Bakı şəhəri, H.B.Əliyev küçəsi 6, mənzil 51-də yaşayan Məmmədova Xanım Bəylər qızı tərəfindən “Hürriyyət” qəzetinin redaksiyasına şikayət məktubu daxil olub. Şikayətçi iddia edir ki, qızı Nigar Məmmədovaya layiq olduğu elmi dərəcəni vermirlər. Şikayətçinin redaksiyamıza göndərdiyi məktubu ixtisarla təqdim edirik:

“Hörmətli redaksiya!

Keçən ilin may ayında, qızımın dissertasiya müdafiəsi ərəfəsində Ali Attestasiya Komissiyasında mövcud olan iki korrupsiya tələsi haqqında bizə ətraflı məlumat verdilər. Dedilər ki, iddiaçıların hamısını bir nəfər kimi ekspert şuralarına çağırırlar və onları orada sındırıb, öz məqsədlərinə çatana kimi get-gələ salırlar. Ekspert şuralarına gələ bilməyən iddiaçılar üçün yalançı plagiat düzəldib, deyirlər “get gör neynəyirsən”.

Bu məlumatdan sonra, həmin tələləri ləğv etdirmək məqsədi ilə ölkəmizin Prezidentinə, Birinci vitse-prezidentə, Milli Məclisin sədrinə, Prezident Aministasiyasının rəhbərinə, Birinci vitse-prezidentin Katibliyinin rəisinə, DTX rəisinə, Baş Prokurora çoxsaylı müraciətlər etdim. Heç bir tədbir görülmədi.

Ali Attestasiya Komissiyasında qızımın dissertasiyasının təsdiqi bizə əvvəlcədən məlum olan ssenari üzrə getdi. Belə ki, qızımın dissertasiyasını 07.10.2022-ci il tarixdə təsdiq üçün Ali Attestasiya Komissiyasına təqdim etdilər və 11.10.2022-ci il tarixdə qeydiyyata aldılar. 11.01.2023-cü il tarixdə dissertasiyaya baxılma müddəti bitdiyindən, qızımın müdafiə etdiyi Elmi Şuranın katibindən dissertasiya barədə soruşduq, o isə Ali Attestasiya Komissiyası ilə əlaqə saxlayıb bildirdi ki, Ekspert Şurasının 16.01.2023-cü il tarixdə keçiriləcək iclasında qızımın dissertasiya işi müzakirəyə çıxarılacaq və qızımı bu iclasa dəvət ediblər. Soruşduq ki, bu nə cür dəvətdir, bizim xəbərimiz yoxdur? Dedilər ki, bu cənablar, Ali Attestasiya Komissiyasına verilmiş əlaqə telefonuna dəvət barədə mesaj göndərirlər.

14.01.2023-cü il tarixdə Ali Attestasiya Komissiyasının sədrinə qızımın xaricdə ikinci təhsil alması və onu Bakıya gətirdmək üçün bizim maliyyə vəsaitimizin olmaması barədə teleqram vurdum. 16.01.2023-cü il tarixdə qızımın Ekspert Şurasında iştirkının mümkünsüzlüyünü bilən kimi, onun dissertasiyasını plagiat yoxlanışına göndəriblər. Halbuki, plagiat yoxlanışı Ali Attestasiya Komissiyasının vəzifəsi deyil və bu qanunsuz hərəkətdir… Ən əsas da odur ki, iddiaçını tələyə salmaq üçün plagiat yoxlanışını müdafiədən qabaq deyil, dissertasiyaların təsdiqinin son mərhələsində aparırlar. Məqsəd iddiaçını “yükləməkdir”. Bu yükün ağırlığı, “Attestasiya komissiyasında rüşvətxorluq, qohumbazlıqdır” sərlövhəsi adı altında saytların birində dərc olunan yazıda qeyd edilib: “İllər keçir, Ali Attestasiya Komissiyasında rəhbərliklər dəyişir. Ancaq bir dəyişməyən üsul-idarədir, rüşvətxoşluuqdur, korrupsiyadır. Bu illər ərzində hətta elmi dərəcələrin qiyməti də 20 mindən 30 minə qədər qalxdı. Hətta pulundan keçib bunu ödəyərək adlar, dərəcələr alanlar da oldu. Milyonlarla belə faktlar ictimailəşsə də hələ ki, heç nə dəyişməyib, al-ver davam edir…”.

30 min manatı biz haradan alaq? Bu açıqlamada yazılanlar əsasında demək olar ki, Ekspert Şuraları, əslində, qapalı əqli mülkiyyət hərraclarıdırlar. Pulun varsa, əqli mülkiyyətin olan dissertasiyanı özəlləşdirirsən, yoxdursa xoş getdin. Amma bu hərraclarda yığılan pullar dövlətə deyil, ciblərə gedir. Plagiat hoqqasının məğzi də bundan ibarətdir…

5.13.02.2023-cü il tarixdə Ali Attestasiya Komissiyası sədrinin müavini S.Cabarovun mənim qızıma göndərdiyi məktubunu bizə təqdim ediblər. 08.02.2023-cü il tarixli, 3-50/2-70/2023 saylı məktubunda bu cənab bildirir ki, “Ali Attestasiya Komissiyasının Kollegiyası dissertasiya işində müəllifinə və mənbəyinə istinad verilmədən digər müəlliflərin materiallarından istifadə olunduğunu və iqtisad elmləri üzrə ekspert şurasının tövsiyəsini nəzərə alaraq 06.02.2023-cü il tarixli qərarı ilə iddiaçı Nigar Arzu qızı Məmmədovaya “Dəyər zəncirinin genişləndirilməsi kontekstində Azərbaycan neft-kimya sənayesinin dünya bazarına inteqrasiyasının rasional istiqamətləri” mövzusunda 5310.01 –“Dünya iqtisadiyyatı” ixtisasında iqtisad elmləri üzrə fəlsəfə doktoru elmi dərəcəsi verilməsindən imtina etmişdir”.

