 |
|
|
DİA.AZ: - Oktyabrın 6-da Müdafiə Nazirliyinin təşkilatçılığı və Əsir və itkin düşmüş, girov götürülmüş vətəndaşlarla əlaqədar Dövlət Komissiyasının dəstəyi ilə Azərbaycan Respublikasında akkreditə olunmuş xarici ölkələrin hərbi attaşeləri Xocavənd rayonunun Edilli kəndi ərazisində Azərbaycan Ordusunun hərbi qulluqçularının olması ehtimal edilən şəxslərin kütləvi dəfn edildiyi məzarlığa səfər ediblər. Bu barədə DİA.AZ-a Müdafiə Nazirliyindən məlumat verilib.
Beynəlxalq Hərbi Əməkdaşlıq İdarəsinin rəisi general-mayor Hüseyn Mahmudov xarici ölkələrin hərbi nümayəndələrinə Birinci Qarabağ müharibəsi zamanı Azərbaycan Respublikasının ərazilərində qanunsuz fəaliyyət göstərmiş erməni hərbi birləşmələri və Ermənistan Respublikasının silahlı qüvvələri tərəfindən beynəlxalq humanitar hüquq norma və prinsiplərinin kobud şəkildə pozulmasından danışıb. Bunun nəticəsində Azərbaycan Ordusunun hərbi qulluqçularının olması ehtimal edilən şəxslərin əsir düşərək, işgəncə verilməklə öldürülməsi faktları barədə ətraflı məlumat verib.
Məzarlıqda 12 nəfərin qalıqlarının üzə çıxdığı qeyd olunub. Əşyalarla birlikdə aşkarlanan skeletlərin geyimlərindən hərbçi olduqlarının bilindiyi xüsusi vurğulanıb. Eyni zamanda skeletlərin əlləri və ayaqlarının məftil və kəndirlə bağlandığı da hərbi attaşelərin diqqətinə çatdırılıb.
General-mayor H.Mahmudov erməni təcavüzü nəticəsində itkin düşmüş 4000 nəfərədək mülki şəxs və hərbi əsirlərin taleyi barədə hələ də heç bir xəbərin olmamasını da qeyd edib.
Sonra hərbi attaşelər hərbi hissələrdən birini ziyarət edərək burada şəxsi heyət üçün yaradılan şəraitlə tanış olublar.
"Tərtər işi” ilə cinayət işlərinə bəraətverici əsaslarla xitam verilmiş 18 nəfərin adları və rütbələri məlum olub.
Bu barədə APA-ya vəkil Rəsul Cəfərov məlumat verib.
Vəkil bildirib ki, həmin şəxslər müxtəlif maddələrlə ittiham olunaraq azadlıqdan məhrumetmə cəzasına məhkum olunmuşdular.
"Tərtər işi" ilə bağlı istintaqın təzələnməsindən sonra isə onların günahsız olduqları təsdiqlənib:
Seymur Hidayətov:Polkovnik-leytenant
Ramin Mustafayev: Polkovnik-leytenant
Elşən Xamıyev: Mayor
Cavid Ağayev: Mayor
Elmar Allahverdiyev: Kapitan
Elvin Xəlilov: Kapitan
Ziya Qurbanov: Kapitan
Səddam Quliyev: Kapitan
Bəşir Məmmədov: Kapitan
Elvin Rəfiyev: Baş leytenant
Sabir Əliyev: Baş leytenant
Yusif Əsədov: Baş leytenant
Əsəd Mancanov: Leytenant
Turab Kərimov: Gizir
Zamiq Səfərov: MAXE
Rəcəb Teymurov: MAXE
Bəhruz Novruzov: MAXE
Eyyub Məmmədov: MAXE
Xatırladaq ki, Ali Məhkəmə bir neçə gün əvvəl "Tərtər işi" ilə bağlı ittiham olunmuş daha 18 nəfər barəsindəki son kassasiya qərarını ləğv edərək yenidən apelyasiya baxışına göndərib.
