Medianın İnkişafı Agentliyi (MİA) media haqqında qanunun 74-cü maddəsinə əsasən KİV və jurnalistlərin reyestrində qeydiyyata alınmaq üçün bu quruma elektron qaydada müraciət edən fotoreportyor Əziz Kərimovun qeydiyyatından imtina edib.

MİA-da qeydiyyatdan imtinanı onunla əsaslandırıblar ki, Kərimovun KİV redaksiyasında ştatlı jurnalist kimi minimum üçillik iş stajı yoxdur, həm də fotoqraf jurnalist sayılmır. Kərimov uzun illərdirdir fotojurnalistika ilə məşğuldur və fərdi sahibkar kimi Turan agentliyinin redaksiyası ilə müqaviləsi var, agentlikdə yerləşir, öz foto- məhsullarını onun işinə maraq göstərən hər kəsə satır. Kərimovun fotolarını dünya nəşrləri dərc edirlər.

Media haqqında qanunun 74.2.10-cu maddəsində həqiqətən göstərilir ki, jurnalist –frilanser (sərbəst işçi) üçillik iş stajı olduğu təqdirdə media reyestrində qeydiyyata alına bilər. Ancaq qanunda bu stajın redaksiyada işləyərkən hesablanmalı olduğu göstərilmir. Turan İnformasiya Agentliyinin direktoru Mehman Əliyev DOST-da (Əmək və Əhalinin Sosial Müdafiəsi Nazirliyi yanında Dayanıqlı və Operativ Sosial Təminat Agentliyi) maraqlanıb: fərdi əmək fəaliyyətilə məşğul olan şəxslər üçün çalışdığı illərə görə staj hesablanırmı? DOST-da cavab veriblər ki, 2006-cı ildən başlayaraq, əgər həmin şəxs Fonda sığorta haqları ödəyibsə, ona ödəniş etdiyi illərə görə staj hesablanır.

Beləliklə, ilk suala aydınlıq gətirildi. MİA əsassız, qanuna zidd olaraq, səlahiyyətlərindən sui-istifadə edərək məcburi üçillik staj haqqında 74.2.10-cu maddədən istifadə edib Kərimovun qeydiyyatından imtina edib.

Keçək imtina ilə bağlı ikinci bəhanəyə - fotoqraf. MİA-də hesab edirlər ki, fotoqraf, video- operator jurnalist deyil, yəni yaradıcı əməkdaşlardır. Onları redaksiyaların texniki əməkdaşları hesab edirlər. Başqa KİV-lərdə də bu peşə sahiblərinin qeydiyyata alınmaması barədə məlumatlar var.

Jurnalistika fakültəsində mənim kursum foto işinin öyrənilməsini nəzərdə tuturdu. Bu fənn üzrə imtahan verdim. Və foto istehsalı jurnalistikanın ayrılmaz hissəsidir.

Vikipediyanın bu barədə geniş, o cümlədən jurnalist olmayan auditoriya üçün nə dediyinə baxaq:

Fotojurnalistika jurnalistikanın fotoqrafiyadan əsas ifadə vasitəsi kimi istifadə edən xüsusi formasıdır. Fotojurnalistika fotoqrafiyanın əlaqəli janrlarından (sənədli fotoqrafiya, küçə fotoqrafiyası və məşhurluq fotoqrafiyası kimi) aşağıdakı xüsusiyyətlərə görə fərqlənir:

Zaman - şəkillər hadisələrin inkişafının xronoloji kontekstində əhəmiyyətlidir.

Obyektivlik-vəziyyət fotoşəkillərin dürüst olacağını və çəkilən hadisələri dəqiq əks etdirəcəyini nəzərdə tutur.

Nəql etmək - çəkilişlər digər xəbər elementlərilə birlikdə oxucuya və ya tamaşaçıya məlumat verir, hadisələrin mahiyyəti barədə təsəvvür yaradır.