Bu qərar gözlənilən idi. Qızımın müdafiəsindən əvvəl, bu ssenari ilə bizi tanış etmişdilər. Bu məktubu alandan sonra qızım, Ali Attestasiya Komissiyasının Kollegiyasının qərarının təsdiq edilmiş surətinin və plagiat hesabatının verilməsi barədə Komissiya sədrinin adına elektron ərizə ünvanladı. Qızım mənə vəkalətnamə verdiyi üçün, mən də analoji müraciəti etdim və bundan əlavə Komissiya sədrinin adına iki dəfə teleqram göndərdim. Kollegiyanın qərarını bizə vermədilər. Bu günə kimi bizə bu qərarı vermirlər. Bir müddət keçəndən sonra qızımın elekrom poçtuna “palgiat faktları” barədə imzasız və möhürsüz sənəd göndərdilər. 04.03.2023-cü il tarixdə qızım bu “plagiat faktları”na yazdığı izahatı, Ali Attestasiya Komissiyasının Kollegiyasının onun barəsində çıxardığı, lakin tanış olmadığı qərarından şikayət ərizəsi ilə birlikdə Ali Attestasiya Komissiyasının poçt ünvanına göndərdi. Mən bu sənədin pdf formatını Bakıda çap etdirib, poçtla Ali Attestasiya Komissiyasına göndərdim.

Həyat yoldaşım göndərilmiş plagiat sənədini rus dilinə tərcümə edib, rus iqtisadçıları ilə müzakirə etdi və mart ayında Ali Attestasiya Komissiyasının sədri Famil Mustafayevin qəbuluna yazıldı. Mart ayının birinci həftəsinin tam olmadığını bəhanə edərək, bu qəbulu keçirmədilər. Halbuki, Ali Attestasiya Komissitasının saytında birinci həftənin tam olub-olmaması barədə heç nə yazılmayıb. Mart ayının 17-də həyat yoldaşımı Ali Attestasiya Komissiyasının şöbə müdiri Mübariz Məmmədlinin qəbuluna dəvət etdilər. Həyat yoldaşım Mübariz müəllimdən təkidlə xahiş edib ki, plagiat faktları sənədinin müəlliflərini çağırsınlar və bu sənəddəki faktların əssasız və mənasız olduğunu onlara sübut etsin. Həyat yoldaşımın bu xahişini nəzərə almadılar.

Sonra Ali Attestasiya Komissiyasının Aparat rəhbərinin qəbulunda olanda da eyni xahişi edib və xahişini yerinə yetirməyiblər. 17 aprel tarixində mənim həyat yolaşım, Ali Attestasiya Komissiyası sədrinin müavininin qəbulunda olmuş, orada bəyan etmişdir ki, bir gündən sonra Famil Mustafayevin qəbulunda olacaq və onun plagiat adlandırdığı faktların hansının üstünə barmağını qoysa, ona bu faktın plagiat olmadığını sübut edəcək. Bu söhbətin videosuna baxandan sonra, Famil Mustafayev mənim həyat yoldaşımı qəbul etməkdən imtina etdi və qızımın electron poçtuna onu 26.04.2023-cü il tarixdə Ekspert Şurasının iclasına dəvət barədə imzasız və möhürsüz məlumat göndərtdirdi. Biz bu adama başa sala bilmirik ki, subordinasiya baxımından aşağı orqan olan Ekspert Şurası Kollegiyanın qərarını ləğv edə bilməz…

