Bakı şəhəri, Səbail rayonu, Rostropoviçlər küçəsi, ev 9-11 ilə Nizami küçəsi, ev 4 ünvanlarının kəsişməsi yerləşən və “Pilot Residence” kooperativinin pilot layihəsi çərçivəsində inşa edilən binanın sakinləri adıçəkilən tikinti şirkətindən növbəti dəfə şikayət edirlər. Belə ki MTK rəhbərliyi qonşu şirkət – “Caspian” MTK-nın avtomobil dayanacağına yol açmaq üçün binanın 1-ci blokundan 7 metr hündürlükdə qazılmaqla yeraltı keçid inşa etmək niyyətindədir. Bunun üçün sakinlərə məktub ünvanlayaraq onların razılığını almaq istəyir. Belə ki, “Pilot Residence” rəhbərliyi mövcud layihəni kobud şəkildə pozaraq, yaşayış kompleksinin mövcud ərazisində Dövlət Şəhərsalma və Arxitektura Komitəsi və ya şəhər icra hakimiyyətindən dövlət icazəsi olmadan öz biznes obyektlərinin tikintisini davam etdirmək istəyir. Və təəccüblüdür ki, yanlış arqument olaraq, heç bir şəkildə əsaslı tikinti layihələrinin təsdiqi üçün birinci qurum olmayan FHN ilə razılaşma istifadə olunur.

Lakin adları aşağıda qeyd olunan bina sakinləri bu addımla razı olmayaraq, MTK-nın planını birmənalı olaraq rədd edirlər. Qəribədir ki, MTK-nın öz funksiyasını, verdiyi vədləri icra etməməsi ilə bağlı məhkəmə işləri davam edə-edə sakinlərin iradəsinin əksinə növbəti addım atmağa hazırlaşır. Səbəb isə digər şirkətə külli miqdarda borcunun olması səbəbindən bunu müəyyən qədər kompensasiya etmək istəyidir.

Bu işdə təhlükəli məqamlar da var. Belə ki, Bakının mərkəzində təpə ərazidə tikilən 12 mərtəbəli yaşayış binasının layihədən kənara çıxılması – yəni altının qazılması onun bünövrəsinə, seysmik -zəlzələ yükünə mənfi təsir göstərə bilər. Bu da nəticədə artıq bəzi mənzillərində çatları olan binada çatların artmasına və müəyyən uçqunlara səbəb ola bilər. Bu işləri bir halda həyata keçirmək olar ki, layihə Dövlət Şəhərsalma və Arxitektura Komitəsi tərəfindən təsdiqlənsin, yenidən geologiya işləri görülsün və bundan sonra yüksək ixtisaslı mütəxəssislərin rəyi əsasında bərpa-gücləndirmə və digər zəruri işləri aparılsın. Belədə sakinlər də arxayınlaşardı ki, məsuliyyət bu işə zəmanət verən dövlət qurumunun üzərində olacaq.

Üstəlik, binanın üzərində tikildiyi torpaq sahəsinin də fərqli geoloji xüsusiyyətləri var. vaxtilə bu ərazi “Kolodeznaya” – yəni quyuların olduğu yer olub. Bakının yaşlı sakinləri deyir ki, vaxtilə Çəmbərəkənd parkı, Mətbuat prospekti, İçərişəhər metrosu həndəvərindəki həyətlərdə çoxlu quyular var idi. Torpaq boşluqlarında – quyularda yığılan bu sulardan heç vaxt içmək üçün istifadə olunmayıb.

Sakinlər isə şikayət edərək bildirir ki, MTK-nın müvafiq dövlət qurumları tərəfindən təsdiq edilmiş layihə planı varsa, niyə onlardan icazə istəyirlər? “İndi, 2024-cü ilin iyun ayında, yəni mövcud layihəni başa çatdırmadan təxminən 5 il sonra qonşu MTK-dan hansısa məhkəmə çəkişmələri ilə bizi, evdə yaşayan ailəni şantaj etməyə çalışırlar. “Caspian” MTK-nın sahibi özü iyunun əvvəlində həyətə gələrək bizimlə görüşdü və şikayət etdi ki, “Pilot Residence” sahibləri onun 5 (!) ildir “evlərini köçürdüyünə görə” borcunu bağlamırlar. Əslində bunun bizə nə aidiyyatı var?! Gedin qonşu MTK ilə problemlərinizi həll edin və nəhayət bizim evin sakinləri qarşısında öhdəliklərinizi bağlayın. Hər şeyin həddi var!”, – deyə ciddi narazılıqlar edirlər.
“Biz Dövlət Şəhərsalma və Arxitektura Komitəsi sədrinin və Səbail rayon icra hakimiyyəti başçısının qəbullarında olmuşuq – hazırda işin bütün təfərrüatları ilə tanışıq. Layihəmiz 2017-ci ilin fevral ayında 2019-cu ilin sonuna qədər tam başa çatdırılması şərti ilə təsdiq edilmişdir. 2019-2020-ci illər ərzində şirkət qanunsuz tikililəriylə yaşayış kompleksimizin bütün layihəsini eybəcərləşdirib. Həyətdə uşaqların oynamağına, sakinlərin istirahətinə imkan yoxdur. 220-yə yaxın ailə normal həyat şəraitindən məhrum olub. Bunu etmək hüququnu “Pilot Residence”ə kim verib?!”, – deyə sakinlər gileylənir.
Xatırladaq ki, Azərbaycan Respublikasının ərazisində əsaslı tikinti layihələrinə təsdiq verəcək yeganə dövlət orqanı Dövlət Şəhərsalma və Arxitektura Komitəsidir. FHN-nin tikinti layihələrinə təsdiq vermək səlahiyyəti yoxdur, yalnız rəy vermək və nəzarət funksiyaları mövcuddur.

