 |
|
|
Samux rayonu, Poylu kənd sakini İsmayılov Akif İsmayıl oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi bildirir ki, “Retems Group” şirkəti 3 ay əvvəl, o da daxil olmaqla, ümumilikdə 16 nəfərdən xurma alsa da, hələ də pulunu ödəmir. A.İsmayılov bu məsələdə şirkətin baş direktoru Orxan Musayevi şirkətin Ruslan, Natiq, Seyfəddin və Bəşir adlı işçilərini ittiham edir:
“Mən, İsmayılov Akif İsmayıl oğlu, yazaraq bildirirəm ki, “Retems Group” şirkətinin baş direktoru Musayev Orxan və işçiləri Ruslan, Natiq, Seyfəddin və Bəşir dələduzluqla məşğuldurlar. Belə ki, onlar məndən və tanıdığım digər 16 nəfərdən xurma alaraq, pulumuzu mənimsəmişdir.
Şirkət rəhbəri tək bizim kənddən yox, başqa rayonlardan olan sakinləri də bu cür aldadıb. Onlardan İbrahimov Samir Azər oğlu, Əhmədov Ramazan Məhərrəm oğlu, İsmayılov Hüseyn Qasım oğlu, Alıyev Tural Elşad oğlu, Vəliyev Fariz Mübariz oğlu, Bağırov Nəsrəddin Sadəddin oğlu və daha çox sayda aldadılan insanlar var.
Biz halal zəhmətlə qazanmaq üçün həyətimizdəki meyvələri satmaq istəmişik. Biz nə biləydik ki, bu şirkət fırıldaqçılıqla məşğuldur?!
Səlahiyyətli qurumlardan xahiş edirəm ki, məsələ ilə bağlı bizə kömək etsinlər. Polisə hələ müraciət etməmişik. Amma bu hərəkətləri ilə bizi məcbur edirlər ki, onları polisə şikayət edək”.
“Retems Group” şirkətinin baş direktoru Orxan Musayev “Hürriyyət”ə bildirdi ki, sakinlərin pulunun ödənilməməsinə görə rəhbərlik etdiyi şirkət məsuliyyət daşımır:
“Bəli, biz şirkət olaraq xurma alışı ilə məşğuluq. Ola bilsin ki, adlarını çəkdiyiniz 16 nəfərin malı da bilavasitə bizə satılıb. Lakin biz bütün tədarükçülərimizin ödənişlərini etmişik. Yəni şirkətin heç bir tədarükçüsünə borcu yoxdur. Hansısa bir tədarükçümüz bu sakinlərin ödənişlərini çatdırmayıbsa, bu barədə xəbərimiz yoxdur”.
Şikayətçinin qeyd etdiyi Ruslan adlı şəxs isə dedi ki, o, şirkətin nümayəndəsi deyil, fərdi çalışır, məhsulu alır və satır.
P.S. Redaksiyamıza şikayət edən şəxslərdən biri isə vurğuladı ki, şirkətdən ona yaxın günlərdə ödəniş ediləcəyi bildirilib: “Dedilər ki, Bakıya gəlmə, səbrli ol, yaxında pulun veriləcək”. Maraqlıdır ki, “Retems Group” şirkətinin baş direktoru Orxan Musayev isə bütün iddiaları rədd edərək, şirkətin kimsəyə borcu olmadığını deyir.
Onu da qeyd edim ki, yuxarıda adları çəkilən hər bir şəxslə əlaqə saxlamağa çalışdıq, lakin zənglərimiz cavabsız qaldı. Şikayətçilərin redaksiyamıza göndərdiyi səs yazılarından isə aydın olur ki, Orxan Musayev bu işi Ruslanın boynuna atır, qarşı tərəf isə “Orxan niyə belə deyir, başa düşmürəm”, - deyə təccübünü bildirir.
Maraqlıdır, əgər belədirsə, bu insanların mənimsənilən pullarını kim qaytaracaq?
Son günlər ölkədə fəaliyyət göstərən “Xaricdə Təhsil Şirkətləri” haqqında gəzən söz-söhbətlər heç də xoş məqamlardan xəbər vermir.
DogruXeber.az: - Doğrudur, elə şirkətlər var ki, işlərini mükəmməl həyata keçirir və tələbələrin diqqətini cəlb edir. Gələcəyimiz olan gənclərin bir qismi arzu edir ki, ölkə xaricində təhsillərini davam etsinlər, Vətənə layiqli vətəndaş kimi xidmət etsinlər. Əfsüslər olsun ki, “Xaricdə Təhsil Şirkətləri” adı altında xoşagəlməz hallara yol verilir, vətəndaşların etibarından sui-istifadə edib onların pullarını mənimsəyirlər. Qeyd etdiyim nöqsanlarla bağlı kifayət qədər arqument, dəlil göstərmək olar.
Bir qurup gənc media vasitəsi ilə dövlət qurumlarına, bir sözlə Azərbaycan Respublikasının Birinci vitse-prezidenti Mehriban Xanım Əliyevaya müraciət etmək fikrindədir. Belə ki, Bakı şəhərində fəaliyyət göstərən “Pilgrim Education” şirkətinin rəhbəri Aslanova Aisa Nəbi qızı bir neçə tələbədən şirkətə ödəniş etdirərək onları güya xarici ölkələrin universitetlərinə təhsil almaq üçün şərait yaradacaq.
Redaksiyamıza şikayət edən Qurbanova Türkan Seymur qızı, Soltanova Rəna Pərviz qızı, Hacıyeva Firuzə Namiq qızı, Hüseynova Tahirə Rəhmaz qızı və digərləri iddia edirlər ki, Aisa Aslanova onları aldadıb və götürdüyü öhtəliklərin heç birini yerinə yetirməyib.
Əksinə, A. Aslanovanın mobil telefonuna zəng edən gənc şikayətçilər gözlənilmədən müəyyən qurumların adları ilə hədələnib. Məsələ ilə bağlı qarşı tərəf kimi Aisa Aslanova ilə telefon əlaqəsi yaratdıq.
Qarşı tərəf isə bir qurup gəncin iddialarını qəbul etmədi, onları şantajçı adlandırdı. Onu da qeyd edək ki, ödənişlər kart vasitəsi ilə həyata keçirilib.
