 |
|
|
Baş Prokurorluq "qumar kralı" kimi tanınan Yusif Baqiyevlə (Şəkili) bağlı məlumat yayıb.
Musavat.com bildirir ki, internet informasiya resurslarından istifadə etməklə qumar oyunlarının təşkil edilməsi və əldə edilmiş pul vəsaitlərinin leqallaşdırılmasında təqsirləndirilən Yusif Baqiyev və digərləri məsuliyyətə cəlb edilib.
Qeyd edilib ki, internet informasiya resurslarından istifadə etməklə qumar oyunlarının təşkil edilməsi və digər qanunsuz hərəkətlərlə bağlı daxil olmuş məlumat əsasında həyata keçirilmiş təxirəsalınmaz əməliyyat-axtarış tədbirləri nəticəsində Baş prokuror yanında Korrupsiyaya qarşı Mübarizə Baş İdarəsində cinayət işi başlanıb.
Aparılmış istintaq-əməliyyat tədbirləri ilə Baqiyev Yusif Seyfullah oğlunun Ramil Saadov və digər şəxslərlə mütəşəkkil dəstə halında birləşərək özünə məxsus olan onlayn qumar saytlarının ölkə ərazisində qanunsuz olaraq fəaliyyət göstərməsinə nail olmaqla xüsusilə külli miqdarda qanunsuz gəlir əldə etməsinə, habelə, 2022-ci ildən başlayaraq "Paysis" MMC və "Pulpal" MMC-nin rəhbəri Nasibov Samir Hüseyn oğlu ilə sövdələşərək sonuncuya məxsus pul köçürmə sistemlərində ayrı-ayrı şəxslərin adına elektron pul kisələrinin açılaraq onlayn qumar oyunları nəticəsində əldə edilməklə həmin kisələrə köçürülmüş ümumilikdə 161 milyon manatdan artıq pul vəsaitin müxtəlif şəxslərin adlarına açılmış çoxsaylı kart hesablarına köçürməsi yolu ilə leqallaşdırmasına əsaslı şübhələr müəyyən edilib.
İstintaq zamanı keçirilib baxış və axtarışlar nəticəsində iş üçün əhəmiyyət kəsb edən maddi sübutlar götürülüb.
Toplanmış ilkin sübutlar əsasında Yusif Baqiyev və Ramil Saadova Cinayət Məcəlləsinin 193-1.3.1, 193-1.3.2 (mütəşəkkil dəstə tərəfindən cinayət yolu ilə əldə edilmiş xeyli miqdarda əmlakı leqallaşdırma) və 244-1.4-cü (qumar oyunlarının təşkili və ya keçirilməsi xüsusilə külli miqdarda gəlir əldə etməklə törədildikdə), Samir Nasibova isə həmin Məcəllənin 193-1.3.1 və 193-1.3.2-ci maddələri ilə ittiham elan edilib.
Yusif Bagiyev barəsində istintaq orqanının vəsatəti və ibtidai araşdırmaya prosessual rəhbərliyi həyata keçirən prokurorun təqdimatı əsasında Binəqədi Rayon Məhkəməsinin qərarı ilə həbs, Ramil Saadov və Samir Nasibovun barəsində isə istintaq orqanı tərəfindən polisin nəzarəti altına vermə növündə qətimkan tədbiri seçilib.
Hazırda cinayət işi üzrə ibtidai istintaq davam etdirilir.
Bakıda yol-nəqliyyat problemləri həll olunmaq əvəzinə daha da dərinləşir. Buna səbəb isə Azərbaycan Yerüstü Nəqliyyat Agentliyinin (AYNA) sistemsiz və məntiqsiz qərarlarıdır. Paytaxtın Əziz Əliyev küçəsi ilə Neftçilər prospektinin kəsişməsində yerləşən yolayrıcı aylardır bağlı qalsa da, bu müddət ərzində problemin həlli istiqamətində heç bir addım atılmayıb.
Yenicag.az-ın məlumatına görə, orada yerləşən işıqfor artıq funksionallığını itirsə də, AYNA onu saxlamaq üçün qeyri-ciddi bir üsula əl atıb – həmin ərazidə əlavə piyada keçidi zolağı çəkilib. Halbuki, cəmi 20 metr məsafədə piyadalar üçün keçid mövcuddur. Şəhərin bir çox nöqtələrində piyadalar təhlükəsiz keçid tapmadığı halda burada süni şəkildə ikinci keçid yaradılması, sözün əsl mənasında, məntiqsizdir. Bu addımın yeganə məqsədi isə həmin işıqforu orada saxlamaqdır.
