Bu əməli törədənlərin ciddi şəkildə cəzalandırılmaları tələb olunur

Yeni avtomobil almaq çoxlarının imkanı xaricindədir, ona görə də bir çox insanlar bazarda ikinci əl avtomobil seçirlər. Potensial alıcının baxdığı ilk şey “dəmir at”ın görünüşü, istehsal ili və yürüşüdür. Həddindən artıq yürüş alışdan imtina etmək üçün bir səbəbdir, lakin çox az olması da şübhəli ola bilər. Ola bilsin ki, avtomobil bir neçə ildir istifadə olunmayıb və ya yürüş sadəcə geri çəkilib. Bu cür faktlara indi də bir çox ölkələrdə rast gəlinir.

Avropa Komissiyasının məlumatına görə, bu cür fırıldaqçılıq iqtisadiyyata ildə təxminən 9,6 milyard avroya başa gəlir. Beləliklə, “CarVertical”ın keçən ilki araşdırması göstərdi ki, Şərqi və Mərkəzi Avropa yürüşlərin geri çəkilməsində liderdir. Baltikyanı ölkələr də öndədir. Onlardan sonra Rumıniya, Rusiya və Ukrayna gəlir.

Beləliklə, bu problemin Ukraynada aktual olması, bu ölkədə odometrdə yürüşün azaldılmasına görə cərimə tətbiq etməyi təklif etmələri ilə ifadə edilir. Qanun layihəsinə əsasən, işlənmiş avtonəqliyyat vasitəsinin üçüncü şəxslərə satılması məqsədilə onun yürüş məsafəsinin saxtalaşdırılmasına görə qeydiyyat (təkrar qeydiyyat) zamanı aşkar edilərsə, iri cərimələr, bir il ərzində təkrar qayda pozuntusuna yol verildikdə isə külli miqdarda cərimələrin tətbiqi təklif edilir.

Bizdə isə mütəxəssislərin dediyi kimi, işlənmiş avtomobillərin də müəyyən faizi yürüşü aşağı salınaraq satılır. Mövzu barədə AYNA-ya danışan Azad İstehlakçılar Birliyinin (AİB) rəhbəri Eyyub Hüseynovun özü də vaxtilə bu cür saxtakarlığın qurbanı olub: “Bizdə belə faktlara tez-tez rast gəlinir. Bir neçə il əvvəl qrant çərçivəsində təşkilatımız üçün avtomobil almaq qərarına gəldim və bunun üçün işlənmiş avtomobil bazarında oldum. Uzun axtarışlardan sonra bir avtomobil seçdim və aldım və hətta onu yoxlamaq üçün bir mexanik dəvət etdim, o, maşını almağa dəyər olduğuna əmin etdi. Amma qısa müddətdən sonra avtomobilin qeyd olunandan daha çox işlənmiş olduğu məlum oldu. Ortaya çıxdı ki, avtomobilin yürüşü təxminən 100 min km geri çəkilib. Maşını vicdansız satıcıya qaytarmaq çox əziyyətli iş oldu”.

“İstehlakçıların aldadılması, haqsız rəqabət və s. kimi suallar bu günə qədər açıq qalır. İstifadə olunmuş avtomobil alanlara avtomobilin servis kitabçasının olub-olmadığını yoxlamağı məsləhət görürəm. Əgər yoxdursa, deməli, onun yürüşü mütləq çox çəkilib və mən belə bir alış etməyi məsləhət görmürəm. İkinci tövsiyə ondan ibarətdir ki, əgər siz hələ də servis kitabçası olmayan avtomobil almaq qərarına gəlsəniz, rəsmi avtomobil xidməti ilə əlaqə saxlayın və cari yürüş haqqında rəsmi sənəd alın. Qanunvericilik bazasını bu aspektdə gücləndirmək lazımdır ki, qanun aldadılan istehlakçının tərəfində olsun”, - deyə həmsöhbətimiz bildirib.

Qeyd edib ki, bu sahə hələ də müvafiq strukturların nəzərindən kənarda qalıb: “Hər ay bizim quruma işlənmiş avtomobilin alınması ilə bağlı 2-3 narazılıq, şikayət daxil olur. Biz insanlara daha çox məlumat verməliyik ki, onlar saxtakarlığın qurbanı olmasınlar. İstehlakçıların bu məsələdə köməyə ehtiyacı olarsa, biz onlara pulsuz yardım etmək üçün əlimizdən gələni etməyə hazırıq. Digər problem odur ki, bazarda çoxlu saxta ehtiyat hissələri var, xüsusən də ucuz Koreya avtomobilləri üçün. AİB bu bazarda monitorinq keçirməyə hazırlaşır və oradakı vəziyyəti öyrənir”.

Azərbaycan Avtomobil Dilerləri Assosiasiyasının (AADA) sədri Natiq Zərbəli AYNA-ya açıqlamasında deyib ki, bəzən möhtəkirlər avtomobili satmazdan əvvəl onun yürüşünü azaltmaq üçün odometr göstəricilərini geriyə doğru dəyişirlər: “Yürüş nə qədər az olsa, avtomobil bir o qədər təzə olar. Əvvəllər onu mexaniki şəkildə çəkirdilər, amma indi hər şey rəqəmsaldır, ona görə də proqram təminatını sındırırlar”.

Öz növbəsində “Sürücülərin Maarifləndirilməsinə Yardım” İctimai Birliyinin sədri Fazil Məmmədov sözügedən problemin aktuallığını təsdiqləyib: “Yürüşün çəkilməsi əsl cinayətdir və təbii ki, buna görə ciddi cəza olmalıdır. Bu, fırıldaqdır, çünki satıcı avtomobili olduğundan daha təzə kimi satır. Geri çəkilmə əhəmiyyətli dərəcədədirsə, deməli, əslində nəqliyyat vasitəsi dəfələrlə daha çox istifadə edilib, o zaman nəqliyyat vasitəsinin aşınması, əlbəttə ki, tamamilə fərqli olacaq. Və ümumiyyətlə, fövqəladə hal ola bilər, heç bir təhlükəsizlik təmin edilmir. Bunun üçün sadəcə kiçik bir cərimə kifayət deyil. Deyək ki, real qiyməti 5 min dollar olan maşın, yürüşü çəkildikdən sonra dəfələrlə baha satılır”.

“Əlbəttə ki, bu hal daha çox bahalı populyar maşınlarda tətbiq olunur, digərlərində isə bu cür saxtakarlıqdan çox qazana bilməyəcəksiniz. Belə bir satıcı tutulsa, cərimə ödəməyə məcbur olsa belə, yenə də ondan yaxşı pul qazanacaq. Bu, o deməkdir ki, belə tədbirlər davam edəcək. Amma indi alıcı üçün hər şeyi yoxlamaq asandır. Avtomobilin tarixçəsi və lazımi məlumatları VIN kodu - nəqliyyat vasitəsinin eyniləşdirmə nömrəsi ilə tapmaq olar”, - deyə müsahibiz vurğulayıb.

