"Azərbaycan Respublikası dövlətinin qanunverici hakimiyyəti 13 may 2022-ci il tarixli, 530- VIQD nömrəli Qanunla “Əmək pensiyaları haqqında” qanuna yeni məzmunda 37.3.2-1 maddəsi əlavə edib : “Bu Qanunun 20-ci maddəsinə uyğun olaraq əmək pensiyasına əlavə təyin edilmiş şəxslərin əmək pensiyasının sığorta hissəsinin bu Qanunun 37.3.1 və 37.3.2 maddələrinə uyğun olaraq yenidən hesablanması onların və ya ailə başçısını itirmiş üzvünün MÜRACİƏTİ əsasında bu Qanuna uyğun olaraq həyata keçirilir”". Bu barədə Dia-az.İnfo-ya göndərilən məqalədə deyilir. Məqalədə daha sonra bildirilir: "Qanuna əlavənin qəbulundan 2 il keçib, amma Qanunun 20-ci ( “Qulluq stajına görə əmək pensiyasına əlavələr” ) maddəsinə əsasən, pensiya alan şəxslərin təminatını həyata keçirən DSMF-in Xüsusi Şərtlərlə Təyinat üzrə Mərkəzi Filialı (XŞTMF) əlavənin Qarabağ əlillərinə, şəhid ailələrinə tətbiqinə anlaşılmaz bəhanə ilə qadağa qoyub. İşləyən pensiyaçının işlədiyinə görə pensiyasının 37.3.2-1 maddəsinə əsasən yenidən hesablanması ilə Filala müraciətinə “işi davam etdirdiyinə” görə imtina edilir. Absurdluğa baxın, qanunverici işləyən, işi davam etdirən pensiyaçıların pensiyalarının bu işləməyə, davam etdirməyə görə yenidən hesablanmasını aktlaşdırır, icra etməli orqan imtina edir ki, işləməkdə davam edir !(??) 2 ildir nə ali dövlət hakimiyyəti, hüquq orqanları, nə Maliyyə Nazirliyi, nə Hesablama Palatası, nə Ombudsman bu anlaşılmaz maliyyə-hüquq pozuntusuna, dövlət büdcəsi ilə məmur cibinin dəyişik salınmasına görə tədbir görür. Hamı əlil, qazi, şəhid pensiyalarından rüşvətini alıb susur. Hətta ƏƏSM naziri Sahil Babayevin işləyən pensiyaçıların pensiyalarının özlərinin müraciəti olmadan, yəni proaktiv qaydada yenidən hesablanacağını mediya bildirməsi də yardıma çatmır. DSMF-in pensiya təminatı departamenti dövlətin, nazirin yox, XŞTMF-nin dediyini QANUN sayır. Hazırda Milli Məclisdə dövlət büdcəsinin müzakirələri gedir. Fikrimizcə, qanunverici qəbul etdiyi qanunun icrasını pensiya orqanından sorğulamağa borcludur. Birincisi, qəbul olunan qanunun icrası , Konstitusiyanın 149-cu maddəsinə görə, hamıya məcburidir. İkincisi, qanunların icrasına və tətbiqinə nəzarəti , Konstitusiyanın 133-cü maddəsinə görə, prokurorluq həyata keçirir. Ən başlıcası, MM-in özünün Hesablama Palatası büdcənin düzgün təyinatını yoxlayan qurumdur. Bəs nəyə görə prokurorluq, maliyyə , büdcə nəzarəti qurumları 2 ildir DSMF məmurlarına “işləməyən pensiyaçı” ilə “işləməyən pensiyaçı kateqoriyası” anlayışlarının ayrıntısını-fərqini anlada bilmirlər? Bir daha nəzarətedici qurumların etmək istəmədiyini DSMF-in pensiya təminatına cavabdeh məmurlarının diqqətinə çatdırırıq. Ümumiyyətlə, “kateqoriya”nın fəlsəfədə, riyaziyyatda, linqvistikada , pedaqogikada öz anlamları var. Qısa desək, kateqoriya qrup, dərəcə, çoxluq, cəm ... anlamına gəlir. Məsələn, “ahıllar”, “əlillər”, “işçilər”, “işsizlər”, “sənətçilər”, “əmək pensiyaçıları” kateqoriyaları. Bu “əmək pensiyaçıları” kateqoriyasının özü də bir neçə kateqoriyaya ( əlilliyə, yaşa, ailə başçısını itirməyə görə) bölünür. Bir də var, əlilliyə və yaşa görə işləməyən əmək pensiyaçıları kateqoriyası. Hazırda qadınların 63,5, kişilərin 65 yaşı olduqda işləməyən əmək pensiyası kateqoriyasına aid edilirlər. Bu kateqoriyaya keçəndən sonra işlərini davam etdirənlərin pensiyası “Əmək pensiyaları haqqında” qanunun 37.3.1 maddəsinə uyğun olaraq 6 ildən bir AVTOMATLAŞDIRILMIŞ qaydada yenidən hesablanır. 