 |
|
|
İsrail ABŞ-nin ardınca BMT-nin İnsan Hüquqları Şurasında iştirakını dayandırmaq niyyətini bəyan edib.
"Report" xəbər verir ki, bu barədə İsrailin xarici işlər naziri Gideon Saar bəyanatla çıxış edib.
"Trampın BMT-nin İnsan Hüquqları Şurasında iştirak etməmək qərarını alqışlayırıq. İsrail ABŞ-yə qoşulur və Şurada iştirakını dayandırır", - Saar bildirib.
Onun sözlərinə görə, BMT-nin İnsan Hüquqları Şurası demokratik dövlətə (İsrailə - red.) hücumlar və antisemitizmin yayılması üzərində cəmləşib.
"İnsan Hüquqları Şurasında İsrailə qarşı 100-dən çox qətnamə qəbul edilib, Bu, Şuranın qəbul etdiyi bütün qətnamələrin 20 %-dən çoxunu təşkil edir və İran, Kuba, Şimali Koreya və Venesuelaya qarşı qəbul edilən qətnamələrdən sayca çoxdur", - nazir vurğulayıb.
Saar həmçinin əlavə edib ki, İsrail artıq bu ayrı-seçkiliyə dözməyəcək.
Qeyd edək ki, ABŞ Prezidenti Donald Tramp ölkəsinin BMT-nin İnsan Haqları Şurasından (UNHRC) çıxarılması və BMT-nin Fələstinli Qaçqınlara Yardım Agentliyinin (UNRWA) maliyyələşdirilməsini dayandırması barədə sərəncam imzalayıb.
ABŞ administrasiyası gələn həftə başlayacaq Münhen Təhlükəsizlik Konfransında Ukraynadakı münaqişənin həlli ilə bağlı strategiyasını təqdim etmək niyyətindədir.
Bildirilir ki, sənədin ilkin variantını Donald Trampın Ukrayna üzrə xüsusi elçisi Keyt Kelloq müttəfiqlərə təqdim edəcək. Lakin planın təfərrüatları, o cümlədən müzakirələrin formatı və dərinliyi məlum deyil.
Agentliyin Vaşinqtonun təklif edə biləcəyi konkret addımlar barədə məlumatı yoxdur.
Qeyd edək ki, Münhen Konfransı fevralın 14-dən 16-dək keçiriləcək.
Bundan əvvəl NBC telekanalı Ağ Evdəki rəsmilərə istinadən xəbər vermişdi ki, ABŞ prezidenti Donald Trampın administrasiyasında Ukraynadakı münaqişənin həlli üsulları ilə bağlı fikir ayrılığı yaranıb. Mənbənin sözlərinə görə, Kelloq və milli təhlükəsizlik üzrə müşaviri Mayk Vals Rusiyaya təzyiq etmək istəyir, komandanın qalan hissəsi isə Kiyevə yardımın azaldılmasının tərəfdarıdır.
Musavat.com
Türkiyə prezidenti Rəcəb Tayyib Ərdoğan Suriyanın yeni lideri Əhməd Aş-Şəraanı Ankaraya gətirmək üçün xüsusi prezident təyyarəsi göndərib.
Musavat.com xəbər verir ki, bu barədə "Yeni Şafak" qəzeti məlumat yayıb.
Bu addım Türkiyə və Suriya arasında yeni siyasi münasibətlərin qurulması istiqamətində xoş niyyət jesti kimi qiymətləndirilir.
Qeyd edək ki, Suriyanın müvəqqəti prezidenti Əhməd Əş-Şaara ikinci rəsmi səfərini Türkiyəyə edib. O, səfər çərçivəsində Türkiyə prezidenti Rəcəb Tayyib Ərdoğanla görüşüb. Liderlər görüş zamanı mərkəzi Suriyada Türkiyə aviabazalarının yaradılmasını və yeni Suriya ordusunun hazırlanmasını əhatə edəcək birgə müdafiə paktını müzakirə ediblər. Mənbələrin sözlərinə görə, Türkiyə Suriya hava məkanından hərbi məqsədlər üçün istifadə edə biləcək.
Musavat.com
“İran heç vaxt İsraillə müharibə etmək və ya bu ölkəni məhv etmək niyyətində olmayıb”.