Dia-az.İnfo

Dövlət Su Ehtiyatları Agentliyi !
Bu rəsmi dövlət qurumu olsa da rəhbəri Zaur Mikayılov buranı şəxsi holdingi kimi idarə edir. Hətta, öz yaxınlarını, qohumlarını və tanışlarını ətrafına toplayan Mikayılov onlara, "istədiyiniz kimi kollektivi qurun, idarə edin" deyə tapşırıq - daha doğrusu ixtiyar da verib.

"DogruXeber.az" xatırladır ki, bir neçə gün əvvəl "Zaur Mikayılov qudasını özünə müşavir təyin etdi" başlığı ilə yerli mediada yayımlanan məlumatlar böyük rezonans doğurdu.

Qeyd edək ki, Əsəd Şirinov Zaur Mikayılovun vəzifəyə təyin etdiyi ikinci qudası idi. Bundan az əvvəl də digər qudası Fuad Quliyevi özünə müşavir təyin etmişdi. Lakin, sonradan Fuad Quliyevi aparat rəhbəri təyin edən Mikayılov beləcə Qazaxıstanda "Coca-Cola" şirkətinə rəhbərlik edən qudası Əsəd Şirinov üçün vakansiya yeri hazırlamış oldu.

Yerli medianın gündəminə ard-arda bomba kimi düşən bu xəbərlərin yaratdığı səs-küydən deyəsən biraz narahat olan Zaur Mikayılov media gündəminə bir şayiə ötürdü ki, güya qudası istefa verib. Lakin, məlumatı dəqiqləşdirmək üçün əlaqə yaratmağa çalışan mətbuat nümayəndələrinin heç biri ilə qurum tərəfindən iltifata keçilmədi. Bu isə o, deməkdir ki, "qohumcanlı" Mikayılovun "iz itirmək planı" istədiyi nəticəni vermədi.

Yeri gəlmişkən, onu da vurğulayaq ki, bizim Zaur Mikayılov təkcə qohumcanlı deyil, eyni zamanda keçmişini unutmayan, "dostcanlı" mehriban insandır. Onun bu keyfiyyətlərinin bariz nümunəsi elə əvvəllər özünün işlədiyi "Bravo" marketlər şəbəkəsinin bir neçə çalışanlarını savad səviyyəsinin azlığına, çoxluğuna baxmadan əvvəl "Melorasiya və Su Təsərrüfatı" ASC -nə, indi də Dövlət Su Ehtiyatları Agentliyinə daşımasıdır. Özü də qurumun içindən redaksiyamıza verilən məlumata görə marketdən gələnlərin hamısına mühüm vəzifələr həvalə olunub.

Yuxarıda da qeyd etdiyimiz kimi Zaur Mikayılov əvvəl "Melorasiya və Su Təsərrüfatı" ASC-nin sədri vəzifəsində çalışırdı.

Ölkə başçısının 30 mart 2023-cü il tarixli fərmanına əsasən Dövlət Su Ehtiyatları Agentliyi yaradıldı və rəhbəri də Zaur Mikayılov oldu. Fəaliyyətinə və strukturuna nəzər salanda, sadəcə qurumun adı dəyişdirildiyini görmək olar. Amma, ağrıdıcı məqamlardan biri də budur ki, onsuzda Melorasiya və Su Təsərrüfatı ASC olaraq özünü doğrultmayan bu qurumun səlahiyyətləri daha da artırıldı və keçmiş "Azərsu" ASC də "İri Şəhərlarin Birləşmiş Su Təchizatı Xidməti" publik hüquqi şəxsi adı ilə Zaur Mikayılovun "caynağına" verildi.

"Tanımadığı adamlarla işləməyi xoşlamayan" Zaur müəllim demək olar ki, dərhal kütləvi ixtisarlar apararaq qurum çalışanlarını parçaladı.

Təsəvvür edin ki, Bakının Yasamal , Nərimanov, Nəsimi, Sabunçu, Binəqədi və digər rayonlarında Sukanal idarələrinin rəisləri işdən azad ediliblər. İdarələrin digər çalışanlarına isə "özünüzə iş tapın" xəbərdarlığı, daha doğrusu bildirişi göndərilib.

Görünür bu qurumda işləmək şansına nail olmaq üçün ya Zaur Mikayılovla mütləq şəkildə qohum olmaq lazımdır, ya da "Bravo" marketdə iş təcrübəsi.

Maraqlıdır, bu qədər insanların özlərinə harada iş tapmalarını tövsiyyə edirsiniz, Zaur müəllim?

Varmı bildiyiniz iş yerləri?

Hələ bu harasıdır?!

Etibarlı mənbənin redaksiyamıza bildirdiyinə görə kütləvi ixtisarlar qərarı Zaur Mikayılovun "ürəyini tam soyutmayıb". O, eyni zamanda keçmiş "Azərsu" işçilərinin maaşlarının azaldılmasına və çalışma dərəcələrinə görə əmək haqlarına edilən əlavələrin ləğvinə də qərar verib.

İndi keçək işdən çıxarılanların yerinə yeni təyinatlara !

1. Nəzarət Ölçü Cihazları İdarəsinin (ən gəlirli idarə hesab olunur) rəisi Eyvaz Hüseynov vəzifəsindən azad edilib, onun yerinə Zaur Mikayılovun qudasının 1996 ci il təvəllüdlü yaxın qohumu gətirilib.

