlət Agentliyinin İdarə Heyəti sədrinin müavinindən, Səhiyyə İşçiləri Həmkarlar İttifaqının Naxçıvan Muxtar Respublikası Komitəsinin sədrindən ibarət tərkibdə formalaşdırılmalı idi.

Tibb Müəssisələrinin İdarəetmə Birliyinə cari rəhbərliyi Müşahidə Şurasının vəzifəyə təyin və vəzifədən azad etdiyi icra direktor həyata keçirməlidir.

Naxçıvan Muxtar Respublikasının Nazirlər Kabineti “Tibb Müəssisələrinin İdarəetmə Birliyi” publik hüquqi şəxsin nizamnaməsini və strukturunun layihəsini, o cümlədən nizamnamə fondunun miqdarı barədə təkliflərini bir ay müddətində hazırlayıb Ali Məclisə təqdim etməli idi.

Fərmanla Nazirlər Kabinetinə tapşırılmışdı ki, Tibb Müəssisələrinin İdarəetmə Birliyinin tabeliyinə veriləcək dövlət səhiyyə sisteminə daxil olan tibb müəssisələrinin siyahısını Ali Məclislə razılaşdırmaqla iki ay müddətində təsdiq etsin.

Naxçıvan Muxtar Respublikasının Səhiyyə Nazirliyi və İcbari Tibbi Sığorta üzrə Dövlət Agentliyi fərmandan irəli gələn vəzifələrə həll etməlidi idi.

Bəs nə baş verib? Bu fərmanın imzalanmasından bir ilə yaxın vaxt keçməsinə baxmayaraq, mühüm dövlət sənədi “havada qalıb” və icra olunmayıb. Tibbi Müəssisələrinin İdarəetmə Birliyinin tabeliyində fəaliyyət göstərməli olan xəstəxanalara qanunsuz şəkildə Səhiyyə Nazirliyi rəhbərlik edib. Yəni əvvəlki dövrlərdə olduğu kimi, Naxçıvan yenə “fərqlənib” və muxtar respublikada Azərbaycanın əsas hissəsindən tamamilə ayrı bir idarəçilik sistemi tətbiq olunub.

Naxçıvan Muxtar Respublikası Ali Məclisi sədrinin müavini Anar İbrahimov mayın 8-də keçirilən Ali Məclisin yaz sessiyasının növbəti plenar iclasındakı çıxışında bu məsələyə diqqət çəkərək deyib: “Belə yanaşma qəbuledilməzdir. Artıq 10 aya yaxındır ki, biz muxtar respublikada ən vacib sahə olan səhiyyə sahəsində idarəetməni təmin edə bilmirik. Səbəb Səhiyyə Nazirliyinin və Tibb Müəssisələrinin İdarəetmə Birliyinin Ali Məclis sədrinin fərmanını icra etməməsidir”.

Göründüyü kimi, Ali Məclisin rəhbərliyi səhiyyə sahəsində baş verənlərdən narazı və narahatdır. Təəssüf ki, Ali Məclis rəhbərliyinin bu haqlı iradından sonra da Səhiyyə Nazirliyi lazımi tədbir görməyib, fərmanın icrası təmin edilməyib. Belə olan halda ciddi suallar yaranır. Naxçıvan səhiyyə nazirinin vəzifəsini icra edən Samiq Sadıxov niyə özbaşınalıq edir və kimə arxayındır? Muxtar respublikanın yeni Baş naziri Ali Məclisdə hökumətin hesabatı müzakirə olunarkən səsləndirilən bu fikirlərə niyə reaksiya vermir?

Samiq Sadıxovun son bir ildəki fəaliyyətinə nəzər salanda yuxarıdakı suallara cavab tapmaq olur. Çünki heç bir rəhbər vəzifəli şəxs kiməsə arxayın olmadan belə qanunsuzluqlar edə bilməz.

Naxçıvanda lisenziyasız laboratoriya fəaliyyət göstərir

Nazir əvəzinin qanunsuz əməllərindən biri “Naxçıvan Muxtar Respublika Xəstəxanası” publik hüquqi şəxsin binasında xarici şirkətin laboratoriya yaratmasıdır.

Həmin laboratoriya lisenziyasız fəaliyyət göstərir. Laboratoriyanın fəaliyyəti üçün tələb olunan hüquqi sənədləri yoxdur.

