Prezident İlham Əliyevə məktub

Möhtərəm Prezident, başınızın beynəlxalq problemlərə, xüsusilə Qarabağda yaşanan erməni özbaşınalıqlarına qarışdığı bir zamanda Sizə bu məktubu yazıb-yazmamaq barədə çox düşündüm. Sonunda yazmağa qərar verdim. Çünki istəmirəm ki, sabah beynəlxalq arenada bir də mənim şikayətim sürprizi ilə qarşılaşasınız. Nə yazıq ki, Sizin savadına, təcrübəsinə arxayın olub hakim təyin etdikləriniz məni Avropa İnsan Hüquqları Məhkəməsinə müraciət etmək məcburiyyətində buraxmağa çalışırlar.
Məlumdur ki, Siz hələ 2020-ci ilin may ayının ilk günü Baş Prokuror Kamran Əliyevlə video-söhbətiniz zamanı ona bir sıra hüquqi məsləhətlər vermişdiniz. Məsləhətləriniz əsasən hüququn aliliyi və ədalətli məhkəmə islahatları ilə bağlı olmuşdu. Sözsüz ki, siz bu sözləri deyərkən üzünüzü Kamran Əliyevə tutsanız da, həm də məhkəmə hakimlərinə öz fikirlərinizi çatdırmışdınız. Sözünüzün sonunda onu da əlavə etmişdiniz ki, hakimlər milli maraqları, vətənpərvərlik hisslərini ön planda tutmalıdırlar. Təəssüf edirəm ki, Suraxanı rayon Məhkəməsinin mənim barəmdə çıxardığı qərar nəinki hüquqa, həm də milli maraqlara sığmır. Ən azı o səbəbdən ki, mən məhkəmə predmeti olan yazı və müsahibələrimdə öz fərdi ambisiyamdan yox, dövlətçilik maraqlarından çıxış etmişdim. Naxçıvanda yaşanan dövlətçilik ənənələrinə zidd problemlərdən danışıb bir çox naqisliklərin ortadan qaldırılması məsələsini gündəmə gətirmişdim. Naxçıvanın o zamankı hakimiyyəti isə mənim qarşıma öz trol dəstələrini çıxarıb şəxsiyyətimi alçaltmaq və təhqir yoluyla məni öz mövqeyimdən çəkindirməyə çalışmışdı. Mən də onlara məcburən cavab vermişdim.
Sizə o zamanki hadisələri nəql etməklə dəyərli vaxtınızı almaq istəmirəm. Sadəcə onu vurğulamaq istəyirəm ki, mənim bu vətənpərvərlik hissimdən doğan təşəbbüsüm Suraxanı rayon Məhkəməsi tərəfindən cinayət əməli kimi cəzalandırıldı. Sanki öz ölkəsini sevmək və onun ərazi bütövlüyü uğrunda qələmi ilə mübarizə aparmaq cinayət imiş.
Bunlar öz yerində. Dərd burasındadır ki, barəmdə çıxarılan hökmdə yerli və beynəlxalq hüquqa zidd bir sıra qanun pozuntuları mövcuddur. Yerli qanunlara zidd pozuntuları bir kənara atıram. Çünki Avropa İnsan Hüquqları Məhkəməsinə müraciət edəcəyim təqdirdə əsasən beynəlxalq hüquqi aktlara istinadən yekun qərar çıxaracaqlar. Açığı, öz dövlətimi məhkəməyə vermək xəcalətini yaşamamaq üçün bu gün Sizə müraciət etməyi daha məqsədəuyğun hal olaraq qiymətləndirdim.
İndi isə Sizə həmin məhkəmə hökmündə yalnız beynəlxalq hüquq normaları pozuntularına dair neçə məlumatı vermək istəyirəm.
Avropa Konvensiyasının pozuntuları
Cənab Prezident, Azərbaycan Konstitusiyasının 12-ci maddəsinin I-ci hissəsi deyir ki, insan və vətəndaş hüquqlarının və azadlıqlarının təmin edilməsi dövlətin ali məqsədidir. Konstitusiyanın 12-ci maddəsinin II hissəsinə görə, bu hüquq aktında sadalanan insan və vətəndaş hüquqları və azadlıqları Azərbaycan Respublikasının tərəfdar çıxdığı beynəlxalq müqavilələrə uyğun tətbiq edilir. Beynəlxalq müqavilələr Azərbaycan qanunvericiliyinin tərkib hissəsidir və normativ hüquqi aktlar iyerarxiyasında Azərbaycan Respublikasının Konstitusiyası və referendumla qəbul edilən aktlardan sonrakı yeri tuturlar. Yəni barəmdə hökm çıxarılan Azərbaycan Respublikası Cinayət Məcəlləsi və Mülki Məcəllədən daha üstün dəyərdir.