Xatırladaq ki, Eyvaz Hüseynov keçmiş "Azərsu" ASC-nin sabiq sədri Qorxmaz Hüseynovun qardaşı oğludur.

2. Su Tikinti idarəsinə 1992 - ci il il təvəllüdlü (qudanın qohumu olduğu deyilən) Orxan İmanlı
təyin olunub.

Mənbənin məlumatına görə bu şəxs hər kəslə kobud davrandığı və söyüşlə danışdığı üçün bütün işçilər ondan narazıdır.

3. Yasamal rayon Sukanal idarəsinə 1988 - ci il təvəllüdlü Orucov Sərxan təyinat alıb.

4. Nəqliyyat idarəsinə 1996-cı təvəllüdlü, "Bravo" supermarketlər şəbəkəsindən gələn Sabir Cabrayılov təyin olunub.

5. Keçmiş "Azərsu" ASC sədri Qorxmaz Hüseynovu 3 il əvəz edən Köçərli Həsənovu "İri Şəhərlarin Birləşmiş Su Təchizatı Xidməti" publik hüquqi şəxsinin rəhbər təyin edib. Halbuki, köçərli Həsənovun adı bir zamanlar korrupsiyada hallanırdı. Belə ki, Qaradağ rayonunda milyon manatlıq dəyəri olan qalın stendli böyük borunun satışında Köçərli Həsənovun da adının keçdiyi deyilirdi. Amma, nə hikmətsə, bu məsələdə günahlandırılıb işdən çıxarılan Qaradağ rayon Sukanal idarəsinin rəisi Elnur Əliyev oldu.

Abşeron rayonunda "Qurd dərəsi" adlanan ərazidə yaşayan sakinlərin "DogruXeber.az"a kütləvi müraciətlərində sakinlər iddia edirdi ki, "Azərsu" ASC-nin məsul əməkdaşı əraziyə su borusunun çəkilməsi üçün onlardan müxtəlif məbləğlərdə pullar alıb. Lakin, ümumilikdə 40.000 (qırx min) manatdan yuxarı pul yığılmasına baxmayaraq, bugünə qədər də vətəndaşların su problemləri öz həllini tapmayıb.

Qeyd edək ki, sözügedən vətəndaşlar məsələdə Köçərli rolunun olduğunu iddia edirdilər və hətta bununla bağlı Azərbaycan Respublikasının Baş Prokurorluğuna müraciət etdiklərini deyirdilər.

Bundan əlavə, "DogruXeber.az" az informasiya agentliyi olaraq, həmin vətəndaşların redaksiyamıza rəsmi müraciətləri əsasında Azərbaycan Respublikasının Prezidenti İlham Əliyevə, Vitse-prezident Mehriban xanım Əliyevaya, "Azərsu" ASC rəhbərliyinə və Azərbaycan Respublikasının Baş Prokurorluğuna rəsmi sorğular göndərmişik. Lakin, təəssüflər olsun ki, bugünə qədər nə sorğularımız cavablandırılıb, nə də vətəndaşların iddiasında adı çəkilən məsul şəxslər barəsində qanuni tədbir görülüb.

Köçərli Həsənovun bütün etdiklərinə rəğmən vəzifəsinin artırılması isə hansı "fəaliyyət formaları" ilə Zaur Mikayılovun "rəğbətini qazanmağın" mümkünlüyünün bariz nümunəsidir.

Daha bir real nümunə isə Londonda Milyonluq villaları və oğlunun avtomobil kolleksiyası ilə məşhur olan müavin Rafiq Aslanova, eləcə də sərvətlər ilə kolleqasından heç də geri qalmayan və müxtəlif korrupsiya hallarında adı çəkilən digər müavin Zakir Quliyevə mühüm vəzifələrin həvalə olunmasıdır.

Bu qədər qanunlara meydan oxumaq" və əks davranışlar Zaur Mikayılovun fəaliyyətini izləyən hər kəsdə haqlı şübhələr yaradır.

Yəqin, oxucularımız da bizimlə razılaşar ki, Dövlət məmurunun xalqı "qıcıqlandırma prinsipləri" xalqı dövlətə düşmən etmək məqsədi kimi görünür.

Adam sanki, dövlətdən və xalqdan nəyinsə qisasını alır.

P.S: Qeyd edək ki, Zərdab, Kürdəmir, Şəmkir, Ağdam və Balakən rayonlarının Suvarma Sistemləri İdarələrinin rəislərinin dövlət büdcəsinə vurduqları külli miqdarda ziyanlar və digər qanunsuz əməlləri barəsində dəfələrlə göndərdiyimiz bütün sorğular bugünə qədər də cavabsız qalıb

Dövlət Su Ehtiyatları Agentliyinin daxilində gərgin anlar yaşanır - ŞOK məlumat

Dövlət Su Ehtiyatları Agentliyi, yoxsa ŞƏBƏKƏ BİZNESİ ? - Dövlət qurumunda "Dostluq birliyi" // VİDEO
https://dogruxeber.az/2023/07/10/yerli-yezid-ordusu-fermerlr-zlm-dir-vdeo.html
"Bu idarədə atanın saxtakarlığını örtmək üçün vəzifələri oğullarına verilir" - VƏZİFƏ VARİSLİYİ ?! // VİDEO

Yeyinti və nöqsanlarını yayımlamasın deyə, jurnalistə rüşvət təklif edən idarə müdirinin fəaliyyətinin qısa özəti - VİDEO+FOTO

"Sudan sərvət çıxaran" məmurlar - VİDEO

Suvarma Sistemlər idarələrində korrupsiya bataqlığı - VİDEO

Redaksiyamız hər kəsin söz haqqını tanıyır.