Samiq Sadıxovun tapşırığı ilə “Naxçıvan Muxtar Respublika Xəstəxanası” publik hüquqi şəxs həmin laboratoriyanın yaradılması məqsədilə səhiyyə ocağının bir hissəsini icarəyə verib. Deməli, dövlətin xəstəxanasında artıq laborator analizləri özəl müəssisə aparır. Halbuki, bu, qanunla qadağandır.

Bu laboratoriyanın yaradılması üçün “Naxçıvan Muxtar Respublika Xəstəxanası” publik hüquqi şəxsi ilə EXON Biomedikal Sağlıq Xidmətləri Sənaye və Ticarət Anonim Şirkəti arasında müqavilə imzalanıb. Laboratoriyanın test qruplarına biokimya, immunologiya, genetik, hematologiya, mikrobiologiya, patositologiya, molekulyar, seroloji, vitaminlər və dərman səviyyələri yoxlamaları, həmçinin digər testlər daxildir.

Laboratoriyanın fəaliyyəti üçün niyə lisenziya alınmayıb? Hüquqi sənədlər hazırlanmadan laboratoriya niyə qurulub? Bəlkə heç bu sahibkara lisenziya verilməyəcək. Bu qədər vəsait sərf edilərək laboratoriya hansı əsasla yaradılıb?

Bu suallara muxtar respublikanın aidiyyəti dövlət orqanları cavab verə bilmir. Ona görə ki, səhiyyə naziri əvəzi bu qanunsuzluqları edə bilməsi üçün himayə olunur.

Lisenziyası olmayan və qanunsuz fəaliyyət göstərən laboratoriyanın analiz nəticələri də şübhəlidir. İndi bu laboratoriyanın yanlış analizi nəticəsində hansısa muxtar respublika sakininin sağlamlığında ciddi problem yaransa, buna kim cavab verəcək? Buna görə dövlət kimin yaxasından yapışacaq? Naxçıvan sakinlərinin sağlamlığı qanunsuz fəaliyyət göstərən bu laboratoriyanın yaradılmasının təşəbbükarı olan Samiq Sadıxovun və onu himayə edənlərin heç umurunda da deyil.

Struktur “islahatları” hansı nəticələrə gətirib çıxarıb?

Səhiyyə Nazirliyi bu sahədə apardığı “stuktur islahatları” ilə həm səhiyyə işçilərinin, həm də muxtar respublika əhalisinin işini çətinləşdib, onlara ciddi problemlər yaradıb. Məsələn, nazir əvəzi Samiq Sadıxov hesab edib ki, muxtar respublikaya Kordioloji Mərkəzi lazım deyil. Ona görə də bu mərkəz ləğv edilərək, muxtar respublika xəstəxanasına birləşdirilib. Mərkəzin müasir tələblərə cavab verən binasının isə aqibəti bəlli deyil. İndi ürək xəstələri muxtar respublika xəstəxanasının bir mərtəbəsində əməliyyat olunur, digər mərtəbəsindəki palataya köçürülür. Halbuki, o xəstələri əməliyyatdan sonra hərəkət etdirmək olmaz.

Eyni “məntiqlə” nazir əvəzi hesab edib ki, Naxçıvan Muxtar Respublikasına QİÇS-lə Mübarizə Mərkəzi lazımdır. Ancaq heç kim araşdırıb bunu əsaslandırmayıb ki, Naxçıvanda neçə ürək, neçə QİÇS xəstəsi var. Yəni, bu səhiyyə müəssisələrindən hansının Naxçıvanda ayrıca tibb ocağı kimi fəaliyyət göstərməsi daha vacibdir. Yəqin ki, QİÇS Mərkəzini yaradanda nəzərə alıblar ki, Naxçıvanda yaradılan “şərait”in nəticəsi olaraq, belə xəstələrin sayı arta bilər.

Nazir əvəzi yenə eyni “məntiqlə” Naxçıvan Təcili Tibb Mərkəzini fəaliyyət göstərdiyi ayrıca binadan çıxararaq muxtar respublika xəstəxanasında yerləşdirib. Təcili Tibbi Yardım Mərkəzinin bazasında Səhiyyə Nazirliyinin tabeliyində Təcili Tibbi Yardım Xidməti yaradılıb. Bu xidmətdən əvvəl əgər təcili yardım bir iki çağırışa gedirdisə, indi nadir hallarda çağırışa gedir. Təcili Tibb Mərkəzinin binasının ləğv edilərək muxtar respublika xəstəxanasında yerləşdirilməsini yəqin ki, Samiq Sadıxov kimi “yüksək idarəçilik bacarığı” olan şəxs izah edə bilər.