Nəqliyyat üzrə ekspert Eldəniz Cəfər də AYNA əməkdaşı ilə söhbətində söyləyib ki, indi müasir texnologiyalar sayəsində işlənmiş avtomobilin tarixini yoxlamaq mümkündür: “Yürüşün çəkilməsi SSRİ-də adi hal idi və hələ də postsovet məkanında rast gəlinir. Bir qayda olaraq, yürüş Gürcüstandan bizə gələn avtomobillərdə çəkilir. Bu fakt dələduzluq kimi qiymətləndirilməlidir və bununla qarşılaşanların polisə müraciət etmək üçün bütün əsasları var”.

Müəllif: Elya Belskaya

“Pulunu ver, torpaq al, üstündə də öz hesabına nəsə tik, olsun sökülən əmlakının əvəzi” - Naxçıvanda kompensasiya məntiqi
Naxçıvan MR-nın Culfa rayonun Gömrük idarəsi bir vətəndaşın mülkiyyətinə aid torpaq üzərində tikilib.

Ovqat.com-a bu barədə məlumatı adının açıqlanmasını istəməyən rayon sakinlərindən biri verib.

Onun sözlərinə görə, şəkildə gördüyünüz bu binanın yerində 2006-ci ilə qədər mağazalar və anbar var imiş. 1998-ci ildən fəaliyyət göstərən bu anbar və mağazalar İrana gedib gələn Naxçıvan sakinlərinə qonşu ölkədə ən çox tələb olunan məhsulları satırmış. Başqa sözlə, pis də qazandırmırmış. Rəsmi sənədləri olmasına baxmayaraq, obyekt 2006-cı ildə sahibkarın razılığı alınmadan hərbçilər tərəfindən sökülür və yerində gömrük idarəsinin indiki binası tikilir. Mənbəmiz obyektin sökülmə anını əks etdirən videoları da redaksiyamıza göndərib.

Binanın sökülmə anını bu linki tıklayaraq seyr edə bilərsiniz:
Mülkün sahibi Bayram Talıbov imiş və o, 2006-cı ilin aprel ayının 9-da dünyasını dəyişib. Naxçıvanlı Bayram kimi tanınan sahibkarın Moskvada "qanuni oğru” Hikmət Muxtarovla (Sabirabadlı Hikmət) birlikdə güllələnmiş kriminal avtoritet olduğu bildirilir. Maraqlıdır ki, həmin mülkiyyət də elə həmin illərdə qanunsuz olaraq sökülüb. İlk baxışdan şübhələr bu iki işin bir-birilə əlaqəsi olması ehtimalına götürsə də, söhbətləşdiyimiz qaynaqlar bunu istisna edirlər. Bildirildiyinə görə, həmin obyekt Bayram Talıbovun sağlığında sökülüb və hətta hadisənin xəbərini alan mülk sahibi Naxçıvana qayıtmaq istəyirmiş. Fəqət ona və Sabirabadlı Hikmətə açılan atəş buna imkan verməyib .


Şəkillərdə: Culfa rayon Gömrük İdarəsinin binasının Naxçıvanlı Bayrama məxsus torpaq üzərində tikildiyini təsdiqləyən sənədlərdən bəziləri
İki böyük bədbəxtliyi eyni anda yaşayan Talıbovlar ailəsi bir də Vasif Talıbovun repressiyasına məruz qalmamaq üçün onun hakimiyyətdən “öz xoşuyla” uzaqlaşmasına qədər susub. O, hakimiyyətini Prezidentin xüsusi nümayəndəsi Fuad Nəcəfliyə təhvil verəndən sonra Talıbovlar ailəsinin də qəlbində bir ümid işığı doğub. Və bu ümidlər də 1 ildir döymədikləri qapı, şikayət etmədikləri ünvan qalmayan Talıbovlar hələ də öz mülkiyyətlərini geri qaytara bilmirlər.

Bayram Talıbovun 18 ildir başsız qalan ailəsi 2 nəfərdən ibarətdir: həyat yoldaşı Elmira və 19 yaşlı oğlu Həsən. Atasının üzünü görə bilməyən Həsən onun qanuni varisi sayılır. Öz ailə mülkiyyətlərini geri qaytarmaq üçün hüquq müstəvisində mübarizə aparan da odur. Bu işdə ona ən böyük dəstəyi isə əmisi Ceyhun Talıbov verir.


Şəkillərdə: Culfa rayon Gömrük İdarəsinin gerçək sahibi Həsən Talıbov

Əlaqə saxladığımız Ceyhun Talıbov deyilənləri təsdiqlədi. Bildirdiyinə görə, Naxçıvanda şikayət etdikləri bütün ünvanlar onlara məhkəməyə üz tutmalarını məsləhət biliblər. Ailə də bu tövsiyələri nəzərə alıb və Azərbaycan məhkəmə sisteminin ədalətinə bel bağölayıb 23.05.2023-cü il tarixində Naxçıvan İnzibati Məhkəməsinə müraciət ediblər. Şikayətlərinə məhkəmənin hakimi Elnur Hüseynov baxır. Daha doğrusu, rəsmən baxır, həqiqətdə isə ona “baxmaq” demək olmaz . Elnur Hüseynov şikayətçiləri qəsdən get-gələ salaraq bu sevdadan vaz keçirməyə çalışır. Hər halda Həsən Bayramovun Azərbaycan Prezidentinə yazdığı məktubdan da belə anlaşılır.

“İş üzrə Naxçıvan İnzibati Məhkəməsinin hakimi Elnur Hüseynovun icraatına 23.05.2023-cü ildə icraatına daxil olmuş və bu 6 ay ərzində 5 məhkəmə iclası (13.06.2023, saat 09:40 (Hazırlıq icraatı) , 24.07.2023, saat 12:00 (Hazırlıq icraatı), 26.09.2023, saat 15:30 (Hazırlıq icraatı), 02.11.2023, saat 11:00 (Hazırlıq icraatı), 09.01.2024, saat 11:30 (Hazırlıq icraatı), 2.11.2023, saat 11:00 (Hazırlıq icraatı)) keçirilmişdir.

Qeyd edirəm ki, bu günkü tarixədək işin bu qədər uzanmasına səbəb Naxçıvan İnzibati Məhkəməsinin hakimi Elnur Hüseynov olmuş və bu günkü tarixədək iş üzrə heç bir araşdırma aparmadan, lüzumsuz olaraq məhkəmə iclaslarını təxirə salmış və mənim cavabdeh Culfa Rayon İcra Hakimiyyəti ilə barışmağımı təkidlə istəmişdir. Lakin, mən cavabdeh Culfa Rayon İcra Hakimiyyəti ilə ən başından razılaşmayacağımı bildirsəm də, hakim Elnur Hüseynov hər dəfəsində bir ümidlə məhkəmə iclasını təxirə salmış və razılığın əldə edilməsini gözləmişdir. Artıq bu qədər məhkəmə iclaslarının uzadılması mənim pozulmuş hüquqlarımı məhkəmə sferasında bərpa etdirməyimə kifayət qədər əngəl yaradır. İş materiallarına da nəzər yetirmiş olsanız, görərsiniz ki, bu günkü tarixədək iddia tələbimin mahiyyəti ilə bağlı araşdırmanın aparılması üçün məhkəmənin hakimi Elnur Hüseynov tərəfindən heç bir orqana sorğu göndərilməmiş, heç bir araşdırılma aparılmamış, işin mahiyyəti ilə əlaqədar olaraq araşdırma aparılması üçün onun tərərfindən heç bir addım atılmamışdır”, - 08.12.2023 tarixində Həsən Bayramov tərəfindən Prezident Aparatına göndərilən məktubda belə deyilir.