Maraqlı məqam ondan ibarətdir ki, bu cür çirkətlər daha çox reklam qazanır, universitetlərlə əməkdaşlıq edir, tədbirlərə dəvət edilir. Məhz bundan sonra tələbələr həmən şirkəti ciddi qəbul edərək sövdələşməyə imza atır.
Digər gənclərə tösiyyə olunur ki, “Xaricdə Təhsil Şirkətləri” ilə əlaqə qurduqda diqqətli olsunlar. Heç bir halda razılaşmarıq ki, gələcəyimiz olan gənclər bir qurup arzuolunmaz şəxslərin qurbanına çevrilsin. Ələxsüsdə, “Pilgrim Education” şirkəti ilə qəti təmas qurmasınlar. Əks halda yuxarıda adı hallanan gənclərin aqibətini sizlərdə yaşayacaqsınız. Bütün hallarda haqları tapdalanan gənclərin müdafiə edəcəyik və bu barədə daha yuxarı dairələrə məlumat veriləcək.//azinforum.az
İranda Sirç-Kerman avtomobil yolunda tələbə qızları daşıyan mikroavtobus aşıb, ən azı altı nəfər ölüb.
"Azad İran" "Telegram" kanal xəbər verir ki, bu barədə İranın Kerman əyalətinin Fövqəladə Hallar Xidməti məlumat verib.
Kermanın təcili yardım şöbəsinin rəhbəri bildirib ki, mikroavtobusda 40 nəfər olub.
Onlardan 15 nəfəri ağır yaralanıb, vəziyyətləri kritik hesab olunur.
"İcra hakimiyyətləri ləğv olunmalı, xüsusi nümayəndəliklər yaradılmalı, parlament buraxılmalıdır, çünki..."
Son vaxtlar müxtəlif platformalarda Azərbaycanda aprel ayında referendumun keçiriləcəyi, icra hakimiyyətlərinin ləğv olunacağı və Prezidentin xüsusi nümayəndəliklərinin yaradılacağı ilə bağlı xəbərlər dolaşır. Aydındır ki, ölkə başçısı həm siyasi, həm iqtisadi, həm də sosial sahələrdə bir sıra ciddi islahatlar həyata keçirir və bu, yalnız dövlətin inkişafına və xalqın rifahının yüksəldilməsinə xidmət edir. Ölkədə infrastrukturla bağlı da islahatların həyata keçirildiyinin şahidi oluruq. Modern idarəçilik sisteminin yaradılması istiqamətində atılan addımlar, bəzi dövlət qurumlarının bir srukturda birləşdirilməsi həm büdcəyə qənaət etməyə, həm də daha çevik və asan idarəçilik formasına keçməyə imkan verir. Bəs görəsən, icra hakimiyyətlərinin ləğvi reallaşsa, bu, dövlətin gələcək inkişafına nə kimitöhfə verə bilər?
Mövzu ilə bağlı “Müasir Müsavat”partiyasının sədri KONKRET.az-a açıqlamasında bildirib ki, onun təmsil olunduğu partiya bu kimi məlumatlardan xəbərdardır:
“Cənab Prezident neçə illərdir yerlərdə öz səlajiyyətli nümayəndələrini təyin edib. Bu da öz müsbət effektini verir. Hal hazırda həm rayonun icra başçısı, həm də prezidentin səlahiyyətli nümayəndəsi strukturu mövcuddur. Bu, bir qarışıqlıq yaradır. Düşünürəm ki, icra hakimiyyətlərinin ləğvi və nümayəndəliklərin yaradılması çox yüksək səviyyəli bir iş ola bilər. Çünki əksər icra başçıları bir iş görə bilmir. Xalqı incidir, rüşvətə meyl göstərirlər. Bu əməllərinə görə icra başçıları arasında həbs edilənlərin olması heç kimə sirr deyil. Odur ki, icra hakimiyyətlərinin ləğvi və nümayəndəliklərin yaradılması çox yaxşı fikirdir. Ancaq hesab edirəm ki, bələdiyyələrin səlahiyyətləri artırılmalıdır. Elə işlər var ki, onlarla bələdiyyələr məşğul olmalıdır. Cənab Prezident bu xətti tutubsa, bu, çox müsbət haldır. Bütün bunlarla yanaşı proporsional seçki sistemi bərpa edilməlidir, parlament buraxılmalıdır. Son vaxtlar Rusiya mediasında və ayrı-ayrı siyasi dairələrində Azərbaycanın əleyhinə xoşagəlməz fikirlər səsləndirir. Ancaq hazırki parlament buna heç biri cavab vermir. Ona görə də, çox istəyirik ki, referendumda proporsional seçki sistemi ləğv edilsin”.
Mövzu ilə bağlı KONKRET.az-ın suallarını cavablandıran sabiq deputat, siayi ekspert Elşad Mirbəşiroğlu bildirib ki, referendumun keçirilməsi ölkənin yeni tarixi mərhələsi üçün normal hal ola bilər:
Gözəgörünməz bir qatil var, cəmiyyətimizi qorumalıyıq - Elşad Mirbəşiroğlu - 28.06.2024, Sputnik Azərbaycan
“Zaman, reallıqlar və ölkənin inkişaf səviyyəsi dəyişir. Həm də Azərbaycanın obrazı tamamilə yenilənib. İdarəetmə sisteminin təkmilləşdirilməsi fonunda yeni dövrün reallıqlarına uyğun, yeni tarixi proses baş verə bilər. Amma referendum məsələsi rəsmi olmadığına görə qəti fikir bildirmək çətindir”.
Şabran rayon sakini Ənvər Gülməmməd oğlu Müslümovun itkin düşməsindən 2 ilə yaxın vaxt keçir. Rayonun Qələgah kəndinin sakini olan 1958-ci il təvəllüdlü Ənvər Müslümov 2023-cü il mayın 21-i səhər saat 4 radələrində yaşadığı ünvandan çıxıb və bir daha geri qayıtmayıb.
Məlum olan budur ki, ferma sahibi olan Ənvər Müslümov həmin sübh tezdən yaşadığı evdən onu çağıran şəxslə birgə özünün idarə etdiyi “Mercedes”lə naməlum istiqamətə gedib. Bundan sonra Ənvər Müslümovu gördüm deyən olmayıb. Ailə üzvləri onu xeyli axtarandan sonra kənd ərazisində avtomobilini aşkar ediblər.
