Fövqəladə Hallar Nazirliyi Tikintidə Təhlükəsizliyə Nəzarət Dövlət Agentliyi “Azkommunlayihə” Kommunal Layihələndirmə İnstitutu yeni tender keçirib.

Tribunainfo.az xəbər verir ki, nazirlik FHN İdman-sağlamlıq klubunda voleybol meydançası üçün Video Challange sisteminin satınalınmasını həyata keçirəcək.

FHN bununla əlaqədar “QAFQAZNET” MMC ilə satınalma müqaviləsi bağlayıb. Layihənin həyata keçirilməsinə isə 205.375,46 manat xərcləyəcək.

Qeyd edək ki, FHN-lə “Qaqaznet” arasında bu, ilk sövdələşmə deyil. Bundan əvvəl də nazirlik bir neçə iri tenderlərini bu şirkətə həvalə edib. Məsələn, FHN Maddi Texniki-Təchizat İdarəsi 2023-cü ildə 3 tenderini “Qafqaznet” MMC-yə verib. Təkcə iki müqavilənin dəyəri 3 724 670 manat təşkil edib.

Elə ötən il də analoji tenderlər reallaşdırılıb.

Bildirək ki, 2015-ci ildə təsis edilən “Qafqaz Net” MMC “Gilan Holdinq” daxilində biznes strukturları arasında mərkəzləşdirilmiş şəbəkə infrastrukturunun yaradılması və internet xidmətinin verilməsini həyata keçirir. Şirkətin rəhbəri Cəfərov Adil Ələddin oğludur.

Açıq mənbələrdə isə iddia olunur ki, “Gilan Holdinq” FHN rəhbəri Kəmaləddin Heydərova yaxın şirkətlərdən biridir.