Şəkildə: Vətəndaşı get-gələ salıb "İcra Hakimiyyəti ilə barış" deyən hakim
Sual oluna bilər: Naxçıvan İnzibati Məhkəməsinin hakimi Elnur Hüseynov şikayətçiyə “Culfa rayon İcra hakimiyyəti ilə barış” deyərkən nəyi nəzərdə tutur?
Suala Mərhum Bayram Talıbovun qardaşı Ceyhun Bayramov belə aydınlıq gətirir: “Bayramovlar ailəsi əllərindən zorla alınan mülkiyyətin kompensasiya olunması xahişi ilə dəfələrlə Culfa rayon İcra Hakimiyyətində olub. Sonuncu dəfə onlara başqa yerdə - ana yolun kənarında torpaq sahəsi təklif etdilər. Bunun üçün isə hər kvadrat metrə 5 manat istədilər. Üstəlik, torpağı alandan sonra onun üzərində anbar və mağaza tikmək də ailənin boynuna yüklənmişdi. Allah eşqinə, bunun harası kompensasiyadır? Axı, 2006-cı ildə qardaşımın topdağıtmaz obyektini söküblər. Ədalətli kompensasiya o olardı ki, həmin müəssisənin yenidən bərpası üçün vəsait də verilsin”.

Həmsöhbətimiz onu da vurğuladı ki, ailənin təklif olunan həmin torpağı almağa və onun üzərində obyekt tikməyə pulu yoxdur: “Olsaydı, istədiyi yerdən mülk alıb yeni obyekt tikərdi də. Kiminsə qapısını döyməyə nə ehtiyac vardı?”.

Daşkəsən Rayon İcra Hakimiyyəti sentyabr ayından bu günə kimi ümumilikdə 3 tender müqaviləsi imzalayıb. Bir müddət əvvəl işindən azad olunan icara başçısını birinci müavin Vüqar Məmmədov əvəz edir. Xəbər verilir ki, rayonda bütün tenderlər təmir və abadlıq işlərinə həsr olunub. Amma ortada heç nə yoxdur. Ümumilikdə isə qalib şirkətlərin hesabına 160 min manatdan çox pul köçürülüb.

Çox güman ki, Daşkəsən rayon icra hakimiyyəti başçısının səlahiyyətlərini müvəqqəti icra edən Vüqar Məmmədov təmir işlərini başa çatdırmaqda çətinlik çəkir. Əks halda Daşkəsən rayonun təmir olunması üçün cəmi 4 aya 3 dəfə tender elan etməzdi.

Baş tutan tenderləri sıra ilə təqdim edirik:

DAŞKƏSƏN RAYON İCRA HAKİMİYYƏTİ BAŞÇISININ ŞƏHƏR NÜMAYƏNDƏLİYİ -
"GÖYGÖL TİKİNTİ" Məhdud Məsuliyyətli Cəmiyyəti -
Daşkəsən şəhərinin küçələrində abadıq işləri -Məbləğ: 48.747,99 AZN

Sözügedən qalib MMC-nim nizamnamə kapitalı 10 AZN, qanuni təmsilçisi ANAR TAĞIYEV ƏHMƏD OĞLUdur.

DAŞKƏSƏN RAYON İCRA HAKİMİYYƏTİ BAŞÇISININ ŞƏHƏR NÜMAYƏNDƏLİYİ
"STAR TƏMİR CONSTRUCTİON" Məhdud Məsuliyyətli Cəmiyyəti -
Daşkəsən şəhərində çoxmərtəbəli yaşayış binalarının giriş bloklarının əsaslı təmiri

Bu qalib MMC-nin isə nizamnamə kapitalı 20 AZN, qanuni təmsilçisi ZAUR ƏSGƏROV MARİF OĞLUdur.

DAŞKƏSƏN RAYON İCRA HAKİMİYYƏTİ BAŞÇISININ ŞƏHƏR NÜMAYƏNDƏLİYİ
"STAR TƏMİR CONSTRUCTİON" Məhdud Məsuliyyətli Cəmiyyəti -
Daşkəsən şəhərdaxili yolların əsaslı təmiri işləri - Məbləğ: 74.818,96 AZN

Diqqət çəkən məqam DAŞKƏSƏN RAYON İCRA HAKİMİYYƏTİ BAŞÇISININ ŞƏHƏR NÜMAYƏNDƏLİYİnin bütün tenderləri STAR TƏMİR CONSTRUCTİON" MMC ilə olmasıdır.

Nəzərinizə çatdıraq ki, Daşkəsən Rayon İcra Hakimiyyətinin merini əvəz edən birinci müavin, sabiq icra merinin kadrıdır.

Mövzuya qayıdacayıq.

