Müdafiə Nazirliyinin Daxili Təhlükəsizlik, həmçinin, Təhsil-tədris və Elmi Tədqiqatlar İdarəsinin sabiq baş zabiti, 42 milyonluq mənimsəmədə ittiham olunan Zahid Niftəliyevin ("Şlyapa Zahid") cinayət işi üzrə məhkəmə prosesi davam etdirilib.
İqtisadiyyat.az APA-ya istinadən xəbər verir ki, Bakı Ağır Cinayətlər Məhkəməsində hakim Novruz Kərimovun sədrliyi ilə keçirilən prosesdə şahidlər dindirilib.

Məhkəmədə şahid qismində ifadə verən Kamil Əşrəfov bildirib ki, “Şahin CO” şirkətinə Müdafiə Nazirliyi üçün xüsusi avadanlıqların alınması üçün kredit ayrılıb:

“Kapitalı az və kiçik şirkətlərə böyük həcmli kreditlər ya ayrılmır, ya da çox nadir hallarda ayrılır. Məndən olsaydı, heç bir sənədə imza atmazdım. Bizdən kredit ayrılması üçün xahiş etmişdilər. Biz də ayırdıq. Ayrılan kredit məbləği bankın öz kapitalı hesabına olub. Müştərilərin banka yatırdığı pullarla ödəniş olunmayıb. Ayrılan pullar “Şahin CO”nun istəyi ilə bir qismi nağdlaşdırılmış, bir qismi də hesaba köçürmə ilə ödənilib”.

Təqsirləndirilən Zahid Niftəliyev “Şahin CO”nun borclarından xəbəri olmadığını, ümumiyyətlə, bütün proseslərdən məlumatsız olduğunu bildirib.

"Zahid Niftəliyevə borcunu ödəmək üçün şans yaratdıq"

Daha sonra iş üzrə növbəti şahid “ATA Holdinq”in İdarə Heyətinin sabiq sədr müavini Adıgözəl Ağayev dindirilib.

O, bildirib ki, 2015-ci ilin iyul ayında İdarə Heyəti tərəfindən “Şahin CO” MMC-nin adına böyük məbləğdə kredit verilməsi üçün müraciət müzakirə edilib və müsbət cavab verilib:

“Belə hallarda, əsasən, kredit götürənin qoyduğu girova baxılır. Lakin bu dəfə Əşrəf müəllim dedi ki, bizdən kreditin verilməsi üçün xahiş edilib, müsbət cavab verilməlidir. Biz də müsbət cavab verdik və kredit ayırdıq. Lakin ilin sonunda yalnız faizin ödənildiyini, kreditin ödənilmədiyinin şahidi olduq. Bununla bağlı biz Zahid Niftəliyevə məlumat verdik. Ona borcunu ödəməyi üçün şans yaratdıq. Bundan sonra isə aidiyyəti qurumlara məlumat verdik”.

Şahid həmçinin milyonluq kreditin ayrılmasına sabiq vergilər naziri, mərhum Fazil Məmmədovun göstəriş verdiyini bildirib.

Proses martın 12-də davam etdiriləcək.

"Şyapa Zahid nədə ittiham olunur?

Qeyd edək ki, Zahid Niftəliyev rüşvət almaqda ittiham olunaraq bir müddət əvvəl həbs olunub. Ona Tərtər Hərbi Məhkəməsinin hökmü ilə şərti cəza verilib, azadlığa buraxılıb.

Daha sonra o, Dövlət Təhlükəsizliyi Xidmətinin (DTX) İstintaq baş idarəsi tərəfindən həbs edilib.

İstintaq dövründə Gəncə Apellyasiya Məhkəməsi prokurorluğun Tərtər Hərbi Məhkəməsinin hökmü ilə bağlı protestini təmin edib. Z.Niftəliyev vəzifə saxtakarlığı və külli miqdarda rüşvət almaqda təqsirli bilinərək 8 il 6 ay müddətinə azadlıqdan məhrum edilib.

Bundan başqa, Z.Niftəliyev hazırda məhkəmədə araşdırılan cinayət işi üzrə öz adına formal şirkət açaraq “ATABank”dan götürülmüş 42 milyon manat kredit vəsaiti üzrə çıxarılmış məhkəmə qətnaməsini qərəzli olaraq icra etməməkdə ittiham olunur.

