“Rusiyanın Kursk vilayətindəki Ukrayna qoşunları mühasirəyə alınmayıb”.
TEREF xəbər verir ki, bunu Ukrayna Silahlı Qüvvələrinin Ali Baş Komandanı Aleksandr Sırskinin məruzəsindən sonra Prezident Volodimir Zelenski deyib.

“Qüvvələrimizin Kursk vilayətinin müəyyən ərazilərində əməliyyatı davam edir. Bölmələr öz tapşırıqlarını dəqiqliklə yerinə yetirirlər. Kursk vilayətindəki Ukrayna qoşunlarının sayəsində xeyli sayda Rusiya qüvvələri başqa istiqamətlərə yönəldilib. Qoşunlarımız Kursk vilayətində rus və Şimali Koreya qruplaşmalarına qarşı müqaviməti davam etdirir. Qoşunlarımız mühasirədə deyil”, – dövlət başçısı bildirib.

Xatırladaq ki, Rusiya Kurskdakı Ukrayna qüvvələrinin mühasirəyə alındığını iddia etmişdi.

“Qafqazinfo”

Odessanın mərkəzində dəhşətli qətl hadisəsi törədilib.
“AzPolitika” Ukrayna mətbuatına istinadla xəbər verir ki, 32 yaşlı Ukrayna millətçisi Demyan Qanul saat 10 radələrində şəhərin mərkəzində Ukrayna Qəhrəmanları (Aleksandrovski) prospektində güllələnib.

Qeyd edək ki, əslən Kirovoqrad vilayətindən olan Qanul Odessada ali təhsil alıb. Qanul millətçi "Praviy sektor" təşkilatının Odessa qanadının fəallarından olub. Özü isə "Küçə cəbhəsi" ictimai təşkilatının liderliyini edib. O, yaşıl zonalarda tikinti aparılmasına qarşı mübarizə aparması və zooaktvist kimi də aktiv fəaliyyət göstərib.

Təşkilat lideri könüllü olmaqla bərabər Odessada rus imperiyasından və bolşeviklərdən qalma küçə adlarının və ya abidələrin dəyişdirilməsi və sökülməsinin aktiv tərəfdarlarından idi.

Aktivisti güllələyən şəxs kameralara düşüb. Ukrayna daxili işlər naziri İqor Klimenko cinayəti şəxsən nəzarət götürdüyü ilə bağlı açıqlama verib. Hadisənin araşdırılması və cinayətkarın həbs olunması üçün Kiyevdən xüsusi istintaq əməliyyat qrupu göndərilib və qatil gizləndiyi evdə yaxalanıb. Cinayətin mötivi haqda hələlik məlumat verilmir.

İŞİD terror təşkilatının Suriya və İraq lideri Abdullah Maki Musleh El Rifai öldürülüb.

Bu barədə İraqın Baş naziri Məhəmməd əs-Sudani deyib.

Onun dünyanın ən təhlükəli terrorçularından biri olduğu qeyd edilir.

Məlumata görə, İraq təhlükəsizlik qüvvələri əməliyyatı ABŞ-ın rəhbərlik etdiyi koalisiya ilə birgə həyata keçirib. \\Axar.Az