Hulusi Akarın Bakıya səfəri bir neçə kontekstdə diqqət çəkir:
- Son sərhəd toqquşmasından sonra Ermənistan yeni hücuma hazırlaşdığını gizlətmir: bu ölkənin baş qərargah rəisinin müavini hücumla bağlı əmr aldıqlarını açıqladı;
- Etirazların yaşandığı İran diqqəti Azərbaycan üzərində fokuslayır və Tehranda Azərbaycanın Ermənistanla dövlət sərhədini bərpa etmək istəyinə qarşı mümkün müdaxilə ssenarilərinin nəzərdən keçirildiyi də istisna deyil;
- Azərbaycan Xüsusi Təyinatlı Qüvvələri Türkiyədə “Bordobərəlilər”lə birgə təlimlərə başlayıb (4-14 oktyabr);
Adətən təlimləri iki ölkənin hərbi rəhbərliyi birgə izləyir, lakin bu dəfə XTQ-nin Türkiyəyə, Türkiyənin hərbi rəhbərliyinin Azərbaycana gəlişi maraqlıdır:
1. İki ölkə mümkün risklərə qarşı birgə plan üzərində işləyir;
2. Ermənistanın gözlənilən təxribatına əks-cavab əməliyyatı istisna deyil;
Akarın nümayəndə heyəti ilə Bakıya gəlişi dövlət sərhədinin bərpası üçün praktiki addımların atılması zərurəti yaranacağı təqdirdə üçüncü tərəflərin mümkün müdaxilə riskinə qarşı çəkindirici mesaj xarakteri də daşıyır: üçüncü tərəf kimi daha çox İran aktivlik nümayiş etdirir, o cümlədən, Fransanın da Ermənistana hərbi dəstək verməsi gözləntiləri var!
Asif Nərimanlı
Teref.az
Azərbaycanın müdafiə nazirinin bir gündə baş tutan təmasları haqda ancaq versiyalar irəli sürmək olar...
Oktyabrın 3-də İsrailin müdafiə naziri Benyamin Qansın rəhbərlik etdiyi nümayəndə heyəti Bakıya gəlib. Nümayəndə heyəti Prezident İlham Əliyevlə görüşüb. Sonra Benyamin Qansın Müdafiə Nazirliyində rəsmi qarşılanma mərasimi keçirilib.
General-polkovnik Z.Həsənov qonaqları salamladıqdan sonra hər iki ölkə arasında tərəfdaşlığın yüksək səviyyədə olmasının təkcə dövlətlərimizin inkişafında deyil, həm də bütün regionda təhlükəsizliyin təmin edilməsində mühüm rol oynadığını qeyd edib.
B.Qans hərbi əməkdaşlığın daha da inkişaf etdirilməsinin vacibliyini qeyd edərək bu cür görüşlərin keçirilməsinin əhəmiyyətini vurğulayıb. Görüşdə Azərbaycanla İsrail arasında hərbi, hərbi-texniki sahələrdə əməkdaşlığın inkişaf perspektivləri, müxtəlif ixtisaslı hərbi mütəxəssislər səviyyəsində işçi görüşlərin təşkili, eləcə də qarşılıqlı maraq doğuran digər məsələlər müzakirə olunub.
Maraqlıdır ki, elə həmin gün müdafiə naziri general-polkovnik Zakir Həsənovla İran İslam Respublikasının Silahlı Qüvvələrinin Baş Qərargah rəisi general-leytenant Məhəmməd Hüseyn Baqeri arasında telefon danışığı olub. Tərəflər arasında ikitərəfli hərbi əməkdaşlıq, eləcə də qarşılıqlı maraq doğuran digər məsələlər müzakirə edilib. Bir gündə baş tutan bu görüş və telefon zəngi diqqət çəkir. İsrail və İranın münasibətlərini nəzərə aldıqda isə bu təmaslara diqqət daha da artır.
Qeyd edək ki, İsraillə Azərbaycan arasında hərbi əməkdaşlıq yüksək səviyyədədir. İranın da bu əməkdaşlığa yumşaq desək, qısqanc münasibəti də bəllidir. Bu səbəbdən Azərbaycanın müdafiə nazirinin bu təmasları haqda ancaq versiyalar irəli sürmək olar. O da mümkündür ki, Baqeri ilə telefon zəngi sırf təsadüfdən, bəri başdan razılaşdırıldığı üçün eyni günə təsadüf edib. Bəlkə də Bakı iki dövlət arasında hansısa təmaslarda vasitəçilik edir və sairə...
