Rusiya Müdafiə Nazirliyi gündəlik bülletenlərində “Dağlıq Qarabağ” ifadəsini çıxarıb.

Bakupost.az Rusiya MM-in saytına istinadla bildirir ki, bülletenin 25 oktyabr buraxılışında “Dağlıq Qarabağ” “Azərbaycanın Qarabağ iqtisadi rayonu”, “Stepanakert” isə “Xankəndi” kimi təqdim olunub.

“Aztelekom” Füzulidə internetin verilməsini bərpa edib.

Rayonun Babı və Arayatılı kəndlərindən olan bir neçə sakinin Meydan TV-yə verdiyi məlumata görə, internet bərpa olunsa da, abonentlərin balansında olan pullar sıfırlanıb.

“Sentyabrın 20-də 15 manat ödəniş etdim. Lakin bir aydan çoxdur interneti kəsiblər. Bu gün internet bərpa olunsa da, istifadə etmədiyimiz paketi bərpa etməyiblər. Məcbur bu gün yenidən balansa pul qoymalı olacağıq”, – Babı kənd sakini Meydan TV-yə deyib.

Füzuli Mərkəzi Telefon Qovşağından Meydan TV-yə təsdiqləyiblər ki, internet bərpa olunsa da, abonentlərin öncədən ödədikləri pullar balansdan silinib.

“Bu da insanların etirazına, narazılığına səbəb olub. Bir xeyli insan bura gəlmişdi, pullarını tələb edirdilər. Biz onlara məsləhət gördük ki, “Aztelekom”a müraciət etsinlər. Çünki bu işə biz baxmırıq”, – telefon qovşağından Meydan TV-yə bildirilib.

“Aztelekom”un 170 “Qaynar Xətti”ndən isə Meydan TV-yə bildirilib ki, vətəndaşların pullarının balansa yenidən bərpa ediləcəyinə dair dəqiq məlumat yoxdur. Operatorun sözlərindən belə anlaşılıb ki, ödəniş edən abonentlərin pulları geri qaytarılmaya da bilər.

“Son qərarı rəhbərlik verəcək”, – operator deyib.

Sentyabrın 19-da Azərbaycan Qarabağda lokal hərbi əməliyyata başlayandan dərhal sonra “Aztelekom”, həmçinin “Nar Mobile”, “Bakcell”, “Azercell” Füzulidə internetin verilməsini dayandırıb.

Hazırda yalnız “Aztelekom” interneti bərpa edib. Mobil operatorlar isə hələ də internetə məhdudiyyət tətbiq etməkdə davam edir.

Meydan TV-nin oktyabrın əvvəlindən mobil operatorların mətbuat xidmətlərinə göndərilən sorğuları isə hələ də cavablandırılmayıb.

Məsələni Meydan TV-yə şərh edən hüquqşünas Ələsgər Məmmədli isə deyib ki, ölkədə fors-major, fövqəladə və ya hərbi vəziyyət elan edilmədiyi təqdirdə internetin məhdudlaşdırılması qanunsuzdur.

“İnternetin kəsilməsi ilə əlaqədar öncədən istehlakçılara məlumat verilməlidir. Verilmədiyi təqdirdə istifadəçilər kütləvi olaraq məhkəməyə müraciət edə bilərlər”, – hüquqşünas deyib. //Meydan TV//

Bu gün Qubadlı Şəhəri Günüdür.

“Report”un xəbərinə görə, Qubadlı Şəhəri Günü ilk dəfədir qeyd olunur.

Prezident İlham Əliyevin bu il iyulun 31-də imzaladığı sərəncama əsasən, hər il oktyabrın 25-də Qubadlı Şəhəri Günü təntənəli şəkildə qeyd ediləcək.

Bu əlamətdar günün təsis olunması Qubadlı şəhərinin Ermənistan silahlı qüvvələrinin işğalından azad edilməsi tarixi ilə bağlıdır. Belə ki, bu gün - oktyabrın 25-də şəhərin erməni işğalçılarından təmizlənməsindən 3 il ötür.

Müzəffər Azərbaycan Ordusu 2020-ci il oktyabrın 25-də Qubadlı şəhərini işğalçılardan azad edərək üçrəngli bayrağımızı 30 ilə yaxın müddətdən sonra həmin ərazilərdə qürurla dalğalandırıb.