DogruXeber.az

İqtisadi və Sosial Araşdırmalara Yardım İctimai Birliyinin rəhbəri Eyyub Kərimli özünün “Facebook” profilində “Medistyle Hospitl”da baş verən qanunsuzluqlarla bağlı paylaşım edib. O, iddia edir ki, sözügedən şirkət vətəndaşların hüquqlarını pozmaqla yanaşı, vergidən dəd külli miqdarda vəsait yayındırır. Onun statusunu olduğu kimi dərc edirik:

“Dünən (srağagün – red.) “Medistyle Hospitl”da böyük bir qanunsuzluq və özbaşınalıqla üzləşdim. Deməli, ailə üzvümün əməliyyatı üçün Dr Elşad Rzayevə müraciət etdik. Analizlər və əməliyyat üçün böyük məbləğdə vəsait ödədik və bu gün (dünən) saat 9:00-a əməliyyat təyin edildi.

Onu da qeyd edim ki, ödənişi yalnız nəğd formada tələb etdilər, nəğdsiz ödənişi qəbul etmirlər. Ödəniş zamanı qəbz və pasientlə bağlanan müqaviləni surətini istədim, bunların heç biri təqdim edilmədi.

Dünən (srağagün) gecə həkim mənə zəng edib müxtəlif qeyri ciddi səbəblər göstərməklə, əməliyyatı edə bilməyəcəyini bildirdi.

Siz təsəvvür edin, ödəniş qəbzini və xidmət müqaviləsinin surətini istədiyim üçün, çəkinib, əməliyyatdan imtina etdilər. Deməli, bu klinika həm vergidən yayınır, həm pasientin hüquqlarını kobud formada pozur.

Dövlət Vergi Xidmətindən bununla bağlı ciddi ölçü götürməyi, media nümayəmdələrindən isə xahiş edirəm ki, bu məsələni geniş işıqlandırsınlar. Həkim mənə deyir ki, "bilirsiz, savadlı insanlarla işləmək istəmirik, orta bilikli insanlarka işləmək daha rahatdır”. Yəni onları şikəst qoymaq”.

Hazırladı: Jalə FAMİLQIZI

Hurriyyet.az

Redaksiyadan: Qarşı tərəfin mövqeyini dərc etməyə hazırıq.

Bakı-Sumqayıt sürət qatarı işə düşdükdən sonra böyük əksəriyyət elə zənn edirdi ki, Bakının tıxac və sərnişindaşımada mövcud problemlərin bir hissəsinin aradan qalxmasına səbəb olacaq. Lakin bunun tam tərsi müşahidə olunur. Səbəblər çoxdur.
Tribunainfo.az Azərbaycan Dəmiryolları İdarəsinin (ADY) bir sıra neqativ cəhətləri ilə bağlı müəyyən araşdırmalar aparıb. Bu zaman məlum olub ki, problem təkcə Bakı-Sumqayıt sürət qatarları ilə bağlı deyil. Həm də ADY-nin bir sıra məsələlərdə səritəsizlik etməsi də mövcuddur.
Problemlərdən biri budur ki, hal hazırda Bakı-Sumqayıt qatarından istifadə edənlər istifadə etdikləri gediş kartlarından yalnız bir nəfər üçün, yəni özləri üçün istifadə edə bilərlər. Hərçənd bu olduqca məntiqsiz qərardır. Çünki ailəsi ilə birlikdə Bakıya gələn və ya əks istiqamətdə hərəkət edənlər məcburiyyət qarşısında qalaraq, onlar üçün də gediş kartı almalıdırlar. Halbuki “Bakı kart” və digər nəqliyyat vasitələri üçün nəzərədə tutulmuş gediş kartlarında bu neqativlik yoxdur. Yəni, onlar çoxnəfərlik gediş üçün də nəzərdə tutulub.
ADY-nin belə məntiqsiz qərar qəbul etməsinin bir neçə səbəbi var. Onlardan biri bu quruma təyinat almış Rövşən Rüstəmovun dəmiryolu sahəsini yaxşı bilməməsidir. Uzun zaman “Azərpoçt”da “bandrollar şöbəsi”nə rəhbərlik etmiş bu şəxsin dəmiryolları haqqında anlayışı demək olar ki, yoxdur. Digər məsələ isə kart satışı prosesindən pul qazanmaq həvəsidir. Və gedişat da təsdiq edir ki, yalnız bir nəfər üçün gediş kartının nəzərdə tutulmasının başqa səbəbi ola bilməz.
Amma ADY-də dərd bununla da bitmir. Məsələ odur ki, bu qurum qanunvericiliyin pozulması hallarına görə də, xeyli “irəli” gedib. Hələ bu ilin əvvəlində İqtsiadiyyat Nazirliyi yanında Antiinhisar və İstehlak Bazarına Nəzarət Dövlət Xidməti ADY ilə bağlı araşdırmalara başlamışdı. Tribunainfo.az xəbər verir ki, həmin araşdırmalara səbəb isə özəl nəqliyyat şirkətlərinə qarşı ayrı-seçkilik etməsi olub. Rəsmi məlumata görə, ekspeditor (özəl nəqliyyat) şirkətləri ADY-dən şikayətçi düşüblər. Onlar bildiriblər ki, ADY şirkətlərə qarşı haqsız rəqabətə və ayrı-seçkiliyə yol verir. Eləcə də bazar subyektləri ilə əməkdaşlıqdan əsassız olaraq imtina edildiyi bildirilir.
Dövlət Xidməti müəyyən edib ki, ADY rəhbərliyi rəqabəti məhdudlaşdırır, rəqibin işgüzar münasibətləri qanunsuz vasitələrlə qəsdən pozur və dayandırır, kontragentə sərfəli olmayan və ya müqavilələrin məzmununa aid olmayan müqavilə şərtlərinin ona məcburi qəbul etdirir və təsərrüfat qərarlarının icrasına qanunsuz vasitələrlə təsir göstərir.
Qeyd edək ki, bu araşdırmalardan sonra sözügedən xidmət hansı qərar qəbul edib, məlum deyil. Ümumiyyətlə, qərar qəbul olunubsa, Rövşən Rüstəmov neqativ halları aradan qaldırlamlı idi. Lakin görünən odur ki, problem həll olunmayıb. Səbəb isə yenə özbaşınalıq və səriştəsizlikdir.
Bu əsnada, Tribunainfo.az-a daxil olan məlumatlarda deyilir ki, Rövşən Rüstəmov təkcə, ADY-də deyil, elə “Azərpoçt”da işləyən zaman da sərişətiszlik səbəbindən xeyli söz eşidib. Hətta onun “Azərpoçt”da şöbə müdiri olan zaman bir neçə dəfə töhmət aldığı iddia olunur. Bəzi məlumatlara görə, bu töhmətlərdən biri dövlət qurumlarından birinə çatmalı olan bandrolun səhv ünvana göndərilməsi olub. İddialara görə, həmin bandrol isə kifayət qədər ciddi qurumlardan birinə məxsus olub. Nəticədə, qalmaqal yaranıb. Həmin hadisədən Rövşən Rüstəmov güclə sıyrıla bilib. Həmin dönəmdə onun yaxınlarının yuxarı instansiyalardan xahişlərindən sonra məsələ qapadılıb.
Hətta o da iddia olunur ki, həmin vaxt Rüstəmov bir xeyli xərcə düşmək məcburiyyətində də qalıb. Lakin bu xərcin konkret olaraq nədən ibarət olması məlum deyil.
Yazıdakı hallarla bağlı qarşı tərəfin də mövqeyini dərc etməyə hazırıq.