Habil müəllimin 70 yaşını qutlamağa nədən başlayım, bilmirəm. Böyük şairimiz Əli Kərimlə indi heç cür razılaşa bilmirəm:
“Hər şeyi başlamaq asan bir işdir,
Görünür daha çox sonu çətindir”
Ondan başlayım ki, 14 mart 1955-ci ildə ziyalı -maarifçi ailəsində, dünyaya göz açıb, sonra birinci sinfə gedib, orta məktəbi bitirib, sonra ali məktəbə qəbul olunub, bitirib, sonra, sonra…Ağdamda doğulmağını, Qarabağla nəfəs aldığını, 30 ilə yaxın Ağdamsız, Şuşasız, Laçınsız…Qarabağsız olduğunu vurğulamağı unutdum. Heç Habil müəllimin, belə baxanda haralı olduğu da bilinmir, doğulduğu elinə, yurduna bütöv bağlıdır, yerliçilik, ayrıçılıq hissi ona yaddır.
Bəlkə ondan başlayım ki, Qarabağ uğrunda savaşda KİŞİ KİMİ vuruşub, döyüşlərdə çiyin-çiyinə söykənmişik, sonra arxa-dayağımız olub, arxamızı DAĞA söykəmişik, hansı görəvdə olmağından asılı olmayaraq qapısını açmağa qapı dalında boynubükük dayanmamışıq. Şəhid, qazi adını Habil Surxay oğlu qutsal, müqəddəs sayır, bir an da olsun şəhid ailələrini, qazi dostlarını unutmur. Özü də vətənə xidmət görəvində, iş başında şəhid olan oğul atası, ŞƏHİD ATASIDIR! Böyük elm adamı, hüquq elmləri doktoru, professor olduğunu vurğulamağı unutdum. Belə baxanda Habil müəllimin ziyalılığı, alimliyi üzündən oxunur. Bir də alim olmaq olar, çətini adam olmaqdır, özü də el adamı! Habil müəllim əsl el adamıdır!
Bəlkə ondan başlayım ki, 44 günlük ZƏFƏR SAVAŞINDA Ali Baş Komandanın hər çıxışını, 8 NOYABRA aparan hər sorağını necə bölüşürdü! Necə “ZƏFƏRİN MÜBARƏK, PREZİDENTİM, ALİ BAŞ KOMANDANIM, DOĞMA YURDUM, ANA VƏTƏNİM, AĞDAMIM, QARABAĞIM, AZƏRBAYCANIM!” deyirdi. Necə göz yaşları içində gözaydınlığı verirdi.
70 yaşın mübarək, döyüş dostumuz, arxa-dayağımız Habil Surxay oğlu! Nə yaxşı doğulmusunuz, nə yaxşı varsınız! 70 illiyinizdə də umacağımız var, bundan sonra da bir 30 il belə KİŞİ KİMİ yaşayın! Məmməd Araz demiş, haqqın var yaşamağa!
Məğrur Bədəlsoy

Rusiya Xarici İşlər Nazirliyinin mətbuat katibi Mariya Zaxarova növbəti dəfə hər kəsi təəccübləndirib.

Adalet.az xəbər verir ki, Zaxarova mətbuat konfransı zamanı ağlamsınıb. Yəni ağamasa da , ağlamış kimi bir görüntü yaradıb.

Deməli, regnum.ru yaydığı məlumatda bildirilir ki, Kursk və Belqorod vilayətlərində Rusiya-Ukrayna münaqişəsi nəticəsində ölən və yaralanan uşaqların sayını təqdim edərkən göz yaşlarını saxlaya bilməyib.

“ Belqorod vilayətində 88 uşaq yaralanıb, Kursk vilayətində 12 uşaq ölüb, 4 uşaq yaralanıb. Martın 2-də o, Ukrayna silahlı qüvvələrinin Rusiyanın sərhəd və arxa bölgələrində keçirdiyi əməliyyatlar nəticəsində 652 mülki şəxsin həlak olduğunu bildirib. Onların arasında 23 uşaq da var. Həmçinin 169-u uşaq olmaqla 2980 nəfər xəsarət alıb. Şöbə rəisi əlavə edib ki, bütün faktlar araşdırılır, ümumilikdə 2690 cinayət işi başlanıb. Ümumilikdə son 10 il ərzində ən azı 1700 uşağın qanı ukraynalı silahlıların əlinə bulaşıb. Bunlar Kiyev rejimi üçün məzar daşına çevriləcək statistikadır…”

İndi orada mənim kimi "dəli" bir jurnalist çıxaydı, Zaxarovaya sual verəydi ki, Rusiyanın Ukraynaya genişmiqyaslı işğalı başlayandan Ukraynada 600 uşaq həlak olub, 1550-dən uşaq yaralanıb. Görəsən onlar uşaq deyildi?
Üstəlik, rəsmi və təsdiq olunmuş məlumatlara görə, 2024-cü ildə Ukraynada, ümumilikdə, 495.096 insan ölüb.
Dübarə, iddialara görə , müharibə başlayandan bəri Ukrayna Silahlı Qüvvələrinin (SQ) itkiləri artıq yarım milyona çatıb. Görən bu statiska hansı rejimin məzar daşına çevriləcək statistikadır, Zaxarova…?
Vallah , bəzən Rusiyalı rəsmilərdən elə açıqlamalar çıxır ki, gözümüzün şahidi olmasaq inanarıq ki, sən demə, Ukrayna Rusiyaya işğalçı hücuma başlayıb, səm demə, Zelenski deyib ki, 72 saata Rusiyanı işğal edib Moskvada oturacağam.