2020-ci il oktyabrın 25-də Azərbaycan Prezidenti, Müzəffər Ali Baş Komandan İlham Əliyev Zəngilan, Cəbrayıl, Qubadlı rayonlarının bir neçə kəndini və Qubadlı şəhərinin işğaldan azad edildiyini açıqlayıb.

Prezident İlham Əliyev 2020-ci il dekabrın 29-da Azərbaycan Respublikası Silahlı Qüvvələrinin hərbi qulluqçularının “Qubadlının azad olunmasına görə” medalı ilə təltif edilməsi haqqında sərəncam imzalayıb.

Sərəncama əsasən, Azərbaycan Respublikasının Qubadlı rayonunun işğaldan azad olunması uğrunda aparılmış döyüş əməliyyatlarında iştirak edərək şəxsi igidlik və şücaət göstərmiş Azərbaycan Respublikası Silahlı Qüvvələrinin 9376 hərbi qulluqçusu “Qubadlının azad olunmasına görə” medalı ilə təltif edilib.

Dövlət başçısı 2021-ci il iyunun 24-də də Azərbaycan Respublikası Silahlı Qüvvələrinin hərbi qulluqçularının “Qubadlının azad olunmasına görə” medalı ilə təltif edilməsi haqqında sərəncam imzalayıb.

Sərəncama əsasən, Azərbaycan Respublikasının Qubadlı rayonunun işğaldan azad olunması uğrunda aparılmış döyüş əməliyyatlarında iştirak edərək şəxsi igidlik və şücaət nümayiş etdirmiş 5867 hərbi qulluqçu “Qubadlının azad olunmasına görə” medalı ilə təltif olunub.

Təltif edilənlərin 4-ü general-mayor, 39-u polkovnik, 1 nəfəri isə 1-ci dərəcəli kapitandır.

Rayon işğaldan azad olunduqdan sonra orada bərpa və yenidənqurma işlərinə başlanılıb. Ərazinin minalardan təmizlənmə əməliyyatları ilə yanaşı, infrastrukturun bərpası işləri də davam etdirilir.

Ötən müddət ərzində Xanlıq Radio-Televiziya Yayım Stansiyasının mövcud 50 metrlik qülləsindən istifadə olunmaqla 8 TV və 2 radio proqramının Qubadlı şəhəri və rayonun 12 kəndində (Əlibəyli, Qoturbulaq, Xocahan, Qapanlı, Muğanlı, Hal, Xanlıq, Hənzəli, Əfəndilər, Qəzyan, Saray, Yuxarı Mollu) yayımı təmin olunub.

Bununla yanaşı, işğaldan azad edilmiş torpaqlarda gömrük qaydaları əleyhinə hüquqpozmalara qarşı mübarizə aparmaq, narkotik vasitələrin, psixotrop maddələrin və onların prekursorlarının, digər mülki dövriyyəsi qadağan edilmiş malların gömrük sərhədindən qanunsuz keçirilməsinin qarşısını almaq, ümumilikdə gömrük nəzarətinin tətbiq edilməsi məqsədilə Qubadlı rayonu ərazisində Cənub Ərazi Baş Gömrük İdarəsinin “Qubadlı” gömrük postu yaradılıb.


Eyni zamanda, Prezident İlham Əliyevin tapşırığı ilə Qarabağ və Şərqi Zəngəzur iqtisadi rayonlarının sosial-iqtisadi inkişafında mühüm rol oynayacaq Qubadlı-Eyvazlı avtomobil yolunun tikintisi aparılıb.

2021-ci ilin bu günü Prezident İlham Əliyev və birinci xanım Mehriban Əliyeva Qubadlı rayonunda səfərdə olublar. Dövlət başçısı və birinci xanım Xudafərin-Qubadlı-Laçın avtomobil yolunun 10-cu kilometrliyindən Qubadlı şəhər mərkəzinə gedən Xanlıq-Qubadlı yolunun təməlqoyma mərasimində, “Azərenerji” ASC-nin sistem əhəmiyyətli 110/35/10 kV-luq “Qubadlı” yarımstansiyasının, Dövlət Sərhəd Xidmətinin yeni hərbi hissə kompleksinin açılışlarında iştirak ediblər. Sonra Prezident İlham Əliyev və birinci xanım Mehriban Əliyeva Qubadlı rayon ictimaiyyətinin nümayəndələri ilə görüşüblər.