Həyat yoldaşım Ali Attestasiya Komissiyasında qəbullarda olanda ona deyiblər ki, “Ekspert Şurasında qızınızın apelyasiya şikayətinə baxırlar və əgər gızınız verilən suallara Şura üzvlərinin xoşuna gələn cavablar versə, Kollegiyaya tövsiyyə edəcəklər ki, qızınıza elmi dərəcənin verilməməsi barədə çıxardığı qərarı ləğv etsin”. Birincisi, mənim qızım apelyasiya şikayəti verməmişdir. O, “Elmi dərəcələr verilməsi qaydası haqqında Əsasnamə”sinin 10.1. maddəsinə əsasən şikayət vermişdir. Apellyasiya şikayətini Apellyasiya Şurasına sahibkarlıq fəaliyyəti ilə məşğul olan sahibkarlar verə bilərlər. Ali Attestasiya Komissiyasında yaradılmış Apellyasiya Şurasının Əsasnaməsinin 1.1 maddəsinə əsasən “Azərbaycan Respublikasının Prezidenti yanında Ali Attestasiya Komissiyasının (bundan sonra – Komissiya) Apelyasiya Şurası (bundan sonra – Apelyasiya Şurası) sahibkarlıq fəaliyyəti göstərən fiziki və hüquqi şəxslərin özlərinin sahibkarlıq fəaliyyəti ilə bağlı Komissiyanın qərarlarından, digər hərəkət və ya hərəkətsizliyindən (bu Əsasnamənin 1.7-ci bəndində nəzərdə tutulmuş hallar istisna olmaqla) verdikləri şikayətlərə, habelə dövlət qulluğuna qəbulla bağlı keçirilən müsahibənin nəticələrindən namizədlərin verdikləri şikayətlərə (bundan sonra – şikayət) baxan və ictimai (ödənişsiz) əsaslarla fəaliyyət göstərən kollegial orqandır”. Və həmin əsasnamənin 5.1.3. maddəsinə əsasən şikayətçinin şikayət ərizəsində onun VÖEN-inin göstərilməsi tələb olunur. Mənim qızım sahibkar deyil, onun VÖEN-i yoxdur. Famil Mustafayev Ekspert Şurasını hətta Apellyasiya Şurası kimi qəbul etsə belə, qızımın verdiyi şikayət orada baxılmamalıdır. Çünki Ekspert Şurasının verdiyi tövsiyyə əsasında Kollegiya elmi dərəcənin verilməməsi barədə artıq qərar qəbul edib. Ya Famil Mustafayevin qanundan xəbəri yoxdur, ya da ki, şəxsi maraqları naminə özünü qanundan xəbərsiz kimi aparır. Çünki Azərbaycan Qanunlarına uyğun olmayan ekspert şuralarının əsasnaməsini, plagiat qaydalarını və s. düzədib, öz məqsədlərinə çatmaq üçün düşüblər iddiaçıların üstünə. Ekspert şuraları haqqında düzəltdikləri əsasnamədə, ekspert şuralarının vəzifələrindən biri “dissertasiya şuralarının və Komissiyanın qərarlarından verilmiş şikayət ərizələrinə (apellyasiyalara) baxılması və müvafiq tövsiyələrin hazırlanması”dır. “Elmi dərəcələr verilməsi qaydası haqqında Əsasnamə”də “şikayət “ sözü var, “şikayət ərizələri (apellyasiyalar)” sözü yoxdur. Şikayət və apelyasiya şikayətinin fərqini mən yuxarıda izah etdiyim üçün, bir daha bu məsələyə qayıtmaq istəmirəm. Komissiyanın qərarından verilmiş şikayətin Ekspert Şurasında baxılmasının İnzibati İcraat haqqında Qanuna zidd olması da yuxarıda Qanunun maddələri ilə əsaslandırıldığından bu məsələyə bir də qayıtmıram.

Famil Mustafayev və onun əməkdaşları aşkarladıqları plagiat faktlarını mənim həyat yoldaşımla müzakirə etməkdən çəkinirlər. Hesab edirlər ki, plagiat faktları iddiaçı ilə müzakirə edilməlidir. Bu bəhanə də əsassız və qanunaziddir. Belə ki, “Elmi dərəcələr verilməsi qaydası haqqında Əsasnamə”yə görə şikayətə inzibati qaydada “İnzibati icraat haqqında” Azərbaycan Respublikasının Qanununa uyğun olaraq baxılır. Bu qanunun 79.1 maddəsinə əsasən, “İnzibati şikayətlər üzrə icraat bu fəslin xüsusiyyətləri nəzərə alınmaqla bu Qanunun IV fəslində müəyyən olunmuş qaydada həyata keçirilir”. Həmin Qanunun İV fəslində yer alan 37.1 maddəsinə əsasən, “Fiziki və ya hüquqi (maraqlı) şəxs inzibati icraatda şəxsən iştirak edə bilər və yaxud nümayəndə vasitəsilə təmsil oluna bilər”. Yəni bir daha bu məmurların Qanunları öz məqsədlərinə çatmaq üçün təhrif etdiklərinin şahidi oluruq.

Hörmətli redaksiya!

Elm, dövlətin texniki və texnoloji müstəqilliyinin əsasıdır. SSRİ dövründə Azərbaycan SSR yüksək elmi potensiala, inkişaf etmiş sənaye və kənd təsərrüfatına malik idi. SSRİ dağılandan sonra keçən əsrin 90-cı illərində özəlləşmə adı altında sənaye müəssisələrini qəpik-quruşa özəlləşdirib, həmin müəssisələrin böyük əksəriyyətini dağıdaraq, İrana mettallom kimi satdılar. Bu özəlləşdirmənin iştirakçılarından biri Ali Attestasiya Komissiyasının sədri Famil Mustafayev olmuşdur. Dağıdılan sənaye obyektlərindən biri və ən nəhəngi neft-kimya kompleksi olmuşdur. Mənim qızımın dissertasiyası bu kompleksin bərpasına və fəaliyyətinin təkmilləşdirilməsinə həsr edilib. Famil Mustafayev dağıdıcı fəaliyyətini davam etdirərək, bir vaxtlar dağıdılmasında iştirak etdiyi kimya kompleksinin bərpası və fəaliyyəti üçün əhəmiyyətə malik olan dissertasiyanın təsdiqinə imkan vermir. Al Attestasiya Komissiyasında mövcud olan qaunusuzluqlar və özbaşınalıqlar barədə mənim Azərbaycanın dövlət rəhbərlərinə etdiyim çoxsaylı müraciətlərin hamısı bloklanır. Heç bir tədbir görülmür.