37.3.2 maddəsinə görə, əlilliyə görə pensiya təyin edilmiş şəxs İŞLƏMƏKDƏ DAVAM EDƏRSƏ, onun pensiya təyin olunduqdan, yaxud əmək pensiyası BU MADDƏYƏ əsasən yenidən hesablandıqdan işləməyən əmək pensiyaçısı KATEQORİYASINA keçdiyi tarixədək olan dövr üzrə toplanan PENSİYA KAPİTALINA və həmin kateqoriyaya keçdiyi tarixdəki yaşına müvafiq tələb olunan SIĞORTA STAJINA əsasən ...AVTOMATLAŞDIRILMIŞ qaydada ( qulluq stajına görə pensiya alanlarınkı MÜRACİƏTLƏRİ əsasında) yenidən hesablanır. Bəs niyə DSMF-in pensiya təminatına cavabdeh qurumları “işləməyən əmək pensiyaçısı” kateqoriyasını qəsd-qərəzlə işləməyi dayandırmaq kimi qəbul edib, qazi, şəhid ailələrinin pensiyalarını MÜRACİƏTLƏRİ əsasında yenidən hesablamaqdan imtina edirlər? Necə olur, işləyən adi şərtlərlə pensiyaçıların işləməyən pensiyaçı kateqoriyasına , yəni 63,5 və 65 yaşına keçəndən sonra pensiyaları 6 ildən bir AVTOMATLAŞDIRILMIŞ qaydada yenidən hesablanır, amma qulluq stajına görə, yəni xüsusi şərtlərlə pensiyaçıların işi davam etdirmələri MÜRACİƏTLƏRİ əsasında yenidən hesablanmaya əsas vermir? Necə olur adi şərtlərlə pensiyaya çıxıb, işi davam etdirənlərdən işi dayandırmaq tələb olunmur, pensiyaları yenidən avtomatik hesablanır, amma xüsusi şərtlərlə pensiyaçılardan tələb olunur? Bu ayrı-seçkilik qərəzdən, mənimsəmədən özgə nədən qaynaqlana bilər? Absurdluğa baxın, pensiyaçı ölənə kimi işləyirsə, belə çıxır, öləndən sonra pensiyası yenidən hesablanmalıdır? Hələ ki bu absurdluq sürür. Haçan dayanacağı da bilinmir".
Azərbaycanda dəmiryol nəqliyyatının vahid operatoru olan «Azərbaycan Dəmir Yolları» QSC dəmir yol sahəsində fəaliyyət göstərən şirkətlər arasında ayrı-seçkiliyə yol verir. FED.az xəbər verir ki, artıq «Azərbaycan Dəmir Yolları» QSC-nin bu davranışı ilə bağlı özəl şirkətlərdə narazılıq yaranıb. Azərbaycanda müxtəlif növ daşımalarla məşğul olan «Alliance Logistics» MMC şirkəti «Azərbaycan Dəmir Yolları» QSC-ni ayrı-seçkilik etməsi və haqsız rəqabət yaratması ilə əlaqədar olaraq Antiinhisar və İstehlak Bazarına Nəzarət Dövlət Xidmətinə müraciət edib.
Müraciətdə bildirilir ki, “Azərbaycan Dəmir Yolları” QSC dəmir yol sahəsində fəaliyyət göstərən ekspeditor şirkətlərinə qarşı haqsız rəqabətə və ayrı-seçkiliyə yol verir, daha dəqiqi, habelə əməkdaşlıqdan əsassız olaraq imtina edir. Şirkət bu halların səbəğbinin araşdırılması və müvafiq tədbirlərin görülməsini istəyir.
Qeyd edək ki, bu hallar “Antiinhisar fəaliyyəti haqqında” Azərbaycan Respublikası Qanununun «Sahə inhisarçılığı»na aid olan 6-cı maddəsinin 4-cü və 11-ci bəndlərinə, eləcə də Qanunun «Təsərrüfat subyektlərinin inhisarçılığı»na aid olan 8-ci maddəsinin 7-ci və 8-ci bəndlərinin pozulması deməkdir.