2020-ci ilin aprelində Biləsuvar rayon İcra Hakimiyyətinin başçısı Mahir Quliyevin DTX-nin həyata keçirdiyi əməliyyat-istintaq tədbirləri nəticəsində həbs olunmasından sonra məlum oldu ki, o vəzifəli şəxs olaraq şəxsi maraqları naminə vətəndaşların və dövlətin qanunla qorunan mənafelərinə zərər vuran, hakimiyyət orqanlarının fəaliyyətinə kölgə salan hüquqazidd əməllərə yol verib.

Odur ki, elə həmin il Biləsuvar rayon İcra Hakimiyyətinə yeni başçı təyin edildi. Prezidenti İlham Əliyev Faiq Qürbətovu Biləsuvar rayon İcra Hakimiyyətinin başçısı vəzifəsinə təyin olunması ilə əlaqədar videoformatda qəbul edən zaman xatırlatdı ki, “Mən dəfələrlə demişəm ki, Prezident başda olmaqla bütün dövlət məmurları xalqın xidmətçisidir. Məhz buna görə biz bu vəzifədəyik. Buna görə xalq mənə etibar edib və mən təyin etdiyim bütün kadrlardan bunu tələb edirəm. Ancaq əfsuslar olsun ki, bir çox hallarda, bəzi hallarda yox, bir çox hallarda dövlət məmurları özlərini apara bilmirlər. Onlar hesab edirlər ki, onlara hansısa xüsusi imtiyaz verilib. Onlar qanunları pozurlar, bəzi hallarda çox ciddi pozurlar.”

Avqustda Faiq Qürbətovun Biləsuvar rayon İcra Hakimiyyətinin başçısı təyin olunmasının 4 ili tamam olacaq. Elə ölkə başçısının təbirincə desək Faiq Qürbətovun başçılıq etdiyi rayonda qanunları hələ də pozurlar.

Aktualinfo.org -un Biləsuvar rayon İcra Hakimiyyəti Biləsuvar şəhər Kommunal Müəssisələri Kombinatı tərəfindən keşirilmiş kotirovka sorğusu proseduru ətrafında apardığı araşdırmada bir çox şübhəli məqamlar məlum oldu.

Belə ki, dövlət satınalmalarının vahid internet portalına yerləşdirilmiş məlumata görə Biləsuvar şəhər Kommunal Müəssisələri Kombinatı tərəfindən 29.03.2024-cü il tarixində tullantı konteynerlərinin satın alınması barədə keçirilmiş kotirovka sorğusunda iştirak edən AZ4914, SAATLI RAYONU, ƏLİSULTANLI, ƏLİSOLTANLI, EV 1, MƏNZİL 23 ünvanında qeydiyyatda olan”Saffira Plus” MMC (VÖEN:6701559471) 19 540.80 AZN məbləğində qiymət təklifi vermiş və satınalma komissiyası tərəfindən qalib elan edilmişdir. Əlavə olaraq qeyd edək ki, “Archimed” və “Bakı Universal Maşınqayırma” MMC-ləri “Dövlət satınalmaları haqqında” Azərbaycan Respublikasının Qanununun 35.1.1-ci maddəsinə əsasən satınalmadan kənarlaşdırılmışdır. Qeyd edilənləri nəzərə alaraq “Dövlət satınalmaları haqqında” Azərbaycan Respublikasının Qanununun müddəalarına uyğun olaraq 21.05.2024-cü il tarixinədək gözləmə müddəti təyin olunmuşdur. (Bildirişin göndərildiyi gündən sonrakı iş günü gözləmə müddəti başlayır və 5 (beş) iş günü ərzində qüvvədə olur.)