Naxçıvan Səhiyyə Nazirliyinin son vaxtlar əldə etdiyi “böyük uğurlar” sırasında aparılan “kadr islahatları” da var. Nazir əvəzi muxtar respublikadakı xəstəxanaların rəhbərliyinə səhiyyə ilə yaxından uzaqdan əlaqəsi olmayan şəxsləri gətirib. Hazırda Naxçıvanın səhiyyə müəssisələrinin əksəriyyətinə rəhbərlik edənlər tibb işçiləri deyil. Məsələn, Naxçıvan Perinatal Mərkəzinin direktor müavini Ülkər Bayramova hüquqşünas, Naxçıvan Sağlamlıq Mərkəzinin direktoru Əli Orucov iqtisadçıdır. Şərur Regional Tibb Mərkəzinin direktoru Bayram Mikayılov da tibb işçisi deyil. Üstəlik bu şəxslə bağlı çox ciddi iddialar və faktlar var.

Ciddi media orqanlarında yayılan məlumatlara görə, Bayram Mikayılov 2017-ci ildə Dövlət Sosial Müdafiə Fondunun Saatlı rayon şöbəsinin müdiri işləyərkən rayon sakini, ahıl yaşlarında olan Elşən Allahyarovu öz iş otağında aşağılayıcı sözlərlə təhqir edib. Hadisənin videogörüntüsü sosial şəbəkələrdə geniş yayıldığı üçün işdən uzaqlaşdırılıb.

Həmin il Bakının Xətai rayonu ərazisində həyat yoldaşı Gülnarə Cəbrayılovanı bıçaqladığına görə Xətai Rayon Polis İdarəsində barəsində Cinayət Məcəlləsinin 221.3-cü maddəsi ilə cinayət işi başlanıb. Ancaq Bayram Mikayılov hansısa yolla məsuliyyətdən yayınıb.

2019-cu ildə isə o, Dövlət Sosial Müdafiə Fondunun Sabirabad rayon şöbəsinə rəis təyin edilib. Bayram Mikayılov bu vəzifədə çalışarkən, vətəndaşların pensiyası ilə bağlı külli miqdarda pul mənimsəmədə iittiham olunaraq növbəti dəfə işdən çıxarılıb. Hətta onun əməlinə hüquqi qiymət verilməsi üçün barəsində toplanmış materiallar Baş Prokurorluq yanında Korrupsiyaya Qarşı Mübarizə Baş İdarəsinə göndərilib və qısamüddətli həbs edilib.
Sonradan TƏBİB-ə yol tapan Bayram Mikayılov 2022-ci ilin ortalarında Sabirabad Rayon Mərkəzi Xəstəxanasının direktor müavini vəzifəsinə təyin edilib. Lakin bir müddət sonra maliyyə maxinasiyalarına və qazilərə qarşı kobud rəftarına görə, tutduğu vəzifədən uzaqlaşdırılıb. Naxçıvan Səhiyyə Nazirliyinin rəhbərliyinin belə bir şəxsi əvvəlcə Culfa Regional Tibb Mərkəzinə, sonra Şərur Regional Tibb Mərkəzinə direktor təyin etməsi muxtar respublikada səhiyyə sektorunun hansı kriteriyalarla idarə olunduğunun sübutudur.

