“Əgər onlar bir az da belə davam etsələr, mən bu dezinformasiya təbliğatı ilə kimlərin məşğul olduğunu mətbuata açıqlayacam”

“Elm və Təhsil Nazirliyi müraciətlərə şablon cavablar verir...”

“Elm və Təhsil Nazirliyi bildirir ki, bəzi müəllimlər hansısa sözü yaza bilmir və ya çubuqlu bölməni edə bilmir. Əgər biz bütün həqiqətləri demək istəyiriksə, onda nazirlik bu tələbələrin hansı universitetləri bitirdiyini desin, onlar da bundan nəticə çıxarsınlar. Bu ali təhsil müəssisələrinin adları ictimaiyyətə açıqlanmalıdır. Bir tərəfdən tələbələr məzun olur, diplom verilir, digər tərəfdən isə onlar təkrar sertifikasiyaya cəlb edilirlər. Buna həm vaxt, həm enerji, həm də dövlətin vəsaiti gedir”.

“AzPolitika.info” xəbər verir ki, bunu Milli Məclisin deputatı Ceyhun Məmmədov mətbuata açıqlamasında bildirib.

Millət vəkilinin bu açıqlamasından sonra onun Təhsil nazirindən tanışı ilə bağlı xahiş etdiyi və rədd cavabı aldığı üçün Emin Əmrullayevi qərəzli şəkildə tənqid etdiyinə dair iddialar gündəmə gəlib.

Ceyhun Məmmədov “AzPolitika.info”-ya açıqlamasında yayılan iddiaların əsassız olduğunu bildirib: “O iddiaların heç bir əsası yoxdur. Əgər kimdəsə belə bir fakt varsa, həmin faktı təqdim etsin və biz bunu müzakirə edək. Mənim bu günə kimi Elm və Təhsil Nazirliyindən heç bir şəxsi xahişim olmayıb. Təəssüf ki, kimlərsə bizim tənqidlərimizdən nəticə çıxarmaq, mövcud problemləri həll etmək əvəzinə belə bir yola baş vurublar”.

Deputat təəssüf hissi ilə bildirib ki, əksər hallarda bir sıra nazirliklərdə, xüsusən də Elm və Təhsil Nazirliyində deputatların müraciətlərinə o qədər də normal yanaşılmır və reaksiya verilmir: “Biz bunu dəfələrlə görmüşük. Məsələn, Milli Məclisdə hansısa bir məsələ ilə bağlı ünvanlanan müraciətə Elm və Təhsil Nazirliyi şablon cavablar verir. Həmçinin, bu qurum tərəfindən seçicilərin, ayrı-ayrı şəxslərin müraciətinə də adekvat reaksiyalar verilmir”.

“Ümumiyyətlə, mənim iş fəaliyyətim boyu heç kimdən nəsə şəxsi xahişim olmayıb. Ona görə də bunlar ucuz təbliğatdır. Təəssüf ki, kimlərsə özlərini Elm və Təhsil Nazirliyinə yaxın göstərmək, yaltaqlanmaq üçün belə kobud səhvlərə yol verirlər. Bizim Elm və Təhsil Nazirliyi ilə əməkdaşlığımız var, onların tədbirlərində iştirak edirik. Məsələn, bir az bundan əvvəl mən MİQ imtahanında olmuşam”,- deputat əlavə edib.

Deputat son vaxtlar Elm və Təhsil Nazilriyi ilə bağlı tənqidi çıxışlarına da aydınlıq gətirib: “Bu açıqlamaların məğzi odur ki, müəllimlərə qarşı bu cür münasibət onları dismotivasiya edir. Mən əslində nazirliyə tövsiyə edirəm ki, siz bu qədər müəllimi özünüzdən küsdürməyin, tədrisə marağını azaltmayın. Dediyim kimi, bu sadəcə bir tövsiyədir. Sertifikasiya ilə bağlı dediklərimə gəlincə, mən bildirmişəm ki, universitetlərdə təhsilin səviyyəsini artırmalıyıq. Görünür, bu bəzi insanları narahat edir və onlar təzə metod tapıblar. Guya Etibar Əliyevin, Ceyhun Məmmədovun kimləsə bağlı şəxsi xahiş etdiyinə dair yalan iddialar yayıblar. Mənim bütün tənqidlərim obyektivdir. Heç kim deyə bilməz ki, mənim hər hansı qərəzli bir tənqidim olub”.

