Qaradağ rayonu Lökbatan qəsəbəsində yerləşən 4 saylı doğum evində qazidən rüşvət tələb olunmasının detalları məlum olub.

Sözügedən doğum evinin baş həkimi Kəmalə Heydərova bildirib ki, baş vermiş hadisəni sosial şəbəkələrdə görüb:

"Doğum şöbəsinin həkimi Sevinc Məmmədova tərəfindən doğuş icra olunub. Hamilənin qızı dünyaya gəlib. Məsələ ilə bağlı xəstənin yaxınları tərəfindən bizə müraciət olunmayıb. Hazırda görüntülərdə əks olunan hadisə ilə bağlı həkimdən izahat alınır".

Baş həkim K.Heydərova vurğulayıb ki, altı aydır rəhbərlik etdiyi xəstəxanada bu kimi mənfi halla ilk dəfədir qarşılaşır.

Ətraflı "Xəzər Xəbər"in süjetində:

Bu yaxınlarda Ankaradan dəyərli bir qonağımız gəlmişdi. Axşamüstü (günün pik vaxtı) qonağımızı “İçərişəhər” metrostansiyasının yaxınlığından götürüb, "Təbriz" küçəsinə aparmalıydım. Elə bir tıxac vardı ki, maşınla gedəcəyimiz yerə ən yaxşı halda 1 saat – saat yarıma çata bilərdik. Taksi sifariş vermək istədim. Təxminən 15 dəfə cəhd etdim, alınmadı. Taksi yox idi.

Orada taksilərin yollarda sıxlığa səbəb olması barədə deyilənləri xatırladım. Elədirsə, taksilərin sayı bu qədər azaldığı təqdirdə, tıxac niyə azalmayıb?

Taksi tapmayacağımıza əmin olduqdan sonra, qərara gəldik ki, metro ilə “Gənclik” stansiyasına gedib, oradan taksiyə minək.

Elə də etdik. Amma etməz olaydıq…

“İçərişəhər” stansiyasında elə bir sıxlıq və havasızlıq vardı ki, nəfəs almaq mümkün deyildi. Bir neçə dəqiqə gözlədik, qatar gəldi, mindik. Burada vəziyyət daha fəlakət!!!

Basa-bas, havalandırma sistemi olmayan qatarla üç dayanacaq getmək işgəncəyə bərabər oldu. Qatarda bizim qonaqdan başqa, xeyli əcnəbi də vardı. Məlum, Bakıya gələnlər İçərişəhəri görmək istəyirlər deyə, turistlərin o istiqamətdə axını olur.

Qatardakı bütün sərnişinlər tər-suyun içindəydi. Mənimki isti ilə yanaşı, həm də xəcalət təriydi.

Əslində havasızlıq problemi təkcə yayda yox, qışda da olur. Üstəlik, qatarların 5-6, bəzən 7-8 dəqiqə intervalla hərəkəti ciddi sərnişin sıxlığı yaradır.

Bir ölkənin paytaxtının, baş şəhərinin yeraltı nəqliyyatı bu vəziyyətdə olmamalıdır!

Böyük Zəfər qazanan, illərdir, ən mötəbər beynəlxalq tədbirlərə ev sahibliyi edən, bölgənin ən güclüsü olan, dünyanın super güclərinin hesablaşdığı bir ölkənin paytaxtının yeraltı nəqliyyatı bu vəziyyətdə ola bilməz!

“Bakı Metropoliteni” QSC-yə sorğu verirsən, cavabında statistik rəqəmləri sadalayıb, sonda deyirlər ki, köhnə nəsil qatarlara havalandırma-kondisioner sisteminin quraşdırılması mümkün deyil.
Yəni, belə gəlib, belə gedəcək. Dözülməz, boğanaq istilərdə sərnişinlər havasız vaqonlarda gedib-gəlməyə məhkumdur.

Köhnə qatarlara havalandırma sisteminin quraşdırılmasının mümkünsüz olduğunu hamı bilir.