O zaman Ənvər Müslümovun oğlu mətbuata atasının itkin düşməsi ilə bağlı bunları demişdi:
“Maşını kəndin giriş hissəsində, yolun kənarında qapıları açıq və işıqları yanılı halda tapıldı. Telefonuna zənglər çatmır. Polisə və aidiyyəti qurumlara müraciət edilib. Atamın heç kimlə ədavəti və problemi olmayıb, ona görə də baş verənlər bizdə şok effekti yaradıb. Bir oğul və vətəndaş kimi aidiyyəti qurumlardan bizə kömək olmağı xahiş edirəm”.
Ənvər Müslümov itkin düşəndən sonra yaxınları hüquq mühafizə orqanlarına müraciət etmişdilər. Daxili İşlər Nazirliyi Ənvər Müslümovun fotosunu yayaraq onu tanıyanlardan və barəsində məlumatı olanlardan DİN-in “102” Xidməti Zəng Mərkəzinə, eləcə də Şabran Rayon Polis Şöbəsinin (+994) 70 233 27 23 mobil nömrəsinə zəng edərək məlumat vermələri istənilirdi. Lakin Ənvər Müslümovdan hələ ki, hər hansı bir xəbər yoxdur.
Maraqlıdır ki, Ənvər Müslümovun müəmmalı şəkildə itkin düşməsindən illər əvvəl onun yaşadığı kəndin qonşuluğundakı Dağbilici kəndində də oxşar müəmmalı olay baş vermişdi. O zaman 14 yaşlı Nailə və 7 yaşlı Reyhanə Məcidova bacıları itkin düşüblər.
2007-ci ildə ölkə gündəmini silkələyən bu tükürpərdici olayla bağlı bu gün də ziddiyyətli məlumatlar var. Ortada olan məlumatlardan bilinən odur ki, bacılar 2007-ci ilin avqustunda yaşadıqları kəndin ərazisində itkin düşüblər. Bundan sonra, həmin il avqustun 9-da Samur-Abşeron kanalında meyit tapılıb.
İstintaq belə qənaətə gəlib ki, aşkarlanan Nailə Məcidovanın meyitidir. Lakin Məcidovaların atası Zamir Məcidov aşkar olunan meyitin onun qızı olmadığını iddia edib.
Onun dediklərindən sitat:
“Yazıblar ki, guya Nailənin meyiti tapılanda barmağında üzük olub. Amma həmin meyit çıxarılanda atam orada olub, deyir ki, onun əlində üzük yox idi. Meyitin boyu və çəkisi Nailəyə uyğun gəlmir. Dedilər ki, suda qalıb, şişib və meyit uzanıb. Biz də deyirik ki, şişibsə, dediyiniz üzüyü barmağından necə çıxarmısınız? Deyirlər ki, barmağını kəsib çıxarmışıq. Amma meyit basdırılanda da, ekshumasiya olunanda da gördük ki, barmaq kəsilməyib. O meyit tapılanda tanınmaya təqdim olunmadı, fikrimiz soruşulmadı”.
Məcidovlar ailəsi həmin meyitin Nailəyə məxsus olduğuna inanmır. O ki qaldı 7 yaşlı Reyhanəyə, indiyədək onun nə ölüsündən, nə də dirisindən xəbər var.
Şabranda isə bu işlər arasında əlaqənin olmasına inananlar az deyil. Rayon sakinlərində belə bir fikir var ki, Ənvər Müslümov Məcidova bacılarının itkin düşməsi ilə bağlı hansısa məlumatlara, bilgilərə sahib olub. Müəmmalı şəkildə itkin düşməsini də bununla əlaqələndirirlər.
Hər halda bu versiyanın yoxlanması zərurəti ortadadır. Şabran dağlarında yerləşən kəndlərdən insanların izsiz-tozsuz itməsinin bu istiqamətdə araşdırılması müəyyən ipuclarını ortaya çıxara bilər.
Xatırladaq ki, Məcidova bacılarının oğurlanması epizodu Təvəkkül, Elnur, Elçin İsmayılov qardaşlarının cinayət işində vardı. İsmayılovların cinayət işi üzrə 11 zərərçəkmiş şəxs müəyyən edilsə də, Məcidova bacılarının valideynləri məhkəməyə gəlmirdilər. İttiham aktına əsasən, İsmayılov qardaşları Məcidova bacılarından başqa digər qızları da zorlayaraq qətlə yetiriblər.
Yada salaq ki, Elnur İsmayılov ilə qardaşları Təvəkkül və Elçinə 2009-cu ildə Ağır Cinayətlərə Dair İşlər üzrə Məhkəmədə hökm oxunub. Nailə və Reyhanə Məcidova bacılarını qətlə yetirməkdə təqsirli bilinən Təvəkkül İsmayılov qəsdən adam öldürmə, zorlama, adam oğurluğu və digər maddələrlə təqsirli bilinərək ömürlük, Elnur İsmayılov 144.3 (adam oğurluğu), 29, 149.3.3 (zorlama), 178.2.4 (dələduzluq) maddələri ilə bəraət alaraq, 221.2.1 (xuliqanlıq) maddəsi ilə 6 il həbs cəzası, Elçin İsmayılov isə 149.2.3 (zorlama), 221.2.1 (xuliqanlıq) maddələri ilə bəraət alaraq 221.2.2 (xuliqanlıq) maddəsi ilə 4 il azadlıqdan məhrum edilmişdilər.
Musavat.com
Xaricdə bəzi universitetlərdə təhsil alan tələbələrin ölkədə diplomlarını tanıtdıra bilməmələri ilə bağlı məlumatlara tez-tez rast gəlirik. Ən böyük çətinliyi isə distant təhsil alan tələbələr çəkirlər. Onların sözlərinə görə, bu üsulla təhsil aldıqları üçün diplomları Azərbaycanda tanınmır və buna görə də iş tapa bilmirlər.
Maraqlıdır, ən çox hansı ölkələrdə təhsil alan tələbələrimiz belə problemlərlə qarşılaşırlar.
Diplomları tanınmayan universitetlər hansılardır?
Mövzu ilə bağlı Musavat.com-a danışan təhsil eksperti Kamran Əsədov deyir ki, Azərbaycanda xarici ali təhsil müəssisələrinin diplomlarının tanınması prosesi bir sıra meyarlar əsasında həyata keçirilir. Bu meyarlar arasında təhsil müəssisəsinin akkreditasiyası, tədris proqramlarının keyfiyyəti və təhsil formasının uyğunluğu kimi amillər mühüm rol oynayır.