“Canişin həzrətləri” Naxçıvanda muxtariyyətə aid olan hər şeyi məhv etməyi qarşısına məqsəd qoyub.
Naxçıvandakı mənbəmizin iddiasına görə, son zamanlar bu istiqamətdə müntəzəm addımlar atılır, Muxtar Respublikanın ruhunu incitmədən onun bütün muxtar səlahiyyətləri əlindən alınır.
“Canişin”in bu istiqamətdə atdığı bir sıra addımları barədə müntəzəm məlumatlarla sizləri tanış etdiyimizdən keçmişdə baş verənləri təkrarlayıb qiymətli zamanınızı almaq fikrindən uzağıq. Bu yazımızda sadəcə “Canişin” həzrətlərininin həyata keçirməyə hazırlaşdığı bir sıra hüquqi islahatlarla bağlı bəzi məlumatları diqqətinizə çatdıracağıq.
Ovqat.com-un məlumatına görə, “canişin” həzrətlərinin növbəti addımı Naxçıvanda bir sıra orqanları ləğv etmək, bəzilərinin isə çəkisini aşağı salmağa yönəlib.
İslahat 1: “Naxçıvan hara, Ombudsman hara?
Onun ləğv etmək istədiyi birinci məsələ Naxçıvan Muxtar Respublikasının İnsan Hüquqları üzrə Müvəkkili (Ombudsman) təsisatıdır. O bu qurumu regional mərkəzə çevirmək istəyir. Belə olduqda orada bir sıra işçilər ixtisara düşməklə yanaşı, işləyən işçilərin əmək haqqları isə kəskin aşağı düşəcəkdir. Canişinin bu vecinə də deyil!
İslahat 2: “Qısırlaşdırılmış Ali Məhkəmə"
Ən böyük həngamə Naxçıvan Muxtar Respublikasının Ali Məhkəməsi ilə bağlıdır. Naxçıvan Muxtar Respublikası Konstitusiyasının 44-cü maddəsinin I hissəsinə görə, Naxçıvan Muxtar Respublikası Ali Məhkəməsi ümumi və ixtisaslaşdırılmış məhkəmələrin icraatına aid edilən mülki, cinayət və digər işlər üzrə ali məhkəmə orqanıdır; o, Naxçıvan Muxtar Respublikasının ərazisində apelyasiya qaydasında ədalət mühakiməsini həyata keçirir.
Bununla bərabər, Naxçıvan Muxtar Respublikasının Ali Məhkəməsi Naxçıvan Muxtar Respublikasında Konstitusiya nəzarətini təmin edir. O, Naxçıvan Konstitusiyasının 44-cü maddəsinin II hissəsinə görə, müəyyən subyektlərin sorğusu ilə Naxçıvanın qanunvericilik aktları arasında uyğunluq məsələlərini həll edir.
Bundan başqa, Naxçıvan Konstitusiyasının 44-cü maddəsinin III hissəsinə görə hər kəs onun hüquq və azadlıqlarını pozan Naxçıvan Muxtar Respublikasının qanunvericilik və icra hakimiyyəti orqanlarının normativ hüquqi aktlarından bu maddənin II hissəsinin 1-3-cü bəndlərində göstərilən məsələlərin Naxçıvan Muxtar Respublikasının Ali Məhkəməsi tərəfindən həll edilməsi üçün, habelə bələdiyyə və məhkəmə aktlarından Naxçıvan Muxtar Respublikasının Ali Məhkəməsinə pozulmuş insan hüquq və azadlıqlarının bərpa edilməsi məqsədilə qanunla müəyyən edilmiş qaydada şikayət verə bilər.
Naxçıvan Konstitusiyasının 16-cı maddəsi isə Naxçıvan Muxtar Respublikası Ali Məclisi deputatlarının seçkilərinin nəticələrinin yoxlanılması və təsdiqi adlanır və həmin maddəyə görə seçkilərin nəticələrinin düzgünlüyü qanunla müəyyən edilmiş qaydada Naxçıvan Muxtar Respublikasının Ali Məhkəməsi tərəfindən yoxlanılır və təsdiq edilir.
Nəyə görə Naxçıvan Muxtar Respublikasının Ali Məhkəməsi ilə bağlı qanunvericiliyin tələblərini uzun-uzadı danışdım, bunun səbəbi var!