Və burada məlum olur ki, MİA fotoqraf terminindən sui-istifadə edərək onu jurnalistika kontekstindən çıxarır. Bəli, jurnalistika çərçivəsindən kənarda fəaliyyət göstərən fotoqraf, sadəcə, fotoqrafdır, məsələn, fotoatelyedə və ya bulvarda foto çəkən biri kimi. Yəni, statik foto çəkir, baxmayaraq ki, bu iş də fotoqrafiya obyektinə bədii baxış tələb edir. Jurnalistikadan kənar fotoqrafların xətrinə dəymək istəmirəm. Şəxsən mən onları yaradıcı peşənin daşıyıcıları kimi tanıyıram, amma indi söhbət jurnalistikadan gedir.

Hələ media haqqında qanunun qəbul olunduğu dövrdə biz narahatlığımızı ifadə etdik və xəbərdarlıq etdik ki, qanunun bir çox müddəalarında ziddiyyətlər, məntiq qanununun pozulması var, müxtəlif yozumlar üçün yer qoyur və beləliklə redaksiyaların və jurnalistlərin fəaliyyətinin əngəllənməsi üçün asanlıqla istifadə oluna bilər. Ümumiyyətlə, qanunun fəlsəfəsi bunu ifadə edir. Obrazlı olaraq, gilyotini xatırladır.

Ümumiyyətlə, kimsə izah edə bilərmi:

Frilanser kimi reyestrə daxil olmaq üçün niyə bir və ya beş, on il yox, üçillik iş stajına malik olmaq lazımdır?

Niyə redaksiyanın üç ildən az staja malik ştatlı jurnalisti redaksiyanın tərkibində reyestrdə qeydiyyata alınır? Axı, 74.2.10-cu maddənin məntiqinə görə (jurnalistika sahəsi üzrə 3 (üç) ildən az olmayaraq iş stajı olmalıdır) o, reyestrə daxil edilməməlidir.

Niyə hansısa redaksiyada üç il işləmədiyi üçün fərdi sahibkar statusu ilə jurnalistikayla məşğul olmaq istəyən şəxsin reportyor, fotoreportyor, video-operator vəzifələrini yerinə yetirmək hüququ yoxdur?

Mən bu sualları linotip - çap jurnalistikası əsrində vermirəm, multimedia əsrində verirəm, elə bir zamanda ki, informasiya istehsalı və yayılması sahəsində özünü ifadə etmək istəyən hər bir vətəndaş bunu heç kimdən soruşmadan edir, çünki texniki cəhətdən bunun mənası yoxdur, amma siyasi cəhətdən - bu hüquq ona Konstitusiyanın (dövlətin ali qanunu, bu da aşağıda göstərilən heç bir qanunu, o cümlədən media haqqında qanunu bloklaya bilməz) 51- ci maddəsilə verilib.

Madam, reyestr məsələsinə toxunduq, o zaman KİV və frilanserlərin leqallaşmasını əngəlləyən digər mübahisəli məsələyə keçək. Məsələn, redaksiyanın 20 müəllif materialının məcburi istehsalı, bu informasiyanın bir abzasdan və ya məqalədən ibarət olmasının , saatlarla, yoxsa günlərlə yazılmasının əhəmiyyəti yoxdur. Niyə 20, 10 və ya 50 deyil? Niyə bu meyar üç jurnalisti olan redaksiyaya da, 70 jurnalisti olan redaksiyaya da eyni dərəcədə şamil edilir? Və ya dəyişiklik edib bir adam üçün norma tətbiq etmək olarmı, məsələn, bir və ya iki? O zaman daha ədalətli olacaq – birinci üzrə norma 6 informasiya, ikinci üzrə 140. Təsəvvür edirəm ki, birincilər bu cümləni oxuduqdan sonra sevinəcəklər, ikincilər isə kütləvi infarkt olacaqlar.

Ümumiyyətlə, media haqqında belə bir qanunu və onun əsas gilyotini kimi reyestri düşünən məmurlarımızın bu no-hau-nu başqa sahələrdə də tətbiq etməsi yaxşı olardı.

Polis-bu qədər cinayət işini araşdırsın, bu qədər cinayətkarı zərərsizləşdirsin.

Həkimlər-gün ərzində bu qədər xəstəni müayinə etsinlər, bu qədər əməliyyat aparsınlar.

Kənd təsərrüfatı istehsalçıları-bu qədər kartof əksinlər, bu qədər məhsul yığsınlar.

Deputatlar-gündə bu qədər sayda qanun müzakirə etsinlər və qəbul etsinlər.