Amma siz metroya məsulsunuz axı…

Sizi oraya təyin ediblər ki, mümkünsüzü mümkün edəsiniz, problemin həllini tapasınız ki, paytaxtın sakinləri, qonaqları metrodan rahat istifadə eləsin. Qan-tərin içində yol gedib, halı pisləşməsin, bayılmasın, bəzən də ölməsin.

Sizi oraya ona görə təyin etməyiblər ki, öz rahat, komfortlu avtomobillərinizlə işə gəlib, sərin kabinetlərinizdə oturub, “bu, mümkün deyil” deməklə günləri, ayları, illəri yola verəsiniz…

Gülşən Hacıyeva
TNS

“İstehlakçıların hüquqlarının müdafiəsi haqqında” 19.09.1995-ci il tarixli
Azərbaycan Respublikası qanununun 19-cu maddəsi istehlakçıların
hüquqlarının və qanuni maraqlarının dövlət müdafiəsi haqqındadır.
Dövlətin adından bu müdafiəni İqtisadiyyat Nazirliyi, yanındakı Antiinhisar
və İstehlak Bazarına Nəzarət Dövlət Xidməti həyata keçirir. Di gəl,
keçirirmi? Bu sualın cavabının “yox” olmasını konkret faktlar doğrulayır.
Elə son günlərin pozuntularından və istehlakçı hüquqlarını qorumağa
təhkim edilən Dövlət Xidmətinin susqunluğundan danışaq. Ölkədə fəaliyyət
göstərən bütün mobil operatorlar, eldə deyildiyi kimi, bir-birinin “ağzına
tüpürüblərmiş kimi” müqavilə şərtlərini birtərəfli qaydada pozaraq tarifləri
də qaldırıb, internet paketlərinin qiymətini də. Birtətərəfli qiymət artımına
baxın, indi ən aşağı aylıq paket qiyməti 6 manatdan başlayır. Əvvəllərsə
həftəlik, 15 günlük paketlərlə yanaşı , aylıq 3 manatlıq paketlər də
istehlakçıların ixtiyarına verilirdi. Belə xidmətdən daha çox aztəminatlı
tələbələrin, əlillərin, pensiyaçıların yararlanmaları isə heç kimə gizlin deyil.
Aylıq 80-100 manata göz dikən tələbənin, müharibə veteranının ayda ən
azı 6 manat rabitə xidmətinə ödəməyə pulunun çatmadığı göz önündə
deyilmi? Bəs İqtisadiyyat Nazirliyi, yanındakı Antiinhisar və İstehlak
Bazarına Nəzarət Dövlət Xidməti hara baxır, bu qurumun dövlət
büdcəsindən maliyyələşməsinə nə ehtiyac var?
Kommunal xidmətlər sektorunda da durum ürəkaçan deyil. Hökumət,
qanunverici orqan əhalinin durumunu ağırlaşdıran aktlarla istehlakçıları
çıxılmaz duruma salıb. Özbaşınalığa baxın, “Azəristilik” istilik qiymətlərini
özbaşına Tarif Şurasının qərarına uyğun olaraq yaşayış sahəsinin kvadrat
metrinə görə 15 qəpikdən hesablamaq əvəzinə, ümumi sahəyə uyğun
hesablama aparıb. Qış mövsümü bitdi, bu 6 ayda istilik xidməti anlamadı
ki, NK-nın qərarında söhbət ümumi yaşayış sahəsindən gedir, hər
mənzilin ümumi sahəsindən yox. Bunu anlamaq bu qədərmi çətindir ki,
istilik verilməyən artırmaya, hamam tualetə, dəhlizə görə istehlakçıdan
ödəniş tələb edilməsi absurddur. Bu, Konstitusiyanın 73-cü maddəsinə də
ziddir.
Energetika, su təminatı, nəqliyyat sahəsində də istehlakçı hüquqlarının