Əldə etdiyimiz dəqiq məlumata görə, Canişin həzrətləri Naxçıvan Konstitusiyasının yeni layihəsində Naxçıvan Muxtar Respublikası Ali Məhkəməsinin adının “apellyasiya məhkəməsi” olaraq deyişdirilməsini istəyir. Belə olduqda, bu həzərat anlamır ki, Naxçıvan MR Ali Məhkəməsinin adı “Naxçıvan MR Apellyasiya Məhkəməsi” olaraq dəyişdirilərsə, bəs, o zaman, Naxçıvan Muxtar Respublikasının qanunvericilik sisteminə münasibətdə Naxçıvan Muxtar Respublikasında Konstitusiya nəzarətini hansı orqan təmin edəcək? Və ya Naxçıvan Muxtar Respublikası Ali Məclisi deputatlarının seçkilərinin nəticələrinin yoxlanılması və təsdiqini hansı orqan həyata keçirəcək???
Bəlkə canişin hesab edir ki, bu fundamental və zəruri konstitusiya nəzarəti funksiyasını elə adı “Naxçıvan MR Apellyasiya Məhkəməsi” olan orqan həyata keçirə bilər?
Yanılır! Ölkə rəhbərliyinin diqqətindən yayınmaqla tələm-tələsik bu layənin qəbul edilməsinə cəhd göstərir. Halbuki, Konstitusiya nəzarəti səlahiyyətlərini apellyasiya məhkəməsinə vermək olmaz! Naxçıvan Muxtar Respublikasının qanunvericilik sisteminə münasibətdə konstitusiya nəzarəti funksiyasının AR Konstitusiya Məhkəməsinə də verilməsi düzgün deyil! Çünki regional səlahiyyət respublika əhəmiyyətli ali dövlət orqanı olan Konstitusiya Məhkəməsinə həvalə edilə bilməz!
Naxçıvan MR Ali Məhkəməsinin adının Apellyasiya Məhkəməsi olaraq dəyişdirilməsi bu məhkəmənin əlindən konstitusiya nəzarəti funksiyasının alınması deməkdir ki, bu başqa ciddi məsələyə də mənfi təsir göstərir. Belə olduqda muxtar respublika sakinləri onun hüquq və azadlıqlarını pozan Naxçıvan Muxtar Respublikasının qanunvericilik və icra hakimiyyəti orqanlarının normativ hüquqi aktlarından bu maddənin II hissəsinin 1-3-cü bəndlərində göstərilən məsələlərin Naxçıvan Muxtar Respublikasının Ali Məhkəməsi tərəfindən həll edilməsi üçün, habelə bələdiyyə və məhkəmə aktlarından Naxçıvan Muxtar Respublikasının Ali Məhkəməsinə pozulmuş insan hüquq və azadlıqlarının bərpa edilməsi məqsədilə qanunla müəyyən edilmiş qaydada şikayət verə BİLMƏYƏCƏKDİR!
BU İSƏ CANİŞİN həzrətlərinin insan hüquqlarını boğması, insan haqlarını kobud şəkildə məhdudlaşdırması deməkdir!
Vasif Talıbova min şükür! O heç olmasa qanunvericilik müstəvisində insan haqlarını tanıyırdı!
Bu dəyişikliklərə qarşı çıxmaq istəyən hər kəsi Canişin gözünün düşməni hesab edir!
Tarixdə ilk dəfə olaraq Naxçıvan Muxtar Respublikasının Ali Məhkəməsi konstitusiya nəzarəti funksiyasını yerinə yetirərək 11 iyun 2000-ci ildə Naxçıvan Muxtar Respublikasının Ali Məhkəməsi sədrinin sorğusu əsasında Naxçıvan Muxtar Respublikası Nazirlər Kabine¬tinin 22 may 2000-ci il tarixli 103 saylı qərarının Naxçıvan Muxtar Respublikasının Konstitusiyasına uyğunluğu məsələsinə baxaraq müvafiq qərar qəbul etmişdir. Sonrakı dövrlərdə isə Naxçıvan Muxtar Respublikasının Ali Məhkəməsi Naxçıvan Muxtar Respublikası Konstitusiyasının 16-cı maddəsi ilə ona aid edilmiş səlahiyyəti həyata keçirərək konstitusiya nəzarəti qaydasında Naxçıvan Muxtar Respublikasının Ali Məclisinə müxtəlif vaxtlarda keçirilmiş seçkilərin, o cümlədən əlavə seçkilərin nəticələrinin düzgünlüyünü yoxlayaraq təsdiq etmişdir. İndi isə görünən budur ki, “canişin” həzrətləri Naxçıvanın muxtar hüquqlarını rəsmən bəyan etmədən ləğv etməklə məsələni səs-küysüz çözməyə başlayıb. Görünür, səs-küylü hüquqi islahatların əlavə baş ağrısına yol açacağından narahatdır.

