Pirallahı Rayon İcra Hakimiyyətinin başçısı Vasif İmanovun rayon sakini, şəhid Vəfalı Suvarovun ailəsinə məxsus obyekti sökdüyü, əvəzində başqa obyekt verəcəyini vəd etsə də, 11 ildən artıqdır şəhid ailəsini aldatdığı ilə bağlı xəbər vermişdik.
Bu barədə “Bakupost” TV-yə danışan şəhidin qızı Vüsalə Suvarova icra başçısını bir sıra qanunsuz əməllərdə ittiham etmiş, atasının şəhidlik pulu ilə tikdikləri obyektin onun tərəfindən sökdürülməsindən bəhs etmişdi.

V. Suvarovanın sözlərinə görə, atası Vəfalı Suvarov müharibəyə getməzdən öncə onlara yaşadıqları binanın qarşısında torpaq sahəsi verilib:
“Atam şəhid olduğu üçün uzun müddət həmin ərazidə heç bir iş görə bilmədik. 2011-ci ildə isə atamın şəhidlik pulu (qan pulu) ilə orada obyekt tikdik və saç ustası kimi fəaliyyət göstərməyə başladım. 2013-cü ildə Vasif İmanov Pirallahı rayonuna icra başçısı təyin ediləndən sonra bizimlə görüşdü. Dedi ki, sizin obyektinizi sökməliyəm, yerində uşaq meydançası salınacaq. O, bunun qarşılığında bizə başqa yerdə obyekt verəcəyini vəd etdi”.
Amma icra başçısı vədinə əməl etməyib. Nə sökülən tikilinin əvəzinə nəsə verilib, nə də həmin sahədə uşaq meydançası tikilib:
“Düz 11 ildir icra başçısı bizi süründürür, hörmətsizlik edir, aşağılayır. Mənim atam bizi dövlətə etibar edib, gedib şəhid olub. İcra başçısı isə dəstək olmaq əvəzinə əmlakımızı əlimizdən alır, yeganə çörək yerimizi qapadır. Pirallahıda nə pir var, nə Allah, yalnız başçının zülmü var”.
Maraqlısı həm də odur ki, uşaq meydançası yaratmaq adı ilə söküntü aparılan ərazinin yaxınlığında sonradan müxtəlif obyektlər tikilib və mağaza kimi müxtəlif şəxslərə satılıb və ya icarəyə verilib.
Vüsalə Suvarovanın müsahibəsi və bir sıra dövlət orqanlarına davamlı şikayətlərindən sonra icra başçısı 11 il əvvəl söküntü apardığı ərazidə gecə ikən, cəmi 3-4 saat ərzində obyekt tikdirib. Şikayətçi bununla bağlı görüntüləri saytımıza təqdim edib. Görüntülərdən aydın olur ki, polis əraziyə gəlib, müdaxilə etsə də, sonradan fəhlələr öz işlərinə davam ediblər. Gecə ikən cəmi 3 saata balaca bir obyekt tikərək məsələni ört-basdır etmək istəyiblər.

V.Suvarovanın dediyinə görə, yeni tikilən obyekt ona məxsus obyektdən iki dəfə balacadır.
Bütün bunlar azmış kimi, şəhid qızının sözlərinə görə, icra hakimiyyəti rəhbərliyinin öyrətdiyi şəxslər sosial şəbəkədə videomüsahibəsinə şərhlər yazaraq, onu təhqir ediblər.
V. Suvarova və anası Cəmilə Suvarova bununla bağlı Prezident İlham Əliyevə və rəsmi qurumlara müraciət edərək kömək istəyib.

V.Suvarova deyir ki, 11 il ərzində icra hakimiyyəti tərəfindən onlara heç bir kompensasiya ödənilməyib, laqeyid münasibət göstərilib.