Xatırladaq ki, 6-cı maddənin 4-cü bəndinə əsasən təsərrüfat subyektlərinin müstəqilliyinin əsassız olaraq məhdudlaşdırılması; 11-ci bəndinə əsasən isə rəqabəti məhdudlaşdırmaq, yaxud aradan qaldırmaq məqsədilə tabeliyində olan təsərrüfat subyektlərinə dempinqin tətbiqi üçün şərait yaradılması qanunla qadağandır.
«Antiinhisar fəaliyyəti haqqında» qanunun 8-ci maddəsinin 7-ci və 8-ci bəndlərinə əsasən isə digər təsərrüfat subyektləri ilə müqayisədə kontragentlərin rəqabət imkanlarına zərər vuran, yaxud zərər vura bilən eyni və ya eyni şərtli müqavilələrin bağlanmasında ayrı-seçkiliyə yol verilməsi; eləcə də, kontragentə sərfəli olmayan və ya müqavilələrin məzmununa aid olmayan müqavilə şərtlərinin ona məcburi qəbul etdirilməsi qadağandır.
Eləcə də “Azərbaycan Dəmir Yolları” QSC-nin bu davranışı “Haqsız rəqabət haqqında” Qanunun
5-ci maddəsinin (Rəqibin təsərrüfat fəaliyyətinin nüfuzdan salınması hallarını əhatə edir) 2-ci hissəsinin, Rəqibin təsərrüfat fəaliyyətinə müdaxiləni əhatə edən 6-cı maddəsinin 2-ci hissəsinin və Haqsız sahibkarlıq fəaliyyətinə aid olan 7-ci maddəsinin 3-cü hissəsinin tələblərinin pozulması əlamətləridir.
Qeyd edək ki, sözügedən qanunun 5-ci maddəsinin 2-ci bəndinə əsasən digər bazar subyektlərinin işgüzar nüfuzu və maliyyə vəziyyəti haqqında yalan və təhrif olunmuş məlumatların yayılması qadağandır.
Qanunun 6-cı maddəsinin 2-ci hissəsinə görə isə rəqibin işgüzar münasibətlərinin qanunsuz vasitələrlə qəsdən pozulması, kəsilməsi və dayandırılması qanunla qadağandır.
Bundan başqa, qanunun 7-ci maddəsinin 3-cü hissəsinə əsasən rəqibin üzərində əsassız üstünlük qazanmaq məqsədilə onun təsərrüfat qərarlarının qəbul edilməsinə və icrasına qanunsuz vasitələrlə təsir göstərilməsi qanunla qadağandır.
Azərbaycan Yerüstü Nəqliyyat Agentliyi “2024 - cü ildə yol infrastrukturunun yaxşılaşdırılması, yol hərəkətinin təhlükəsizliyinin artırılması və tıxacların azaldılması üçün nəzərdə tutulan iş və xidmətlərin satınalınması” tenderinin nəticələrini elan edib.
Dia-az.info xəbər verir ki, tenderin qalibi Azərbaycan Avtomobil Yolları Dövlət Agentliyi olub.
Qalib şirkətlə 3 161 125 manat məbləğində müqavilə imzalanıb.
Xatırladaq ki, Azərbaycan Yerüstü Nəqliyyat Agentliyi bu barədə tenderi dövlət satınalmaları portalından kənar elan edib.
Aqstafa rayonu, Sadıqlı kənd sakini, Qarabağ qazisi Əfəndiyev Ramin Mübariz oğlu yerli icra hakimiyyətindən giley edir. Dia-az.info-nun məlumatına görə, şikayətçi iddia edir ki, dəfələrlə rayon İcra Hakimiyyətində qəbulda olsa da, işlə təmin olunmasına kömək etmirlər:
“Mən, Əfəndiyev Ramin Mübariz oğlu, yazaraq bildirirəm ki, İkinci Qarabağ Müharibəsinin iştirakşısı olmuşam. 2-ci qrup əliləm. Qardaşım Əfəndiyev Amil də veterandır.
İşlə bağlı icra başçısının qəbulunda olmuşuq. Bizə bildirirlər ki, iş yoxdur. Bəs, biz nə edək, nə ilə məşğul olaq? Bu qədər işsizlik olar?
Deyirlər ki, gedin gözləyin, iş olanda sizə məlumat verəcəyik. Amma heç bir məlumat vermirlər. Bu gedişlə heç vaxt da iş olmayacaq”.
