Xarici ölkələrə gəmi lövbərlərinin satışı ilə məşğul olan azərbaycanlı şirkət rəhbəri Dövlət Gömrük Komitəsi tərəfindən süründürməçiliyə məruz qaldığını iddia edir.

"Qafqazinfo”ya daxil olan şikayət məktubunda qeyd olunub ki, "Corporation Vvide Profile Of Az Metal” şirkəti 5 ildən çoxdur misdən hazırlanan gəmi lövbərlərinin istehsalı və xaricə ixracı ilə məşğuldur.

Şirkətin rəhbəri Qamət Ağazadə bildirib ki, Komitənin sədr vəzifəsini müvəqqəti icra edən Şahin Bağırov Bakı Baş Gömrük İdarəsinə İsmayıl Hüseynovu rəis əvəzi təyin etdikdən sonra həmin qurumda süründürməçilik halları başlayıb: "Biz illərdir, bu işi görürük. Ona görə də şirkətimiz bütün sənədləri qanunauyğun şəkildə hazırlayıb, lazımi prosedurları keçib, rüsumlarını ödəyib. Ona görə də heç vaxt problem yaşamamışıq. Qısaca izah etsəm, xaricə mal ixracı üçün lazım olan gömrük bəyannaməsi, invoys, maşının sənədləri, kontrakt, məişət sertifikatı, uyğunluq sertifikatı və qalan hər bir xırda detalı peşəkar əməkdaşlarımız hazırlayıb ixracatı həyata keçiriblər. Bir sıra xarici şirkətlərlə kontraktlarımız var. Biz ölkə iqtisadiyyatına, xüsusən də qeyri-neft sektoruna töhvə veririk. Ölkəyə pul gətiririk. Amma general İsmayıl Hüseynov artıq daha bir sahibkarı küsdürüb bazardan çıxarmaq üzrədir. Bunun bir adı var: inhisarçılıq”.

Şikayətçi qeyd edir ki, ötən ilin sonlarında aldıqları sifarişləri xaricə göndərmək üçün bir neçə maşın yükü hazırlayıb sənədləşmə üçün Bakı Baş Gömrük İdarəsinə gətiriblər. Sənədlərdə heç bir problem olmadığı üçün birinci maşın buraxılıb. Lakin sonra idarədən bildiriblər ki, şirkətin uyğunluq sertifikatı qaydasında deyil: "Uyğunluq sertifikatı odur ki, yəni bizim mallarımız ekspertizadan keçib, keyfiyyətlidir. Yəni sənədlərdə göstərdiyimiz metalın növünə uyğundur. Təsəvvür edin, eyni sertifikatla bir maşını buraxırlar, sonrakı maşınları yox. Sertifikat etibarsız idisə, birinci maşını niyə buraxırdılar bəs? Bu sualı orada verəndə, nədənsə cavab verən tapılmır.

Sertifikatda saxtakarlıq varsa, versinlər prokurorluğa, araşdırılsın. Biz sertifkatı İqtisadiyyat Nazirliyi tərəfindən fəaliyyətinə rəsmi icazə verilmiş "Seltux” şirkəti tərəfindən almışıq. Yəni bu şirkətə nazirliyin nəzdində fəaliyyət göstərən Azərbaycan Akkreditasiya Mərkəzi səlahiyyət verib ki, bu sahədə uyğunluq yoxlaması apara bilərsən. Biz də bu sertifikatı almaq üçün pul ödəmişik. Nəzərə alın ki, hər gün bir maşın üçün gömrüyün həyətində dayanmağa 100 dollar haqq alınır. İki maşınımız 20 gündür ki, oradadır. Təsəvvür edin ki, DGK bir sahibkarı nə qədər ziyana salır”.

Sahibkarın sözlərinə görə, etirazlardan sonra Bakı Baş Gömrük İdarəsindən bir şəxs bildirib ki, sertifikatı Azərbaycan Standartlaşdırma İnstitutundan (Azstand) almalıdırlar. Lakin 2 dəfə "Azstand”a müraciət etmələrinə baxmayaraq, buradan sertifikat verilməyib: "Təbii ki, burada İsmayıl Hüseynovun öz şəxsi marağı var. Qeyri-rəsmi göstəriş verib ki, bizim kimi mis katod ixracatı ilə məşğul olan şirkətlərə sertifikat verilməsin. Bununla da o qeyd etdiyim metal sahəsi üzrə monopoliya yaradır. İstəyir ki, bu sahəni öz biznesinə çevirsin. Bu metalı ondan başqası yığıb istehsal etməsin. Biz kiçik sahibkarlarıq. Malın tonunda 50 dollar qazanırıq, deyirik Allah bərəkət versin. Biz İsmayıl Hüseynov kimi milyonlar qazanmaq arzusunda deyilik.

