Rusiya Federasiyasının Azərbaycan Respublikasındakı fövqəladə və səlahiyyətli səfiri Mixail Yevdokimov Xarici İşlər Nazirliyinə dəvət olunub.
Bu barədə Xarici İşlər Nazirliyindən bildirilib.

Görüş zamanı Rusiya mətbuatında, eləcə də Rusiyanın bəzi rəsmi dairələri tərəfindən dezinformasiya xarakterli, ölkəmizi hədəf alan yazıların dərc olunması, reportajların yayımlanmasının anlaşılmazlıq yaratdığı, bunun Azərbaycan Respublikası və Rusiya Federasiyası arasında Müttəfiqlik qarşılıqlı fəaliyyəti haqqında Bəyannamənin məzmun və ruhuna zidd olduğu diqqətə çatdırılıb.

Azərbaycan Hava Yollarına məxsus təyyarənin faciəvi şəkildə qəzaya uğraması ilə bağlı ilkin təhqiqatın nəticələrinin məlum olduğu, istintaqın yekunlaşdırılması üçün iş aparıldığı, qəza ilə bağlı Rusiya tərəfindən gözləntilərimizin açıq şəkildə bəyan edildiyi xatırlanıb.

Yerli mətbu orqanında “Rus evi” ilə bağlı məlumata gəldikdə, bunun rəsmi mövqe olmadığı, bu kimi təşkilatların ölkəmizin ərazisində fəaliyyətinin qarşılılıq prinsipinə əsaslandığı və qanunvericiliyin tələblərinə uyğun aparılmasının vacib olduğu bildirilib.

Qeyd edək ki, ötən gün Azərbaycanın Rusiyadakı səfiri bu ölkənin Xarici İşlər Nazirliyinə dəvət olunmuşdu.

Avropa İttifaqı Suriyaya qarşı sanksiyaları yumşaldacaq.
APA xəbər verir ki, bunu Avropa İttifaqının Xarici İşlər və Təhlükəsizlik Siyasəti üzrə Ali Nümayəndəsi Kaya Kallas “X” hesabında açıqlayıb.

“Avropa İttifaqının xarici işlər nazirləri Suriyaya qarşı sanksiyaların yumşaldılmasına dair yol xəritəsini indicə razılaşdırıblar”, - Kallas vurğulayıb.

Onun sözlərinə görə, Avropa İttifaqı bu məsələdə sürətlə hərəkət etmək niyyətindədir, lakin “səhv addımlar atılarsa” Suriyaya qarşı sanksiyaların yumşaldılması qərarı geri alına bilər.

Ukrayna münaqişəsinin sülh yolu ilə nizamlanması üzrə danışıqlar aprel-may aylarında başlaya bilər.

Tanınmış jurnalist Əbdülkadir Selvinin Türkiyənin “Hürriyət” qəzetində dərc edilən məqaləsində belə deyilir.

Türkiyə hakimiyyət dairələri ilə sıx əlaqəsi olan Selvinin yazdığına görə, danışıqlar başlamazdan əvvəl Donald Tramp və Vladimir Putin arasında görüş keçiriləcək. Həmin görüşdən sonra və aparılacaq geniş danışıqlardan əvvəl atəşkəs elan olunacaq: “Birinci atəşkəs elan olunacaq. Bundan sonra sülh danışıqları başlayacaq. Danışıqlar prosesində Türkiyə müəyyən missiyanı öz üzərinə götürə bilər və prezident Rəcəb Tayyib Ərdoğan həm Putin, həm də Zelenski ilə ünsiyyət qura bilən yeganə lider olduğu üçün vasitəçi rolunu oynaya bilər. İndi Tramp da onlara qoşulub”.

O xatırladır ki, Ukrayna münaqişəsinin nizamlanması üzrə danışıqlar 2022-ci ildə İstanbulda aparılıb. Selvi yazır: “Ancaq ABŞ və İngiltərə müharibə istədikləri üçün o zaman heç bir razılaşma əldə oluna bilmədi. İndi sülh istəyən Tramp və Putin var. Amerikanın dəstəyini itirən Zelenskinin isə danışıqlar masasından qaçmaq şansı yoxdur”.

Xatırladaq ki, Türkiyənin Xarici İşlər naziri Hakan Fidan ötən həftə Ukraynadakı münaqişənin dönüş nöqtəsinə yaxınlaşdığını və Ankaranın onun həlli üçün səyləri dəstəkləməyə hazır olduğunu bildirib. /azpolitika.info

Avropa İttifaqına üzv ölkələrin xarici işlər nazirləri Gürcüstanın diplomatik və xidməti pasportlarına malik şəxsləri üçün vizasız rejimin dayandırılması barədə qərarı təsdiq ediblər.