Xatırladaq ki, İran İslam Respublikasının Silahlı Qüvvələrinin Baş Qərargah rəisi, general-leytenant Məhəmməd Hüseyn Baqeri (Təbrizli və Azərbaycan kökənli) hərbi paradda birbaşa ad çəkərək Azərbaycanı təhdid edən cümlələr qurub.
“Atlas” Araşdırmalar Mərkəzinin rəhbəri Elxan Şahinoğlu hər iki dövlətlə əməkdaşlıqda Bakının maraqlı olduğunu qeyd etdi: “Eyni gündə bir-birinə düşmən olan iki dövlətin - İsrailin və İranın müdafiə sistemlərinə başçılıq edən şəxslərin Bakı ilə təmaslarını təsadüfü saymaq olarmı? İsrail Azərbaycan-İran əməkdaşlığından narahat deyil, bunu Azərbaycanın daxili işi sayır və qarışmır. İran isə əksinə, Azərbaycan-İsrail hərbi əməkdaşlığından aşkar narahatdır, bunu müxtəlif səviyyələrdə səsləndirməkdən çəkinmir, üstəgəl, Hüseyn Baqeri bir müddət əvvəl Azərbaycanla bağlı təhdid mahiyyətli açıqlama verib. Rəsmi Bakı İsraillə hərbi-texniki əməkdaşlığı bundan sonra da davam etdirməkdə və genişləndirməkdə maraqlıdır. Azərbaycan Ordusunun gücləndirilməsi və döyüş qabiliyyətinin artırılması əsas vəzifədir. Azərbaycan-İsrail hərbi əməkdaşlığı İrana qarşı yönəlməyib. Azərbaycan öz ordusunu ən müasir hərbi texnika ilə təchiz edir. Azərbaycanın aldığı silahlar yalnız Qarabağda və Ermənistanla təmas xəttində istifadə edilir. Buna baxmayaraq, Tehran Azərbaycan-İsrail hərbi əməkdaşlığını İran üçün təhlükə kimi qiymətləndirir. İran İslam Keşikçiləri Korpusuna yaxın saytlardan biri hətta belə bir xəbər yaymışdı ki, guya Azərbaycan Türkiyə və İsraillə əməkdaşlıq çərçivəsində İran ərazisinə silah keçirir. Əlbəttə, İsrailin İrana qarşı münasibəti məlumdur və İranda nüvə mərkəzlərində çalışan bir neçə alimin öldürülməsində İsrail kəşfiyyatının adı çəkilir. Ancaq nə Azərbaycan, nə də Türkiyə İranın daxili işlərinə qarışmırlar və Qərb dövlətləri, o cümlədən İsrailin İrana qarşı planlarında iştirak etmirlər. Bu barədə dəfələrlə açıqlamalar verilib. Ancaq Tehranın siyasi dairələrində fərqli düşünürlər. Zakir Həsənov Məhəmməd Hüseyn Baqeri ilə telefon söhbətində rəsmi Bakının arqumentlərini bir daha onun diqqətinə çatdırsa da, Tehranın şübhələrinin azalacağını söyləmək çətindir. Ancaq bu şübhələr Azərbaycan-İsrail hərbi əməkdaşlığın miqyasına mənfi təsir etməyəcək. İsrailin müdafiə naziri Bakıda prezident səviyyəsində qəbul olunubsa, deməli, Azərbaycan Prezidenti İlham Əliyev iki ölkə arasında hərbi əməkdaşlığın genişlənməsində maraqlıdır. Azərbaycan bundan sonra İsraildən müasir silahlar alacaq”.