Biz pulsuz olduğumuz üçün, qızıma layiq olduğu elmi dərəcəni vermirlər”. //“Hürriyyət”//

Azərbaycan Respublikasının Əmək və Əhalinin Sosial
Müdafiəsi Naziri cənab Sahil Babayevə

Ucar rayonu Pirkənd kəndində yaşayan Həşimov Elmin Yaşar oğlu tərəfindən

MÜRACİƏT

Hörmətli cənab nazir, mən mətbuat vasitəsi ilə Sizə bildirirəm ki, aztəminatlı ailə olaraq ünvanlı sosial yardım almaq üçün 14.03.2023-cü il tarixində etdiyimiz müraciətə imtina verilib. İmtinanın səbəbi kimi «Ailənin əmlakının düzgün qeyd edilməməsi» göstərilib. Bu əsassız və qanunsuz verilmiş imtinadır. Çünki biz əmlaklarımız barədə bütün məlumatları sistemdə qeyd etmişik.

Qeyd edim ki, bundan əvvəlki 10.11.2022-ci il tarixində ünvanlı dövlət sosial yardım almaq üçün etdyimiz müraciətimizə aylıq 376,33 AZN pul təyin olunmuşdu. Həmin vaxt müraciət edəndə bir neçə dəfə «Ailənin əmlakının düzgün qeyd edilməməsi» barədə belə əsasız və qanunsuz olaraq imtinalar verilirdi. Lakin Sizə həm rəsmi ərizə və media vasitəsi ilə müraciət etdikdən sonra ailəmə ünvanlı dövlət sosial yardımı təyin olundu.

Üç ay sosial yardımı aldıqdan sonra bu ilin fevral ayında həyat yoldaşım daimi işlə təmin olunduğu ilə əlaqədar ailəmizin gəliri artdığı üçün verilən sosial yardım dayandırıldı və yoldaşım maaş aldıqdan sonra yenidən sənədləri toplayıb ünvanlı dövlət sosial yardım almaq üçün müraciət etdik və yuxarıda qeyd etdiyim kimi təssüf ki, yenədə əsassız və qanunsuz imtina verilir.

Mənim və həyat yoldaşımın, hər birimizin bir pay torpağı var. Həyat yoldaşımın 4 nəfər payçının paylı mülkiyyəti olan A seriyalı, 2722008744 nömrəli, 904013018955 reyestr nömrəli 0,67 hektar pay torpağı, mənim isə 6 nəfər payçı ilə paylı mülkiyyət olan A seriyalı, 2722008983 nömrəli, 904013043140 reyestr nömrəli 0,34 hektar pay torpağım var. Eyni zamanda həyat yoldaşım Həşimova Gülzar Namət qızının adına Ucar rayon Qaracallı kəndində valideynləri ilə birlikdə paylı mülkiyyət olan ev var. Bu üç əmlakdan başqa mülkiyyətimiz yoxdur. Hər üç əmlakıda qeyd etmişik.Əmlakımızda dəyişiklik olmadığı halda necə ola bilər ki, ünvanlı dövlət sosial yardım alamq üçün 10.11.2022-ci il tarixində etdiyimiz müraciətə təyinat verilir, amma 14.03.2023-cü il tarixində olan müraciətimizə əmlakın düzgün qeyd edilməməsi bəhanəsi ilə imtina verilir.

Himayəmdə iki azyaşlı övladım var. Oğlum xəstədir və sağlamlığı məhdud uşaq kimi sosial müavinət alır. Özümdə üçüncü qrup əliləm. İşləyə bilmirəm, daimi iş yerim yoxdur. Ailəmin maddi vəziyyəti həddindən artıq kasıb vəziyyətdədir.

Hörmətli cənab nazir mən bir daha mətbuat vasitəsi ilə Sizdən xahiş edirəm məni şəxsən özünüz qəbul edəsiniz. Mən həmin qəbulda bu müraciətdə qeyd etdiyim faktlarla bağlı subutlarımı şəxsən Sizə təqdim edəcəm

Hörmətlə:Həşimov Elmin Yaşar oğlu

İqtisadçı: “Əgər bu vergi aşağı salınsaydı, o zaman 59 manatlıq ərzaq səbəti müştərilərə 51 manata başa gələcəkdi”

Bakıda qiymətlər günlə deyil, saatbasaat artır. Ərzaq xüsusilə, bahalaşır - alıcılar qiymət etiketlərinin artımını izləmək mümkün olmadığını etiraf edirlər. Mallar rəflərdən yoxa çıxır və sonra yenidən görünür, lakin fərqli, bahalı qiymət etiketi altında.

Bizdə qiymət artımı məhz belə ssenari ilə baş verir. Paytaxt sakini Firuzə İbrahimova belə deyir: “Əgər məhsul birdən-birə satışdan itibsə, bu o deməkdir ki, tezliklə, lakin daha baha qiymətə satışa çıxarılacaq”. – Məsələn, bu yaxınlarda mağaza rəflərindən “Snickers”, Mars və “Bounty” şokoladlarını yığışdırdılar. Mən onları tez-tez uşaqlarım üçün alırdım və səkkiz yaşlı oğlumun ona şokolad almaq üçün başqa növbəti xahişindən sonra aşkar etdim ki, bu şokoladlar demək olar ki, bütün mağazalardan yoxa çıxıb. Mənim təxminim doğru idi. İki və ya üç həftədən sonra həmin mallar eyni vaxtda bütün rəflərə qayıtdı, lakin artıq iki dəfə baha qiymətlə”.