Hamını peşə sexləri üzrə reyestrlərə daxil etsinlər və üzərinə öhdəlik qoysunlar.

Lakin ilk növbədə, aşağıdakı öhdəliklərlə - işsizliyə, inflyasiyaya, korrupsiyaya yol verməmək, pensiyaların, maaşların (dövlət qulluqçularına və deputatlara yox) məcburi illik artımı və s. ilə icra hakimiyyəti üçün belə bir reyestr yaratmaq lazımdır.

Reyestrin, bütövlükdə media haqqında qanunun problemləri haqda çox danışmaq olar. Artıq danışmışıq. Bizi eşitmədilər. Əziz Kərimova qayıdaq. Bu məqaləyə dair fotoda oxucu Əzizin onu yalnız statusuna görə deyil, fotojurnalistika sahəsindəki xidmətlərinə görə fotoreportyor kimi tanıyan müxtəlif yerli və beynəlxalq tədbirlərdən akkreditasiya beciklərini görə bilər.

Mən bu yazını yazdığım zaman Əziz Türkiyədə zəlzələ zonasında hadisə yerindən fotolarını çəkib yayır. MİA-nın onu fotojurnalist kimi rəsmən tanımaması vəziyyəti dəyişmir. Gözünüzü açın, cənablar!
Mehman Əliyev, IA Turan-ın direktoru

Tovuz rayonunun Dondar Quşçu kəndində 10 yaşlı Nərmin Quliyevanın qətlində təqsirli bilinən İlkin Süleymanovun cinayət işi üzrə növbəti məhkəmə prosesi keçirilib.

Gəncə Ağır Cinayətlər Məhkəməsində hakim Dadaş İmanovun sədrliyi ilə baş tutan prosesdə vəkillərin vəsatəti ilə bağlı əlavə şahidlərin dindirilməsi mərhələsi həyata keçirilib.

Bunlar işlə bağlı rəy vermis ekspertlərdir. Çünki məhkəmə araşdırmaları zamanı ekspert rəylərilə bağlı xeyli ziddiyyətlər ortaya çıxıb. Prokuror ziddiyyətlərin olduğunu qəbul edib, ekspertlərin çağrılıb dindirilməsinə etiraz etməyib.

Bu gün keçirilən prosesdə 3 il öncə yanmış meyiti müayinə etmiş tibbi ekspertlərdən biri Nazim Rəhimov ifadə verib.

Hazırda Ağstafa rayonunda işlədiyini deyən Nazim Rəhimov vəkillərin suallarının bir çoxuna konkret cavab verə bilməyib. O, hətta imzaladığı rəyi xatırlamadığını bildirib.

Hakim şərait yaradıb ki, ekspert imzaladığı rəylə tanış olsun, bir çox məsələləri yadına salsın, nəyə imza atdığını atırlasın.

Azyaşlı Nərminlə bağlı şübhə yaradan məsələlərdən biri meyitin qan qrupu ilə onun şəxsiyyət vəsiqəsindəki qan qrupunun fərqli olmasıdır.

Bundan başqa, müdafiə tərəfi cinayət işinin materiallarında olan fotolara əsaslanaraq bildirir ki, meyitin boyu 10 yaşlı uşağın boyundan xeyli uzundur. Ekspert rəyində də meyitin boyunun ölçüsü göstərilməyib.

Vəkillərin sözlərinə görə, istənilən meyitin müayinəsində boyun ölçüsünün göstərilməsi vacibdir. Müdafiəçilər məhkəmədə dindirilən ekspert Nazim Rəhimovdan meyitin boy ölçüsünün rəydə niyə göstərilmədiyini soruşub. Ekspert isə “ölçməmişik” deyə cavab verib.

Vəkillər ekspertdən kürək nahiyəsi torpağın üstündə olduğu halda, sinə ilə eyni dərəcədə yanması, yaxud da geyimlər yanmadığı halda, bədənin kömürləşmə həddində yanmasının səbəbləri haqda soruşublar.

Lakin ekspert bu sualların da bir çoxuna “bilmirəm”, “bu sualı qrupun rəhbəri Seyfulla müəllim cavablandıra bilər” kimi cavablar verib.