Yeri gəlmişkən, onu da bildirək ki, bu yol əvvəllər sürücülər üçün önəmli keçid nöqtəsi olub. Belə ki, əvvəllər Əziz Əliyev küçəsindən Neftçilər prospektinə birbaşa çıxış mümkün olduğu üçün nəqliyyat rahat hərəkət edirdi. Lakin yol bağlandıqdan sonra sürücülər məcbur olub alternativ yollardan istifadə edirlər. Nəticədə isə Neftçilər prospektinə əlavə nəqliyyat axını yaranıb ki, bu da günün istənilən saatında uzun tıxaclara səbəb olur.
Ən böyük problem isə AYNA-nın bu vəziyyəti həll etmək yerinə, daha da ağırlaşdırmasıdır. Çünki qurum Bakının yol infrastrukturunu tənzimləmək əvəzinə, vəziyyəti qeyri-peşəkar qərarlarla xaosa sürükləyir.
Onu da deyək ki, AYNA-nın sistemsiz yanaşması yalnız bu yolla məhdudlaşmır. Bakıda taksilər üçün xüsusi zolaqlar yaradılmadığına görə sürücülər məcbur olub sərnişinləri təyinat nöqtəsindən uzaqda düşürməyə çalışırlar. Bu da yol kənarında nizamsız dayanmalara, həmçinin paytaxtın əsas küçə və prospektlərində süni sıxlığa səbəb olur. Əgər AYNA bu problemi həll etmək istəsə, dünya təcrübəsinə uyğun olaraq paytaxtın əsas yollarında taksi zolaqları təşkil edərdi. Lakin görünən odur ki, qurum vəziyyəti düzəltmək əvəzinə, sürücüləri çətin vəziyyətə salmağa davam edir.
Bundan əlavə, AYNA həmçinin sözügedən ərazidə yerləşən avtobus yollarında da xaotik vəziyyət yaradıb. Daha dəqiq desək, Neftçilər prospektinin üzü Bayıl istiqamətinə gedən tərəfi – Qız qalası tərəfdən gələn avtobus zolağı ləğv edilsə də, Azərbaycan Dövlət Kukla Teatrı tərəfindən üzü 8 Noyabr prospekti istiqamətində gələn avtobus zolağı saxlanılıb. Bu isə Niyazi küçəsi və Bayıl istiqamətindən gələn avtomobillərin sıxlıq yaşamasına səbəb olur. Həm işıqforun lazımsız şəkildə saxlanılması, həm də avtobus zolaqlarında yarımçıq və sistemsiz dəyişikliklər yollarda xaosa gətirib çıxarır.
Qısacası, AYNA-nın düşünülməmiş qərarları Bakının əsas yollarında vəziyyəti çıxılmaz hala salıb. Əvəzində isə nə yeni həll yolları təqdim edilir, nə də mövcud problemlərin aradan qaldırılması üçün effektiv addımlar atılır. Sırf bu qurumun başdansovdu fəaliyyətinin nəticəsidir ki, mərkəzi küçələrdə nəqliyyatın hərəkəti tamamilə tormozlanıb, yollar tıxac içindədir və vətəndaşlar hər gün bu vəziyyətin əziyyətini çəkirlər.
Qurumun əsas vəzifəsi şəhər yollarında hərəkəti rahatlaşdırmaq olsa da, görünən odur ki, AYNA prosesə tam tərsinə yanaşır. Məntiqsiz qərarlar, sistemsiz planlaşdırma və uğursuz yol siyasəti paytaxtı nəqliyyat cəhənnəminə çevirib. Əgər bu yanaşma bir müddət də davam edərsə, Bakıda nəqliyyatın vəziyyətinin daha da acınacaqlı hala düşəcəyini kimsə istisna etmir.
Rəssam-modelyer Elnarə Bəkirovanın atası, iş adamı Kamran Bəkirovu qətlə yetirib, meyitini quyuya atmaqda ittiham olunan iki nəfər – Mustafa Zeynalov və Namiq Əliyevin il yarım davam edən məhkəməsi yekunlaşıb.
Bakupost.az xəbər verir ki, Bakı Ağır Cinayətlər Məhkəməsində çıxarılan hökmlə onların hər biri 19 il azadlıqdan məhrum edilib.