Pirallahı RİH-dən məsələ ilə bağlı Bakupost.az verilən rəsmi açıqlamada isə deyilir:
“Bildiririk ki, müraciəti əsasında Vüsalə Suvarovanın anası Suvarova Cəmilə Cəlil qızına bələdiyyə tərəfindən Pirallahı qəsəbəsində 1000 kv.m torpaq sahəsi verilib və humanizm prinsipi əsas götürülərək orada 3 ədəd fərdi yaşayış evinin tikintisinə şərait yaradılıb. Həmçinin anası, şəhid ailəsi kimi mənzil növbəsinə alınıb.
Vətəndaşlar müxtəlif müraciətləri (istəkləri) ilə bağlı rayon İcra Hakimiyyətinin başçısı və Aparatın məsul əməkdaşları tərəfindən müntəzəm qəbul edilib və dinləniliblər. Onlara daim diqqət və qayğı göstərilməkdədir. Daşınmaz əmlakla bağlı vətəndaşlar yaşadıqları binanin önündə onlara məxsus olmuş, fəaliyyət göstərməmiş, kommunal (qaz, su, işıq) təchizatı və heç bir sənədi olmayan obyektin söküldüyünü bildirərək, bərpasında köməklik göstərilməsini istəyiblər. Bununla bağlı hər hansı sənəd təqdim edilməyib. Həmçinin RİH tərəfindən iddia olunan tikinti sahəsi ilə bağlı hər hansı göstəriş, qərar verilməyib və fəaliyyət göstərən heç bir tikinti sökülməyib. Rayon ərazisində abadlıq-quruculuq işləri isə MKTB tərəfindən həyata keçirilir.
Bununla belə humanizm prinsipi əsas götürülərək, bu kateqoriya şəxslərlə bağlı görülən işlərin davamı kimi Pirallahı qəsəbəsində müxtəlif şəxslərə məxsus olan və fəaliyyət göstərən sahəsi 35, 37, 35 və 35 kv.m olan 4 müxtəlif obyektlər təklif edilib. Vüsalə Suvarova ilk öncə onlardan birinin adına alınmasına razılıq versə də, sonradan digər iddialarda olub. Bu səbəbdən də, söküldüyünü iddia etdikləri onlara məxsus obyekt aidiyyəti üzrə bildirdikləri yerdə müasir şəkildə bərpa edilib. Lakin Vüsalə Suvarova sonradan qeyri-müəyyən səbəbdən söküldüyünü iddia etdiyi və istəyi ilə yerində bərpa olunan yeri qəbul etməkdən imtina etsə də, özlərinin əvvəlki istək və müraciətlərinə əsasən də, sözügedən yer onlara məxsusdur”.
Qeyd edək ki, V.Suvarovanın atası Suvarov Vəfalı Gülhəsən oğlu 1994-cü ildə Ağdamın Güllücə kəndinə şəhid olub.

Azərbaycan ürək-damar xəstəliklərindən ölüm hallarına görə dünyada ikinci yerdədir. “World Statistics” resursunun hesabatında belə deyilir. Dərc olunan cədvəldən görünür ki, ölkəmiz hər 100 min nəfərə 388 ölüm faktı ilə yalnız Tacikistandan geri qalır. O da cəmi bir ölüm faktı fərqi ilə. Tacikistanda bu göstərici 389-dur.
Həkimlərin rəyinə görə, infarkt səbəbləri keyfiyyətsiz qidalar, yağlar, əsəb-stress, passiv həyat tərzi və başqa amillərdir. Təbii ki, əlavə faktorlar da sadalamaq olar. Lakin daha çox narahat edən məsələ qidalarımızın təhlükəsizliyi və keyfiyyətidir. Həkimlərin fikrincə, hazırda yediyimiz yağlar ürək-damar yollarının tutulmasına, tromba gətirib çıxarır. Çünki təmiz yağlar olmadığı üçün öz işini getdikcə görür və nəticədə infarkt baş verir. Bazarlarda isə müxtəlif adda, çeşiddə yağ məhsulları görmək olar. Anaxeber.info yazır ki, onlar ölkəyə necə idxal olunur, tərkibi yoxlanılırmı, təhlükəsizliyi hansı səviyyədədir, məlum deyil. Ona görə ki, Azərbaycan Qida Təhlükəsizliyi Agentliyi xalqa yağ yerinə zəhər yedirir. Hazırda marketlərdə yağ satılan bölümə baxın, Rusiya, Yeni Zellandiya istehsalı adı ilə keyfiyyətsiz, ürək-damar yollarının tutulmasında "müstəsna" əməyi olan yağ məhsulları görmək olar. Onların qiymətinə baxanda məlum olur ki, əslində yağ yox, infarkt olmaq üçün əsl vasitədir. Hətta kilosu 17-18 manata satılan yağlar da Yeni Zellandiyadan idxal edilmiş təmiz kərə yağları deyil. Bunu dəfələrlə mütəxəssislər açıqlayıblar. Amma AQTA bu qorxunc vəziyyətlə bağlı heç bir iş görmür. Əksinə, qurum öz maraqları qarşılığında gömrükdən hər növ yağın idxalına göz yumur. Bu da bizi dünya reytinqində infarkta görə liderlər sırasına çıxarır. Maraqlıdır, AQTA sədri Qoşqar Təhməzli özü hansı yağdan istifadə edir? Görəsən, bu statistika onu narahat edibmi?
Hazırda satışda kərə yağı, eləcə də günəbaxan yağları adı ilə təklif olunan məhsulların əksəriyyətinin əslində markası ilə heç bir əlaqəsi yoxdur. Bu yağların bir qismi naməlum heyvanların iç yağı, piylər və bitkilərdən, digər qismi isə mənşəyi bilinməyən kimyəvi materiallardan hazırlanır. Əsl yağ təəssüratı yaratsın deyə günəbaxan və kərə dadı qoxusu verilir. Bu cür trans yağlar Dövlət Gömrük Komitəsindən keçirilir, Dövlət Qida Agentliyinin (AQTA) laboratoriyalarında yoxlanılmır, nəticədə asanlıqla bazarlarda ayaq açır. Bu yağların adının açıqlanması ilə bağlı dəfələrlə AQTA-ya sorğu ünvanlansa da, müraciətimiz cavabsız qalıb. Bu isə onu deməyə əsas verir ki, hazırda ölkəmizdə istehsalçı hüquqları istehlakçı hüquqlarından üstün tutulur.
Qida təhlükəsizliyin təmin edilməsinin bir yolu da təhlükəli qidalara istehsal edən firmaların adının açıqlanmasıdır. AQTA bunu da etmir. Bu, bizə ittiham etməyə əsas verir ki, AQTA təhlükəli qidalara istehsal edən sexlərdən, müəssisələrdən haqq yığırlar, sonra da əhaliyə bəyan edirlər ki, təhlükəli qidalar var, özünüzü gözləyin. İstehlakçı özünü hansı üsulla qorumalıdır? Qurum bu yolları da göstərmir.
Xatırladaq ki, AQTA sədri Qoşqar Təhməzli satışa çıxarılan keyfiyyətsiz yağların tərkibində insan orqanizmi üçün təhlükəli maddələrin aşkar olunduğunu demişdi. O, Azərbaycanda 12 adda yağın tərkibində trans yağların miqdarının normadan yuxarı olduğunu açıqlayaraq, Bakı, Sumqayıt, Gəncə, Mingəçevir, Şamaxı, Lənkəran, Xaçmaz, Şəki, Tovuz Regional bölmələrində 32 adda müxtəlif yağın ekspertizaya cəlb olunduğunu demişdi. Amma adlarını açıqlanmamışdı. Qoşqar Təhməzlinin nə marağı var ki, siyahını yaymadı?
Deməli, mənfəət, sövdələşmə əhalinin infarkt olmasından daha vacibdir. Odur ki, adı qida təhlükəsizliyi ilə bağlı olan agentliyə bu məsələdə güvənmək, qida təhlükəsizliyimizi etibar etmək olmaz.
Ümumiyyətlə, həmin yağların ürək-damar xəstəlikləri, infarkta yol açması ilə məhdudlaşmaq olmaz. AQTA sədri bilir ki, həm də bu məhsullar onkoloji xəstəliklərə xidmət edir. Bu sırada palma yağları xüsusi rol oynayır. Bir sözlə, AQTA ölkədə qida təhlükəsizliyinə və keyfiyyətə nəzarətdə sıfır səviyyədədir. Ümid Allaha qalıb, gərək özümüzü necəsə qoruyaq. Çünki bu qurumun və sədrinin başı biznesə qarışıb...


Anaxeber.info

Xəbər verildiyi kimi, Səhiyyə Nazirliyinin Ç.Abdullayev adına Elmi-Tədqiqat Kardiologiya İnstitutunun baş həkimi Rza Səmədov 10 gün əvvəl vəzifəsindən uzaqlaşdırılıb.

AzToday.az-ın əldə etdiyi məlumata görə, Səhiyyə naziri Teymur Musayev baş həkimi yaş senzi səbəbindən işdən uzaqlaşdırıb. Amma Elmi-Tədqiqat Kardiologiya İnstitunun baş həkimin səlahiyyətlərinin icraçısı kimi təyin olunan Azad Hacıyevin də yaş problemi var. Bu baxımdan demək olar ki, A.Hacıyev bu vəzifəni müvəqqəti icra edəcək.

Mediada yayılan məlumatlara görə, sabiq baş həkim Rza Səmədov İnstitutun direktoru Gülnaz Dadaşovanın yaxın adamı kimi tanınırdı. Onun vəzifəsindən uzaqlaşdırılmasının direktorun ciddi narahatlığına səbəb olub. Məhz buna görə G.Dadaşova hazırda İnstitutda “səliqə-səhman” yaratmağa başlayıb. Belə ki, onun özünü sığortalamaq üçün İstitutda aylardır xadimə ştatında olan, lakin tibb bacısı kimi fəaliyyət göstərən Failə Mahmudovanı işdən uzaqlaşdırdığı deyilir.

Azad Hacıyevin fəaliyyətindən də Kardiologiya İnstitutnun əməkdaşları ciddi narazıdır. Onu institutun direktoru Gülnaz Dadaşovanın qanunsuz əmrlərini belə sorğu-sualsız yerinə yetirən şəxs kimi xarakterizə edirlər.

Bir qədər əvvəl Səhiyyə Nazirliyinin institutda apardığı yoxlamalar zamanı ciddi nöqsanlar üzə çıxarılıb və buna görə direktora sərt xəbərdarlıq da edilib. Amma Gülnaz Dadaşova fəaliyyətində heç bir dəyişiklik etməyib. Yenə eyni qaydada institutu idarə etməkdədir. Belə ki, işçilərin məzuniyyət hüquqları kobud şəkildə pozulur. İşçilər istədiyi vaxt yox, məhz direktorun istəyi əsasında məzuniyyətə çıxa bilir. Həmçinin, işçilər 21 günlük məzuniyyət hüququnu birdəfəlik istifadə etmək məcburiyyətində qalıblar. Direktorun xoşuna gəlməyə işçilərin bəziləri məzuniyyətə göndərilməmiş işdən uzaqlaşdırılır. Ümumiyyətlə Gülnaz Dadaşovanın işçilərinin əmək hüquqlarını pozması ilə bağlı mediada çoxsaylı faktlar işıqlandırılıb. Hətta bir-neçə dəfə məhkəmələrdə iddialar qaldırılıb.

Məlumatlı mənbə Səhiyyə Nazirliyinin xəbərdarlıqlarına baxmayaraq, İnstitutun direktoru G.Dadaşovanın işçilərə qarşı əsassız cəza tədbirlərini davam etditdiyini də bildirib:

“O yenə də kollektivlə hesablaşmır, institutda intriqalar yaradır, öz qanunsuz tələblərinə etira edən işçiləri müxtəlif üsullarla işdən uzaqlaşdırmağa davam edir. Heç bir qanuna tabe olmaq istəməyən direktor işçilər arasında ayrı-seçkiliyə yol verir”.

İnstitutun kollektivi G.Dadaşovanın “sağ əli olan” direktor müavini vəzifəsinfə işləyən Azər Mirzəxanlının fəaliyyətindən də narazıdır:

“Cəlilabad rayon ƏƏSMM-nin direktoru işlədiyi vaxtlarda onun adı dəfələrlə korrupsiya işlərində hallanıb. Bu barədə mətbuatda kifayət qədər yazılar gedib. Azər Mirzəxanlı həkimlərə qarşı əsassız, sərt və alçaldıcı tədbirlər həyata keçirir. O, 5 kvadrat metrlik kabinetdə dəyirmi stol yerləşdirərək, 5-6 həkimi bir yerdə oturmağa məcbur edir. Darısqallıq ucbatından hansısa həkim kabineti tərk etmək istədikdə digər həkimlər məcburiyyət ayağa durub hər dəfə ona yol vermək məcburiyyətində qalırlar. Respublikanın hörmətli və təcrübəli kardioloqlarını bu şəraitdə işləməyə məcbur edən direktor müavini Azər Mirzəxanlı özü isə 3-cü mərtəbədə yeganə ventilyasiya mənbəyi olan, işıq verən pəncərələri bağlatdıraraq, özünə dəbdəbəli içərisində hamam-tualeti olan kabinet tikdirir”.

İnstitut əməkdaşları bununla belə tezliklə Gülnaz Dadaşovanın işdən uzaqlaşdırılacağına ümid edir. Onların ümidinə səbəb isə institutda yeni İnvaziv Kardiologiya şöbəsinin yaradılacağı ilə bağlı xəbərlərdir. Ürək xəstəliklərinin müalicəsində hazırda ən vacib sayılan sahələrdən biri olan İnvaziv Kardiologiya ilə bağlı institutda mütəxəssisin olmaması səbəbindən yeni təyin olunacaq rəhbərliyin bu sahədə professional olması şərtdir. Bu səbəbdən institut kollektivi Gülnaz Dadaşovanın tezliklə işdən uzaqlaşdırılacağını gözləyir. Çünki Səhiyyə Nazirliyinin rəhbər şəxsləri belə artıq direktorla bağlı edilən şikayətlərdən bezdiyini dilə gətirirlər…

Ç.Abdullayev adına Elmi-Tədqiqat Kardiologiya İnstitutunun əməkdaşlarının səsləndirdiyi ittihamlarla bağlı qarşı tərəfin də mövqeyini işıqlandırmağa hazırıq.

Orxan Məmmədli

AzToday.az

Bir müddət idi ki,qalmaqallı iş adamı Müqayis Verdiyevdən əsər əlamət yox idi. Son günlər xəbər portallarından yenidən "əldəqayırma" iş adamının səsi gəlməyə başlayıb. Dələduzlara xas olan təcrübəsinə əsaslanaraq münasib zaman seçib Müqayis....

Ölkədə korrupsioner və rüşvətxor məmurlara qarşı ciddi mübarizə başlayıb. İcra başçıları daxil olmaqla nazirlərə qədər dövlət vəsaitlərini mənimsəyənlər, rüşvətə qurşananlar qorxu içindədirlər. Vətəndaşlar sevinirlər baş verənləri müşahidə edərək...

Yaranmış situasiyadan bəhrələnmək üçün, Müqayis Verdiyev kimi dələduzlar da növbəyə dayanıblar. Xüsusilə, icra başçıları ilə həmişə konfliktdə olan Müqayis Verdiyev həbs olunan icra başçılarına qarşı yeni cəbhə açıb.

Həbs olunmamışdan öncə sabiq başçılarla pul problemlərini həll edə bilmədiyi üçün onların həbsindən sonra varlanmaq eşqinə düşüb Müqayis...

Keçmiş palanları açıb tökməklə nələrsə əldə etməyə cəhd edən iş adamı əslində, danışdıqca batdığının fərqində deyil. Söhbət nəinki yüz minlərdən hətta, milyonlardan gedir. Oxucularımıza məlumat üçün bildirək ki M.Verdiyev tikinti biznesi ilə məşğul olub.

O, cinayət məcəlləsinin müxtəlif maddələri ilə dəfələrlə həbsdə olub. Həbslərin motivi isə demək olar ki eynidir, mənimsə və dələduzluq. Maraqlıdır, müxtəlif rayonların icra başçılarının, həyata keçirdiyi təmir tikinti işlərinə görə ona borclu olduqlarını israrla qeyd edən iş adamları nədənsə həbsdən çıxandan sonra yenidən növbəti rayonun icra başçısı ilə sövdələşməyə gedərək yeni layihələrə imza atır.

Diqqət çəkən məqamlardan biridə ondan ibarətdir ki, ''təcrübəli iş adamı'' dəyəri milyonlarla ölçülən işləri ortada heç bir hüquqi sənəd olmadan həyata keçirir. İş təhvil veriləndən sonra isə, borc qalmaqalları üzə çıxır. Məlum olub ki M.Verdiyev pulları hissə-hissə alaraq mənimsəyib.