Sakinlər deyir ki, Prezident gələndə görməsin deyə binanın bayır hissəsini bəzəyiblər
“Yaşadığımız bina təxminən 70 il əvvəl istifadəyə verilib. İstismar müddəti çoxdan başa çatıb. Kanalizasiya xətləri çürük, ərazisi isə baxımsızdır. Müraciət etdiyimiz qurumlar da məsuliyyəti bir-birinin üzərinə atır”.
Bunu Meydan TV-yə Gəncə şəhəri, Nizami rayonu, Heydər Əliyev prospektindəki 56 saylı binanın sakinləri deyir. Çoxillik bina 4 blokdan ibarətdir. Binada təqribən 50 ailə yaşayır.
“Üzlüyə kibrit vursan, alışar”
Bina sakini Rəvanə Əliyeva deyir ki, binada yalnız bir dəfə dam örtüyündə təmir işi aparılıb. Bir də illər əvvəl binanın Heydər Əliyev prospektinə baxan tərəfi tezalışan penoplastla üzlənib:
“O vaxt guya abadlaşdırma işləri aparılırdı, gəlib binanın dam örtüyünü ortabab təmir elədilər, məqsəd heç də sakinlərin rahatlığı deyildi. Sadəcə olaraq, binanın bir tərəfi Heydər Əliyev prospektinə baxır, guya bunlar abadlıq işləri görürlər. O vaxt prospektə tərəf baxan hissəni penoplast materialla üzlədilər. O üzlüyün sökülməsi üçün müraciət etmədiyimiz yer qalmayıb. Bəzi hissələri öz-özünə sökülüb, tökülüb. O hissələrə də gətirib rəng çəkiblər. Bu üzlük insan həyatı üçün təhlükəlidir, Allah eləməmiş, kibrit vursan, alışar”.
“Kanalizasiya xətləri çürüyüb”
Sakin Afaq Həsənovanı narahat edənsə binadakı kommunikasiya xətləridir. Deyir, kanalizasiya xətləri 70 ildə bircə dəfə də əsaslı təmir olunmayıb. Bu səbəbdən də mənzillərin tualetlərində tez-tez çirkab sular dolub-daşır:
“Hətta bəzən çirkab sular aşağı mərtəbələrdəki qonşu mənzillərə də süzülür. Bezmişik”.
Sakin Kamil Qasımovsa bloklardan və binanın həyətyanı sahəsindən danışır. Onun sözlərinə görə, həyətyanı ərazidə indiyədək hər hansı təmizlik, abadlıq işləri görülməyib:
“Sovet vaxtı çəkilmiş asfalt örtüyünü illərin yağan yağışı çoxdan yuyub aparıb. Həyətdə yer var, ancaq uşaqlar üçün bir meydança düzəltmirlər. Bloklara girişlər pis vəziyyətdədir. Özümüzdə də imkan yoxdur ki, əl gəzdirək”.
Sakinlər deyir, qonşuluqdakı 57 saylı bina da eyni vəziyyətdədir.
Qurum: “Pis görünməsin deyə, alçipanla örtdük”
Aprelin 9-da Prezident İlham Əliyev Gəncəyə səfər edəndə bu binaların qarşısından ötüb keçib. Sakinlər deyir, çox arzulayıblar ki, Prezident maşından düşüb binanın üzlüyü ilə maraqlansın:
“Prezidentin səfərinə üç gün qalmış icra hakimiyyəti fəhlələri tökdü prospektdəki binaların qarşısına, penoplastların çürümüş hissələrini qaşıyıb yerinə alçipan vurub, üstünü rənglədilər. Kaş ki, Prezident şəxsən yaxınlaşıb binaların prospektə tərəf baxan hissəsinin üzlüyü ilə maraqlanaydı. Binaların həyətlərinə burulub daxili hissələrini də görəydi. Kaş biləydi ki, məmurlar onun 10 il əvvəl tezalışan üzlüklərin sökülməsiylə bağlı verdiyi tapşırıqları yerinə yetirmir”.
Gəncə Şəhər Mənzil Kommunal Təsərrüfatı İstehsalat Birliyindən Meydan TV-yə bildirilib ki, həmin binada təmir-abadlıq işləri tədbirlər planına salınıb. Ancaq bu, nə vaxt baş tutacaq, hələlik məlum deyil:
“Binanın üzlüklərinin bəzi hissələri sökülmüşdü. Düzdür, cənab Prezident gələnə yaxın pis görünməsin deyə, o hissələri alçipanla bağladıq. Ancaq tədbirlər planına salınıb, o məhəllədə əsaslı abadlıq işləri aparılacaq”.
Türkiyənin məşhur şirkəti "Demirören Holdinq" "Ziraat Bankı"ndan aldığı və 6 ildir ödəniş etmədiyi kreditlərin müqabilində bəzi binalarını satmalı olub.