Ay qardaş, lap mənim malım keyfiyyətsizdir. Bunun gömrüyə nə aidiyyəti var? Alan razı, satan razı. Yəni bunu mən bilərəm, alıcı bilər. Alıcı dəfələrlə bu maldan alıb. Gömrük Komitəsi niyə mənim satışıma maneə törətməkdə maraqlıdır?”

Məsələ ilə bağlı "Sertus” MMC-nin direktoru Emil Eynullayev bildirib ki, "Sertus” MMC Azərbaycan Akreditasiya Mərkəzinin sertifikasiyasından keçib: "Dövlət qurumu bizə rəsmi səlahiyyət verib. Biz hər 3 ildən bir bunun üçün müraciət edirik. İstehsalat prosesinə baxıb məhsula uyğunluq sertifikatı veririk. Verdiyimiz sertifikatlar bütün dövlət qurumlarında tanınır. Əgər mən dövlət akreditasiyasından keçmişəmsə, deməli, mənim verdiyim sertifikat ölkə üzrə rəsmi tanınır. Ona görə Dövlət Gömrük Komitəsinin bu barədəki göstərişləri qanunsuzdur”.

Qeyd edək ki, İsmayıl Hüseynov 2001-ci ildən gömrük orqanlarında çalışır. Gömrük general-leytenantıdır. 2018-ci ildə Komitə sədrinin birinci müavini vəzifəsinə təyin edilib. Daha çox əvvəlki sədr Səfər Mehdiyevin kadrı kimi tanınıb. Şahin Bağırov DGK-ə sədr əvəzi təyin olunandan sonra İsmayıl Hüseynovu Bakı Baş Gömrük İdarəsinə müvəqqəti sədr göndərib.

Fərhad Abdullayevin sədrliyi ilə Azərbaycan Respublikası Konstitusiya Məhkəməsi Plenumunun növbəti iclası keçirilib.

Konstitusiya Məhkəməsinin mətbuat xidmətindən bildirilib ki, iclasda Bakı Apellyasiya Məhkəməsinin müraciəti əsasında Azərbaycan Respublikası Cinayət Məcəlləsinin 72-ci maddəsinin “Qeyd” hissəsinin 1-ci bəndinin “cinayət məsuliyyətindən yalnız bir dəfə azad edilmə” ilə bağlı müddəasının şərh edilməsinə dair konstitusiya işinə baxılıb.

Konstitusiya Məhkəməsinin Plenumu iş üzrə hakim İ.Nəcəfovun məruzəsini, maraqlı subyektlərin nümayəndələri Bakı Apellyasiya Məhkəməsinin hakimi C.Hüseynin və Azərbaycan Respublikası Milli Məclisi Aparatının Dövlət quruculuğu, inzibati və hərbi qanunvericilik şöbəsinin müdiri H.M.Seyidin, mütəxəssislər Azərbaycan Respublikası Ali Məhkəməsinin Cinayət Kollegiyasının sədri H.Nəsibovun, Azərbaycan Respublikası Vəkillər Kollegiyasının üzvləri M.Mustafayev və V.Babayevin mülahizələrini, ekspert Bakı Dövlət Universitetinin Hüquq fakültəsinin Cinayət hüququ və kriminologiya kafedrasının dosenti, hüquq üzrə fəlsəfə doktoru S.Rzayevanın rəyini və işin materiallarını araşdırıb müzakirə edərək qərar qəbul edib.

Qərarda deyilir ki, Azərbaycan Respublikası Cinayət Məcəlləsinin 72-ci maddəsinin “Qeyd” hissəsinin 1-ci bəndinə əsasən, şəxs həmin Məcəllənin 72–73-2 və 74-1-ci maddələri üzrə ümumilikdə yalnız bir dəfə cinayət məsuliyyətindən azad edilə bilər.

Azərbaycan Respublikası Cinayət Məcəlləsinin 72-ci maddəsinin “Qeyd” hissəsinin 1-ci bəndinə uyğun olaraq cinayət məsuliyyətindən bir dəfə azad edilmiş şəxs tərəfindən yenidən cinayət törədildiyi təqdirdə, onun cinayət məsuliyyətindən azad edilmə üçün zəruri olan hərəkətləri icra etməsi Məcəllənin 59-cu maddəsinə müvafiq olaraq cəzanı yüngülləşdirən hallar kimi nəzərə alına bilər.

Azərbaycan Respublikası Cinayət Məcəlləsinin 72-ci maddəsinin “Qeyd” hissəsinin 1-ci bəndi həmin Məcəllənin 72–73-2 və 74-1-ci maddələri ilə cinayət məsuliyyətindən azad edilmiş şəxsin məsuliyyətdən azad edilənədək törətmiş olduğu digər cinayət əməlinə görə cinayət məsuliyyətindən azad olunmasının mümkünlüyünü istisna etmir.