Deputat Elm və Təhsil Nazirliyinin bu məsələyə aydınlıq gətirməli olduğunu bildirib: “Əgər bunu Elm və Təhsil Nazirliyi edirsə, onlar bunu etməməlidirlər. Eyni zamanda, nazirliyin ictimaiyyətlə əlaqələr sektoru da bu məsələyə aydınlıq gətirməlidir. Təqdim etsinlər ki, Ceyhun Məmmədov hansı tarixdə, kimdən nə xahiş edib? Azərbaycan ictimaiyyəti, jurnalistləri, ziyalıları məni yaxşı tanıyır. Onlar mənim fəaliyyətimdən xəbərdardırlar. Ona görə də, belə adamlar bu yolla heç nəyə nail ola bilməyəcəklər. Mən təxminən bu adamların kim olduğunu da bilirəm. Əgər onlar bir az da belə davam etsələr, mən bu dezinformasiya təbliğatı ilə kimlərin məşğul olduğunu mətbuata açıqlayacam”.

Bu gün işdən çıxarıldığı barədə məlumat yayılan Naxçıvan Muxtar Respublikası fövqəladə hallar nazirinin müavini, general-mayor Hikmət Kərimov barəsində maraqlı məlumatlar əldə etmişik.

TEREF.AZ-ın məlumatına görə, Qaynarinfo xatırladır ki, Hikmət Kərimovun işdən çıxarılması barədə məlumat səhər saatlarında yayılıb. Məlumat Muxtar Respublikanın rəsmi media orqanı kimi tanınan "Nuhçıxan” saytında dərc edilib. Xəbərdə bildirilir ki, Naxçıvan MR Ali Məclisi sədrinin birinci müavini Azər Zeynalov Hikmət Kərimovun işdən çıxarılması barədə sərəncam imzalayıb.

Hikmət Kərimov 2014-cü ildə general-mayor rütbəsi alıb. Həmin ilə qədər nazir müavini olsa da, polkovnik rütbəsi daşıyıb.

İddialara görə, o, daha çox narazılığa səbəb olan məmurlar kateqoriyasına aiddir. Bəzi məlumatlarda isə Hikmət Kərimovun Naxçıvan MR Ali Məclisinin keçmiş sədri Vasif Talıbova yaxın şəxs olduğu iddia edilir.

Ötən il generalın adı mənzil qalmaqalında hallanıb. Naxçıvan sakini olan Məmmədov Vüqar Məmmədhüseyn oğlu Hikmət Kərimovu onu yaşadığı evdən çıxarmaqda ittiham edir.

Onun müraciətində deyilir: "1994-cü ildə daxili işlər orqanlarında işə qəbul olmuşam. İşlədiyim dövrdə yəni, 1996-cı ildə Daxili İşlər Nazirliyinin nəzdində olan yataqxana binasında mənə ailəmlə yaşamaq üçün mənzil verilib. Buna baxmayaraq, xidmətimlə bağlı müəyyən rayonlarda işləyirdim. 2015-ci ildə təqaüdə çıxdım. Təqaüdə çıxmaqda məqsədim övladım olmadığından müəyyən müalicələr almaq üçün Bakı şəhərinə köçdük və Bakı şəhərində kirayə ev tutub qaldıq. Müalicəni davam etdirdik və bir övladımız dünyaya gəldi. Uşaq xəstə olduğu üçün, məcburən Bakı şəhərində qaldıq. Hərdən Naxçıvana gedərkən həmən yataqxanada qalırdıq və uşağın müalicəsi üçün Bakı şəhərinə gəlib gedirdik.

1996-cı ildən 2022 -ci ilin aprel ayınadək həmin mənzildə qeydiyyatdaydıq (yəni 28 ildir). 23.04.2022-ci il tarixdə DIN-nin müavini Zahid Gözəlov əl telefonuma zəng edərək bildirdi: "Fövqaladə Hallar Nazirliyindən bizə məktub gəlib”. Soruşdum "nə məktubdur?”, dedi ki "göstəriş verilib evdən çıxasınız”. Soruşdum, bu nə məsələdir. Bildirdi ki, FHN-nin müavini general-mayor Kərimov Hikmət Kərim oğlunun göndərdiyi məktub əsasında evdən çıxmağınız tələb olunur. Mən də 3 gün ondan sonra getdim FHN -nin müavini general-mayor Hikmət Kərimovla görüşdüm. O təkidlə bildirdi ki, evi boşalt. Mən dedim ki, mənim evim yoxdur, məni evlə təmin edin çıxım. Həmin mənzildə 28 ildir qeydiyyatdayam və yaşayıram. O isə mənə bildirdi ki, 3 günə vaxt verirəm, çıxmasan göstəriş verəcəyəm, əşyalarını töksünlər çölə. Özün də şikayət üçün hara gedirsən get. Başladı vəzifəsindən sui-istifadə edib məni hədələməyə. Yenə təkrarən bildirdi ki,özünə məxsus olan əşyaları götürməsən göstəriş verəcəm qapını qırıb çölə töksünlər. Mən də məcbur olub evdən çıxdım. Evimdəki əşyalarımı hara aparacağımı bilmədiyim üçün dəyər-dəyməzinə satdım. Sonra Bakıda kiraya yaşadığım evə qayıtdım. Başıma gələnləri həyat yoldaşıma bildirdim. Yoldaşım çox həyacan keçirtdi, dedi: "Mən 22 il o evdə övladsız yaşamışam, indi 5 yaşında övladımız var, biz harda qalacayıq? Yoldaşım bu həyacandan xərçəng xəstəliyinə düçar oldu. Hazırda vəziyyəti orta kafidir. Bakı şəhəri Milli Onkologiya Xəstəxanasında qeydiyyatdadır və müalicə olunur. Ayda bir dəfə kimya-terapiya qəbul edir”.

“Lerik Broyler” MMC-yə məxsus Lebro Quşçuluq Kompleksi Lənkəranın Təngivan kəndi başda olmaqla ətraf yaşayış məntəqələrində vəziyyəti dözülməz hala gətirib.

Teref.az AzToday.az-a istinadla xəbər verir ki, bu barədə Təngivan kənd sakinləri şikayət edirlər.

Onların sözlərinə görə, deputat İqbal Məmmədova məxsus müəssisə illərdir tullantı mallarını sanitar normalara zidd qaydada yandıraraq üfünət iyinin yayılmasına səbəb olur:

“10 ildir “Broyler”in buraxdığı üfunətdə zəhərlənir, xəstəlik tapır, boğuluruq. Kimyəvi zəhərli maddələri isə çaya buraxır, çay isə dənizə tökülür, torpaq sahələri sulanır, heyvanlar içir və s.

Mediada yayılan məlumatlara görə, şirkətin qanuni təmsilçisi İqbal Məmmədovun qardaşı oğlu Orxan Nərimanlıdır.

İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti (AİBNDX) tərəfindən “Aztelekom” MMC və “Bakı Telefon Rabitəsi” MMC (Cəmiyyətlər) barəsində antiinhisar qanunvericiliyinin pozulmasının əlamətləri üzrə iş qaldırılıb.

TEREF.AZ-ın Gununsesi.info-ya istinadən xəbərinə görə, adıçəkilən qurumlar cərimələnib. Ancaq “Aztelekom” qəbul edilən bu qərarın əsassız olduğunu bəyan edib:

“Qərarın bu hissəsinin və göstərişin mövcud qanunvericiliklə təzad təşkil etdiyi və əsassız olduğu qənaətindəyik. Belə ki, AİBNDX-nın mövqeyinə əsasən, Cəmiyyətlərin Tarif (qiymət) Şurası tərəfindən qiyməti tənzimlənən xidmətlərlə eyni predmetli xidmətlərin tariflərini müəyyən etdiyinin iddia edilməsinə baxmayaraq, Cəmiyyətlər tərəfindən qiymətləri tənzimlənmiş xidmətlər Tarif Şurası tərəfindən qiyməti tənzimlənən xidmətlərə heç bir halda aid deyil. Belə ki, Cəmiyyətlər tərəfindən qeyd edilmiş xidmətlərin təqdim edilməsində kanalyaradıcı avadanlıqlardan istifadə edilməyib. Qeyd olunan məlumatlar və müvafiq sübutların işin araşdırılması zamanı da təqdim edilməsinə baxmayaraq, AİBNDX tərəfindən yuxarıda qeyd edilmiş qərar qəbul edilib”.

Açıqlamada daha sonra qeyd olunur ki, “Aztelekom” MMC və “Bakı Telefon Rabitəsi” MMC tərəfindən təqdim edilən xidmətlərə aid qiymətlər mövcud bazar konyukturasına və bazarda eyni xidmətləri təqdim edən digər sabit şəbəkə operatorlarının tətbiq etməkdə olduğu qiymətlərə uyğunlaşdırılaraq təyin edilib. “Qeyd olunanlar nəzərə alınmaqla, İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti tərəfindən qəbul edilmiş qərarın “Aztelekom” MMC və “Bakı Telefon Rabitəsi” MMC tərəfindən mübahisələndirilməsi nəzərdə tutulub və bu məqsədlə Azərbaycan Respublikasının qanunvericiliyinə uyğun olaraq müvafiq məhkəməyə müraciət olunacaq”, – açıqlamada qeyd olunur.

Bəzi ekspertlər AİBNDX və sözgedən qurumlar arasında məhkəmə həddinə çıxan gərginliyi İqtisadiyyat naziri Mikayıl Cabbarovla Rəqəmsal inkişaf və nəqliyyat naziri Rəşad Nəbiyev arasında ciddi konfiliktin təzahürü olduğunu qeyd edirlər. Müşahidəçilərin qənaətinə görə, Rəşad Nəbiyevin nüfuz savaşından qalib çıxması mümkün görünmür. Çünki ortada Gömrük Komitəsi və digər nazirliklərdə Mikayıl Cabbarovun təşəbbüsü ilə baş vermiş genişmiqyaslı dəyişikliklər nümunəsi var.

Qarşıdakı dövrdə “super nazir”in təklifi ilə “Azərbaycan Hava Yolları” QSC-də (AZAL) ciddi islahatların aparılacağı gözlənilir. Ekspertlər bu halda M.Cabbarovun Rəşad Nəbiyev üzərində qəti qələbə çalacağını düşünürlər.

Qeyd edək ki, AZAL-ın hava nəqliyyatında yaratdığı bahalıq, monopoliya ölkədə ciddi narazılıq doğurur. Cəmiyyətin ən müxtəlif təbəqələri Dövlət Konsernin soyğunçuluğuna son qoymağı tələb edirlər. Bu sahədə ciddi dəyişikliklərin aparılması heç şübhəszi geniş ictimai dəstək və təqdir qazanacaq.

Bakı şəhəri, Xətai rayonu, Kənd Əhmədli qəsəbəsinin bir neçə küçəsində, əsasən də Şahin Səmədov küçəsində kanalizasiya sistemləri bərbad vəziyyətə düşüb. Düz 4 yerdə xəttin üstü açılıb və evlərdən axan çirkab suları özünü açıq şəkildə göstərir ki, bu da iyrənc mənzərə yaradır.

Hazırda yay fəsli olduğu üçün həmin sulardan qalxan üfunət iyindən həm nəfəs almaq, həm də həmin küçələrdən keçmək mümkünsüzə çevrilib. Payız və qış aylarında isə vəziyyət daha acınacaqlı olur.

Belə ki, yağan yağış və qardan əmələ gələn sular həmin xətlərə dolur ki, bu da çirkab sularının daşaraq ətraf küçələrə axmasına və daha bərbad vəziyyətin yaranmasına səbəb olur.

Qəsəbə bələdiyyəsinin, icra nümayəndəliyinin və məscidin yerləşdiyi 3-cü Qəsəbə küçəsində vəziyyət daha acınacaqlıdır. Belə ki, məscidin düz yanında, qəsəbə icra nümayəndəliyinin və bələdiyyəsinin düz qarşısındakı xəttin üstü iki yerdən açılıb, evlərdən axan kanalizasiya suları açıq şəkildə görünür. Qəsəbə sakinləri dəfələrlə hər iki quruma müraciət etsələr də, heç bir nəticəsi olmayıb.

Sakinlər bir neçə dəfə də Xətai rayon icra hakimiyyətinə, Xətai rayon bələdiyyəsinə, hətta “Azərsu” ASC-nin Xətai Rayon Su-kanal İdarəsinə müraciət ediblər. Onlara bu problemin aradan qaldırılması ilə bağlı vədlər verilsə də, hələ də yerinə yetirilməyib.

İş orasındadır ki, müraciətlərinin nəticəsiz qaldığını görən sakinlər artıq bu vəziyyətə alışıblar. Problem isə yerində qalmaqdadır.

TEREF.AZ bildirir ki, məsələ ilə bağlı Bizim.Media-ya açıqlama verən Bakı şəhəri, Xətai RİH-nin şöbə müdiri Pənah İmanov, problemdən xəbərdar olduqlarını diqqətə çatdırıb:

“Problemdən yeni xəbərimiz olub. Əvvəla, bu, bizim deyil, Xətai rayon Su-Kanal İdarəsinin problemidir”.

Kənd Əhmədlinin kanalizasiya xətlərinin çoxunun çürük olduğunu təsdiq edən şöbə müdiri qeyd edib ki, onların dəyişdirilməsinə ciddi ehtiyac var:

“Amma buna baxmayaraq, hazırda Xətai RİH-də həmin xətlərin dəyişdirilməsi üçün layihə və smeta hazırlanır. Sakinlər tərəfindən də bizə müraciətlər olunub. Həm sakinlərin istəyini, həm də problemin ciddiliyini nəzərə alaraq, yəqin ki, yaxın vaxtlarda işə başlayacağıq.

Ancaq onu da deyim ki, problemin bir və bir neçə ay ərzində həll olunması mümkün deyil və bunun üçün müəyyən vaxt tələb olunur. Bununla belə, xətlərin təmirini havalar soyuyana və yağış mövsümü başlayana qədər tamamlamağa çalışacağıq”.

Məsələ ilə bağlı “Azərsu” ASC-nin Xətai Rayon Su-kanal İdarəsi ilə əlaqə saxladıq. Telefona cavab verən idarənin operatoru Vahid Məmmədovun danışığından belə aydın oldu ki, problemdən xəbərləri yoxdur və biz məlumat verəndən sonra xəbərdar oldu.

Buna görə də, qurumun nümayəndəsi bizdən kanalizasiya xəttinin hansı küçələrdə xarab olduğunu soruşub və problemi qeydiyyata aldığını bildirib.

Vahid Məhərrəmov onu da əlavə edib ki, bir neçə saat ərzində İdarənin qəza xidməti əraziyə gedəcək və problemin həlli üçün araşdırma aparacaq.

Məsələ ilə bağlı bir neçə dəfə “Azərsu” ASC-nin ictimaiyyətlə əlqələr şöbəsinin rəhbəri Anar Cəbrayıllı ilə əlaqə saxlamaq istəsək də, bütün cəhdlərimiz nəticəsiz qalıb.

Mövzunu diqqətə saxlayacağıq.

Bir müddət əvvəl Penitensiar Xidmətin Müalicə Müəssisəsinin rəisi Mayıl Məmmədovun qızı ilə keçmiş kürəkəni Sadiq Poluzadə arasında məhkəmə çəkişməsi barədə məlumat vermişdik. Həmin vaxt S.Poluzadə saytımıza müraciət edərək Xətai Rayon Məhkəməsinin hakimi Şəhriyar Əliyevin işə qərəzli baxdığını, M.Mikayılovun təzyiqi ilə onun əleyhinə qərar çıxardığını iddia etmişdi.

Hurriyyet.Az xəbər verir ki, şikayət ictimailəşdikdən sonra məsələ araşdırılıb, hakim Şəhriyar Əliyevin çıxardığı qərarda pozuntular aşkar edilib. S.Poluzadənin anası Hicran Poluzadə saytımıza bildirib ki, oğlunun müraciəti ictimailəşdirildikdən sonra hakimin davranışları ilə bağlı rəsmi şəkildə Ədliyyə Nazirliyinə də müraciət ediblər:

“Ədliyyə Nazirliyindən cavab olaraq bildirildi ki, hakim Şəhriyar Əliyevin fəaliyyəti ilə bağlı araşdırma aparılıb. Göstərilən mülki iş üzrə sədrlik edən hakim tərəfindən bir sıra prosessual pozuntulara yol verildiyi aşkarlanıb. Nazirlik rəsmi məktub göndərərək qeyd etdi ki, həmin hakim barəsində zəruri tədbirlər görülür”.

Hicran Poluzadə hakim Şəhriyar Əliyevin çıxardığı qərardan apellyasiya şikayəti verdiklərini, işə Bakı Apellyasiya Məhkəməsində hakim Xumar Mərdanovanın sədrliyi ilə baxıldığını da bildirib.

Qeyd edək ki, Penitensiar Xidmətin Müalicə Müəssisəsinin rəisi Mayıl Məmmədovun qızı ilə onun keçmiş kürəkəni Sadiq Poluzadə boşansa da, aralarında mülkiyyətə görə məhkəmə çəkişməsi gedir. M.Məmmədovun qızı ona 64 min manat dəyərində qızıl-zinət əşyalarının çatmalı olduğunu iddia edir.\\Konkret.az

Bakı şəhəri, Nizami küçəsi 53, mənzil 41-də yaşayan, “Hüquqları Pozulmuş Məhkumların Müdafiəsi” İctimai Birliyinin həmtəsisçisi Abdullayev Böyükağa Abdulla oğlu tərəfindən “Hürriyyət” qəzetinin redaksiyasına növbəti məktubu daxil olub. Qəzetimiz vasitəsilə Prezident İlham Əliyevə, Birinci vitse-prezident Mehriban Əliyevaya, Baş nazir Əli Əsədova, Milli Məclisin sədri Sahibə Qafarovaya, Maliyyə nazirİ Samir Şərifova ünvanladığı məktubu olduğu kimi dərc edirik:

“Hörmətli Prezident!

Azərbaycan Respublikasının Vəkillər Kollegiyası özünün Nizamnaməsi əsasında və Konstitusiyanın tələblərinə uyğun olaraq insanların hüquqlarını cinayət və mülki müstəvidə müdafiə edən, insan resuslarına xidmət göstərən kollegial hüquqi şəxsdir.

Azərbaycan Respublikasının Auditorlar Palatası da öz Nizamnaməsi əsasında, Konstitusiyanın tələblərinə uyğun olaraq iqtisadi sahədə, insan resurslarına xidmət göstərən hüquqi şəxsdir.

Sizin fərmanınızla təsdiq edilimiş, “Azərbaycan Respublikasının 2023-cü ilin dövlət büdcəsindən” (Təsnifata uyğun 1.3.5.1) Azərbaycan Respublikasının Vəkillər Kollegiyasına 5 000 000 (5 milyon) manat vəsait ayrılmışdır.

Çox-çox təəssüflər olsun ki, ancaq Azərbaycan Respublikasının Auditorlar Palatasına dövlət büdcəsindən bircə manat olsun belə, vəsait ayrılmamışdır. Baxmayaraq ki, hər iki qurum xidmət göstərməklə məşğuldur.

Onda, nəyə görə Vəkillər Kollegiyasına 5 milyon manat ayrıldığı halda, Auditorlar Palatasına bir manat belə ayrılmamışdır?! Bu xidmət qurumlarını 5 milyon manat dəyərində bir-birindən fərqləndirən üstün cəhətləri hansılardır?

Vəkillər Kollegiyasının rəhbərliyi ilə Auditorlar Palatasının rəhbərliyi arasındakı nüfuz – stimul fərqini götürsək, Auditorlar Palatasının sədri Vəkillər Kollegiyasının sədrindən əlçatmaz dərəcədə yüksəkliklərdə dayanmışdır.

Belə ki, Auditorlar Palatasının sədri Vəkillər Kolleğiyasının sədrindən fərqli olaraq, bütün ömrü boyu dövlət strukturlarında işləmişdir, özü də professordur...

Cənab Prezident!

Məqsədim nə Vəkillər Kollegiyası və onun sədrini, nə də Auditorlar Palatasını və onun sədrini gündəmə gətirmək deyil! Məqsədimiz dövlət büdcəsinin kimlər tərəfindən və necə dağıdıldığına və büdcədən Vəkillər Kollegiyasına ayrılmış 5 milyon manat vəsaitin TALEYİNƏ aydınlıq gətirməkdir...

Belə çıxır ki, bu kimi müəmmalı ayırmalarla cavabdeh şəxslər - Baş nazir, Maliyyə naziri və Milli Məclisin sədri başda olmaqla 125 deputat dövlət düdcəsindən ayrılan 5 milyona göz yummaqla, büdcənin dağıdılmasına - talan edilməsinə şərait yaratmışlar!

Belə çıxır ki, bu kimi müəmmalı ayırmalarla cavabdeh şəxslər Sizi də aldadıblar! Çünki dövlət büdcəsinin layihəsi Sizə Baş nazir və Maliyyə naziri tərəfindən hesabat verildikdən və Milli Məclisdə müzakirə edilib, səsə qoyulduqdan və qərar qəbul edildikdən sonra təqdim edilmişdir. Və Sizin tərəfinizdən fərmanla təsdiq edilmişdir.

Hörmətli Prezident!

Bildirirlər ki, Vəkillər Kollegiyasının sədri Anar Bağırov Ədliyyə naziri Fikrət Məmmədova yaxınlığı ilə tanınır. Görünür, Anar Bağırovun Vəkillər Kolleğiyasının sədri olmasında Ədliyyə nazirinin boyük əməyi olmuşdur. Bir sözlə, Anar Bağırov Ədliyyə nazirinin adamıdır.

Bax, elə bu səbəbə görə də, dövlət büdcəsindən Vəkillər Kollegiyasına 5 milyon manat vəsait ayrılmışdır. “Göstərdiyi xidmət müqabilində damcı-damcı göydən başına pul yağan və pul damcıları hesabına dəryaya çevrilmiş” Vəkillər Kollegiyası 2023-cü ildə dövlət büdcəsindən ayrılan 5 milyon manatı hara xərcləmişdir?

Cənab Prezident!

Sizdən xahiş edirəm ki, dövlət büdcəsindən ayrılmış 5 milyon manat vəsaitin taleyi və büdcənin kimlərin və necə dağıtmaları barədə araşdırma aparılmasına və Sizə doğru-dürüst məlumat verilməsi üçün aidiyyəti qurumlara göstəriş verəsiniz.

Aydınlıq gətirilənə kimi, bu məsələni şəxsən nəzarətinizdə saxlamağınızı da Sizdən ayrıca xahiş edirəm. Qabaqcadan öz minnətdarlığımı bildirirəm”.

Redaksiyadan: Yazıda adları qeyd olunan qurumların və şəxslərin mövqeyini dərc etməyə hazırıq.