OVQAT.com

Bakı şəhəri, Süleyman Rüstəm küçəsi, ev 33, 33 a və 33 b binalarının sakinləri "İDEA” ictimai Birliyinin rəhbəri, Heydər Əliyev Fondunun vitse-prezidenti Leyla xanım Əliyevaya müraciət edib.

Müraciətdə deyilir:

Bakı şəhəri, Nəsimi rayonu, Süleyman Rüstəm küçəsində yerləşən 33 nömrəli bu binalar 1960-cı ildə tikilib. Məhəlləmiz 11 blok və 165 mənzildən ibarət olaraq, əslində üç binanın (A, B, C) birləşməsi kimi inşa edilmişdir. Hər mənzildə ortalama 5 nəfərin olması hesabı ilə binalarda hal-hazırda 800 nəfərdən artıq insan yaşayır. Lakin əfsuslar olsun ki, bu qədər insanın yaşadığı binada və onu əhatə edən ərazidə normal yaşayış və istirahət şəraiti yox səviyyəsindədir.
Nəzərə alsaq ki, bina şəhərin mərkəzində ABŞ səfirliyinin və bir sıra ali təhsil müəssisələrinin yaxınlığında yerləşir. Günü-gündən yeniləşən, müasir görkəmi ilə dünyanın ən gözəl şəhərlərinin sıralamasında yer alan Bakının mərkəzi hissəsində böyük bir məhəllənin bu cür acınacaqlı, bərbad vəziyyətdə olması heç də ürəkaçan deyil.