Konstitusiyanın 151-ci maddəsinə görə, Azərbaycan Respublikasının qanunvericilik sisteminə daxil olan normativ hüquqi aktlar ilə (Azərbaycan Respublikasının Konstitusiyası və referendumla qəbul edilən aktlar istisna olmaqla) Azərbaycan Respublikasının tərəfdar çıxdığı dövlətlərarası müqavilələr arasında ziddiyyәt yaranarsa, həmin iş üzrə beynəlxalq müqavilələr tətbiq edilir. İnsan haqları ilə bağlı Azərbaycanın tərəfdar çıxdığı ən önəmli beynəlxalq müqavilələrdən biri isə İnsan Haqları və Əsas Azadlıqlarının Qorunması Haqqında Avropa Konvensiyasıdır.
Azərbaycan Ali Məhkəməsinin Plenumunun 30 mart 2006-cı il tarixli qərarı da bu faktı təsdiqləyir. Qərarda vurğulanır ki, yerli qanunvericiliklə Avropa Konvensiyası və Avropa Məhkəməsinin qərarları arasında ziddiyyət yaranarsa Konvensiya və Avropa məhkəməsinin qərarları əsas götürülməlidr.
Suraxanı rayon Məhkəməsi isə Azərbaycan Respublikası Konstitusiyasında qeyd edilən bu maddələrə istinad etməyib, çıxarılan məhkəmə hökmündə Avropa İnsan Haqları Konvensiyasının 10-cu maddəsinin adını çəkilsə də ona üzdən və formal yanaşılıb, yanlış şərh edilib. Avropa Konvensiyasının 10-cu maddəsinin tətbiqi ilə bağlı Avropa İnsan Haqları Məhkəməsinin uyğun standartları ümumiyyətlə nəzərdən qaçırılıb.
Konvensiyanın 10-cu maddəsinin (ifadə azadlığı) pozuntusu
Konvensiyanın ifadə azadlığı hüququnu təminat altına alan 10-cu maddəsinə görə, hər kəsin öz düşüncəsini azad ifadə etmək haqqı var. Təbii ki, bəzi istisnalarla. Konvensiya ifadə azadlığına müdaxılə üçün yalnız bu məqsədləri legitim sayır: a) milli təhlükəsizlik, ərazi bütövlüyü və ictimai qaydanın qorunması; b) iğtişaşların və cinayətlərin qarşısının alınması; c) əhalinin sağlamlığın və mənəviyyatın qorunması; d)başqa şəxslərin nüfuzunun və haqlarının qorunması; e) etibar edilmiş bilgilərin açıqlanmasının qarşısının alınması; f) məhkəmələrin nüfuzunun və tərəfsizliyinin təmin olunması.
Göründüyü kimi, Avropa Konvensiyası da ifadə azadlığının məhdudlaşdırılmasına yol verir. Bununla belə, ifadə azadlığını məhdudlaşdırarkən, dövlət arxayın olmalıdır ki, bu məhdudlaşdırma: a) yuxarıda saydığımız legitim məqsədlərin ən azı birindən irəli gəlir; b) belə məhdudlaşdırma dövlətin iç qanunlarında aydın ifadə olunub və hamının bu qanunlardan xəbər tutmasına imkan yaradılıb; c) hər hansı məhdudlaşdırma “demokratik toplumda zəruru” olmaq sınağından keçə bilməlidir.
Cənab Prezident, nəzərinizə çatdırım ki, mənə məhkəmə tərəfindən cinayət cəzası kəsilib. Halbuki Avropa Konvensiyası, Avropa Məhkəməsinin presedent hüququ fikir azadlığı sahəsində bunu açıq şəkildə yolverilməz sayır. Məsələn, AİHM “Şener Türkiyəyə qarşı” işi üzrə qərarında vurğulayıb ki, “Söz azadlığına cinayət hüququ ilə müdaxilə bütün hallarda Konvensiyanın 10-cu maddəsini pozur. Hətta cəza təyin edilməsə belə”.
Doğrudur ki, Suraxanı rayon Məhkəməsinin hökmü mənim ifadə azadlığı hüququndan yararlanmağımı əngəlləmir. Ancaq Avropa Məhkəməsi Suraxanı rayon Məhkəməsinin hökmündə də istinad edilmiş “Lingens Avstriyaya qarşı” işi üzrə qərarında cinayət cəzası kimi jurnalistə kiçik cərimə cəzasının verilməsini belə yolverilməz sayır: “Müəllifə tətbiq edilmiş cəza onun özünü ifadə etməsinə mane olmasa da, gələcəkdə bu cür tənqid bildirməkdən çəkindirə biləcək senzuranın bir növünü təşkil edir... Siyasi müzakirələr kontekstində bu cür cəza tədbiri böyük ehtimalla jurnalistlərin ictimaiyyətin həyatına təsir edən məsələlərin ictimai müzakirəsinə töhfə verməsinin qarşısını alır. Eyni zamanda bu cür sanksiya mətbuatın məlumat təminatçısı və ictimai nəzarətçi kimi öz vəzifələrini yerinə yetirməsinə maneə olur”.