AFN.az Türkiyə mediasına istinadən xəbər verir ki, holdinq “Hürriyet Gazetecilik ve Matbaacılık”ın tərkibindəki daşınmaz əmlakın bir hissəsini banka 1 milyard 287 milyon 922 min TL-yə satıb. Beləliklə, “Hürriyet”, “Kanal D”, “CNN Türk” və bir çox başqa media kanalı və qəzetinin də sahibi olan “Demirören Holdinq” nəşriyyat qrupuna aid bəzi binalar “Ziraat Bankı”na keçib.
"Dünya" qəzetinin xəbərinə görə, 2018-ci ildə "Doğan Holdinq"dən 916 milyon dollara alınan "Hürriyet", "Kanal" D, "CNN Türk" və bir çox media kanalı və qəzetləri üçün "Ziraat Bankı"ndan 895 milyon dollar kredit götürən "Demirören Holdinq" bu ilədək ödənilməli olan 70 milyon dolları ödəyə bilmədiyi üçün bir sıra daşınmaz əmlakını "Ziraat Bankı"na satmağa məcbur olub.
"Doğan Holdinq"ə aid bir çox qəzet və televiziya kanalını alan "Demirören Holdinq" bu alış üçün ödədiyi vəsaitin, demək olar ki, hamısını "Ziraat Bankı"ndan aldığı kreditlə qarşılayıb.
Aradan keçən müddətdə "Demirören Holdinq"in "Ziraat Bankı"na heç bir ödəniş etməməsi ictimaiyyətdə müzakirələrə səbəb olub. Lakin holdinq ötən il verdiyi açıqlamalarda ödənişlərin razılaşdırıldığı kimi aparıldığını bildirilmişdi. Son hadisələr isə göstərir ki, bu, yalan məlumat olub və heç bir ödəniş reallaşdırılmayıb.
Taksimin mərkəzində, İstiqlal küçəsində yerləşən "Demirören" Ticarət Mərkəzini illik 70 milyon dollarlıq ödəmə qarşılığında "Denizbank"a verən şirkətlər qrupu İstanbulun Esenyurt rayonunda 61,5 sotluq ərazidə yerləşən mətbəənin də 816,6 milyon lirəyə təyyarə istehsalçısı "Baykar"a satıldığını açıqlayıb.
Nəhayət, "Demirören Holdinq" "Ziraat Bankı"na olan 70 milyon dollarlıq kredit borcunun müəyyən qədərini (açıqlanmır) ödəmək üçün "Hürriyet Gazetecilik və Matbaacılık"a daxil olan daşınmaz əmlakın bir hissəsini banka 1 milyard 287 milyon 922 min TL-yə satıb.
Qeyd edək ki, "Demirören Holdinq" adı Azərbaycan üçün də yad deyil. Belə ki, 2021-ci ildə İqtisadiyyat Nazirliyinin təsisçisi olduğu “Azərlotereya” ASC bu holdinqə idarəetməyə verilib. Prezident İlham Əliyevin “Azərlotereya”nın idarəetməyə verilməsi barədə 16 yanvar 2021-ci il tarixli sərəncamına əsasən, şirkətin Türkiyənin “Demirören Şans Oyunları Yatırımları A.Ş.” şirkətinin törəmə müəssisəsi olan “YMT Sans B.V.” şirkətinə 10+5 illik müddətə idarəetməyə verilməsi ilə bağlı 27 fevral 2021-ci ildə müqavilə imzalanıb. İdarəetmənin bu formasına keçiddən sonra "Azərlotereya" ilə bağlı bəzi məqamlar müzakirə mövzusu olub. Məsələn, “Azərbaycan Respublikasının 2022-ci il dövlət büdcəsinin icrası haqqında" Azərbaycan Respublikasının Qanun layihəsinə və Azərbaycan Respublikasının 2022-ci il dövlət büdcəsinin icrasına dair illik hesabata Azərbaycan Respublikası Hesablama Palatasının rəyində bildirilirdi ki, bəzi müəssisələr üzrə xalis mənfəət əldə edilsə də, büdcəyə dividend ödənişi həyata keçirilməyib. Bu müəssisələrdən biri isə "Azərlotereya" ASC-dir. Belə ki, səhmlərində dövlətin payı olan müəssisə olaraq ASC-nin 2022-ci il üzrə dövlət büdcəsinə heç bir divident ödəmədiyi qeyd edilsə də, “Azərlotereya” ASC-nin 2022-ci il üzrə maliyyə hesabatında Hesablama Palatasının əksinə olaraq, müəssisənin ötən il üzrə 30,194,740 manat dividend ödədiyi qeyd edilir. Maraqlıdır ki, ötən il "Demirören Holdinin "Ziraat Bankı"na olan kredit ödənişlərinin də normal ödəndiyini açıqlamışdı. Mövzunu diqqətdə saxlayacağıq.