İqtisadiyyat Nazirliyi yanında Dövlət Vergi Xidmətinin vergi ödəyicilərinin məlumat bazası üzərindən apardığımız araşdırmada məlum oldu ki, “SAFFİRA PLUS” Məhdud Məsuliyyətli Cəmiyyətinin 26.01.2023-cü il tarixdə Dövlət Vergi Xidmətinin 5 saylı Ərazi Vergilər İdarəsində dövlət qeydiyyatına alınıb.Reyestr məlumatlarında nizamnamə kapitalı 10 manat olan MMC-nin hüquqi ünvanının SAATLI RAYONU, ƏLİSULTANLI, ƏLİSOLTANLI, ev 1, m. 23, qanuni təmsilçisi kimi isə Zeynalova Nurlanə Şahin qızı qeyd olunub.

Bəs Zeynalova Nurlanə Şahin qızı kimdi?

Sumqayıt şəhər Yaşıllaşdırma İdarəsinin yaşıllıqların salınması işləri üzrə mart ayında keçirilmiş dəyəri 293 min 230 manat olan tender müsabiqəsinin qalibi olmuş “4 MM AQRO” (VÖEN- 6701560141) MMC-nin də qanuni təmsilçisi. Hansı ki, araşdırdığımızda məlum oldu ki, “4 MM AQRO” MMC tender müsabiqəsinin başlamasından cəmi 7 gün əvvəl dövlət qeydiyyatına alınıb. Kommersiya qurumunun hüquqi şəxslərin dövlət reyestrinə daxil edilmiş məlumatlarda bu MMC -də “SAFFİRA PLUS” MMC ilə eyni tarixdə, eyni ünvanda dövlət qeydiyyatına alınıblar. Hansı ki, həmin kəndə dövlət qeydiyyatına alınmış bir neçə MMC də var ki, dəyəri yüzminlərlə ölçülən bir çox şübhəli satınalmaların qalibi seçiliblər. “SAFFİRA PLUS” MMC-nin qanuni təmsilçisi kimi isə Zeynalova Nurlanə Şahin qızının o kənddə pasport qeydiyyatının olmaması barədə də məlumatlar var.

Göründüyü kimi Zeynalova Nurlanə Şahin qızı eyni zamanda “4 MM AQRO” MMC-nin qanuni təmsilçisidir. Bu da Nazirlər Kabinetinin 28 iyul 2020-ci il tarixli 265 nömrəli Qərarı ilə təsdiq edilmiş “Riskli vergi ödəyicisinin, о cümlədən riskli əməliyyatların Meyarları”na görə yolverilməzdir. Belə olan halda Biləsuvar şəhər Kommunal Müəssisələri Kombinatının Satınalma Komissiyası “SAFFİRA PLUS” MMC-nin qeyd olunan satınalmada iştirakına necə yol verib?

Göründüyü kimi Biləsuvar şəhər Kommunal Müəssisələri Kombinatı ilə “SAFFİRA PLUS” MMC arasında bağlanmış satınalma müqaviləsində şübhəli məqamlar var. Belə ki, satınalmanın keçirilməsi zamanı bu hala ya Kombinatın Satınalma Komissiyası göz yumub, ya da “SAFFİRA PLUS” MMC-nin qanuni təmsilçisi kimi isə Zeynalova Nurlanə Şahin qızı ona satınalmalarda iştirak hüququ verən sənədləri saxtalaşdırıb.

Qeyd edək ki, 2020-ci ildə DTX-nin Biləsuvar rayon İcra Hakimiyyətində həyata keçirdiyi əməliyyat-istintaq tədbirləri nəticəsində işindən olanların biri də Biləsuvar şəhər Kommunal Müəssisələri Kombinatının rəisi Xalidə Ağayeva da olub. Onun yerinə 2021-ci ilin iyulunda Ceyhun Həyatov təyin olunub. Yuxarıda qeyd etdiyimiz məlumatlardan görsənən odur ki, nə Biləsuvar rayon İcra Hakimiyyətinin başçısı Faiq Qürbətov, nə də onun kadrı şəhər Kommunal Müəssisələri Kombinatının rəisi Ceyhun Həyatov Prezidentin tövsiyyələrindən bir nəticə çıxara bilməyiblər.

Azərbaycan Respublikasının prezidenti İlham Əliyevin 17 oktyabr 2015-ci il tarixdə imzaladığı sərəncamla MTN rəhbəri Eldar Mahmudovun tutduğu vəzifədən kənarlaşdırılması ölkənin ictimai–siyasi həyatında böyük rezonans yaratdı. Məlum oldu ki, sabiq nazir ona göstərilən yüksək etimaddan öz çirkin məqsədləri üçün istifadə edərək, ətrafina topladığı cinayətkar dəstə vasitəsilə sahibkarlara, o cümlədən imkanlı şəxslərə qənim kəsilərək, soyğunçuluqla məşğul olub.