Musavat.com "Azad İran"a istinadən xəbər verir ki, bunu İranın Ali Milli Təhlükəsizlik Şurasının katibi Əli Əkbər Əhmədian deyib.
Onun sözlərinə görə, son 45 ildə İran hökuməti yalnız İsrailə qarşı “müqavimət cəbhəsini” alovlandırmaq istəyib.
Əhmədian bildirib ki, Qəzzada müharibə yolu ilə İsrailin məhv edilməsi saxta hədəflər idi və düşmənin hiylələrindən biri olub.
O qeyd edib ki, İsrailin ötən ilin oktyabrında İranın hava hücumundan müdafiə və raket sistemlərinə hücumuna Tehranın cavab verməməsi İslam Respbulikasının zəifliyinin əlaməti sayılmamalıdır.
Musavat.com
Çin bu ay BMT Təhlükəsizlik Şurasına (TŞ) sədrlik edəcək.
“Report”un ABŞ bürosu xəbər verir ki, Çinin BMT-dəki daimi nümayəndəsi Fu Konq BMT-nin qərargahında ay ərzində Təhlükəsizlik Şurasının gündəliyinə dair mətbuat konfransı keçirib.
Fu Konq bildirib ki, Çinin xarici işlər nazirinin iştirakı ilə TŞ-da yüksəksəviyyəli açıq iclas keçiriləcək. İclasda çoxtərəfliliyin tətbiqi, qlobal idarəçilik islahatları və onun təkmilləşdirilməsi ilə bağlı müzakirələr aparılacaq. O vurğulayıb ki, bu iclas Çinin çoxtərəfliliyə sadiqliyini bir daha təsdiqləmək üçün vacibdir:
“Hamımız bilirik ki, bu il BMT-nin yaradılmasının 80 illiyi qeyd olunur. Əgər BMT-nin 80 illik tarixi bizə nəyisə öyrədibsə, o da beynəlxalq sülh və sabitliyin çoxtərəfliliyin ən yaxşı təminatı olmasıdır. Müasir dövrdə ölkələrin BMT Nizamnaməsi və beynəlxalq hüquqa əsaslanan sülh yolu ilə münaqişələrin həllinə sadiqliyini təsdiqləməsi vacibdir. Biz Təhlükəsizlik Şurasının rolunu gücləndirməli və üzv ölkələrin çoxtərəfliliyə, eləcə də BMT-nin qlobal proseslərdəki roluna sadiqliyini bir daha vurğulamalıyıq”.
Diplomat qeyd edib ki, fevral ayında Rusiya-Ukrayna müharibəsinin üçüncü ildönümünə həsr olunmuş iclas keçiriləcək və tərəflər arasında sülh prosesinə dair müzakirələr aparılacaq. Bundan başqa, Yaxın Şərqdə davam edən münaqişələr və bölgədə dayanıqlı sülhə nail olmaq üçün atılacaq addımlar gündəmdə olacaq.
"Ukrayna hakimiyyəti Ağ Evin planını “uğursuzluq” hesab edir".
Musavat.com bu barədə "Reuters"ə istinadən xəbər verir.
Nəşrin məlumatına görə, Zelenskinin kommunikasiyalar üzrə müşaviri Dmitri Litvin bazar günü deyib ki, ABŞ Rusiya ilə atəşkəs sazişi bağladıqdan sonra Ukraynanı seçki keçirməyə çağırırsa, bu, “uğursuz plan” kimi görünür.
Bundan əvvəl prezident Donald Trampın Ukrayna üzrə xüsusi nümayəndəsi Keyt Kelloq agentliyə bildirib ki, Birləşmiş Ştatlar Ukraynada seçkilərin ola bilsin ki, ilin sonuna qədər keçirilməsini istəyir, xüsusən də Kiyev yaxın aylarda Rusiya ilə atəşkəs barədə razılığa gələ bilsə.
“Biz cənab Kelloqun tam müsahibəsini görməmişik, yalnız seçki ilə bağlı bir neçə sitat var, ona görə də onun mövqeyini tam qiymətləndirmək çətindir”, - deyə Litvin Reuters-ə yazılı cavabında qeyd edib.
“Ancaq onun planı yalnız atəşkəs və seçkilərdirsə, bu, uğursuz plandır – Putini yalnız bu iki şeylə qorxutmaq olmaz”. -, deyə Litvin cavabında bildirib.