Ekspertin sözlərinə görə, meyit müayinəyə təqdim olunanda onlara məlumat verilmişdi ki, Tovuzda itkin düşmüş Nərmin Quliyevadır. Vəkillər ekspertdən soruşub ki, müayinədə azyaşlının yaxınlarından kimsə iştirak edirdimi?

Hakim müdaxilə edərək, bu sualı çıxarıb, nədənsə ekspertin bunu cavablandırmasına imkan verməyib.

Növbəti məhkəmə iclaslarına isə digər ekspertlər çağrılacaq. Ekspertiza ilə bağlı açıq qalan suallardan biri meyitin üstündən çıxmayan paltarların sonradan ekspertin əlinə necə gedib çıxmasıyla bağlıdır.

Məsələn, ekspert uşaq cins şalvarının üstündən İlkin Süleymanovun gödəkçəsinə aid lif tapılması haqda rəy verib. O cins şalvarın ekspertə necə gedib çıxması məlum deyil. Çünki meyitin üzərindən çıxan paltarların siyahısında cins şalvar yoxdur.

Telefonla bağlı ekspert rəyində də ziddiyyətlər ortaya çıxıb. Məsələn, rəyə əsasən, İlkin Süleymanovun telefonda parno fotolara baxdığı iddia olunan vaxtda o, müstəntiqin yanında şahid qismində dindirmədə olub.

Növbəti proses fevralın 15-də davam edəcək.

İttihama görə, 2019-cu il noyabrın 19-da itkin düşən Tovuz rayonunun Dondar Quşçu kənd sakini 10 yaşlı Nərmin Quliyevanın qətlə yetirilərək yandırılan meyiti 2020-ci ilin yanvarın 6-da kənd ərazisində aşkar edilib.

Daxili İşlər Nazirliyi, Dövlət Təhlükəsizliyi Xidməti və Baş Prokurorluğun əməkdaşlarından ibarət istintaq-əməliyyat qrupu tərəfindən cinayətin açılması istiqamətində həyata keçirilmiş təxirəsalınmaz istintaq hərəkətləri və əməliyyat-axtarış tədbirləri nəticəsində bu ağır cinayəti törətməkdə şübhəli bilinən Dondar Quşçu kənd sakini, işləməyən, 1973-cü il təvəllüdlü Süleymanov İlkin İbrahim oğlu tutularaq istintaqa cəlb edilib.

İş üzrə çoxsaylı şahidlər dindirilib, məhkəmə-tibbi, məhkəmə-bioloji, məhkəmə-kimyəvi ekspertizaları təyin edilib və digər zəruri istintaq hərəkətləri aparılıb.

İstintaq-əməliyyat qrupu tərəfindən İ.Süleymanovun yaşadığı evin həyətinə giriş qapısının və həyətə döşənmiş süni daş örtüyünün üzərindən, N.Quliyevanın saxlanıldığı otaqda olan çarpayının örtüyü və pərdənin üzərindən qanabənzər ləkələr, eləcə də iş üçün əhəmiyyət kəsb edən digər əşyalar maddi sübut kimi götürülüb.

İlkin Süleymanov şübhəli şəxs qismində müdafiəçinin iştirakı ilə dindirilərkən törətdiyi əməli tam etiraf edib.

İstintaq orqanı tərəfindən İlkin Süleymanovun barəsində Cinayət Məcəlləsinin 120.2.4 (xüsusi amansızlıqla qəsdən adam öldürmə), 120.2.9-cu (təqsirkar şəxs üçün aşkar surətdə köməksiz vəziyyətdə olan adamı öldürmə, habelə adam oğurluğu və ya girov götürülməsi ilə bağlı adam öldürmə), 144.3 (adam oğurluğu), 145.3-cü (qanunsuz azadlıqdan məhrum etmə, ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda) maddəsi ilə ittiham elan edilib.

Naxçıvan şəhəri, Babək rayon sakini Həsənov Polad Kamil oğlu Hurriyyet.az saytına yazaraq, rayonun keçmiş polis rəisi Teymur Quliyevdən şikayətçi olduğunu bildirir:

“Mən, Həsənov Polad Kamil oğlu, yazaraq sizdən xahiş edirəm ki, bu məsələni işıqlandırasınız.