Dəfələrlə mövcud vəziyyətin dözülməzliyi ilə bağlı yuxarı instansiyalara müraciət etməyimizə baxmayaraq, bu günə kimi heç bir müsbət dəyişiklik baş verməyib.
Uzun zamandır ölkənin ali instansiyalarına ünvanladığımız məktublar problemin həll edilməsi üçün müvafiq olaraq Nəsimi rayon İcra Hakimiyyətinə yönəldilir.
Ancaq təəssüflər olsun ki, altı aydır icra başçısı olmayan Nəsimi rayon icra Hakimiyyəti hər dəfə bizim məktublarımıza formal cavab verərək məhəlləmizdəki problemlərin həlli üçün vəsaitin olmadığını bildirirlər.

Bizim məhəlləmizə birbaşa cavabdeh olan qurumların, Nəsimi rayon icra Hakimiyyətinin, ərazimizə nəzarət edən 52 saylı Mənzil Kommunal İstismar Sahəsinin yaşadığımız acınacaqlı duruma bu cür məsliyyətsiz, laqeyd yanaşması Sizin son illər Bakı şəhərində, eləcə də şəhərimizin ətraf qəsəbələrində sakinlərin sosial-mədəni həyatlarının daha da yaxşılaşması üçün apardığınız əsaslı yenidənqurmaya, əsrarəngiz layihələrinizə ciddi kölgə salır.

Dəfələrlə ən adi bir problemin həlli üçün 52 saylı Mənzil Kommunal İstismar Sahəsinin rəisi İqrar Sadıqova edilən müraciətlərimiz havadan asılı qalır.

Məhəlləmizdə olan 3 yaşayış binasında yaşayan ailələrin azyaşlı uşaqlarının vaxtlarını səmərəli keçirmələri, əylənmələri üçün ərazidə heç bir şərait yoxdur.

Məhəlləmizin hər tərəfində sınıq-salxaq zibil yeşikləri bel-belə yığılıb.

Həyətimizdə olan daş pilləkanların döşəməsi 1960-1970-ci illərdə döşənib.

Divarlardan ağlay üzlüklü daşlar qopub yerə tökülür.

Üç binanın sakinlərinin həyətdə oturmaları, dincəlmələri üçün bir dənə də olsun skamya yoxdur.

Bizim yaşadığımız bu üç binanın həyətində olan söhbətgah 1970-80-ci illərdən qalıb.

Həyətimizdə olan yeganə bulaqdan uzun illərdir ki, su gəlmir. Bütün bunlar azmış kimi 52 saylı Mənzil Kommunal İstismar Sahəsinin rəisi həyətimizin girişinə şlanqbaum qoyaraq həyətimizi "parkovkaya" çevirib.

Mövcud vəziyyətin ağırlığından şikayətlənən sakinlər daha sonra deyirlər.

Son illər Bakı şəhərində Sizin şəxsi təşəbbüsünüz və rəhbərliyinizlə həyata keçirilən "Abad məhəllə" layihəsi üzrə bir çox binalar, məhəllələr, həyətlər abadlaşdırılmış, uşaq və idman meydançaları inşa edilmişdir.

Sizin bu layihəniz minlərlə vətəndaşımızın, körpələrimizin böyk sevincinə səbəb olub.

Biz əminik ki, Siz bizim harayımıza səs verəcəksiz. Bizim məhəlləmiz də abad məhəllə olacaq. Bizim övladlarımız da sevinc yaşayacaqlar.

Hal-hazırda, ümidi hər yerdən üzülmüş, səsimizə heç kimin səs vermədiyi 33 nömrəli binanın sakinləri olaraq yeganə arzumuz müasir oturacaqların heç olmazsa bir neçəsini öz həyətimizdə görmək, övladlarımızın əylənmələri üçün atraksionların quraşdırılması, binamızın kommunikasiya və təklükəsizlik sisteminin yaradılmasıdır.

Sonda bina sakinləri müraciətlərində yazırlar:

Hörmətli Leyla xanım!

Sizdən xahiş edirik ki, bizim bir Azərbaycan Respublikası vətəndaşı olaraq, təhlükəsizlik, sağlam mühütə olan hüququmuzun pozulmasına yol verməyəsiniz. Yaşadığımız 33 nömrəli binanın təmir edilməsi və həyətyanı sahənin abadlaşdırılmasına köməklik göstərməyinizi Sizdən xahiş edirik. Ümid edirik ki, Sizin dəstəyinizlə abadlaşan məhəlləmizə övladlarımızın yaşadıqları sevinci görməyə gələcəksiniz.

Mənbə: İnterposta.info

Dövlət Su Ehtiyatları Agentliyində islahatlar aparılsada bir çox qurumların idarə rəisləri yenə də "köhnə qaydalarla" işləməkdə davam edir.

Mia.az xəbər verir ki, "ənənəvi metodlara" sadiq qalan idarə rəislərindən biri də Biləsuvar Suvarma Sistemləri İdarəsinin müdiri Ədalət Babayevdir.

Dövlət Su Ehtiyatları Agentliyinin sədri Zaur Mikayılovun əmri ilə yenidən Biləsuvar Suvarma Sistemləri İdarəsinin rəis təyin edilən Ədalət Babayev adı çəkilən qurumda "ailə podratı" yaradıb.

Saytımıza daxil olan məlumata görə Ədalət Babayev oğlunu mühəndis, baldızı oğlunu isə müavin təyin edib. Bildirilir ki, Ədalət Babayev oğlu Orxan Rəşidlinin vəzfisəni 4 ay müddətində 3 dəfə dəyişib. Belə ki, Orxan Rəşidli sınaq müddətində ilk öncə 1-ci texnik təhcizatda mühəndis, sonra ümumi şöbədə mühəndis, daha sonra isə su bölgüsündə mühəndis təyin edilib.

Digər məlumatda bildirilir ki, hazırda Biləsuvar Suvarma Sistemlərini Ədalət Babayevin baldızı oğlu və müavini Elsəvər Həsənov idarə edir. Yanacaq məsələlərindən tutmuş, texnikaların təhcizatı və hərəkətinə qədər bütün işləri əlinə alan Elsəvər Həsənovun yaxın gələcəkdə Ədalət Babayevin dəstəyi ilə başqa bir rayona idarə rəisi təyin ediləcəyi iddia edilir. (Azfakt.com)

***

Biləsuvar Su Meliorasiya Sistemləri İstismarı İdarəsinin rəisi Ədalət Babayev haqqında bir sıra saytlarda yayılan məlumata münasibət bildirib.

Mia.az-ın məlumatına görə, o, Faktinfo.az saytına açıqlamasında təyinatları belə izah edib:

"Birincisi, oğlum Orxan Rəşidli struktur islahatları aparılana qədər rəhbəri olduğum idarədə işləməyib. O, Cənub Muğan Kanalı İstismar İdarəsində müxtəlif işlərdə,o cümlədən qısamüddətli kanal rəisi vəzifəsində çalışıb.Belə ki,bir neçə idarə, o cümlədən Cənub Muğan Kanalı İstismar İdarəsi Biləsuvar Suvarma Sistemləri İdarəsinə birləşdirildi,Orxan 12-ci dərəcədən, 9-cu dərəcəyə endirilməklə müvafiq ixtisas üzrə köçürmə yolu ilə rəhbərlik etdiyim idarəyə su bölgüsündə mühəndis işinə göndərildi. Bu da mənim istəyimlə olmayıb.

İkincisi də, oğlum hardasa işləməli deyildi ki? 628 bal toplamış, iki universitet bitirmiş şəxs çalışmamalı idi ki, günlərin birində baş verəcək struktur islahatları nəticəsində bölgüdə atasının rəhbərlik etdiyi idarəyə düşə bilər? Bunu da saytlar yazacaq.Bu nə yanaşmadı indi? Orxan neyləsin, Biləsuvar rayonundan gedib, başqa bölgədə işləsin? Məgər ölkəmizdə eyni ailə üzvlərinin bir təşkilatda işləməsinə dair nümunələr yoxdur? İndi də oğlumun işləməsini həzm edə bilmirlərsə, iş yerini dəyişdirsinlər."

İdarə rəisi müavini Elsevər Həsənov haqqında yazılanlara da aydınlıq gətirib.