Bir məhsulun paylama şəbəkəsindən qəfil yoxa çıxması qiymət artımının əmin, lakin zəruri əlaməti deyil. Daha doğrusu, qiymət etiketləri elə oradakı vitrinlərin üzərinə mağazanın ərzaq şöbəsində yenidən yazılır, alıcı paylaşır: “Dünən bir qiymətə almışam, sabah isə qəfil qalxır və daha ucuzunu axtarmaq lazım gəlir. Axı bu yarışda maaş açıq şəkildə uduzur. Mənim maaşım dəyişmir, amma qiymət dəyişir, hər şey çox tez bahalaşır”.

Alıcılar etiraf edir ki, bu il mart-aprel aylarından başlayaraq ərzaq məhsullarının qiyməti əvvəlki kimi sürətlə bahalaşmır. Kənd təsərrüfatı məhsullarının baha olması vətəndaşları narahat edir. İlk meyvə və tərəvəzlər çox vaxt mərkəzi pərakəndə satış şəbəkələrinin əksər ziyarətçilərinin “əlini yandırır”, buna görə də orada və şəhər mağazalarında bu məhsulların qiymətində iki, hətta üçqat fərq olduğuna görə, çoxları ölkə bazarlarına üz tuturlar.

“Dünən mağazadan alçanının kiloqramını 7 manata almışam, axşam bazarında isə endirimlə cəmi 2 manat 50 qəpiyə satılır. Bilmirəm niyə belə böyük fərq var, amma bundan sonra bazardan mal alacağam”, - deyə meyvə-tərəvəz piştaxtası qarşısında dayanan vətəndaş bildirib.

Həqiqətən də mağazalarda ağız sulandıran pomidorun, təzə kartofun, yaşıl lobyanın qiyməti may ayında ucuzlaşsa da, bazardakından xeyli fərqlənir. Yerli iqtisadçılar bunun səbəblərini müxtəlif faktorlarda görürlər.

İqtisadçı ekspert Natiq Cəfərlinin AYNA-ya bildirdiyinə görə, biznes xərclərini azaltmaq və qiymətləri aşağı salmaq üçün hökumətə ərzaq seqmentində əlavə dəyər vergisini aşağı salmaq təklif olunub: “Lakin hökumət bu addımla razılaşmadı, amma nədənsə bəzi meyvələri 15 faizlik gömrük rüsumundan azad etdi... Bəli, söhbət ölkəyə idxal olunan tropik meyvələrdən gedir!”.

“Daxili ticarət şəbəkəsinin tropik çeşidi həqiqətən idxal vergisindən xilas oldu. Bu sevindirici hadisə Nazirlər Kabinetinin “Xarici iqtisadi fəaliyyətin mal nomenklaturası” adlanan sənədə etdiyi dəyişikliklərdə özünü göstərir. Fərman gələn ilin yanvarından tətbiq ediləcək və 2030-cu ilin dekabr ayının sonuna qədər qüvvədədir. Düzdür, bunun əhaliyə demək olar ki, təsiri yoxdur. Axı hansımız bütün günü papaya və ananas yeyirik? Baxmayaraq ki, bəlkə də bu, hökumət üzvləri üçün adi menyudur. Əks halda, kartofun qiyməti rekordları qırdığı vaxt, niyə birdən-birə tropik ləzzətlər üçün belə bir narahatlıq yarandı?”, - iqtisadçı vurğulayıb.

“Cüzdanlarımızın içindəkiləri xilas etməyə çalışan Azərbaycan hökuməti tropik meyvələri gömrük rüsumlarından azad etdi. Ola bilsin ki, bəzilərimiz səhər tezdən avokado, marakuya meyvəsi və ramburanın dadına baxmadan işə getmirik. Amma hamı üçün olan gündəlik darıxdırıcı menyudakı 18 faiz ƏDV-nin 2 faizə endirilməsi hökumət tərəfindən lazımsız görüldü. Əgər bu vergi aşağı salınsaydı, o zaman 59 manatlıq ərzaq səbəti müştərilərə 51 manata başa gələcəkdi”, - Cəfərli deyib.

Qlobal ərzaq qiymətlərinin aşağı düşməsi ilə bağlı məlumatlara baxmayaraq, ölkəmizdə ərzaq inflyasiyası davam edir. Dövlət Statistika Komitəsinin məlumatına görə, yanvar və fevral aylarında Azərbaycana idxal olunan məhsulların qiymətləri ötən illə müqayisədə nəinki azalmayıb, hətta 21 faiz artıb. Bir sözlə, fevralda idxalın dəyərinin yanvar ayı ilə müqayisədə daha bir faiz artması və ötən ilin fevral ayı ilə müqayisədə 20,4 faizə qədər artması təəccüblü deyil.

