"Regionda münaqişəli faza qalması Qərbə sərf edirdi. Ancaq Azərbaycan Cənubi Qafqazda tamam fərqli və sürpriz reallıqlar yaratdı. Bundan sonra Bakı ilə hesablaşma mərhələsi başlandı".
Bu sözləri "Globalinfo"ya analitik Aqşin Kərimov ABŞ-ın Azərbaycan-Ermənistan sülh prosesinə təsiri haqda danışarkən deyib. Onun sözlərinə görə, bu, ciddi çəkişmələrlə müşahidə olundu:
“Həm ABŞ, həm Fransa tərəfindən Azərbaycana qarşı təzyiq maşınları işə salındı. Bunun fonunda az qala belə bir təəssürat yaradıldı ki, bəs Rusiya Ermənistanın etibarlı müttəfiqi deyil. Sual olunur, o zaman Qərbdə Rusiyanın Ermənistanın təhlükəsizlik zəmanətçisi olması alqışlanırdımı?”.
Onun sözlərinə görə, Azərbaycanın yaratdığı reallıqlar Ermənistanın xarici siyasətdə böyük sarsıntı keçirməsinə gətirib çıxarıb:
“Kənar güclər bu sarsıntılara şərik çıxmaq görüntüsü yaradaraq əslində Ermənistanın ən həssas sinirlərinə toxunaraq onu Azərbaycana qarşı həvəsləndirmək siyasətini üstün tuturlar.
Mən burada ABŞ ilə Fransanın strateji yanaşmalarını fərqləndirərdim, çünki Parisdən fərqli olaraq Vaşinqton Bakı ilə tərəfdaşlıq, təhlükəsizlik sferalarında etibarlı bir model qurmaqda maraqlıdır.
Lakin ortada ziddiyyətlər qalmaqdadır. Bunu Azərbaycanla ABŞ az qala strateji dialoqlar ekvivalentində olan müzakirələrlə yoluna qoymağa çalışır. Fransa isə qlobal miqyasda itkilərini Cənubi Qafqazda alternativ ambisiyalar formalaşdırmaqla kompensasiya etməyə çalışır. O, burada Rusiya ilə bərabər, bir az da irəli gedərək söyləyirəm ki, ABŞ və Böyük Britaniya ilə də rəqabətdədir”.
Ekspert deyib ki, Fransa ilə ABŞ-ı fərqləndirən digər cəhət regiondakı mövcud reallıqların perspektivdə hansı potensial geosiyasi dəyişikliklərə gətirib çıxaracağı məsələlərində görünür:
“ABŞ Azərbaycanın yaşıl enerji siyasətinə və alternativ enerji mənbələrinin şaxələndirilməsi, ixracı potensiallarına yüksək qiymət verir, Fransadan isə bu istiqamətdə də müsbət siqnallar gəlmir.
Çoxtərəfli münasibətlər sistemində isə məsələni Rusiya amili mürəkkəbləşdirir. Buna görə də Moskvaya qarşı Ermənistan şirnikləndirilir. ABŞ ilə Fransa Ermənistanı Rusiya əleyhinə ehtiyatsız strategiya yürütməyə təhrik edir. Təbii ki, bu, Azərbaycanla Ermənistan arasındakı sülh gündəliyinə də təsirlərini göstərir.
Lakin bir məqam var: ABŞ Ermənistana dəstək olsa da, bu, sarsılmaz deyil. Fransa isə İrəvanın revanşist imkanlarını genişləndirməkdən ötrü Ermənistanın təhlükəsizlik qarantı rolunu üzərinə götürməyə çalışır. Ermənistan öz təhlükəsizliyini düşünməyib ehtiyatlı davranmırsa, prosesdə Azərbaycan öz sözünü deməlidir.
Gördüyünüz kimi, ABŞ ilə Fransa fərqli öhdəliklərlə regional meydandadırlar, ancaq proses Rusiyaya qarşı cəbhə oxu kimi formalaşdıqca, Moskva da əlindəki alətlərdən istifadəyə can atır”.
A.Kərimov deyib ki, Moskva Qarabağ münaqişəsi dövründəki mövqeyindən fərqli olaraq Azərbaycanın üzərinə gəlmir, o, indi daha çox Ermənistanı ram etməyin yollarını arayır:
“Beləliklə, Azərbaycan həm ABŞ-dan, həm də Rusiyadan gözləntilərini ortaya qoyur. Bunu Fransaya qarşı manevr sahəsi kimi genişləndirməyi düşünür. Yox, Fransa bu manevrə qarşı Ermənistana kapital qoyursa, Bakı qalibiyyət modelinin davamını gətirmək çağırışı ilə üz-üzə qalır.
ABŞ bu gözləntiləri Azərbaycan-Ermənistan sülh proqramında vasitəçilik cəhdləri ilə uyğunlaşdırmaq istəyəndə isə Azərbaycan buna qarşı çıxır. Eynilə Rusiya da vasitəçi kimi danışıqlarda görünməyə həvəslidir. Eyni məntiq Fransa da hakimdir. Bu isə Azərbaycana qarşı ATƏT-in Minsk Qrupunun həmsədrlik institutunu dirçəltməkdə cəhdidir. Təbii ki, Azərbaycan həqiqi sülh üçün təşəbbüskarlıq göstərənlərlə müzakirələrə açıqdır, amma təşəbbüskarlar ambisiyalı moderatorluq niyyətlərin baş qaldırmasından uzaqda dayanmalıdırlar”.