Onlar son sözlərində zərərçəkmiş tərəfdən – mərhum Kamran Bəkirovun ailəsindən üzr istəyiblər.
Mustafa Zeynalov
Təqsirləndirilən şəxslərdən 70 yaşlı Mustafa Zeynalov üzünü hakimlərə tutataq, son sözündə deyib:
“Elə cəza verin, həbsxanada ölməyim”.
1955-ci il təvəllüdlü Mustafa Zeynalov hüquqşünasdır, vaxtilə müstəntiq işləyib. Polis orqanlarında çalışmış Mustafa Zeynalov sonradan rüşvət ittihamı ilə cinayət məsuliyyətinə cəlb olunub. O, “Kontakt Home” mağazalar şəbəkəsində hüquq şöbəsinin müdiri vəzifəsində də çalışıb.
1984-cü il təvəllüdlü Namiq Əliyev isə bankda hüquq şöbəsinin müdiri olub, daha sonra mobil operatorlardan birində şöbə müdiri işləyib, dəfələrlə müxtəlif dövlət qurumlarına fərdi layihələr verib, dövlət tədbirləri keçirib.
Namiq Əliyev
Məhkəmədə zərərçəkmiş qismində Elnarə Bəkirova təqsirləndirilən şəxslərə ağır cəza tələb edib.
Prokuror Mustafa Zeynalov və Namiq Əliyevin hər birinin 20 il azadlıqdan məhrum edilməsini istəyib.
Cinayət işinin materiallarında göstərilib ki, 1954-cü il təvəllüdlü Kamran Bəkirov 2023-cü ilin aprelində Nardaran qəsəbəsi, Ləhic bağları yaşayış massivində öldürülüb.
Qızı iddia edir ki, həmin vaxt onu aldadıb, birgə biznes qurmaq adı ilə görüşə çağırıb, qətlə yetiriblər. Ailə üzvlərinin sözlərinə görə, görüşə gedərkən onun üstündə 300 min manata qədər pul olub.
İttihama əsasən, Kamran Bəkirov pulunu ələ keçirmək məqsədilə öldürülüb.
Kamran Bəkirov və Elnarə Bəkirova
Yerli mətbuatda yayılan iddialara və Elnarə Bəkirovanın bildirdiyinə görə, təqsirləndirilən şəxslərin hər ikisi 2020-2024-cü illərdə Milli Məclisin deputatı olan, “Kontakt Home” mağazalar şəbəkəsinin rəhbəri Elnur Allahverdiyevin qohumlarıdır. Mustafa Zeynalov onun dayısı, Namiq Əliyev isə o biri dayısının kürəkənidir.
Son günlər təsir agenti qalmaqalı yaşanmaqdadır. Bir-birini xarici ölkədən dəstək alaraq onların maraqlarını öz ölkəsində yaymaq və ictimai fikrə təsir etmək məqsədi güdməkdə ittiham edənlərin sayı artıb. Mətbuatda həmin agentlərin siyahıları da dərc olunur.
Bəs, görəsən, təsir agenti kimdir?
Musavat.com sözügedən mövzuda araşdırma materialı hazırlayıb.
Həmin materialı təqdim edirik:
“Təsir agenti (ing. Agent of Influence) xarici dövlətin və ya qurumun maraqlarını təbliğ edən, onların siyasətini dəstəkləyən və ictimai rəyə təsir göstərən şəxs və ya təşkilatdır. Bu şəxslər media, siyasət, iqtisadiyyat, diplomatiya və ictimai sektor kimi müxtəlif sahələrdə fəaliyyət göstərə bilərlər.
Təsir agenti birbaşa casus sayılmasa da, onun əsas məqsədi xarici ölkənin maraqlarını yaymaq və ictimai fikrə təsir etməkdir. Onlar açıq və ya gizli şəkildə fəaliyyət göstərə, müxtəlif siyasi, sosial və iqtisadi gündəmləri formalaşdırmağa cəhd edə bilərlər.
Təsir agenti necə hazırlanır?
Təsir agentlərinin hazırlanması müxtəlif metodlarla aparılır. Bəzi hallarda bu şəxslər xarici dövlətlərin xüsusi xidmət orqanları tərəfindən öyrədilir, bəzi hallarda isə təbii şəkildə müəyyən dairələrin maraqlarına xidmət edən şəxslərə çevrilirlər.