Avropa Məhkəməsi “Cumpana və Mazare Rumıniyaya qarşı” işində jurnalistlərə düşüncələrinə görə cinayət cəzalarının tətbiqinə sərt və aydın məhdudiyyətlər qoyub: “Hökm vermənin prinsipcə milli məhkəmələrin işi olmasına baxmayaraq, Məhkəmə hesab edir ki, mediada deffamasiyaya görə cinayət cəzasının tətbiq edilməsi yalnız bəzi hallarda - xüsusən digər fundamental insan hüquqlarının əhəmiyyətli şəkildə pozulduğu nifrət nitqi və ya zorakılığa çağırış zamanı jurnalistlərin Konvensiyanın 10-cu Maddəsi ilə təmin edilən ifadə azadlığı ilə bir araya sığır... İctimai maraq doğuran məsələ ilə bağlı müzakirə kontekstində klassik fərdi deffamasiya işində - hadisələr cinayət cəzasının tətbiqinə heç bir bəraət qazandırmır.”
AİHM bu mövqeyini Azərbaycanla bağlı ifadə azadlığı hüququnun pozuntusundan bəhs edən bütün qərarlarında dəfələrlə təkrarlayıb, ifadə azadlığı hüququnun pozuntusunu tanıyıb və dövlətin üzərinə ərizəçilərə kompensasiya ödəmək vəzifəsi qoyub. Bu barədə çıxarılan məhkəmə hökmlərini sadalamaq istəmirəm.
Sadəcə onu vurğulamaq istəyirəm ki, Suraxanı rayon Məhkəməsinin çıxışlarıma, paylaşımlarıma görə məni cinayət cəzasına məhkum etməsi Konvensiyanın 10-cu maddəsi ilə təminat altına alınan ifadə azadlığı hüququmun pozulması deməkdir.
Konvensiyanın 6-cı maddəsinin (ədalətli məhkəmə araşdırması) pozuntusu
Avropa Konvensiyasının 6-cı maddəsi hər kəsin ədalətli məhkəmə araşdırması hüququnu təminat altına alır. Həmin maddəyə görə, “Hər kəs, ... müstəqil və qərəzsiz məhkəmə vasitəsi ilə, ağlabatan müddətdə işinin ədalətli və açıq araşdırılması hüququna malikdir. Məhkəmə qərarı açıq elan edilir...”.
Bu maddədə nəzərdə tutulan “Qərəzsiz məhkəmə” prinsipinin pozulması
Göründüyü kimi, Konvensiyanın 6-cı maddəsi "məhkəmənin" qərəzsiz olmasını tələb edir. Qərəzsizlik, bir qayda olaraq, tərəfgir və ya qeyri-obyektiv olmamaq mənasına gəlir.
Mənim məhkəmə işimdə isə açıq-aşkar hakim qərəzçiliyi hiss olunur. Belə ki, xüsusi ittihamçının bir neçə il əvvəl paylaşıdığı facebook statusunun foto surətini məhkəmə təqdim etmişdim. Ancaq həmin sübut məhkəmənin hökmündə ümumiyyətlə görünmür, deməli, məhkəmə heç bir əsas olmadan mənim sübutlarımı qəbul etməyib və niyə qəbul etmədiyini əsaslandırmayıb da.
Bu işdə xüsusi ittihamçı mənim qonaq olduğum 2 saata yaxın davam edən video proqramdan kiçik paraçaları kəsib sübut kimi məhkəməyə təqdim edib. Yəni fikrimi ümumi kontekstdən çıxarıb. Mən proses boyunca dəfələrlə məhkəməyə xüsusi ittihamçının təqdim etdiyi sübutların mötəbər olmadığını, proqramdan kiçik çıxarışların böhtanın sübutu kimi qəbul olunmasının doğru sayıla bilməyəcəyini bildirmiş, proqramın tamamına baxılmasını tələb etmişdim. Mənim bu tələblərimin heç birini qəbul etməyən məhkəmə hökm verərkən, bu da azmış kimi xüsusi ittihamçının bir neçə il əvvəl paylaşıdığı paylaşımın foto surətini də vacib sübut kimi mötəbər saymayıb. Bu yanaşma, məhkəmənin tərəflərə obyektiv yox, qərəzli və tərəfgir yanaşdığını təsdiqləyir.