kobud pozuntusu müşahidə edilir. Qaz, işıq, su sayğaclarının fiziki şəxslərin
istifadəsi üçün pulsuz , xidmət qurumunun hesabına quraşdırılması
qanunda yazılsa da, yazılmayan qanunlarla istehlakçılar aldadılır,
qanunsuz ödənişə məcbur edilir, qanunsuzluğa boyun əyməyənlər isə
kommunal xidmətlərdən məhrum edilir. Təsəvvür edin, “Azəriqaz” 15 ildən
çoxdur Qarabağ qazisinin müraciətinə baxmır, evin çöldən “Kombi” sistemi
ilə qızdırılmasına sayğac quraşdırmaqdan imtina edir. Bakı İnzibati
Məhkəməsi ( h. Fərid Mədətli) 5 ildir vermədiyi aktla əlil fiziki şəxsə
saatda 10 kub metrdən çox qaz sərf edən istehlakçılar üçün
nəzərdə tutulan sənaye qaz qurğusunun quraşdırılmalı olmasını
qərara alıb. İndi 5 ildir əlil-istehlakçı məhkəmə qərarının icrasını ,sənaye
qaz qurğusunun quraşdırılmasını və müqavilə bağlanmasını tələb edir, nə
qərar icra olunur, nə sayğac quraşdırılır. “Azəriqaz”ın keçmiş rəhbərliyi isə
otaqların, hamamın qızdırılmasını binanın çölündə quraşdırılan qaz
qurğuları yolu ilə həyata keçiriləcəyini bildirirdi. İmkan vermədilər, elə bu
təklifdən sonra rəis görəvindən alındı. İşıq xidmətində özbaşınalıq hökm
sürür, istehlakçı hüquqları qorunmur. Özbaşınalığa baxın, 2018-ci ilə kimi
50 metr məsafəyə qədər görülən işlər xidmət qurumunun hesabına həyata
keçirilirdi, qoşulma haqqı tutulmurdu. İndi hamısı istehlakçının boynuna
qoyulub, hətta köhnə tarixə qoşulma haqqı da tələb olunur. Onu da
vurğulayaq ki, bu qoşulma haqqının qaz, su xidmətinə də şamil edilməsinə
başlanılıb və istehlakçı hüquqlarını qorumalı olan qurum bu pozuntuya
qiymət vermək istəmir. Özbaşınalıq o həddədir ki, əlillər, qazilər bu
ödənişləri ödəməkdən azad olsalar da, xidmət qurumları qanunsuz
ödənişlər tələb etməkdə “azadlıq”larını ortaya qoyurlar.
Bəs İqtisadiyyat Nazirliyi, yanındakı xidmət qurumu niyə görəvini icra
etmir, niyə qanuna uyğun olaraq məhkəmədə istehlakçı hüquqlarının
müdafiəsinə ərizə vermir? Əksinə, hüquq pozucularını qoruyur? Yəqin
hüquq müdafiəçiliyinin də öz haqqı var. Ombudsman da eləcə, yalnız
qanunsuz cavablarla poçtalyon rolunu oynayır. Qanunvericilik isə real
addımlar atılmasını doğrulayır. Atılacaqmı? İstehlakçı hüquqları
qorunmayacaqsa, İqtisadiyyat Nazirliyi, yanındakı Antiinhisar və İstehlak
Bazarına Nəzarət Dövlət Xidməti nəyə və kimə lazımdır?
“Azərişıq” ASC 8-ci ildir verdiyi 03.04.2017-ci il tarixli texniki şərti ,
müqavilə öhdəliyini icra etməkdən imtina edir. Antiinhisar və İstehlak
Bazarına Nəzarət Dövlət Xidməti susur, istehlakçının isə məhkəmə
müdafiəsi hüququna da qadağa qoyulub. Cavabdehin “hüquq” xidmətinin
haqqı ilə. Hələ ki ölkədə hüquq, haqq-ədalət yox, haqq-hesab hökm sürür.
Bu hökm nə qədər sürəcək, ilahi?
Məğrur Bədəlsoy
TEREF

Və ya haqqımızı necə və niyə qəsb edirlər?