AMİP Mərkəzi Şurasının sədri, politoloq Rəşad Bayramov İran faktoruna xüsusi diqqət ayırdı: “Azərbaycan və İsrail arasında hərbi əməkdaşlıq yeni bir şey deyil. Bu əməkdaşlığın tarixi iki ölkə arasında digər sahələrdə də olduğu kimi uzun illərə dayanır və hər keçən gün daha da inkişaf edir. Azərbaycan uzun illərdir ki, İsrail istehsalı olan silah sistemləri üçün etibarlı müştəridir. Statistikaya baxsaq görərik ki, 2011-2020-ci illərdə Azərbaycanın əsas silah idxalının 27 faizi İsrailin payına düşüb. 2016-2020-ci illərdə isə silah idxalının 69 faizi İsrailin payına düşüb ki, bu da həmin dövr üçün İsrailin ümumi silah ixracının 17 faizini təşkil edir. Hazırda Azərbaycanın istifadə etdiyi sistemlər arasında 2020-ci ildə Qarabağ savaşı zamanı kifayət qədər uğur qazanmış İsrailin kamikadze tipli "Harop" PUA-ları da var. 2018-ci ildə Azərbaycan İsraildən həm də kamikadze tipli “SkyStriker” PUA-ları da əldə edib. Və nəhayət, İsrailin Azərbaycandan başqa demək olar ki, heç bir ölkəyə satmadığı “Israel Aircraft Industries” şirkəti tərəfindən hazırlanan LORA uzun mənzilli “yer-yer” tipli operativ taktiki raketlər də Azərbaycan Ordusunun arsenalında olduqca layiqli yer tutur. Ümumiyyətlə isə qeyd edim ki, İsrailin arsenalında olan hava hücumundan müdafiə vasitələri, operativ taktiki raket kompleksləri və s. Azərbaycan üçün əlçatandır və Azərbaycan da bu imkanlardan istifadə edərək öz hərbi arsenalını dünyanın ən qabaqcıl silah texnologiyaları ilə zənginləşdirir.
İrana gəldikdə isə təəssüflə qeyd etmək lazımdır ki, keçən otuz il ərzində bizlər bu ölkədən İsrailin Azərbaycana verdiyi dəstəyin yüzdə biri qədər belə dəstək görmədik. Əksinə, hər fürsətdə Ermənistanı, ərazilərimizi işğal altında saxlayan, günahsız insanlarımızı qətlə yetirən, məscidlərimizi yerlə-yeksan edən ölkəni dəstəklədiyinə şahidlik etdik. Birinci Qarabağ savaşında Ermənistan ordusunun arsenalında İran istehsalı olan silah-sursatdan tutmuş, tibbi preparat və ərzağa qədər nə desən var idi və bunlar danılmaz həqiqətdir. Mən hələ Azərbaycanın raketlərə olan tələbatını qarşılamaq üçün İrandan “Şahab” raketlərini əldə etmək niyyətində olduğunu və bu məqsədlə rəsmi Tehrana olan müraciətə yox cavabı alındığını demirəm. İran indi də heç bir şəkildə Vətən müharibəsindəki qələbəmizi həzm edə bilmir və bunu açıq şəkildə dilə gətirməkdən də çəkinmir. Otuz il ərzində 132 kilometrlik İran-Azərbaycan sərhədinin düşmən tapdağında olduğuna bir dəfə də olsun etiraz etməyən İran indi hansısa sərhədlərin dəyişdirilməsinin yolverilməzliyindən danışır və ən yüksək səviyyədə təhdidlər yağdırır. Amma bütün bunlara baxmayaraq, Azərbaycan olaraq biz istənilən ölkə ilə ikitərəfli, bərabər səviyyəli münasibətlərə dayanan əməkdaşlıqda maraqlı olduğumuzu dəfələrlə bəyan etmişik. Bir neçə il əvvəl Azərbaycanla-İran arasında hərbi əlaqələr və hərbi-texniki əməkdaşlıq üzrə Birgə İşçi Qrupu yaradılması, bu ilin yanvarın sonlarında Azərbaycanın müdafiə naziri Zakir Həsənovun İrana səfəri də bunun bariz nümunəsidir.
Konkret dünənki hadisəyə, yəni İsrailin müdafiə naziri Benyamin Qansın rəhbərlik etdiyi nümayəndə heyətinin Bakıya səfərinə və elə həmin gün müdafiə naziri general-polkovnik Zakir Həsənovla Baqeri arasında telefon danışığına gəldikdə isə deməliyəm ki, burada qeyri-adi və təəccüblü bir şey yoxdur. Təəssüf ki, rəsmi məlumatlarda cənab Zakir Həsənovla Məhəmməd Baqeri arasında olan telefon danışığının kimin təşəbbüsü ilə baş tutduğu açıqlanmır. Amma istənilən halda, bu telefon danışığının İsrail müdafiə naziri ilə görüşdən sonraya təsadüf etməsi onu deməyə əsas verir ki, telefon danışığında İranın bu səfərdən narahat olmamasının gərəkliyi də müzakirə olunub. İsrail-Azərbaycan münasibətlərinin hər hansı bir üçüncü ölkəyə qarşı olmadığının dəfələrlə elan olunmasına baxmayaraq İran bu münasibətlərdən hər zaman narahat olub. Onu da qeyd edim ki, bu münasibətlərdən narahat olan iki dövlət varsa, onlardan biri İran, digəri isə Ermənistandır".