Rəhbər vəzifəli şəxslər problemlərin həllində maraqlı deyil

Bütün bu faktlar onu göstərir ki, Naxçıvanda səhiyyə sistemi acınacaqlı vəziyyətdədir, muxtar respublika əhalisinin sağlamlığı təhlükə altındadır. Öz işinin öhdəsindən gələ bilməyən Samiq Sadıxov təcili vəzifəsindən azad edilməli, Naxçıvanın səhiyyə sistemindəki özbaşınalıq aradan qaldırılmalı, bu sahədə Azərbaycandan fərqli idarəçilik sistemi ləğv edilməli, Səhiyyə Nazirliyinə və Tibb Müəssisələrinin İdarəetmə Birliyinə layiqli kadlar təyin olunmalıdır. Görünən odur ki, Naxçıvandakı rəhbər vəzifəli şəxslər bu sadalanan problemlərin həllində maraqlı deyil. Naxçıvan Muxtar Respublika olsa da, Azərbaycanın tərkib hissəsidir. Odur ki, muxtar respublika əhalisi Azərbaycan Səhiyyə Nazirliyinin bu məsələyə təcili müdaxilə etməsini, problemlərin həlli istiqamətində tədbirlər həyata keçirməsni xahiş edir. İnanırıq ki, vicdanlı və öz işinin peşəkarı olan dövlət məmuru kimi tanınan nazir Teymur Musayev naxçıvanlıları tək qoymayacaq, göz görə-görə muxtar respublika səhiyyə sisteminin tamamilə məhvinə imkan verməyəcək, problemləri araşdıraraq ölkə rəhbərliyi qarşısında məsələ qaldıracaqdır. Çünki söhbət insan sağlamlığından gedir…

TNS

Antiinhisar və İstehlak Bazarlarına Nəzarət Dövlət Xidməti maraqlı bir rəqəm açıqlayıb. Qurum deyir ki, yoxlamalar nəticəsində ölkədə mövcud olan ölçmə avadanlıqlarından 74,2 %-də nöqsanlar aşkarlanıb.
Yəni anlaşıqlı desək, bu o deməkdir ki, Azərişıq-ın , Azərsu-yun, Azəriqaz-ın sayğaclarında, ADY, RİNN, Kənd Təsərrüfatı Nazirliyi və digər qurumlarda hansısa xidməti, sərfiyyatı, çəkini və s. ölçən cihazların əksəriyyətində problem varmış.
Tərəzinin də problemli olması o deməkdir ki, düz çəkmirmiş.
Antiinhisar konkret hansı quruma məxsus hansı ölçmə vasitələrinin düz ölçmədiyini, düz ölçməyənlərlə bağlı hansı tədbirlərin görüldüyünü, səhv ölçmə ilə bağlı vətəndaşlara hansı kompensasiyanın ödənildiyini açqlamayıb.
Osman Gündüz
TEREF

Qazax rayonunun Nəsrəddin Tusi, Şah İsmayıl Xətai, Babək və Fərrux Qayıbov küçələri istifadəyə yararsızdır.

Bu barədə Oxu.Az-a sakinlər şikayət ünvanlayıblar.

Onlar bildiriblər ki, sözügedən ərazidə yollar sonuncu dəfə 1988-ci ildə təmir edilib:

"Həmin ünvanda asfaltlanma, təmir-bərpa işləri uzun müddətdir aparılmır. Mövcud vəziyyət qış aylarında daha da çətinləşir. Maşınlar sıradan çıxır. Piyadaların vəziyyəti isə daha da acınacaqlı olur. Xahiş edirik bizim problemimiz həll edilsin".

Cəzaçəkmə müəssisəsinin müdiri xəstə donuzların yemlənməsindən nə qədər gəlir əldə edir

Məlumatlı mənbəmiz xəbər verir ki, Ədliyyə Nazirliyinin Penitensiar Xidmətin Şəki şəhərində yerləşən 15 saylı cəzçəkmə müəssisənin arxa hissəsində “Kiş” çayı istiqamətində tökülən zibillik hissədə uzun müddətdir ki, donuz ferması fəaliyyət göstərirdi. Donuz fermasına Oğuz şəhərində yaşayan uidin milliyətindən olan Andrey adlı şəxs tərəfindən dövlətinin nəzarəti altında olan Ədliyyə Nazirliyinin Penitensiar Xidmətin Şəki şəhərindəki cəzaçəkmə müəssisənin arxa tərəfində, “Kiş” çayı ilə həbsxana arasındakı zibil tökülən yerdə fəaliyyət göstərən və 100-ə yaxın donuz saxlanılan fermada donuz xəstəliyi aşkar edilib. Hansı ki, qanunvericiliyə görə zibillik ərazidə donuz saxlamaq qadağandır. Və cari ilin aprelin 19, 20 və 21-də xəstəlikdən ölmüş donuzlar Şəki rayonun Oraban kəndi yaxınlığında yolun kənarına daşınaraq tullanmışdır.