Qərar dərc edildiyi gündən qüvvəyə minir, qətidir, heç bir orqan və ya şəxs tərəfindən ləğv oluna, dəyişdirilə, yaxud rəsmi təfsir edilə bilməz.

İzləyənlər bilir ki, keçən il təkbaşına “Tik-Tok”dakı jeton mafiyası ilə mübarizə apardım və oranı əxlaqsızxanaya çevirən, mənə : “bura əyləncə platformasıdır, sizin burada nə işiniz var?” , - deyən məmur və oliqarx uşaqlarına qalib gəldim. Həmin sırada ölkənin ən varlı ailələrinin uşaqları vardı.
Başlarında da “MG” niki ilə ora girən, bir vaxtlar Prezidentin köməkçisi Əli Həsənovun köməkçisi işləmiş , Sədərək bazarının sahibi Yusif Qədimbəylinin oğlu Mehman Qədimbəyli də vardı. Onların hamısı bir müddət “Tik-Tok”u atıb , qaçdılar.
İndi Azər Zahid adlı bir odioz aparıcının layihəsində yenə görünməyə başlayıblar. Azər Zahid milli mənəvi dəyərlərimiz deqeradasiyaya uğradan, söyüşün biri bir qəpik olan, ərsəyə gətirdiyi “tokşounun” iştirakçıları qaldıqları otel otaqlarında bir-birinin lüt videosunu çəkib paylaşan bir tamaşaya 80 min adamı baxmağa məcbur edir.
Bəli, məhz məcbur edir. Çünki mən də çıxıb efir qarşısında istədiyimi danışsam, nalayiq hərəkətlər etsəm , izləyici sayım maksimuma çatacaq.
Heç bir lisenziya almadan ölkədə böyük qazanc gətirən qumar oyunu təşkil etməklə, vergi ödəmədən hər gün aşağısı 10 min dollara yaxın pul qazanır. Onun bu tələsinə düşən sadə vətəndaşlar olub - qalan pullarını verib jeton alıb, Azər Zahidin şousuna atır.
Mən bir az əvvəl həmin verilişi canlı yayımda sərt tənqid edirdim. Canlımda 500-dən çox adam vardı. Azər Zahid və onun ortaqları bahalı pullu şikayət paketləri ilə canlı yayımdan şikayət edərək, canlı transliyasiya etmək imkanlarımı məhdudlaşdırdılar. Görün, ölkənin informasita təhlükəsizliyi kimin əlində aciz qalıb?
Mehman Qədimbəyli ilə Azər Zahid tandemi mənə “Tik-Tok” üzərindən yayım aparmağa imkan vermir. Ölkənin əlaqədar qurumları hara baxır? Niyə başdan-ayağa fırıldağ olan, mənəvi dəyərlərimizə həqarət yaradan “Təkər” adlı tok-şounu bağlayıb, araşdırma aparmırlar?
Bunu bir az da boş buraxsanız, daha ciddi fəsadların şahidi olacaqsınız. Həmin şouda iştirak edib , çıxan bir çox tanınmış simalar Azər Zahidin verilişdə əsl dələduzluqla məşğul olduğuna dair iddialar səsləndiriblər. Həmin videolar internetdə çox yayılıb. Elə onları dəvət edib, cinayətin izinə düşmək olar.
Məhəmmədəli Qəribli
Teref.az

Azərbaycan Respublikası qanunvericiliyən əsasən dövlət məmurlarının biznes fəaliyyəti ilə məşğul olması qadağandır. Lakin bir sıra məmurlar var ki, kreslolarını itirdikdən sonra onların, yaxud ailələrinin ölkə daxilində və xaricində mülkləri, biznesləri ortaya çıxıb.

TEREF.AZ bildirir ki, Bizim.Media müxtəlif vaxtlarda xarici ölkələrdə biznesləri ortaya çıxmış yüksək ranqlı məmurları araşdırıb:

Əli Həsənov

PA-nın sabiq şöbə müdiri Əli Həsənovun ailə üzvlərinin xarici ölkələrdə bizneslə məşğul olduqları ilə bağlı kifayət qədər faktlar var. Keçmiş məmurun oğlu Şamxal Həsənli Dubayda və ABŞ-da mülklərə sahibdir və daşınmaz əmlak biznesi ilə məşğuldur. Qızı Səfiyə Həsənli isə Dubayda qiymətli daş-qaş və saat biznesi ilə tanınır.

Fazil Məmmədov

Mərhum vergilər naziri Fazil Məmmədovun da xaricdə bizneslərinin olduğu deyilir. Mətbuatda yayılan məlumatlara görə, keçmiş nazirin xaricdəki biznesini kürəkəni Əbdül Əliyev idarə edir və bununla bağlı bir sıra faktlar da gün üzünə çıxıb. Ə.Əliyevin təkcə İngiltərədə qeydiyyatdan keçmiş 12 şirkətinin olduğu bildirilir.