Bu gün internet bizi birləşdirən, qarşımızda yeni imkanlar açan bir vasitədir. Bu həqiqəti qəbul edən hər kəs sürətli, davamlı internet üçün büdcəsindən daim maliyyə ayırmağa məcburdur. İnternetdən rahat və davamlı istifadə isə ayırdığımız büdcə ilə düz mütənasib olmalıdır.

Bəs bu, hər zaman belədirmi? Ümumiyyətlə, lazımi məbləği ödəmək davamlı və sürətli internetlə təminata zəmanət verirmi? Təəssüf ki, ölkəmizdə bunu hələ əminliklə təsdiqləmək mümkün deyil. Təkcə sosial şəbəkə platformalarına nəzər salmaq bəs edir ki, həm mobil, həm də genişzolaqlı internetlə bağlı müxtəlif problemlərin öz mövcudluğunu qoruduğuna şahidlik edək.

Azad İstehlakçılar Birliyinin (AİB) sədri Eyyub Hüseynov AYNA-ya açıqlamasında həm mobil, həm də genişzolaqlı sabit internetlə bağlı istehlakçılardan şikayətlər gəldiyini deyib: “Mobil operatorlar öz üstün vəziyyətlərindən istifadə edərək, istehlakçıların hüquqlarını pozmağa davam edir. Bundan başqa, mobil operatorların, sanki mobil cihazlar istehsal edən müəssisələrlə əlbir olduğunu müşahidə edirik. Belə ki, telefon cihazlarına elə rejimlər qoyurlar ki, onlar avtomatik olaraq və ya istehlakçının səhvinə görə aktivləşdirilir və istehlakçıdan külli miqadarda pul çıxılır. Bu, xüsusilə də xarici ölkələrə səyahət edən vətəndaşların başına gəlir”.

“Başqa bir tələ isə vətəndaşlara təklif edilən kurslar, funksiyalardır. Onlar təklif edilərkən ödənişli olması qeyd edilimir. Vətəndaş isə onu aktivləşdirir və sonra baxır ki, balansından xeyli miqdarda pul silinib. Bundan başqa stasionar internet şəbəkəsi ilə bağlı da narazılıqlar çoxdur. Bizə ünvanlanan şikayətlərə görə, internetin sürəti qiymətə uyğun olmur, müqavilə şərtləri yerinə yetirilmir”, - deyə müsahibimiz bildirib.

Hüseynovun sözlərinə görə, internet provayderlərindən hansısa qiymətləri aşağı salmaq istədiyi halda digər provayderlər elə vəziyyət yaradır ki, bu, mümkünsüz olur: “Bununla bağlı şikayət də almışdıq. Vətəndaşların dediklərinə görə, digər provayderlər qiyməti aşağı salmaq istəyən internet provayderini boykot etdiyi üçün müştəri digər provayderin informasiyasını ala bilmir. Biz bununla bağlı aidiyyəti dövlət orqanlarına da müraciət etmişdik. Lakin nəticəsiz qaldı və qiyməti aşağı salan provayder məcbur olduğu üçün qiyməti digər provayderlərlə uyğunlaşdırmalı oldu. Yəni internet resurslarında bu cür halların olduğuna da şahidlik edirik”.

Bütün bunlarla yanaşı internetə əlçatımlılıq, infrastrukturun vəziyyəti, xüsusilə də hava şəraitindən asılı olaraq internetin sürətinin zəifləməsi, kəsilməsi ilə bağlı problemlərə də tez-tez rast gəlinir. Bu barədə ümumi vəziyyəti AYNA-ya şərh edən “Azərbaycan İnformasiya və Kommunikasiya Texnologiyaları Sənayesi Assosiasiyası”nın İdarə Heyətinin sədri Elvin Abbasov söyləyib ki, mis kabellər dövründə internetdən çox şikayətlər eşidilsə də, indi vəziyyət fərqlidir: “Beynəlxalq reytinqlərə görə, Azərbaycanda mobil və genişzolaqlı internetlə bağlı vəziyyət əvvəlki illərlə müqayisədə indi daha yaxşıdır. Artıq ucqar kənd və rayonlar da daxil olmaqla, ölkənin təxminən 80 faizi genişzolaqlı internetlə təmin olub”.