Müəllif: Emma Rzayeva

"Məhkəmə - hüquq sistemində, özəlliklə inzibati məhkəmə sahəsində özbaşınalıq, qeyri-prosessuallıq, icra hakimiyyətindən buyruq gözləmək, məhkəmə təcrübəsinin vahidliyi prinsipinin pozulması Prezidentin 03.04.2019 -cu il tarixli “Məhkəmə- hüquq sistemində islahatların dərinləşdirilməsi haqqında” fərmanından sonra daha da “dərinləşib”". Bu barədə DİA.AZ-a göndərilən məqalədə deyilir.
Məqalədə daha sonra bildirilir: "Elə bil , fərman verilib ki, vətəndaşların Konstitusiyanın 60-cı maddəsi ilə doğrulanan inzibati və məhkəmə təminatı hüququna iddianın mümkün sayılmaması haqqında qərardadla qadağa qoyulması məhkəmə təcrübəsinin vahidliyi prinsipini təşkil etsin! (?) Halbuki məhkəmə təcrübəsinin vahidliyi prinsipinə görə, İDDİANIN MÜMKÜN SAYILMAMASI HAQQINDA QƏRARDAD, YENİDƏN MÜMKÜNLÜK ŞƏRTLƏRİNƏ ƏMƏL ETMƏKLƏ, EYNİ PREDMET ÜZRƏ İDDİA QALDIRMAQ İMKANINI İSTİSNA ETMİR. Ali Məhkəmə Plenumunun 10 aprel 2015-ci il tarixli “ İnzibati məhkəmə icraatında iddianın mümkünlüyünə dair” 5 saylı qərarının 8.3 bəndində belə yazılıb.
Prezident . sözügedən fərmanının 3.2 bəndi ilə Ali Məhkəməyə və Məhkəmə Hüquq Şurasına tövsiyə edib, Ədliyyə Nazirliyinə tapşırıb ki, məhkəmələrin hüquqi məsələlərin həllinə yanaşmasının SABİTLİYİNİ və normativ hüquqi aktların tətbiqi ilə bağlı hüquqi mövqeyinin proqnozlaşdırılan olmasını tətbiq etmək məqsədilə Azərbaycan Respublikası Ali Məhkəməsinin VAHİD MƏHKƏMƏ TƏCRÜBƏSİ formalaşdırmaq vəzifəsinin və həmin vəzifənin İCRA EDİLMƏSİ mexanizminin təsbit edilməsinə dair normativ hüquqi aktların layihələrini hazırlayıb iki ay müddətində Azərbaycan Respublikasının Prezidentinə təqdim etsinlər. 4 il -24 iki ay keçib hələ də iddianın mümkün sayılmaması haqqında Şəki İnzibati-İqtisadi Məhkəməsinin 15.02.2019-cu il tarixli qərardadı Azərbaycan Respublikasının inzibati məhkəmə sistemində Konstitusiya aktı kimi qüvvədədir. Görəsən, Ali Məhkəmə, Məhkəmə-Hüquq Şurası , Ədliyyə Nazirliyi Prezidentin tövsiyəsinə, tapşırığına necə əməl edib ki, hələ də Bakı İnzibati Məhkəməsi, Bakı Apellyasiya Məhkəməsinin , Ali Məhkəmənin İnzibati Kollegiyası, hətta Konstitusiya Məhkəməsi “Şəki dövləti” adından” 4 il qabaq Vəkillər Kollegiyasının intizam komissiyasının üzvü, fərdi vəkil Əlirza Həbilovun keçmiş həmkarı İlqar Cabbarova qəbul etdirdiyi saxta 15.02.2019-cu il tarixli iddianın mümkün sayılmaması haqqında qərardadı ölkədə ən yüksək hüquqi qüvvəyə malik olan qanun kimi tətbiq edir? !
Bakı Apellyasiya Məhkəməsinin İnzibati Kollegiyasının Şərafət Məmmədova, Pərviz Hüseynov və Cahangir Yusifovdan ibarət heyətinin tərəflərin hüquq bərabərliyi, çəkişmə prinsipinə əməl etməkdən imtinasından sayılı günlər keçir. Bakı İnzibati Məhkəməsinin hakimi Orxan Həsənovun bir illik süründürməçiliyinə hüquqi qiymət vermək əvəzinə, yuxarı instansiya özü də süründürməçiliklə, hüquq bərabərliyi, məhkəmə təcrübəsinin vahidliyi prinsipini pozmaqla məşğuldur. Yuxarı instansiya məhkəməsi bilmir ki, prosessual müddət şikayətin məhkəməyə daxil olduğu yox, rabitə orqanına verildiyi vaxtdan sayılır. Aşağı – yuxarı məhkəmə hakimləri bilmir ki, prosesin istənilən mərhələsində hər kəsin müdafiə hüququ təmin olunur, iddianın mümkün sayılmaması haqqında qərardad yenidən eyni predmet üzrə iddia qaldırmaq imkanını istisna etmir, iclasının protokolu olmayan məhkəmə aktının ləğvi mütləqdir? ! Yoxsa 1-ci dərəcəli Qarabağ qazisinə ilgidə qərəz sərgiləyirlər? Axı məhkəmə icraatında qərəz, ədalətsizlik, tərəfgirlik yolverilməzdir! Təsəvvür edin, Orxan Həsənovun 8 ay mümkünlük adı ilə süründürməçilikdən sonra üç dəqiqəlik hazırlıq iclasında (İPM-ə görə, hazırlıq icraatında mümkünlük məsələsi həll olunmur) iddianın mümkün sayılmaması haqqında qəbul etdiyi qərardadda nə iclasın protokolu var, nə iclas katibinin və cavabdehlərin nümayəndələrinin adı. Belə savadla necə hakim seçilməni bir qırağa qoyaq, bəs yuxarı məhkəmə? Şərafət Məmmədova, Pərviz Hüseynov və Cahangir Yusifov üçlüyü niyə aşağı instansiyanın qanunsuzluğunu, özbaşınalığını müdafiə edir? Niyə vəkil Əlirza Həbilovun VK-dakı vəzifəsindən sui-istifadə etməklə DİN-in adından məhkəməyə göndərdiyi 3 ilin vəkili Orxan Qılman oğlu Babayev DİN-in nümayəndəsi kimi qəbul edilir, amma 1-ci dərəcəli Qarabağ əlilinə vəkil ayrılmasından imtina edilir? Tərəflərin hüquq bərabərliyi prinsipinə belə əməl edilir? Protokolu olmayan işi ləğv etmək yerinə, qıraqdan sifarişlə apellyasiya baxışından çıxarmaq hansı hüquqdan soraq verir?
Ali Məhkəmənin yeni sədri İnam Kərimovun Prezidentin tövsiyəsinə sözdə yox, işdə əməl edəcəyinə inam böyükdür. Kənd quzusuna göstərilən diqqət və qayğıdan Qarabağ qazilərinə pay düşmür? Qazinin məhkəmədən istəyi yalnız obyektivlik , qərəzsizlik, məhkəmə təcrübəsinin vahidliyi prinsipinə əməl edilməsidir.
Hələ ki, hakimlərin iddiaçı qaziyə ağzını açmağa imkan vermədən birinci sualı “ŞƏKİ İNZİBATİ-İQTİSADİ MƏHKƏMƏSİNİN 15.02.2019-CU TARİXLİ QƏRARDADININ ÜZƏRİNƏ QOYDUĞU “ÖHDƏLİK” barədədir. Vay o günə “yox” deyəsən, yenə də iddianın mümkünsüzlüyü ilə məhkəmə təminatı hüququnun mümkünsüzlüyü qüvvədə olacaq.
P. S. Vurğulamaq yaddan çıxıb ki, Şəki İnzibati-İqtisadi Məhkəməsinin 15.02.2019 tarixli iddianın mümkün sayılmaması haqqında qərardadı iş üzrə tərəf olmayan inzibati orqanların da əsas sübutu, normativ hüquqi aktı rolunu oynayır. “Şəki dövləti” adından qəbul edilən qərardad DİN-ə qarşı olduğu halda, Bakı İnzibati Məhkəməsi (Orxan Həsənov ) və Bakı Apellyasiya Məhkəməsinin İnzibati Kollegiyası (Şərafət Məmmədova, Pərviz Hüseynov və Cahangir Yusifov) ƏƏSMN tabeliyində DSMF-in Xüsusi Şərtlərlə Təyinat üzrə Mərkəzi Filialının da bu “Konstitusiya aktı”ndan yararlanması təcrübəsini tətbiq edib . Qalır Ali Məhkəmə..."