hurriyyet.az

"Möhtərəm Prezident! Sizə, Azərbaycanın dövlətçiliyinə və ölkəmizin beynəlxalq imicinə böyük ziyan vura biləcək bir məsələ haqqında məlumat bildirməyi özümüzə borc bilirik. Belə ki, 25 noyabr 2023-cü il tarixində AR Kənd Təsərrüfatı naziri M.Məmmədov və AR Qida Təhlükəsizliyi Agentliyinin sədri Q.Təhməzli tərəfindən AR İqtisadiyyat naziri M. Cabbarova müraciət məktubu göndərilmişdir. Bu müraciətin mahiyyəti və məqsədi “Ekoloji təmiz kənd təsərrüfatı haqqında” Azərbaycan Respublikasının Qanununun ləğv edilməsi və “Qida təhlükəsizliyi haqqında” Azərbaycan Respublikasının Qanununda dəyişiklik edilməsi barədə “Azərbaycan Respublikasının Qanunu” layihəsi haqqındadır. Bununla əlaqədar Sizə AMEA-nın Ekoloji Təmiz Kənd Təsərrüfatı üzrə Regional Təcrübə və Resurs Mərkəzinin kollektivinin rəyini təqdim edirik". Bu barədə AMEA-nın Ekoloji Təmiz Kənd Təsərrüfatı üzrə Regional Təcrübə və Resurs Mərkəzi kollektivinin Prezident İlham Əliyevə ünvanlanmış müraciətində deyilir.
Müraciətdə daha sonra deyilir: "Bu rəy Azərbaycanda ekoloji təmiz kənd təsərrüfatının və aqrar elmin mövcud vəziyyətinin real qiymətləndirilməsi istiqamətində lazımi təhlillər aparıldıqdan, dünya təcrübəsi öyrənildikdən sonra nəzəri-fundamental və tətbiqi-innovativ tədqiqatların optimal strukturunu, orta və uzunmüddətli prioritetlərini və inkişaf pespektivlərini, bunların reallaşması üçün müvafiq elm və təhsil müəssisələrinin əsas vəzifələrini, yeni idarəetmə və koordinasiya sisteminin konturlarını müəyyənləşdirən istiqamətləri nəzərə alaraq hazırlanmışdır.
Yuxarıda adı çəkilən qanun layihəsi ölkə ictimaiyyəti, azərbaycan alimləri və peşəkar mütəxəssisləri, digər aidiyyatı dövlət qurumları (Azərbaycan Milli Elmlər Akademiyası, Ekologiya və Təbii Sərvətlər Nazirliyi, Elm və Təhsil Nazirliyi, Bakı Dövlət Universiteti, Azərbaycan Dövlət Aqrar Universiteti, Azərbaycan Respublikasının Prezidenti Yanında Dövlət İdarəçilik Akademiyası və s.) tərəfindən müzakirə edilmədən, yalnız bu təşəbbüsü irəli sürən mərkəzi icra hakimiyyəti orqanları olan Azərbaycan Respublikası Kənd Təsərrüfatı Nazirliyinin və Azərbaycan Qida Təhlükəsizliyi Agentliyinin 4 (dörd) nəfər əməkdaşı tərəfindən hazırlanıb.
Sizə məlumat olaraq bildiririk ki, dünyanın 190-dan artıq ölkəsində bu ölkələrin qanunvericilik bazasının əsasında ekoloji(orqanik) kənd təsərrüfatı sistemi inkişaf etdirilir. Bu proses bütün ölkələrdə İFOAM (Beynəlxalq Orqanik Kənd Təsərrüfatı Hərəkatı Federasiyası) tərəfindən idarə olunur və Azərbaycan dövləti İFOAM-ın baza standartlarının əks olunduğu bütün beynəlxalq konvensiyalara qoşulmuşdur.
Azərbaycan Ekoloji Təmiz Kənd Təsərrüfatı haqqında 2008-ci ildə Qanun qəbul edildikdən sonra MDB ölkələri cərgəsində 1-ci, dünya ölkələri içərisində sonuncu onluq arasındadır.
Azərbaycanda ekoloji kənd təsərrüfatının inkişaf etdirilməsi ideyası 1996-cı ildə Gəncədə doğulmuşdur. Məqsəd xırda və pərakəndə torpaq istifadəçiliyi və eyni zamanda torpaq payı alan insanların texniki və maliyyə imkanlarının məhdud olduğu şəraitdə onlara ata-baba, yəni ekoloji kənd təsərrüfatı istiqamətində vərdiş və bacarıqlar aşılamaq idi. Beləliklə, 1996-cı ildə Azərbaycan Dövlət Aqrar Universitetində, Gəncədə yerləşən Elmi-Tədqiqat İnstitutlarında çalışan və özlərinin yüksək vətənpərvərlik ruhu, əqidə birliyi, vətəndaşlıq borcu və peşəkarlıq sevgisi ilə birləşən bir qrup alimlərin və onlara həmin amallar fonunda qoşulan könüllülər birlikdə ölkədə Ekoloji Kənd Təsərrüfatı Hərəkatının əsasını qoydular. Sonrakı mərhələdə bir neçə il dünyada müxtəlif ölkələrdə mövcud olan ekoloji təmiz əkinçilik qanunvericiliyi öyrənildikdən sonra 2005-ci ildə Azərbaycan Kənd Təsərrüfatı Akademiyasının (AKTA-indi Azərbaycan Dövlət Aqrar Universiteti) professoru A.Babayevin rəhbərliyi altında AKTA və Gəncə Aqrobiznes Assosiyasiyasını (GABA) təmsil edən ekspertlər qrupu «Ekoloji Kənd Təsərrüfatı haqqında Qanun» layihəsini işləyib hazırladılar. Bu layihə ictimai rəyi öyrənmək məqsədilə mərkəzi və regional mətbuat orqanlarında çap edildikdən sonra Milli Məclisə və respublikanın müvafiq nazirliklərinə təqdim edildi. Qanun layihəsi yalnız 2007-ci ilin aprel ayında ölkə parlamentinin Aqrar Siyasət Komissiyasında müzakirə mövzusuna çevrildi və prof. A.Babayev İşçi Komissiyanın tərkibində qanun layihəsinin müzakirəsi və redaktəsi prosesində iştirak etdi. Qanun Milli Məclisdə 2008-ci ildə qəbul olundu və ölkə Prezidentinin 25 avqust 2008-ci il tarixli fərmanı ilə qüvvəyə mindi.

Qanun qəbul olunduqdan 10 il sonra FAO ölkəmizdə bu qanunla əlaqədar islahatların çox ləng getdiyini nəzərə alaraq hökümətlə apardığı danışıqlardan sonra “GCP/AZE/006/TUR: Azərbaycanda ekoloji təmiz kənd təsərrüfatının inkişafı və institusional bacarıqların artırılması” layihəsini icra etdi və lahiyənin yerinə yetirilməsinə xeyli maliyyə xərcləndi. Bu layihənin əsas hədəfləri Azərbaycanda orqanik kənd təsərrüfatının inkişafına təkan vermək, bu sahədə mövcud qanunvericiliyin, hüquqi bazanın formalaşdırılmasının, müvafiq milli strategiyanın hazırlanmasından ibarət idi. Layihə çərçivəsində hazırlanan hüquqi aktlar və tövsiyyələr Azərbaycan hökümətinə təqdim olundu.