Şikayətim Babək rayonunun keçmiş polis rəisi Quliyev Teymur və müstəntiq Xəlil Əlirzayevdəndir. Bir gün yolun kənarında dəyanan lapedimə “Niva” markalı avtomobilin çırpılması nəticəsində polislər məndən 3 min və “Niva” sürücüsündən isə 15 800 manat pul aldılar.

Bizi 10 günə yaxın bölmədə saxladılar. Həmin vaxtlarda polis bölməsində gedən gizli biznesin şahidi oldum. Polis bölməsinə gələn və yaxud da gətirilən şəxslərdən Quliyev Teymur və müstəntiq Xəlil Əlirzayev külli miqdarda pul alıb, həmin şəxsləri evə buraxırdılar.

Tanıdığım bir neçə şəxsdən də bu qaydada rüşvət alınıb. Pulumun heç olmasa bir hissəsinin mənə qaytarılmasında köməklik göstərməyinizi xahiş edirəm”.

Redaksiyadan: Qarşı tərəfin mövqeyini dərc etməyə hazırıq. //Hurriyyet.az//

Naxçıvan Muxtar Respublikasının Babək rayonunun Hacıvar kənd sakini Məmmədov Fikrət Məhəmmədhüseyn oğlu Naxçıvan Beynəlxalq Hava Limanındakı işindən qanunsuz yerə uzaqlaşdırıldığını iddia edir.

O, bu barədə Yeniavaz.com-a müraciətində bildirib.

F.Məmmədovun sözlərinə görə, o, 1998-ci ildə Naxçıvan Beynəlxalq Hava Limanında işə daxil olub:

“Bir müddət keçdikdən sonra mühafizə xidmətinə rəis vəzifəsinə təyin edilmişəm. 05.10.2009-cu ildə Mənşur Gülməmmədlinin (Naxçıvan Beynəlxalq Hava Limanın direktoru – red.) təkidi ilə Daşımaların təşkili xidmətinə növbə rəisi keçirilmişəm. 10 gün işlədikdən sonra M.Gülməmmədli məndən 1500 manat tələb etdi. Mən bu vəsaiti niyə verməli olduğum barədə sual verəndə bildirdi ki, pul Vasif Talıbova (Naxçıvan Muxtar Respublikası Ali Məclisinin keçmiş sədri – red.) çatdırılacaq. Pulu verməyəcəyim halda məni işdən azad edilməklə hədələdi. Mən də məcbur qalıb tanış insanlardan borc alaraq M.Gülməmmədliyə otağında 30 ədəd 50 AZN verdim.

Mənşur Gülməmmədlinin çox qanunsuz işlərini gördüyümə və bildiyimə görə, 2011-ci ildə işdən azad edilməyim üçün ərizə yazmağımı tələb etdi. 28.03.2011-ci ildə işdən çıxmaq haqqında ərizə yazmaqdan imtina etdiyim üçün məni Azərbaycan Respublikası Əmək Məcəlləsinin 70-ci maddəsinin “ç” bəndinə (heç bir üzrlü səbəb olmadan bütün günü işə gəlməmə) əsasən işdən qanunsuz şəkildə azad etdi”.

Vətəndaşın işdən çıxarılması iddiaları ilə bağlı Naxçıvan Beynəlxalq Hava Limanı ilə əlaqə saxlamağa çalışdıq. Lakin qurumun rəsmi saytında qeyd olunan telefon nömrələrinə edilən zəglərə cavab verilmədi.

Fevralın 6-da Türkiyədə baş vermiş və çoxsaylı insan tələfatına səbəb olmuş zəlzələ qurbanlarına dəstək məqsədilə Azərbaycanın birinci xanımı, Heydər Əliyev Fondunun prezidenti Mehriban Əliyevanın göstərişinə əsasən, Heydər Əliyev Fondu tərəfindən qardaş ölkəyə humanitar yardım göndərilir.

"Report" xəbər verir ki, bununla əlaqədar faciədən zərər çəkmiş şəxslər üçün müxtəlif dərman preparatları, oksigen maskaları, filtrli sistemlər, sarğı materialları, onurğa taxtaları, ilkin yardım boyunluqları, xərək və s. daxil olmaqla tibbi ləvazimat və avadanlıqlar, eləcə də isti geyimlər çatdıracaq xüsusi təyyarə Türkiyəyə yola düşəcək.
Ətraflı

Fondun Türkiyəyə ezam edilən əməkdaşları zəlzələ bölgəsində faciədən zərər çəkmiş vətəndaşlara humanitar yardım çatdıracaq.