Yazıda iddia olunanlarla bağlı TEREF.az olaraq bütün maraqlı tərəfləri dinləməyə hazırıq...

Vətəndaş və İnkişaf Partiyasının (VİP) sədri Əli Əliyevin azadlığa çıxması üçün əfv ərizəsi yazması birmənalı qarşılanmadı. Bu addımına görə onu qınayanlar, tənqid edənlər var. Partiya sədri bəziləri tərəfindən “sınmaqda”, “iqtidara təslim olmaq”da suçlanır.

Əli Əliyev azadlığa çıxdığı gün mətbuat konfransında bu məsələyə aydınlıq gətirib. Əfv ərizəsi yazsa da barəsindəki ittihamları əsassız saydığını deyib. O, jurnalistlərə deyib ki, mübarizəsini davam etdirəcək. Bərait almaq üçün lazımı hüquqi prosedurlara baş vuracaq.
Siyasətçilərdən Ə.Əliyevin əfv ərizəsi yazaraq azadlığa çıxmasına münasibət bildirənlər var.

Bütöv Azərbaycan Xalq Cəbhəsi Partiyasının sədri, deputat Qüdrət Həsənquliyev də Ə.Əliyevin əfv ərizəsi yazması ilə bağlı tənqidlərə münasibət bildirib:

“Əli Əliyevin əfv olunmaq üçün müraciət etməsini, Prezidentin də onun partiya sədri olmasını və müraciətini nəzərə alaraq bağışlamasını düzgün hesab edirəm. Bəzi adamlara iqtidarı ittiham etmək üçün “qurbanlar” lazımdır. Onları həbs olunan şəxslərin və ailə üzvlərinin üzləşdiyi məhrumiyyətlər düşündürmür. Belələrinin nə dediyinə əhəmiyyət vermək lazım deyil”.

Bəs bir partiya sədrinin əfv üçün ərizə yazmasının bu kimi reaksiyalara səbəb olmasının səbəbi nədir? Niyə onun azadlığa çıxması bu qədər müzakirələrə səbəb oldu?