Ermənistanın Baş naziri Nikol Paşinyanın 2026-cı ilin sonuna kimi yeni Konstitusiya layihəsinin hazırlanması barədə tapşırıq verdiyi bildirilir. Bu barədə “Azadliq” radiosunun erməni xidməti məlumat yayıb.

Qeyd olunur ki, Paşinyan Azərbaycanın Ermənistan Konstitusiyasının dəyişdirilməsi ilə bağlı davam edən tələbi fonunda bu qərarı verib:

“Qərardan əvvəl 2022-ci ildə yaradılan Konstitusiya İslahatları Şurası konstitusiya dəyişiklikləri layihəsi hazırlayırdı. Konsepsiyanın ilkin variantı 2024-cü ilin yanvarında hökumətə göndərilib. İndi Paşinyan yeni Konstitusiya layihəsinin hazırlanmasını tapşırıb. Qərarda “Konstitusiyaya dəyişiklikləri” əvəzinə “yeni Konstitusiya” ifadəsinin yazılması açıq şəkildə qeyd olunub”.

İyunun 11-də Azərbaycanın xarici işlər naziri Ceyhun Bayramov almaniyalı həmkarı Annalena Berbokla görüşdə demişdi ki, sülh sazişinin imzalanmasına Ermənistan Konstitusiyasında Azərbaycanın ərazi bütövlüyünə qarşı iddia mane olur.

İyunun 6-da Azərbaycanın dövlət başçısı İlham Əliyev də Türkdilli Dövlətlərin Parlament Assambleyasının (TÜRKPA) nümayəndə heyəti ilə görüşdə Yerevanla sülh sazişinə toxunaraq demişdi ki, Ermənistanın hazırkı Konstitusiyası dəyişməz qaldığı halda sülh sazişinin bağlanması, sadəcə, mümkün deyil.

Ondan bir gün sonra Ermənistan Xarici İşlər Nazirliyi bəyanat yayaraq heç bir qonşusuna, o cümlədən Azərbaycana ərazi iddiasının olmadığını bildirmişdi.

Bəs indi sülhə maneə nə olacaq?

Siyasi şərhçi Rauf Mirqədirov Kamran Mahmudovun təqdimatında yayımlanan “Çətin sual” verilişində bu barədə danışır.

TEREF lent.az-a istinadən Azərbaycanın Xalq artisti Nazpəri Dostəliyevadan bəhs edir.

- Nazpəri Dostəliyeva harada anadan olub və neçə yaşı var?

Nazpəri Dostəliyeva 1959-cu il dekabrın 23-də Aşıq Əhmədin ailəsində, Bakıda doğulub.

- Nazpəri Dostəliyeva hansı təhsili alıb?