9 iyul 2019-cu il tarixində Sizin göstərişinizlə AR Prezidenti Administrasiyası rəhbərliyi Respublikanın Mərkəzi İcra Orqanlarına monitorinq keçirmək məqsədilə ekoloji təmiz kənd təsərrüfatı haqqında qanunvericiliyin icra vəziyyətinin yoxlanılması ilə əlaqədar zəruri məlumatları Azərbaycan Respublikası Prezidentinin Administrasiyasına təqdim etmələri haqda məktub göndərdi (məktub nömrəsi 2/795). Monitorinqin nəticələrinə görə məlum oldu ki, ölkə qanununun və Prezidentin Fərmanlarının yerinə yetirilməsi istiqamətində görülən işlər qeyri-qənaətbəxşdir. Yalnız Azərbaycan Respublikasının Prezidenti İ.Əliyevin 25 avqust 2008-ci il tarixli 818 №-li və 24 may 2010-cu il tarixli 267 №-li Fərmanlarını və 2010-cu il tarixli 159 nömrəli qərarlarını əsas tutaraq yaradılan (AMEA-nın Rəyasət Heyətinin 25 may 2016-ci il tarixli 8/5 nömrəli qərarı ilə) AMEA-nın Ekoloji Təmiz Kənd Təsərrüfatı üzrə Regional Təcrübə və Resurs Mərkəzinin (“Mərkəz”) gördüyü işlər məqbul hesab olundu. Qeyd etmək lazımdır ki, bu “Mərkəz”-in fəaliyyəti sayəsində regionun 2 rayonunda (Qax, Zaqatala) ekoloji təmiz kənd təsərrüfatı üzrə təlim və seminarlarda iştirak edən 1000-ə qədər fermerdən 500-ü və yaxud 50 fermer qrupunun Avropanın Akkreditasiya Orqanları tərəfindən sertifikatlaşdırılması Azərbaycanda ilk hadisədir və bunu “Mərkəz”in qısa müddət ərzində fəaliyyətinin önəmli nəticəsi kimi qəbul etmək olar. Orqanik fermer statusu alan fermerlərin Avropa Akkreditasiya orqanlarına ödəməli olan rüsumu (bizim fermerlərin ödəniş qabiliyyəti zəif olduğuna görə (qiyməti 4000 (dörd min) avro olduğunu nəzərə alsaq) IFOAM (Beynəlxalq Ekoloji Kənd Təsərrüfatı Hərəkatı Federasiyası) ödənişi öz üzərinə götürmüşdür. Beləliklə orqanik sertifikatlaşma prosesinə ödənilməli olan rüsumun ümumi məbləğ 200 (iki yüz) min avro olmuşdur.

Lakin təəssüflər olsun ki, qanunun təkmilləşdirilməsi haqqında FAO-nun təklif və tövsiyyələri yerinə yetirilmədi. Bunun əksinə olaraq, bu sahəyə cavabdeh olan bəzi orqanlar məsuliyyətdən gələcəkdə yaxa qurtarmaq üçün birdəfəlik Qanunu ləğv etdirmək qərarına gəliblər. Eyni zamanda təqdim etdikləri layihədə orqanik məhsulların sertifikatlaşdırılması ilə əlaqədar bütün səlahiyyətlər Qida Təhlükəsizliyi Agentliyinə verilməklə aidiyyatı olan digər mərkəzi icra orqanlarının səlahiyyətlərinə müdaxilə olunur. Halbuki, dünyanın bütün ölkələrində orqanik məhsulların sertifikatlaşdırılması bu ölkələrin Milli Standartlarına əsaslanaraq yerinə yetirilir. “Azərbaycanın Milli Standartları” bizim tərəfimizdən işlənib hazırlanaraq 2016-cı ildə Azərbaycan Standartlar Komitəsinə təqdim olunmuşdur və bu standartlar Azərbaycan Standartlaşma İnstitutu tərəfindən hüquqi sənəd formasına salınsa da, hələ də burokratik əngəllər ucbatından qəbul olunmayıb.
Belə olan halda sual olunur ki, Qida Təhlükəsizliyi Agentliyinin ölkənin standartları ilə məşğul olan bir orqanın səlahiyyətlərinə müdaxilə edərək öz üzərinə götürməkdə məqsədi nədir? Digər tərəfdən “Qanun boşluğu” yarandığı halda ölkədə orqanik məhsul istehsalını kim və hansı səlahiyyətlərlə təşkil etməlidir və yaxud ölkədə orqanik məhsul istehsalçısının və orqanik məhsulun olmadığı halda Qida Təhlükəsizliyi Agentliyi kimi və nəyi sertifikatlaşdıracaq?
Aşağıda qeyd etdiyimiz əsas motivlərə əsaslanaraq bildiririk ki, “Ekoloji təmiz kənd təsərrüfatı haqqında” Azərbaycan Respublikasının Qanununun ləğvi ölkəmizin ictimai mühitində və beynəlxalq aləmdə dövlətimizə qarşı mənfi rəy yarada bilər:

1. Mövcud Qanuna qarşı olan qeyri-dövləti münasibət hal-hazırda qüvvədə olan “Azərbaycanda ekoloji cəhətdən dayaynıqlı sosial-iqtisadi inkişafa dair Milli Peoqram”-in mahiyyəti ilə ziddiyyət yaradır və 4.1 - Su ehtiyatları, 4.2 - Atmosfer havası, 4.3 – Torpaq ehtiyatları, 5.1 – İqlim dəyişmələri, 5.2 – Səhralaşmaya qarşı mübarizə, 5.3 – Bioloji müxtəliflik maddələrində göstərilən strateji məqsədləri inkar etmək və qarşımıza qoyulan vəzifələrdən boyun qaçırmaq mənasını yaradır. .

2. Qanunda qeyd olunan “Ekoloji kənd təsərrüfatı haqqında qanunvericiliyin məqsədi”, 4-cü maddədə qeyd olunan “Ekoloji kənd təsərrüfatının ümumi prinsipləri”, 5-ci maddədə “Ekoloji təmiz kənd təsərrüfatının dövlət tənzimləməsi”, 6-cı maddədə “Ekoloji təm kənd təsərrüfatına dair tələblər”, 7-ci maddədə “Bitkiçilikdə tətbiq olunan ekoloji tələblər”, 8-ci maddədə “Heyvandarlıqda tətbiq olunan ekoloji tələblər”,9-cu maddədə “Ekoloji təmiz kənd təsərrüfatı cubyektlərinin təşkil qaydaları”, 10-cu maddədə “Ekoloji təmiz kənd təsərrüfatına keçid dövrü” müddəalarında, eyni zamanda Qanunun 3-cü, 4-cü, 5-ci və 6-cı fəsillərdə qeyd olunmuş bütün maddələri ləğv etmək o deməkdir ki, Azərbaycan hökuməti Qanun işlənib hazırlanan zaman əsas kimi qeyd etdiyi İFOAM-ın Baza Standartlarından, BMT-nin davamlı inkişaf haqqında “XXI əsrin gündəliyi ” direktivlərindən, Avropa İttifaqının 2092/91 saylı Qətnaməsindən, Avropa İttifaqının Aqrar – Ekoloji Proqramından , Avropa Şurasının CAP- Ümumi Kənd Təsərrüfatı adlı tədbirlər Planından və Avropa Birliyinin bütün ölkələri üçün əsas kimi qəbul edilən “Avropa Birliyinin Ümumi Kənd Təsərrüfatı Siyasəti”-nin prinsiplərindən Avropa İttifaqının 834/2007 nömrəli qətnaməsindən imtina edir.