Bu barədə məlumat Avropa İttifaqı Şurasının saytında yer alıb.

Bununla yanaşı, gürcü diplomatlar və rəsmilər Aİ ölkələrinə səfər edərkən ərizə təqdim etmək üçün daha qısa müddət, daha az viza rüsumu və daha az sənəd təqdim etmək kimi güzəştlərdən də istifadə edə bilməyəcəklər.

Həmçinin qeyd olunub ki, adi pasporta malik Gürcüstan vətəndaşları əvvəlkitək Avropa İttifaqı ölkələrinə qısamüddətli səfərlər edərkən vizasız rejimdən yararlana biləcəklər.

Qərar yaxın günlərdə qüvvəyə minəcək.

Qeyd edək ki, yanvarın 27-də Brüsseldə Aİ-yə üzv ölkələrin XİN rəhbərləri Şurasının iclası keçirilib. Gürcüstanın diplomatik pasporta malik şəxsləri üçün vizasız rejimin ləğv edilməsi üçün yalnız 15 səs tələb olunurdu. Macarıstan və Slovakiya qərarın əleyhinə çıxış edib.

Onu da xatırladaq ki, 2024-cü ilin sonunda Şuranın iclasında gürcü diplomatlar və rəsmilər üçün vizasız rejimin dayandırılması barədə razılıq əldə olunmuşdu.

Son vaxtlar Azərbaycanda yeni Konstitusiya qəbul olunacağı, bu il ərzində referendum keçiriləcəyi barədə məlumatlar yayılır.

Hökumətdəki mənbələrdən APA-ya bildirilib ki, Azərbaycanın hazırkı gündəliyində belə məsələ yoxdur.

“Gündəlikdə Konstitusiya ilə bağlı dəyişiklik müzakirəsi yoxdur. Belə bir dəyişikliyə hazırlaşmırıq. Bunu müzakirə edənlərin hansı məqsəd daşıdıqları, bu informasiyaların hansı zərurətdən yarandığı da bizə məlum deyil”, - deyə, mənbə bildirib.

Qeyd edək ki, bu il Azərbaycan Prezidenti İlham Əliyev tərəfindən ölkədə “Konstitusiya və suverenlik ili” elan olunub.
Dövlət başçısının sərəncamında “Konstitusiya və Suverenlik ili” nin elan olunmasının səbəbi göstərilib.

Sərəncamda qeyd olunub ki, Konstitusiyamızın bəyan etdiyi niyyətlərdən biri kimi ərazi bütövlüyümüzün və suverenliyimizin tam bərpa olunduğunu, 2025-ci ildə Konstitusiyamızın qəbul edilməsinin 30-cu və Vətən müharibəsində qələbəmizin 5-ci ildönümünü nəzərə alaraq, Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq bu il Azərbaycan Respublikasında “Konstitusiya və Suverenlik İli” elan edilib.

Yunanıstan parlamentində keçirilən prezident seçkiləri namizədlərdən heç biri lazımi sayda səs toplamadığı üçün ikinci tura qalıb.
Bizimyol.info "AA"ya istinadən xəbər verir ki, Yunanıstan parlamentində səlahiyyət müddəti martda başa çatacaq prezident Katerina Sakelaropolunu kimin əvəzləyəcəyini müəyyən etmək üçün seçkilər keçirilib.

Hakim Yeni Demokratiya Partiyasının namizədi Kostantinos Tasulas, ana müxalifət partiyası Panhellenik Sosialist Hərəkatının namizədi Tasos Yaniçis, Radikal Sol Alyansın namizədi Luka Kaçeli və Qələbə Partiyasının namizədi Kostas Kiryaku seçkidə iştirak edib.

300 yerlik parlamentdə 297 deputat səs verib. Tasulas 160 səslə birinci olub, Kaçeli 40, Yaniçis 34 və Kiryaku 14 səs ala biliblər. Bitərəflərin sayı isə 49 olub. Birinci turda heç bir namizəd prezident seçilmək üçün 200 səs toplamadığından seçkilər ikinci tura qalıb.

Yanvarın 31-də seçkilərin ikinci turu keçiriləcək. Yunanıstanda prezident hazırkı prezidentin səlahiyyət müddətinin bitməsinə ən azı bir ay qalmış parlament tərəfindən beş illik müddətə seçilir. Bir şəxs ölkədə maksimum iki müddət prezident ola bilər.

Prezident seçilmək üçün namizəd parlament deputatlarının ən azı üçdə ikisinin səsini almalıdır. Bu səs faizinə çatmazsa, 5 gün ərzində seçki təkrarlanır.

İkinci seçkidə lazımi sayda səs toplana bilmədikdə, 5 gün sonra üçüncü seçki keçirilir. Parlament üzvlərinin ümumi sayının beşdə üçünün dəstəyini alan namizəd prezident seçilir.

Üçüncü turda prezident seçilməzsə, 5 gün sonra keçiriləcək seçkilərdə deputatların ümumi sayının mütləq əksəriyyətinin dəstəyini alan namizəd prezident olur.

Türkiyə ABŞ-nin yeni administrasiyasının “Sanksiyalar vasitəsilə Amerikanın düşmənlərinə qarşı mübarizə” qanunu (CAATSA) çərçivəsində sanksiyaları ləğv edəcəyini gözləyir.

İndex.az xəbər verir ki, bunu Türkiyənin xarici işlər naziri Hakan Fidan Avropa İttifaqının (Aİ) diplomatik xidmətinin rəhbəri Kaya Kallasla danışıqlardan sonra keçirilən mətbuat konfransında deyib.

“ABŞ Türkiyənin mühüm strateji tərəfdaşıdır və münasibətlər bu istiqamətdə davam edəcək. Əvvəllər də aydın şəkildə bildirdiyimiz kimi, ABŞ Prezidenti Donald Trampın yeni administrasiyasının münasibətlərimizdəki problemli sahələri, xüsusilə də CAATSA çərçivəsində sanksiyaları aradan qaldıracağını gözləyirik”, – o qeyd edib.

CAATSA qanunu 2017-ci ilin avqustunda qəbul edilib.

Rusiya Ukrayna ilə bağlı danışıqlara hazırdır.

APA-nın Moskva müxbiri xəbər verir ki, bunu Rusiya prezidenti Vladimir Putin bildirib.

Rusiya dövlət başçısının sözlərinə görə, bunun üçün Qərb Zelenskiyə təzyiq göstərməlidir: "Kiyevin sponsorları Zelenskini məcbur etməlidir ki, o, Moskva ilə danışıqların qadağan edilməsi barədə qərarını ləğv eləsin. Çünki onun belə bir dekreti var”.

Putin əlavə edib ki, Ukrayna özü-özünə Rusiya ilə dialoq aparmağı qadağan edib, belə olan halda isə istənilən danışıqlar qeyri-legitim sayılır.

“Konstitusiya və Suverenlik İli” çərçivəsində müxtəlif yerli və beynəlxalq təşkilatlarla ardıcıl görüşlər keçiriləcək və müzakirələr təşkil ediləcək. Bunu Milli Məclisin İnsan hüquqları komitəsinin yanvarın 23-də keçirilən iclasında komitə sədri Zahid Oruc deyib.

O bildirib ki, “Konstitusiya və Suverenlik İli” çərçivəsində qarşıda bir çox çağırışlar, baxışlar var: “Bu çağırışlar arasında yeni referendumun keçirilməsi də var. Konstitusiya dövlət quruculuğunun Baş Planıdır, bu anlamda Zəfər Konstitusiyasının qəbul olunması da mümkündür. Yeni konstitusion quruluşlar məsələsi parlamentdə tez-tez qaldırılır. İcra hakimiyyətləri sistemi ilə paralel xüsusi nümayəndəlik institutu formalaşıb. Bu, artıq tək azad edilmiş ərazilərdə deyil, həm də Naxçıvanda tətbiq olunur”.

Xatırladaq ki, “Konstitusiya və Suverenlik İli”nin böyük sürprizinin referendum keçirilməklə Zəfər Konstitusiyası qəbul ediləcəyi barədə 2024-cü ilin 29 dekabrında Musavat.com saytında məlumat verilib. Milli Məclisin İnsan hüquqları komitəsinin 23 yanvarda keçirilən iclasında komitə sədri Zahid Orucun açıqlaması üç həftə öncə yazdıqlarımızın təsdiqi sayıla bilər.

1995-ci ildə qəbul edilən Azərbaycan Konstitusiyasına görə, Milli Məclisdə 125 deputat təmsil olunur. Bəzi ekspertlər və siyasətçilər bildirir ki, 1995-ci ildən bu yana ölkə əhalisi 2 milyon nəfərdən çox artıb, ancaq əhalinin parlamentdə təmsilçilik nisbəti dəyişməyib. Əgər 1995-ci ildə parlamentin 1 deputatı 61 min nəfəri təmsil edirdisə, bu gün 1 deputat 81 min nəfəri təmsil edir. Buna görə zaman-zaman bəzi siyasətçilər parlamentin deputatlarının sayının artırılmasını təklif ediblər.

Azərbaycan Konstitusiyasında dəyişməsi gözlənilən məsələlərdən biri də qarışıq seçki sisteminə keçiddir. Parlament seçkilərində qarışıq seçki sistemi 2002-ci ilə qədər mövcud olub. 1995 və 2000-ci illərdə keçirilən seçkilərdə parlamentin 20%-i (25 deputat) proporsional, 80%-i isə majoritar qaydada seçilib.

Məlumat üçün bildirək ki, proporsional seçki sistemində seçicilər birbaşa namizədlərə deyil, partiyalara səs verir. Partiyalar qazandıqları səslərə görə parlamentdə mandat qazanır. Majoritar seçki sistemində isə seçicilər birbaşa namizədə səs verir və ən çox səs toplayan namizəd deputat seçilir.

Azad edilən ərazilərdə Prezidentin xüsusi nümayəndəlik institutunun yaradılmasından sonra Azərbaycanda icra hakimiyyətlərinin ləğv edilməsi məsələsi gündəmə gəlib. Xüsusi nümayəndə prezidentin müəyyən etdiyi ərazi hüdudlarında prezidenti təmsil edən vəzifəli şəxsdir və prezidentin müəyyən etdiyi ərazi hüdudlarında onun müəyyən etdiyi səlahiyyətləri həyata keçirir. Məlumata görə, yeni yaradılan qurumun tətbiqi uğurlu nəticə verərsə, ölkənin digər ərazilərində də Prezidentin xüsusi nümayəndəliyi yaradıla bilər.

Nəhayət, Nazirlər Kabinetinin ləğvi. İndiki konstitusiyada Nazirlər Kabinetinin özünəməxsus heç bir səlahiyyəti yoxdur. Bu isə o deməkdir ki, Nazirlər Kabinetinin konstitusion statusu çox zəifdir və ləğv oluna bilər.

Demokratiya və İnsan Hüquqları Komitəsinin sədri, hüquq üzrə fəlsəfə doktoru Çingiz Qənizadə “Yeni Müsavat”a bildirib ki, 2025-ci ilin “Konstitusiya və Suverenlik ili” elan olunmasının bir neçə səbəbi var: “Birincisi, müstəqil Azərbaycanın Konstitusiyasının 30 illiyidir. Bu konstitusiya MDB məkanında olan konstitusiyalardan ən demokratik konstitusiyalardan biridir. Üstündən 30 il keçib və bu gün yeni reallıqlar yaranıb, böyük inkişaf yolu qət edilib, bu müddətdə bir çox qanunlarımızda dəyişikliklər həyata keçirilib, bir çox vacib yeni qanunlar, yeni sənədlər qəbul edilib, ən son olaraq 2024-cü ilin dekabrında Milli Məclis "Hərbi vəzifə və hərbi xidmət haqqında" Qanunda ciddi dəyişikliklər etdi. Qanunlarımızda sonuncu referendumdan indiyə qədər edilmiş bir sıra dəyişikliklər, yeni qanunların qəbulu da konstitusiyada dəyişikliklərin həyata keçirilməli olduğunu gündəmə gətirir. Eləcə də idarəetmədə, bələdiyyələrlə bağlı, seçki sistemi ilə əlaqədar konstitisiyada dəyişikliklər edilməsi istisna deyil. Torpaqlarımız işğaldan azad edildikdən sonra bir sıra rayonlarımızın idarəetməsində yeniliklər tətbiq edilib, həmçinin Naxçıvan Muxtar Respublikasında. Bu yeniliklər konstitusiyada təsbit olunmalıdır. Ölkəmizin bütün ərazisində suverenliyimizin bərpa olunması da yeni reallıqlar meydana gətirib. Bu reallıqlar da ana qanunumuza əlavələr və dəyişikliklər edilməsi zərurətini meydana gətirir".

Ekspert həmçinin qeyd edib ki, əhalimizin sayı 30 ildə 3 milyon nəfərə qədər artaraq 10 milyonu keçib. Bu amil də konstitusiyada müəyyən dəyişiklikləri zərurətə çevirir: “1995-ci ildə qəbul edilən konstitusiyanın səhv etmirəmsə, 82-ci maddəsində qeyd olunur ki, Milli Məclis üzvlərinin sayı 125 nəfərdən ibarətdir. Əhalinin sayı 7 milyon olanda Milli Məclisin 125 deputatının olmasının məqsədəuyğunluğu ana qanuna daxil edilib. Bu gün əhalimizin sayı 10 milyondan çoxdur. Ona görə də artıq 1 deputata düşən seçicinin sayı artıq 50 mindən yuxarıdır. Ona görə də hesab edirəm ki, konstitusiyada Milli Məclis üzvlərinin sayının artırılması məsələsi də gündəmə gələ bilər. Bütün qeyd etdiyimiz və digər dəyişikliklərin edilməsi isə yalnız referendumun keçirilməsi ilə mümkündür”.