- 2002-ci ildə Azərbaycan Dövlət İncəsənət Universitetini bitirib. 2018-ci ildə Nazpəri Dostəliyeva "İncəsənətin nəzəriyyəsi, təhlili və tənqidi" ixtisası üzrə fəlsəfə doktoru elmi dərəcəsi alıb.

- Nazpəri Dostəliyeva sənətə nə zamandan başlayıb?

Ekranlara ilk 1996-cı ildə çıxıb. İlk hiti "Nə olar, Allahım, ayırma bizi" mahnısı olub. "Mənim göz yaşımı görməyəcəksən", "Dilbərim", "Bağışla ana", "Unut kədərini, qəmini unut" kimi yaddaqalan mahnılar ifa edib. 1998- cı ildən Azərbaycan Dövlət Teleradio Şirkətinin solistidir. 25 disk və 3 albomu var. Dünyanın bir çox ölkələrində (Fransa, Almaniya, Niderland, Norveç, Kipr, Türkiyə) solo konsertlər verib. 1999-cu ildən bəstəkar Səyavuş Kərimi, bəstəkar Cabbar Musayev ilə uğurlu iş birliyi olub.Nazpərinin şöhrətlənməsində onun qeyri-adi gözəlliyinin də rolu olub.

- Nazpəri Dostəliyeva böyük səhnəyə toylardan gəlib?

Bəli. O atası aşıq Əhmədəlini özünün ilk ustadı adlandırır. İlk çıxışları el şənliklərində olub. "Yadıma gəlir, övladlarım çox kiçik idi, qapını bağlayıb işə gedirdim. Ordan çıxıb qaçırdım canlı efirə. Efirdən çıxıb səsyazma studiyasına gedirdim. Studiyadan qaçırdım toylara. Maşınım da yox idi. Səhərə yaxın piyada qayıdırdım evə. Görürdüm, uşaqlar özləri bir şeylər hazırlayıb yeyiblər. Balaca oğlum başını böyük qardaşının dizinə qoyub yatıb. Oturub hönkür-hönkür ağlayırdım. Dəfələrlə olub ki, uşaqlar qapını bağlayıb yatıblar. Oyatmağa qıymamışam. Qapı arxasında pilləkənlərin üstündə oturaqlı yatmışam"- deyə o müsahibələrindən birində deyib.

- Nazpəri Dostəliyeva ailəlidir?

Nazpəri xanım bir dəfə Nəriman adlı bəylə ailə həyatı qurub. Sonradan bu evliliyə son qoyan müğənninin həmin evlilikdən Əli və Əkbər adlı iki oğlu dünyaya gəlib. Müğənni bu barədə suallara belə cavab verir:

"Mənim qız toyum üç gün, üç gecə davam edib. O vaxtı Şövkət Məmmədova toyumda iştirak edib. Amma yoldaşımı sevməmişəm, uşaqlarıma görə ona həmişə hörmətlə yanaşmışam. Qadın üçün təkbaşına iki oğlan övladı böyütmək çox çətindir. Neçə il mən övladlarımı tək böyütdüm. Ataları bir dəfə olsun maraqlanmadı onlarla.

- Nazpəri Dostəliyevanın qardaşı öz qızına təcavüz edib?

Bir neçə il əvvəl isə özünü Nazpəri Dostəliyevanın qardaşı qızı kimi təqdim edən və atasının təcavüzünə məruz qaldığını bildirən Pərvanə Dostəliyeva ilə bağlı qalmaqalda müğənninin adı hallansa da, Nazpəri xanım bu barədə mətbuata belə açıqlama verib:

"Bir Xalq artisti olaraq hər zaman ayağımdan dartmağa çalışanlar çox olub. Bu böhtanların üstündən hər zaman səbirlə keçmişəm və susmuşam. Videosu yayılan bu sərxoş qadın guya mənim qardaşım qızıdır və məni şantaj edir. Qardaşım Ağaların rəsmi nikahdan iki oğlu var. Qardaşımın gəncliyində ətrafında qızlar çox olub. Bu qız da, yəqin, qeyri-qanuni dünyaya gələn biridir. Çox təəssüf edirəm ki, qardaşımın gənclik səhvinə görə bu gün mən şantaj olunuram. Onun məni şantaj etməyinin səbəbi də bu qızın anasını və özünü qəbul etməməyim və yaxınıma buraxmamağımdır. Mən heç vaxt o qızı qəbul etməmişəm və etməyəcəm də. Ağlı başında olan bir qadın belə sözlər danışmaz. Onun danışdıqları cəfəngiyatdır. Ona görə də, onun sözlərini ciddiyə almıram".