Tikinti işlərinə cəlb olunan fəhlələr və ustalar o cümlədən, tikintini materiallarla təmin edən sahibkarlar onlara çatacaq pulları tələb edərkən M.Verdiyev yaxasını kənara çəkərək həmin rayonların icra başçılarını hədəfə gətirir. Şübhə yoxdur ki icra başçıları ilə M.Verdiyev arasında müəyyən sövdələşmələr olub.

Azərbaycan reallığında hansısa icra başçısının iş adamından müəyyən məbləğdə pullar tələb etməsi başa düşüləndir. Amma M.Verdiyevin iddia etdiyi kimi böyük məbləğlərin ödənilməməsi real görünmür. Görünən odur ki, hər rayonda müəyyən işlər görən M.Verdiyev işlərini başa çatdırdıqdan sonra bir müddət həbsxanaya gedərək ''dincəlir'' və bununla da fəhlələrə və sahibkarlara olan borclarının üstündən xətt çəkir.

Bunun adı təcrübədə klassik dələduzluqdur. Adı dəfələrlə belə qalmaqallarda hallanan M.Verdiyevi artıq hamı tanımağa başlayıb və ağlı başında olan heç kim onunla iş birliyinə getmək istəmir. Bu o deməkdir ki, adı dəfələrlə dələduzluqda və mənimsəmələrdə hallanan M.Verdiyevin gəlir götürdüyü mənbələr məhdudlaşmaqdadır.

Ona görə də pulsuz qalmağa öyrəşməyən dələduz növbəti planlar üzərində işləməyə başlayır. Ona elə gəlir ki həbs olunan icra başçılarının yalandan üzünə durmaqla və onlara şər atmaqla hansısa formada müxtəlif mənbələrdən gəlirlər əldə edəcək. Və yaxud, hələdə vəzifə başında olan icra başçılarına hədə-qorxu gələrək, onları təhdid edərək pul vəsaitləri qoparacaq.

İnternet üzərindən apardığımız araşdırmalar zamanı M.Verdiyevin haqqında kifayət qədər qalmaqallara rast gəlmək mümkündür. Bu barədə materiallar kifayət qədər olduğu üçün bu yazımızda onlara toxunmaq istəmədik. Şübhə etmirik ki, bu materialları araşdırmağa başlasaq M.Verdiyevlə bərabər bir çox icra hakimiyyətlərinin vəzifəli şəxslərinə qədər uzanan geniş bir şəbəkəni ifşa edə bilərik.

İstisna edilmir ki, M.Verdiyev icra hakimiyyətlərində kök salmış özü kimi dələduzlarla əlbir olaraq son günlər yeni planlar üzərində işləyir. Bu planın tərkib hissəsi kimi üzü üzlər görmüş M.Verdiyev ölkə mətbuatında çalışan bəzi tanışlarının xidmətlərindən yararlanmağa başlayıb.

Maraqlıdır ki, “iş adamı” Müqayis Verdiyev öz haqlarını və hüquqlarını hüquq-mühafizə orqanlarında yox, sayt və qəzet redaksiyalarının qapılarında axtarır. Görünən odur ki, Müqayis “pozulmuş və tapdalanmış hüquqlarını” məmurları şantaj etməklə bərpa etməyə çalışır.

Bunun nə ilə bitəcəyini proqnozlaşdırmaq o qədər də çətin deyil. Həmişə olduğu kimi bu dəfədə M.Verdiyev yolunu həbsxanalara salmalı olacaq. Əvvəlki ''poxotkalarından'' fərqli olaraq növbəti qurbanı tapa bilmədiyi üçün türməyə əliboş girib, əliboş çıxacaq.

İstisna olunmur ki, bu dəfə ona cinayət məcəlləsinin fərqli maddələri tətbiq olunsun. Son günlər ölkədə aparılan islahatlar və özünü iş adamı hesab edən bir çoxlarının əsl simasını ortaya çıxardı. Məşhur atalar sözündə deyildiyi kimi ''Qozbeli qəbir düzəldər''.

Azerbaycanrealligi.com