3. Nəzərə alınmır ki, Azərbaycan dünyada qloballaşma şəraitində davamlı inkişafın prinsiplərini rəhbər tutaraq qoşulduğu “Monreal protokolu”(Monreal,1987), “Kioto protokolu”(Kioto,1997), “Orxus konvensiyası”(1998), “XXI əsrin Gündəliyi” qətnaməsi(Rio-De-Janeyro,1992), Yohannersbuqda Dünya sammitində qəbul edilən deklorasiya (Yohannesburq, 2002), “Avropanın Ətraf Mühiti” konfransının bəyanatı (Kiyev, 2003) və digər beynəlxalq aktlarda qeyd olunur ki, heç bir ölkənin davamlı inkişafı əhalinin, torpağın, suyun, bitkilərin və heyvanları sağlamlığını və təhlükəsizliyini təmin edən siyasətin həyata keçirildiyi şəraitdə mümkündür. Bu müddəalar Ekoloji Təmiz Kənd Təsərrüfatı haqqında Azərbaycan Respublikasının Qanununda əsas məqsəd kimi qarşıya qoyulmuşdur!

4. Azərbaycanın 2024-cü ildə BMT-nin iqlim dəyişiklikləri üzrə Cenevrə Konvensiyasının Tərəflər Konfransında 29-cu sessiyasına (COP29) ev sahibliyi edəcək bir ərəfədə bu mövcud Qanunun ləğv edilməsi faktı konfrans iştirakçılarının, o cümlədən İFOAM-dan olan nümayəndə heyətinin ciddi iradlar yaradacaq sürpriz ola bilər.


5. Ekoloji Təmiz Kənd Təsərrüfatı üzrə Azərbaycan Respublikasının Qanununun ləğv edilməsi üçün əsas kimi “Azərbaycan Respublikasının kənd təsərrüfatı məhsullarının istehsalına və emalına dair Strateji Yol Xəritəsi ”nə istinad olunmasını təşəbbüskarların yanlış addımı kimi qəbul edirik. Çünki Strateji Yol Xəritəsi dövri sənəddir(yəni 2025-ci ilə qədərki dövrü əhatə edir) və “ Yol Xəritəsi”ndə qeyd olunan “7.4. Ekoloji Təmiz Kənd Təsərrüfatının inkişaf etdirilməsi”prioriteti bizim adını çəkdiyimiz Qanun əsasında işlənib hazırlanmışdır. Yol Xəritəsi və planlardan fərqli olaraq qanunların ömrü 50-100 il ola bilər.

Müraciətimizin sonunda bildirmək istərdik ki, biz, bir qrup mütəxəssis çiyinlərimizdə daşıdığımız vətəndaşlıq ruhu ilə 1996-ci ildən bəri ötən dövr ərzində könüllü olaraq heç bir təmanna güdmədən və hətta dövlətin bir manat vəsaitinə şərik çıxmadan, böyük zəhmət və əziyyətlə müasir dünyada həm elmi, həm də praktiki nou-xau kimi qimətləndirilən ekoloji(orqanik)kənd təsərrüfatının ölkəmizdə elmi, elmi-metodiki, elmi-informasiya bazasını yaratmağa nail olmaqla yanaşı dövlətimizin hüquqi qanunvericilik bazası üçün strateji əhəmiyyət kəsb edən hüquqi sənədlərini də işləyib hazırlayaraq ali dövlət orqanlarına təqdim etmişik:

1. “Ekoloji Təmiz Kənd Təsərrüfatı haqqında” Azərbaycan Respublikasının Qanunu ilə bağlı bəzi normativ hüquqi aktlar (8 Qaydalar AR Nazirlər Kabinetinin 2009-cu il 8 yanvar tarixli 5 nömrəli qərarı ilə təsdiq edilmişdir).
2. Milli Standartlar (işlənib hazırlandıqdan sonra 2016-ci ildə Dövlət Standartlar Komitəsinə təqdim olunub).
3. Milli Konsepsiya (2016-ci ildə AMEA-nın Rəyasət Heyətində müzakirə edilərək onun əsasında Dövlət Proqramı işlənib hazırlanmışdır).
4. Dövlət Proqramı (2016-ci ildə AMEA-nın Rəyasət Heyətində müzakirə edildikdən sonra AR Nazirlər Kabinetinə təqdim olunub).
5. Kənd Təsərrüfatı Məhsullarının İstehsalı və Emalı üzrə Strateji Yol Xəritəsi (7.7.4. Prioritet 7.4. Ekoloji təmiz kənd təsərrüfatı istehsalının inkişaf etdirilməsi)

Möhtərəm Prezident!
Diqqətinizə görə təşəkkür edirik. Əgər burokratik səbəblər ucbatından bizim müraciətimiz Sizə çatdırılmazsa, biz çalışacağıq ki, bu müraciəti sosial şəbəkə vasitəsi ilə Sizə təqdim edək!"
dia-az.info

Beynəlxalq Universitetin sabiq rektoru, Fransada məskunlaşan Elşad Abdullayevin oğlunun və özünün ermənilərlə iş birliyində olması ilə bağlı yenidən məlumatlar yayılıb. Yayılan məlumatda iddia olunur ki, Elşad Abdullayevin oğlu, Rusiya Federasiyasında yaşayan və biznes fəaliyyəti ilə məşğul olan Elşən Abdullayevin Ermənistanın keçmiş Prezidenti Serj Sərkisyanın yaxın qohumu Susanna, eləcə də sözügedən ölkənin Rusiyadakı sabiq səfiri Qarik Meliksetyan ilə ticarət əlaqələri mövcuddur.

İddia olunur ki, E.Abdullayev ötən müddətdə Susanna ilə birgə Azərbaycanın işğal olunmuş ərazilərində torpaq sahələrinin alqı-satqısı ilə məşğul olublar. Bununla əlaqədar, E.Abdullayev tərəfindən 2014-cü ildə qarşı tərəfə 4.500.000 (dörd milyon beş yüz min) rubl məbləğində pul vəsaiti ödədiyinə dair notarial qaydada müqavilə bağlanıb.

Qeyd olunanlarla bağlı yayılan sənədləri aşağıda təqdim edəcəyik.

Ondan öncə xatırladaq ki, Elşad Abdullayevin adı uzun müddətdir ki, bu məsələdə hallanır. Onun ermənilərlə biznes əlaqələri barəsində ölkə mediasında məqalələr hələ 7 il öncə dərc edilib. Ancaq o zaman irəli sürülən iddialara dair sənədlərin fotosu yayılmayıb.

2017-ci ildə moderator.az saytında verilən yazıda qeyd olunub ki, Elşən Abdullayevlə Bakıda doğulmuş, erməni əsilli Şaxramanova Susanna Şaqenova arasında imzalanmış bir neçə müqavilə sənədləri üzə çıxıb.

Sayt yazır: “Sənədlərdə qeyd olunur ki, 1987-ci il təvəllüdlü Abdullayev Elşən Elşad oğlu ona məxsus Moskva şəhəri, Lenin rayonunda yerləşən obyekti Şaxramanova Susanna Şaqenovaya arendaya verir. Müqavilənin müddəti 10 aprel 2015-ci ildən 2017-ci ilin aprelinə qədər nəzərdə tutulub. Müqaviləyə əsasən 225,5 kvm olan obyektə görə qarşı tərəf ayda 50 000 rubl (təxminən 1500 manat) ödəyəcək@.