Əsaslandırılmış məhkəmə qərarı hüququmun pozulması
Suraxanı rayon Məhkəməsi öz hökmündə mənim tərəfimdən davamlı olaraq qaldırılan arqumentlərə qəti şəkildə münasibət bildirməməklə əsaslandırılmış məhkəmə qərarı hüququmu da pozub.
AİHM-in presedent hüququna əsasən, məhkəmələr iş üzrə qaldırılan bütün arqumentlərə detallı cavab vermək məcburiyyətində olmasalar da, hər halda məhkəmə qərarından iş üzrə bütün əsas məsələlərə münasibət bildirildiyi aydın olmalı (“Boldea Rumıniyaya qarş” işi, para. 30) və işin nəticəsi üçün həlledici əhəmiyyətə malik arqumentlərə spesifik və açıq-aydın cavablar verilməlidir (“Moreia Ferreira Portuqaliyaya qarşı” işi (no. 2), para. 84).
Bu işdə isə mən həm yazılı etirazlarımda, həm də şifahi məhkəmə çıxışlarımda məhkəməyə ünvanlanan arqumentlərimdə paylaşılan mübahisəli məzmunun faktual əsaslarının bir neçə il əvvəl məhz xüsusi ittihamçı tərəfindən paylaşıldığını, jurnalist olaraq paylaşılmış məzmun haqda mülahizələrimi ictimaiyyətlə bölüşdüyümü, qanunvericiliyin yalnız yalan, əsası olmayan məlumatların yayılması halında məsuliyyət müəyyən etdiyini vurğulamışdım. Məhkəmə isə həmin arqumentlərin heç birinə münasibət bildirmədən, yalnız xüsusi ittihamçının tələblərini və çıxışlarını təkrarlayaraq, mənim cinayət törətməyimin guya tam sübuta yetirildiyini, buna görə də cinayət və mülki məsuliyyətə cəlb edilməli olduğumu bildirib.
Yeri gəlmişkən onu da deyim ki, məhkəmə prosesi zamanı mənim üzümə oxunan hökmlə, sonradan mənə təqdim olunan yazılı hökm arasında da ciddi fərq var. Yazılı hökmə bir də mənim qarşı tərəfdən üzr istəməyim şərti əlavə olunub ki, bu da ən ciddi prosesual qanun pozuntusudur, faktiki olaraq hökmün qarşı tərəfin lehnə saxtalaşdırılması deməkdir.
Əslində isə məhkəmədə mənim tərəfimdən irəli sürülən arqumentlərin araşdırılması, paylaşılan məzmunun böhtan, ləkələyici olub-olmaması, cinayətin və mülki pozuntunun baş verib-verməməsi müəyyənləşdirilməli, bu faktlar hökm çıxarılarkən həlledici əhəmiyyət kəsb etməli idi. Lakin məhkəmə işin nəticəsi üçün həlledici əhəmiyyətə malik olan və proses boyu təkrarlanan spesifik, davamlı və vacib arqumentlərimi gözardı etdi. Bununla da mənə münasibətdə əsaslandırılmış qərar hüququ pozuntusuna yol verdi.
Cənab Prezident, sadaladığım və sadalamadığım bütün bu qanun pozuntuları onu göstərir ki, AİHM-nə müraciət edəcəyim təqdirdə şikayətimin təmin olunması ehtimalı yüksəkdir. Hətta bəlkə mənə babat təzminat haqqı da tanıya bilərlər. Amma bütün bunlara baxmayaraq, mən öz dövlətimi beynəlxalq məhkəməyə vermək və hələ-hələ onu udmaq istəmirəm. Çünki sabah bu faktlardan yadelli düşmənlərimiz mənim dövlətimin əleyhinə də istifadə edəcəklər. Amma bunun baş verməməsi təkcə məndən asılı deyil. Ümid edirəm ki, Konstitusiyaya görə, hər bir vətəndaşın hüquqlarının və təhlükəsizliyinin qorunması kimi ciddi mükəlləfiyyət daşıyan Siz – ölkə Prezidenti bu mübahisənin Bakıda həllinə nail olunmasına və mənim yad qapısında ədalət axtarışım üçün heç bir zəmin yaradılmamasına çalışacaqsınız. Ən əsası isə, barəmdə bütün beynəlxalq və milli hüquqları pozan məsuliyyətsiz hakim barədə adekvat tədbirlər görəcəksiniz ki, bu, digər hakimlər üçün də ibrət dərsi olsun.
Hörmətlə Heydər Oğuz.