Qax Rayon İcra Hakimiyyətinin başçısı Musa Şəkiliyev sosial şəbəkələrdə qınaq obyektinə çevrilib. TEREF oxu.az-a istinadən xəbər verir ki, buna səbəb səyyar qəbul zamanı etdiyi diqqətsizlik olub. Belə ki, o, görüşdə özü və ətrafındakı vəzifəli şəxslərə (rayonun hüquq-mühafizə orqanlarının və aidiyyəti qurumlarının rəhbərləri) kölgədə yer rahatladığı halda, onun qəbuluna yazılan Uzuntala kəndinin sakinləri saatlarla günəşin altında oturmaq məcburiyyətində qalıblar. Onu da vurğulayaq ki, qəbul zamanı yaşlı kişilər bağçalarda körpələrə verilən stullarda əyləşdiriliblər.
Şəhərin mərkəzi küçəsi daxil digər ərazilərdə də məişət tullantılarının günbəgün artması halları müşahidə olunur. Ekologiya və Təbii Sərvətlər Nazirliyinin Regional Ekologiya idarə rəsimləri tərəfindən buna qarşı dəfələrlə mübarizə aparıb, protokollar və cərimələr yazılıb. Amma, buna baxmayaraq problem hələdə öz həllini tapmır. Xüsusilə Gəncədə şəhərdaxili və kənar ətraflarda bu problem daha qabarıq formadadır.
Görünür şəhərində məişət tullantılarının daşınma sistemi mövcud olmadığı üçün insanlar məcbur qalıb, zibilllərini küçələrə və ya yol kənarlarına atırlar. Bu isə ümumilikdə Gəncə şəhərində mövcud vəziyyətin daha da ağır olmasına işarədir.
Qeyd edək ki, “Azərbaycan Respublikasında ekoloji vəziyyətin yaxşılaşdırılmasına dair 2006-2010-cu illər üçün Kompleks Tədbirlər Planı”, “2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”, habelə milli iqtisadiyyat və iqtisadiyyatın əsas sektorları üzrə strateji yol xəritələri çərçivəsində beynəlxalq investisiyalar cəlb etməklə təhlükəli (o cümlədən radioaktiv) tullantıların yığılması, yerləşdirilməsi və zərərsizləşdirilməsi üçün poliqonlar yaradılıb. Gəncə şəhərində yığılan tullantıların zərərsizləşdirilməsi məqsədilə poliqonlar var. Əcabə görəsən Gəncə ŞİH və aidiyatı qurumlar bu biabırçı tullantılarla dolu ərazini niyə görməzdən gəlir?!. Gəncə şəhərində yaşanan natəmiz ekoloji vəziyyətin, “Yaşıl dünya naminə həmrəylik ili” çərçivəsində COP29 tədbirlərinə sayqısızlıq deyilmi,,,?
Onunuda bildirək ki, Ekologiya və Təbii Sərvətlər Nazirliyinin 10 saylı Regional Ekologiya idarəsi tərəfindən Ekologiya.az-a bildirilib ki, Gəncə şəhərində mövcud poroblemlərlə bağlı dəfələrlə xəbərdarlıqlara baxmayaraq, mülkiyyətçi şəxslər ətraf mühütə zərər vurmaqdan çəkinmirlər.
İdarədən onuda bildirdilər ki, tərəfimizdən dərhal mövcud problem nəzarətə götürülüb, aqraşdırma aparılır.
Məlumdur ki, ölkəmizdə hər kəsin keyfiyyətli və təhlükəsiz ərzaq mallarına, kənd təsərrüfatı məhsullarına və s. olan tələbatının lazımi səviyyədə ödənilməsi məqsədilə müəyyən addımlar atılsa da, faktdır ki, bu gün də bu sahədə çox ciddi problemlər yaşanmaqdadır. Baxmayaraq ki, Prezident İlham Əliyev 29 aprel 2019-cu il tarixdə “Azərbaycan Respublikasında qida təhlükəsizliyinin təmin edilməsinə dair 2019–2025-ci illər üçün Dövlət Proqramı”nın təsdiq olunması haqqında №114 Sərəncam imzalamışdır. Bu Sərəncamın imzalanmasında əsas məqsəd, qeyd etdiyimiz kimi əhalinin təhlükəsiz və keyfiyyətli qida məhsulları ilə təmin olunması, qida təhlükəsizliyi sisteminin səmərəliliyinin və şəffaflığının daha da artırılması, həmçinin bu sahənin beynəlxalq tələblərə uyğunlaşdırılması nəzərdə tutulmuşdur. Cənab Prezident tərəfindən belə bir Sərəncamın imzalanmasına baxmayaraq, bu gün də bəzi işbazlar tərəfindən əksər ictimai-iaşə obyektlərində olmazın hoqqalara qol qoyulmaqda davam edir.