- Nazpəri Dostəliyeva nə üçün efirlərə çox gec çıxıb?

Nazpəri xanım 16 yaşından toylara getsə də efirə 38 yaşında çıxıb. Uzun illər səhnəyə çıxmamasına səbəb qardaşı olub.

- Nazpəri Dostəliyeva atası barədə nələr danışıb?

Nazpəri Dostəliyevanın atası saz havalarının mahir ifaçısı hesab olunub. Atasından danışan Xalq artisti onun yaşından cavan göründüyünü də vurğulayıb.

Atamla yan-yana gəzəndə onu sevgilim zənn edirdilər. Bir dəfə Moskvada atamla gəzirdik. Bir qadın yaxınlaşdı, mənə dedi ki, sənin nə yaraşıqlı sevgilin var. Dedim ki, o, mənim atamdır, sevgilim deyil". Atam mənim ilk böyük sevgim, ustadım, dayağım idi.

- Nazpəri Dostəliyeva mərhum bacısı Zeynəbdən nə üçün küsüb?

Nazpəri Dostəliyeva uzun illər müğənni bacısı Zeynəb Dostəliyeva ilə küsülü olub. Hətta Zeynəb xanımın efirlərdə səsləndirdiyi fikirlərə görə, bacısı xeyli müddət onun efirlərə buraxılmasına imkan verməyib. Lakin sonradan onlar arasındakı küsülülük sona çatıb. Onların küsülülüyünə səbəb sənət qısqanclığı olduğu deyilir.

- Nazpəri Dostəliyevanın oğlu niyə vəfat edib?

2021-ci il, martın 23-də gözlənilmədən sənətçinin böyük oğlu Əli Quliyev 41 yaşında vəfat edir. Müğənni oğlunun ürək çatışmazlığından dünyasını dəyişdiyi bildirir. 1980-ci il təvəllüdlü Əli Quliyev bir neçə il öncə

- Nazpəri Dostəliyeva nə üçün mərhum müğənni İlhaməyə 25 min manat təzminat ödəyib?

Nazpəri xanım zaman-zaman öz həmkarları ilə də qalmaqal yaşayıb. Bunlardan ən səs-küylüsü İlhamə Quliyeva ilə olan qalmaqal olub. Aralarındakı münasibət o qədər gərginləşib ki, İlhamə Quliyeva Nazpəri xanıma efirlərə çıxmağa qadağa qoyub. İki sənət adamının işi məhkəməlik olduğundan Nazpəri Dostəliyeva İlhamə Quliyevaya 25 min manat təzminat da ödəyib. İlhamə xanım dünyasını dəyişəndən sonra Nazpəri Dostəliyeva müsahibələrinin birində deyir:

Heç kim elə düşünməsin ki, mən bu hala sevinirəm. Nə qədər düşmən olsaq da, ölüm ölümdür. Mən təəssüflənirəm ki, o belə bir həyat yaşadı. Bu gün bilsin ki, onun ölümünə sevinənlər var. Heç kimə belə bir ölüm arzulamazdım. O, dəfələrlə mənim yuxularıma girib, Nazpəri, mənə halallıq ver deyib. Mən də təbii ki, halallıq vermişəm".

- Nazpəri Dostəliyeva plastik əməliyyat etdirib?

64 yaşlı müğənni üz gərdirmə əməliyyatı etdirib. Özünü idmanla formada saxlayır.

- Nazpəri Dostəliyeva toylara neçəyə gedir?

Oğlunun ölümündən sonra 1 il yas saxlayan müğənni yenidən öz sənətinə qayıtdı və toy qonorarı 6-8 min manat təşkil edir.