Oraban kənd sakinləri bəyan edib ki, bu, ciddi təhlükədir və dərhal AQTA-ya məlumat veriblər. AQTA-nın nümayəndələri gəlib ölmüş donuzlara baxış keçirmiş, nümunələr götürmüşlər. Lakin onlara edilən zəngdən sonra AQTA nümayəndələri tələsik avtomobillərinə minib hadisə yerindən uzaqlaşmışlar. Yaxşı ki, hadisə yerində bulldozer markalı ekskovatorla donuzları əvvəlcə çalaya basdırmış, ərazini və texnikanı büs-bütün dezinfaksiya etmişlər.

İlkin məlumata görə, donuz vəbası tapılan heyvanların bir hissəsi tələf olub. Hadisənin geniş rezonans doğurmasından narahat olan Şəki şəhərində “donuz biznesi” ilə məşğul olan vəzifəli şəxs olduğu bildirilən şəxsin göstərişi ilə cəzaçəkmə müəssisəsinin arxasındakı donuz ferması təcili olaraq ləğv edilmiş, qalan donuzlar naməlum istiqamətdə aparılmışdır. Məlumatda o da bildirlir ki, Oraban kəndi yaxınlığına tələf olmuş donuzlar sarı rəngli kabinəsi olan yük avtomobili vasitəsilə daşınmışdır.Digər məlumata görə bu donuz ferması əvvəlcədən planalaşdırlan sxem üzrə fəaliyyət göstərmişdir. Belə ki, yüksək vəzifəli şəxs tərəfindən Pentensiar Xidmətin Şəkidəki cəzaçəkmə müəssisəsi rəhbərliyinə göstəriş verilmişdir ki, məhkumların yemədiyi qalıqlar məhz donuz fermasına daşınsın. Donuzların kəsilərək ətinin hara verildiyi barədə hələlik dəqiq məlumat yoxdur. Lakin mənbənin verdiyi məlumatda bildirlir ki, cəzaçəkmə müəssisəsinin və yaxınlıqdakı zibilxananın hesabına heç bir izafi xərc çəkilmədən donuz biznesi ilə məşğul olan vəzifəli şəxs elə sifətdən donuza oxşayır və milliyəti də şübhəlidir.

Doğrudur, AQTA maddi maraqların təmin olunması müqabilində yerli sakinlərin sağlamlığı üçün yaranmış təhlükəli vəziyyətlə bağlı hökuməti məlumatlandırmalı və habelə cəzaçəkmə müəssisəsinin olduğu bölgəyə giriş və çıxışların bağlanmasını bildirməli idi. Lakin konkret biznes maraqları AQTA-nı qanunvericiliyin tələblərinə əməl etməyə imkan vermir. Nəticədə insanların sağlamlıqları risk altına düşür.
Xatırladaq ki, Gürcüstanda 2007-ci ildə rast gəlinən Afrika donuz vəbası 2014-cü ilə qədər Ukrayna, Polşa və Çexiyada özünü göstərmişdi. 2018-ci ildə isə Çində 20 əyalətdə və 47 kənddə vəba səbəbindən 600 mindən çox donuz öldürülmüşdü.
Həyata keçirilən araşdırmalara görə, yüksək dərəcədə yayılma xüsusiyyətinə malik olan donuz vəbası xoşbəxtlikdən insanlara keçmir.
P.S. Ümid edirik ki, aidiyyatı dövlət qurumları istər Oraban kəndi yaxınlığında dezinfeksiya edilərək basdırılmış donuzların, istərsə də Şəkidə cəzaçəkmə müəssisəsinin arxa hissəsindəki fermanın olduğu sahədə araşdırma aparacaq və Andrey adlı baxıcının nə vaxtdan donuz yetişdirməsini öyrənəcəklər. Növbəti sayımızda Şəki rayonun Oraban kəndi yaxınlığına gətirilərək tullanmış ölmüş donuzların da videosunu yayımlayacağıq. Bizi izləyin.
(İfadetv.com)

Azərbaycanda parlament seçkilərinə hazırlıq gedir. Bir neçə aydan sonra seçicilər yeni qanunverici orqanı seçəcək. Qeyd edək ki, sonuncu parlament seçkiləri 2020-ci ilin fevralında keçirilib. Həmin vaxt mövcud parlament özünü buraxaraq yenidən formalaşıb. 2020 seçkilərində köhnə deputatların təxminən 80 faizi yenidən mandat ala bilib.