Qeyd edək ki, Azərbaycanın birinci xanımı, Heydər Əliyev Fondunun prezidenti Mehriban Əliyeva faciə ilə əlaqədar verdiyi başsağlığında Türkiyə xalqının kədərinin bizim kədərimiz olduğunu qeyd edib, yaralananların və xəsarət alanların tezliklə şəfa tapmasını arzulayıb.

Heydər Əliyev Fondu Türkiyə xalqının üzləşdiyi faciə zamanı həlak olanların doğmalarına və yaxınlarına bir daha dərin hüznlə başsağlığı verir, yaralılara şəfa diləyir.

Əmək və Əhalinin Sosial Müdafiəsi Naziri Sahil Babayev Məmmədova Mətanət Nəbi qızını Nazirliyin Aparatının Əlillik siyasəti şöbəsinin Reabilitasiya məsələləri sektorunun müdiri təyin edib.

Hurriyyet.Az xəbər verir ki, Mətanət Məmmədova Sahil Babayevin qohumudur. Sözügedən xanım nazirin əmisi gəlinidir.

Eyni zamanda M.Məmmədovanın atası Nəbi Muxtarov da uzun müddət yüksək vəzifələrdə çalışıb. N.Muxtarov bir müddət Qaçqınların və Məcburi Köçkünlərin İşləri üzrə Dövlət Kоmitəsinin sədr müavini işləyib. 1993-2011-ci illərdə Füzuli rayonunun icra başçısı olub.

Uzun müddət işsiz qalan Nəbi Muxtarov 2020-ci il fevralın 9-da keçiriləcək parlament seçkilərində iştirak etmək üçün öz namizədliyini 84 saylı Füzuli seçki dairəsindən irəli sürdü. Lakin səs toplaya bilmədi. Həmin dairədən Vüqar Bayramov deputat seçildi.

Qeyd edək ki, Mənatət Məmmədova bu təyinata qədər Əmək və Əhalinin Sosial Müdafiəsi Nazirliyinin tabeliyindəki Dövlət Tibbi-Sosial Ekspertiza və Reabilitasiya Agentliyinin (DTSERA) İdarə Heyəti sədrinin müavini olub.

Ağcabədi rayon Şahsevən Təzəkənd kənd sakinləri susuzluqdan əziyyət çəkir.

DİA.AZ bildirir ki, kənddə yerləşən subartezian quyusu quruduğundan onlar uzaq məsafədən su daşımağa məcburdur.

Məsələ ilə bağlı Ağcabədi rayon Suvarma Sistemləri İdarəsindən bildirilib ki, kəndin içməli su problemindən xəbərdardırlar.

300-ə yaxın ailənin yaşadığı Şahsevən Təzəkənd kəndi isə bir ildir ki, içməli su probleminin həll edilməsini gözləyir.

Daha ətraflı aşağıdakı videoda:

İctimai nəqliyyata bilet satışı üzrə operator "K Group” MMC-nin Bakı Nəqliyyat Agentliyinin rəhbəri Vüsal Kərimliyə məxsus olduğu aşkarlanıb. BNA bu barədə verdiyi açıqlamada Vüsal Kərimlinin quruma rəhbər təyin ediləndən sonra şirkətdə fəaliyyətini dayandırdığını bildirib. Lakin araşdırmaya görə, Vüsal Kərimli fəaliyyətini hələ də davam etdirir. Məlum olub ki, ictimai nəqliyyatda bilet satışı da Vüsal Kərimlinin biznes imperiyasına daxil olan şirkət tərəfindən həyata keçirilir. Bundan başqa, son dövrlər BNA-nın keçirdiyi tenderlərdə şübhəli məqamların olması da aktual məsələlərdən biridir. Belə ki, tenderlərin bir çox hallarda BNA rəhbərinə yaxın, yaxud da yeni yaradılan "proxy” şirkətlərə verildiyi iddia olunur.

Mövzu ilə bağlı iqtisadçı Natiq Cəfərli Yenicag.az-a açıqlamasında bildirib ki, Azərbaycanda bir çox dövlət qurumlarının rəhbərləri öz səlahiyyətlərindən istifadə edərək qanun pozuntularına yol versələr də, həmin şəxslərə qarşı ciddi tədbirlər görülmür:

"Təəssüf ki, Azərbaycanda bir çox hallarda dövlət qurumları sayılan və ya publik hüquqi şəxs hesab olunan təşkilatların rəhbərləri öz təşkilatlarına aid daxili tender və dövlət satınalamaları qaydalarını tez-tez pozurlar. Görünür, bu hal Bakı Nəqliyyat Agentliyindən də yan keçməyib. Qurum rəhbərliyi əllərində olan səlahiyyətlərdən istifadə edir, birbaşa özlərinə məxsus və ya çox yaxın adamlarına məxsus şirkətlər həmişə tenderlərin qalibi olurlar. Bu isə ölkədə tenderlər və dövlət satınalmaları ilə bağlı ciddi problemlərin olduğunu bir daha sübut edir. Çünki mediada onlarla, yüzlərlə bu cür araşdırmalar olub və son 20 il ərzində cəmiyyətdə geniş müzakirələrə səbəb olub. Bu vəziyyətlə bağlı ciddi irəliləyişə nail olunmaması təəssüf doğurur. Əslində, BNA ilə bağlı yayılan bu cür məlumatlar müvafiq dövlət orqanlarının yoxlama obyekti olmalıdır. Azərbaycan qanunvericiliyinə və məntiqə görə, mediada çıxan məlumatlar istənilən halda araşdırılmalıdır. Hətta məlumat düz olmasa da, tenderlərin keçirilmə qaydalarına ciddi nəzarət etməklə "proxy” şirkətləri asanlıqla tapmaq mümkündür. Bəzi hallarda açıq şəkildə qanun pozuntuları olur. Bəzən dövlət satınalmaları və tenderlərin qalibləri bir həftə və ya iki ay öncədən yaradılan şirkətlər olur. Halbuki qanunvericilikdə tender qalibi olan şirkətlərin ən azı ağlabatan təcrübəyə malik olması göstərilir”.

Nəqliyyat eksperti İlqar Hüseynov da, öz növbəsində, saytımıza açıqlamasında qeyd edib ki, bütün hallarda yayılan məlumat araşdırılmalıdır:

"BNA ətrafında yayılan neqativ məlumatlar doğrudursa, bu, dövlət büdcəsinin şəffaf idarə edilməsi qaydasının pozulması və korrupsiya faktının yaranmasıdır. Azərbaycanda çox qəribə bir tendensiya var. Belə ki, şirkət yaratmış şəxslər hansısa vəzifəyə təyin olunduqdan sonra həmin şirkəti yaxın adamlarının və ya şirkətə aidiyyəti olmayan birinin adına keçirirlər. Yəni məsul şəxs kimi təqdim olunur. Halbuki faktiki olaraq şirkətin sahibi rəhbər vəzifədə çalışan şəxs olur. Ümumiyyətlə, dövlət qulluğunda çalışan insanların, parlamentə seçilən deputatların, nazirliklər və komitələri idarə edən şəxslərin, BNA və icra hakimiyyəti strukturlarının bizneslə məşğul olması qanunla qadağandır. Buna baxmayaraq, rəhbər vəzifədə olan kifayət qədər şəxs qanun pozuntusuna görə həbs olunublar. Məlum olub ki, onların şirkətləri yaxın adamlarının və qohumlarının adına olub. Bunu Azərbaycanda hər kəs bilir.

Bu baxımdan, BNA rəhbəri Vüsal Kərimli yayılan məlumatı təkzib etsə də, onun istefa verdiyi şirkətin yenidən tenderlərdə qalib olması və bilet satışı həyata keçirməsi ortaya suallar çıxarır. Burada birbaşa korrupsiya var və dövlət maraqlarına zidd məqamlar özünü büruzə verir. Ona görə də Baş Prokuror yanında Korrupsiyaya qarşı Mübarizə Baş İdarəsi məsələni araşdırmalıdır. Əgər fakt öz təsdiqini taparsa, qurum rəhbəri ciddi şəkildə cəzalandırılmalıdır”.