- Nazpəri Xanımın evindən kimlər nə qədər pul oğurlayıb?

19 avqust 2017-ci il tarixində Bakı şəhəri Nərimanov rayonunda yaşayan Nazpəri Dostəliyevanın mənzilinə qanunsuz daxil olaraq içərisindən külli miqdarda qızıl-zinət əşyaları və pul olan dəmir seyf oğurlayıblar.

N.Dostəliyeva deyib ki, evindən ümumilikdə 311 min manatlıq qızıl-zinət əşyası, 15 min dollar, 3 min avro və 2 min fund-sterlinq maddi ziyan dəyib.

Elvin Abbasov: “Dalğa bir ölkə ərazisindən digərinə keçə bilər”

Xalq yazıçısı, millət vəkili Sabir Rüstəmxanlı feysbuk səhifəsində “Azərcell”I tənqid edib. “Hörmətli Azərsell! Mən İranda deyiləm! Azərbaycanda, Yardımlıdayam! Sən hansı haqla və məsuliyyətsizliklə mənim telefonuma “İrana xoş gəlmisiniz…” mesajı göndərirsən? Sən axı Azərsellsən, İransell deyilsən!” yazan millət vəkilinin statusuna rəy bildirənlər də yarı-zarafat, yarı-gerçək “Azərcell” “delimitasiyaya məcbur edilməlidir”, deyə qeyd ediblər.

Məsələyə münasibət bildirən İKT üzrə mütəxəssis Elvin Abbasov “Sherg.az”a açıqlamasında Sabir bəyin texnologiya sahəsində naşı olduğunu dedi:

- Bu, texnikadan və ümumi proseslərdən anlayışı olmayan şəxsin yazısıdır. Emosional yazıdır. Millət vəkilinin pozisiyası düzgün deyil. Bütün dünyada sərhəd zonalarında dalğaların bir ərazidən digərinə keçməsi təbii haldır. Dalğa bucağı olan bir şey deyil ki sərhəd zonasından o tərəfə keçməsin. Siqnalizasiya elədir ki, məsələn, radio dalğaları, televiziya antenlərinin dalğalarının sərhəd zonalarında keçidləri var. Bunun qarşısını almaq mümkün deyil. Bu, dalğadır. Bucaqları olan maddə deyil. Ona görə də bəzi hallarda olur ki sərhəd zonalarında dalğalar bir ərazidən digərinə keçə bilir, bir-birinə qarışa abilir. Dalğa bir ölkə ərazisində qarşı qarşı tərəfi və ya siz Azərbaycan ərazisində olduğunuz halda digər ölkəni göstərə bilər. Məsələn, Gürcüstana keçiddə - Qırmızı körpüdə, Gürcüstanın bir hissəsinə qədər “Azərcell” “Nar” dalğaları Azərbaycandakı kimi qəbul edir. Onda deyək ki, “Azərcell” və ya “Baksell”, “Nar” Gürcüstanda özünü yaxşı aparmır?! Millət vəkili, sadəcə, emosional mövqedən çıxış edib. Bu, mahiyyəti olmayan fikirdir. Dalğa hər tərəfə keçə bilər, dalğa qarışa bilər. Əsas odur ki Azərbaycan daxilində belə hal yoxdur. Bütün sərhəd zonalarında isə hər yerdə bu hal var, dalğaların qarşı tərəfə keçməsi aktualdır. Və bunun qarşısını ala biləcək texnologiya yoxdur. Dalğa bucaqları olan fiziki hadisə deyil. Dalğa stansiyası nə qədər yaxındırsa onun diametri, radiusunun qarşı tərəfə keçməsi ehtimalı var. Bunu “sərhəd pozuntusu”, “sərhədlərin ihlalı” kimi təqdim etmək yanlışdır. Önəmsəniləcək bir hadisə də deyil.
P.S, Teref olaraq qeyd etmək istəyirik ki, 21-ci əsrdə yeni texnologiyalar imkan verir ki, mütəxəsisin dediyi o sərhəd "tanımayan" dalğaların qarşısı alınsın! Sadfəcə bunun üçün yeni texnologiyalardan istifadə etmək lazımdır!
TEREF