"Müavinim Elsevər Həsənov çox savadlı, işinə məsuliyyətlə yanaşan şəxsdir. Yüksək bal toplamış, iki universitet bitirmiş gəncdir. Onun haqqında da həqiqətə uyğun olmayan məlumat yazıblar. Yəni qeyd etmək istəyirəm ki, yanacaq, texnikaların təchizatı və hərəkətinə kimi məsələlərin müavinim Elsevər Həsənova heç bir aidiyyatı yoxdur. Vurğulanan məsələlər vəzifə bölgüsü baxımından idarənin baş mühəndisinə aid işlərdi. O da öz vəzifəsi ilə məşğuldur. Həmçinin yazıldığı kimi deyil, mən rəhbər şəxs təyin etmirəm, elə bir səlahiyyətim yoxdur, Elsevər Həsənov da tabe olduğumuz baş idarə tərəfindən müavin kimi idarəyə təyin olunub. Onu bir müddətdən sonra başqa bir idarəyə rəis göndərəcəyimə dair yazılan fikrə gəlincə, qeyd etdiyim kimi bu mənim səlahiyyətim daxilində deyil, yalan xəbərdir.Yeri gəlmişkən, niyə görülən işlərdən, əldə olunan uğurlardan yazmırlar?

Yeri gəlmişkən, Su Ehtiyatları Agentliyində sədr Zaur Mikayılovun iki qudası da yüksək vəzifə tutur.

MİA.AZ

Azərbaycan səhiyyəsinin can verdiyi və reanimasiya şəraitində olduğu onsuz da hamıya bəllidir. Amma bəzi tibb müəssisələri elə tərif edilir ki, məəttəl qalırsan, bəlkə yanıldığını düşünürsən. Elə ki içəriyə daxil oldun, səhv etmədiyini bir daha başa düşürsən: əmin olursan ki, bu ölkənin səhiyyə sistemi düzələn deyil. Əslində, təəccüblü də deyil. Kim bu respublikanın səhiyyə xidmətindən xeyir görüb? Bir ölkənin səhiyyə naziri, yaxud məmuru xaricdə müalicə alırsa, deməli, öz vətənində səhiyyə sisteminə güvənmir. Amma yenə də bəzi gözləntilər vardı ki, nəysə dəyişir, icbari tibbi sığorta işləyir, bazar qaydaları aradan qalxır. Xüsusən də yeni yaranan səhiyyə ocaqları haqda yaxşı piar gedirdi. Məsələn, Yeni Klinikanı qeyd etmək olar. Lakin adı Yeni Klinika olsa da, özü kliniki ölüm mərkəzinə oxşayır. Ya da Yeni Klinika Azərbaycanın Quantnamo həbsxanası adlana bilər. Əslində, əvvəldən bəlliydi ki, Yeni Klinikaya güvənmək olmaz. Axı pandemiya dövründə baş həkimi koronavirusa yoluxan xəstələrə rüşvətlə palata ayıran bir yerdən nə gözləmək olar? Bəli, rəhbəri həbs edildi, amma heç nə dəyişməyib. İndi daha böyük süründürməçilik müşahidə olunur. Sanki gestapo kampıdır. Məsələn, vətəndaş İlhamə Talıbova Ağcabədi rayonundan göndərişlə Yeni Klinikaya müraciət edib. Söhbət göndərişdən gedir. Di gəl, Yeni Klinika vətəndaşlara işgəncə verilməsini üstün tutur. Göndərişlə gələn İlhamə Talıbova əməliyyat olunmalıdır. Bura qədər hər şey normal görünür. Əvvəlcə, İlhamə Talıbovadan analizlərdən keçmək tələb olunur. O da analiz və müayinələri keçir. Ertəsi gün isə İlhamə Talıbovaya deyilir ki, indi də qandan infeksiyaya qarşı analiz verməlidir. Vətəndaşın səbr kasası daşır. Deyir ki, bunu elə bütün analizləri keçəndə demək mümkün idi. Həqiqətən də, axı niyə vaxtında bu analiz deyilmir və nəticədə əməliyyat gözləyən bir insan gün itirir?! Ən dəhşətlisi budur ki, Yeni Klinika qanda infeksiya ilə bağlı analiz götürmədiklərini bildirir və özəl klinikalardan birinə getməyi məsləhət görür. Burada da həm süründürməçilik, həm vaxt və maddi itki göz qabağındadır. Vətəndaş haqlı olaraq yerindəcə etiraz bildirir ki, Yeni Klinika kimi nəhəng tibb müəssisəsi qanda infeksiya analizi götürməyib özəl klinikaya yönəldirsə, deməyə söz qalmır. Doğurdan da absurd məqamdır. Ümumiyyətlə, Yeni Klinikanın nə günə düşdüyü araşdırılmalıdır. Ən azı klinikanın ölkə rəhbərliyinin dəstəyi ilə fəaliyyətə başladığı nəzərə alınmalıdır...
Əlqərəz, İlhamə Talıbova müayinələrlə, analizlərlə bağlı əsl süründürməçiliklə üzləşir. Vətəndaş isə razılaşır ki, yaxşı, qanda infeksiya olub-olmadığını özəl klinikaların birində analiz verərək dəqiqləşdirməyə hazırdır, bəs, əməliyyatın tarixi nə zamana təyin olunacaq?
Bax, bu yerdə Yeni Klinikadan İlhamə Talıbovaya ən absurd cavab verilir - məlum olur ki, onun 2-3 ay sonra əməliyyat olunacağı gözlənilir. Yəni dəqiq tarix də açıqlanmır və hər an şərait dəyişə bilər. Beləliklə, vətəndaş Ağcabədidən göndərişlə Yeni Klinikaya yönləndirilir, əməliyyat olunmalıdır, intəhası, başına min oyun açılır, qapı - qapı analiz otaqlarını, klinikaları gəzir. Bu da Yeni Klinikanın nə vəziyyətdə olduğunu gözlər önünə sərir. Sanki bu klinikanın yiyəsi yoxdur. Belə ki, vətəndaş süründürülür, sonra başqa ünvana yönləndirilir, sonda aydın olur ki, əməliyyat üçün hələ bir neçə ay gözləməlidir. Belə çıxır ki, xəstə aylarla əməliyyat olunacağını gözləməlidir. Bu da absurd qərar və idarəçilikdir.
İlhamə Talıbova deyir ki, Yeni Klinikada bu işgəncə dolu vəziyyətlə qarşılaşan yüzlərlə belə xəstə, növbəsini gözləyən insanlar var. Amma Yeni Klinika rəhbərliyini qətiyyən narahat etmir. Görünür, ya gönü qalındır, ya da əvvəlki həbslərdən nəticə çıxarılmayıb. Vətəndaşlara belə bir münasibət bəslənməsi rüsvayçılıqdır. Çünki bu klinika prezidentin açılışını etdiyi yerdir. Amma Yeni Klinika rəhbərliyi bazar havasından çıxa bilməyib. Bir yanda xəstələri belə süründürmək, bir yanda prezidentin diqqətində olan klinikanı bazara çevirmək gec-tez reaksiyalara səbəb olmalıdır.
Qeyd edək ki, hazırda direktor Barat Yusubovdur. Prezident İlham Əliyev və birinci xanım Mehriban Əliyevanın iştirakı ilə açılışı baş tutan Yeni Klinika tibb müəssisəsi 28 mart 2020-ci il tarixindən fəaliyyət göstərir. Amma belə fəaliyyət göstərir...
Anaxeber.info