1. İdeoloji formalaşdırma – Şəxs müəyyən ideologiyanı qəbul edir və bu ideologiyanı yaymağa başlayır. Bu, universitetlər, qeyri-hökumət təşkilatları, beyin mərkəzləri (think tanks) və mediada formalaşdırıla bilər.
2. Maddi və siyasi dəstək – Xarici ölkələr və ya qurumlar təsir agentlərinə maddi, media və siyasi dəstək verirlər.
3. Sosial və media təsiri – Sosial media, jurnalistika və diplomatiya vasitəsilə təsir agentləri hədəf auditoriyaya təsir göstərmək üçün müəyyən şəbəkələrə daxil edilirlər.
4. Şəxsi əlaqələr və lobbiçilik – Təsir agentləri yerli siyasətçilərlə, media qurumları ilə və nüfuzlu şəxslərlə əlaqə quraraq müəyyən qərarların qəbuluna təsir göstərməyə çalışırlar.
5. Tədricən radikallaşdırma və ya manipulyasiya – Bəzi hallarda təsir agentləri özləri də bilmədən xarici dövlətlərin maraqlarına xidmət edən fiqurlara çevrilirlər.
Təsir agentlərinin əsas işi nədir?
Təsir agentlərinin fəaliyyətləri fərqli formalarda ola bilər. Əsas məqsəd ictimai rəyə, siyasi qərarlara və dövlət institutlarına təsir etməkdir.
1. İctimai rəyə təsir etmək – Media, sosial şəbəkələr, beyin mərkəzləri və akademik institutlar vasitəsilə müəyyən mövzularda ictimai rəyin formalaşdırılması.
2. Dezinformasiya yaymaq – Dövlət siyasətini zəiflətmək və ya alternativ siyasi gündəmi yaratmaq üçün yalan və manipulyasiya edilmiş məlumatların yayılması.
3. Siyasi qərarlara təsir etmək – Siyasətçiləri və dövlət rəsmilərini müəyyən qərarların qəbuluna yönəltmək, lobbiçilik fəaliyyətləri həyata keçirmək.
4. Cəmiyyətdə qarşıdurma yaratmaq – Müxtəlif sosial, etnik və dini qruplar arasında gərginliyi artırmaq, daxili sabitliyi pozmaq.
5. Beynəlxalq arenada təbliğat – Xarici ölkənin maraqlarına uyğun mövqeləri beynəlxalq təşkilatlarda və mediada yaymaq.
Təsir agenti ilə casus arasında fərq nədir?
Xüsusiyyət Təsir Agenti Casus
Əsas məqsəd İctimai rəyə təsir, siyasi gündəm yaratmaq Gizli məlumat toplamaq, casusluq fəaliyyəti aparmaq
Fəaliyyət metodu Açıq və ya örtülü təbliğat, media və siyasi təsir Gizli fəaliyyət, kəşfiyyat əməliyyatları
Kimə xidmət edir? Xarici hökumətlər, fondlar, təşkilatlar Xüsusi xidmət orqanları, kəşfiyyat idarələri
Qanuni aspekt Bəzi ölkələrdə qanuni, amma tənzimlənir Əksər ölkələrdə qanunsuz və cinayət sayılır
Təsir agentlərinin qarşısının alınması üçün tədbirlər
• Xarici təsirlərin məhdudlaşdırılması – Xaricdən maliyyələşən təşkilatların və fərdlərin fəaliyyətini tənzimləmək.
• Mediada şəffaflıq təmin etmək – Xarici təsir altında olan media qurumlarının fəaliyyətini izləmək və məlumatların mənbəyini açıqlamaq.
• Hüquqi tənzimləmə – Xarici agentlərə dair qanunların qəbulu və onların qeydiyyata alınması.
• Milli təhlükəsizlik tədbirləri – Kəşfiyyat və əks-kəşfiyyat orqanlarının təsir agentlərinin fəaliyyətini izləməsi və ifşa etməsi.
Bütün bunlar təsir agentlərinin milli təhlükəsizliyə və ictimai rəyə təsirini minimuma endirmək üçün istifadə edilən əsas strategiyalardır.
Musavat.com
Sumqayıt ş., 40-cı məh., ərazisində yerləşən 1 №-li, şəhər xəstəxanasının poliklinika şöbəsinin qarşısı poliklinikadan çox maşın bazarını xatırladır
Bu iddia bir qrup Sumqayıt sakini adından Yenixeberorg-a daxil olmuş müraciətdə yer alır. Məlum aktuallığını nəzərə alıb, müraciəti olduğu kimi dərc edirik:
Gündəlik olaraq dövrü mətbuatdan yol nəqliyyat hadisələri ilə bağlı məlumatları izləyirik. Dövlət Yol Polis Xidmətinin əməkdaşları qanun pozuntularına yol verən sürücülərə qarşı operativ reydlər keçirərək vəzifələrini icra etdikləri üçün onlara minnətdarıq.