Həmçinin, dövlət başçısı və birinci xanım 2022-ci ilin oktyabrın 19-da da Qubadlı rayonuna səfər ediblər. Belə ki, Prezident İlham Əliyev Qubadlı rayonunda “Bərgüşadçay” və “Zabuxçay” su anbarlarının layihələri ilə tanış olub, Qubadlı Elektrik Şəbəkəsinin Rəqəmsal İdarəetmə Mərkəzinin təməlini qoyub. Dövlət başçısına və birinci xanıma Qubadlı şəhərinin Baş planı təqdim olunub. Prezident İlham Əliyev və birinci xanım Mehriban Əliyeva Qubadlıda İşğal və Zəfər muzeylərinin təməlqoyma mərasimində iştirak ediblər.

Bundan başqa, bu il may ayının 4-də Prezident İlham Əliyev Qubadlı rayonunun Zilanlı kəndinin təməlinin qoyulması mərasimində iştirak edib. Bildirilib ki, kənddə məktəb binası, uşaq bağçası, ailə sağlamlıq mərkəzi, inzibati bina, klub icma və idman mərkəzləri yaradılacaq. Ümumiyyətlə, bu yaşayış məntəqəsində əhalinin məşğulluğunun təmin edilməsi də diqqət mərkəzində olacaq.

Həmin gün dövlət başçısı Qubadlı rayonunun Mahruzlu kəndinin də təməlini qoyub. Mərasimdə qeyd edilib ki, kənddə əhalinin məşğulluğu üçün hər cür şərait təmin ediləcək.

İlham Əliyev mayın 4-də, eyni zamanda Qubadlı şəhərində 91 çarpayılıq Mərkəzi Xəstəxana binasının təməlinin qoyulması mərasimində iştirak edib. Bildirilib ki, 4,5 hektardan çox ərazidə inşa olunacaq bu tibb müəssisəsi inzibati binadan, stasionar və ambulator xidmət hissələrindən ibarət olacaq. Stasionar xidmət hissəsində qəbul, terapiya, cərrahiyyə, pediatriya, doğum, ginekologiya, yoluxucu xəstəliklər, anesteziologiya-reanimasiya, hemodializ şöbələri fəaliyyət göstərəcək. Xəstəxananın ambulator xidmət hissəsi isə konsultativ poliklinika, uşaq poliklinikası, şüa-diaqnostika, funksional diaqnostika, fizioterapiya və tibbi bərpa şöbələrindən, klinik diaqnostika laboratoriyasından ibarət olacaq.

Prezident, həmçinin Qubadlı şəhərində tikiləcək inzibati binanın da təməlini qoyub. Məlumat verilib ki, inzibati binanın inşasında metal konstruksiyalardan istifadə olunacaq. Fasad həlli və yastı dam günəş panellərinin quraşdırılması, həmçinin yaşıl elementlərin orqanik şəkildə inteqrasiya olunmasına imkan verəcək.

Bundan başqa, Azərbaycan Prezidenti mayın 4-də Qubadlı şəhərində 600 şagird yerlik tam orta məktəb binasının da təməlinin qoyulması mərasimində iştirak edib.

Həmin gün dövlət başçısı Qubadlı şəhərində ilk yaşayış məhəlləsinin də təməlini qoyub. Bildirilib ki, ümumi sahəsi 2,6 hektara yaxın olan yaşayış məhəlləsinin yerləşdiyi ərazi çay və dağ mənzərəsi ilə əhatə olunub. Məhəllə şəhərin təsdiq edilmiş ümumi Baş planına uyğun salınacaq. Bu məhəllədə binaların üçmərtəbəli və dördmərtəbəli olması planlaşdırılır. Ümumilikdə məhəllədə 156 mənzilin tikintisi nəzərdə tutulur. Mənzillərdən 48-nin ikiotaqlı, 68-nin üçotaqlı, 20-sinin dördotaqlı və 20-sinin isə beşotaqlı olması planlaşdırılır. Binaların inşasında müasir memarlıq yanaşmalarından və milli naxış elementlərindən istifadə olunacaq.