Ölkədə internet sürəti probleminə gəlincə, mütəxəssisin qeyd edib ki, artıq bir çox rayon və kəndlərdə infrastruktur dəyişikliyi baş verdiyi üçün internetin sürətindəki problemlərin səbəbləri də dəyişib: “İndiki halda şikayətləri araşdırdığımız zaman səbəblərin fərdi olduğunu görürük. Yəni problemin ölkənin fiberoptik magistral xətlərində yox, son istifadəçinin özündə olduğuna şahidlik edirik. Son istifadəçinin problemləri isə müxtəlif ola bilir. Məsələn, son istifadəçiyə xidmət edən subprovayderlər, həmçinin vətəndaşın evindəki avandalıqlar, provayderlərin vətəndaşa xidmət etdikləri avadanlıqlar və onların keyfiyyəti, təbii ki, vətəndaşın evindəki alətlər və cihazlar. Yəni internet probleminin bir çox alt motivləri olsa da, ümumilikdə əvvəlki illərlə müqayisədə müsbətə doğru böyük fərq yaranıb. Vətəndaşlar artıq kütləvi olaraq internetdən şikayət etmirlər. Problemlər daha çox fərdi olur”.

“Hazırda internetin əlçatanlığı və keyfiyyətini tənzimləyən orqan da fəaliyyət göstərir ki, bu da məsələyə müsbət tərəfdən təsir edən amilə çevrilib. İnformasiya və Kommunikasiya Texnologiyaları Agentliyi bu məsələdə tənzimləməni həyata keçirir. Şikayətlərin nəzərə alınması üçün şikayət portalı yaradılıb. Eyni zamanda provayderlərin avadanlıqlarını qeydiyyata almaq üçün portal yaradılıb. Əvvəlki illərdə bu imkanlar yox idi. Bu məqamlar isə özlüyündə internetin keyfiyyətinə təsir edən amillərdir. Ona görə əvvəlki illərlə müqayisədə internet probleminin xeyli dərəcədə həll edildiyini görürük”, - deyə Abbasov vurğulayıb.

Əlavə edib ki, ölkənin böyük şəhərlərinin əksəriyyəti 95 faiz fiberoptik internetlə təmin olunub, bəzi şəhərlərlərdə isə işlər yekunlaşıb: “Rayonların fiberoptik internetlə təminatı paralel aparılır. Bəzi rayonların bir hissəsində ola bilsin işlər tam yekunlaşıb, bəzi hissələrində isə işlər davam etdirilir. Ümumilikdə ölkə üzrə 20 faiz ərazidə hələ bu istiqamətdə işlər davam etdirilir. Bu ilin sonuna ölkənin tamamilə fiberoptik internetlə təminatının yekunlaşacağı gözlənilir”.

Müsahibimizin sözlərinə görə, ölkənin keyfiyyətli internetlə təminatı üçün bu istiqamətdə işlər daimi xarakter daşımalıdır: “İnternet infrastrukturu digər ölkələrdə də daim dəyişir. Mobil internetə gəlincə isə, dünya artıq beşinci nəsil internetə keçib. Bunun da özünün faydaları, tezlikləri var. Azərbaycanda da mobil internet 5G-yə keçir. İnternetlə bağlı daim yeniliklər olacaq. Çünki yeni portallar, saytlar daha güclü internet tələb edir. Bu da bütün istiqamətlərdə nəzərə alınır. Yəni həm avadanlıqlar və cihazlar inkişaf edir, həm də internet infrastrukturu inkişaf edir”.