Əfuslar olsun ki, Sumqayıt ş., 40-cı məh., ərazisində yerləşən 1 №-li, şəhər xəstəxanasının poliklinika şöbəsinin qarşısı poliklinikadan çox maşın bazarını xatırladır. Poliklina ərazisinə qanunsuz daxil olan avtomobillərin əlindən biz təngə gəlmişik. Poliklinaka ərazisinin bir hissəsini poliklinaknın həkimləri zəbt edərək şəsi avtomobillərini saxlayırlar. Digər hissəsi isə yoldan keçən sürücülər özləri üçün parkovka yerinə çevrilibdir. Poliklinanın 2 girişindən birində maneə baryeri (şlakbaum) olsa da, digər girişindəki maneə (şlakbaum) naməlum şəxslər tərəfndən sökülüb. Buna görə də istənilən sürücü poliklinika ərasinə daxil olub hətta qapının ağzında maşınlarını rahat parkovka edirlər. Bu da öz poliklinkaya gələn sakinlərin təhlükəsizliyinə ciddi maneə yaradır. Poliklinikanın rəhbərliyi o avtomobilləri niyə görmür ?!
Xahiş edirik sakinlərin poliklinika ərazisinə qanunsuz daxil olan avtomobil sürücüləri barəsində tədbir görməklə yanaşı avtomobillərin poliklina ərazisinə daxil olmasını əngəlləmək üçün poliklinikanın digər girişindən sökülmüş maneənin (şlakbaum) bərpa olunması üçün tədbir görəsiniz.
Öncədən Sizə minnətdarıq.
Bank hesablarından pulların oğurlanması, başqa şəxslərin adına kreditlərin götürülməsi yalnız şəxsiyyət vəsiqəsi ilə mümkün ola bilər.
Bu baxımdan da mütəxəssislər şəxsiyyət vəsiqələrinin açıq halda fotolarının sosial şəbəkədə paylaşılmasını düzgün hesab etmirlər.
Həmçinin vurğulanır ki, şəxsiyyət vəsiqələrinin digər şəxslərə etibar edilməsi də düzgün deyil.
Başqasının əlinə keçən bu sənəd onun sahibinə ciddi problem yarada bilər.
Daha ətraflı İctimai TV-nin videomaterialında:
Yeni "Ford Mustang GTD" avtomobilinin ilk sahibləri onu iki il ərzində yenidən satışa çıxara bilməyəcəklər.
TEREF oxu.az-a istinadən xəbər verir ki, ən sürətli və güclü müasir "Mustang"ın alıcıları əlavə razılaşma imzalamağa məcbur edilirlər. Bu, idman maşınlarının həqiqi həvəskarlara, yoxsa spekulyantlara çatmasını təmin etmək üçün edilir.
Əvvəllər "Ford" eyni sxemlə 2022-ci ildə istehsaldan çıxarılan kiçikseriyalı orta mühərrikli GT kupesini satıb.
Qeyd edək ki, "Ford Mustang GTD" keçən ilin yayında təqdim edilib və ümumi istifadə yolları üçün icazəyə malikdir, lakin mahiyyətcə o yarış maşınıdır və qismən "Mustang GT3" texnologiyalarına əsaslanır.
Avtomobilin karbon lifindən hazırlanmış gövdə panelləri və aerodinamik elementləri, geniş tənzimləmə imkanları olan tamamilə fərqli adaptiv asqı sistemi və 5,2 litrlik 826 at gücündə mexaniki kompressorlu V8 mühərriki var.
Keçən il bu "Mustang" Nürburqrinq trasında bir dövrəni 6 dəqiqə 57,685 saniyəyə qət edərək ABŞ-nin seriyalı maşınları üçün ən yaxşı nəticəni göstərib.
ABŞ-də yeni "Mustang GTD"nin baza qiyməti 300 min dollardan yuxarıdır.
Qazaxıstan sahillərində Xəzər dənizinin suyunun qırmızı rəngdə olmasını əks etdirən kadrlar yayılıb.