İyunun 16-sı saat 00:50-də Ermənistan silahlı qüvvələrinin bölmələri Yeğeqnadzor rayonunun Bardzruni yaşayış məntəqəsi istiqamətində yerləşən mövqelərindən Azərbaycan Ordusunun Naxçıvan Muxtar Respublikasının Şahbuz rayonunun Şada yaşayış məntəqəsi istiqamətində yerləşən mövqelərini atıcı silahlardan atəşə tutub. Azərbaycan Müdafiə Nazirliyinin yaydığı məlumata görə, ordumuzun bölmələri tərəfindən qeyd olunan istiqamətdə cavab tədbirləri görülüb.

Qeyd edək ki, iyunun 14-ü saat 13:55-də də Ermənistan silahlı qüvvələrinin bölmələri Böyük Vedi rayonu istiqamətində yerləşən mövqelərindən Azərbaycan Ordusunun Naxçıvan Muxtar Respublikasının Sədərək rayonu istiqamətində yerləşən mövqelərini atıcı silahlardan atəşə tutub.

Ermənistan tərəfi isə atəşkəsin pozulmasını təkzib edir və belə bir əmr verilmədiyini açıqlayır. Ermənistanın Baş naziri açıqlamasında deyib ki, onun tərəfindən ordusuna belə bir göstəriş verilməyib. Paşinyan atəşkəs pozuntusu halının Azərbaycan və Ermənistan tərəfindən birgə araşdırılması təklifi ilə də çıxış edib.

Ekspertlər isə bildirirlər ki, Ermənistan ordusu təxribatlar törətməklə sülh prosesinə növbəti dəfə zərbə vurmaq niyyətini ortaya qoyur.

Bakı Politoloqlar Klubunun rəhbəri, analitik Zaur Məmmədov AYNA-ya müsahibəsində deyib ki, təxribat törədilirsə, bunun məsuliyyəti birbaşa olaraq Ermənistan rəhbərliyinin üzərinə düşür:

- Biz bilirik ki, Ermənistanda müəyyən qruplar var ki, onlar keçmiş prezidentlər – Robert Köçəryanın, Serj Sarkisyanın, yaxud da xaricdəki erməni lobbisinin təsiri altındadırlar, onların təlimatı əsasında hərəkət edirlər. Ola bilsin ki, həm qruplaşmaların ordudakı uzantıları bu təxribatı törədirlər. Amma hər halda, atəşkəs pozulursa, bunun məsuliyyəti Ermənistan dövlətinin üzərindədir. Azərbaycan Ordusu üçün fərqi yoxdur, erməni əsgəri atəş açırsa, deməli, ona cavab veriləcək.

Naxçıvan istiqaməti ümumiyyətlə, həssas istiqamətdir. Biz bilirik ki, Naxçıvana Ermənistan tərəfindən ərazi iddiaları mövcuddur. Bu iddia daim olub, bu gün də səsləndirilməkdədir. Ona görə də Bakının danışıqlardakı əsas tələbi məhz Ermənistanın Konstitusiyasının dəyişdirilməsi yox, onların gələcəyə baxış bucağının dəyişdirilməsidir. Əks təqdirdə, Azərbaycan adekvat addımlar atacaq. Bir daha atəşkəs pozulacaqsa, o zaman Azərbaycan Laçın istiqamətində 40 kilometrlik ərazidə sabitliyi təmin edə bilərik. Əgər Avropa İttifaqının missiyasının olduğu ərazidən Azərbaycan ərazisinə təhdid gələrsə, biz orada “bufer zona” yarada bilərik ki, təhlükəsizliyimiz təmin olunsun. Bu barədə yaxşı olar ki, Ermənistan rəhbərliyi bir daha düşünsün.

- Paşinyan atəşkəsin pozulmasını hər iki tərəfin birgə araşdırmasını təklif etdi. Bunu necə qiymətləndirmək olar?