Mövzu ilə bağlı Globalinfo.az-a danışan AĞ Partiyanın başqanı Tural Abbaslı bu mövzunun müzakirəsinin ümumiyyətlə doğru olmadığını söyləyib:

“Ümumilikdə əfv sərəncamını müsbət qiymətləndirirəm. Könül istərdi ki, bunun nəticəsində azadlığa çıxanların sayı daha çox olsun. 801 məhkumu əhatə edib, bu say 1500-2000 olsa lap gözəl olardı. İstənilən halda əfv fərmanları humanist addımdır və müsbət qarşılanır. Səhv etmirəmsə, adı siyasi məhbuslar siyahısında olan 2-3 nəfər şəxslər də bunun nəticəsində azadlığa buraxıldılar.

Təbii ki, Əli Əliyevin azadlığa çıxması müsbət haldır, sevindiricidir. Heç bir siyasətçi, partiya sədri öz fikirləri və siyasi fəaliyyətinə görə həbsdə olmamalıdır. Ə.Əliyevin əfv ərizəsi ilə müraciət edib-etməməsi onun şəxsi işidir və kimsə buna müdaxilə edə bilməz. Öz siyasi fəaliyyətini, şəxsi həyatını, karyerasını ölçüb-biçib və belə bir addım atıb.

O baxımdan bu məsələ ilə bağlı partiyaların, siyasi kəsimlərin nə isə deməsini etik hesab etmirəm. Seçicilər, vətəndaşlar isə necə reaksiya verəcəklərini özləri bilərlər. Hər halda bunun Əli bəyin şəxsi seçimi olduğunu düşünürəm və rəqiblərinin də bunu kənardan mənfi, yaxud müsbət qiymətləndirməsi doğru deyil. O, ailəsindən, partiyasından uzaqda həbsdə qalsaydı yaxşı olardı? İndi ən azından azadlıqdadır, fəaliyyətini ölçüb-biçəcək. Ailəsi ilə birlikdə olacaq, nəticədə bir insan azaddır. Ona görə də bu məsələni ümumiyyətlə media və siyasi kəsimdə müzakirə etmək belə yanlışdır. Bu, onun hüququdur”.

“Elə Əli Əliyev başda olmaqla azadlığa çıxan bütün məhkumları ailələrinə qovuşmaları münasibətilə təbrik edirəm. Həbsdə olan digər məhkumlara da tezliklə azadlığa çıxmağı arzulayıram” – deyə, o bildirib.

Qeyd edək ki, Prezident İlham Əliyev məhkum edilmiş bir sıra şəxslərin Azərbaycan xalqının Ümummilli Lideri Heydər Əliyevin 100 illik yubileyi münasibətilə əfv olunması haqqında Sərəncam imzalayıb.

Azərbaycanda pensiyalar yenidən artırıla bilər. Buna səbəb "Sosial Sığorta haqqında" qanuna edilən dəyişiklikdir. Yenilik nəticəsində Dövlət Sosial Müdafiə Fondunun sərbəst vəsaitləri investisiyalara yönləndiriləcək. Yəni fondun gəlirləri xərclərindən çox olarsa, əldə qalan sərbəst kapital əlavə gəlir mənbəyinə çevriləcək. Bu həm pensiyalar, həm də pensiya kapitalının artımına şərait yaradır.

Dövlət Sosial Müdafiə Fondunun İdarə Heyətinin sədr müavini Zəka Mirzəyev İTV-yə bildirib ki, bu əməliyyatların qanunauyğunluğuna, şəffaflığına, gəlirliliyinə, maliyyə və əməliyyat risklərinə nəzarət etmək üçün Əmək və Əhalinin Sosial Müdafiəsi Nazirliyi ilə İnvestisiya Şurası formalaşdırılır: "Hansı istiqamətlərə investisiya yönləndiriləcək, hansı hədəflər müəyyənləşdiriləcək, maliyyə və əməliyyat risklərinin nədən ibarət olacağı ilə bağlı İnvestisiya Şurası hər il bir dəfə investisiya sənədini təsdiqləyəcək". Qeyd edək ki, yeniliklərdən əlavə əhalini sevindirəcək təkliflər də mövcuddur. Əhalinin istəyini nəzərə alaraq pensiya kapitalının fərqli istiqamətlərdə istifadəsi nəzərdə tutulur.

Millət vəkili Vüqar Bayramov isə hesab edir ki, Azərbaycan vətəndaşları öz yığımlarından yalnız pensiya almaq üçün istifadə edirlər. Amma bir sıra ölkələrdə pensiya kapitalından digər məqsədlər üçün istifadə etmək hüququ var.

Onun sözlərinə görə, bəzi ölkələrdəki kimi vətəndaşların yığımlarının səhiyyə xidmətini almaq, kommunal xidməti ödəmək, kredit öhdəlikləri olan vətəndaşların borcunu ödəmək üçün pensiya kapitalının bir hissəsinin bu istiqamətə yönləndirilməsi daha məqsədəuyğun olardı".

Bəzi vətəndaşların pensiya kapitalının kifayət qədər böyük olduğunu vurğulayan V.Bayramov hesab edir ki, əgər vətəndaş tələb olunan pensiya kapitalını toplayıbsa, o zaman ona əlavə vəsaitinin 30 faizinin başqa məqsədlər üçün istifadə etməsinə şərait yaradılmalıdır:

“Bu həm yığımlara marağı artıra və qeyri-rəsmi məşğulluğun daha da leqallaşdırılmasına səbəb ola bilər".