İttihama əsasən, Zahid Niftəliyev məqsədyönlü şəkildə həmin məbləğdə kredit almaq məqsədilə “Şahin-CO” adlı şirkət yaradıb, şirkət təsərrüfat və maliyyə vəziyyəti barədə “Ata Bank” ASC-yə saxta məlumatlar təqdim etməklə 2016-cı ildə 12 ay müddətinə 42 milyon 470 min 885 manat manat kredit alaraq xüsusilə külli miqdarda ziyan vurub. O, götürülmüş kreditin ləğv prosesində olan “Ata Bank” ASC-yə ödənilməsi ilə bağlı məhkəmə qətnamələrini qərəzli olaraq icra etməyib.

Onu da qeyd edək ki, xüsusilə külli miqdarda mənimsəmə cinayətində iştirakı araşdırılan digər şəxslərlə bağlı DTX-də cinayət işi ayrılıb.

Türkiyənin "Peqasus” Hava Yolları şirkətinin təyyarəsi İngiltərənin Mançester şəhər aeroportuna təcili eniş edib.
İstanbuldan gələn təyyarənin enişdən bir qədər əvvəl həyəcan siqnalı göndərdiyi müəyyən edilib. Şahidlər təyyarənin tüstüləndiyini bildiriblər.

Təyyarənin hidrolik sistemində nasazlıq olduğu bildirilir. Hadisə nəticəsində heç kim xəsarət almayıb. İngiltərənin aviasiya mütəxəssisləri təhqiqata başlayıblar.

Ən yeni tarix. Maraqlı faktlar.
1930-cu illərin sonlarında milyonlarla insanın həyatına son qoyan repressiya dövründə İosif Stalinin xarakterinin ən amansız cizgiləri özünü daha qabarıq büruzə verib.
O, nə keçmiş silahdaşlarına, nə də sıravi vətəndaşlara güzəştə getməyib.
“NKVD” vasitəsi ilə gecə-gündüz işləyən repressiya maşınından heç kim geri dönə bilməyib. Çoxları, xüsusilə də tanınmış dövlət xadimləri, marşallar, generallar son ana qədər xilas olacaqlarına inanıblar, ümidlərini üzməyiblər. Amma heç kim əfv olunmayıb.
Maraqlıdır, edama gedən məşhurlar son məqamda özlərini necə aparıblar, son sözləri nə olub?
Leninin yaxın silahdaşlarından biri olan Qriqori Zinovyev 16 dekabr 1934-cü ildə antisovet fəaliyyətə görə həbs edilib.
O, 10 il azadlıqdan məhrumetmə cəzasına məhkum edilsə də, 24 avqust 1936-cı ildə hökm dəyişərək güllələnmə ilə əvəz olunub.
26 avqustda Zinovyevi güllələnmə kamerasına aparanda o, edamı icra edənlərin ayaqlarına yıxılaraq çəkmələrindən öpüb, ağlayaraq yalvarmağa başlayıb:
“Sizdən xahiş edirəm, Allah xətrinə, İosif Vissarionoviçə zəng vurun. O, bizim həyatımızı saxlayacağına söz verib, yalvarıram sizə, zəng vurun, mənim sözlərimi ona çatdırın”.
Zinovyevlə birlikdə edama aparılan Lev Kamenev isə özünü təmkinli aparıb, onu sakitləşdirməyə çalışıb: “Qriqori, sakit olun, şərəflə ölmək lazımdır”.
Zinovyevin edamında “NKVD”-nin rəhbəri Henrix Yaqoda, onun müavini Nikolay Yejov və Stalinin mühafizə rəisi Karl Pauker də iştirak edib. Edamdan sonra Yejov Zinovyevə vurulan güllələrin gilizini özü ilə götürüb.
SSRİ-nin ilk beş marşalından biri olan Mixail Tuxaçevski vətənə xəyanətdə, antisovet fəaliyyətdə və terror aktlarının hazırlanmasında ittiham olunaraq hərbi kollegiya tərəfindən güllələnmə hökmünə məhkum olunub.
11 iyun 1937-ci ildə saat 23:35-də hökm hərbi kollegiyanın zirzəmisində icra olunub. Edamdan əvvəl Mixail Tuxaçevski çox qürurlu görünüb və son söz olaraq “Qırmızı orduya eşq olsun!” şüarını səsləndirib.
1936-1938-ci illərdə “NKVD”-nin komissarı (naziri) olan Nikolay Yejov 10 aprel 1939-cu ildə Lavrenti Beriyanın iştirakı ilə həbs edilib. Onu iki il rəhbərlik etdiyi “NKVD”-nin Suxanovka türməsində saxlayıblar.
Yejov türmədə saxlanılarkən güllələnəcəyinə inanmayıb və həmin müddətdə çox inamlı görünüb. 3 fevral 1940-cı ildə Hərbi Kollegiyada Yejovun işinə baxılıb.
Bir neçə maddə ilə- antisovet fəaliyyət, vəzifədən sui-istifadə, homoseksuallıqda ittiham olunan Nikolay Yejov güllələnmə hökmünə məhkum edilib.
O, həyatının son dəqiqəsində Stalinin şərəfinə şüar səsləndirib: “Yaşasın Stalin!”
Sovet-fin müharibəsindəki xidmətlərinə görə Sovet İttifaqı qəhrəmanı adı ilə təltif olunan, 1940-cı ildə marşal rütbəsi alan Qriqori Kulik 11 yanvar 1947-ci ildə həbs edilib.
O, sovet hakimiyyətini ələ keçirmək istəyən qrupdakı fəaliyyətinə görə ittiham olunub.
24 avqust 1950-ci ildə Hərbi Kollegiyanın qərarı ilə Qriqori Kulik güllələnməyə məhkum edilib.
Qərarın icrası elə həmin gün həyata keçirilib. Psixoloji durumunda problemlər yaranan marşal son günlərində yalnız bir ifadə işlədib: “Yoldaş Stalinə çatdırın ki, bizi burada incidirlər...”
Hər şeyə qadir olan “dəmir narkom” Lavrenti Beriya isə ömrünün son anlarında özünü çox aciz bir durumda göstərib.
Marşal Georgi Jukov Beriyanın edam gününü belə xatırlayıb:
“Beriya güllələnən zaman özünü ən sonuncu qorxaqlar kimi aparırdı.
Çox aciz bir vəziyyətdə görünürdü. O, həmin anlarda ağlayırdı, diz çökmüşdü, özünü batırmışdı...”
Bəlkə də Jukov bu ifadələri ictimaiyyətin fikrini yayındırmaq üçün söyləyib. Çünki Beriyanın güllələnməsi ilə bağlı belə bir versiya da var ki, o elə həbs olunan gün heç bir məhkəmə olmadan güllənib.
Göründüyü kimi Stalin rejimində yetişən “qəhrəmanların” çoxu sonradan vətən xaini çıxıblar.
Onlar həmin şəxslər olublar ki, bir vaxtlar Stalinin əlindən ən böyük rütbələri, dövlət mükafatlarını alıblar. Sonralar isə adları repressiya siyahılarının ilk sıralarına yazılıb.
“Hər şeyi kadrlar həll edir” söyləyən Stalinin kadr siyasəti həqiqətən də çox mürəkkəb olub. Bu kadr münasibətlərində ortaya çoxsaylı suallar çıxır.
Bəzi məqamlarda haqlı ilə haqsızı seçmək çətinlik yaradır. Amma bir məsələdə Stalinə haqq qazandırmaq olar.
Vətənə xəyanət edənlər mütləq cəzalandırılmalıdır, kimliyindən, vəzifəsindən, rütbəsindən, təltiflərindən asılı olmayaraq.
İlham Cəmiloğlu