Müəllif: Banu Çiçək

Məlum olduğu kimi, Bakının Xətai rayonu, Xudu Məmmədov küçəsində yerləşən “Şərur MTK” yaşayış kompleksində lift qırılıb.
Xəsarət alan 8 nəfər şəxsdən (5-i qadın, 3-ü kişi olmaqla) 7 nəfəri Sabunçu Tibb Mərkəzinə, 1 nəfəri Kliniki Tibbi Mərkəzə hospitalizasiya olunub. Anaxeber.info yada salır ki, hadisə ötən həftə olub.
Sakinlərin sözlərinə görə, liftlər nasazdır, tez-tez xarab olur, həyati təhlükə yaranır. Onlar yerli telekanallara şikayətində deyiblər ki, liftlərin yenilənməsi üçün dəfələrlə binaların komendatına bildirilib, amma faydası olmayıb. Bu azmış kimi, hadisəyə görə şirkət rəhbəri İsfəndiyar Axundov liftdən istifadə edənləri günahlandırıb. İddia edib ki, tros qırılmayıb, sadəcə, götürmə yükündən daha çox insan eyni anda liftə mindiyi üçün bu hadisə yaşanıb. Yəni utanmasan oynamağa nə var ki?! Şərurlu İsfəndiyar kimi tanınan iş adamına isə kiminsə inanması qəribə olardı. Onun adı indiyə qədər o qədər qalmaqallı işlərdə hallanıb ki, verdiyi bu açıqlamaya kimsə aldanmaz. İ.Axundovun adı mənzil fırıldağı, keyfiyyətsiz bina, tikintisi və digər məsələlərdə çəkilib. İnternet resurslarında saysız-hesabsız faktlara rast gəlmək mümkündür. O baxımdan liftin qırılmasında sakinləri qınamaq onun özünə yaraşan açıqlamadır. Üstəlik, ağır çəkili şəxslərin liftə mindiyini və bu problemin yaşandığını açıqlayıb. Halbuki telekanallara danışan sakinlər deyirlər ki, hər həftə liftlər xarab olur, bir sakin liftə minəndə, digəri gözləməyə məcbur qalır. Ümumiyyətlə, "Şərur" MTK-da binalarla maraqlanan, sakinlərin taleyinə diqqətlə yanaşan kimsə yoxdur. Ona görə ki İsfəndiyar Axundov artıq bu binaları təhvil verib, heç maraqlanmır, yeni qazanc mənbələri axtarışındadır. Hərçənd, bu hadisəyə görə ona cinayət işi açıla bilər. Hüquqşünasların rəyi budur ki, liftin qırılması nəticəsində insanlar ölə bilərdi, bəxti gətirib ölümdən dönüblər. Amma bu, Şərurlu İsfəndiyarı məsuliyyətdən azad etmir. Hazırda Xətai rayon prokurorluğu araşdırma aparır, lakin ilk gündən cinayət işinin açılmasına zərurət yaranmışdı. Üstəlik, Axundov insanları təhqir edərək deyib ki, onlardan biri 150 kq olub. Sözsüz ki, bu yalandır. Və bunu kimin deməsi də qəribədir. Bütün hallarda işə hüquqi qiymət verilməlidir. Söhbət 8 insanın aqibətindən və xəsarət almasından gedir. Eyni zamanda, şansı gətirib ölməyən bu sakinlərin sayəsində indi bütün binaların liftləri yenilənməlidir, təhlükəsizlik təmin olunmalıdır.
Onu da deyə ki, Şərurlu İsfəndiyar ləqəbli tikinti maqnatı İsfəndiyar Axundovun qaranlıq biznes şəbəkəsi ilə bağlı zaman-zaman məlumatlar yayılıb: inşa etdirdiyi yeni tikililərdə bir mənzili beş adama satmaq; fırıldaq yolu ilə insanların milyonlarla pulunu mənimsəmək və s. Bu şəxsin adının qarşısına bütün qeyri-qanuni əməlləri düzmək mümkündür. Amma nə fayda?! Bütün bunlara rəğmən, İsfəndiyar Axundov eyni fəaliyyəti davam etdirməkdə davam edir. “Şərurlu İsfəndiyar”ın keçmiş MTN şefi Eldar Mahmudovla qaranlıq əlaqələrə malik olduğuna dair xəbərlər də yayılmışdı.

Anaxeber.info

Millət vəkili Sabir Rüstəmxanlı "Azercel"dən gələn sensassion mesajla bağlı sosial şəbəkə hesabında status paylaşıb.