Əli Nağıyev

Keçmiş əmək və əhalinin sosial müdafiəsi naziri Əli Nağıyevin də xaricdə bizneslərinin olduğu və onların oğlu Araz Nağızadə tərəfindən idarə edildiyi bildirilir. Araz Nağızadənin Rusiyada qeydiyyatdan keçmiş “Naxçıvan İnvest” və “Eqon” şirkətlərinin həmtəsisçisi olduğu bildirilir.

Əbülfəs Qarayev

Sabiq mədəniyyət və turizm naziri Əbülfəs Qarayevin də ailəsinin adınıa bizneslərinin olduğu ilə bağlı mətbuatda xəbərlər yayılıb. Belə ki, sabiq nazirin həyat yoldaşı Lalə Kazımovanın Xorvatiyada, qızı Suad Qarayevanın isə Rusiyada mülklərinin olduğu bildirilir.

Hüseynqulu Bağırov

Sabiq ekologiya və təbii sərvətlər naziri Hüseynqulu Bağırovun da ailə üzvlərinin xaricdə mülklərinin olduğu bildirilir. Onun ailə üzvlərinin təsisçisi olduğu, Avropa ölkələrində fəaliyyət göstərən çoxsaylı şirkətlərin olması ilə bağlı KİV-də məlumatlar mövcuddur.

Eldar Mahmudov

Ləğv olunmuş Milli Təhlükəsizlik Nazirliyinin sonuncu naziri Eldar Mahmudovun oğlu Anar və qızı Nərgizin bizneslərə sahib olması İngiltərədə qaldırılmış məhkəmə işindən sonra ifşa olunub.

Mahmudovun övladları 2020-ci ilin mayında “Prensa Lberica” media qrupuna daxil olan nəşrlərdə dərc edilmiş məqalədən keçmiş MTN rəhbərinin və onun ailəsinin Böyük Britaniya, İspaniya, Lüksemburqdakı çoxsaylı daşınmaz əmlakından, biznes aktivlərinin olduğu bildirilib.

Bu səbəbdən Mahmudovun övladları mətbu orqanı məhkəməyə verib, lakin dəlil yetərsizliyi səbəbindən onların iddiası rədd edilib.

Ziya Məmmədov

Sabiq nəqliyyat, rabitə və yüksək texnologiyalar naziri Ziya Məmmədovun da oğlu Anar Məmmədovun xaricdə çoxsaylı mülklərinin və bizneslərinin olduğu bildirilir. Lakin sabiq nazir mətbuata verdiyi açıqlamada sözügedən iddiaları təkzib edib.

“Türkiyəli biznesmen Emin Uçar Azərbaycanın Naxçıvan Muxtar Respublikasında (MR) böyük sərvət qazanıb. Yeni sənədlər və müsahibələr onun Naxçıvanı 27 il idarə etmiş Vasif Talıbovun ailəsinə bağlılığını, onun əlaltısı olduğunu üzə çıxarıb”.

“Azadlıq” radiosuna xəbər verir ki, bu barədə Beynəlxalq Korrupsiya və Mütəşəkkil Cinayətkarlığın Araşdırılması üzrə Jurnalistika Layihəsi (OCCRP) yaydığı araşdırmada bildirilir.

Araşdırmaya görə, Uçar son illər Gürcüstanda 270 milyon dollarlıq biznes və mülkiyyət imperiyası qurub. Onun şirkətinin Fransanın “Accor” şirkətilə birgə idarə etdiyi üç otel də bu sıradadır.

OCCRP Uçarın Vasif Talıbov və ailəsini təmsil etdiyini, onun şirkətlərinin Talıbov ailəsinə bağlı böyük holdinqlərlə açıq əlaqələri olduğunu qeyd edir. Uçarın vəkilləri onun sərvətini istiqrazlardan qazandığını desələr də, biznesmenin idarə etdiyi şirkətlər Azərbaycanda dövlət kontraktları əldə edib.

Araşdırmada deyilir ki, Gürcüstan paytaxtı Tiflisidə opera binası yaxınlığındakı “Dinehall” restoranı, Fransanın “Accor” şirkəti ilə birlikdə tikilən beşulduzlu otel Uçarın biznes imperiyasına daxildir. “Accor”dan OCCRP-yə bildirilib ki, Uçarın Talıbovlarla iddia olunan münasibətləri fonunda onunla əlaqələrə yenidən baxılır.

OCCRP hələ 2022-ci ilin fevralında Uçarın Talıbov ailəsinə bağlarını aşkarlayıb. Jurnalistlər Talıbovun illik 26 min dollar məvacib almasına baxmayaraq, vəzifədə olduğu dövrdə sərvət yığdığını üzə çıxarıblar.