“Təhsildə Keyfiyyət Təminatı Agentliyinin (TKTA) məlumatına görə, bəzi xarici ali təhsil müəssisələrinin diplomları ölkəmizdə tanınmır. Bu, əsasən həmin universitetlərin yerli akkreditasiyasının olmaması ilə əlaqədardır. Məsələn, Amerika Birləşmiş Ştatlarında yerləşən Beynəlxalq Atlantik Universiteti, Avstriya Respublikasındakı Beynəlxalq Xristian Universiteti və Çex Respublikasındakı Beynəlxalq Praqa Universiteti kimi ali təhsil müəssisələrinin diplomları tanınmayanlar sırasındadır. Bu siyahı mütəmadi olaraq yenilənir və TKTA-nın rəsmi saytında dərc olunur.
Təhsil formalarına gəldikdə, Azərbaycan Respublikasının “Təhsil haqqında” Qanununun 13-cü maddəsində əyani, qiyabi, sərbəst (eksternat) və distant (məsafədən) təhsil formaları nəzərdə tutulur. Lakin distant təhsilin ölkəmizdə tam tətbiqi və tanınması üçün zəruri prosedurlar hələ də tam formalaşmayıb. Elm və Təhsil Nazirliyinin məlumatına görə, hazırda Azərbaycanda keyfiyyət təminatı almış distant tədris proqramı mövcud deyil. Bu istiqamətdə qanunvericilik bazasının formalaşması üçün işlər aparılır.
Bu səbəbdən xaricdə distant formada təhsil almış şəxslərin diplomlarının tanınmasında çətinliklər yaranır. Məsələn, 2024-cü ildə distant təhsil səbəbindən 94 nəfərin müraciətinə mənfi cavab verilib. Bu vəziyyət distant təhsilin tanınması üçün müvafiq mexanizmlərin və standartların hələ tam formalaşmaması ilə əlaqədardır”.
Ekspertin sözlərinə görə, xaricdə təhsil almağı planlaşdıran şəxslər seçdikləri universitetin akkreditasiyasına və təhsil formasına diqqət yetirməlidirlər. Xüsusilə, distant təhsil proqramlarına yazılarkən, həmin proqramların və diplomların Azərbaycanda tanınıb-tanınmayacağını əvvəlcədən araşdırmaq vacibdir.
“2009-cu ildə qəbul edilmiş “Təhsil haqqında” Qanunda distant təhsil nəzərdə tutulsa da, onun tətbiqi mexanizmləri hələ də tam işlənib hazırlanmayıb. Bu səbəbdən, xaricdə distant formada təhsil almış şəxslərin diplomlarının tanınmasında çətinliklər yaranır.
Distant təhsilin tanınmamasının digər bir səbəbi isə bu təhsil formasının keyfiyyətinin təminatı ilə bağlıdır. Pandemiya dövründə tətbiq edilən distant təhsil təcrübəsi göstərdi ki, tələbələrin bir çoxu dərslərə formal olaraq qoşulur və bu, təhsilin keyfiyyətinə mənfi təsir göstərir. Bundan əlavə, bəzi ixtisaslar, xüsusilə tibb və mühəndislik sahələri, praktiki bacarıqlar tələb etdiyindən, distant təhsil bu sahələr üçün uyğun hesab edilmir.
Dünya təcrübəsinə nəzər salsaq, distant təhsilin müxtəlif ölkələrdə fərqli şəkildə qəbul edildiyini görərik.
Məsələn, ABŞ və Avropa ölkələrində distant təhsil geniş yayılıb və bu təhsil formasının keyfiyyətinin təminatı üçün xüsusi mexanizmlər mövcuddur. Bu ölkələrdə distant təhsil proqramları akkreditasiya olunur və diplomları tanınır. Lakin, bəzi ölkələrdə distant təhsilin keyfiyyətinə dair narahatlıqlar səbəbindən bu təhsil formasına ehtiyatla yanaşılır və diplomların tanınması məhdudlaşdırılır.
Azərbaycanda distant təhsilin diplomlarının tanınması üçün müvafiq hüquqi və metodoloji bazanın yaradılması, keyfiyyət təminatı mexanizmlərinin tətbiqi və bu sahədə beynəlxalq təcrübənin öyrənilməsi vacibdir. Bu istiqamətdə atılacaq addımlar distant təhsilin inkişafına və onun diplomlarının tanınmasına töhfə verə bilər”.
Nəsimi Rayon Məhkəməsində “Med Corporation” MMC-yə yazılan inzibati protokola baxılıb.
XALQ.AZ -ın məlumatına görə, hakim Babək Pənahovun sədrliyi ilə keçirilən iclasda qərar qəbul olunub.
Qərara əsasən, “Med Corporation” MMC cərimələnib.
Məlumat üçün bildirir ki, Azərbaycan Mərkəzi Bankı protokolu İnzibati Xətalar Məcəlləsinin 430.4-cü (Avans yolu ilə ödənilmiş valyuta vəsaitinin müqabilində müəyyən edilmiş müddətlərdə müvafiq mallar idxal edilmədikdə, işlər görülmədikdə və ya xidmətlər göstərilmədikdə ödənilmiş valyuta vəsaitinin xaricdən geri qaytarılmamasına görə vəzifəli şəxslər inzibati xətanın bilavasitə obyekti olmuş valyuta vəsaiti məbləğinin on faizindən iyirmi faizinədək məbləğdə, hüquqi şəxslər inzibati xətanın obyekti olmuş valyuta vəsaiti məbləğinin iyirmi faizindən otuz faizinədək məbləğdə cərimə edilir) maddəsinə əsasən tərtib edib.
Qeyd edək ki, “Med Corporation” MMC-nin nəzdində “Avrasiya” Hospitalı fəaliyyət göstərir.
Son illər xaricdə, xüsusilə Türkiyədə təhsil alan azərbaycanlı tələbələrin sayı artıb. Bunun əsas səbəbləri sırasında bəzi ixtisaslara asan qəbul şərtləri və təhsilhaqqının bir çox Avropa ölkəsi ilə müqayisədə daha münasib olması göstərilir. Lakin bu məqsədlə xaricə üz tutanlar ciddi problemlə qarşılaşırlar: Diplomları Azərbaycanda tanınmır.
Türkiyədə təhsil almış, lakin diplomunu ölkəmizdə tanıda bilməyən bir neçə məzun “Qafqazinfo”ya müraciət edib.