Lənkəran Şəhər İcra hakimiyyəti “Lənkəran şəhər ərazisi üzrə yaşayış sahələrinin fasad və giriş hissələrində aparılacaq bir sıra işlərin satın alınması” ilə bağlı tenderə yekun vurub.

Qaynarinfo xəbər verir ki, tenderin qalibi “Topxana Layihə İnşaat” MMC qalib seçilib. Tərəflər arasında bağlanacaq satınalma müqaviləsinin maliyyə dəyəri 228.861,77 AZN-dir.

İqtisadiyyat Nazirliyi yanında Dövlət Vergi Xidmətinin reyestr məlumatlarına görə, “Topxana Layihə İnşaat” MMC 17 aprel 1996-cı ildə qeydiyyata alınıb. Nizamnamə kapitalı 110 010 AZN olan şirkətin hüquqi ünvanı Bakı şəhəri, Xətai rayonu, Əhmədli qəsəbəsi, Cavanşir küçəsi, ev 27, mənzil 39-da yerləşir. MMC-nin qanuni təmsilçisi Ələkbərov Fuad Vaqif oğludur.

“Topxana Layihə İnşaat” MMC 2021-ci ilədək RRT LTD Firması adı altında fəaliyyət göstərib. Maraqlıdır ki, bu şirkətin qeydiyyata alınma tarixi ilə “Topxana Layihə İnşaat” MMC-nin qeydiyyata alınma tarixi arasında ziddiyyət var. Reyestr məlumatlarında görünür ki, RRT LTD Firması 2007-ci ildə qeydiyyata alınıb. 2021-ci ildə isə adı dəyişdirilərək “Topxana Layihə İnşaat” MMC qoyulub. Əgər “Topxana Layihə İnşaat” MMC RRT LTD Firmasının varisidirsə və sözügedən firma 2007-ci ildə qeydiyyata alınıbsa, o zaman necə olur ki, “Topxana Layihə İnşaat” MMC-nin 1996-cı ildə qeydiyyata alınır? Bu sualın cavabı açıq qalır.

Dövlət satınalmalarının elektron portalında yerləşdirilən məlumatlara nəzər saldıqda “Topxana Layihə İnşaat” MMC-nin tenderlərdə fəal iştirak etdiyi aydın olur. Maraqlıdır ki, şirkət əsasən iri məbləğli tenderlərin qalibi olur.

“Topxana Layihə İnşaat” MMC Naxçıvan nümayəndəliyi də var. Amma nədənsə uzun illərdir fəaliyyə göstərən, iri məbləğli tenderlərin qalibi seçilən, hətta Naxçıvan nümayəndəliyi olan şirkət barəsində açıq mənbələrdə heç bir məlumat yoxdur. Şirkətin əlaqə telefonlarına və internet səhifəsinə də rast gəlinmir.

Şirkətin bu günə qədər Fuad Ələkbərov da daxil dörd nəfər təmsil edib. MMC-nin ilk qanuni təmsilçisi Talıbov Cavanşir Rəşid oğlu, ondan sonra Babayev Asim Kamal oğlu olub. Asim Babayevi Bayramov Əli Kamal oğlu əvəzləyib. Əli Bayramov cari ilin iyun ayında Fuad Ələkbərovla əvəzlənib.

“Topxana Layihə İnşaat” MMC 2023-cü ilin iyun ayına qədər 10 manatlıq nizamnamə kapitalı ilə fəaliyyət göstərib. İyunda nizamnamə kapitalının üzərinə 110 000 AZN əlavə edilib.

Lənkəranda görüləcək işlərə gəlincə, şərtlər toplusunda aydın olur ki, söhbət fasadın rənglənməsi, taxta qapıların sökülməsi, pilləkanların, tavan və meydançaların əhənglə rənglənməsi, dəmir qapılar qoyulması və s. bu kimi xırda təmir işlərindən gedir.

Lənkəran İcra Hakimiyyətinin başçısı Taleh Qaraşovdur. O, 2012-ci ildən bu vəzifədədir. Ümumiyyətlə isə Taleh Qaraşov ən uzun ömürlü icra başçılarından hesab edilir. O. 27 ildir ki, icra başçıcı vəzifəsi daşıyır. Taleh Qaraşov 1996-2002-ci illərdə Kürdəmirin, 2002-2006-cı illərdə Cəlilabadın, 2006-2011-ci illərdə Neftçalanın, 2011-2012-ci illərdə isə Astaranın icra başçısı olub.

"Dünən Lökbatanda yerləşən "Aqrovest-BazarStore" marketdən aldığım "Babaevskiy" şokoladının vəziyyəti.... DİA.AZ bildirir ki, bunu "Müştərinin Səsi" sosial qrupundakı paylaşımında Lalə İsmayılova adlı istifadəçi qeyd edib.

Narazı vətəndaş daha sonra yazır: "İçində qurdlar və hörümçək toru var idi. Başqa ölkədə olsaydı, bu hala görə təzminat davası açmaq olardı. Ehtiyatlı olun!

P.S. Son istifadə tarixi 2024-cü il göstərilib..."

Bu gün narkobiznesdən gələn pullar sabah ölkədə bir çox arzuolunmaz hadisələrin baş verməsinə səbəb ola bilər...

I YAZI

Azərbaycanda 2 ildən artıqdır ki, narkotiklərin qanunsuz dövriyyəsinə və narkomaniyaya qarşı ciddi mübarizə gedir. Demək olar ki, bütün müvafiq qurumlar narkotik ticarətinin qarşısını almaq üçün öz imkanlarını səfərbər ediblər.

Stopnarkotik.az-ın mötəbər qaynaqlardan əldə etdiyi məlumata əsasən, bu məsələdə ən yüksək səviyyədə ortaya iradə qoyulub. Belə ki, Prezident İlham Əliyev ölkədə “narkotik böhranı”nın qarşısını almaq üçün aidiyyəti dövlət strukturlarına ciddi göstərişlər verib. Xüsusilə də, İrandan daxil olan narkotik vasitələrin qarşısını almaq üçün hər bir dövlət qurumuna bütün imkanlarından istifadə etməyi tapşırıb.

Lakin çox təəssüflə qeyd etməliyik ki, ölkə başçısının ciddi tapşırıqlarına və aidiyyəti strukturların ardıcıl tədbirlər həyata keçirməsinə baxmayaraq, Azərbaycanda narkotik ticarətinin və narkomaniyanın kökünü kəsmək mümkün olmur. Hətta əminliklə deyə bilərik ki, bu sahədə vəziyyət günbəgün daha da ağırlaşır. Maraqlıdır, belə olduğu təqdirdə, biz, dövlət olaraq, harada yanlışlığa yol veririk?

Əlbəttə, 44 günlük Qarabağ müharibəsindən sonra İranın Azərbaycana qarşı “narkotik savaşı” apardığı kimsəyə sirr deyil. Yəni demək olar ki, hər gün İrandakı hansısa narkobarona xidmət edən onlarla vətəndaşımızın polis tərəfindən saxlanıldığı, yaxud zaman-zaman ölkəmizə narkotik keçirməyə cəhd edən şəxslərin sərhəddə ələ keçdiyi haqda xəbərlər oxumaqdayıq. Məsələn, Stopnarkotik.az saytının aylıq hesabatına əsasən, təkcə iyun ayında DSX İrandan ölkəmizə 6 fakt üzrə narkotik vasitələrin daxil olmasının qarşısını alıb. May ayında bundan bir qədər də çox olub. Eləcə də Dövlət Gömrük Komitəsi tərəfindən də ay ərzində 1-2 fakt aşkarlandığı bəllidir. Belə olduğu halda, biz molla rejiminin Azərbaycana elan etdiyi “narkotik savaşı”na qarşı mübarizədə harada boşluqlara yol veririk ki, iranlı narkobaronlar və onların ələ aldığı vətəndaşlarımız hələ də ölkədə “ağ ölüm” saçırlar”?!

Sözsüz, indi Azərbaycanda narkotik probleminin səbəbləri ilə bağlı küçə və meydanlarda sorğu aparsaq, respondentlərin böyük əksəriyyəti bu işin arxasında məmurların dayandığını deyəcək. Təsadüfi deyil ki, tez-tez sosial şəbəkələrdə də bu cür fikirlər səsləndirilir və ayrı-ayrı məmurlar ittiham hədəfinə çevrilir. Fərqi yoxdur ki, həmin məmurlar hazırda vəzifə başındadır, yoxsa adları “sabiqlər” siyahısında çəkilir. Əsas odur ki, onlar hələ də ölkədəki proseslərə təsir etmək gücündədirlər.

Bəllidir ki, narkotik böyük pul mənbəyidir. Görünür, narkotik şəbəkəsinə rəhbərlik edən məmurlar da öz bizneslərini məhz pulun gücünə idarə edirlər. Şübhə yoxdur ki, onlar yüksək vəzifələrdə çalışan hansısa şəxsləri də böyük vəsaitlərin qarşılığında özlərinə ortaq edib, yaxud da bu və ya digər şəkildə onlarla “anlaşa” biliblər.

Nəyə görə burada “böyük vəsaitlər”dən söhbət getdiyini iddia edirik? Yuxarıda qeyd etdiyimiz kimi, Azərbaycanda narkotik ticarətinə qarşı mübarizənin başında Prezident dayanır və məhz onun tapşırığı əsasında cəmiyyətimizi bu böhrandan çıxarmaq istiqamətində ardıcıl fəaliyyət həyata keçirilir. Lakin, görünür, narkotik ticarəti hansısa məmurlara külli miqdarda vəsait qazandırdığından, onlar öz nəfslərini saxlaya bilmir, hətta ölkə başçısının tapşırığına qarşı getməyə belə, özlərində cəsarət tapırlar. Bu zaman isə bir şeyi unudurlar ki, gec-tez onlar da öz qanunsuz əməllərinə görə qanun qarşısında cavab verəcəklər...

Burada diqqətçəkən daha bir məqam da var. Qeyd etdiyimiz kimi, narkotik ticarəti onun başında duranlara böyük vəsaitlər qazandırır. Deməli, bu gün həmin ticarətlə məşğul olan istər hazırda vəzifədə olan, istər də keçmiş məmurların əlində külli miqdarda pullar cəmləşib. Bir halda ki, bu gün həmin şəxslər Prezidentə qarşı çıxırlar, deməli, sabah həmin pullar ölkədə bir çox arzuolunmaz hadisələrin baş verməsinə gətirib çıxara bilər. Hər halda, müvafiq qurumlar bu barədə ciddi düşünməlidirlər. Bu gün narkotiklərin qanunsuz dövriyyəsinə və narkomaniyaya qarşı mübarizədə prioritet olan məsələlərdən biri də o olmalıdır ki, ölkədəki narkotik dövriyyəsinin arxasında hansı məmurlar var?! Bir halda ki, Prezident ortaya iradə qoyub, gənclərimizi bu bəladan xilas etmək üçün göstəriş verib, bəs kimlər onun iradəsinə qarşı çıxır?!