Həmçinin, 2023-cü il sentyabrın 5-də Prezident İlham Əliyev “Yeni Qubadlı‒Laçın avtomobil yolunun layihələndirilməsi və tikintisi ilə bağlı tədbirlər haqqında” Sərəncam imzalayıb. Sərəncama əsasən, Xudafərin‒Qubadlı‒Laçın avtomobil yolunun 33-cü kilometrliyindən başlayan yeni Qubadlı‒Laçın avtomobil yolunun layihələndirilməsi və tikintisinin həyata keçirilməsi məqsədilə 2023-cü il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Azərbaycan Avtomobil Yolları Dövlət Agentliyinə 20 milyon manat ayrılıb.

Qeyd edək ki, Qubadlı rayonu 1933-cü ildə Qubadlı kəndinin əsasında təşkil olunub. 1963-cü ildə ləğv edilərək ərazisi Zəngilan rayonu ilə birləşdirilib. 1964-cü ildə yenidən müstəqil rayon olub. Qubadlı 31 avqust 1993-cü ildə Ermənistan Silahlı Qüvvələri tərəfindən işğal edilmişdi. İnzibati bölgüsünə 1 şəhər, 93 kənd, 31 inzibati-ərazi dairəsi aiddir.

Qubadlı rayonunun səthi əsasən dağlıqdır. Ərazisi Qarabağ silsiləsinin cənub-qərb (Topağac dağı – 2 010 m, Pirdağ-1 316 m), Bərgüşad silsiləsinin şərq (Hərtis dağı – 1 277 m) və Qarabağ yaylasının cənub-şərq (Qurbantəpə dağı – 1 075 m) hissəsinə daxildir. Qarabağ yaylasının cənub-şərq qurtaracağı olan Yazı düzü (Bazarçay və Həkəri çayı arasında) ərazidə 450 m-dək alçalır. Ərazidə Qarabağ silsiləsi maili və dalğalı İncə düzünə keçir. Yura-Antropogen çöküntüləri yayılıb. Əqiq yatağı var. Çayları Bazarçay, Həkəri və onların qollarıdır (Kiçik Həkəri, Meydandərəsi və s); bunlardan suvarmada istifadə edilir.

Rayonda əsasən, qəhvəyi dağ-meşə torpaqları yayılıb. Əsas bitki örtüyü kollu və seyrək meşəli çəmənlərdir. Dağ meşələri (fıstıq, palıd, vələs və s.) var. Meşələrin sahəsi 13,2 min hektardır. Heyvanları ayı, canavar, vaşaq, tülkü, boz dovşan, süleysin, oxlu kirpi və s-dir. Quşlardan boz kəklik, turac, qırqovul, göyərçin və s. var. Rayonda Qubadlı yasaqlığı təşkil edilib.

Bu gün Azərbaycan ordusunun bir neçə ərazini işğaldan azad etməsindən üç il keçir.

Oxu.Az xatırladır ki, 2020-ci ilin 23 oktyabrında cəbhənin bir neçə istiqamətində uğurlar qazanılıb.

Azərbaycan hərbçiləri Xocavəndin Dolanlar, Bünyadlı kəndlərini, Cəbrayılın Dağ Tumas, Nüsnüs, Minbaşılı kəndlərini və Xələfli qəsəbəsini, Zəngilanın Vənədli, Mirzəhəsənli kəndlərini, Qubadlının Zilanlı, Kürd Mahruzlu, Muğanlı və Alaqurşaq kəndlərini işğaldan azad ediblər.
Qeyd edək ki, Prezident, Silahlı Qüvvələrin Ali Baş Komandanı İlham Əliyev qələbə xəbərlərini tvit ataraq xalqa çatdırıb.

Azərbaycan sentyabrda Qarabağda keçirilən genişmiqyaslı anti-terror əməliyyatı zamanı “Artsaxın” iki keçmiş təhlükəsizlik məmuru – Samvel Babayan və Vitali Balasanyanla atəşkəs barədə danışıqlar aparmaqdan imtina edib. Bu barədə oktyabrın 18-də Ermənistanın “Joxovurd” nəşri öz mənbələrinə istinadən məlumat yayıb.

Bu məlumata görə, separatçıların lideri Samvel Şahramanyan sentyabrın 19-da vəziyyətin gərginləşdiyi zaman Azərbaycan Dövlət Təhlükəsizlik Xidməti rəhbərinin müavini ilə əlaqə saxlayıb. O, atəşkəs elan edilməsini və erməni tərəfindən əsas nümayəndəsi qismində Samvel Babayanla danışıqlara başlanılmasını təklif edib.