Onlar bildirirlər ki, indi nə təhsillərinə davam edə bilirlər, nə də işləyə: “Təhsilimizi Türkiyənin mövcud təhsil sisteminə uyğun olaraq “açık öğretim” (red. - distant təhsil) təhsilalma formasında bitirmiş və diplom əldə etmişik. Lakin indi diplomlarımızı tanıda bilmirik. Bunun üçün Təhsildə Keyfiyyət Təminatı Agentliyinə müraciət etmişik. Agentlik “açık öğretim” təhsilalma formasının ənənəvi təlim metodlarına əsaslanan təhsilalma formasına aid olmadığını bildirərək diplom tanınmasından imtina qərarı verib”.
Məzunların sözlərinə görə, agentliyin saytında yayımlanan tanınmayan universitetlərin sırasında onların təhsil aldıqları Atatürk və Anadolu universitetlərinin adı yoxdur:
“Oxuduğumuz dövrdə və hətta bu günün özündə belə, agentliyin internet səhifəsində tanınmayan universitetlər və diplomlar siyahısı var ki, orada “açık öğretim”lə bağlı heç bir məlumat əks olunmayıb. Biz məcbur qalaraq Azərbaycan məhkəmələrinə üz tutmuşuq. Hazırda məhkəmələrin icraatında xeyli belə iş var.
Son dövrə qədər Azərbaycan məhkəmələri tərəfindən məsələyə düzgün qiymət verilərək Türkiyədə “açıq öğretim” növündə təhsil almış tələbələrin diplomlarının tanınması ilə bağlı səlahiyyətli qurum olan TKTA-nın üzərinə öhdəlik qoyulmuşdu. Bununla bağlı Ali Məhkəmənin internet saytında yerləşdirilmiş bir çox nümunə qərarlar da mövcuddur. Həmin qərarlarda Ali Məhkəmənin hakimləri düzgün mövqedən çıxış edərək “açık öğretim” təhsil növünün Azərbaycanda mövcud “distant” təhsil forması ilə uzlaşdığını qeyd edib və bildiriblər ki, distant (“uzaktan öğretim”) təhsil tələbələrə kommunikasiya texnologiyalarından istifadə edərək öyrənməyə imkan verən müasir təcrübədir. Həmçinin bir çox inkişaf etmiş və ya inkişaf etməkdə olan ölkələrdə həyata keçirilən distant təhsil vasitəsilə yaşı, gəliri və ya peşəsindən asılı olmadan insanların öz imkanlarına uyğun şəkildə öz təhsillərini nizamlayaraq, məhsuldarlığını itirmədən təhsillərini davam etdirdikləri bir sistemdir. Eyni zamanda vurğulanıb ki, Azərbaycan qanunvericiliyində mövcud olan distant təhsilalma formasının təşkili qaydaları və müddəti ilə bağlı aktların qəbul olunmaması səlahiyyətli qurumun diplomların tanınmasından imtinası üçün əsas ola bilməz”.
Onlar qeyd edirlər ki, 2024-cü ilin oktyabr ayından etibarən məhkəmələr əvvəlki qərarların əksinə, diplomların tanınmamasına dair bir neçə qərar qəbul edib:
“Bunun nəticəsində ölkəmizdə magistratura səviyyəsində təhsilimizi davam etdirə, eləcə də bəzi qurumlarda öz ixtisasımız üzrə fəaliyyət göstərə bilmirik. Habelə, 4-5 il ərzində müəyyən xərclər çəkməklə, əziyyətli təhsil alma hesabına başa gələn diplomlarımız əhəmiyyətsiz olur.
Diplomların tanınmasından imtinaya əsas kimi “açık öğretim” təhsilalma formasının Azərbaycan Respublikasının qanunlarında nəzərdə tutulmadığı göstərilir. Lakin “Təhsil haqqında” Qanuna əsasən, ölkəmizdə təhsilalmanın əyani, qiyabi, distant (məsafədən) və sərbəst (eksternat) formaları müəyyən edilib. Həmin qanuna əsasən, zəruri hallarda, müasir təhsil texnologiyalarından istifadə etməklə müvafiq icra hakimiyyəti orqanı tərəfindən müəyyən edilmiş qaydada digər təhsilalma formaları da tətbiq edilə bilər. Göründüyü kimi, “açık öğretim” təhsilalma forması qanunvericiliyimizdə mövcud distant təhsil forması ilə uzlaşır, həm də qanunda qeyd edildiyi kimi müasir təhsil texnologiyalarından istifadə etməklə təşkil olunmuş təhsilalma formasıdır”.
Məsələ ilə bağlı Təhsildə Keyfiyyət Təminatı Agentliyinə (TKTA) sorğu ünvanladıq. Qurumdan müraciətimizə belə cavab verildi:
“Azərbaycan Prezidentinin 2023-cü il 18 avqust tarixli, 2306 nömrəli Fərmanı ilə təsdiq edilmiş “Xarici dövlətlərin ali təhsilə aid kvalifikasiyalarının tanınması Qaydaları”nın 1.4-cü bəndinə əsasən tanınma Azərbaycan Konstitusiyası, Azərbaycan Respublikasının tərəfdar çıxdığı beynəlxalq müqavilələr, “Təhsil haqqında” Azərbaycan Respublikasının Qanunu, Azərbaycan Respublikasının digər qanunları, bu Qaydalar, Azərbaycan Respublikası Prezidentinin digər fərmanları, həmçinin sərəncamları, Azərbaycan Respublikası Nazirlər Kabinetinin qərar və sərəncamları, habelə Azərbaycan Respublikasının digər normativ hüquqi aktlarının tələbləri nəzərə alınmaqla həyata keçirilir.
Buna qarşılıq, “Təhsil haqqında” Azərbaycan Respublikası Qanunu, 13.1-ci bəndində əks olunmuş təhsilalma formaları arasında “açıköğretim” forması yer almır və Azərbaycan Respublikasında bu formada tədrisin təşkili ümumiyyətlə nəzərdə tutulmayıb”.