Xəbər verdiyimiz kimi, Bakı şəhəri, Xətai rayonu, Afiyəddin Cəlilov küçəsində "Yeni Həyat Şirkətlər” Qrupunun inşaa etdiyi "Park Azure” Yaşayış Kompleksində komunal xərcləri ödəməyən sakinlərin liftdən sitifadəsinə məhdudiyyət qoyulub. Sözügedən binada mənzilinə çıxışı üçün liftə məhdudiyyəti tətbiq edilən şəxslərdən biri də Arzu Əliyevadır.

TEREF.AZ bildirir ki, Arzu Əliyeva Qaynarinfo-ya açıqlamasında "Park Azure” yaşayış kompleksində başına gətirilən oyunlardan və sahibkarın qanunsuz əməllərinə göz yuman dövlət qurumlarından danışıb:

"Mən iki otaqlı mənzilimi satıb, sözügedən binada ilkin ödəniş etməklə ipoteka ilə mənzil sahibi olmuşam. "Park Azure” yaşayış kompleksində əvvəl hər şey normal idi və sonradan burada çox ciddi problemlər başladı. Binada avtomobil qarajları üçün nəzərdə tutulan yerlər sökülərək, ofislərlə əvəzləndi. Tikinti və yanğın təhlükəsizliyi normalarına riayət edilmədən qanunsuz addımlar atılmaqda davam etdi. Səsini çıxaran, haqqını, hüququnu tələb edən vətəndaşları müxtəlif yollarla, hədə-qorxu gələrək susdurmağa çalışırlar. Halbuki, biz ora köçürüləndə binada sakinlər üçün yüksək şərait nəzərdə tutulmuşdu. Sənədləri də buna görə imzaladıq. Adı "Park Azure”dır. Amma uşaqların və böyüklərin həyətə dincəlmələri üçün nə park var, nə həyət var. Həyətin ortasında da tikinti aparılıb. Əslində buranın adı "Park Azure”a yox "Babək Azure” olmalıdır. Avtomobil dayanacağı üçün nəzərdə tutulan yerlər ofis olub və həmin yerlər yüksək məbləğdə icrayə verilir. Problemlər də elə burdan başlayır".

Arzu Əliyeva iddia edib ki, hazırda mənzillərə giriş-çıxış üçün istifadəyə verilən liftlərdən sözügedən qanunsuz tikilən ofislərin işçiləri də istifadə edir:

"Nəticədə mənzillərimizə qalxıb-düşmək üçün liftdən istifadə çətinləşib. Çünki, bir liftə minmək üçün ən azı 15 dəqiqə vaxt lazımdır. Yəni gözləməlisən ki, ofis işçiləri nə vaxt lifti boşaladacaq. Bu bina sakinləri ilə "Park Azure” Yaşayış Kompleksini idarə edənlər arasında ciddi narazılığa səbəb olu"r.

Digər bir tərəfdən Arzu Əliyeva əlavə edib ki, "Park Azure” Yaşayış Kompleksində liftdən istifadə və təmizlik üçün aylıq 104 manat tələb edilir:
"Mən bu kommunal ödənişi etməyə hazıram. Bilirəm ki, binanın ümumi əmlakının saxlanması üçün aylıq xərc lazımdır və bu da qanunvericilik çərçivəsində tənzimlənməlidir. Amma mənə bildirilsin ki, sözügedən vəsait necə hesablanıb, necə formalaşır və "Park Azure” Yaşayış Kompleksinin rəhbərliyi yığılan pulu nəyə xərcləyir? Bunun hesabatını bizə verən yoxdur. Əksinə, liftlərə qanunsuz quraşdırılan kartı pulla satıblar. İstədikləri vaxt lifti dayandırır, açırlar. Nəyə görə bu qanunsuzluğa dövlət qurumları göz yumur? Vətəndaşa göstərilən qərəzli mövqedən belə başa düşülür ki, ölkəmizdə sahibkar nəyi necə istəyir, elə də edə bilər. Mənzilin sahibi mənəm, onlar deyil. Əgər onlardırsa, gətirib verdiyim pulları qaytarsınlar. Mən gedib başqa yerdə yaşayım. Kirayədə qalmıram, evimdə qalıram. Liftdən bütün günü müxtəlif işlər üçün istifadə edilir. Yuxarıda sadaladığım kimi, bizim nə parkımız var, nə həyətimiz. Üstəlik binada anisanitariya höküm sürür. Binanı siçovullar basıb. Burda uşaqlar kiçik bir həyətdə ölən siçovullara əl vururlar. Bu ki infeksiyadır. Binanın padvalı belə icarəyə verilib. Orada çörək sexi açılıb”.