Həmin zaman Elşad Abdullayev məsələ ilə bağlı Musavat.com-a açıqlama verib. Açıqlamasında Abdullayev belə bir əlaqələrinin olmadığını bildirib:

“Bizim ermənilərlə iş birliyində olmağımız haqqında məlumatlar həqiqətə uyğun deyil. Biz heç bir erməni ilə iş birliyində olmamışıq, mən özümə bəraət qazandıran insan deyiləm də. Bizim alnımız açıq, üzümüz də ağdır”.

E.Abdullayev yayılan sənədlərdə adı çəkilən erməni əslli Susanna Şaxramanova haqda bunları deyib:

“Əvvəla, biz Bakıda doğulmuş Şaxramanova Susanna Şaqenova ilə işbirliyində olmamışıq, onu tanımıram da. Bu səbəbdən də mən Moskvada olan hüquqi nümayəndəmdən xahiş etdim ki, həmin şəxs haqqında mənə yazılı məlumat versin. O da mənə onun rus dilində əl yazması şəkilində bəyanatını göndərdi. Şaxramanova Susanna bəyan edib ki, Elşad Abdullayevlə biznesi yoxdur, məni tanımır, heç bir vaxt görməyib və Rusiya Federasiyasında heç bir biznes əlaqəsi yoxdur. Onu da bildirib ki, kommersiya məsələləri üzrə yeganə əlaqə saxladığı azərbaycanlı şəxs Fuad Rzayevdir”.

İndi isə sözügedən məsələ ilə bağlı sənədlər və müqavilələr yayılıb. Həmin müqavilələrə əsasən əlaqələrin mövcudluğu iddia olunur.

Onları təqdim edirik:



Onu da qeyd edək ki, məsələ ilə bağlı yenə də qarşı tərəfi dinləyib, mövqeyini dərc etməyə hazırıq.

Qafar Səfərli,
Musavat.com

Bakıda "Mahal" MTK tərəfindən inşa edilmiş 17 mərtəbəli binanın fasadı uçub.

Qaynarinfo-nun məlumatına görə, hadisə MTK-ya məxsus Yasamal rayonu, Yeni Yasamal adlanan ərazidə - Məhəmməd Xiyabani küçəsində yerləşən binada baş verib.

Belə ki, dünən axşam binanın üzlüyü qoparaq avtomobillərin üzərinə düşüb. Xeyli sayda avtomobilin zərər gördüyü deyilir.

Məsələ ilə bağlı Qaynarinfo-ya MTK-nın özünü təqdim etməyən nümayəndəsi bildirib ki, yüngül hadisə baş verib. Onun sözlərinə görə, binanın qopan üzlüyü daş deyil: "Nazik fasaddır, qopub. Yaxın günlərdə bərpa ediləcək. Binanın digər yerlərində olan üzlük möhkəmdir".

Yanvarın 4-də Laçın rayonunda dağlıq ərazidə baş vermiş yol qəzasında həlak olan iki hərbçidən biri – Həsən İsmayılovun ailə üzvləri biganəlikdən gileylənir. Deyirlər ki, yaşadıqları Gəncə şəhərinin icra başçısı Niyazi Bayramov və digər yüksək vəzifəli şəxslər onlara layiq olduqları münasibəti göstərmir.

“Allahın bir əklilini o uşağın məzarına qoymayıblar”

Həsən İsmayılovun bacısı Elza Əmirova Meydan TV-yə danışır ki, qardaşına şəhid statusu verilib, Gəncədə Şəhidlər Xiyabanında dəfn olunub:

“Amma şəhidin layiq olduğu ehtiramı, münasibəti görmürük. İcra başçısı görüntü xatirinə gətirib bayrağı atama verib, çıxıb gedib. Nə bir yas mağarına gəlib, nə ailə ilə maraqlanıblar. Allahın bir əklilini də o uşağın məzarının üstünə qoymayıblar. Heç məzarının başında bayraq da yoxdur. Öz hesabımıza şəklini çıxartdırmışdıq, məzarının üstünə də onu qoyublar, vəssalam. Adətən şəhidləri kortejlə son mənzilə yola salırlar. Mənim qardaşıma bunu da eləmədilər. Dəfn mərasimində 4 bayraq vardı. Onu da qazi Kamal alıb aparmışdı…”.

“Gəlib görsünlər ki, şəhidin evi nə gündədir”

28 yaşlı Həsən İsmayılovun 5 bacının tək qardaşı olduğunu deyən Elza Əmirovanın sözlərinə görə, qardaşının iki azyaşlı övladı qalıb. Uşaqlardan birinin 4, digərinin 1 yaşı var. Elza Əmirova deyir ki, ailənin maddi durumu ağırdır, hətta ehsan verməkdə də çətinlik çəkirlər:

“11 il idi ki, xidmət edirdi. Həm 2020-ci ildə 44 günlük müharibənin, həm də 2023-cü ildə anti-terror əməliyyatlarının iştirakçısı olub. Qardaşım kəşfiyyatçı idi. Gəlib görsünlər ki, şəhidin evi nə gündədir. Şəhid olub, yas yerinə gəlib-gedən çoxdur. Ehsan verməyə imkanımız yoxdur. İcra başçısı, onun ətrafındakıları maraqlandırmır ki, bu ailə nə vəziyyətdədir? Dövlət başçısı büdcə ayırıb, amma əhəmiyyət verilmir. Dövlət uğrunda gedən adama belə münasibət yaraşarmı?!”.

Elza Əmirova bildirir ki, bununla bağlı iradlarını Gəncə Şəhər İcra Hakimiyyətinin nümayəndələrinə də çatdırıblar. Cavabında bildirilib ki, bayramla əlaqədar qeyri-iş günüdür, bu üzdən heç bir addım ata bilmirlər.

“Deyirlər ki, “bayran günləri olduğuna görə xəzinə bağlıdır, heç nə eləyə bilmərik, bayram bitəndən sonra maraqlanacağıq”. Şəhidə çatan bir ehsandır, onu da vaxtında eləmirsinizsə, sonra maraqlanmağı neynirik?! Bayram günlərində gül dükanı bağlı deyildi ki. Bir əklil də düzəltdirə bilmirdiniz?”, – Elza Əmirova əlavə edib.

Azərbaycanda yanvarın 7-nə qədər qeyri-iş günləri olduğuna görə Həsən İsmayılovun ailə üzvlərinin iddialarına Gəncə Şəhər İcra Hakimiyyətindən münasibət öyrənmək mümkün olmayıb.

Yanvarın 4-də Laçın rayonunda çətin relyefli dağlıq ərazidə hərbi nəqliyyat vasitəsinin qəzaya uğraması nəticəsində Azərbaycan Ordusunun hərbi qulluqçuları Həsən İsmayılov və Səxavət Axundov həlak olub.

Xaçmaz rayonunun Sayad kəndində doğulub-böyüyən Səxavət Axundov 2022-ci ilin oktyabrında hərbi xidmətə yollanıb. Onun ilyarımlıq hərbi xidməti 2024-cü ilin aprelində başa çatacaqdı.

Bildiyimiz kimi cənab Prezident İlham Əliyev mütəmadi olaraq bütün məmurlardan vətəndaşların rifahı üçün zəruri tədbirlərin həyata keçirilməsini tələb edir.
Amma bir çox məmur göstərişlərə əməl qoymadan vətəndaşları incitməklə məşquldur.
Beləki, Azərbaycan Yerüstü Nəqliyyat Agentliyinə (AYNA) tapşırılan işlərdən biri parklanma yerlərinin təşkilidir.
Həmin yerlər təşkil edildikdə qurum tərəfindən mütləq şəkildə müvafiq qanunvericilyə əsaslanmaq tələb edilir.
Beləki, parklanma yerlərinin təşkili "Yol Hərəkəti haqqında" qanunun 53-cü maddəsi ilə tənzimlənir.
Həmin maddənin tələbinə əsasən parklanma yerləri təşkil edildiyi avtomobil yollarının kənarlarında yerləşən evlərdə və ya binalarda yaşayan minik avtomobillərinin istifadəçiləri üçün onların müraciətinə əsasən müvafiq icra hakimiyyəti orqanı tərəfindən pulsuz parklanma yerləri ayrılır və onlara nəqliyyat vasitəsinin istifadəçisi, markası, dövlət qeydiyyat nişanı, parklanma ərazisi və etibarlıq müddəti göstərilməklə fərdi parklanma talonu verilir.
Lakin vətəndaşlardan mütləq şəkildə həmin ünvanda qeydiyyata düşmələri tələb edilir.
Qanuna görə maddənin siyahısı müvafiq icra hakimiyyəti orqanı tərəfindən müəyyən edilən dövlət orqanlarının yerləşdiyi inzibati binaların ətrafında müvafiq icra hakimiyyəti orqanının hər biri üçün ayrılıqda müəyyən etdiyi radius çərçivəsində ödənişli parklanma yerlərinin təşkili qadağandır.
Cərimə təşkili ümumi olaraq hansı prinsiplərə uyğun olar təşkil edilir ?
Hər bir məntəqəyə ezam edilmiş bələdçi şərti adı verilən şəxs, onun iş prinsipi nədən ibarətdir ?
Bələ görsənir ki, vətəndaş parklanma yerinə gəldikdə yerin seçimini edir, avtomobilini saxlayır, lakin bələdçi seçilən yeri bəyənməyərək və ya səhv olmasını hesab edərək vətəndaşa yenidən parklanma başladır, daha sonra vətəndaşlara açılan müddətə görə cərimə tərtib edilir .
Halbuki vətəndaş hec xəbərdar olmur ki ona kimsə parklanma müddəti başladır . Bəs cərimələrin qeydləri kim tərəfindən qeydə alınır?
AYNA-nın müfəttişləri harada olur? Müfəttiş ərazidə görsənmədiyindən belə çıxır ki, ciddi qanun pozuntusu edilərək üçüncü şəxslərin qeydə aldığı fotolar əsnasında cərimələr tərtib edilir.
Azərbaycan Respublikası Nazirlər Kabinetinin 2019-cu il 22 aprel tarixli 187 nömrəli gərarı ilə tanış olsaq daha çox nöqsan taparıq.
Sonda zəruri bir qeyd edim.Mən AYNA,nəqliyyat haqqında dəfələrlə yazılarla çıxış etmişəm.
Hər dəfə də qarşı tərəf mövqeyini bildirmək əvəzinə fərqli üsullara əl atırlar.Gah trolları işə düşür, gah müxtəlif təkliflər verilir, gah da təzyiqləri işə salırlar.
Hörmətli AYNA təşkilatının rəhbərliyi, trollarınıza deyin öz yolları ilə getsinlər.
Siz isə yaxşı olardı problemlərin həlli yollarını axtarıb tapasınız.
Sima Babayeva
Teref: Xocanın blogu

Ağcabədi rayonu, Yeni Qaradalaq kənd sakini, hal-hazırda Binə qəsəbəsi, Xəzər rayonu, Südçülük sovxozunda yaşayan Bayramov Rəfael Əhməd oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi bildirir ki, onun pensiyası qeyri-qanuni olaraq kəsilib:

"Mən, Bayramov Rəfael Əhməd oğlu, yazaraq sizdən xahiş edirəm ki, problemimi işıqlandırın.

İllərdir hara müraciət edirəmsə, bir kəlmə deyib, canlarını qurtarırlar. Axı, mənə əllillik niyə düşmür?! Əllillik düşmürsə, onda sağlamlıq haqqında arayış verin. Artıq yorulmuşam, sanki mən başqa bir dövlətin vətəndaşıyam.

2015-ci ildə insult xəstəliyi keçirdim. Beynimə qan sızmışdı. Mənə həkim diaqnozu ilə 2-ci qrup əllilik verildi. İki il əvvəl - 2021-ci ildə pensiyamın qarşısını bağladılar, yəni kəsdilər.

Saxta heç nə etmədiyimi bildiyimə görə, problem etmədən komissiyadan keçməyə getdim. Sistemə mənim məlumatlarımı daxil etdilər, lakin imtina gəldi.

Narazılığımdan sonra məni 1 saylı Şəhər Klinik Xəstəxanasına göndərdilər. Orada tam xəstə olduğum müəyyən olundu. İkinci dəfə yenə sistemə vurdular, bu zaman yenə imtina gəldi. Bu dəfə məni başqa bir xəstəxanaya - "Zəfəran" Hospitalına göndərdilər. Orada da yenə təsdiq olundu ki, bir tərəfim işləmir. 3-cü dəfə yenə sitemə vurulsa da, imtina cavabı verildi.

Həkim məsləhət gördü ki, get "DOST" Xidmətinə, orada sənə kömək göstərərlər. Mərkəzdə mənə kömək göstərilmədi, yol göstərdilər. Mənə məhkəməyə müraciət etməyimi məsləhət gördülər. Hal-hazırda pensiya almıram, müalicəm, dolanışığım yoxdur. Məhkəməyə müraciət etmək üçün rüsüm ödəmək lazımdır, pulsuz olmur. Mənə kömək edin, bu qədər özbaşınalıq olmaz axı".

Məsələ ilə bağlı Dövlət Sosial Müdafiə Fondu ilə əlaqə saxladıq. Bildirdilər ki, vətəndaşın şikayəti araşdırılacaq.

"Zara" mağazalar şəbəkəsindəki biabırçılıq alıcıların da narazılığına səbəb olub.

32gun.az-a daxil olan məlumata görə, çirk basmış ayaqqabılar mağazada endirimli adı ilə satışa çıxarılıb.
Belə ki, açıq rəngli və üstü palçıqlı "botlar" endirimli piştaxtada satılır.
Fotolar "GanclikMall"da yerləşən "Zara" mağazasında çəkilib.

Bundan əlavə paltar-dəyişmə yerlərinin də çirk içində olduğu deyilir.