Qurumdan əlavə olaraq qeyd edilib ki, Türkiyə qanunvericiliyində bu təhsil forması müəllim və tələbə arasında qarşılıqlı əlaqənin olmadığı bir sistem kimi qəbul edilir:
“İnzibati icraat zamanı araşdırma əsasında məlum olub ki, Türkiyə Respublikasının “Xarici dövlətlərin ali təhsil diplomlarının tanınması və ekvivalentliyinin müəyyən olunması Qaydası”nın 3-cü maddəsinin “a” bəndinə əsasən “açıköğretim” təhsilalma forması təhsilalanlarla təhsilverənlərin qarşılıqlı ünsiyyətinə və qarşılıqlı fəaliyyətinə əsaslanmayan təhsilalma növüdür.
Buna qarşılıq, “Təhsil haqqında” Qanunun 31-ci maddəsinə əsasən təhsilverənlər və təhsilalanlar təhsil prosesinin mütləq iştirakçıları kimi nəzərdə tutulub. Beləliklə, “açıköğretim” təhsilalma forması üzrə tədrisin təşkilinin Azərbaycan təhsil qanunvericiliyinə əsasən təhsil prosesinin təşkili üçün nəzərdə tutulan tələblərlə uyğunsuzluq təşkil etdiyi müəyyən olunub.
Nəticə etibarilə, bu forma Azərbaycanda təhsilin təşkili və tədris prosesini tənzimləyən normalara əsasən müəyyən olunmuş zəruri elementləri özündə ehtiva etmir və ənənəvi təlim metodlarına əsaslanan formal təhsil hesab oluna bilməz.
Azərbaycan Prezidentinin 2023-cü il 18 avqust tarixli, 2306 nömrəli Fərmanı ilə təsdiq edilmiş “Xarici dövlətlərin ali təhsilə aid kvalifikasiyalarının tanınması Qaydaları”nın 4.1.5-ci bəndinə əsasən Milli Kvalifikasiyalar Çərçivəsi üzrə bakalavriat səviyyəsinə uyğun kvalifikasiyalara münasibətdə tədris müddətinin ən azı üçdə ikisində ənənəvi təlim metodlarına əsaslanan formal qaydada təhsilin əldə olunması tanınmaya dair ümumi tələblərə aid edilib.
Yuxarıda qeyd olunanlar nəzərə alınaraq, bu forma üzrə tədrisin təşkilinin Azərbaycan təhsil qanunvericiliyinə əsasən təhsilin təşkili prosesinin zəruri tələblərinə uyğun olmadığı üçün ənənəvi təlim metodlarına əsaslanan formal təhsil hesab oluna bilməz”.
Mövzu ilə bağlı saytımıza danışan təhsil eksperti Elşən Qafarov isə bildirir ki, distant təhsil alma forması Azərbaycanda mövcud olmadığı üçün tanınmır:
“Ümumiyyətlə, xaricdə verilmiş diplomların, yəni dərəcələrin, kvalifikasiyaların tanınması Lissabon Konvensiyasına uyğun olaraq aparılır. Bununla da dövlətlər arasında vətəndaşların bir-birinin ölkəsində təhsil alması, həmin ölkədə əldə etdikləri təhsil sənədlərinin, dərəcələrinin tanınması prosedurunu təsdiq edəcəklər.
2001-ci ildə nostrifikasiya qaydaları təsdiq edilmişdi və həmin qaydalar Lissabon Konvensiyasına zidd idi. Lakin 2023-cü ildə ölkə Prezidentinin Sərəncamı ilə xaricdə verilmiş kvalifikasiyaların tanınması qaydaları təsdiq olunduqdan sonra yeni qaydalar tam şəkildə Lissabon Konvensiyasına uyğunlaşdırıldı. Bu məsələ isə tələbələrin distant təhsil formasında xaricdə təhsil almasıdır. Problem xaricdə verilmiş təhsilin keyfiyyəti ilə bağlı deyil.
Sadəcə Azərbaycan Respublikası distant təhsili tanımır. Halbuki keçmiş post-sovet məkanına daxil olan bir çox respublikalar artıq distant təhsil formasını tanıyır. Lakin biz bu məsələdə çox gecikirik. Halbuki “Təhsil haqqında” Qanunun 14-cü maddəsində distant təhsil forması qeyd olunub. Ancaq bunun icra mexanizmi yoxdur, yəni qəbul edilməyib. Buna görə də distant təhsil alan şəxslərin diplomları tanınmır. Bu da ayrı-ayrı insanların narazılığına səbəb olur”.
Ekspertin sözlərinə görə, dünyada distant təhsilə keçid artır və biz də bu sistemi qəbul etməli olacağıq:
“Problemin kökü ondadır ki, məsul qurumlar distant təhsili tanımaq istəmirlər. Bunun səbəbi isə Azərbaycanın ali təhsil sisteminin bugünkü vəziyyətinin kifayət qədər bərbad olmasıdır. Əgər Təhsil Nazirliyi distant təhsil formasını tanısa, o zaman Azərbaycan universitetlərində yüksək ödənişlər etməklə təhsil alan, amma yetərli bilik və bacarıqlara yiyələnməyən şəxslər, daha aşağı qiymətə xarici universitetlərdə təhsil alaraq lazımi bilik və bacarıqları qazana bilərlər. Nəticədə Azərbaycan universitetlərinə müraciət edənlərin sayı azalacaq, universitetlər boş qalacaq və ya çox az sayda tələbə cəlb edə biləcəklər”.
Vəkil Orxan Əhmədov isə deyir ki, Nazirlər Kabineti 2010-cu il 24 iyun tarixli 117 nömrəli Qərarında bakalavr təhsili məzmunu və təşkili qaydalarında distant və eksternat formada bakalavr hazırlığı müəyyən olunsa da, bu günə qədər həmin əsasnamələr təsdiq edilməyib:
“Nəticə etibarilə məsləhət görülərdi ki, tələbələr nəinki universitetlərinin dövlət tərəfindən tanınmasına, həm də həmin təhsil formasına da fikir versinlər. Xaricdə təhsil almaq istəyən tələbələr universitetlərin dövlət tərəfindən tanınıb-tanınmadığını yoxlayırlar, amma təhsil formasına xüsusi diqqət yetirmirlər. Əgər tələbə xaricdə qiyabi və ya distant formatda təhsil alırsa, lakin Azərbaycanda bu ixtisas yalnız əyani formada mövcuddursa, diplom tanınmaya bilər. Tələbələr ixtisas və təhsil formatı barədə öncədən araşdırma aparmalıdırlar ki, diplomlarını tanıtmaqda çətinliklə qarşılaşmasınlar”.