Hər gün Eldar Mahmudovun dəstəsinin üzvləri tərəfindən külli miqdarda vəsaiti talanan sahibkarların yeni şikayətlərinin şahidi oluruq. Vəzifə səlahiyyətlərindən sui-istifadə istifadə edən MTN əməkdaşlarının, o cümlədən generalların işdən qovulması və həbs olunmaları az qala bütün dünyaya səs salsa da, Eldar Mahmudovun cinayətkar dəstəsinin hələlik cəzadan kənarda qalan üzvləri öz çirkin əməllərindən əl çəkmirlər.

MTN-də illərdir kök salmış cinayətkar dəstənin qurbanlarından biri də AMA ASC–nin sahibkarı və səhmdarlarıdır. Səhmdarların AzPolitika-ya verdikləri məlumata görə, üç ildir AMA ASC (köhnə Sabunçu Bazar -5) səhmdarların illik ümumi yığıncağını keçirmir. Səhmdarların hüquqları ASC-ni zəbt edən bir qrup mütəşəkkil cinayətkar dəstənin üzvləri tərəfindən kobud şəkildə pozulub. 2013-cü ilin oktyabr ayında AMA ASC-nin İdarə Heyətinin sədri Rəşad Əlizadə səhmdarların növbədənkənar iclasını ASC-nin inzibati binasında deyil, küçədə keçirməli olub. R.Əlizadə səhmdarlara bildirib ki, 6 avqust 2013–cü ildə gündüz saat 11-12 radələrində idmançı Fariz Məmmədov 25 nəfərin müşaiyyətilə AMA ASC-nin ərazisini zəbt ediblər. Həmin günün səhəri yenidən Fariz Məmmədovun rəhbərliyilə, altısı dünya çempionu olmaqla, 55 nəfər idmançı ASC-nin inzibati binasına hücum edərək, İH-nin sədri R.Əlizadəyə, baş mühasibi Allahverdi Mahmudova və digər işçilərə zor tətbiq edərək, döyə-döyə ASC-nin ərazisindən qovub çıxarıblar. Hadisəylə əlaqədar 102 xidmətinə edilən müraciət əsasında əraziyə gələn polis əməkdaşları da cinayətkar dəstə barədə heç bir inzibati tədbir görməyib. Qanuna zidd olaraq, ASC-nin inzibati binasını zəbt edərək xəzinədarın otağına daxil olan F.Məmmədov və dəstənin digər üzvləri cəmiyyətin möhürü və külli miqdarda vəsait olan seyfi ələ keçiriblər. Dəstə F.Məmmədovun rəhbərliyilə, qeyri–qanuni olaraq, cəmiyyətin iş rejimini və əməkdaşların əmək fəaliyyətini dayandırıblar. Nəticədə AMA ASC–nin Vergilər Nazirliyinə və əlaqədar dövlət təşkilatlarına külli miqdarda borcu yığılıb qalıb. Məlumata görə, ASC-yə basqın edən idmançıların içərisində qaydasız döyüş üzrə dünya çempionları Şəhriyar və Bəxtiyar qardaşları da iştirak ediblər. R.Əlizadənin səhmdarlara dediyinə görə, ara sakitləşəndən sonra F.Məmmədovla aparılan danışıqlar zamanı o, bəzi etiraflar edib. Deyib ki, idmançılardan ibarət dəstə “BAKU STEEL COMPANY” MMC-nin Müşahidə Şurasının sədri Rasim Məmmədovun göstərişilə hərəkət edir. Məqsəd düşünülmüş plan əsasında özünün və əlbir olduğu bəzi “yüksək vəzifəli şəxslərin” maraqlarını təmin etməkdir. Belə ki, bir-biri ilə qohumluq əlaqələri olan Səfər Süleyman oğlu Əliyev, onun oğlu, MTN Astara rayon şöbəsinin sabiq rəisi (Bugünlərdə işdən çıxarılıb-red) Ceyhun Səfər oğlu Əliyev, yaxın qohumluq əlaqələri olan Novruzəli Qaraş oğlu Əsgərov, Sahib Əli oğlu Həşimov və o, təklif əsasında AMA ASC–ni zəbt ediblər. Deyilənə görə, “BAKU STEEL COMPANY” MMC-nin Müşahidə Şurasının sədri Rasim Məmmədov özü şəxsən bildirib ki, AMA ASC 400 000 (dörd yüz min) manata sabiq MTN əməkdaşı, hazırda həbsdə olan Ceyhun Əliyevin atası Səfər Əliyev və Sahib Həşimov tərəfindən alqı-satqı yolu ilə alınıb.

“Hətta bizə hədə-qorxu gələrək öz cinayətkar əməllərini pərdələmək üçün deyilib ki, guya bu məsələ PA-nın rəhbəri Ramiz Mehdiyev və oğlu Timur Mehdiyevin nəzarəti altindadir. Lakin biz düşünürük ki, bu sabiq nazir Eldar Mahmudovun ətrafindakı dəstənin Prezident Administrasiyasının rəhbəri Ramiz Mehdiyevə və onun yaxınlarına, ailə üzvlərinə qarşı məqsədli şəkildə düşünülmüş təxribatıdır”, deyə səhmdar bildirib.

Dövlət məmurlarının adlarından öz çirkin məqsədləri üçün istifadə edərək, 6 avqust 2013-cü il tarixdən bu günədək Fariz Məmmədovun rəhbərliyi ilə idmançılardan ibarət dəstə AMA ASC-nin gəlirlərini mənimsəməklə, həm dövlətə, həm də səhmdarlara külli miqdarda ziyan vurmaqla məşguldurlar. Sabiq nazir Eldar Mahmudovla isti münasibətlərdə olan MTN-in Astara Rayon Şöbəsinin sabiq rəisi Ceyhun Səfər oğlu Əliyev və atası Səfər Süleyman oğlu Əliyev (Türkiyənin Antalya şəhərində otel tikintisi ilə məşğuldur), Sahib Əli oğlu Həşimov və xalası oğlu Novruzəli Qaraş oğlu Əsgərov, Aydın Əhmədov (vasitəçi Mərdəkan Broyler ASC-də rəhbər vəzifədə çalışıb), Vidadi Orucov (ləqəbi “Vadim”, RF-nın vətəndaşıdir, Moskva şəhərində OMON-da işləyir), qardaşı Ramiz Orucov və kriminal aləmdə Alik ləqəbiyiə tanınan, özünü MTN-nin polkovniki kimi təqdim edən Allahverdi Abbasov və Məzahir adli şəxs qabaqcadan əlbir olaraq, AMA ASC-ni ələ keçiriblər.

Deyilənə görə, Allahverdi Abbasovun həyat yoldaşı Ədliyyə Orqanlarında çalışır. Zərərşəkmiş tərəf MTN-nin əməkdaşı olmuş Ceyhun Əliyevin rəhbərliyilə mütəşəkkil cinayətkar dəstə tərəfindən əmlakının zəbt olunması və külli miqdarda vəsaitinin talan olunması ilə əlaqədar dəfələrlə MTN-nə müraciət etsə də, heç bir tədbir görülməyib. Günün günorta çağı Sabunçu rayonunun mərkəzində quldur dəstəsi açıq-aşkar AMA ASC-nin hazırkı sahibkarını öz mülkünə buraxmır, dövlətə heç bir vergi ödəmədən ASC-nin gəlirlərini mənimsəyir. “Bəs görəsən Sabunçu rayon İH –nin başçısı Adil Vəliyev hara baxır? Vergilər naziri Fazil Məmmədov 3 il vergidən yayınan AMA ASC-ni niyə cəzalandırmır? AMA ASC-ni zəbt edən idmançılardan ibarət adları adam oğurluğunda hallanan quldur dəstəsinin havadarı kimdir? Hal–hazırda Prezident İlham Əliyevin ciddi göstərişilə sahibkarları talamaqla məşğul olan cinayətkarlara qarşı mübarizə aparıldığı vaxtda, Fariz Məmmədov və onun havadarları öz cinayətkar əməllərinə son qoymurlar. Görünən odur ki, Eldar Mahmudovun yaratdığı “MTN”çi quldur dəstəsi hələ də öz işindədir. Həbs edilənlər aysberqin görünən tərəfidir. Bir qrup idmançıdan ibarət quldur dəstəsini maliyyələşdirərək sahibkarların mülkünü zəbt edən hazırki mütəşəkkil cinayətkar dəstənin havadarı kimdir? Əmlakı talanan sahibkar dəfələrlə əlaqədar dövlət məmurlarına şikayət etsə də, onun şikayətləri qulaq ardına verilir.”

Yazıda adları çəkilən şəxslərin də mövqeyini işıqlandırmağa hazırıq.

AzPolitika.info

Asif Ağayev Beyləqan rayon icra başçısı vəzifəsindən çıxarıldıqda sonra rayon İcra Hakimiyyətində yoxlamalar aparılır...

Poliqon xəbər verir ki, bu barədə "Beyləqan Xəbərləri" səhifəsi məlumat yayıb. Səhifə iddia edir ki, bir neçə gündür Baş Prokrouluq işçiləri Beyləqan rayon İcra Hakimiyyətində korrupsiya yoxlamasına başlayıblar.

İcra binasının dəhlizlərində gəzən söhbətlərə görə artıq icra hakimiyyətinin Ərazi idarəetmə və yerli özünüidarəetmə orqanları ilə iş şöbəsinin müdiri İlqar Quliyev Bakıya çağrılaraq dindirilib. Həmçinin yaxın vaxtlarda digər məsul şəxslər, o cümlədən Asif Ağayevin dövründə əsas şəxs sayılan başçının müavini-ictimai-siyasi və humanitar məsələlər şöbəsinin müdiri Yeganə Məmmədovanında istintaqa cəlb edilmək ehtimalı var.

Səhifənin əldə etdiyi məlumata görə, Yeganə Məmmədovaya Asif Ağayevin dövründə sosial vəziyyəti çətin olan ailələrin övladlarına kömək adı altında rayon icra hakimiyyətinin büdcəsindən ayrılan vəsaitin bir hissəsinin mənimsədiyinə görə cinayət işi açıla bilər. Məlumatda qeyd edilir ki, Yeganə Məmmədovanın anasına və qardaşına bir neçə əmək haqqı kartı verdiyi və hər ay başçı müavinin anası ilə qardaşının bu kartlardan özləri üçün pul çıxartmaları barədə məlumatlar var.

"Beyləqan Xəbərləri"nin əldə etdiyi digər ilginc məlumatda isə bildirilir ki, Asif Ağayev vəzifəsindən çıxarılan günü 6 iyin tarixində Sabirabad rayonunda Asif Ağayev, şöbə müdiri İlqar Quliyev, digər şöbə müdiri Heybət Əliyev və Yeganə Məmmədova birlikdə görüş keçirərək ortaya çıxacaq korrupsiya faktlarından qurtulmağın yollarını müzakirə ediblər. Həmin günü Yeganə Məmmədova Bakıda imiş və o, paytaxtdan Sabirabada gələrək görüşə qatılıb.

Poliqon.info