Şikayətçi həmçinin deyib ki, lift borcu olan şəxslərin adı "Park Azure” yaşayış kompleksinin idarəçiləri tərəfindən liftdə kağız üzərində vurulur:
"Mənim adımı, soyadımı başqaları nəyə görə bilməlidir? Övladlarım nəyə görə analarının adını liftdə vurulmasını görməlidir? Bu "qayda” heç bir yerdə yoxdur. Bunu edən "Park Azure” yaşayış kompleksini idarə edən Babək adlı şəxsdir. O, özünü binanın sahibi kimi aparır. Nəyə görə? Axı binada mənzilin sahibi bizik!”.

O, bildirib ki, ad-soyadı liftdə vurulduğu üçün "Park Azure” yaşayış kompleksinin komendatına xəbərdarlıq etsə də, heç bir nəticə olmayıb:
"Əsəbləşib, kağızları cırdım. Sonradan mənimlə bağlı polisə şikayət verildi. İş məhkəməyə gedib çıxdı. Məhkəmədə qarşı tərəf məni həbs etdirmək istəyirdi. Bu məsələ düzgün araşdırlsa, haqqımda verilən qəraralar və inzibati tənbehin qərzəli olduğu açıq-aydın görünər. "Yeni Həyat Şirkətlər Qrupu”nun sədri vəzifəsini müvəqqəti icra edən Babək Babayevin nümayəndəsi Vidadi məhkəmədə iddia etdi ki, guya mən 24 iyun 2023-cü il tarixdə liftdə olan məlumat lövhəsindəki kağızları cıraraq, yaşayış kompleksinin dəhlizinə atıb, monitoru sındırmışam. Həmçinin "reception” bölməsində işləyən Nuranə adlı işçi ilə mübahisə edib, nalayiq ifadələr işlədib, bukletləri götürərək nümaişkarə şəkildə yerə atmışam. Amma bu belə deyil. Mən yalnız liftdə adımın yazılığı kağızları cırıb atmışam. Niyə mənim adım liftdə vurulmalıdır? Liftdə lazımsız reklamları niyə görməliyəm? Məhkəmə məni İnzibati Xətalar Məcəlləsinin 510-cu maddəsində nəzərdə tutulmuş inzibati xətanı törətməkdə təqsirli bilib, barəmdə 50 manat məbləğində cərimə tətbiq etdi. Apellyasiya şikayəti vermişəm. 23 avqust tarixində məsələyə baxılacaq”.

Arzu Əliyeva deyib ki, "Park Azure” rəhbərliyinin liftə məhdudiyyət qoyması tam olaraq qanunsuzdur:

"3 övladım var. Bir övladım Vətən müharibəsi iştirakçısıdır və "Suqovuşanın azad olunmasına görə” medalı ilə təltif edilib. Oğlum deyir ki, ana mən Vətənə xidmət etmişəm. Vətənə xidmət etdiyimə, torpaqlarımızın azad olunmasında iştirak etdiyim üçün yəqin mənim anama belə davranırlar. Mənim adım liftə vuruldu, uşaqlarıma pilləkənla çıxıb-düşməyi məsləhət bildilər".

Şikayətçi xanım hazırda "Park Azure”a rəhbərlik edən şəxslərin digər qanunsuz əməllərlə də məşğul olduğunu iddia edib:

"Artıq sakinlər onları burada görmək istəmir. Biz komendatımızı özümüz seçməliyik, onları istəmirik. Babək Babayev deyir ki, bina sakinlərinin 99 faizi onlardan razıdır. Gətirib, onların rəhbərliyinə razılıq verən sakinlərin imzalarını göstərsinlər. Əksinə, 88 faiz bina sakinləri onlardan narazıdır. Sadəcə başları öz işlərinə qarışdığından məsələyə müdaxilə etməyə vaxtları yoxdur. Nəticədə də belə özbaşınalıqlar baş veririr. Yeni tikili çoxmənzilli binaların idarə olunması Mənzil Məcəlləsi ilə tənzimlənir. Lakin bizim binada bu sahibkarın xüsus qanunları və məcəlləsi ilə həyata keçirilir. Hərkəs də buna göz yumur".

Arzu Əliyeva "Park Azure”da baş verən hadisələrlə bağlı müvafiq qurumlara müraciət edəcəyini də deyib:

"Mən bunu edəcəm. Çünki onlar dözülməz hərəkətlərə yol verirlər. Böyük kommunal ödənişlər tələb edilir, xidmətlər isə demək olar ki, yox səviyəsindədir. Bakı Şəhər İcra Hakimiyyətinə, İqtisadiyyat Nazirliyinə və digər aidiyyatı qurumlara müraciət edəcəm. Məni Vətənimdən, ölkəmdən küsdürmək istəyirlər. Niyə görə? Buna onlar cavab verməlidirlər”.