Ötən 4 ildə millət vəkilləri əvvəlkindən fərqli heç nə ilə yadda qalmadı desək, yanılmarıq. İstər ölkə qanunvericiliyinin formalaşmasında, istər seçicilərlə ünsiyyətdə, istərsə də digər fəaliyyətlərində hər hansı yenilik etmədilər. Növbəti seçkilərə də eyni durumda qatılan deputatlar parlamentdə nə qədər fəaliyyətsiz olsalar da, seçkiöncəsi mediada aktivlik göstərməyə başlayıblar. Bəzi deputatların ötən 4 illik parlament fəaliyyəti dövründə cəmi 4 dəfə səsi çıxıb, ya yox, amma son aylarda mediada ard-arda “təhlil yazılarının” yayılması onların yenidən mandat sorağında olmasından xəbər verir. Belə deputatlardan biri də 67 saylı Cəlilabad şəhər seçki dairəsini təmsil edən Malik Həsənovdur. Bu günlərdə mediada növbəti “analitik yazısı” yayılan Malik Həsənovun 2020-ci ildən bəri parlamentdə neçə dəfə çıxış etməsi ilə bağlı yazımızı bura qədər oxumuş olan hər kəsdə sual yarandı.
Öncə onu vurğulayaq ki, parlamentin 2020-2024-cü illərdə yaz, payız və növbədənkar sessiyalar üzrə ümumlikdə 150-dən çox plenar iclas keçirilib. Bu periodda Malik Həsənov cəmi 5 dəfə çıxış edib. Çıxışlar əsasən mədhiyyə olub, heç bir ictimai əhəmiyyətli məsələnin müzakirəsini, yaxud hansısa qanunun qəbulunda təklifi özündə ehtiva etmir. Lakin son aylarda Malik Həsənovun artıq bir neçə “təhlil yazısı” mediada dərc edilib. Təkcə bu ilin əvvəlindən bəri M.Həsənovun mediada 16 məqaləsi dərc edilib. Lakin bu məqalələrin heç birində seçicilərlə görüş, onların problemlərinin həlli, seçici baxışının qanunverici orqana daşınması, bu və digər qanunların qəbulu ilə bağlı deputat mövqeyi əks olunmur. Maraqlıdır, Malik Həsənov deputatdırmı, anlitikdirmi? Söz yox, hər bir deputatın məqalə yazmaq, proseslərə baxışını ortaya qoymaq ixtiyarı var. Lakin təmsil olunduğu Milli Məclisdə ağzını açıb danışmağa “ərinən” bir deputat niyə ayda bir neçə “analitik” təhlillə mediada çıxış etsin? Üstəlik, iki ali təhsildən heç biri bu sahə üzrə deyilsə, yazıların müəllifinin belə özü olmasına dərin şübhə yaranır. Qeyd edək ki, M.Həsənov Azərbaycan Pedaqoji Rus Dili və Ədəbiyyatı İnstitutunun Rus dili və ədəbiyyatı fakültəsini və Azərbaycan Dövlət İqtisad Universitetinin Mühasibat uçotu və audit fakültəsini bitirib. Göründüyü kimi, bu ixtisasların heç birinin siyasi təhlilçiliklə əlaqəsi yoxdur. Malik Həsənov deyəsən, ixtisasını da, mandatı da unudub, qələmə “sarılıb”...
Deputatın mövqeyini verməyə hazırıq.

AFN.az

Seçki sistemində hər hansı problem olmayan, seçki komissiyalarının şəffaf və obyektiv fəaliyyət göstərdiyi ölkələrdə hansısa iş adamının deputatlıq iddiasına düşməsində, parlamentə seçilməsində vətəndaşlar qəbahətli heç nə görmürlər. Məntiqlə iş dünyasında hər hansı korrupsiya, inhisarçılıq, oğurluq və digər kölgəli mexanizmlərdən keçmədən uğur qazanan birinin siyasətdə də özünü sınamasında pis heç nə yoxdur. Əksinə, özlərinə görə uğur hekayələri olan və cəmiyyətə fayda verən belə adamların uğurlu siyasi fiqurlara çevrilməsi perspektivi onları seçici üçün daha cəlbedici edir.

Həmin adamların parlamentə düşməsi isə Azərbaycandakı kimi öz bizneslərini qorumaq, dövlət sifarişlərinə, tenderlərə yol tapmaq, yaxud ən yaxşı halda şöhrətpərəstlik, yekəxanalıq məqsədi daşımır. Onların öz bizneslərini deputat mandatı ilə qorumağa ehtiyacları yoxdur. Bu səbəbdən həmin ölkələrdə Azərbaycandan fərqli olaraq, bir çox iş adamının uğurlu, ölkəsinə fayda verən siyasi fiqura çevrilməsinin saysız-hesabsız nümunələrini görürük...

Əslində, deputatın keyfiyyəti qanunvericilik fəaliyyəti, siyasi aktivliyi və s. ilə ölçülür və bu zaman onun çıxışları indikator rolu oynayır. Bu baxımdan mətbuatda bizim bəzi deputatları “lal deputatlar” adlandırırlar. Ancaq əsas məsələ deputatın parlamentdə, yaxud ondan kənarda çox danışması deyil, nə danışmasıdır. Ola bilsin elə danışmayan deputatlar var ki, çox danışanlardan daha savadlı və faydalıdırlar. Bəzi “fəal” deputatlar isə bəlkə də danışmasaydılar daha yaxşı olardı...

Yaxın aylarda Azərbaycanda yeni parlament formalaşdırılacaq. Heç kimə sirr deyil ki, qanunvericiliyin ziddinə olaraq, hazırda Azərbaycan parlamentinin üzvlərinin müəyyən qisminin iri, böyük hissəinin isə orta və kiçik biznesi var. Demək olar, hər zaman da belə olub. O da məlumdur ki, bizdə iş adamının parlamentə düşməsi onları əvvəlki işlərindən qətiyyən ayırmır. Bu adamlar yenə də günlərinin böyük hissəsini siyasi fəaliyyətə, qanunvercilik təşəbbüslərinə, seçicilərinin problemlərinə və deputatlıq vəzifəsindən irəli gələn digər fəaliyyətlərə deyil, öz bizneslərinə həsr edirlər. Bizdəkilər heç zəhmət çəkib siyasi savadlarını artırmağa belə vaxt sərf etmək istəmirlər ki, bunun da saysız-hesabsız nümunələri var. Bu adamlar mətbu orqanlardakı məqalələrini, hətta müsahibələrini, yaxud nadir hallarda rast gəldiyimiz parlamentdəki çıxışlarını belə özləri hazırlamırlar, kimlərəsə yazdırırlar...

Biznesmen-deputatların sayı parlamentimizdə kifayət qədər çoxdur və onları hamı tanıyır. Məsələn, deputat Ağalar Vəliyev var. Tikinti maqnatıdır. Pulu, var-dövləti, biznesindən başqa heç nəyi ilə seçilməyib. Hansısa təklifini, təşəbbüsünü, cəmiyyəti maraqlandıran mövzularda mövqeyini, çıxşını görən olmayıb.


Belə bir adamın Azərbaycan siyasətində, parlamentində olması vacibdirmi? Onu parlamentdə nə maraqlandıra bilər axı? Milli Məclisin IV,V,VI çağırışlarının deputatı olan A. Vəliyev indiyə qədər zəhmət çəkib statistika xatirinə belə çıxış etməyi özünə rəva bilmir. Ancaq özünə arxayındır və bilir ki, indiyə qədər necə “seçilibsə”, indidən sonra da belə davam edəcək.

Soruşan da yoxdur ki, ümumiyyətlə siyasi tipi və siyasətlə yaxından-uzaqdan heç bir əlaqəsi olmayan belə deputatlara parlamentin nə ehtiyacı var? Onların depuatat olması bu dövlətə, seçiciyə nə verir axı? Qapısına gələn 3-5 kasıba 5-10 manat verməkmi(onu da versələr)? Deputat bu olmalı, belə olmalıdırmı?

Axtaran olsa, bizim biznesmen-deputatların bizneslərində saysız-hesabsız qüsurlar, qanunsuzluqlar, vergidənyayınmalar və s. tapar. Bu da təkcə həmin şəxslərin tamahkarlığından yox, həm də ölkədəki biznes mühitindən, vergi və məhkəmə sisteminin idealdan çox-çox uzaq olmasından qaynaqlanır.