Yeniavaz.com "Kazinform”a istinadla xəbər verir ki, sakinlər qeyri-adi vəziyyətdən narahat olub və ekoloqlara məlumat veriblər.
Lakin Mangistau Regional Ekologiya Departamentinin məlumatına görə, narahatlığa əsas yoxdur, bu təbii hadisədir.
Departamentinin mütəxəssisləri dəniz suyunun tərkibində kimyəvi maddələrin və neft məhsullarının olub-olmamasını müəyyən etmək üçün analizlər aparıblar.
"Təhlillərin nəticələrinə görə, heç bir çirkləndirici maddə aşkar edilməyib. Hər şeyin normal olduğu ortaya çıxıb. Yosunlar suya tünd qəhvəyi və qırmızı rəng verir. Qar yağan zaman bu hal daha da qabarıq formada üzə çıxıb. Yosunlar dayaz sularda, xüsusən də sahilimiz boyu böyüyür. Suyun rəngi onların mövcud olduğu yerlərdə dəyişir”, - departamentdən təhlillərin nəticələrinə dair verilən açıqlamada deyilir.
Mangistau Regional Ekologiya Departamentinin rəhbəri Kaysar Nadirbek deyib ki, onlar bu haldan xəbərdar olduqları halda, məsəələni dəqiqləşdirmək üçün suyun vəziyyətini bir daha yoxlayıblar.
Aktaulu ekoloq Kirill Osinin sözlərinə görə, bu hadisə hər il qışda baş verir:
"Çünki bu zaman yosunlar çoxalır və çiçək açır. Qırmızı rəng qar yağanda xüsusilə qorxulu görünür. Bu, əsasən qəhvəyi yosunlardır”.
Bu gün ali təhsil müəssisələrinin magistraturalarına qəbul imtahanında (1-ci cəhd) 3 nəfərdə mobil telefon, 1 nəfərdə isə qanunla istifadəsi və satışı qadağan olunan mini kameralı eynək, xüsusi ötürücü qurğu və qulaqlıq aşkar olunub.
TEREF bildirir ki, bu barədə Redaktor.az - a Dövlət İmtahan Mərkəzindən xəbər verilib.
Müvafiq hallar protokollaşdırılaraq həmin şəxslər imtahandan xaric olunublar. Hazırda qeyd olunan qayda pozuntuları ilə bağlı araşdırma aparılır.
DİM bir daha imtahan iştirakçılarını bu cür hərəkətlərdən çəkinməyə çağırır və bu hərəkətlərə yol vermiş şəxslər, onları bu işə təhrik edənlərlə bağlı hüquq-mühafizə orqanlarına müraciət ediləcəyini nəzərə çatdırır.
Əmlak Məsələləri Dövlət Xidmətinin məlumatına görə, 2024-cü ildə xarici ölkə vətəndaşlarının əldə etdikləri daşınmaz əmlakların 197-si fərdi yaşayış və bağ evi, 214-ü isə mənzil olub.
Azərbaycanda mülk almağa ən çox Rusiya, Türkiyə, Gürcüstan, Ukrayna və Qazaxıstan vətəndaşları maraq göstərirlər. Mütəxəssislər isə deyirlər ki, əcnəbilər daha çox dənizkənarı ərazilərdə əmlak almağa üstünlük verirlər.
"Onlara dənizimiz, şəhərimizin mərkəzi daha maraqlı gəlir. Bu şəxslər əsasən Ağ Şəhər, Səməd Vurğun küçəsində olan mənzillərə, Mərdəkan ərazisində yerləşən bağ evlərinə üstünlük verirlər. Onların əksəriyyəti Bakıda ailə həyatı qurduğu üçün ev alırlar. Lakin iş məqsədilə paytaxta gələrək burada ev alan əcnəbilər də az deyil", - deyə əmlakçı Tural Əfəndi bildirib.
Həmçinin hesab olunur ki, xarici ölkə vətəndaşları Azərbaycanda evi müvəqqəti yaşamağa icazə məqsədilə alırlar. Bununla belə, əcnəbilərin 2024-cü ildə Azərbaycanda aldıqları evlərin sayı əvvəlki illə müqayisədə azalıb.
Belə ki, 2024-cü ildə xarici ölkə vətəndaşları tərəfindən əldə olunmuş cəmi 824 əmlakın mülkiyyət hüququnun qeydiyyatı aparılıb. Halbuki 2023-cü ilin təkcə birinci yarısında bu göstərici 909 olub.
Ətraflı Baku TV-nin süjetində: