Nərimanov rayon Mənzil-Kommunal Təsərrüfat Birliyinin adı çəkilən rayonun icra başçısı olmaq üçün bütün yollara əl atır.
YAP Pirallahı rayon Təşkilatının sabiq sədri, hazırda Nərimanov Rayon Mənzil Kommunal Təsərrüfat Birliyinin rəisi vəzifəsini tutan Manaf Manafovla bağlı məlumat var.
Manaf Manafovla Nərimanov icra başçısı Elgin Həbibullayev arasında gizlin savaş başlayıb. Hər iksi Bakı meri Eldar Əzizovun kadrı olmasına baxmayaraq, Manaf Manafovun icra başçısına qarşı savaşının arxasında onun yerinə göz dikməsi ilə bağlı olduğu deyilir.
"Azərbaycan Reallığı"na daxil olan məlumatda iddia edilir ki, son günlər Nərimanov icra başçısı Elgin Həbibullayev haqqında bəzi media resurslarında dərc edilən neqativ yazılaırn sifarişçisi Manaf Manafovdur.
Nərimanov Rayon Mənzil Kommunal Təsərrüfat Birliyinin rəisi Elgin Həbibullayevi hədəfə gətirməklə onu iqtidarın yuxarı dairələrinin gözündən salmaq niyyəti güdür. Mənbəmiz qeyd edir ki, Elgin Həbibullayevdə Manaf Manafovun bu niyyətindən xəbər tutduğu üçün onun üzrəində nəzarəti gücləndirib.
Belə ki, Nərimanov icra başçısı davamlı olaraq rayon ərazisini gəzərək Mənzil Kommunal Təsərrüfat Birliyinin işlərini yoxlayır.
Qeyd edək ki, Nərimanov rayonun bir çox yerlərində zibillik ərazilər mövcuddur. Məhz təmiz olmayan yerləri bəhanə edən Elgin Həbibullayev haqlı olaraq Manaf Manafovun üzərinə gedərək onu sıxışdırır.
Mənbəmiz qeyd edir ki, Manaf Manafov Eldar Əzizovun ona söz verdiyi vədin yerinə yetirilmədiyi üçün iqtidardakı başqa şəxslərlə də gizlin əlaqəyə keçib. Bütün rıçaqlaırnı işə salan Manaf Manafovun hazırda karyerasının yükələcəyi yaxud bitəcəyi nöqtəsinə gəlib çatıb./"Azərbaycan Reallığı"
Abşeron rayonu Masazır qəsəbəsinin "Qurtuluş-93" yaşayış sahəsinin mərkəzində yaşıllıqlar məhv edilərək yerində müxtəlif təyinatlı obyektlər tikilir.
Ərzidə yaşayan sakinlər Tezadlar.az-a bildiriblər ki, may ayının əvvəlindən başlayaraq "Qurtuluş-93" yaşayış sahəsindəki "Ay Store" marketinin qarşısından "Yeni Bakı" yaşayış kompleksi istiqamətində salınmış yaşıllıq məhv edilir və yerində müxtəlif təyinatlı obyektlər tikilir: "Bu günlərdə səhər yuxudan oyandıq ki, yol kənarındakı yaşıllıq məhv edilib, ağaclar kəsilib. Belə gedişlə tezliklə ərazidə ağac, gül kolları qalmayacaq. Xahiş edirik, bizim səsimizi Ekologiya və Təbii Sərvətlər Nazirliyinin rəhbərliyinə çatdırasınız".
Sakinlər xəbər verir ki, hazırda dəmir dirəklərin quraşdırıldığı həmin ərazidə xeyli sayda ağac və gül kolları olub. Onlar bunu sübut edən videogörüntü də təqdim ediblər. Həmin videolar bir neçə gündür çəkilib. Videolardan da görünür ki, ərazidə xeyli sayda ağac kəsilərək yerində quraşdırma işlərinə başlanılıb.
Sakinlərin sözlərinə görə, onlar ağacların məhv edilməsinə etirazlarını bildirsələr də, tikiləcək obyektin ərazisini yaşıl torla örtənlərə nəzarət edən şəxsdən bunun səbəbini soruşsalar da, sualı cavabsız qoyaraq ona “gedin işinlə məşğul olun, özünüzə problem yaratmayın" deyib: "Bizə həm də təsir edən odur ki, bir ağacın ətrafına kölgə salması, yaxud ağac halına gəlməsi üçün 5-10 il zaman lazım olur. Ancaq bunlar bir neçə dəqiqənin içərisində bu qədər ağacları məhv ediblər".
Nizami rayonu ərazisində bir aydır salınmış yaşıllıq baxımsızlıqdan məhv olmaq üzrədir.
TEREF Tribunainfo.az-a istinadən xəbər verir ki, bu barədə yaşıllığın salındığı Nizami rayonu Bəhruz Nuriyev 40 ünvanın yaşayan sakin Elmir Muradov yazıb. O bildirib ki, bağ bir ay əvvəl salınıb, ancaq baxımsızlıqdan ağacların çoxu artıq quruyub:
Sakin bildirib ki, ərazidə çox sayda müxtəlif cür ağaclar əkilib. Ancaq yaşıllıq salındıqdan sonra ərazi bir dəfə də olsun suvarılmayıb. Nizami Rayon İcra Hakimiyyəti yaşıllıqla maraqlanmır, burada quruyaraq məhv olan ağaclar onları narahat etmir:
“Bura bir ay əvvəl salınmış məhəllədi. Bura hələ də bağban təyin edilməyib. Yaşıllıqlar salınandan rayon icra hakimiyyəti bura ilə bir dəfə də maraqlanmayıb. Artıq ağacların əksəriyyəti susuzluqdan quruyub, yaşıllıqların çoxu məhv olub. Dövlətin pulu yenə kimlərsə tərəfindən havaya sovurulmaqdadır. İcra hakimiyyəti 100 min manatdan çox pul xərclənmiş yeni salınan məhəllənin məhv olmasına göz yumur. Ağaclar quruyur, məhv olur, ancaq heç bir aidiyyəti qurumun vecinə deyil”.
Yazıda adı çəkilən tərəflərin mövqeyini işıqlandırmağa hazırıq.
Sumqayıt şəhəri, 21-ci məhəllə, ev 13/52-nin qarşısındakı həyət evindən yaşadığını bildirən İsmayılov Asif Cavanşir oğlu tərəfindən Hurriyyet.az-ın redaksiyasına şikayət daxil olub. Şikayətçinin məktubunu olduğu kimi dərc edirik:
“57 yaşım var. 22.02.2023-cü ildə Sumqayıt Travmatalogiya Xəstəxanasında həkim Emin Yaqubov tərəfindən boyun onurğa əməliyyatı olmuşam. O, mənə boş yerə 3 ay 8 gün ümid verərək, xəstəxanada yatızdırdı. Sonra məlum oldu ki, uğursuz əməliyyat edib. Hansı ki, ayağımla xəstəxanaya getsəm də, araba ilə qayıtdım”.
Hazırda 1-ci qrup əlil olduğunu deyən şikayətçinin sözlərinə görə, 8 aydan sonra vəziyyəti daha da pisləşib: “Bundan sonra Bakıda, Əhmədlidə yerləşən Neyrocərrahiyyə Xəstəxanasına müraciət etdim. Sağ olsun, Rasim həkim məni əməliyyat edib, ölümdən qurtardı. Amma şikəstliyim yenə də qalır. Məni bu günə salan Emin Yaqubov bir dəfə də olsun mənimlə maraqlanmır.
Sumqayıt Travmatalogiya Xəstəxanasında olan özbaşınalıqla bağlı baş həkim Rauf həkimə, Səhiyyə Nazirliyində Səkinə xanıma, TƏBİB-ə, Respublika Prokurorluğuna müraciət etdim. Üstəlik, ərizə ilə Prezident İlham Əliyevə də müraciət etmişəm. Lakin heç bir tədbir görən yoxdur.
Sizdən xahiş edirəm ki, mənim müraciətimi işıqlandırın, bəlkə aidiyyəti qurumlar bir tədbir görər”.
Bakı şəhəri, Xətai rayonu, Əhmədli qəsəbəsi, Gəncə prospekti 34 ünvanında yerləşən “Artromed” klinikasında biyabırçı hadisə baş verib.
Tribunainfo.az-a şikayətini bildirən Nəsirova Almaz qeyd edib ki, 7 yaşlı oğlu Nəsirzadə Hüseyni “Artromed” klinikasına aparıb. Orada Kamal doktorun müayinəsindən keçən uşağı parazitoloq Alla Rüstəmovaya yönləndiriblər.
Belə ki, qeydiyyat üçün həkim, parazitoloq Alla Rüstəmova uşağın ad soyadını bir neçə dəfə soruşub yazıb, pozub. Azərbaycan dilini bilməyən həkim əsəbləşərək qışqırıb: – “bu necə deməkdir, mən sizi başa düşmürəm” deyib. Ardınca xəstəxanaya gələn Nəsirova Almaz təmkinli şəkildi bildirib ki, “necə başa düşmürsünüz, Nəsirzadə Hüseyn Ruslan oğlu”, – deyərək qeydiyyat üçün adı 4-cü dəfə təkrar edib. Uşağın, Nəsirzadə Hüseynin əlində isə kağız vardı. Həkim Alla Rüstəmova uşağın üstünə bərk şəkildə qışqırır. Qorxusundan anasına qısılan uşaq xəstəxanadan getmək istədiyiini bildirir. Həkim Allah Rüstəmova növbəti kobud hərəkəti edərək kağızları müştərinin üstünə tullayır.
Şikayətçi Nəsirova Almazın sözlərinə görə, həkim Allah Rüstəmova müştərinin üstünə qışqıraraq onlardan rus dilində danışmasını tələb edib. Daha sonra həkim Alla Rüstəmova xəstəxananın kolidorunda rus dilində söyüşlər söyərək təhqiramiz ifadələr işlədir.
Bu azmış kimi həkim Alla Rüstəmova stolu şikayətçinin uşağı Nəsirzadə Hüseyn Ruslan oğlu və valideyni Nəsirova Almazın üzərinə itələyib. Stol xəstəxanaya gələn digər müştəri Sona xanımın ayağına, Nəsirova Almazın isə qarnına dəyib. Resepşına müraciət edib dərdini deyən şikayətçi bildirir ki, resepşında işləyən işçilər belə qorxaraq dayanmışdı. Sanki xəstəxananın ağası Alla Rüstəmova idi.
Qeyd edək ki, hadisə baş həkimin otağında baş verməsinə baxmayaraq həkim Alla Rüstəmovaya qarşı heç bir tədbir görülməyib.
Digər müştəri Sona xanımın sözlərinə görə, Alla Rüstəmova rus dilini bilməyən hər kəsə qarşı belə kobud davranaraq aqressiv yanaşır.
Şikayətçi sonda bildirib ki, biz Azərbaycanda yaşayayırıq. Xəstəxana və digər müəssisələrdə çalışan hər bir vətəndaş öz ana dilini bilməlidir. Biz öz uşaqlarımızı belə həkimlərə əmanət etsək uşaqlarımız travma alar. Azərbaycanın dövlət dili Azərbaycan dilidir. Belə bir qanun yoxdur ki, xəstəxanalarda müştərilər rus dilində danışsın.
“Stalin dövründə sürgün nəticəsində minlərlə insan yurd-yuvasından didərgin düşmüşdü. Bu, zülm aparatının kütləvi şəkildə həyata keçirdiyi cəza mexanizmi idi.
İndisə müasir sürgün metodunu Respublika Klinik Xəstəxanasının direktoru Elviz Qasımov həyata keçirməyə başlayıb. Və elə bir absurd qərarlar qəbul edib ki, ölkənin heç bir xəstəxanasında bu sürgün variantı ağıla gəlməz”.
Respublika Klinik Xəstəxanasının bir qrup tibb işçisi “Arqument.az”a göndərdiyi şikayətdə belə qeyd edir.
Onların sözlərinə görə, Respublika Klinik Xəstəxanası təmirə bağlanır, amma direktorun qəbul etdiyi qərarlar təəccüb doğurur: “Bu təmir səbəbindən E.Qasımovun “dərin planı” nəticəsində xəstəxananın II korpusunun I korpusa köçürülməsinə qərar verilib. Bu da başadüşüləndir. Amma direktorun 1-ci korpusun Bilgəhə köçürülməsi ilə bağlı qərarı olduqca absurddur. Buna heç bir məntiqi izah tapmaq olmur. Soruşan da yoxdur ki, ay başına dönüm, 20 Yanvar hara, Bilgəh hara? Bir qədər əvvəl Nərimanov ərazisində yerləşən 5 saylı Xəstəxanada da təmir işləri aparıldı. İşçi kontingenti çox asanlıqla yaxın ətrafdakı xəstəxanalarda yerləşdirdi. Heç kəs narazı qalmadı”, – deyə tibb işçiləri vurğualyıblar.
Kifayət qədər ironik tonda yazılan müraciət müəllifləri ictimai diqqət çəkmək üçün hadisəni bir az da obrazlı təqdim edirlər: “”Axırıncı aşırım” filmində Kərbəlayının təbirincə desək, heç Yədullanın müsibəti heç belə olmamışdı. Hərçənd, Elviz Qasımovu ictimaiyyət az qala islahatlar həyata keçirəcək biri kimi qəbul edirdi, amma gördülər ki, yanılıblar. Yaxşı ki, Elviz Qasımov Stalin kimi səlahiyyətlərə sahib olmayıb, yoxsa daha qəddar addımlar ata bilərdi. Hər halda, onun son qərarlarından sonra belə qənaətə gəlmək mümkündür. Çünki bu, konkret olaraq sürgündür”.
Müraciət müəllifləri bildirirlər ki, Elviz Qasımovun bu qərarı xəstəxanın həm 1-ci korpusda işləyənlərin, həm vətəndaşların narazılığına səbəb olub: “Çünki ölkənin ən böyük xəstəxanalarından olan və hər gün yüzlərlə insanın müraciət etdiyi “Respublikanski”ni uzaq Bilgəhə köçürmək məntiqsiz və faciəvi qərardır. Hər kəs üçün zülmdür, həm işçilər, həm xəstələr, həm də xəstə yaxınları üçün. Nəzərə alaq ki, qarşıdan isti yay gəlir və xəstələrin həkimlərin qəbuluna düşməsi üçün uzun yol qət edib Bilgəhə getməsi həm işgəncədir, həm də əlavə xərcdir. Hazırda metronun “20 Yanvar” stansiyasına yaxın yerləşməsi hamı üçün xəstəxananı əlçatan edir”.
“Kollektivin işçiləri haqlı olaraq soruşurlar: Bakının əlçatan bir yerində məkan tapılmadı ki, işçilər Bilgəhə sürgün edilir? Hətta bununla bağlı Elviz Qasımova edilən müraciətlər və təqdim olunan ərizələrin zibil qutusuna atıldığı hər kəsə bəllidir. Bu da azmış kimi, direktor özünə yaxın adamlara imtiyaz tanıyıb, onları Bilgəhə göndərmir, təmirə görə 2-ci korpusun yerləşəcəyi 1-ci korpusun yerləşdiyi binada saxlamaqda israrlıdır. Bu da ayrı-seçkilik və öz komandasını kollektivdən fərqləndirmək deməkdir. Təbii ki, bu da narazılığa səbəb olub. Ümumiyyətlə, Elviz Qasımovun nə etmək istədiyi başa düşülmür. Belə bir absurd hərəkət insanları işdən incik və əziyyətə salmaqdır”, – deyə müraciətdə qeyd olunub.
Adlarının açıqlanmasını istəməyən tibb işçiləri (Nəzərə alsaq ki, Elviz Qasımovun direktorluğu dövürdə təxminən il yarım ərzində 450-yə qədər şəxs işdən çıxarılıb) problemlə bağlı, sosial şəbəkələr vasitəsilə ölkə başçısına, Birinci vitse-prezident Mehriban Əliyevaya, Prezidentin köməkçisi Anar Ələkbərova, İcbari Tibbi Sığortanın rəhbəri Zaur Əliyeva, TƏBİB- in rəhbəri Vüqar Qurbanova müraciət ediblər.
Onlar ölkə rəhbərliyindən bununla bağlı addım atılması xahiş edilər. Ümid edirlər ki, bu əsassız “sürgün” dayandırılacaq, I korpus daha əlverişli bir tibb müəssisəsinə köçürüləcək.
Artıq neçə ildir ki, hər ilin başlanğıcında Avro-5 yanacaq istifadəmizin tezliklə xalqın istifadəsinə veriləcəyi deyilir. Lakin bu modernizasiya layihəsində necə maraqlı hadisələr baş verirsə, ayrılan məbləğlər bir çoxları üçün çox şirin gəlib, layihə bitmək bilmir.
Maraqlısı odur ki, SOCAR-da artıq 3 ildir ki, dəyişiklik olub və layihədə olan məbləğlər də kimlərinsə, başını döndürüb. Əks halda bütün Respublikanın ən böyük modernizasiya layihəsi indiyə bitmiş olmalı idi.
Bildiyiniz kimi SOCAR-ın neft-qaz emalı və neft-kimya müəssisələrinin yenidən qurulması, modernizasiyası, həmin müəssisələrin emal, istehsal, əməliyyat, keyfiyyətə nəzarət, əməyin təhlükəsizliyi, təmir-baxım işlərinin koordinasiyası, xammal və aralıq məhsulun ötürülməsi, digər texniki, texnoloji və kommersiya əməliyyatlarının səmərəli həyata keçirilməsi, habelə maliyyə resurslarının daha rentabelli idarə edilməsi məqsədilə 2019-cu ilin sonunda SOCAR-ın təsisçiliyi ilə “SOCAR Downstream Management” şirkəti yaradılıb. Daha sonra Modernizasiya layihəsinin idarə etməsi bu şirkətə həvalə edilib.
Heydər Əliyev adına NEZ-in yenidən qurulması layihəsi çərçivəsində Dizel Hidrotəmizlənmə, Benzin Hidrotəmizlənmə və C4 (butan-butilen) fraksiyasının hidrogenləşmə qurğuları, habelə “Azərikimya” İB-də həyata keçirilən yenidənqurma işləri çərçivəsində C3 (propan-propilen) fraksıyasının hidrogenləşmə qurğusu və Türkiyədə inşa edilmiş “STAR” neft emalı zavodunun nafta hidrotəmizləmə, dizel hidrotəmizləmə və kerosin hidrotəmizləmə qurğuları “Axens” şirkətinin lisenziyası əsasında inşa edilib. Nəzərə çatdıraq ki, Axens Fransa mənşəli şirkətdir və hazırda zavodlarımızın lisenziarlarından biridir. Bu o deməkdir ki, hazırki geo-siyasi proseslər çərçivəsində zavodun fəaliyyətində fransada asılılıq yaratmışıq. Görəsən bu hal bilərəkdənmi yaradılıb ya təsadüfən? Araşdırılmalıdır.
Neft Emalı Zavodunun istehsal gücünü artırmaq, ölkəni "Avro-5" standartına uyğun yüksək keyfiyyətli yanacaqla təmin etmək, "Azərkimya"nın xammal sabit təchizatı və neft məhsullarının ixrac potensialının artırılması məqsədi ilə həyata keçirilən modernləşdirmə və yenidənqurma işləri “ugurla” davam etməkdədir.
21 dekabr 2018-ci ildə Heydər Əliyev adına neft emalı zavodunda aparılan yenidənqurma və modernləşdirmə layihəsinin birinci mərhələsi çərçivəsində inşa edilən yeni bitum qurğusunun və maye qazdoldurma məntəqəsinin açılış mərasimi olub. Azərbaycan Prezidenti İlham Əliyev mərasimdə iştirak edib.
Prezident İlham Əliyevə Heydər Əliyev adına neft emalı zavodunda aparılan yenidənqurma və modernləşdirmə layihəsi barədə məlumat verildi. “Ulu Öndərin adını daşıyan neft emalı zavodunun modernləşdirmə layihəsi tarixi əhəmiyyətə malikdir. Layihə tamamlandıqdan sonra bu zavod ölkəmizi yüksək keyfiyyətli yanacaqla təmin edəcək, Azərbaycanın ixrac potensialını artıracaq və ölkəmizin regiondakı mövqeyinin daha da möhkəmlənməsinə xidmət göstərəcək. Artıq bu mühüm və tarixi layihənin ilkin mərhələsi tamamlanıb” kimi cənab Prezidentə məlumatlar verildi. Layihənin 2020-ci ilin sonunadək planlaşdırılan ikinci mərhələsində AVRO-5 keyfiyyət standartına cavab verən dizel yanacağının alınması, 2021-ci ilin birinci yarısına nəzərdə tutulan üçüncü mərhələdə isə eyni keyfiyyət standartına cavab verən A-92, 95 və 98 benzin məhsullarının istehsalı üçün müvafiq yeni qurğuların inşası həyata keçiriləcək.
Artıq 2024-cü ilin ilk yarısı bitmək üzrədir, bu da onu göstərir ki, ölkə başçısına yalan danışılıb. Ola bilər ki, Pandemiya və 2-ci Vətən müharibəsinin başlanması layihənin gedişatına təsir edib. Belə olan halda proyekt 2023-cü ilin sonuna qədər təhvil verilməli idi. Onu da qeyd edək ki, Pandemiya dövründə (2020-ci ildə) layihənin 80% bitmiş olmalı idi. Amma bugün də təhvil-təslim olmayıb.
Bəs layihə çərçivəsində “SOCAR Downstream Management” şirkətinin etdiyi özbaşınalıqlardan və dövlət büdcəsinin mənimsənilmə hallarından müvafiq orqanların xəbəri varmı? İlk illərdən Türk vətəndaşına Rövnəq Abdullayev tərəfindən layihə həvalə edilmiş və bütün yeyinti onun əli ilə edilmişdir. 2020-ci ildən sənədlər araşdırılsa, kifayət qədər fakt vardır. Lakin layihəni idarə edən Məsut İlter bəy olsa, da layihəni idarə edən və bütün kadrları əsas yerlərə təyin etdirən həmin dövrdə layihə rəhbəri Emil Alxaslı olmuşdur. Emil Alxaslının oğlunun kirvəsindən tutmuş qrup yoldaşları, sinif yoldaşları, dostları bu layihədə mühüm postları tutublar. Lakin Rövşən Nəcəfin gəlməsi ilə layihədə bir irəliləyişin olacağına ümid olsa da, Emil Alxaslı adı çəkilən qurumun baş direktoru təyin olunur. Yeni SOCAR prezidentini aldadırlar ki, layihə bitməsi üçün bu adam bu postda qalmalıdır. Amma anlamadılar ki, həmin vaxt işdən çıxarılsa idi layihə daha da sürətlənəcəkdi. İndi bu şəxs o qədər güclənib ki, sahə üzrə vitse-prezident belə onunla bacarmır. 2023-cu idə quruma SOCAR-ın daxili nəzarət şöbəsi yoxlama üçün daxil olmuşdu, maraqlısı odur ki, çox mühüm yeyinti faktları əldə olunsa da, qəfil yoxlama dayandırılmış və müəssisəni tərk etmişdir. Səbəbini bilən olmasa da, məlumdur ki, belə hallarda ya Alxaslı yaxşı xərc çəkib, ya da güclü hamiləri vardır. Onun Zavoddakı fəaliyyəti kimlərisə, ifşa edə bilərdi. Nəzərinizə çatdıraq ki, bu günə qədər layihə üçün 5 milyard manatdan çox vəsait xərclənib.
“SOCAR Downstream Management” şirkəti layihənin idarə etməsini təşkil etmək məqsədi ilə yaradılsa da, sonradan bütün əməliyyəti və istehsalatı nəzarətə götürülür. Təbii ki, bu Məsut İlterin Türkiyədən gətirdiyi mütəxəssislər tərəfindən koordinasiya olunurdu. Bu mütəxəssislərin bəzilərinin Türkiyədəki2-3 ildə əldə etdiykləri villaları da ayrıca araşdırma mövzusudur. Amma bugün layihənin nə səbəbə bitməməsi daha vacib bir məsələdir.
Təbii ki, bu qədər vəsaitin mənimsənilməsi açıq aydın görünür. Layihə çərçivəsində heç bir iş və xidmət “otkatsız” verilməmişdir. Bunu SOCAR rəhbərliyi çox yaxşı bilir və əllərində kifayət qədər faktlar vardır.
İstər Çirkli suların təmizlənməsi qurğusunun tikilməsi barədə “Hazar Arıtım” şirkətinə “tenderlə” verilmiş iş, istər Azfen şirkətinin gördüyü işlər, bütün beton işlərinin yalnız Azkontakt tərəfindən verilməsi, İlk inşaatın fəaliyyəti, Hidroinşaat MMC-nin bağladığı müqavilələr və gördüyü işləri, Zavod ərazisinin asfaltlanması üçün tenderin qalibi olan Teknikon şirkətinin fəaliyyəti araşdırılmalıdır. Bu şirkətlərin necə qalib olması araşdırılmalıdır, təbii ki, əlimizdə faktlar vardır, müvafiq qurumlar tərəfindən araşdırılıb ictimaiyyətə çatdırılsa, daha yaxşı olardı. Görünən odur ki, bugünki SOCAR rəhbərliyi də bu məlumatların üzə çıxmasında maraqlı deyildir. Əks halda Emil Alxaslının atası Aydın kişinin hesabına köçürülmüş vəsaitlər, bacısı Məmmədova Aygün Aydın qızının hesablarına (VÖEN 1306859072)(hesab nömrəsi-AZ31BRES41040AZ0011942289001) HAOR Modernisation və ya HAOR Revamp project adı ilə DSP Laboratory complex Dubai Unit (İntertek) tərəfindən ödənişlərdən, onun İtaliyadakı, Türkiyədəki otellərindən məlumatları olduqları halda o vəzifədə qalmazdı.
Cənab Prezidentin bugün dünyada və ölkəmizdə apardığı çətin mübarizələr zəminində onun aldadılması, düzgün məlumatların verilməsi yolverilməzdi. Əvəz olunmaz insan yoxdur, Alxaslı olmazsa, layihə bitməz kimi nağılllar yalnız yalan bəhanələr ola bilər. Belə çıxır ki, ölkədə yalnız bir kadr var layihəni bitirməyə? Təbii ki, xeyr. Sadəcə Alxaslı və onun havadarları layihəni elə bir bərbad vəziyyətə gətiriblər ki, yeyinti o qədər çoxdur ki, heç bir mütəxəssis layihəni öz üzərinə götürməyi risk etmir. Ümid edirik ki, Rövşən Nəcəfin və onun vitse-prezidentlərinin bacarmadığı Alxaslının öhdəsindən cənab nazir Mikayıl Cabbarov tezliklə gələcək və onun fəaliyyəti ictimaiyyəti məlumatlandırmaqla araşdırılacaqdır. Araşdırmağa başlanılsa, yəqin ki, zavoda daxil olan qeyri-qanuni neft və onun emal edilməsi və hansı yollarla satılması da üzə çıxacaqdır. Daha sonra SOCAR Türkiyənin Star və Petkim zavodlarının son 5 ildəki fəaliyyətinin da yoxlanılmasına növbə çatar.
Qeyd: Yazıda adı keçən şəxs və qurumların mövqeyini yayınlamağa hazırıq.
Azərbaycanda şəhər və kəndlərin qurulması, eləcə də mövcud şəhər və kəndlərdə layihələndirmə işlərinin aparılması məqsədilə 2022-ci ildən indiyədək 33 tender elan edilib.
Dövlət satınalmaları portalı vasitəsilə həyata keçirilən bu tenderlərin ümumi dəyəri 43 milyondan çox olub. Tenderlər daha çox işğaldan azad edilmiş ərazilərin yenidən qurulması məqsədilə həmin ərazilərdə baş tutub.
Tenderləri udan şirkətlərdən biri “Arxin-M LTD” MMC şirkətidir. Sözügedən şirkət 4 tender udaraq dövlət qurumlarından 5 milyon manat dəyərində sifariş alıb.
Milyonluq tenderlərin qalibi olan bu şirkət 1998-ci ildə yaradılıb, nizamnamə kapitalı isə cəmi 20 manatdır. Şirkətin hazırki qanuni təmsilçisi Niftalı Tağı oğlu Abbasovdur. Şirkət Bakı şəhəri Nizami rayonu, Elşən Süleymanov, ev 137, m. 23 ünvanında yerləşir.
“Arxin-M LTD” MMC şirkətinin əsl sahibi kimdir?
Dövrü mətbuatda “Arxin-M LTD” MMC şirkəti ilə “Projekt LTD” MMC adlı şirkətin adı daim yanaşı çəkilir, hər iki şirkətin də müxtəlif dövlət qurumlarının layihələrində iştirak etdiyi, tenderlər qazandığı açıqlanır. Beynəlxalq Şəffaflıq təşkilatının dərc etdiyi hesabatda da, bu hər iki şirkətin bir-biri ilə bağlı olması vurğulanıb.
İqtisadiyyat Nazirliyi yanında Dövlət Vergi Xidmətinin Kommersiya qurumlarının dövlət reyestrinin məlumatlarına görə, “Projekt LTD” MMC 5 fevral 2003-cü ildə qeydiyyata alınıb. MMC-nin qanuni təmsilçisi isə Samirə Tahir qızı Bayramovadır.
Diqqətçəkən məsələ odur ki, hər iki şirkət də yarandığı zaman eyni ünvanda qeydiyyatdan keçib. Seçici siyahısına görə, bu ünvan elə 2012-ci ildə şirkətin qanuni təmsilçisi olan Müsəddin Əhməd oğlu Namazovun rəsmi qeydiyyatda olduğu mənzildir: Nizami rayonu, E. Süleymanov küçəsi, ev 137, mənzil 23.
Toplanan faktlardan belə nəticəyə gəlmək olur ki, hər iki şirkət də bu şəxsindir, hazırki qanuni təmsilçilər isə proksi şəxslər, yəni əsas adamı gizləmək üçün rəsmiləşdirilən şəxslərdir.
Bəs Musəddin Namazov kimdir?
4 avqust 1963-cü il təvəllüdlü Musəddin Əhməd oğlu Namazov Gürcüstan Respublikasının Saqareco (Qaraçöp) bələdiyyəsinin Düzəyrəm kəndində anadan olub. O, 2012-2014-cü illərdə Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyindəki “Azərdövləttikintilayihə” DLİ-nin direktoru olub.
İlham Əliyevin 2012-ci il tarixli sərəncamı ilə Azərbaycan Respublikasında inşaat sahəsində səmərəli fəaliyyətinə görə “Tərəqqi” medalı ilə təltif edilib, həmçinin memarlığın inkişafında xidmətlərinə görə “Əməkdar Memar” fəxri adı alıb. 2014-ci ildən indiyə kimi “Azərdövlətlayihə” DBL İnstitutunun direktorudur. 80 ildən artıq inşaat idarəsi kimi təsis edilmiş institut, hazırda dövlət obyektlərinin layihələndirilməsi üçün əsas qurumlardan biridir.
Musəddin Namazovun şirkətləri hansı tenderlərlə nə qədər vəsaitlər udub?
Azərbaycan Respublikası Dövlət Şəhərsalma və Arxitektura Komitəsinin reyestr məlumatlarına əsasən, böyük şəhərlərin baş planının hazırlanması üzrə müqavilələrin bağlandığı “Arxin-M LTD” MMC şirkəti indiyə qədər milyonlarla dəyərində olan 52 layihənin, “Projekt LTD” MMC isə 9 layihənin qalibi olub və tikinti həyata keçirib.
Jurnalistlər üçün nəzərdə tutulmuş, ancaq şəhid ailələrinə verilmiş üçüncü binanın layihə-smeta sənədlərini də məhz “Arxin-M LTD” MMC şirkəti icra edib .
Bakıda Cənubi Qafqazın ən hündür göydələni olacaq “Baku Tower”in layihəsi də “Arxin-M Ltd” tərəfindən hazırlanıb.
Dövlət satınalmalar reyestrinə görə isə 2017-2018-ci illərdə “Arxin-M LTD” 1,66 milyon manatlıq tenderlərdə qalib gəlib. Reyestrə görə, şirkət 2020-2022-ci illərdə 850 min manat dəyəri olan tenderlərdə qalib elan olunub.
“Arxin-M LTD” MMC şirkətinin adı “cinayət işi”ndə və korrupsiya iddiası:
Baş prokuror yanında Korrupsiyaya qarşı Mübarizə Baş İdarəsinin 2021-ci ilin hesabatında qeyd olunub ki, mətbuat işçiləri üçün inşa edilmiş yaşayış binalarının tikintisi zamanı törətdilən qanunazidd əməllər nəticəsində dövlətə məxsus pul vəsaitinin mənimsəmə yolu ilə talanmasında ittiham olunan şəxslərdən biri də “Arxin-M LTD” MMC-nin Memarlıq şöbəsinin müdiri Telman Nurməhəmməd oğlu Tahirov da təqsirləndirilib.
Bəs qanunlar nə deyir?
Azərbaycan qanunvericiliyinə əsasən icraedici orqan rəhbərlərinin, dövlət məmurlarının, deputat və onun ailəsinin şəxsi bizneslə məşğul olması qadağandır.
2012-ci ildən etibarən Azərbaycan hökuməti “Kommersiya sirri haqqında” qanun layihəsinə dəyişiklik edərək şirkət təsisçisinin adını kommersiya sirri hesab edir. Ona görə də, jurnalistlər şirkətlərin səhmdarlarının kim olduğunu tapa bilməyib.
Amma toplanılan faktlar bu şirkətlərin Musəddin Namazovla əlaqəsi olduğunu göstərir.
Korrupsiyaya qarşı mübarizə haqqında Azərbaycan Respublikasının qanununa görə isə “statusundan, təmsil etdiyi orqanın (qurumun) statusundan, vəzifə səlahiyyətlərindən və ya həmin status və səlahiyyətlərdən irəli gələn imkanlardan istifadə etməklə maddi və sair nemətlərin, imtiyazların və ya güzəştlərin əldə edilməsi məqsədilə fiziki və hüquqi şəxslərə sahibkarlıq fəaliyyətini həyata keçirməkdə, eləcə də subsidiyalar, subvensiyalar, dotasiyalar, kreditlər və digər güzəştlər alınmasında qanunsuz kömək etmək Korrupsiya ilə əlaqədar hüquqpozma hesab olunur”.
Musəddin Namazovun cavabı
“Azərdövlətlayihə” Azərbaycan Dövlət Baş Layihə İnstitutunun direktoru, dövlət məmuru statusunda olan şəxsin, proksi şirkətlər açıb, dövlətin ən vacib qurumlarının, dövlət əhəmiyyətli layihələrin tenderlərini qazanması nə qədər qanunauyğundur?
Meydan TV əməkdaşı bu suallara cavab tapmaq üçün əməkdar memarın özü ilə əlaqə saxlayıb. O isə “Mənə niyə zəng etmisiniz? Mənə zəng vurmayın xahiş edirəm”, – deyərək telefonu qapadıb.
Meydan TV əməkdaşı daha sonra direktorun köməkçisi Orxan İsmayılovla əlaqə saxlayıb. O, jurnalistə şirkətlərin Musəddin Namazovla heç bir əlaqəsinin olmadığını bildirib:
“Bununla bağlı nə işıqlandırmaq və yazmaq fikriniz varsa, nə istəyirsinizsə edə bilərsiniz. Diqqətinizə onu da çatdırım ki, Musəddin müəllim dövlət məmuru deyil”.
Azərbaycanda dilimizə oturan absurd ifadələrdən biri "qanunsuz tikinti" kəlməsidir. Sözün özü səhvdir. Axı tikinti necə qanunsuz ola bilər? Deməli, tikilənə qədər icazəsi verilib, amma düzgün qərar verilməyib, çünki normativləri pozub. Belə desək təməlinə haram qatılıb. Ona görə də belə adlandırmaq lazımdır - məmurların qanundankənar tikinti razılıqları. Çünki məmur sərəncam verir, qanuniləşdirir, sənəd alınır, bununla da mülk sahibi qanuni tikinti aparır, amma icazəni verən orqanın rəhbəri qanunsuzluğa əl atmış olur. Təəssüf ki, sonda zərbə yenə tikinti aparana dəyir. Buna baxmayaraq, Abşeron rayon rəhbərliyini heç nə maraqlandırmır, hazırkı icra başçısı Abdin Fərzəliyev və baş memar demək olar ki harada gəldi tikinti aparılmasına sərəncam verirlər. Nəticədə Abşeronun Masazır, Xırdalan, Mehdiabad, Gorədil və digər ərazilərində qanunla tikinti aparılması icazəsiz olan yerlər böyük bir meydançaya çevrilib. Əslində bu özbaşınalıqlar keçmiş başçı İradə Gülmməmədovanın dövründən tüğyan edirdi, hətta onun rəhbərliyi dönəmində baş memar və bir neçə vəzifəli şəxs həbs olundu, biri də sabiq İH rəhbərinin bacısı oğlu idi. Amma yeni gələn icra başçısına baş verənlərin təsiri olmadı, heç nə olmamış kimi ,, qiymətləri qaldıraraq' "estafeti" davam etdirdi. Odur ki, Abşeron rayonunda tikinti aparmaq iki vur iki, yox-yox, neçə min manatlıq bir işdir. Və qanunsuz tikintilərə rəvac verən məmurlar bir müddət əvvəl də Abşeron İH-də keçirilmiş əməliyyatdan sonra hərəkətlərini bir çərçivəyə salmayıblar. Sanki and içiblər ki, bu "yolda" öldü, tutuldu var, döndü yoxdur... Hətta qardaş Türkiyədə dəhşətli zəlzələnin qurbanı olan minlərlə insanın faciəsi də Abşeron İH-dəki tikinti mafiozlarının gözünü qorxutmadı. Görünür ki, rüşvət gözlərini elə tutub, ölüm təhlükəsi olsa belə, hər bir tikinti normativlərinin pozulmasına göz yumurlar. Digər tərəfdən, tikintiyə nəzarət məsələsi suallar doğurur. Deyilir ki, tikintiyə nəzarət olunmur. Bu da yanlış baxışdır. Aidiyyatı orqanlar tikintiyə lap yaxşı kontrol edir. Elə bu nəzarətin nəticəsidir ki, səlahiyyət sahibləri, Abşeron İH məmurları "haqq" alaraq qanunsuz inşa aparılmasına şərait yaradırlar. Əks təqdirdə, onların nəzarətindən kənarda Abşeronda daşı daş üstünə qoymaq olmaz. Yəni icazəli qanunsuz tikinti aparmaq Abşeron rayonunun sanki taleyinə yazılıb. İndi isə mənzərə daha dramatikdir. Başçı Fərzəliyev bu sahədə əsl bazarı mühiti yaradıb - pulunu ver, lap istəsən parkın içində ev tik. Bu dərəcədə olmasa belə, tikintilərlə bağlı hədd aşılıb.
Misal üçün hamının gözü qarşısında Xırdalanda "Kristal A" MTK tərəfindən tikilmiş binanın əlavə mərtəbəsi artırılır. Bu da tamamilə qanuna uyğun deyil, tikinti normativlərini pozmaqdır. Lakin Abşeron İH həmin MTK-ya belə bir absurd imkan yaradıb ki, bir mərtəbə də artırılsın. Halbuki tikinti firmasının binanın təməli qoyulmazdan əvvəl eskiz layihəsi olur, bütün çertyoj işlənir, müvafiq qurumlarda təsdiqlənir, Dövlət Arxitektura Komitəsi rəy verir, infrastruktur qabaqcadan müəyyənləşir. Ancaq "Kristal A" MTK Abşeron İH-lə "dil taparaq" daha bir mərtəbə tikilməsinə əl atıb. Ümumiyyətlə, son 6 ay ərzində Abşeron rayon İcra Hakimiyyətinin (RİH) 4 əməkdaşı korrupsiya faktına görə prokurorluq əməkdaşları tərəfindən məsuliyyətə cəlb olunub. Onlar məhz qanunsuz tikintilərə görə həbs ediliblər. Ancaq ki nə fayda?! tutulmasına baxmayaraq Abşeron icra başçısı və əməkdaşları yenə də qanunsuz tikinti biznesindən az qala özləri də həbs edilənə qədər əl çəkməyəcəklərini nümayiş etdirirlər. Eyni zamanda, "Kristal A" MTK-nın əlavə bir mərtəbə artırmasına digər dövlət qurumları da laqeydlik göstərir. Maraqlıdır, niyə? Müvafiq orqanlar nə üçün susqundur? Abşeron icra başçısı və komandasının buradakı istəkləri anlaşılandır, bəs, tikintiyə icazə ilə bağlı rəy verməli olan digər qurumlar nəyə görə buna diqqət ayırmır? Hər halda bir izahı var...
Abşeron İH-nin bir əməliyyatlıq canı var: rüşvətlə verilən tikinti sərəncamları, "makler evi" biznesi, yıxılan evlər - Müdhiş KORRUPSİYA dosyesi... Amma Abşeron rayonunda geniş vüsət alan qanunsuz tikintilər tək bununla məhdudlaşmır. İH "makler evi" biznesinə də əl-qol açmaq imkanı verib. Masazırda, Xırdalanda yüzlərlə "makler evi" görmək olar. Onlar keyfiyyətsiz tikilmiş, ucuz satılan həyət evləridirlər. Bunu elan saytlarında da görmək olar. Hərçənd o evləri alanlar peşman olurlar - kanalizasiya sistemi yox, otaqların divarları çat verir, nəmişlik, palçıq, su verilməsində problem və başqa çətinliklər var. Ancaq ev dəllalları ucdantutma bu evləri tikir, ucuz qiymətə satır, böyük bir biznes qurur, ən dəhşətlisi odur ki, Abşeron rəhbərliyi bu qədər evin tikintisinə sərəncam verir. Bu sərəncamları kütləvi şəkildə kim verir? - əlbəttə ki icra başçısı, baş memar və bütövlükdə Abşeron İH.... Tikinti həyata keçirən maklerlərin hər ev üçün İcra Hakimiyyətinə sahə və hündürlüyündən asılı olaraq 2500-4000 manat arası vəsait ödədiyi bildirilir. Bununla bağlı məlumata görə, ərazidə tikilən yüzlərlə evlərdən Dövlət Şəhərsalma və Arxitektura Komitəsinin və FHN-nin Tikintidə Təhlükəsizliyə Nəzarət Dövlət Agentliyinin xəbəri yoxdur. Üstəlik, son illər FHN tərəfindən Xırdalan, Mehdiabad, Masazırda qanunsuz tikintilərin söküldüyü açıqlanıb. Deməli, Abşeron İH tikintiyə icazə verir, vətəndaşdan pul alır, nazirlik isə sökür. Burada itirən təbii ki, vətəndaşdır. Amma nazirlik sökərkən bu tikintiyə hansı qurumun icazə verdiyi aydınlaşdırılmır, demək ki məsələ birtərəfli həll olunur. Qeyd edilir ki, Abşeron rayonunda qanunsuz tikinti işlərinə nəzarət və “icazə” almaq məsələləri icra başçısı Abdin Fərzəliyevin “qara kassası” kimi tanınan Nurlan Həsənova həvalə edilib.Tikintiyə “icazə” qiymətinin qalxdığı və inşaat işləri ilə məşğul olan şəxslərin buna görə narazılıq etdiyi deyilir. Bildirək ki, Nurlan Həsənov Nərimonov rayon icra hakimiyyətində İctimai-Siyasi və Humanitar məsələlər şöbəsinin müdiri vəzifəsində çalışıb. Abdin Fərzəliyev Abşeron rayon icra başçısı təyin edildikdən sonra Nurlan Həsənov Abşeron RİH-də Ərazi idarəetmə və yerli özünüidarəetmə orqanları ilə iş şöbəsində Baş məsləhətçi vəzifəsinə təyin edilib. Amma onun əsas işi Abşeron rayonunda qanunsuz tikinti işlərinə nəzarət etmək və “icazə” işlərini həll eləməkdən ibarətdir. Bütün bu məsələlər "qara maskalı"ların bir yoxlaması ilə ifşa edilə bilər. Nə deyək, eviniz tikilsin! Qeyd edək ki, söhbət "Kristal A" tikinti firmasından gedir. Bəzi hallarda insanlar bu şirkəti "Kristal Abşeron" tikinti şirkəti ilə qarışdırırlar. Lakin deməliyik ki, onlar ayrı-ayrı şirkətləridir. Bizim bəhs etdiyimiz "Kristal A" şirkətinin sahibi Aydın Cəfərovdur və onun Bakıda, Abşeronda çoxlu layihələri olan "Kristal Abşeron"la hər hansı əlaqəsi, bağlantısı yoxdur. Olsun ki bu da vətəndaşları aldatmaq üçün düşünülmüş taktikadır. Söhbət isə Abşeronda tikdiyi binaya qanunsuz şəkildə əlavə mərtəbələr artıran "Kristal A" şirkətindən gedir". Araşdırmalarımızı davam etdirəcəyik. Qarşı tərəfin isə mövqeyini dinləməyə hazırıq.
Azərbaycanda tikinti şirkətləri hər zaman öz maraqlarını prioritet tutur. Vətəndaş məmnuniyyəti, alıcının hüquqları, müştərinin arzu-istəkləri sonranın işidir. Bura tikintinin keyfiyyəti, mənzillərin bölgüsü, alqı-satqı müqaviləsində üstünlüyün şirkətə verilməsi daxildir. Misal üçün "Kristal Abşeron” şirkəti bu cəhətdən çox tanışdır. Devalvasiya nəticəsində yüzlərlə ailə zərərə salındı. Niyə?
Çünki şirkətin hüquqşünası "Kristal Abşeron”un maraqlarını əhəmiyyətli hesab edərək ödənişləri dollar ekvivalenti ilə olmasını müqaviləyə əlavə etmişdi. Mənzil alarkən sevincli olan çox ailələr heç müqavilənin bəndlərinə normal diqqət yetirməmişdilər, bundan sui-istifadə edən firma əksəriyyəti müflis etdi. Devalvasiya nəticəsində dollar bahalaşdı və bir çox ailələr evlərini dəyər-dəyməz qiymətinə satmalı oldular. Çünki ödəniş etmək mümkün deyildi. Məsələn, ikiotaqlı mənzil 60-70 minə başa gələcəkdisə, dollar bahalaşanda bu məbləğ gəlib 120-140 civarında oldu. Yəni "Kristal Abşeron” ölkənin milli valyutası olduğu halda, qanunsuz şəkildə dollarla ödəniş tələbi qoymaqla yüzlərlə ailənin həyatını puç etdi. Onların arasında mənzilini su qiymətinə satıb köhnə həyət evlərinə köçməyə məcbur qalanlar belə var. Əlbəttə, rəsmi izah, oluna bilər ki, o zaman müqavilə şərtləri belə idi, amma söhbət ondan gedir ki, yuxarıda qeyd etdiyimiz kimi – "Kristal Abşeron” və onun müftəxor hüquqşünası müqavilənin şərtlərini işləyərkən öz maraqlarını üstün tutub, nəinki vətəndaşların.
Bu da azmış kimi, son illərdə də şirkətin tikdiyi binalardan az şikayət olmayıb. Anaxeber.info mediada yayılan məlumatlara istinadla bildirir ki, "Kristal Abşeron” şirkəti daha yüzlərlə sakini bataqlığa qərq etməyə hazırlaşır. Bundan əvvəl "Qobu Park 2” layihəsində əyri bina tikib vətəndaşların həyatını təhlükəyə atan tikinti firması indi də Yasamal rayonu ərazisində, MiDA evlərinin yaxınlığında bataqlığı qurudub yeni binalar inşa etməyə başlayır. Halbuki Azərbaycan bu ilin payızında möhtəşəm COP29 tədbiri həyata keçirməklə bütün dünyaya yaşıl enerji, yaşıl layihə mesajlarını verəcək. Amma "Kristal Abşeron” üçün ölkə rəhbərliyinin hazırlaşdığı beynəlxalq layihə COP29 tədbirinin təşkilinə heç bir məhəl qoyulmadan, bataqlıq bir ərazidə minlərlə vətəndaşın od qiymətinə, yüksək faizlərlə alacağı mənzillərin tikintisi üçün yeni binalar inşa olunmaqdadır. KİV-də gedən xəbərlərə görə, bu ərazidə tikinti işlərinin aparılması ciddi müzakirələrə səbəb olub. Ekspertlər, müxtəlif tikinti mütəxəssisləri, eləcə də ayrı-ayrı sosial media fəalları sual edirlər ki, belə bir bataqlıq ərazinin qurudulub yerində mənzillər, binalar inşa edilməsi nə dərəcədə tikinti normativlərinə uyğundur. Amma "Kristal Abşeron” şirkəti izahat vermir və öz işinin başındadır.
Şirkət artıq işlərə start da verib. Gecə-gündüz bilmədən ərazidə iş aparılır ki, bataqlıq tez qurudulsun. Əraziyə torpaq daşınır, bataqlıq doldurulur. Bataqlıq doldurulduqdan sonra ərazidə hündürmərtəbəli binaların inşasına başlanılacaq. Artıq təxmin etmək olur ki, bataqlıq üzərində tikiləcək binada vəziyyət necə olacaq. "Kristal Abşeron”un indiyə qədər inşa etdiyi digər bütün binalarda sakinlərin ən çox şikayəti həmişə mənzillərin nəm olması, divarların kif olması ilə bağlı olub. Bataqlıq üzərində inşa ediləcək binadakı mənzillərdə indidən vəziyyəti təsəvvür etmək mümkündür. Axı əyri bina tikmiş şirkətdən nə gözləmək olar ki?!
Başqa bir fakt – "Kristal Abşeron” tikinti şirkəti reklamlarından biri ilə özünü biabır edib. Şirkət reklamda yeni tikilməkdə olan evlərdə səs keçirməyən materiallardan istifadə etdiyini bildirir. Ancaq həm də etiraf edir ki, bu günə qədər tikdiyi binalarda bu qayda qorunmayıb, divarlar səs keçirir, qonşunun adi danışığı da digər evdə aydın duyulur.
Bundan əlavə, bu ilin yanvarında Sumqayıt şəhəri, 10-cu mikrorayonda "Kristal Abşeron” yaşayış kompleksində çəkilən görüntülərdən mənzillərin necə keyfiyyətsiz tikildiyi, bir müddətdən sonra yararsız hala düşdüyü məlum olur.
Belə ki, tikinti zamanı kafel-metlaxın ara məsafəsi boş saxlanılıb, izolizasiyası olunmayıb. Bu da mənzillərə su sızmasına, rütubətə səbəb olub. Nəticədə divarda nəmişlik yaranıb, divar kağızları sıradan çıxıb.
Qeyd olunur ki, binadakı bir neçə mənzilə baxış keçirilib, hamısında eyni mənzərə ilə qarşılaşılıb.
Kristal Abşeron” tikinti şirkəti indi də "Park Yasamal” layihəsini bəh-bəhlə reklam etdirir. Ölkə KİV-lərində layihənin piarı elə aparılır ki, bilməyənlər yaponların, yaxud almanların proyekti kimi qəbul edəcək.
Amma şirkətin sosial media səhifəsində paylaşımlarına verilən reaksiyalardan, yazılan şərhlərdən görünür ki, vətəndaşlarımız heç də avam deyil.
Xatırladaq ki, Kristal Abşeron” tikinti şirkətinin Lökbatan ərazisində inşa etdiyi "Qobu Park-2” yaşayış kompleksində 17-ci bina əyilib, çoxmərtəbəli binanın uçmaq təhlükəsi yaranmışdı.
Millət vəkili Tahir Rzayev də aşma təhlükəsi ilə üz-üzə olan binanın sakinlərinin köçürülməsini tələb etmişdi. Deputat bildirmişdi ki, baş verəcək istənilən faciənin məsuliyyəti tikinti şirkətinin boynundadır.
Həmçinin, şirkət feysbuk səhifəsində reklama çıxardığı elanda "Əcəmi 3 layihəsi”ndə 3 otaqlı 75.2 kv.m mənzili ilkin ödəniş 27824 AZN, 20 illik aylıq ödənişi 1074 AZN-ə təklif edir. Bu isə ümumilikdə 285 min manatdan artıq edir. Şirkətin təklif etdiyi bu qiymətlərə isə vətəndaşlar haqlı olaraq etiraz edirlər.
Gülər Nəsibli adlı vətəndaş "Kristal Abşeron”-un qiymət təklifinə cavab olaraq yazır: "70 kv.m lik mənzilin 1 kv.m qiyməti təqribən 4000 manata başa gəlir, özü də Əcəmidə. Şəhərin mərkəzində Dəniz panaramalı mənzilin qiymətindən də baha. Bu qədər fantastik rəqəmlərin səbəbini necə izah edə bilərsiniz?”
Qeyd edək ki, yerli mediada yazılanlara görə "Kristal Abşeron” şirkəti Milli Məclisin deputatı Ağalar Vəliyevə məxsusdur. Ağalar Vəliyev eyni zamanda "Azəraqrartikinti” Açıq Səhmdar Cəmiyyətinin Müşahidə Şurasının sədridir.