Unutmaq olmaz ki, qida mənşəli xəstəliklər və zəhərlənmə halları həm əhalinin sağlamlığına, həm də hər kəsin rifah halına olduqca mənfi təsirini göstərir. Bu baxımdan qida təhlükəsizliyi məsələsi cəmiyyətimizin inkişafında, gələcək nəsillərin sağlamlığında, insan genofondunun qorunmasında, iqtisadi məhsuldarlığın təmin olunmasında və s. xüsusi əhəmiyyət kəsb edən bir sahədir. Hal-hazırda qida və kənd təsərrüfatı məhsullarının istehsal və idxal-ixrac həcminin artırılması, istehlakçıların sağlamlığının və hüquqlarının müdafiə olunması kimi məsələlər əsas şərt olaraq qarşıya qoyulsa da, yenə də əksər ictimai-iaşə müəssisələrində qida təhlükəsizliyi sahəsində ciddi problemlər yaşanmaqdadır. Adicə bir faktı qeyd edək ki, bu günlərdə gundemxeber.az xəbər portalının redaksiyasına Bakı şəhəri, Yasamal rayonu, Əbdürrəhim bəy Haqverdiyev küçəsi-5 ünvanında yaşayan sakinlər tərəfindən müraciət daxil olmuşdur. Müraciət müəlliflərinin etdikləri xahişi nəzərə alıb qeyd olunan ünvanda olduq və müəyyən araşdırmalar da həyata keçirdik. Apardığımız araşdırmalar zamanı ilk olaraq qeyd olunan ünvanda meyvə-tərəvəz məhsullarının satışı ilə məşğul olan Səttar Məmmədov adlı şəxsə bir neçə sual verib lazımi cavablar əldə etdik. Bəli, bu şəxs ünvanladığımız suallara verdiyi cavabında “Mən uzun müddətdir ki, Yasamal rayonu, Əbdürrəhim bəy Haqverdiyev küçəsi-5 ünvanında yaşayıram və yaşadığım mənzilin qarşısındakı qarajda meyvə-tərəvəz məhsullarının satışı ilə məşğul oluram. Qeyd edim ki, belə bir fəaliyyət növü ilə məşğul olmağım üçün ilk gündən aidiyyəti dövlət qurumlaından lazımi sənədləri, hətta sağlamlıq arayışı da almışam. Hal-hazırda VÖENim var və mən vergi ödəyicisiyəm. Çalışdığım qarajda meyvə-tərəvəz satarkən hər cür təmizliyə, lazımi tələblərə, alıcılarla səmimi münasibətin yaranmasına və s. olduqca önəm verirəm. Belə bir səbəbdəndir ki, ətraf ərazidə yaşayan sakinlərin hər biri mənim fəaliyyətimdən, insanlara qarşı göstərdiyim səmimi münasibətdən olduqca razılıq edirlər” dedi. Elə ki, qeyd olunan ünvanda meyvə-tərəvəz məhsullarının satışı ilə məşğul olan digər şəxsə, yəni əslən Sabirabad rayonundan olduğu bildirilən Qəzənfər adlı şəxsə də bəzi suallarımızı ünvanladıq. Bu şəxs isə ünvanladığımız sualları cavablandırmaq əvəzinə, bir növ “burcutmalara” qol qoydu. Bu da onu ehtimal etməyə əsas verir ki, meyvə-tərəvəz məhsullarının satışını həyata keçirən bu şəxs, indiyə kimi aidiyyəti dövlət qurumlarından lazımi sənədləri əldə etməyib. Sadəcə olaraq o, bəzi dövlət qurumlarının əməkdaşları ilə “dil tapdığından”, bu gün də fəaliyyətini davam etdirməkdədir. Bir sözlə, apardığımız araşdırmalar zamanı bir çox həqiqətləri üzə çıxara bildik. Yəni, ilk olaraq Səttar Məmmədovun hansı əsasla fəaliyyət göstərməsini araşdırarkən bəlli oldu ki, bu şəxs ilk gündən bütün lazımi sənədləri əldə edib. Qeyd olunan ünvanda meyvə-tərəvəz məhsullarının satışını həyata keçirən Qəzənfər adlı şəxs isə, “Gedin öz işinizlə məşğul olun, özüm