Moderator.az xəbər verir ki, Yardımlı rayonunda olarkən "Azercell" mobil operatorundan deputata gözlənilməz mesaj gəlib.

“Hörmətli Azərsell! Mən İranda deyiləm! Azərbaycanda, Yardımlıdayam! Sən hansı haqla və məsuliyyətsizliklə mənim telefonuma “İrana xoş gəlmisiniz…” mesajı göndərirsən? Sən axı Azərsellsən, İransell deyilsən!”, - deyə S.Rüstəmxanlı qeyd edib.

"Şərur" MTK binasında yaşayan vətəndaş gözlənilməz bir halla qarşılaşıb. Belə ki, vətəndaş 1 otaqlı mənzilini satmaq istəyərkən fərqli halla üz-üzə qalıb. O bildirib ki, həmin evdə yaşayış olmayıb, qeydiyyatda heç kəs yoxdur. Nağd alınıb və heç bir yerə borc yoxdur, sənəd müqavilədir. İndi evini satmaq istəyir. Şirkət alqı-satqı üçün ondan 3000 manat, çıxarış üçün isə 1000 manat istəyir. O deyir ki, evi satıramsa, niyə 3000 manat şirkətə ödəməliyəm?..

Bu cür evlərin alqı-satqısı necə həyata keçirilməlidir?

Teleqraf.com-a danışan hüquqşünas Əli Novruzlu məsələni belə izah edib:

“Əgər mənzil nağd pula alınıbsa, MTK-ya yaxınlaşıb, MTK-nın ümumi yığıncağının iclasının protokolundan çıxarış götürülməli, ASAN xidmət mərkəzlərinə təqdim edilməlidir. Müvafiq dövlət rüsumunu ödədikdən sonra çıxarışın hazır olması haqqında elektron bildiriş gözlənilməlidir. Bildiriş gəldikdə yaxınlaşıb, ASAN xidmətdən çıxarış götürülməlidir. Əgər borc yoxdursa, rüsum ödənilmir. Hər bir MTK-nın borcudur ki, satdığı ev üçün sənəd də versin”.

Əmlak eksperti Elnur Azadov isə ildirir ki, çıxarış varsa, birbaşa alqı-satqı edilə bilər:

"Müqavilədə ad dəyişmə, alqı-satqı ilə bağlı maddə olduğu halda MTK haqlıdır. İstismara qəbul aktı varsa, satan çıxarış ala, notariat qaydasında alqı-satqı edə bilər. Qeyd edilən halda çıxarış alınıb, qanuni qaydada alqı-satqı edilməlidir. Çıxarış varsa, MTK ilə alıq-satqı edilməsinə ehtiyac yoxdur. Çıxarışla notariusda qanuni alqı- satqı ediləcək. Əgər müqavilədirsə, çıxarışa keçirilsin. Daha sonra çıxarışla alqı-satqı edilsin".

Ekspert 3000 manat və 1000 manat rəqəmlərinin necə müəyyənləşdirildiyinə də aydınlıq gətirib:

“Müqavilə dəyişmə ilə bağlı rüsum yoxdur. Yanlız çıxarışın rüsumu var”.

İsti yay günlərində sakinlər dincəlmək, sərinləmək üçün parklara üz tuturlar.
Amma Xırdalan Mərkəzi Parkındakı vəziyyət vətəndaşların heç də ürəyincə deyil. Ot örtüyünün təbii olmaması, ağacların vaxtında sulanmaması, fəvvarələrin işləməməsi və bu kimi digər faktlar onların narazılığına səbəb olur.
Bu azmış kimi park ərazisində ağacların kəsildiyi də deyilir.
“Sintetik qazonlardır. Hələ fəvvarələri də düzəltməyiblər. Ağacların hamısı baxımsızlıqdan quruyub. Parkda yaxşı şərait yoxdur, hər tərəfdə çayxana var”, – Xırdalan sakini narazılığını bildirib.
Daha ətraflı Baku TV-nin süjetində: