İkinci Qarabağ müharibəsindən sonra Hindistan da Ermənistanı dəstəkləməkdə davam edir. Düşmən ölkəni silahlandıran Hindistan Ermənistanla birgə təlimlər də təşkil edir. Təbii ki, Ermənistana bu qədər canıyananlıq Hindistana erməni sevgisindən irəli gəlmir. Məsələnin başqa tərəfi var və Hindistanı qıcıqlandıran Azərbaycanın Pakistanla müttəfiqliyidir. Eyni zamanda, Hindistanda müsəlmanlara qarşı ayrı-seçkilik dövlət siyasətidir.
“Əl-Cəzirə”nin təqdim etdiyi bu məqalə Hindistanda müsəlmanların başına açılan müsibətlərə həsr olunub. Həmin məqalənin tərcüməsini Konkret.az-a istinadən oxucularının diqqətinə çatdırırıq.
“21 yaşlı Məhəmməd Tariq Mumbayda Mira Yolundan hər gün istifadə edirdi. Amma onun ağlına da gəlməzdi ki, hind millətçiləri onun başına olmazın oyununu açacaqlar. Tariq hər gün istifadə etdiyi yoldan keçəndə hind millətçiləri Tariqin avtomobilini saxlayıb, onu sürüyərək çölə çıxardıblar. Hadisə 21 yaşlı gəncin atasının gözləri qarşısında baş verib. Tariqin 54 yaşlı atası Əbdül Haque oğlunun başına gətirilənləri dəhşətli mənzərə adlandırıb: “Onu təpiklədilər, dəyənəklə döydülər, dəmir zəncirlərlə bədəninin hər yerinə zərbələr endirdilər. Onlar məni kənarda ağaca bağladıqlarından oğluma kömək edə bilmirdim”.
Canlı yayımlanan aksiya zamanı izdiham bir neçə müsəlmana hücum edib, onların dükanlarını dağıdıb və “Jai Shri Ram” şüarları səsləndirərkən avtomobillərini yandırıblar. Oxşar nümayişlər Hindistanın bir sıra ştatlarında məscidlərin kənarında və müsəlman məhəllələrində keçirilib. Bu hadisə Hindistanın şimalındakı qədim Ayodhya şəhərindəki Ram məbədini baş nazir Narendra Modinin ziyarəti zamanı baş verib. Məbəd 16-cı əsrdə inşa edilən və 1992-ci ildə sökülən Babur məscidinin yerində tikilib.
Baş nazirin ziyarətindən sonra Bihar ştatında müsəlman qəbiristanlığına hücum edilib. Qəbirlər təhqir olunub. Ram məbədinin üzərində hinduizmi simvolizə edən zəfəran bayrağı qaldırılıb.
Oğlunun tanınmaz hala salınmasına dözməyən ata fəryad qoparır: “Bu ölkədə yaşamaq cəhənnəmdə yaşamağa bərabərdir. Oğlum aksiyada döyüldükdən sonra polis idarəsində də işgəncəyə məruz qalıb. Dəhşətli budur ki, o qədər adamın içində oğlumun döyülməsinə heç kim mane olmadı. Mən belə yaşamaqdan utanıram”. Modinin tənqidçiləri hadisənin dini deyil, siyasi tərəfinə diqqət çəkirlər. Dehli Universitetinin professoru Apoorvanand bildirib ki, bu məbəd müsəlmanlara qarşı zorakılığın qələbəsinin bayramıdır: “Modi millətin mənbəyini ilahiliklə əlaqələndirdi. Hindistan respublikasının bütün dəyərləri məhv edilib”.
Hindistanın performansı beynəlxalq demokratiya indekslərində xeyli aşağı düşüb. Bu ölkədə artan millətçilik və dünyəvi dəyərlərdən açıq-aşkar uzaqlaşma Hindistanın beynəlxalq müttəfiqləri arasında da narahatlıq yaradır. Vudro Vilson Beynəlxalq Alimlər Mərkəzinin direktoru Maykl Kugelman bildirib ki, Modi indi Hindistana xəyanət edir, az vaxt ərzində Hindistanda bütün dəyərlər məhv ediləcək.
Apoorvanandın fikrincə isə məbədin tikintisi “Hindli millətçi hərəkatının” qan istəyini söndürməyəcək . Mərasimdən sonra o, Dehli Universitetində Mathura və Varanasi şəhərlərindəki digər məscidlərin sökülməsi üçün şüarların səsləndirilməsinə sərt reaksiya verib: “Bunun sonu yoxdur”, – deyən professor Hindistanda müsəlmanların təhqir olunmasını pisləyib: “Məscidlərin məbədlərlə əvəz olunmasından minlərlə insan qanının iyi gəlir”. Hüquq müdafiəçisi Harş Manderin mərasimi televiziyadan izləməyə hövsələsi çatmayıb. Kəlküttədə keçirilən antifaşist yürüşündə iştirak etmək üçün küçəyə çıxıb. Sosial mediada Modinin tənqidçiləri dinindən asılı olmayaraq, bütün vətəndaşların bərabər hüquqlarını təmin edən Hindistan konstitusiyasının preambulalarını yerləşdiriblər.
Mander Əl-Cəzirə telekanalına deyib: “Moddinin Ram məbədinin ziyarəti Hindistanın süqutunun mühüm mərhələsidir”.

Birləşmiş Ştatlar rəhbərliyi Baham adalarında istirahətlə bağlı öz vətəndaşlarına xəbərdarlıq edib.

ABŞ səfirliyinin saytında qeyd olunur ki, artıq 2024-cü ilin əvvəlindən Baham adalarında 18 nəfər yerli qanqsterlərin qurbanı olub.

“Qətllər istənilən vaxt, o cümlədən günorta vaxtı baş verir” - səfirliyin xəbərdarlığında qeyd olunur.

Vəziyyətin ağırlığını nəzərə alaraq diplomatlar hücum zamanı fiziki müqavimət göstərməməyi tövsiyə edirlər.

Mənbə: Lenta.ru

Almaniyanın müdafiə naziri Boris Pistorius bildirib ki, Rusiya ilə qarşıdurmaya hazır deyilik.

Bu barədə "The Telegraph" nəşri yazıb.

“Almaniya Avropanın gələcəkdə qarşılaşacağı təhlükəsizlik problemlərinə qarşı özünü müdafiə etməyə hazır deyil. Artıq regionda sülhün hökm sürəcəyinə sarsılmaz inam ola bilməz. Almaniya və onun digər NATO müttəfiqlərinin üzləşdiyi dəyişən təhlükəsizlik problemləri fonunda Bundesverin rolu dəyişib. Rusiyadan gələn təhlükələrə və digər aktorlara qarşı hazırlığa görmək lazımdır", - deyə o qeyd edib.

Təxminən 700 fermer Fransanın bəzi magistral yollarını bağlamağa davam edir və bununla da hökumətdən dəstək tədbirlərinin artırılmasını tələb edirlər.

Bu barədə BFMTV məlumat yayıb.

Bildirilib ki, ölkənin yolları 38 yerdə bağlanıb.

Telekanalın qeyd etdiyi kimi, cümə günü 113 nöqtədə magistral yollar bağlanıb, aksiyalarda 17,5 minə yaxın fermer iştirak edib.

Xatırladaq ki, Fransada sənaye nümayəndələrinin inflyasiya səbəbindən gəlirlərin azalması və kənd təsərrüfatı məhsullarının idxalının artması ilə bağlı narazılıqları fonunda kütləvi fermer nümayişləri keçirilir. Fermerlər həmçinin Aİ tələbləri ilə bağlı bürokratik prosedurların sadələşdirilməsini və kənd təsərrüfatının daha az sərt tənzimlənməsini müdafiə edirlər.

Etiraz əlaməti olaraq fermerlər traktorlarla yolları bağlayır və hökumət binaları qarşısında nümayişlər keçirirlər.

Divar tikmək diqqəti yayındırır. Bu vəziyyəti düzəltmək üçün divara ehtiyacınız yoxdur. Sərhəd Patrulunun vəzifəsi ABŞ-a genişmiqyaslı qanunsuz girişi asanlaşdırmaqdır.

Bunu amerikalı iş adamı İlon Mask Texasdakı son hadisələri şərh edərkən bildirib.

"Əsas problem ondan ibarətdir ki, hər kəs heç bir sübut olmadan sığınacaq tələb edə bilər, yəni bütün Yer kürəsi Amerikaya gələ bilər", - İ.Mask vurğulayıb.

Qeyd edək ki, miqrant axını davam etdiyi üçün ştatın Milli Qvardiyası sərhədə nəzarəti ələ keçirib. Ağ Evin bu cür hərəkətlərindən sonra Respublikaçıların iqtidarda olduğu 25 ştat Baydeni sərhədi qorumamaqda ittiham edib və Texası dəstəkləyəcəyini bildirib.

Ukraynada müharibə səbəbindən 10 milyona yaxın ukraynalı evlərini tərk etmək məcburiyyətində qalıb. Onlardan təxminən 6,3 milyonu xaricə gedib, daha 3,7 milyonu Ukraynanın başqa bölgəsinə köçüb.

Bu barədə BMT-nin Qaçqınlar üzrə Ali Komissarı Filippo Qrandi bildirib.

Bildirilib ki, ukraynalı qaçqınların 47 faizi qadınlar, 33 faizi isə uşaqlardır.
O da vurğulanıb ki, təşkilatın Qaçqınlarla iş üzrə agentliyi 27,5 mindən çox evin bərpasına kömək edib.

Mənbə: RBK

27 yanvar 2023-cü il tarixində Bakı vaxtı ilə səhər saat 08:30 radələrində Azərbaycan Respublikasının İran İslam Respublikasındakı Səfirliyinə silahlı hücum olub.

Hücum edən şəxs “Kalaşnikov” markalı avtomat silahla mühafizə postunu yararaq, mühafizə xidmətinin rəisi Orxan Əsgərovu qətlə yetirib.

Səfirliyin mühafizə xidmətinin iki əməkdaşı - Vasif Tağıyev və Mahir İmanov hücumun qarşısını alarkən yaralanıblar.