Araşdırmaçı jurnalistlər Talıbovun holdinqlərinin çoxunun Uçarın şirkətləri tərəfindən maskalandığını ortaya qoyublar. Azərbaycanda “Gəmiqaya”, Gürcüstanda “Maqro Group” kimi şirkətlərin daxil olduğu şəbəkə 2000-ci illərin əvvəllərindən Azərbaycanda onlarla dövlət kontraktı əldə edib.

Hazırda “Gəmiqaya”nın sahibliyi məsələsi qaranlıq qalır. Talıbov istefa verəndən bir həftə sonra “Gəmiqaya”nın adı dəyişdirilərək “Arkoz” olub. Bu isə Uçara bağlı başqa bir şirkətin adıdır.

İnsan haqları təşkilatları Talıbovların “Gəmiqaya”nı idarə etdiyini desələr də, bu informasiya açıq olmadığından onu təsdiqlətmək çətindir. Ancaq şirkətin keçmiş işçisi OCCRP-yə deyib ki, Uçar göstərişləri Talıbovlardan alırdı.

Uçarın Gürcüstanda Talıbovun oğlu Rzanın adından əmlak alması, onların şirkətlərə birgə sahibliyinə dair sənədlər aşkarlanıb.

Rza suallara cavab verməyib. Ancaq Uçarın şirkəti “Maqro”nun və Talıbovu kiçik oğlu Seymurun vəkilləri Uçarla bu ailənin biznes əlaqələri haqda ziddiyyətli açıqlamalar səsləndiriblər.

Seymurun vəkili deyib ki, Rza Talıbov və Uçar “Naxçıvanda “Gəmiqaya” adını daşıyan müxtəlif şirkətlərin həmtəsisçiləridir”.

“Maqro” və Uçarın vəkili isə bildirib ki, onlar iddianı birmənalı təkzib edirlər. Uçarın vəkili onun nə keçmişdə, nə də indi özündən başqa kimsənin biznesi üçün saxta təmsilçilik etdiyini, həmişə qanuni davrandığını bildirib. O, biznesmenin investisiyasının banklardan gələn faizlərdən qaynaqlandığını vurğulayıb.

Ancaq OCCRP Rza Talıbovun Uçara 2012-ci ilin fevralında bir ay müddətinə verdiyi etibarnamənin fotosunu yayıb. Talıbov biznesmenə Gürcüstanın Batumi şəhərində onun adına mülk almağı etibar edib. Həmin ilin iyunundan isə Rza Uçara bu dəfə iki ay müddətinə etibarnamə verir. Bu dəfə tarixi binaya bitişik 1.2 milyon dollarlıq mülk alınır, Uçar təmsilçi kimi satış sənədlərini imzalayır.

“Maqro”dan OCCRP-yə deyilib ki, o zaman Rza Talıbovla Uçar biznes ortağı idilər və belə məsələlərdə bir ortağın digərindən kömək istəməsi tamamilə təbiidir.

İki il sonra, 2014-cü ildə Rzanın aldığı binalarda “Divan Suites Batumi” beşulduzlu oteli açılıb. O zaman Rza Talıbov “Gəmiqaya Holdinq”in sədri kimi mərasimdə qırmızı lenti kəsir.Talibov istefa verdiyi ərəfədə isə Rza “Divan Suites” otelini 18 milyon dollara satışa çıxarıb.

“Transparency International” təşkilatının antikorrupsiya eksperti Sandro Kevxişvili deyir ki, Azərbaycanda potensial korrupsiya ilə yığılan pulun investisiyası Gürcüstan üçün korrupsiya riski yaradır.

“Sərvətini korrupsiya ilə yığan şəxs bu pulu sərmayə qoyduğu ölkədə də eyni metodlara əl atacaq – özəlliklə də güclü antikorrupsiya mexanizmləri, bu riskləri azaldacaq qərarvermə sistemi olmayan bir ölkədə”, – ekspert vurğulayıb.

Bir il öncə OCCRP-nin açıqladığı hesabatda deyilirdi ki, Rza və Seymur Talıbov qardaşları “Credit Suisse”, “Barclays” və digər xarici banklarda müxtəlif hesablar açaraq, atalarının avtoritar hakimiyyəti altında Naxçıvan əhalisi əziyyət çəkdiyi bir dönəmdə şübhəli pul köçürmələri vasitəsilə 20 milyon dollardan çox pul qazanıblar.

Azərbaycan Texniki Universitetinin (AzTU) nəzdində fəaliyyət göstərən Bakı Texniki Kollecində tələbələrlə müəllim arasında dava olub.

TEREF.AZ-ın Qaynarinfo-ya istinadən məlumatına görə, hadisə kollecin bufetində baş verib. Belə ki, tələbə Sərrafi Ələkbərzadə yeməkxanada növbətçi olan zaman nizam-intizama nəzarət edərək, tələbələrin bəzi qaydalara riayət etməsini tələb edib. Bu zaman həmin kollecin ingilis dili M.Nərmin adlı müəlliməsi Sərrafi Ələkbərzadədən ucadan danışmamasını tələb edib və aralarında mübahisə yaranıb.

Hadisədən bir neçə gün sonra isə M.Nərmin və həyat yoldaşı kollecin rəhbərliyinin yanına gələrək, yenidən tələbə və kollec kollektivinin yanında rəhbərliyə qarşı nalayiq ifadələr işlədib, hədə-qorxu gəliblər. Hətta kollec rəhbərliyinə təzyiqlər göstərildiyi üçün müəllim və həyat yoldaşı barəsində polisə şikayət olunub.

Nəhayət hadisəyə Elm və Təhsil Nazirliyi də müdaxilə edib. Nazirliyin əmri ilə Bakı Texniki Kollecinin ingilis dili müəlliminin əmək müqaviləsinə Əmək məcəlləsinin 70-ci maddəsinin "ç” bəndinə uyğun olaraq xitam verilib.

Şikayətə Nərimanov Rayon Məhkəməsinin hakimi hakimi Aytən Novruzovanın sədrliyi ilə baxılıb. Sərrafi Ələkbərzadə zərçəkmiş kimi ifadə verərək deyib ki, müəllim ictimaiyyət arasında onu küçə söyüşləri ilə təhqir edib, özünün, ata və anasının şərəf və ləyaqətini alçaldıb. Bakı Texniki Kollecinin "nəqliyyat vasitələrinin texniki istismarı” fakültəsinin 60 A qrupunun digər tələbələri də müəllimin söyüşlərinə etiraz ediblər.

M.Nərmin cavabdeh qismində məhkəmədə ifadə verərək Sərrafi Ələkbərzadəyə bir müəllim kimi irad tutduğunu, qışqırıb səs-küy salmamasını bildirib. Bildirib ki, bundan 5-10 dəqiqə sonra Sərrafi Ələkbərzadə 5-6 tələbə yoldaşı ilə kobud şəkildə dərs dediyi auditoriyaya daxil olub, onu kolidora çıxardaraq, barəsində "sən müəllim deyilsən, savadsızın birisən” , "sənin diplomun saxtadır”, "dərs demək hüququn yoxdur”, "sən müəllim yox, mal otaransan” və s. təhqiramiz və böhtan xarakterli ifadələr işlədib. Amma həmin tələbələr iddiaçı qismində onun barəsində məhkəməyə şikayət ediblər.

Sərrafi Ələkbərzadə müəllimin hərəkətləri nəticəsində ona 10 min manat məbləğində maddi və mənəvi ziyan dəydiyini, bunun qarşı tərəfdən ödənilməsini məhkəmədən xahiş edib.

Məhkəmə qərar verib ki, iddiaçı tələbələrin "şərəf və ləyaqətin müdafiəsi, dəymiş maddi və mənəvi zərərin əvəzinin ödənilməsi” tələbinə dair ilk iddia tələbi təmin edilməsin. Sərrafi Ələkbərzadənin müəllimə qarşı "şərəf və ləyaqətin, işgüzar nüfuzun müdafiəsi və dəymiş mənəvi zərərin əvəzinin ödənilməsi” tələbinə dair qarşılıqlı iddia ərizəsi də təmin olunmayıb.

Qeyd edək ki, Azərbaycan Texniki Universitetinin (AzTU) nəzdində Bakı Texniki Kollecinin direktoru, professor Akif Cahangirovdur.

Paytaxtın Babək prospekti 31H, Rich Plaza ünvanda yerləşən “NANT» MMC-nin baş direktoru Nazim Qasımovdur. Şirniyyat məhsullarının distribyutor şirkəti kimi tanınan “NANT” məşhur «KONTI», «Chipita», «7Days», «Chipicao», «Fineti», «Rot-Front», «Krasnıy Oktyabr», «Babayevskiy», “Sladkoe sozvuçiye” və “Zolotaya liliya” və başqa populyar brendlər olan qənnadı məhsullarının ölkədaxili satışı ilə məşğuldur. “NANT” MMC əsasən Rusiya istehsalı olan “Vizit” , “Alenka” , “Mişka kosalapıy” , “Krasnaya şapoçka” , “Osenniy vals” və “Mişka kosalapıy medovıy qrilyaj” və digər konfetləri Dağıstandan alıb Azərbaycana gətirir və ölkəmizdəki “Araz”, “Rahat” supermarketlər, “Bazarstore” və digər mağazalar şəbəkəsində satdırır.

Amma son dövrlər Rusiya – Ukrayna müharibəsi ilə əlaqədar Rusiyanın qənnadı fabriklərinin şirniyyat məhsulları bahalaşmışdır. Rusiyanın «Permskaya» qənnadı fabrikinin baş direktoru Boris Şvaytserin sözlərinə görə baş verən ümumi iqtisadi vəziyyət səbəbindən qiymətlər ən azı 15% artmışdır: «Bu, ilk növbədə, valyuta məzənnəsinin artması ilə əlaqədardır. İstifadə etdiyimiz və xaricdə istehsal olunan xammalın dəyəri rubla deyil, avroya bağlanır. Həmçinin, 40% bahalaşan qəndə də xərclərimiz artıb. Bundan əlavə, banklar kreditlər üzrə faiz dərəcələrini əhəmiyyətli dərəcədə artırıblar», — Şvaytser qeyd edib.

Təbii ki, bu vəziyyət Rusiya qənnadı məhsullarının ixrac edildiyi Azərbaycandan olan distübutorlarının, o cümlədən “NANT” şirkətinin də fəaliyyətinə mənfi təsir edib. Bununla belə şirkət öz internet resurslarında bir çox Rusiya məhsullarına faiz endirimləri tətbiq etdiyini paylaşır. Belə olan halda haqlı sual meydana çıxır: Bahalaşan məhsulları alıb ucuz satmaq şirkətə necə sərf edir?

İlk növbədə ağıla gələn fikir budur ki, “NANT” şirkətinin köhnə, vaxtı keçmiş qənnadı məhsullarını satdığı barədə yayılan informasiyalar doğrudur. Bundan başqa, bildirilir ki, şirniyyat məhsullarının daşınması və əsas müştəriyə çatdırılması zamanı bir sıra qaydalara əməl olunmur. Yükləmə üçün təhciz edilmiş avtomobilin soyutma və havalandırma sistemləri normal deyil, standartlara uyğun işləmir. Yük bölməsinin daxili sahəsi kənar qoxulardan təmizlənmir, sanitar-gigiyenik qaydalara riayət edilmir. Çatdırılmanın bütün mərhələsində müəyyən edilmiş temperatur və rütubət səviyyəsi saxlanılmır.

Hələ bir neçə il əvvəl Rusiyanın Sibir regionundakı “Sladunitsa” şirniyyat şirkətinin “Qarabağ” adı daşıyan konfetlər istehsal etdiyi barədə xəbər yayıldı. “Sladunitsa” ASC-nin baş direktoru Yuliya Şestakova, marketinq xidmətinin rəhbəri Anastasiya Perminova xəbəri təsdiqləmişdilər. Perminova şirkətin sahiblərinin Qazaxıstan vətəndaşı olan etnik ruslardan ibarət olduğunu və “Sladunitsa” şirkətinin rəhbərliyində erməni, yaxud azərbaycanlı şəxslərin çalışmadığını demişdi. Ancaq çox təəssüflər olsun ki, Nazim Qasımovun Rusiyadan Azərbaycana “Qarabağ” konfetləri gətirməyə vətənpərvərliyi çatmadı. Səbəb bəllidir: Sibir Dağıstandan çox uzaqdır!

Deryaz.az

Əslən Kürdəmirdən olan Dəyanət adlı şəxsin və onun Qəbələli şərikinin rəhbərlik etdikləri “Uzun Ömür İvanovka” MMC-nin süd məhsulları təbii deyil və onların İsmayıllı rayonunun məşhur İvanovka kəndi və kolxozu ilə heç bir əlaqəsi yoxdur. Burada istehsal olunan məhsulların heç biri təbii deyil, quru süddən hazırlanır. Yağlar da kərə deyil, “Azərsun” holdiunqinin istehsal etdiyi bitki mənşəlidir. Məhsulun markalanmasında “İvanovka” coğrafi adından istifadə etməklə istehlakçıların aldadılması və hüquqlarının pozulmasından başqa, məlumat yayılıb ki, MMC-nin satışa çıxarılan bəzi məhsullarının üzərindəki istehsal vaxtı məhsulun istehsal edildiyi günə uyğun olaraq yox, satışa çıxarıldığı günə uyğun olaraq yazılır. Bununla da saxta məhsulu alan alıcı çox ciddi problemlərlə qarşılaşır. Bir sözlə sağlamlığını təhlükə altına atır.

Redaksiyamıza daxil olan məlumata görə, MMC-yə məxsus Zabrat qəsəbəsində Maqsud adlı şəxsin işlətdiyi süd məhsulları istehsalı sexində qida təhlükəsizliyi sahəsində texniki normativ hüquqi aktların tələbləri pozulur, sanitar-gigiyena normalarına tam əməl olunmur, mənşəyi məlum olmayan xammallardan istifadə edilir, emal prosesinə qəbul edilən xammal və yarımfabrikatların təhlükəsizlik və keyfiyyət göstəriciləri yoxlanılmır.

Həmçinin bildirilir ki, müəssisədə məhsulun saxlanma müddətinin artırılması məqsədilə insanın həyat və sağlamlığına təhlükə yarada konservantlardan gözəyarı şəkildə istifadə olunur, sexdə temperatur və rütubət rejiminin tənzimlənməsinə nəzarət düzgün həyata keçirilmir, soyuducu kameralarda mal qonşuluğu qaydalarına əməl olunmadan saxlanılır.