O. Əhmədov bunun iki həll yolu olduğunu sözlərinə əlavə edib:
“Təhsil haqqında” Qanunun 13-cü maddəsində distant və eksternat təhsil forması nəzərdə tutulsa da, Nazirlər Kabineti tərəfindən distant təhsilin aparılması ilə bağlı əsasnamələr bu günə qədər təsdiq edilməyib. Nəticədə təhsilini tamamlayan məzunlar öz diplomlarını tanıtmaqda əziyyət çəkirlər. Əgər bu təhsil formaları qanunda olsa da, icrası mümkün deyilsə, o zaman qanundan çıxarılmalıdır ki, tələbələr də bu formatlarda təhsil alıb sonradan diplom problemi yaşamasınlar. Əgər qanunda distant və eksternat təhsili nəzərdə tutulubsa, o zaman Nazirlər Kabineti onların icra mexanizmini müəyyən edən əsasnamələri təsdiq etməlidir”.
Azərbaycanın tanınmış vəkili Aslan İsmayılov Ali Məhkəmənin, Məhkəmə Hüquq-Şurasının sədri İnam Kərimova müraciət edib.
Günunsesi.info-nun xəbərinə görə, “Azərbaycanda hüquqi dövlət quruculuğunu arzulayan hər kəsdən bu müraciəti paylaşmalarını xahiş edirəm” deyə Aslan İsmayılov bunu yazıb.
“Sizə ünvanlanmış bu müraciətim tək bir vəkilin müqavilə əsasında apardığı işlər zamanı gördükləri qanunsuzluqlarla bağlı deyil. Bu müraciətdə sadaladığım konkret işlərdə gördüklərim qanunsuzluqlar bütün ölkə boyu geniş yayılıb, insanlarda artıq kütləvi narazılıq doğurur və əminəm ki, bu cür davam edərsə çox acı nəticələrə gətirib çıxara bilər. Buradan bir daha təkrar edirəm ki, İmişlidə baş vermiş bəzi vətəndaşların qanunsuz əməlləri ilə müşayiət olunan kütləvi narazılıqlar bir avtonəqliyyat hadisəsi zamanı baş vermiş faciə ilə bağlı deyildi. Baş vermiş hadisə vətəndaşların hər gün məhkəmələrdə, hüquq-mühafizə orqanlarının hərəkətlərində gördükləri qanunsuzluqlara, özbaşnalıqlara, geniş yayılmış, bütün hədləri aşmış korrupsiya hallarına etirazı idi. Belə davam edərsə bu cür halların təkrarlanmasını istisna etmirəm. 44 günlük Vətən Müharibəsindən sonra sadaladığım halların baş verməsi yolverilməzdir, çünki bu vətəndaşlarımızda olan vətən sevgisinə zərər yetirməklə bərabər hakimiyyətə olan inama da ciddi xələl gətirir. Bu isə bu gün ölkəmiz ətrafında baş verən prosesləri nəzərə alsaq çox təhlükəlidir.
Hörmətli İnam müəllim!
Asan Xidmətdə nail olduqlarınız mənim kimi bir çoxlarında məhkəmə sistemində olan biabırçılıqlara son qoyacağınıza böyük ümid yaratdı və çoxlarımız uzun müddət məhkəmə sistemində baş verən qanunsuzluqlara müvəqqəti də olsa susduq. Çox təəssüf edirəm ki, bu gün artıq baş verən biabırçılıqlara susmaq mümkün deyil. Qısa da olsa bəzi xarakterik halları diqqətinizə çatdırıram.
– İstisnasız bütün məhkəmələrdə işlərə baxış təyin oldunduğu vaxtdan saatlarla gec başlayır, prosesə gəlmiş vəkillər saatlarla zalda gözləməli olurlar və nəticədə iştirak edəcəkləri məhkəmə proseslərinə çatmırlar. Bu halın işin çoxluğu ilə əsaslandırılması doğru deyil, çünki əksər hallarda, xüsusən rayon məhkəmələrində işlər 10-15 dəqiqə fasilələrlə təyin edilir. Bəllidir ki, heç hazırlıq iclasını da 10-15 dəqiqəyə başlayıb yekunlaşdırmaq mümkün deyil. Əksər hallarda işin mahiyyəti ilə baxışları da bu qaydada təyin edilir.
– Hakimlərin əksəriyyəti işə hazırlıq mərhələsini lazımi qaydada qurmurlar, prosesə gələcək şahidlər, zərərçəkənlər lazımi qaydada əvvəlcədən xəbərdar olunmurlar. Bir çox işlər sadəcə baxılması mümkün olmadığı halda da təyin edilirlər.
– Bəzi hallarda hakimlər vəkilləri “doğma”larına və “ögey”lərinə bölürlər (bu bölgü də bəzi vəkillərin hakimlərlə sıx əlaqələrinin olub-olmamasından asılıdır). “Doğma”ların yersiz hərəkətlərinə, kobudluğuna, qarşı tərəfə hörmətsizlik göstərməsinə susur, “ögey”lərin isə işin bütün hallarını araşdırmağa yönəlmiş sualları verməyə belə imkan vermirlər.
– Çəkinmədən qeyd edirəm ki, işlərin uzanması bir çox hallarda korrupsiya maraqları ilə bağlıdır.