Əntiqə Rəşid

Hər şey itirilməyib: sadəcə daha çox işləmək lazımdır

ABŞ Ukraynanı təkcə silahla deyil, həm də kəşfiyyat məlumatları ilə təmin etməyi dayandırıb. Hər şeydən əvvəl “kəşfiyyat məlumatları” dedikdə nəyi nəzərdə tutduğumuzu başa düşməliyik. Bu, qoşunların hərəkəti, bəzi silahların tədarükü haqqında məlumat və ya alınan məlumatlar əsasında hazır təhlildir.

Bu necə baş verir? Deyirik ki, məsələn, qoşunların hansısa yerdəyişməsi olub, hansısa məhvetmə vasitələri gətirilib. Və buna əsasən, biz məlumat alırıq ki, məsələn, hansısa istiqamətdən əks-hücum hazırlanır və ya düşmən tərəfindən hansısa başqa hərəkətlər edilir. Onu da demək olar ki, Şimali Koreya və İran tərəfindən Rusiya Federasiyasına silah tədarükü ilə bağlı müəyyən razılaşmalar var. Belə olan halda biz özümüzü buna hazırlamalıyıq ki, Şimali Koreya ballistik raketləri ilə yanaşı, İran ballistik raketləri də bizə qarşı istifadə olunacaq. Yaxud, məsələn, koreyalı generallar düşmən ərazisində hansısa məskunlaşan əraziyə gəliblər, oraya zərbə endirək...

Bu kəşfiyyat məlumatlarıdır ki, bizim əldə edə bilməyimiz mümkün deyil. Yəni söhbət bəzi müşahidələrin hərtərəfli təhlilindən gedir. Bəzilərini artıq görürük. Ukraynada deyəndə ki, ABŞ kəşfiyyat məlumatlarını dayandırdıqdan sonra “biz kor olduq”, düzgün deyil... Biz kor olmadıq. Çünki bizim düşməni “izləmək” üçün bir şeyimiz var. Sadəcə, müəyyən sahələri gücləndirməliyik.

Bu məqsədlə bizim dost Avropa ölkələrinin bir qrup peykimiz var ki, onlar Ukraynanı kəşfiyyat məlumatları ilə təmin edə bilər və etməyə hazırdırlar.

Bundan əlavə, biz NATO AWAX təyyarələrinin ayrıca eskadronundan istifadə etməyə davam edə bilərik. Nəzərə almaq lazımdır ki, biz NATO ilə “dalaşmamışıq”. Bu təyyarələri İsveçdən almaq da yaxşı olardı. Onlar real vaxt rejimində məlumat ötürə və ümumiyyətlə bir çox məsələləri həll edə bilirlər.

Həmçinin, OSINT-i unutmamalıyıq. Açıq mənbə kəşfiyyatı nəticə verir, çünki ruslar çox danışmağı sevirlər. Və onu da qeyd etmək lazımdır ki, bizim öz kəşfiyyat pilotsuz təyyarələrimiz var, onların köməyi ilə düşmənin hara irəliləməyə çalışdığını da görə bilərik. 28 saata qədər havada qala bilən və 2500 kilometr uça bilən dronlarımız var. Ölçülərinə görə ən kiçik olan, lakin SAR radarlarını daşıyan dronlar var. Bu radar meteoroloji şəraitdən və ərazinin təbii işıqlanma dərəcəsindən asılı olmayaraq yüksək ayırdetmə qabiliyyətinə malik relyef sahəsinin ikiölçülü görüntüsünü əldə edir. Xüsusi silahları hədəfə almaq üçün lazer təyinatlı dronlar var.

Ümumiyyətlə, bizim öz kəşfiyyat imkanlarımız, eləcə də onları bizə təqdim edə biləcək tərəfdaşlarımız var. Mən "hər şey itirildi" deyə bilmərəm. Bəli, biz əvvəllər hazır məlumat alırdıq, amma indi bu məlumatları özümüz toplamalı olacağıq və onları toplayaraq müəyyən addımlar atmalıyıq. Beləliklə, daha çox işləməli olacağıq.

Müəllif: Anatoli Xrapçinski – Ukrayna elektron müharibə avadanlıqları istehsal edən şirkətin baş direktorunun müavini.

Mənbə: UNİAN

Tərcümə AYNA.AZ-a məxsusdur.

Ermənistan hakimiyyəti xarici auditoriyaya ünvanlanmış sülhə hazır olduqlarını bildirən bəyanatlarına baxmayaraq, Azərbaycanla yeni müharibəyə fəal şəkildə hazırlaşır.

Bunu Caliber.az nəşri yazıb.

Nəşr bildirir ki, rəsmi İrəvanın son addımlarının məntiqi – revanşist əhval-ruhiyyənin güclənməsi və sürətli militarizasiya prosesi – bölgənin Ermənistan tərəfindən təxribat törədilmiş yeni müharibə astanasında olduğunu göstərir.

Üstəlik, Ermənistan artıq qarşıdurmanın yeni mərhələsinə hazırlığını gizlətmir – belə ki, keçən həftə hökumət iclasında elan edilib ki, 1 aprel – 13 iyun tarixləri arasında ölkədə ehtiyatda olan hərbçilərin toplanışı keçiriləcək.

Nəşr yazır:

Diqqətçəkən məqam odur ki, bu toplanış rekord müddətdə – tam 10 həftə davam edəcək ki, bu da standart hazırlıq müddətini xeyli üstələyir. Bundan əlavə, Caliber.Az redaksiyasına etibarlı mənbələrdən daxil olan məlumata görə, İrəvan apreldə müharibəyə başlamağı planlaşdırır. Toplanan faktlar və məlumatlar Ermənistanın sərhəddə aqressiv hərəkətlərə məqsədyönlü şəkildə hazırlaşdığını göstərir ki, bu da yeni eskalasiya təhlükəsini real edir.

Daha əvvəl də bildirmişdik ki, Ermənistanın hərbi planlamasında “blitskriq” konsepsiyası – şərti sərhəddəki yaşayış məntəqələrinin ildırım sürətilə işğalı nəzərdə tutulur. Son aylarda Ermənistanın hərbi avantüraya hazırlaşmasının sübutları daha da aydın görünməyə başlayıb.

Eskalasiya prosesində xüsusi rolu rəsmi olaraq “müşahidə missiyası” kimi təqdim edilən Aİ-nin missiyası oynayır. Lakin onların fəaliyyəti tamamilə fərqli mənzərə yaradır. Sərhəd boyunca, xüsusilə də mümkün toqquşma zonalarında kəşfiyyat işləri fəallaşıb. Avropalı “müşahidəçilər” sistematik olaraq əraziləri araşdırır, zəif mövqeləri müəyyənləşdirir, Azərbaycan ordusunun dislokasiyasını təhlil edirlər. Faktiki olaraq, monitorinq adı altında Ermənistan hərbi komandanlığına məlumat ötürməklə məşğuldurlar ki, bu da neytrallıq prinsipinin kobud şəkildə pozulması deməkdir.

Bu aktivlik Ermənistanın militarizasiyasının digər təhlükəli əlamətləri ilə üst-üstə düşür. Ermənistanın hücuma hazırlaşdığını açıq şəkildə göstərən əsas əlamətlərdən biri də Azərbaycanla sərhəddə 10 istehkamlaşdırılmış hərbi mövqenin tikilməsidir. Bu obyektlər struktur və yerləşmə baxımından müdafiə üçün deyil, hücum üçün nəzərdə tutulub. Onların dislokasiyası strateji əhəmiyyətli əraziləri atəş nəzarətində saxlamaq üçün xüsusi hesablanıb, bu da sərhədyanı bölgələrin təhlükəsizliyini ciddi şəkildə təhdid edir. Üstəlik, bu mövqelər xüsusi tunellərlə birləşdirilir və bu tunellər Ermənistanın diversiya qrupları tərəfindən Azərbaycana qarşı təxribat törətmək üçün istifadə ediləcək.

Ermənistan yeni hərbi təxribat hazırlayaraq, reallığı dəyişdirmək və sonra bunu artıq baş vermiş fakt kimi təqdim etməyə çalışır. Plan ondan ibarətdir ki, sərhəddə vəziyyətin qəfil dəyişməsi Azərbaycanı fakt qarşısında qoyacaq və onu aqressiyanın özünə deyil, nəticələrinə reaksiya verməyə məcbur edəcək.

Belə planları həyata keçirmək üçün ciddi resurslar lazımdır. Son iki ildə Ermənistan hərbi alışlarını kəskin şəkildə artıraraq, Fransa və Hindistandan silah almağa milyardlarla dollar xərcləyib. Xüsusilə ötən ilin payızında məlum olub ki, Hindistan Ermənistana ilk Akash zenit-raket komplekslərini göndərir. “New Indian Express” nəşrinin məlumatına görə, Ermənistan 2022-ci ildə Hindistanla 15 Akash raket sistemi almaq üçün 60 milyard rupi (təxminən 710 milyon dollar) dəyərində müqavilə imzalayıb və bu silahı alan ilk xarici ölkə olub. Akash sistemi “yer-hava” tipli raketlərdən ibarət olub, 25 km məsafədə qırıcı təyyarələrə, qanadlı raketlərə, “hava-yer” raketlərinə, pilotsuz uçuş aparatlarına və digər hava hədəflərinə qarşı istifadə edilə bilir.

Fransa isə öz maraqlarını bölgədə gücləndirmək məqsədilə Ermənistanı hava hücumundan müdafiə sistemləri, artilleriya və zirehli texnika ilə təchiz edir. Belə ki, Ermənistana müasir “CAESAR 155” mm-lik özüyeriyən artilleriya qurğuları və onların komplekt hissələri, həmçinin tank əleyhinə raket sistemləri və “hava-hava” tipli raketlər tədarük edilib. Bundan əlavə, Ermənistan ordusu R511 və R530 “hava-hava” raketləri, 30 ədəd ERYX tank əleyhinə raket kompleksi, Almaniya istehsalı olan DM32 (“bunkerfaust”) qumbaraatanları və “Panzerfaust 3” tank əleyhinə sistemləri əldə edib. Bundan əlavə, Ermənistan Silahlı Qüvvələrinə Fransanın Apilas tipli 500 ədəd birdəfəlik reaktiv qumbaraatanı və ABŞ istehsalı olan 50 ədəd BGM-71 TOW tank əleyhinə raket kompleksi tədarük olunub.

Aİ də öz rolunu oynayır – xüsusilə də Avropa Sülh Fondu vasitəsilə ayrılan maliyyə yardımları birbaşa və ya dolayısı ilə Ermənistanın militarizasiyasına sərf edilir.

Bu, misli görünməmiş silahlanma səviyyəsidir və Ermənistanın “müdafiə strategiyası” ilə heç bir uyğunluğu yoxdur. Bütün faktlar göstərir ki, Ermənistan aqressiyaya hazırlaşır.

Ermənistanın hərbi infrastrukturunun digər əsas elementi Lori bölgəsinin Xarkop kəndində yunan tərəfinin fəal dəstəyi ilə inşa edilən körpüdür. Bu, vacib bir logistika obyektidir və hərbi texnikanın və qüvvələrin döyüş zonasına sürətli şəkildə çatdırılmasına imkan verəcək. Beləliklə, qısa müddət ərzində sərhəddə qüvvələrin kəskin artırılması üçün şərait yaradılır ki, bu da qəfil hücum ssenarisi üçün kritik amildir.

Bütün bu faktlar vahid strateji planın mövcudluğunu göstərir və yeni eskalasiyaya istiqamətlənmişdir. Bu vəziyyətdə mümkün döyüş əməliyyatlarının başlanmasının bütün məsuliyyəti Ermənistanın və onun himayədarlarının üzərinə düşəcək. Azərbaycan dəfələrlə sülh dialoquna hazır olduğunu nümayiş etdirib, lakin hər hansı güc tətbiqi ssenarisi qətiyyətlə dəf ediləcək. Bakı öz ərazi bütövlüyünü və vətəndaşlarının təhlükəsizliyini qorumaq üçün kifayət qədər imkanlara malikdir. Ermənistan rəhbərliyi yeni hərbi təxribat kartına oynayır, lakin bu addım onların özləri üçün fəlakətli nəticələrə səbəb olacaq. “Dəmir yumruq” yerindədir və ölkəmizə qarşı istənilən avantüra sərt və ildırım sürətli cavabla qarşılanacaq. Bundan sonra İrəvan yenidən mərhəmət diləməyə məcbur olacaq. Ermənistanın hərbi-siyasi rəhbərliyinin hələ də düşünmək üçün vaxtı var. Əks halda, İrəvandakı bütün inşaat texnikası “Yerablur” qəbiristanlığının genişləndirilməsi üçün istifadə olunacaq. Nə üçün? Yeni “yük-200” karvanları üçün...