Bu yerdə Azərbaycan İstehlakçılar Birliyinin sədri Eyyub Hüseynovun sualı yada düşür: “Ovuc boyda” İvanovka bütün Azərbaycanı süd məhsulları ilə təmin edir?”

Deryaz.az

Naxçıvanda törədilən daha bir sensasion cinayətin izi ilə…
Naxçıvanda Talıbov rejimi süqut edəndən sonra, heç bir məhkəmə qərarı olmadan və bir manat da olsun kompensasiya ödənilmədən mülkiyyətləri yağmalanan vətəndaşlardan çoxlu sayda şikayət məktubları alırıq.
Azinforum.az saytı olaraq, bacardığımız qədər onların ictimailəşməsinə nail oluruq. Bu məzmunda olan şikayətlərin sırasında xüsusilə diqqət çəkənləri Bakıdan Naxçıvan əsilli iş adamlarının oğurlanaraq MR-ə aparılıb, orada işgəncəyə məruz qalmalarına dair faktları göstərə bilərik. “Flaminqo” olayı, Faiq Rzayev adlı sabiq gömrükçünün başına gətirilən hadisələrlə bağlı ictimailəşdirdiyimiz materialları bu qəbildən saya bilərik.
Azinforum.az-a eyni ssenari üzrə təqiblərə məruz qalaraq, mülkiyyətləri əlindən alınan İsgəndər Cabbarov adlı daha bir sahibkar müraciət edib. O, Şərurda hamının yaxşı tanıdığı “Qaqaş” ləqəbli idmançı Rasim Cabbarovun, kinqboks üzrə dəfələrlə dünya çempionu olmuş Güloğlan Cabbarovun böyük qardaşlarıdır.
İsgəndər Cabbarov bildirir ki, 2007-ci ilin fevral ayında o, Naxçıvan Daxili İşlər Nazirliyində məsul vəzifədə işləmiş ( sonradan Şərur rayonunda polis rəisi olan- red) Mamed Hüseynov adlı şəxs tərəfindən güya barəsində olan hansısa şikayətlə bağlı MR-ə dəvət edilib. Aeroportdan enən kimi onun qoluna qandal vuraraq, Böyükdüzdəki müvəqqəti saxlanma təcridxanasına aparıblar.
Ona və şəriklərinə bir neçə gün olmazın işgəncələrini veriblər. Hətta onları 20 dərəcə şaxtada lüt şəkildə huşlarını itirənə kimi açıq havada saxlayırmışlar. İşgəncə prosesinə adı bütün bənzər proseslərdə hallanan Qasım adlı yüksək rütbəli polis, müvəqqəti saxlanma yerinə rəhbərlik edən İlham, onun bir neçə əməkdaşı və Mamed Hüseynov iştirak ediblər.
Bu cür işgəncəyə tap gətirə bilməyən İsgəndər Cabbarov və onun Hacı Qasım adlı şəriki sonda onlardan tələb olunan 700 min dollar pulu Mamed Hüseynova ödəyərək canlarını qurtarmaq qərarına gəlirlər. Zərəçəkən deyir ki, tələb olunan puldan cəmi 5 min dollar çatmadığı səbəbindən onların azad edilməsini pul tam düzələnə kimi bir neçə saat ləngidiblər.
Həmin pulun düzəldilməsi prosesində də, “Flaminqo” olayına bənzər ssenari olub. Sahibkarlara məcbur ediblər ki, Bakının Bakıxanov qəsəbəsində olan dəyəri 1 milyon 200 min dollarlıq mağazanı cəmi 300 minə onların öz adamlarına satsınlar. Hazırda həmin yerdə “Apelsin” adlı market fəaliyyət göstərir.
Sahibkarıara tutulan divan bununla da bitməyib. Onların mülkiyyətinə aid olan məşhur “Qaqaşxana” restoranı, onun ətrafındakı yanacaqdoldurma məntəqəsi yerlə - yeksan edilir, içindəki avadanlıqlar və onminlərlə ton yanacaq götürülür. İş adamlarına məxsus Zeyvə-Düdəngə kəndindəki böyük ferma da onları əllərindən alınaraq, Naxçıvandakı hakim ailəyə yaxın adamların nəzarətinə verilir.
Bütün bu cinayət əməllərinin araşdırılması istəyi ilə bağlı zərərçəkmiş iş adamları bütün əlaqədar qurumlara şikayət ediblər. Onlar dəymiş ziyanın ödənilməsini və bu cinayəti törədinlərin qanunamüvafiq qaydada cəzalanmasını tələb edirlər.
Məhəmmədəli QƏRİBLİ,
Azinforum.az