Yazdıqlarımın nə qədər doğru olub-olmamasını aşağıda qeyd edəcəyim, şəxsən iştirak etdiyim məhkəmə proseslərini yoxlamaqla müəyyən edə bilərsiniz. Xahiş edirəm, nəzərə alasınız ki, 1983-cü ildən hakim, məhkəmə sədri, prokuror, vəkil işləyirəm və məhkəmə prosesinin necə keçirilməsini ən azından pis bilmirəm. Qeyd edəcəyim hər 4 iş üzrə zərərçəkənləri müdafiə edirəm:
– 15.02.2023-cü ildə Bakı Ağır Cinayətlər Məhkəməsində təqsirləndirilən şəxslər Nadir Əliyev və Alik Həsənovun Cinayət Məcəlləsinin 178.4-cü maddəsi ilə hazırlıq iclası keçirilib. İş üzrə cəmi 5 zərərçəkən və 6 şahid olub, heç bir əlavə ekspertiza, yaxud digər əlavə hərəkət keçirilməyib. Söhbət 3 dələduzluq epizodundan – 3 stadionun, Azərbaycan Həmkarlar İttifaqları Konfederasiyasının vəzifəli şəxsləri tərəfindən satılmasından gedir. İş üzrə 40 məhkəmə iclası keçirilib və 1 il 7 aydan sonra 23.09.2024-cü ildə hökm elan edilib. Ən maraqlısı isə iş üzrə çıxarılmış hökmdür. Törədilmiş cinayətlərə, elə məhkəmənin gəldiyi qənaətə görə, N.Əliyev başçılıq edib. A.Həsənov isə tək 1 stadionun satışında əlaqəli şəxs olub. İş üzrə 2 milyon 584 min manat ziyan dəyib, cəmi 100 min manat ödənilib və həmin ödənişi də A.Həsənov edib. N.Əliyev bir manat belə ödəməyib. Həmin maddə ilə cəza 10 ildən 14 ilə qədər nəzərdə tutulub. Məhkəmə hər iki şəxsə heç bir əsas olmadan ən aşağı həddə, yəni 7 il azadlıqdan məhrum etmə təyin edir və sonda cinayət işinə başçılıq edən, bir manat da ziyandan ödəməyən Azərbaycan Həmkarlar İttifaqları Konfederasiyasının sədr müavini N.Əliyevi məhkəmə zalından azad edib ona şərti cəza təyin edir, A.Həsənovu isə cəzaçəkmə müəssisəsinə göndərir. İndi çox istərdim ki, kimsə, bir balaca hüquqi təhsili olan demirəm, məntiqi və savadı olan şəxs bu cəza təyinatında əsas götürülən amili mənə izah etsin. Şəxsən mənə hər şey aydındır. Ancaq bunu səlahiyyət sahibi olanlar müəyyən edib tədbir görsələr daha yaxşı olar.
– 17.05.2024-cü ildə Bakı Ağır Cinayətlər məhkəməsində təqsirləndirilən şəxslər Şahin Hüseynov, Abbas Sadıqov və Mahir Sadıqovun 178.4-cü maddəsi ilə hazırlıq iclası keçirilib. İş üzrə cəmi 3 zərərçəkən və 3 qısa dələduzluq epizodu var. Bu günə qədər 13 iclas keçirilib, 3 təqsirkar dindirilib və 2 zərərçəkənin dindirilməsi davam edir. Növbəti iclas 14.02.2025-ci ilə təyin edilib. Bu cür balaca həcmli bir iş artıq 9 aydır ki, davam edir və məhkəmə prosesində baş verən biabırçılıqları, qanun pozuntularını görmək üçün bir neçə məhkəmə videogörüntüsünə baxmaq kifayətdir. Əminəm ki, heç bir müdaxilə olmasa sədrlik edən hakim Cavid Hüseynov bu işə təqaüdə çıxana kimi baxıb istədiyi hökmü elan edəcək.
– Məhz məhkəmə və digər hüquq-mühafizə orqanlarının korrupsiya əməllərinə görə müdafiə etdiyim Humay Hüseynovanın Nəsimi rayonunda 2010-cu ildə başlanmış əmlakın bölgü işinə cürbəcür instansiyalarda bu gün də baxılır. Tək bu işin analizi həmin sistemin nə qədər biabırçı vəziyyətdə olduğunu göstərir. Hal-hazırda Nəsimi rayon məhkəməsində Vəliyev Hüseyn Vəli oğlunun 186.1-ci maddəsi ilə işə baxılır. Bu işdə də zərərçəkmiş H.Hüseynovanı müdafiə edirəm. İşin fabulası ondan ibarətdir ki, zərərçəkənə çatacaq əmlak icra zamanı H.Vəliyev tərəfindən yararsız hala salınmaqla 20 min manatdan artıq ziyan vurulub. Əmlakın yararsız hala salınması video və fotoşəkillərlə təsdiq olunub. İş üzrə bir təqsirkar, bir zərərçəkən və 3 şahid var. Məhkəmə hökm elan etməsi üçün ancaq bu şəxslər dindirilməlidir. Bu günə qədər də heç bir əlavə hərəkət edilməyib. 15.10.2024-cü ildə hazırlıq iclası keçirilib. Bu günə qədər 9 iclas keçirilib və iş yenə 18 fevrala təyin edilib. Normalda bu iş uzaqbaşı 2 həftəyə və 2 iclasa yekunlaşmalı idi. Artıq 4 aydır ki, bu işin baxışı davam edir. Heç bir səbəb də yoxdur.
– Sonda Bakı Apellyasiya məhkəməsinin 29.12.2024-cü il qərarını diqqətinizə (sədrlik edən hakim Elmar Rəhimov) çatdırıram. Həmin qərarla 27.12.2024-cü il tarixdə Xətai rayon məhkəməsi tərəfindən haqqında qətimkan tədbiri seçilmiş Çin vətəndaşı V.Tianbao məhkəmə zalında həbsdən dərhal azad edilib. Söhbət Azərbaycan vətəndaşlarına qarşı 2 milyon manatdan artıq dələduzluq edib pullarını mənimsəmiş şəxs barəsində gedir. Bu işdə də zərərçəkəni müdafiə edirəm və qəbul edilmiş qərarı nə qədər istəsəm də heç cür izah edə bilmirəm. 10 min manat həcmində dələduzluq etmiş Azərbaycan vətəndaşları haqqında tələm-tələsik həbs qətimkan tədbiri seçən məhkəmə hər dəqiqə ölkədən qaçıb Çində gizlənə biləcək şəxsi necə azad edib? Bundan sonra hansı Azərbaycan dövlətinə qoyulacaq hörmətdən danışıla bilər?
Hörmətli İnam müəllim, bu yazım heç də ölkədə olan bütün korrupsiya və qanunsuzluqların başında məhkəmələrin durması anlamına gəlməməlidir. Çox yaxşı bilirəm ki, digər hüquq-mühafizə orqanlarında vəziyyət daha pisdir. Ancaq onu dəqiq bilirəm ki, ədalətli, qanuni məhkəmə olan yerdə digər orqanlar bu qədər qanunsuzluqlar heç vaxt edə bilməzlər! Ona görə də bir daha müraciət edib göstərdiyim konkret faktları araşdırmağınızı xahiş edirəm, çünki sadaladığım konkret faktlarla bağlı şəxsən Sizə yaxın, bu problemləri çatdıra biləcək bir neçə vəzifəli şəxslərə müraciət etsəm də, geri dönüş almadım və artıq bu qanunsuzluqları ictimailəşdirməkdən başqa heç bir həll yolu görmədim”.