Nəşrin yazdığına görə, Azərbaycan tərəfi razılaşmayaraq, Babayanı “yalançı və dezinformasiya yayan şəxs adlandırıb və onu Ermənistana göndərməyi təklif edib”. Daha sonra Şahramanyan Vitali Balasanyanı təklif edib, amma Bakı bununla da razılaşmayıb.

Azərbaycan son nəticədə bütün namizədləri rədd edərək deyib ki, atəşin dayandırılması üçün yalnız bir şey tələb olunur – “DQR”-in buraxılması haqqında bəyanatın imzalanması. “Joxovurd” yazır ki, sonda belə olub.

“Turan” agentliyinin haqlı olaraq qeyd etdiyi kimi, bu vəziyyətdə bir sual qaranlıq olaraq qalır: Bakı Azərbaycana qarşı döyüşən və onun ərazilərinin işğalında iştirak edən Babayan və Balasanyanın Qarabağı tərk etməsinə niyə icazə verdi? Məsələn, Samvel Babayan Birinci Qarabağ müharibəsi zamanı erməni qüvvələrinin komandanı olub. 1992-ci ildə Şuşanı işğal edən bölmələrdən birinə komandirlik edib.

Vitali Balasanyan Xocalının işğalında və Xocalı sakinlərinin qətliamında iştirak edib. O, Ağdamdan xocalılılara köməyə gələn Azərbaycan qüvvələrini qarşısını almalı olan dəstəyə də rəhbərlik edib. Əsgəran rayonunun məhz Balasanyanın nəzarətində olan ərazisində yüzlərlə Xocalı sakini qətlə yetirilib, əsir götürülüb.

Siyasi şərhçi Murad Sadəddinov Pressklub.az-a açıqlamasında ilk olaraq qeyd edib ki, sentyabrın 19-da Qarabağda genişmiqyaslı hərbi əməliyyatların keçirilməsi ilə bağlı qiymətləndirmə ilə razı deyil.

Onun fikrincə, bu, məhdud anti-terror tədbiri idi və bu tədbir zamanı Azərbaycan öz ərazisində yerləşən qeyri-qanuni erməni dəstələrini tərksilah etmək üçün silahlı qüvvələrinin kiçik, cüzi bir hissəsindən istifadə edib.

“Bu, Ermənistan tərəfinin müvafiq bəndinə əməl etmədiyi 2020-ci ilin Üçtərəfli Bəyannaməsi əsasında edilib.

Samvel Şahramanyanın bəyanatı və “Joxovurd” qəzetində “öz mənbələrinə” istinadən dərc olunan məlumatlara gəlincə qeyd etmək istəyirəm ki, bu, həqiqətə tamamilə uyğun deyil. Biz erməni tərəfinin saxta xəbərlərdən həmişə necə bacarıqla istifadə etdiyini görməyə öyrəşmişik. Mümkündür ki, Qarabağdakı separatçı hərəkatın keçmiş liderlərinin Samvel Babayanla problemləri olub. Müsahibələrindən də görürük ki, o, onları müxtəlif yanlış addımlarda ittiham edir. Və görünür, onun bəyanatlarına və ittihamlarına hansısa formada cavab vermək üçün Şahramanyan fürsətdən istifadə edərək, Ermənistan ictimaiyyətinin gözündə Babayanın nüfuzunu ən azı müəyyən dərəcədə sarsıtmaq istəyir.

Qoyulan suallara gəlincə, hesab edirəm ki, Azərbaycan tərəfi belə danışıqlar təklifləri qəbul etməyəcəkdi. Çünki Azərbaycan Respublikasının Prezidenti, Ali Baş Komandanı bəyan etmişdi ki, qanunsuz silahlı birləşmələr silahı yerə qoymayana, müxtəlif növ separatçı strukturlar “səlahiyyətlərindən” imtina etməyənə və təşkilatlarını ləğv etməyənə qədər Azərbaycan bu əməliyyatı dayandırmayacaq.

Yəni, Bakı açıq şəkildə şərt qoymuşdu ki, separatçılar öz strukturlarını ləğv etməlidirlər. Və belə də oldu.

Burada, bir çox filmlərdə göstərilən sovet qoşunlarının Berlini tutması anını xatırlayırıq. O zaman da artıq mühasirəyə alınmış alman silahlı qüvvələri danışıqlar və s. bağlı müxtəlif təkliflər irəli sürürdülər. Və o zaman da Moskvanın mövqeyi qəti idi – tam və qeyd-şərtsiz təslim. Hesab edirəm ki, bu, bizim vəziyyətimizlə müəyyən qədər müqayisə oluna bilər”, – Sadəddinov deyir.