Cavanşir ABBASLI,
“Yeni Müsavat”
Oktyabrın 5-də səhər saatlarında Rusiya qüvvələri Kiyev vilayətindəki Bila Tserkva şəhərinə hücum edib.
Teleqraf.com xəbər verir ki, bu barədə vilayətin hərbi administrasiyasının rəhbəri Oleksiy Kuleba teleqramda yazıb.
İlkin məlumata görə, işğalçı qüvvələr hücumu İran istehsalı kamikadze dronları ilə həyata keçirib:
“Bila Tserkvada bir neçə partlayışla bağlı məlumat var. İlkin məlumatlara görə, şəhərə kamikadze pilotsuz uçuş aparatları hücum edib. Bu səbəbdən infrastruktur obyektlərində yanğınlar baş verir. Bir zərərçəkmiş var”.
Qeyd edək ki, Bila Tserkva şəhəri paytaxtdan 70 km cənubda yerləşir.
Ukrayna Prezidentinin xanımı Yelena Zelenskaya Türkiyəyə səfəri çərçivəsində “Azov” polkunun Rusiya əsirliyindən azad olunan komandirləri ilə görüşüb.
Bu barədə məlumatı Zelenskaya öz rəsmi tviter hesabında paylaşıb.
Onun sözlərinə görə, səfər çərçivəsində Ukrayna Prezidentinin Ofisinin rəhbəri Andrey Yermak sözügedən komandirlərlə ailələrinin görüşünü təşkil edib.
Görüşdə Yelena Zelenskaya da iştirak edib və ölkə Prezidenti Volodimir Zelenskinin salamlarını “Azov” döyüşçülərinə çatdırıb.
Xatırladaq ki, sentyabrın 21-i Rusiya və Ukrayna arasında əsir mübadiləsi həyata keçirilib. Bu zaman Ukrayna 200 ukraynalı döyüşçünü, elə də Ukrayna Silahlı Qüvvələrinin tərkibində döyüşən 10 əcnəbini əsirlikdən geri qaytarıb. “Azov” polkunun əsirlikdən azad edilən 5 komandiri müharibə bitənə qədər Türkiyə Prezidenti Rəcəb Tayyib Ərdoğanın şəxsi himayəsi altında saxlanılacaq.
ABŞ Ukraynaya 625 milyon dollar dəyərində əlavə hərbi yardım paketi elan edəcək.
Bu barədə CNN-ə adı açıqlanmayan ABŞ rəsmisi bildirib.
Qeyd olunub ki, yardım paketinə 4 HIMARS sistemi də daxil olacaq. Bununla da Ukraynanın istifadəsində olan HIMARS sistemlərinin sayı 20-yə çatacaq.
Birbaşa ABŞ ehtiyyatlarından ayırılacaq silah və sursatlara 16 ədəd 155 mm-lik haubitsa və 16 ədəd 105 mm-lik haubitsa da daxil olacaq.
Sonuncu yardım paketi ilə ABŞ-ın 24 fevraldan sonra Ukraynaya etdiyi ümumi yardımın həcmi 16,8 milyard dollara çatacaq.
Qeyd edək ki, ABŞ ötən həftə Ukraynaya 1,1 milyard dollar dəyərində növbəti yardım paketini bəyan edib. Bu paketdə 18 ədəd HIMARS sisteminin istehsalçılardan alınaraq Ukraynay göndərilməsi nəzərdə tutulub. Yeni HIMARS sistemlərin Ukraynaya bir qədər gec çatdırılacağı, lakin onun təhlükəsizliyinin orta və uzun müddətdə qorumasınaı təmin edəcəyi bildirilib.
Ukrayna Xersonda 50-dən çox yaşayış məntəqəsini azad edib.
Cebhe.info Ukrayna mətbuatına istinadən xəbər verir ki, bu barədə Ukrayna daxili işlər nazirinin müavini Yevgeni Yenin bildirib.
O, 100-dən çox müharibə cinayətinin sənədləşdirildiyini qeyd edib:
"Xerson rayonunda 50-dən çox yaşayış məntəqəsi azad edilib və 3500-dən çox vətəndaş Rusiya işğalından qurtulub. Milli Polis tərəfindən 105 müharibə cinayəti sənədləşdirilib və bu istiqamətdə işlər davam etdirilir".
Y. Yenin rayonda mobil buraxılış məntəqəsinin fəaliyyətə başladığını qeyd edib.
Rus ordusunda tam bardak müşahidə olunur. Səfərbər olunmuş rusiyalılar Ukraynadan qaçacaqlar. Salamat qalanlar Rusiya Federasiyasına qəzəbli, silahlı və insan sifətini itirmiş vəziyyətdə qayıdacaqlar.
Belə proqnozu Ukrayna Prezidenti Ofisinin müşaviri Aleksey Arestoviç Feyqin Live kanalında səsləndirib («UNİAN»).
«Nə vaxt ki, onlar (RF Müdafiə Nazirliyi) donquldanırlarsa, bu, onu göstərir ki, onların psixi vəziyyətinin səviyyəsi elədir ki, artıq özlərinə və öz davranışlarına tam nəzarət etmirlər» - o, bəyan edib.
Onun sözlərinə görə, RF ordusunun qərargahlarında panika hökm sürür. «Bax, idarəolunmaz sürü, harada ki, əclaflar qərargahdadırlar, orada onlar bir-birini «baqaja qoyurlar», əyyaşlıq edirlər və Putinə danışırlar ki, kim daha çox günahkardır… indi səfərbər olunanlara rəhbərlik edəcəklər, harada ki, tam bardakdır, əyyaşlıqdır. Bir qədərdən sonra fəlakət açıq görsənəcək… Nə vaxt ki, bu sürü fiziki olaraq, hər şeyi tullayıb da Ukraynadan qaçacaq… bax, onda kef olacaq… Kim, salamat qalacaqsa, Rusiyaya ac, qəzəbli, qismən silahlı, sərxoş, insan simasını itirmiş vəziyyətdə qayıdacaq… təsəvvür edin» - Arestoviç proqnoz edib.
Rusiyanın “Belqorod” nüvə sualtı qayığı bazadan yoxa çıxıb.
Amerika kəşfiyyatının məlumatına görə, bu, yeni supergüclü “Poseydon” torpedosunun sınaqdan keçirilməsi ilə bağlıdır. Qayığın Arktikaya yola düşdüyü ehtimal olunur. Həmçinin bildirilir ki, sınaqlar torpedonun su altında 10 000 kilometr məsafə qət etmə gücünün yoxlanması məqsədi daşıya bilər. Bu torpedo bəzən “apokalipsisin cəngavəri” də adlandırılır. Bu barədə NATO kəşfiyyatı məlumat verib.
Bildirilir ki, nüvə enerjisi ilə işləyən sualtı qayıq nüvə başlıqlı “Poseydon” torpedosu ilə təchiz edilib. Bu da böyük ərazidə həyatı məhv etmək qabiliyyətinə malik radioaktiv sunami yaratmaq gücünə malikdir. Eyni zamanda Nyu-York və ya Los-Anceles kimi şəhərləri məhv etməyə qadirdir. “Belqorod” sualtı qayığının göyərtəsində səkkizə qədər belə raket var.
NATO rəhbərliyi müttəfiqlərinə nüvə sualtı qayığının səfərbər olunması ilə bağlı xəbərdarlıq göndərib.
Hərbi ekspertlərin fikrincə, bu silah NATO müttəfiqlərini Alyans ölkələrinin Hərbi Dəniz Qüvvələrinin planlaşdırılması konsepsiyasını yenidən nəzərdən keçirməyə vadar edəcək.
“Bu, tamamilə yeni silah kateqoriyasıdır. Yeni silah Qərbin Hərbi Dəniz Qüvvələri əməliyyatlarının planlaşdırılması ilə bağlı dəyişikliklər etməsinə səbəb olacaq. Bu da yeni tələblərin və əks-hərəkət vasitələrinin yaradılmasına gətirib çıxaracaq”, – deyə amerikalı hərbi ekspert H.İ.Satton qeyd edib.