Hava Nəqliyyatında Polis İdarəsinin keçmiş rəis müavini polkovnik Rasim İldırım, onunla birgə ittiham olunan sayt rəhbəri Zaur Mirzəzadə və Qoşqar Məmmədovun məhkəmə araşdırması davam edir.

TEREF “Qafqazinfo”ya istinadən xəbər verir ki, Bakı Ağır Cinayətlər Məhkəməsində keçirilən bugünkü iclasda zərərçəkmiş Qurban Piriyev ifadə verib.

Bu iş üzrə zərərçəkən Piriyev iş adamıdır. O, əvvəllər dövlət qurumlarında da işləyib. Təqsirləndirilən şəxslərlə onu istintaqın əvvəlində intihar edən həmyerlisi Hürü Əmiraslanova tanış edib.

Zərərçəkmiş hakim qarşısında da təsdiq edib ki, o, Bakıdaxili rayonlardan birinə icra başçısı düzəlməsi üçün pul verib. Amma təklif ondan deyil, qarşı tərəfdən gəlib:

“Hürü dedi ki, mənim yüksək vəzifələrdə əlim çatan adamlar var. Vəzifəli şəxslərin adını çəkirdilər. Sonradan gördüm ki, hamısı qurama imiş… Açığı, mən heç icra başçısı olmaq istəmirdim. Çünki səhhətim buna imkan vermirdi.

Bütün bu işlərin başında duran Qoşqardır. Məni o yola gətirdi. Onun göstərişi ilə Rasimə pul vermişəm”.

Piriyev icra başçısı düzəlmək üçün R.İldırımın adamlarına ümumilikdə 510 min manat pul və 34 min manatlıq qızıl-zinət əşyaları verib:

“544 min manatlıq ziyanın bu günə kimi bir hissəsini geri qaytarıblar. Şikayətçiyəm, qalan hissənin də tam ödənilməsini tələb edirəm”.

Proses martın 18-i davam edəcək.

Qeyd edək ki, bu işə görə təqsirləndirilən şəxslər üçü də əvvəl həbs olunublar, sonradan nəzarət şərti ilə sərbəst buraxılıblar.

“Son 15 gün ərzində dağlıq ərazilərdə belə sürətli qarın yağması su ehtiyatımızı artırıb”.

Bunu Dövlət Su Ehtiyatları Agentliyinin tabeliyində fəaliyyət göstərən İri Şəhərlərin Su Təchizatı Xidmətinin İdarə Heyətinin sədrinin müşaviri Aydın Abbasov jurnalistlərə açıqlamasında deyib.

Onun sözlərinə görə, Mingəçevir , Şəmkir və Araz su anbarlarında 75 faizdən çox su ehtiyatı artırılıb.

“Son 10 ildə ilk dəfə su ehtiyatlarımızın artırılmasına nail olduq. Tam əminliklə deyə bilərəm ki, yay mövsümündə istər aran rayonlarında, istərsə də paytaxtda su ehtiyatımız əhalini təmin etməyə imkan verəcək.

Lakin bu o demək deyil ki, qar və yağış yağanda sudan qeyri-səmərəli istifadə edirik. Mərkəzi şəhərlərimizdə yol infrastrukturunda və digər ərazilərdə yağış sularının axıdılması, təkrar mexaniki təmizləmə və digər sahələrə qaytarılması istiqamətində işlər icra olunur. Bakı şəhərinin bəzi küçələrində artıq yağış kollektorlarının qoyulması və genişlənməsi davam edəcək.Bakı ətrafında təbii göllərin təmizlənməsi və ekoloji zonaya çevrilməsi, yağış sularının həmin mənbələrə ötürülməsi istiqamətində müəyyən layihələr icra olunur. Yaxın illərdə bu layihələr yaxşı müstəvidə həllini tapıb ictimaiyyətə təqdim olunacaq”.

Bakıda bəzi küçələrdə nəqliyyat vasitələrinin hərəkəti məhdudlaşdırılacaq.

Bu barədə Azərbaycan Yerüstü Nəqliyyat Agentliyi (AYNA) məlumat yayıb.

Xocalı soyqırımının 33-cü ildönümü ilə əlaqədar təşkil ediləcək anım mərasimi ilə bağlı Xocalı prospekti ilə kəsişən, birləşən və paralel olan Mehdi Mehdizadə, Ayaz İsmayılov, Süleyman Vəzirov və İzzət Orucov küçələrində nəqliyyat vasitələrinin hərəkətinə məhdudiyyət tətbiq ediləcək.

Məhdudiyyətlə əlaqədar 4, 10, 21, 30, 32, 46, 49 və 120 nömrəli müntəzəm avtobusların hərəkəti alternativ küçələrdən təşkil ediləcək.

Bakı Asiya Universiteti ləğv olunduğunu elan edib.

Qanuni təmsilçisi Cəlil Nağıyev olan universitet 2015-ci ildə fəaliyyətini dayandırıb.

Qeyd edək ki, Bakı Asiya Universiteti 1995-ci ildə dövlət qeydiyyatına alınıb. Universitetin bağlanmasının əsas səbəbi tələbələrin sayının çox az olması olub. Universitetdən bildirilib ki, “Çətinlik çəkirdik, qruplar kiçik idi, Boloniya sistemi ilə ayaqlaşmaq mümkün olmurdu. Bəzi problemlər oldu, nə tələbələr, nə də biz əziyyət çəkməyək deyə bu qərara gəldik”.

Universitet 372 687 manat nizamnamə kapitalına malik olub. (Valyuta.az)

Azərbaycan Prezidentinin Təhlükəsizlik Xidmətinin rəisi general-polkovnik Bəylər Əyyubova müavin təyin edilib. TEREF "Unikal”a istinadən xəbər verir ki, bu vəzifəyə polkovnik Fərid Əsgərov təyin olunub.

Qeyd edək ki, Fərid Əsgərov uzun müddətdir Azərbaycan Prezidentinin Təhlükəsizlik Xidmətində çalışır.