“DQR” özünü ləğv etdikdən sonra Bakı mülki əhaliyə (yeri gəlmişkən, onların arasında Azərbaycana silahlı müqavimət göstərən çoxlu hərbi qulluqçular da var idi) ölkəmizin ərazisini tərk etmək imkanı verib, – o, davam edir.

“Azərbaycana qarşı uzun müddət vuruşan S.Babayan və V.Balasanyanın Qarabağı tərk etməsinə icazə və imkan verməsinə gəlincə, mən bu fikirlə razı deyiləm. Düşünürəm ki, belə bir fürsət olsaydı, Azərbaycan bu gün Dövlət Təhlükəsizliyi Xidmətinin istintaq təcridxanasında olan separatçı hərəkatın liderləri kimi, onları da həbs edib məsuliyyətə cəlb edərdi”, – o davam edib.

“Düşünürəm ki, uzun müddət Azərbaycana qarşı döyüşlərdə iştirak etmiş və əraziyə yaxşı bələd olan həm Samvel Babayan, həm də Vitali Balasanyan hansısa çoban cığırları ilə Qarabağı tərk edərək, Ermənistan ərazisinə keçə biliblər.

Hazırda Azərbaycanda bir çox cinayətlər, o cümlədən Xocalı cinayəti ilə bağlı aparılan məhkəmə prosesləri bir çox yeni faktlar və sübutları üzə çıxaracaq, onlara qarşı ayrı-ayrılıqda ittihamlar irəli sürüləcək və onlar beynəlxalq axtarışa veriləcək. Əgər sözsüz ki, hələ axtarışa verilməliyiblərsə. Və zaman keçdikcə – əlverişli şərait yaransa, biz onları həbs edib məsuliyyətə cəlb edə biləcəyik”, – deyə siyasi müşahidəçi hesab edir.

Gələn ilin birinci rübündə əhalinin Şuşaya köçünə başlanılacaq.

Bunu Azərtac-a açıqlamasında Prezidentin Şuşa rayonunda xüsusi nümayəndəsi Aydın Kərimov deyib.

A.Kərimov bildirib ki, ilkin olaraq birdəfəlik 400-dək ailənin köçürülməsi nəzərdə tutulub.

Onun sözlərinə görə, yeni yaşayış kompleksinin tikintisi bu ilin sonuna yekunlaşacaq.

BQXK-nin komandaları Qarabağdakı icmalara baş çəkir, bölgə kütləvi şəkildə boşaldıldıqdan sonra insanlara kömək etməyə çalışır, bu barədə Beynəlxalq Qızıl Xaç Komitəsinin məlumatında deyilir.

"Az sayda insan öz seçimi ilə, yaxud da özləri gedə bilmədiyi üçün öz evlərində qalıb. Bəzilərinin tibbi yardıma və ya yemək və suya ehtiyacı var. Digərləri ailə üzvləri ilə əlaqə saxlamağı və ya getmələri üçün nəqliyyat vasitəsi tapmağı xahiş edirlər. Komandalarımız həmçinin ölən şəxslərin səliqə ilə morqlara aparılmasına kömək ediblər", deyə BQXK-nin əməkdaşı Kris Pul bildirib.

BQXK komandaları öz evlərində qalan az sayda insanla əlaqə saxlayır və daim yeni insaları tapır. Onlar məmnuniyyətlə çörək və su alır və ya ailə üzvləri və dostları ilə əlaqə saxlamaq üçün BQXK-nin telefonlarından istifadə edirlər.

BQXK-yə uzaq dağlıq qəsəbədə 92 yaşlı atası ilə birlikdə yaşayan Aron Kazaryan da müraciət edib.

Oktyabrın 15-də Azərbaycan Prezidenti İlham Əliyevin iştirakı ilə Suqovuşan su anbarı təmir-bərpadan sonra istifadəyə verilib.

Müzəffər Ali Baş Komandan Sərsəng su anbarı ərazisində də Dövlət Bayrağımızı ucaldıb.

Ekspertlər hər iki su anbarının strateji əhəmiyyəti barədə danışıblar.
Ətraflı “ATV Xəbər”in sujetində: