 |
|
|
II Qarabağ müharibəsi iştirakçısı İlqar Cahangirov Abşeronun icra başçısı Abdin Fərzəliyevin qəbuluna düşə bilmədiyini deyir.
O, sosial problemləri ilə bağlı dəfələrlə Abdin Fərzəliyevin qəbuluna düşmək istəsə də, onu müxtəlif bəhanələrlə uzaqlaşdırıblar.
İlqar Cahangirov icra başçısının biganə münasibətindən ölkə rəhbərliyinə şikayət edir.
O, “Arqument.az”a deyir ki, Fərzəliyev ölkə başçısının tapşırıqlarına əməl etmir, vətəndaşlara, qazilərə biganə münasibət göstərir.
İlqar Cahangirov II qrup əlildir.
O, İlham Əliyevin göstərişi ilə 2021-ci ildə Bakı şəhərində mənzillə təmin olunub. Həmçinin xidmətlərinə görə 1-ci, 2-ci və 3-cü dərəcəli medallarla, Silahlı qüvvələrin 90, 95 və 100 illiyi yubiley, Azərbaycan ordusunun yaranmasının 10 illiyi yubiley, hərbi xidmətdə fərqlənməyə görə 3-cü dərəcəli, Füzulinin, Cəbrayılın, Xocavəndin, Şuşanın azad olunmasına görə, döyüşdə fərqlənməyə görə və vətən müharibəsi iştirakçısı medalları ilə təltif olunub.
Dediyinə görə, atası Əlisafa Cahangirov da Birinci Qarabağ müharibəsinin iştirakçısı olub, anası Zəminə Cahangirova qəhrəman ana adını alıb və ömürlük 1-ci qrup əlildir.
İki qardaşından biri Altay Cahangirov Birinci Qarabağ döyüşlərində yaralanıb, ömürlük 2-ci qrup əlildir və digər qardaşı Fərahim Cahangirov birinci Qarabağ müharibəsi veteranıdır.
Abdin Fərzəliyevdən Prezident İlham Əliyevə və Birinci vitse-prezident Mehriban Əliyevaya şikayət edən Qarabağ qazisi onlardan kömək istəyib.
“Bir sözlə, biz ailəlikcə vətənimizə və dövlətimizə bağlı şəxslərik. Abşeron rayon icra hakimiyyətinin başçısı Fərzəliyev Abdin Ələskər oğlu, Prezidentin tapşırıqlarına məhəl qoymayaraq özünü ağa kimi, xan kimi apararaq vətəndaşlara yuxarıdan aşağı baxır. Təsəvvür edin ki, mən 2022-ci ilin dekabr ayından bu günə qədər Abdin Fərzəliyevin qəbuluna düşə bilmirəm. Hər dəfə Abşeron rayon İcra Hakimiyyətinə getdikdə “Abdin müəllim burada yoxdur, iclasdadır” filan kimi bəhanələrlə məni yola salırlar. Mən icra başçısının qəbuluna gedirəm, lakin məni qapıda duran polis qəbul edib yola salır”, – deyə o bildirib.
Abşeron Rayon İcra Hakimiyyəti qazinin şikayətinə münasibət bildirməyib.
Bir müddət əvvəl Bakı klinikalarından birində bir neçə xanımın bədən üzvlərini böyütmək istərkən, “basıb göz çıxaran” cərrahın əl işinin fotolarını paylaşmışdım. İndi bir xanım mənə yazıb ki, onlardan biri mənim şəkilimdir. Onu sil. Xanıma deyirəm ki, ay gözəl insan, həmin şəkildə sənin üzün görünür?
-Yox.
-Əməliyyat olunan yerdən başqa bədən üzvünün digər hissələri necə?
-Yox.
-Adını yazmışam?
-Yox.
-Bəs bu şəkilin harası sənindir? Şəxsən mən onu sənin yox, səni o günə salan həkimin şəkili kimi paylaşmışam. Onun əl işi kimi.
-Bəli, doğrudur. Amma o həkim mənə söz verdi ki, səni “təmir edib” əvvəlki halına salacağam. Siz isə şəkili paylaşmaqla buna imkan vermirsiniz. Söz verirəm sizə, əgər o məni düz-əməlli “təmir etməsə”, sizə daha dəhşətli şəkillər göndərəcəyəm. Hələlik o şəkilləri silin.
Nə isə, uzun çək-çevirdən sonra xanıma şəkili silə bilməyəcəyimi dedim. Başladı məni təhdid etməyə: - Səni məhkəməyə verəcəyəm. Polisə artıq şikayət etmişəm və s.
Bir sözlə, deyəsən, Suraxanı rayon Məhkəməsinin hakimi möhtərəm Nərminə xanımı 7-8 ay da belə narahat edəcəyik. Bunlar öz yerində. Mən üzümü burdan əl işini paylaşdığım həkimə tutub deyirəm: o xanımı düz-əməlli "təmir" edin. Yoxsa bu gün mənim üzümə durğuzduğunuz şəxs sabah sizin üzünüzə dirənəcək. Özü də haqlı surətdə.
Azərbaycan məhkəmə sisteminin başbilənlərinə də bir neçə sözüm var. Əsassız və qərəzli hökmlərinizlə jurnalistləri kimlərinsə ayağına verməyin. Digər möhtəkirlərin də əli-qolu açılır.
Heydər Oğuz
Teref.az
Baş Prokuror yanında Korrupsiyaya Qarşı Mübarizə Baş İdarəsi Tərtər rayon İcra Hakimiyyətində əməliyyat keçirib.
APA xəbər verir ki, idarə əməkdaşlarının keçirdiyi əməliyyat-axtarış tədbirləri nəticəsində korrupsiya faktları ilə bağlı icra hakimiyyətinin vəzifəli şəxsi saxlanılıb.
Baş Prokurorluğun mətbuat xidmətindən APA-ya bildirib ki, əlavə məlumat veriləcək.
SABUNÇU RAYON İCRA ŞÖBƏSİNİN RƏİSİ FÜZULİ HÜSEYNOVUN VƏ İCRA MƏMURU DAŞQIN HƏSƏNƏLİYEVİN QANUNSUZ VƏ QƏRƏZLİ HƏRƏKTLƏRİ HAQQINDA
Əvvəlcə, ona nəzər yetirək ki, Bakı Apellyasiya Məhkəməsinin Mülki Kollegiyası nümayəndəsi olduğum vətəndaş Qarayev Kamil Fəxrəddin oğlunun cavabdeh qismində iştirak etdiyi 2(103)-5635/2022 nömrəli mülki iş üzrə 24 oktyabr 2022-cü il tarixli ədalətsiz, qanunsuz və əsassız qətnamə qəbul edib. Həmin qətnamə tərəflər(ər-arvad) arasında ümumi mülkiyyətə daxil olmayan əmlakın bölünməsini müəyyən edirdi. Baxmayaraq ki, iş üzrə iddiaçı Qarayeva Afət Qabil qızı məhkəmə baxışı iclasında verdiyi izahatda etiraf edərək qeyd etmişdi: ...birgə nikah dövründə cavabdehin atasının evi satıldı, onlara düşən pay kimi 20.000 ABŞ dolları verildi, onlar da həmin məbləğin üstünü düzəldib, 35.000 ABŞ dollarına bu evi almışlar...(Bakı Apellyasiya Məhkəməsinin 24.10.2022-ci il tarixli, 2(103)-5635/2022№-li qətnaməsi: Tərəflərin izahatları 12-ci abzas).
Həmin qətnamədən kassasiya şikayəti verilsə də, Ali Məhkəmənin Mülki Kollegiyası həmin şikayəti təmin etməmişdir.
Həmin qərardan hazırda əlavə kassasiya şikayəti verilmişdir. Qətnamə qanuni qüvvəyə mindiyindən icra olunması üçün Bakı şəhəri Sabunçu Rayon İcra Şöbəsinə icra vərəqəsi verilmiş, iş üzrə icraat həmin icra şöbəsinin məmuru Daşqın Səfərəliyevə həvalə edilmişdir.
Daşqın Həsənəliyev tərəfindən isə 12 iyul 2023-cü il tarixli borclu Qarayev Kamil barəsində “məcburi gətirilmə” haqqında qərar qəbul edilmişdir. Həmin qərarın sürəti isə mənim tərəfimdən 18 iyul 2023-cü il tarixdə sənədin kötüyünə imza edilməklə təhvil alınmışdır.
Qərar belə əsaslandırılmışdır ki, guya borclu icra məmurunun icraatında olan məlum icra işi üzrə icraatdan yayınmış, çoxsaylı xəbərdarlıqlara baxmayaraq icra şöbəsinə getməkdən boyun qaçırıb. Daha sonra məlum olmuşdur ki, həmin qərardan göstərilən müddət gözlənilmədən 17 iyul 2023-cü il tarixdə “məcburi gətirilmə haqqında” təqdimatla məhkəməyə müraciət edilmişdir.
Təqdimat belə əsaslandırılmışdır ki, guya borclu icra məmurunun icraatında olan məlum icra işi üzrə icraatdan yayınmış, dəfələrlə ona çoxsaylı çağırış vərəqəsi göndərilməsinə baxmayaraq icra şöbəsinə gəlməyib.
Təqdimatın əsası kimi həm də o göstərilmişdir ki, guya icraata başlamaq haqqında qərarın sürəti, habelə “məcburi gətirilmə haqqında qəbul edilmiş qərar” borclunun təqdimatda göstərilən faktiki yaşayış ünvanına göndərilmiş, lakin borclu həmin qərardan şikayət verməmişdir.
Aşağıda qeyd olunanlara əsasən icra məmurunun qeyd olunan hərəkətlərini qanunsuz və qərəzli hesab edirəm. Belə ki, icra məmuru tamamilə işin həqiqi hallarına uyğun olmayan qərar qəbul etmişdir.
Bu baxımdan ilk növbədə onu nəzərinizə çatdırmaq istəyirəm ki, sözügedən icra məmurunun icraatına daxil olmuş iş üzrə icraata başlamaq haqqında qərarın sürəti faktiki olaraq borclunun yaşadığı və icra məmuruna da məlum olan ünvana göndərilməmişdir.
Bundan başqa borclu barəsində qəbul edilmiş “məcburi gətirilmə” haqqında 12 iyul 2023-cü il tarixli qərarın sürəti, habelə təqdimatda qeyd olunan “çoxsaylı xəbərdarlıqlar” onun yaşadığı ünvana göndərilməmişdir. Bu halları təsdiq edən sübutlar mövcud deyil.
İşin həqiqi halları isə ondan ibarətdir ki, borclu icra işinin sözügedən icra məmuru Daşqın Həsənəliyevin icraatına verilməsi haqqında 07 iyul 2023-cü il tarixdə “sms bildiriş” vasitəsilə məlumat almış, bundan sonra nümayəndəsi kimi mənə məlumat vermişdir.
Mən isə öz növbəmdə növbəti işi günündə, yəni 10 iyul 2023-cü il tarixdə Sabunçu Rayon İcra Şöbəsinə getməklə icra məmuru Daşqın Həsənəliyev haqqında yazılı etirazı, həmçinin icra şöbəsinin rəisi cənab Füzuli Hüseynova ünvanlanmış ərizəni icra şöbəsinin dəftərxanasına təqdim etmişəm. Bu da ilk növbədə onu təsdiq edir ki, tərəf borclu kimi icraatdan yayınmamış və icra icraatında səlahiyyətli nümayəndəsi vasitəsilə vaxtında və qanuni şəkildə təmsil olunmaqla öz hüquqlarından istifadə etmişdir.
“İcra haqqında Azərbaycan Respublikasının Qanunu”nun 42.3-cü maddəsinə əsasən İcra məmuruna etiraz etmə haqqında məsələ icra qurumunun və ya icra xidmətinin rəhbəri tərəfindən on gün müddətində həll edilir. Həmin qanunun 42.6-cı maddəsinə əsasən icra məmuruna etiraz təmin edilmədikdə, tərəflər bu barədə qərarın sürətini aldıqdan sonra 10 gün müddətində müvafiq məhkəməyə şikayət edə bilərlər.
Lakin 18 iyul 2023-cü il tarixdə Sabunçu Rayon İcra Şöbəsində olarkən mənə məlum olmuşdur ki, icra məmuru D.Həsənəliyevə edilmiş etiraz təmin olunmasa da, bu barədə müvafiq qərar qəbul edilməmişdir. Onu da qeyd edim ki, həmin gün icra şöbəsinin nə rəisi, nə də müavini yerində olmamışdır ki, bu qanunsuz halın səbəbini aydınlaşdırmaq mümkün olsun. Barəsində etiraz edilmiş icra məmuru Daşqın Həsənəliyev isə bu halı onunla izah etmişdir ki, icra məmuruna edilmiş etirazlarla bağlı qərarın formasını Nazirlər Kabinenti təsdiq etməyib. Ona görə də belə qərarlar qəbul edilmir.
Əlbəttə ki, onun bu mövqeyi müvafiq qanunvericiliyin tələblərinə və həmin qanunvericiliklə icra icraatında təmsil olunan tərəflərin hüquqlarına zidd olduğundan tamamilə qanunsuz və qərəzlidir. Ümumiyyətlə icra işinin gedişatında yaranmış hallar onu təsdiq edir ki, həqiqətən də icra məmuru Daşqın Həsənəliyevə etiraz etməkdə haqlı olmuşam.
Məhz 18 iyul 2023-cü il tarixdə nümayəndə kimi mən Samir Zeynalov tələbin könüllü icrası haqqında bildirişi və həmçinin “məcburi gətirilmə haqqında” 12 iyul 2023-cü il tarixli qərarı şəxsən imza etməklə icra məmurundan təhvil almışam. Və elə həmin gün icra məmuru tərəfindən “məcburi gətirilmə haqqında” qərarda göstərilmiş 10 gün müddət gözlənilmədən məhkəməyə təqdimat verilmişdir. Təqdimatda guya həmin qərarın sürətini borclunun aldığı və şikayət vermədiyi göstərilmişdir. Hətta fərz etsək ki, həmin qərarın sürətini həqiqətən almışıq, bu yenə də icra məmuruna sözügedən təqdimatla məhkəməyə müraciət etmək hüququnu tanımırdı. Çünki qəbul edilmiş qərardan şikayət verilməsinin sonuncu günü 22 iyul 2023-cü il tarixə təsadüf edirdi.
Göründüyü kimi icra məmuru hətta bu müddəti belə gözləmədən məhkəməyə qərəzli sürətdə müraciət etmiş və açıq-aşkar mənimlə ünsiyyəti zamanı qərəzli olduğunu gizlədə bilməyərək qanunsuz olan bu hərəkətini özünün “operativliyi” ilə əlaqələndirmiş və nəticədə “yaxşı etdiyini” bildirimişdir.
Bundan başqa nümayəndə kimi iş üzrə izahat verməyi təklif etsəm də, izahatı yalnız borclunun özü verə biləcəyi mənə bildirilmişdir.
Halbuki, İcra haqqında Qanunun 34.1-ci maddəsinə əsasən icraatda iştirak edən nümayəndə təmsil etdiyi şəxsin adından icraatla bağlı bütün hərəkətləri etmək hüququna malikdir.
Beləliklə konkret olaraq onu qeyd etmək istəyirəm ki, barəsində etiraz edilmiş icra məmuru həmin etiraz məsələsi məhkəmə müstəvisində tam həllini tapmayana qədər, habelə boclunun icraatdan yayındığını göstərən hallar yaranmadığı təqdirdə belə qərar qəbul etmək hüququna sahib deyildi.
Diqqətçəkən və maraq doğuran başqa bir məqam isə odur ki, icra məmuru tərəfindən 04 iyul 2023-cü il tarixdə yazılı xəbərdarlıq tərtib olunur, amma “sms bildiriş” 07 iyul 2023-cü il tarixdə borcluya daxil olur. Hansı ki, həmin “sms bildiriş” alındıqdan sonra nümayəndə kimi mən Sabunçu Rayon İcra Şöbəsində olmaqla icra məmuruna əsaslandırılmış etiraz təqdim etmişəm. Bundan sonra isə etiraz məsələsi həll olunmadan icra məmuru tərəfindən borclu barəsində 12 iyul 2023-cü il tarixli “məcburi gətirilmə haqqında” qərar qəbul edib.
Bir daha qeyd etmək istəyirəm ki, istər tələbin könüllü icrası haqqında bildirişi, istər “yazılı xəbərdarlığı”, istərsə də 12 iyul 2023-cü il tarixli “məcburi gətirilmə haqqında” qərarı nümayəndə kimi mən Samir Zeynalov sənədlərin kötüyünə imza etməklə şəxsən 18 iyul 2023-ci il tarixdə təhvil almışam. Bütün bunlara baxmayaraq icra məmuru qanunsuz və son dərəcə qərəzli davranmaqla- işin faktiki hallarını özündən əks etdirməyən və tamamilə yalana söykənən qanunsuz və əsassız təqdimatla elə həmin gün məhkəməyə müraciət etmişdir.
Ona görə də yuxarıda qeyd olunanlara dayanaraq icra məmuru cənab D.Həsənəliyevin və həmçinin icra şöbəsinin rəisi cənab F.Hüseynovun hərəkətlərini qərəzli olmaqla qanunsuz edirəm. İstisna etmirəm ki, sözügedən icra məmuru tələbkar tərəflə hər hansısa formada sövdələşməklə ona təyinatına uyğun olmayan üstünlüklər verə bilər. Çünki tələbkar tərəfin qanunsuz maraqlarının təmini istiqamətində icra məmuru tərəfindən edilmiş qeyd olunan qanunsuz hərəkətlərin məcmusu, o cümlədən icra məmuruna vaxtında edilmiş etirazın həllinə dair qərarın qəbul edilməməsi və həmin qərarın sürətinin təqdim olunmaması halları başqa cür düşünməyə əsas vermir. Məhz göstərilən qanunsuz hərəkət və hərəkətsizliklərdir ki, icraat zamanı tərəf kimi borclunun hüquqlarının təmin olunması və həyata keçirilməsində süni maneələr yaratmışdır.
Azərbaycan Respublikasının “İcra məmurları haqqında Qanunu”nun 9-cu maddəsinə əsasən İcra məmurları onlara verilən hüquqlardan qanuna uyğun istifadə etməyə və öz fəaliyyətlərində fiziki və hüquqi şəxslərin hüquqlarının və qanuni mənafelərinin pozulmasına yol verməməyə borcludurlar.
Azərbaycan Respublikasının “Korrupsiyaya qarşı mübarizə haqqında Qanunu”nun 9.3.6 və 9.3.12-ci maddələrinə əsasən qərarların qəbul edilməsi zamanı fiziki və ya hüquqi şəxslərə onların təyinatına uyğun olmayan üstünlüklər vermək, həmçinin fiziki və ya hüquqi şəxslərə hüquqlarının və qanuni mənafelərinin həyata keçirilməsində süni maneələr yaratmaq korrupsiyaya şərait yaradan hüquqpozmalar sayılır.
Odur ki, qeyd edilənləri nəzərə alaraq Azərbaycan Respublikasının Ədliyyə Naziri cənab Fikrət Məmmədovdan və Məhkəmə Qərarlarının İcra Baş İdarəsinin rəisi cənab İlqar Cəfərovdan Sabunçu Rayon İcra Şöbəsinin icra məmuru Daşqın Həsənəliyevin, eləcə də həmin şöbənin rəisi Füzuli Hüseynovun qanunsuz hərəkətlərinə hüquqi qiymətin verilməsini və göstərilən neqativ halların aradan qaldırılmasının təmin olunmasını xahiş edirəm.
Samir ZEYNALOV,
Hüquq müdafiəçisi, səlahiyyətli nümayəndə
hurriyet.az
68 yaşlı Elmahir Rzayev: “Prezidentə, Mehriban xanıma müraciət edirəm”
Naxçıvan sakini Elmahir Rzayev deyir ki, Muxtar Respublika rəhbərliyində dəyişiklik olanda 20 il əvvəl zorla əlindən alınmış əmlakını geri qaytaracağına ümidi yaranmışdı. Elə ona görə də dəyişiklikdən sonra rəhbər vəzifələrə yeni təyin olunan şəxslərin bir çoxuna müraciət edib. Onun sözlərinə görə, bu müraciətlərdən sonra ümidləri azalmağa başlayıb.
“Atası Vasif Talıbovun müəllimi olub deyə…”
68 yaşlı Elmahir Rzayev Meydan TV-yə danışır ki, Naxçıvan şəhərində, Dəmiryol vağzalının yanında obyekti vardı. Həmin obyekti 2004-cü ildə razılığı alınmadan, məhkəmə qərarı olmadan, dəyərini də ödəmədən söküblər. Üstündən 20 ilə yaxın vaxt keçməsinə baxmayaraq, nə əmlakını bərpa elətdirə bilir, nə də pulunu ödəyirlər.
Elmahir Rzayevin əmlakı Əlincə məhəlləsində, Naxçıvan Dəmiryolu vağzalının sağ tərəfində yerləşirmiş. Bunu təsdiqləyən sənədlər də var.
Əmlak sahibinin sözlərinə görə, 1999-cu ildə alıb, 2002-ci ildə özəlləşdirdiyi bu obyekt Azər Zeynalov “Naxçıvan Dəmir Yolları”na rəis təyin olunandan az sonra sökülüb.
“Mən özüm də dəmiryolunda işləyirdim. Azər Zeynalov dedi ki, guya sədrin – Vasif Talıbovun göstərişidir, sökülməlidir. Dedim ki, bura mənim şəxsi mülkiyyətimdir. Azər Zeynalovun atası Şərurda Vasif Talıbovun müəllimi olub. Vasif Talıbov müəlliminin oğlunu əvvəl Ali Məclisə gətirmişdi, sonra da Dəmiryol idarəsinin rəhbəri təyin elədi. O da başımıza belə oyun açdı. Hətta ona da razılaşdım ki, sökülürsə, bir məktub verilsin ki, dövlət əhəmiyyətli iş görülür, ona görə eləyirlər.. Bundan da imtina elədilər. Aramızda böyük söz-söhbət oldu. Mən bu dərəcədə gözləmirdim. Əmlakımı sökəndə belə, xəbərim olmadı”.
“Günün birində bu bandanın dağılmasını gözləyirdim”
Elmahir Rzayev danışır ki, həmin obyekt dülgər sexi kimi fəaliyyət göstərirdi. Oradan özü də daxil olmaqla, xeyli adam evinə çörək pulu aparırdı. Onun sözlərinə görə, Vasif Talıbovun rəhbərliyi dövründə Naxçıvanda vəziyyət eləydi ki, insanların başına nə oyun açılsa da, adamlar səsini çıxara bilmirdi:
“Ona görə də səbr edib, günün birində bu bandanın dağılmasını gözləyirdim. Nəhayət, o gün gəlib çıxdı. 2022-ci il dekabrın 6-da Dövlət Təhlükəsizliyi Xidmətinin Naxçıvan şöbəsinə ərizə verdim. Oradan bir nəfər nümayəndə mənimlə görüşdü. Bütün sənədləri ona verdim. Uzun illər dəmiryolunda işləmişəm, bütün bildiklərimi danışdım. Hətta obyektimin yerinə də apardım. Gördü ki, obyektimi söküblər, yerində heç ağac da əkməyiblər. Üstündən uzun müddət keçəndən sonra – fevral ayında mənə dedi ki, o iş bizlik deyil. Prokurorluğa da getmişdim. Sonra Ali Məclisə müraciət elədim. Aprelin 4-də səlahiyyətli nümayəndəyə teleqram göndərdim. Xahiş elədim ki, məni qəbul eləsin. O da qəbul eləmədi…”.
“Düşünürəm ki, bu ölkənin yiyəsi var”
Naxçıvan MR-dakı yeni məmurlardan da ümidini üzdüyünü deyən Elmahir Rzayev vurğulayıb ki, ona qarşı bu cür davranış həm də qürurunu zədələyib. Onun sözlərinə görə, məmurların belə münasibəti qarşısında özünü alçalmış hiss edir:
“Onsuz da 20 ildir o əmlakı itirmişəm. Banda dağılandan sonra bir ümid yaranmışdı. Bu cür davranışla o ümidi öldürməklə yanaşı, həm də məni alçaltmış oldular. Mən düşünürəm ki, bu ölkənin yiyəsi var. Ona görə prezidentə, Mehriban xanıma müraciət etmək istəyirəm. Mən nə istəyirəm ki?! Özümün olanı, əlimdən zorla alınanı istəyirəm də. Çox təəssüf ki, vicdan deyilən şey hər adamda olmur. Mən bu yaşımda niyə bu vəziyyətə qalmalıyam?”.
Ötən həftə bir tədbirdə dəvətli olaraq iştirak edirdim. Mənim əyləşdiyim masada çox yaxınımda iki şəhid anası əyləşmişdi. Hər ikisi əsəbi və yorğun görünürdü. Çıxış edənlərdən biri 'şəhid ailələrinə göstərilən diqqət və qayğı"dan bəhs etməyə yenicə başlamışdı ki, analarını ikisi də daha dözə bilməyib gileylənməyə başladılar.
Hər ikisi unudulduqlarından, övladlarının şəhidlik zirvəsinə ucalmasından sonra təqribən bir il hörmət, qayğı görsələr də, sonradan tədricən o, qayğıların azaldılmasından narazılıq edirdilər.
Soruşdum hansı rayon ərazisində yaşayırsınız, onlardan biri əslən Şamaxı rayonundan olduğunu və Suraxanı rayonu Hövsan qəsəbəsində yaşadığını dedi.
Bütün Şamaxı sakinləri kimi ana da Şamaxı rayonunu Milli Məclisdə güya təmsil edən Tamam Cəfərovanın yalnız adını eşitdiyini, ümumiyyətlə o, rayonun rəhbərliyindən heçolmasa mənəvi dəstək belə görmədiklərini dedi.
Suraxanı rayonuna gəldikdə isə...
Bəli, burda da vəziyyət heç də Suraxanı rayon İcra Hakimiyyətinin rəsmi səhifəsində paylaşılan xəbərlər qədər təqdirəlayiq deyil.
2021-ci ilin dəqiq xatırlamıram yanvar, yoxsa fevral ayı idi Suraxanı rayonunda bir şəhid məclisində olarkən, 1-2 şəhid ailəsi icra başçısı barəsində gözəl sözlər deyərək, ondan razılıq etmişdilər.
O, zaman da "DogruXeber.az" adımızın məsuliyyəti ilə tədbir barəsində yazdığım materialda Əziz Əzizovun da adını xüsusi qeyd edərək, şəninə təriflər yazmışdım.
Əslində bu gün də o cür yazmaq istərdim, amma...
Bəli, bu əmmanı yaradan son vaxtlar şəhid ailələrinə qarşı diqqət və qayğıda "simic"lik edən rayon rəhbəri Əziz Əzizovun özüdür.
Anadan soruşdum ki, "axı orada mən tədbirdə olanda bir neçə nəfər razılıq edirdi.
Ananın verdiyi cavab bu oldu ki, "əvvəllər eləydi, sonradan yaddan çıxdıq. İndi mənim yaşadığım küçə bərbad gündədir, dəfələrlə müraciət etmişəm, düzəltmirlər. Azəravtoyol-a da müraciət etmişəm, elə deyirlər düzəldəcəyik, amma dəyişən bir şey yoxdur".
Azəravtoyol-a müraciət etmək sizcə ananın işi idi?
Rəhbərlik etdiyi ərazi sakinlərinin problemlərini aidiyyatı qurumlardan tələb etmək rayon rəhbərliyinin, ərazi üzrə millət vəkilinin işi deyilmi?
Amma, dəfələrlə icra hakimiyyətinə müraciət edib, hər dəfə vədlərlə yola salınan ana özü əlacsız qalıb aidiyyatı qurumlara müraciət edib.
Adətim üzrə yazını yazmadan öncə Əziz Əzizovun barəsində internet üzərindən kiçik araşdırma apardım.
Tramvay ustası işləməkdən başlayıb, işini mühəndisliyə, ardından sahibkarlığa qədər böyüdən Əzizov, sahibkarlıqdan birbaşa keçid edib Cəlilabad rayon İcra Hakimiyyətinin başçısı vəzifəsinə.
Sizcə bu təsadüfdürmü?
Əlbəttə yox, Kərəm Həsənov kimi "day-dayı" olduğu deyilən Əzizovun heç xüsusilə ilk dəfə Cəlilabad rayonuna başçı getməsi də təsadüf deyil.
Yerli medianın yazdığına görə sahibkar fəaliyyəti olan Əzizov bu rayonda özünə böyük fermer təsərrüfatları qurub, rayonun problemlərindən çox özünün və himayədarının təsərrüfatlarına nəzarət edib. Hətta, saytların yazdığına görə onun sözügedən rayonda özünə məxsus şərab zavodu belə var.
Orada torpaq sahələrinin qanunsuz satışı ilə xeyli sərvət toplayan Əzizovun "bezrazmer" nəfsi o yerə gətirib çıxardı ki, vətəndaşlara məxsus pay torpaqlarını da müxtəlif yollarla əllərindən alıb, bir başqalarına satacaq qədər "gözü böyüdü".
Hətta, deyəsən bir ara "nəfsi başına bəla olmuşdu ". Yerli medianın yazdığına görə, iş adamı Fərhad Əliyevin biznesinə yiyələnmək istəyi Əzizova "cızza" təsiri bağışlamışdı. Necə deyərlər, "daş qayaya rast gəlmişdi".
Ümumiyyətlə, Əzizovun Cəlilabad rayon İcra Hakimiyyətinin başçısı olduğu illərdə xeyli sayda Cəlilabad sakinləri dərdini götürüb mətbuata axışmışdı. Onlardan "Kanal14"ə danışan Hüseynov Aydın İman oğlu və Hüseynov Aqşin Aydın oğlunun Əzizov haqqında, "biz onu Alverçi" kimi tanıyırıq deməsinə səbəb, onların da rəsmi sənədlər əsasında özlərinə məxsus olan pay torpaqlarının əllərindən alınıb, başqasına satılması idi.
"Şikayətim "İrşad Elektroniks"dəndir. Artıq 1 aydır kompüteri təmirə vermişəm. Zəng edib məlumat istəyirəm, deyirlər müqavilədə yazılıb, siz qol çəkmisiniz... təmir 2-45 iş gününə qədər çəkə bilər". DİA.AZ bildirir ki, bu barədə "Müştərinin Səsi" sosial qrupundakı paylaşımında Fərid Behbudov adlı istifadəçi giley edir.
Narazı vətəndaş daha sonra yazır: "Sadə bir problem üçün mən niyə 45 iş günü gözləməliyəm?! Bu nə qeyri-peşəkarlıqdır?! Ümumiyyətlə təmir xidmətiniz çox aşağı səviyyədədir. Heç kəsə sizdən kompüter almağı məsləhət görmürəm. Onlarda da oxşar hal yaranarsa, mənim kimi sürünəcəklər. Siz düşünmürsünüz ki, məhsul ehtiyaca əsasən alınıb, yəqin ki, hər hansı bir iş üçün istifadə olunur. Mən indi 45 iş günü gözləməliyəm ki, siz təmir edib, qaytarasınız. Mən bir də sizdən məhsul almaram, nə də dost-tanışıma sizi məsləhət görmərəm".
İddia olunanlarla bağlı teref.az olaraq qarşı tərəfi də dinləməyə hazırıq...
Şikayətlərin yuxarı instansiyaya göndərilməsindən imtina edilir
İstehlakçı hüquqlarının pozulmasının məhkəmə müdafiəsi ilə bərpa edilməsi və dəyən maddi-mənəvi ziyanın ödənilməsi “İstehlakçıların hüquqlarının müdafiəsi haqqında” qanunun tələbi olsa da , məhkəmələr qanunla üzərlərinə qoyulan görəvi yox, hüquq pozucularının sifarişini icra edirlər. İstehlakçı müdafiə üçün məhkəməyə müraciət edəndə elə özbaşınalıqla, elə süründürməçiliklə, elə hüquq bərabərsizliyi ilə üzləşir ki! Özbaşınalıq o həddə çatıb ki, təbii inhisarçı xidmət qurumlarının mülki müqavilə öhdəliklərini , texniki şərti qanunsuz ödəniş tələb edib illərdir icra etməmələri özbaşınalığı ümumi (publik) hüquq (özbaşınılığı) sayılır !(?)
Təbii inhisarçı xidmət qurumunun özünün verdiyi 03.04.2017-ci il tarixli texniki şərti 7-ci ildir qanunsuz ödəniş- rüşvət tələb edib icra etməkdən imtinasına nə inzibati qaydada, nə də məhkəmə qaydasında hüquqi qiymət verilir. Sabunçu məhkəməsi istehlakçı iddiaçının hüququna elə qadağa qoyub ki, 14 ay qabaq məhkəməyə təqdim edilən iddia ərizəsini dəftərxanadan yoxa çıxarıb. Hətta bir il sonra “e-məhkəmə” sistemindən verilən iddianı da on gündən sonra Məhkəmə Hüquq Şurası “tapıb gün işığına” çıxarıb. Hakim Adilə Paşayeva bu yol məhkəmə qadağasının yeni metodunu icraata xitam verməklə tətbiq edib. Guya cavabdehin texniki şərti 201.72 manat rüşvət tələb edib icra etməkdən imtina etməsi ümumi (publik) hüquq sahəsinə aid hərəkət- özbaşınalıqdır və mülki məhkəmə icraatına yanlış götürülüb, inzibati məhkəmədə baxılmalıdır. Yuxarı instansiyanın- Bakı Apellyasiya Məhkəməsinin Mülki Kollegiyasının (sədrlik edən Günay Axundova, Cəmilə Musayeva və Fuad Babayev) yazılı icraat qaydasında qəbul etdiyi qərardad da aşağı instansiyanı haqlı sayıb. Hüquqa, haqqa, ədalətə baxın, fiziki şəxs Qarabağ əlili bağını sosial infrastrukturla təmin etmək üçün təbii inhisarçı xidmət qurumu ilə mülki müqavilə bağlayıb, 03.04.2017 tarixli texniki şərt alıb. Xidmət qurumu əlil-istehlakçı qarşısında götürdüyü mülki öhdəliyi – texniki şərti icra etmək yerinə, qanuna qarşı çıxaraq 201.72 manat şişirtmə ödəniş tələb edib, 7 ildir icradan imtina edir, bəyəm bu ümumi hüquq sahəsinə aiddir? Bəyəm sayğacın özünün pulsuz olduğu vurğulanan texniki şərtdə sayğac qutusuna görə 35 manat tələb edilməsi ümumi (publik) hüquq özbaşınalığıdır?
Hələ ki, iki instansiya 201.72 manatlıq rüşvətə görə xidmət göstərilməsindən, işin görülməsindən, texniki şərtin- müqavilənin yerinə yetirilməsindən imtinanı ümumi (publik) özbaşınalıq sayır. Görək, Ali Məhkəmə xüsusi hüquqla ümumi hüququn fərqini aşağı instansiyalara anlada biləcək? Dövlət hesabına vəkillə təminata qadağa qoyulmasa, biləcəyik.
Məhkəmə müdafiəsi hüququna qadağaların elə metodları üzə çıxır ki, eldə deyildiyi kimi, əlin üzündə qalır. “Əli üzdə qoyan” məhkəmə metodlarından bir neçəsini diqqətə çatdırırıq, bəlkə “əlin üzdən üzülməsinə” yardım edə:
Nizami məhkəməsinin hakimi Ülkər Yusifova MPM-də qərardaddan şikayətə baxılmasına hüquqi normanı – MPM-in 269-cu maddəsini “tapmayıb”, qətnamədən şikayətvermənin 361-ci maddəsini analoji norma kimi tətbiq edib, şikayəti Bakı Apellyasiya Məhkəməsinə göndərməkdən bir aydır imtina edir . Səbail məhkəməsinin hakimi İlkin Rüstəmli isə qətnamədən şikayətin apellyasiya instansiyasına göndərilməsinə qadağa qoyub. Bakı İnzibati Məhkəməsinə Sabunçu məhkəməsindən 4 ildir ləğv edilən işini icraata götürüb, it-bata salmağa ezam olunan Rüstəm Kərimli “rüşvətə hakimliyini elə peşəkarlıqla “ yerinə yetirib ki, 5191 saylı işi tamam sistemdən çıxarıb.
Məğrur Bədəlsoy
Teref.az
Azərbaycan Qida Təhlükəsizliyi İnstitutunun yeni rəhbəri Əli Nəbiyev təmsil etdiyi qurumda işçiləri üçün yeni qaydalar tətbiq edib. TEREF.AZ JAMAZ.İNFO-ya istinadən xəbər verir ki, həmin qaydalara əsasən AQTİ-də çalışan xanım və kişi işçilər işə gələrkən, istədikləri kimi geyinə bilməzlər.
Əldə elədiyimiz məlumata görə, Nəbiyev institutun bütün şöbələrində və filiallarda dresskod təyin edib. Onun tapşırığına əsasən qadınlar işə ağ köynək və qara yubkada gəlməlidir. Rəngli paltar geyinmək isə qadağan olunub.
Mənbəmiz bildirir ki, Əli Nəbiyevin tapşırığına əsasən rəngli paltar geyinənlər işə burxılmır. “Yalnız ağ və qara rənglərə icazə verilir. Rəngli paltar geyinənlər işə buraxılmır. Məsələ ondadır ki, onsuz da hamı işdə ağ xalat geyinir. Evdən işə necə gedib, gəlməkləri, saç düzümü və geyim tərzi ilə bağlı göstərişlər insanlarda narazılıq yaradıb”.
Maraqlıdır ki, AQTİ-nin rəhbəri analoji qadağanı kişilər üçün də tətbiq edib. Onlar da qara və ağ paltardan başqa heç nə geyinə bilməzlər.
AQTİ-nin işçiləri arasında belə bir söz də yayılıb ki, Əli Nəbiyev ixtisasca hüquqşünas olduğundan, yeni qanunlar qəbul etməyə maraqlıdır.
Məsələ ilə bağlı qarşı tərəfin də mövqeyini dərc etməyə hazırıq.
Elm və təhsil naziri Emin Əmrullayevin personası ətrafında başlayan müzakirələr səngimək bilmir. Təhsil sistemində baş verən neqativ halların ictimailəşdirilməsi gənc nazirin karyerası üçün ciddi təhlükə yaradıb.
Yenisabah.az bildirir ki, E.Əmrullayev hazırda ölkədə ən çox tənqid olunan hökumət üzvüdür. Nazir təkcə müstəqil və müxalifət mətbuatının, təhsil ekspertlərinin deyil, həm də Milli Məclisin deputatlarının, o cümlədən tabeliyində çalışan ayrı-ayrı şəxslərin də hədəfindədir. Təhsil sektorunda çalışan ayrı-ayrı adamlar tez-tez mətbuatda və sosial şəbəkələrdə nazirin ünvanına tənqidi fikirlər səsləndirirlər. MİQ imtahanları zamanı isə tənqidin dozası bir qədər artırıldı. Hətta imtahan suallarının əvvəlcədən nazirə yaxın kursların iştirakçılarına paylanmasına dair iddialar rəngləri bir qədər də tündləşdirdi.
“Yeni Sabah”ın əldə etdiyi məlumata görə, indi yaxın ətrafı da E.Əmrullayevin mövqeyinin sarsıldığının fərqindədir. Hətta bu üzdən onu əvəzləmək iddiasına düşənlər də var.
Elm və Təhsil Nazirliyindəki (ETN) mənbələrdən saytımıza daxil olan məlumata görə, hazırda bu qurumun rəhbərliyində təmsil olunan 2 nəfər – nazir müavini Həsən Həsənli və ETN-nin Aparat rəhbəri Mətin Kərimli E.Əmrullayevin yerinə keçməyə iddialıdır.
Mənbə təhsil sektorunda yeni parlayan bu şəxslərin kifayət qədər ciddi qüvvələr tərəfindən himayə olunduğunu bildirib. Onun sözlərinə görə, 32 yaşlı H.Həsənli gənc olmasına rəğmən, təhsil sistemində xeyli məsafə qət edə bilib. O, əvvəlcə ETN-də mütəxəssis, sektor müdiri, sonra isə nazirin müşaviri, Aparat rəhbərinin müavini, Təhsildə Keyfiyyət Təminatı Agentliyinin (TKTA) İdarə Heyətinin sədri vəzifələrində çalışıb. 2021-ci ilin iyun ayından 2023-cü ilin 30 yanvar tarixinədək ETN-nin Aparat rəhbəri vəzifəsini tutub.
1991-ci ildə Naxçıvan şəhərində anadan olan H.Həsənli təhsil sahəsində ciddi mövqelərə sahib olmağa can atan “Naxçıvan klanı”nın son vaxtlar ən çox “stavka” etdiyi gənc və perspektivli kadrlardan biridir. H.Həsənli muxtar respublikada kifayət qədər tanınan bir nəslin təmsilçisidir. Onun babası Namiq Həsənov Naxçıvan Ali Məclisinin sabiq sədri olub. Atası Həbib Həsənov isə uzun müddət Dövlət Avtomobil Nəqliyyatı Xidmətinə (DANX) rəhbərlik edib. Bu amilləri nəzərdən keçirəndə E.Əmrullayevin gənc rəqibinin kifayət qədər ciddi resurslara malik olduğunu söyləmək mümkündür.
Nazirin digər rəqibi M.Kərimli də hakimiyyətdə ciddi dayaqlara malik olan şəxs kimi xarakterizə edilir. Onun bioqrafiyası nəinki H.Həsənlidən, hətta nazirin özünün bioqrafiyasından da zəngindir. 1999-cu ildə Bakı Dövlət Universitetinin Beynəlxalq əlaqələr fakültəsini bitirən M. Kərimli 2000–2001-ci illərdə Fransanın Strasburq Universitetində Avropa elmləri üzrə fənlərarası diplom, 2001–2002-ci illərdə Avropa elmləri üzrə magistr dərəcəsi alıb. O, 2012-ci ildə Harvard Universitetini dövlət idarəetməsi ixtisası üzrə magistr dərəcəsi ilə bitirib.
Mətin Kərimli Azərbaycan Gənclər Təşkilatları Milli Şurasının vitse-prezidenti, NATO-nun Müdafiə Siyasəti və Planlaşdırma İdarəsinin Beynəlxalq Katibliyində tərəfdaşlıq zabiti, Azərbaycanın NATO yanında nümayəndəliyində ikinci katib olub. Bundan başqa, Xarici İşlər və Vergilər nazirliklərində müxtəlif vəzifələrdə çalışıb.
O, 2014-2020-ci illərdə Əmək və əhalinin sosial müdafiəsi nazirinin müavini vəzifəsində çalışıb. 2020-ci ilin yanvar ayından Beynəlxalq Əmək Təşkilatının Sakit okean hövzəsi ölkələri üzrə ofisinin direktoru olub.
M.Kərimli Azərbaycan dili ilə yanaşı, ingilis, fransız, rus və ispan dillərini də bilir.
Qeyd edək ki, zəngin bioqrafiyaya malik olan M. Kərimlinin şansını artıran digər mühüm amil isə qardaşı İnam Kərimovun Azərbaycan Respublikası Ali Məhkəməsinin sədri vəzifəsində çalışmasıdır.
Həsənli-Kərimli cütlüyünün E.Əmrullayevi devirməyə gücü çatacaqmı? Hazırda bu suala birmənalı cavab vermək çətin olsa da, nazirin postunu uzun müddət qoruya biləcəyi inandırıcı görünmür. E.Əmrullayevin imicinin zədələnməsində nazirlikdəki rəqiblərinin də müəyyən qədər rol oynadığı bildirilir. ETN-də kifayət qədər yüksək post tutan bu şəxslərin “mətbəx”ə aid bəzi informasiyaların mediaya sızdırılmasına göz yumduğu deyilir.