Azərbaycanın vergi və qanunvericilik sisteminə qeyd-şərtsiz riayət etsəydilər, başqa-başqa məlum yollara baş vurmasaydılar onlar çətin ki, milyonçuya, oliqarxa çevrilərdilər. Ona görə də necə “gözükölgəli” biznesmen, iş adamıdırlarsa, o cür də deputatdırlar. Ona görə də nə siyasətçi kimi siyasətçi, nə də klassik mənada biznesmen kimi biznesmen ola bilirlər. Ona görə də iş, biznes mühitinin yumşaldılmasına, liberallaşdırılmasına dair real təşəbbüslərlə çıxış etmək əvəzinə vergi yükünün artıtrılmasına, kiçik və orta sahibkarlığın həyatının ağırlaşdırılmasına yönələn məhdudiyyətlərə səs vermək məcburiyyətindədirlər. Ümumiyyətlə, sanki deputatların əksəriyyəti(necə seçilmələrindən asılı olmayaraq) ya xalqın adından danışmaq, mövqe qoymaq, tələb etmək səlahiyyətlərini bilmir, hiss etmirlər, ya da bu məsuluyyətdən qorxurlar...

Azərbaycanda uğurlu iş adamının nə dərəcədə faydalı deputat olmasının, məsələn, Cavanşir Feyziyev nümunəsi var. Adam Böyük Britaniyadan üzü bu yana Azərbaycanın onsuz da müxtəlif geosiyasi qüvvələrin qaralamağa çalışdığı imicinə vurmadığı ziyan qalmayıb.

Bir Azərbaycan deputatı kimi adı, eləcə də Azərbaycanda qazandığı milyonlar Britaniya məhkəmələrinin və mətbuatının müzakirə predmetidir. Mülkləri, pulları məhkəmə yolu ilə əlindən alınır. Onun sayəsində Azərbaycandakı biznes mühitinin eybəcərlikləri bir qədər də şişirdilmiş şəkildə bütün dünyaya car edilir, siyasiləşdirilir və ölkəmizə qarşı istifadə edilir. Ancaq bizdə ondan soruşan yoxdur ki, mənşəyi yumşaq desək, şübhəli olan həmin on milyonlar, yüz milyonlar nədən Azərbaycana, doğulub böyüdüyü Şəkiyə yox, Britaniyaya yatırılırdı ki, sonra da şəkililər deməsin, “təpəsinə vurub əlindən alırdılar”? Bir deputat mandatlı iş adamının öz dövlətinə, parlamentinə edə biləcəyi xidmət bu olmalıdırmı?

Tək Feyziyev deyil, Azərbaycandakı deputat-biznesmenlərin hamısının bir ayağı Qərbdədir. Hansı ki, doğrudan da özlərini bu ölkənin parlamentində oturmağı haqq etmiş məsuliyyət və səlahiyyət sahibi hesab edirlərsə, milyonlarını ora-bura daşıyıb, sonra da itirmək təhlükəsilə üz-üzə qalmaqdansa, öz ölkələrini normal, yaşamalı hala gətirməyə çalışmalı idilər...

Məlum məsələdir ki, Azərbaycanda bütün dünyada başa düşülən klassik formada biznesmenlərin siyasətə gəlişi, iş adamının uğurlu siyasətçiyə, liderə çevrilməsi mükün deyil və yaxın gələcəkdə də mümkün olmayacaq. Belə olan halda bu prosesin imitasiyasını yaratmağın nə mənası var?

Yəqin ki, normal seçki, siyasi mühit olmadan, ümumilikdə parlament institutunun çəkisini, hörmətini qaldırmadan, onu konstitusiyaya görə malik olduğu yerə çatdırmadan parlamentin tərkib sarıdan keyfiyyətini yüksəltmək çətin olacaq. Bütün bu qüsurlar qaldıqca isə yeni gələnlər köhnələrdən çox fərqlənməyəcək, parlament siyasət, siyasi rəqabət arenasına çevrilməyəcək. Ona görə də bu gün bir çox biznesmen deputatlar və digər millət vəkillərinin timsalında indiki konfiqurasiyası ilə Azərbaycan parlamentində olmaq, hələ heç də siyasətdə olmaq demək deyil...

Cəlal Məmmədov

“AzPolitika.info”