Musavat.com
Qətər ABŞ Prezidenti Donald Trampın Qəzza zolağından evsiz fələstinlilərin ərəb ölkələrinə köçürülməsi təklifini dəstəkləmir.
Bunu Qətər hökumətinin başçısı, xarici işlər naziri Məhəmməd bin Əbdül Rəhman Əl Tani Türkiyənin xarici işlər naziri Hakan Fidanla birlikdə keçirdiyi mətbuat konfransında deyib.
Əl Tani vurğulayıb ki, ölkəsi anklavın əhalisini dəstəkləmək üçün səyləri səfərbər etməyə hazırdır.
"Biz fələstinlilərin məcburi köçürülməsi və deportasiyasının qəti əleyhinəyik. Bizim təklifimiz aydındır və ötən gün Qahirədə keçirilən görüşdə də ifadə olunub", - qətərli nazir qeyd edib.
Xatırladaq ki, yanvarın 25-də ABŞ Prezidenti Donald Tramp jurnalistlərlə söhbətində bildirmişdi ki, İsrailin hərbi əməliyyatları nəticəsində evlərini itirmiş Qəzza zolağı sakinlərinin ərəb ölkələrinə köçürülməsini mümkün hesab edir. Söhbət Qəzza zolağından kənara köçürülməli olan 1,5 milyon insandan gedir.
NATO-nun Baş katibi Mark Rutte Avropa ölkələrini müdafiə xərclərini artırmağa və müharibəyə hazırlaşmağa çağırıb.
TNS xəbər verir ki, o, bu barədə "Bild" qəzetinə müsahibəsində deyib.
M.Rutte Berlini hərbi və müdafiə sənayesində daha çox xərcləməyə və istehsal etməyə çağırıb. Onun sözlərinə görə, bu məsələ yaxın aylarda Avropanın bir çox ölkələrində müzakirə mövzusu olacaq.
"Mən sizə çox açıq deyirəm: biz müharibəyə hazırlaşmalıyıq. Bu, müharibədən qaçmağın ən yaxşı yoludur", - Rutte deyib.
Bir müddət əvvəl amerikalı aparıcı Taker Karlson NATO-nun aktuallığını itirdiyini bildirmişdi.
Ermənistan hakimiyyəti Baş nazir Nikol Paşinyanın Vaşinqtona səfəri zamanı ABŞ Prezidenti Donald Trampla görüş təşkil etməyə çalışsa da buna nail ola bilməyib.
Bu barədə “Hraparak“ qəzeti yazı dərc edib.
Bildirilib ki, bu prosesə Ermənistanın Xarici İşlər Nazirliyi, eləcə də “Respublikaçılar” partiyasından olan ermənipərəst senatorlar cəlb edilib, lakin bütün səylər nəticəsiz qalıb.
Bundan başqa qəzetin iddiasına görə, ABŞ-dəki Erməni diasporunun əksər nümayəndələri N. Paşinyanla görüşməkdən imtina edib.
“Avropa İttifaqı monitorinq missiyasının Ermənistandakı fəaliyyətinin daha iki il uzadılması sülh prosesinə müsbət heç nə verməyəcək”.
Bunu Moderator.az-a açıqlamasında politoloq Tofiq Abbasov bildirib. Ekspert qeyd edib ki, missiya regionu könüllü şəkildə tərk etməyəcək:
“Bu qərar göstərir ki, Avropa İttifaqı və ümumilikdə Qərb, post-sovet məkanının ən həssas bölgələrindən olan Qafqaz regionuna nüfuz etmək istəyir. Yəni fiziki baxımdan bu regionda təmsil olunmaq istəyirlər. Onlar iki il sonra da bu bölgədən öz xoşları ilə getməyəcklər. Biz həqiqətin gözünün içinə baxmağı bacarmalı, özümüzü aldatmamalıyıq. Onlar sona qədər bölgədə qalmağa çalışacaqlar.
Bu missiyanın fəaliyyəti ABŞ-dakı bəzi dairələrlə də razılaşdırılıb və birgə qərardır. Bu qərar isə Cənubi Qafqazda sülh və təhlükəsizlik üçün yaxşı heç nə vəd etmir”.