- Biz nəyi araşdırmalıyıq. Atəşkəs pozulur, təxribat törədilir, buna lazımi cavab da verilir. Ermənistan özü araşdırmalıdır ki, atəşkəs necə, hansı şəraitdə pozulur. Əgər həqiqətən də səmimidirlərsə, belə bir əmr rəsmi şəkildə verilməyibsə, o zaman Paşinyan ordusuna baxsın, ona qarşı olanları zərərsizləşdirsin.

- Atəşkəsin pozulması sülh prosesinə zərbə vururmu?

- Əlbəttə, bu, sülh prosesinə zərbədir. Ermənistan rəhbərliyi sülhdə maraqlıdırsa, bu cür təxribatların olmamasına çalışmalıdır. Dediyim kimi, təxribat törədiləcəksə, qarşısı Azərbaycan Ordusu tərəfindən qətiyyətlə alınacaq. Bunun biz dəfələrlə şahidi olmuşuq. Azərbaycanın mövqeyi birmənalıdır və bu mövqe Azərbaycan lideri tərəfindən bir neçə dəfə açıq şəkildə səsləndirilib.

- Paşinyan bildirdi ki, Ermənistan Konstitusiyasında dəyişikliklə sülh sazişi arasında hansısa bağlılıq yoxdur. Bununla Baş nazir nəyi demək istəyir?

- Ermənistan yeni ana qanunu tərtib etməli, qəbul etməlidir. Əgər bunu edərlərsə, Ermənistan Konstitusiyası yenilənəcək və oradakı ərazi iddiaları ilə bağlı maddələr çıxarılacaq. Bu günkü konstitusiyalarında Azərbaycana, Türkiyəyə qarşı birbaşa ərazi iddiaları mövcuddur. Bunlar aradan qaldırılmasa, o zaman sülh imzalansa da, dayanıqlılığı şübhə altında olacaq.

Düşünürəm ki, bu barədə Paşinyan hakimiyyəti düşünürm və yeni konstitusiya qəbulu ilə bağlı planlar var. Sadəcə olaraq bunu gecikdirirlər. Daxili vəziyyət nəzərə alınır. Əlbəttə, Paşinyan açıq şəkildə deyə bilməz ki, bu, Azərbaycanın tələbidir, yerinə yetirək. Amma biz tələsirik, bunu Ermənistan hakimiyyəti yaxşı bilml Rəsmi İrəvan söz verə bilər, dəyişəcəklərini bəyan edə bilərlər. Amma COP29 tədbirinədək sülh sazişi imzalansın. Bu sənədin imzalanması isə Ermənistan Konstitusiyasının dəyişdirilməsindən keçir.

- Ermənistanda davam edən etiraz aksiyalarının arxasında Paşinyanın olduğu iddia edilir. Bəziləri ehtimal edirlər ki, bununla Paşinyan sülh sazişinin ləngidilməsinə çalışır...

- Düşünmürəm ki, bu, Paşinyanın oyunudur. Bu etirazları keşiş Baqrat Qalstanyanın liderliyi ilə baş verir və Baqratın təlimatçısı da erməni kilsəsi, xüsusilə, xarici qüvvələrlə yanaşı, İkinci Qaregindir. Qareginin arxasında isə nə Qərb, nə Soros, nə də ki, Paşinyan və ətrafı olub. Onlar tamamilə, fərli baxışlıdırlar. Əksinə, Paşinyan hakimiyyətə gəldikdən sonra kilsə hakimiyyətini nüfuzdan salmaq üçün, onların hakimiyyətinə son qoymaq üçün proqramı vardı. Uzun müddət idi ki, kilsə hakimiyyətilərinə müdaxilə etmirdi. Baqrat Qalstanyanın lider olaraq seçilməsi Paşinyana qarşı olan siyasi texnoloqların ideyasıdır. Ona görə də keşişin arxasında Paşinyanın özünün dayanması iddiası ilə razılaşmıram. Paşinyanı devirə bilməyən qüvvələr çıxış yolu kimi kilsədən kömək umdular. Din amilini siyasətə qatmaqla hakimiyyəti devirmək niyyəti güdülür. Radikal dini qruplar siyasiləşdirilir ki, bununla hakimiyyətə gələ bilsinlər.