bilirəm necə fəaliyyət göstərirəm” cavabını verdi. Hətta, üstüörtülü olsa belə o, bizə qarşı hədələyici ifadələr işlətməkdən də çəkinmədi. O halda ortaya çoxsaylı suallar çıxır, görəsən Əbdürrəhim bəy Haqverdiyev küçəsi-5 ünvanında meyvə-tərəvəz məhsullarının satışını həyata keçirən Qəzənfər adlı şəxs, Dövlət Vergi Xidmətində, Yasamal Rayon İcra Hakimiyyətində və digər dövlət qurumlarında çalışan, həmçinin qeyd olunan problemin varlığına cavabdehlik daşıyanların diqqətindən necə yayınır? Yəni, sual oluna bilər ki, görəsən ərazi üzrə cavabdehlik daşıyan aidiyyəti dövlət qurumlarının məsul şəxsləri Qəzənfər adlı şəxsin atdığı addımlara niyə göz yumurlar? Deməli, ortada hansısa “gizli əmmalar”, yaxud da “qaranlıq müəmmalar” var ki, bir kimsə bu şəxsə “qaşın üstə qara var” demir, yaxud da deməyi bacarmır. Bu belə olduğundan qeyd olunan problemi ictimailəşdirmək qərarına gəldik ki, ortada olan bəzi “gizli əmmalara”, bir çox “qaranlıq müəmmara” aydınlıq gətirilsin. Əslinə baxsan, Qəzənfər adlı şəxsin aidiyyəti dövlət qurumlarından lazımi sənədləri əldə etmədən fəaliyyət göstərməsi yolverilməz haldır. Digər tərəfdən, bu şəxsin vergi ödəyicisi olmadan qeyri-qanuni fəaliyyət göstərməsi, birbaşa vergi cinayətinin baş verməsinə yollar açır. Deməli, adlarını hallandırdığımız dövlət qurumunun əməkdaşları üzərinə düşən vəzifə borclarını lazımınca yerinə yetirmirlər ki, bir çox şəxslər, o cümlədən Qəzənfər adlı şəxs də vergidən yayınır və məşğul olduğu sahəyə dair tələb olunan qaydalara əməl etmir. Biz bir media qurumu olaraq bu yöndə araşdırmalarımızı aparmaqla, məhz bu gün də tam əksəriyyət üçün maraqlı və düşündürücü məqamları ortaya çıxartmağa çalışacağıq. Qarşı tərəfin də mövqeyini dinləyə bilərik.
Bakının Binəqədi rayonu, Biləcəri qəsəbəsinin sakinləri içməli su təchizatı ilə bağlı problemlər yaşayırlar.
İqtisadiyyat.az xəbər verir ki, bu barədə yazıçı Ömər Xəyyam videogörüntü yayıb.
Onun sözlərinə görə, qəsəbədə "Kristal Abşeron"un binalarındakı mənzillərə qumlu su verilir.
Videoda suyun tərkibinin xeyli çirkli olduğu görülür.
Sakinlər deyir ki, suyun keyfiyyətinin yaxşılaşdırılması məqsədilə filterlərdən istifadə etməyə məcbur olurlar. Bildirilir ki, filter qoyulmadan verilən suyun içmək üçün istifadə olunması təhlükəlidir.
İqtisadiyyat.az məsələ ilə bağlı "Azərsu"ya sorğu ünvanlayıb. Qurumdan sorğumuza cavab olaraq bildirilib ki, həmin binalarda yaşanan içməli suyun keyfiyyətinə "Kristal Abşeron" cavabdehdir:
Qeyd edilib ki, içməli suyun çirkli olması çox güman anbarların vaxtında yuyulmaması ilə əlaqədardır: "Bunu da "Kristal Abşeron" özü həll etməlidir. Çünki paytaxtın hər bir nöqtəsinə verilən su eyni standartda və eyni keyfiyyətdədir. Bu gün Əhmədli də, Biləcəri də, digər ərazilərimiz də eyni sudan alır. Ona görə də suyun keyfiyyəti məsələsi daim nəzarətimizdədir".
Məsələ ilə bağlı "Kristal Abşeron"un rəsmi saytında qeyd edilən nömrələrlə əlaqə yaratmağa çalışsaq da, cavab verən olmayıb.