Orxan Əsgərov İkinci Şəhidlər xiyabanında dəfn edilib. 3 fevral 2023-cü ildə Azərbaycan Respublikası Prezidentinin Sərəncamı ilə Əsgərov Orxan Rizvan oğlu (ölümündən sonra) "Vətən uğrunda" medalı ilə təltif edilib.

Tağıyev Vasif Natiq oğlu 1-ci dərəcəli “Rəşadət” ordeni ilə, İmanov Mahir Kamil oğlu “Vətən uğrunda” medalı ilə təltif edilib.

Terror aktını törədən Yasin Hüseynzadə saxlanılıb.

Hadisədən sonra Azərbaycanın Tehrandakı səfirliyinin fəaliyyəti dayandırılıb. Azərbaycanın İrandakı səfirliyinin əməkdaşları 29 yanvar 2023-cü il tarixində Tehrandan Bakıya təxliyə olunub. Səfirlik əməkdaşları və onların ailə üzvlərindən ibarət ümumilikdə 53 nəfər Vətənə qayıdıb.

Baş vermiş cinayət hadisəsi üzrə İran İslam Respublikasında istintaq edilən cinayət işinin gedişatı Azərbaycan Baş Prokurorluğu tərəfindən diqqətlə izlənilir və qarşı tərəflə mütəmadi əlaqə saxlanılır.

Belə ki, İran İslam Respublikasının qanunvericiliyinə uyğun olaraq cinayət işinin istintaqı tamamlanaraq baxılması üçün məhkəməyə göndərilib və prokuror tərəfindən təqsirləndirilən şəxsin ən ağır cəzaya məhkum edilməsi tələb olunub, lakin hazırda məhkəmə tərəfindən yekun qərar qəbul edilməyib.

Son 30 il ərzində itkin düşmüş 4 minə yaxın azərbaycanlının aqibəti barədə Ermənistan tərəfindən məlumatların təqdim edilməsi məqsədilə təxirəsalınmaz tədbirlər görülməlidir.
Bu barədə Azərbaycan Xarici İşlər Nazirliyinin Ermənistan tərəfinin mina xəritələri təqdim etmək niyyəti barədə açıqlamasına dair şərhində deyilir.

"Bununla yanaşı, habelə azərbaycanlıların dəfn olunduğu kütləvi məzarlıqların yerləri də açıqlanmalıdır", - XİN qeyd edib.

Azərbaycanın AŞPA-dakı nümayəndə heyətinin səlahiyyətlərindən məhrum edilməsi azərbaycanfobiya və islamofobiyanın təzahürü deyil. Səbəb odur ki, Azərbaycan AŞPA-ya qarşı saymamazlıq edir. Bu barədə AŞPA-nın Azərbaycan üzrə keçmiş həmməruzəçisi, Avstriyadan olan deputat Stefan Şennak Turan-a müsahibəsində bildirib.

“Azərbaycan Assambleyanı qarşıdan gələn prezident seçkilərinə dəvət etməməklə öz öhdəliklərini yerinə yetirmədi və Strasburqun müraciətlərinə məhəl qoymadı”, deyə Şennak AŞPA-nın 2025-ci ilin yanvar sessiyasına qədər Azərbaycan nümayəndə heyətinin səlahiyyətlərini dayandırmaq qərarını şərh edərkən bildirib.

Şennakın sözlərinə görə, AŞPA-nın miqrasiya məsələləri üzrə məruzəçisinin Laçın dəhlizinə getmək üçün müraciətinə iki dəfə rədd cavabı verilib, Azərbaycan üzrə həmməruzəçilərin isə siyasi məhbuslarla görüşməsinə icazə verilməyib. “Bütün bunlar açıq-aşkar AŞPA-ya qarşı saymamazlıqdır”, deyə Şennak bildirib.

Bununla belə, o hesab edir ki, öhdəlikləri yerinə yetirmək məqsədi daşıyan addımlar Azərbaycan nümayəndə heyətini vaxtından əvvəl AŞPA-ya qaytara bilər.

“Biz qətnaməyə düzəliş etdik ki, islahatlar həyata keçirildiyi təqdirdə azərbaycanlı deputatlar daha əvvəl qayıda bilər. Hesab edirəm ki, hökumət bundan istifadə etməlidir”, deyə Şennak əlavə edib.

O, azərbaycanlı deputatları “emosional olmamağa” çağırıb.

“Bu, son deyil. Azərbaycanlı deputatları emosional olmamağa çağırıram. Bu qərarda irqçilik və islamofobiya yoxdur”, deyə Şennak qeyd edib.

İranın “Nəsim” telekanalında yayımlanan “Bermud” verilişində türk milləti yenidən təhqir olunub.

Globalinfo.az xəbər verir ki, bu barədə görüntülər sosial şəbəkələrdə yayılıb.

Belə ki, verilişin aparıcısı Kamran Nəcəfzadənin göstərdiyi suflyorda “Onların hər birində min türk qul var idi…” cümləsi əks olunub.

Həmin görüntülər sosial şəbəkə istifadəçiləri tərəfindən tənqid atəşinə tutulub.