"Azərbaycan Respublikası Dövlət Şəhərsalma və Arxitektura Komitəsi sədrinin birinci müavini Namiq Hümmətov və adıçəkilən komitənin nəzdindəki Ərazi Tikinti-Planlaşdırma Mərkəzinin İdarə Heyətinin sədri Ramin Abdullayevin Qarabağda yediyi milyonlarla bağlı maraqlı faktlar ortaya çıxıb. Uzun illərdir ki, Azərbaycandan xaricə külli miqdarda vəsait çıxaran, Türkiyə, Birləşmiş Ərəb Əmirliyi kimi ölkələrdə çoxlu sayda daşınmaz əmlaka yiyələnən adıçəkilən cütlük, müqəddəs Qarabağda da rüşvətsiz və talansız ötüşə bilməyib. Bu barədə "DİA-AZ"a daxil olan məqalədə deyilir.

Məqalədə daha sonra bildirilir: "Hesablama Palatasının “Cəbrayıl, Qubadlı və Zəngilan rayonlarında Bərpa, Tikinti və İdarəetmə Xidməti” publik hüquqi şəxsində apardığı yoxlamalar nəticəsində dövlət büdcəsinin talanması ilə bağlı dəhşətli faktlar ortaya çıxarıb. Məlum olub ki, sözügedən qurum təmit-tikinti adı ilə böyk vəsaitlər mənimsəyib, habelə keçirilən tenderlərdə yalnız özlərinə yaxın şirkətlərin iştirakına şərait yaradıb. Təmir-tikinti və bərpa prosesində yer alan “kənar şirkətlər” isə tenderlərdən verdikləri yüksək “atkat” qarşılığında qalib çıxıb. Bundan başqa, məlum olub ki, tikilməli olan, yaxud tikildiyi iddia olunan bəzi obyektlər ümumiyyətlə tikilməyib və yalnız kağız üzərində var olub.

Qeyd edək ki, Namiq Hümmətov “Qarabağ İqtisadi Rayonunda Bərpa, Tikinti və İdarəetmə Xidməti” publik hüquqi şəxsin Müşahidə Şurasının üzvüdür və tikinti prosesinə şəxsən nəzarət edir. Onun razılığı olmadan Qarabağla bağlı hansısa tenderin keçirilməsi, hansısa şirkətin bu tenderdən qalib çıxması mümkün deyil.

Namiq Hümmətov və onun sevimlisi Ramin Abdullayevin şəhdi qanı tökülən torpaqlarda mənimsədiyi milyonlar nəticəsində Qarabağda dövlət əhəmiyyətli bir sıra layihənin taleyi sual altına düşüb. Hazırda bu layihələrin aqibətinin necə olacağı məlum deyil..."

Azərbaycan Texniki Unversitetinin rektoru Vilayət Vəliyev Elmi Şuranı “Milli Məclisə” çevirib, bütün qanunsuzluqlara guya “qanuni” don geyindirir

Bu sözlər Azərbaycan Texniki Unversitetinin rektoru Vilayət Vəliyevin fəaliyyəti ilə bağlı daxil olmuş müraciətdə yer alır. Biz bu və digər iddialarla bağlı qarşı tərəfi də dinləmək istədik. Yazı ilə tanış olmaq istədilər və biz də, istəklərini cavabsız qoymadıq. Tanış olduqları iddiaların heç birinə cavab vermədilər. Susdular… Belə görünür ki, səslənən iddialarla razılaşmalı oldular.

Aktuallğını nəzərə alıb, müəyyən ixtisar və düzəlişlərlə yazını dərc edirik:

Azərbaycan Texniki Unversitetinin rektoru Vilayət Vəliyevin Universitetdə Cuməli müəllimə etdiklərini (Mühəndis fizikası və elektronika kafedrası), öz yaxınlarına verdiyi yüksək maaşları (3000-5000manat), baldızını, qızını, oğlunu və neçə-neçə əqrabasını universitetə doldurmasını, tədris-köməkçi heyətini çölə tökərək narazılıq yaratmasını, müəllimləri boş-boşuna dərsləri olmayan vaxt Unversitetə yığmasını (guya hansısa müəllim tətil vaxtı icazəsiz xaricə gedib, heç onu deyən yoxdu ki, oğlu və dostları xaricdə oxumaq adı ilə Unversitetin pullarını göyə sovurur), Nəqliyyata və loqistika fakultəsinin tələbəsini dekan Allahverdi ilə birləşib intihar vəziyyətinə çatdırmasını, ziyalıları, alimləri yaxşı vəzifə adıyla işə dəvət edib, onlara qarşı dələduzluq, “moşenniklik” etməsini, 6-cı korpusun yükdaşıyan dvarlarını sökdürüb, fundamentini zəiflədib (Unversitetin alimləri ona yazılı müraciət ediblər ki, sabah zəlzələ olsa qəza baş verməsi an məsələsidir), guya yeniləmə adı ilə inşaat materialları ilə özünə villa tikdirməsini, Unversitetin Elmi Şurasını “Milli Məclisə” çevirib, bütün qanunsuzluqlara guya “qanuni” don geyindirməsini, İqtisadiyyat kafedrasında 200 magistrin pulla dissertasiya işi yazdırdığını, müharibə vaxt oğlunu anasının “qoltuğu” altında gizlətməsini, orduya bir qəpik kömək etməməsini görməməzlik etmək olar. Ancaq bir neçə texniki sahə universitetindən bir nəfərdə qovulmasa da, AzTU-dan 117 gənc tələbənin qovulmasını ona bağışlamaq olmaz. Bu Azərbaycan gəncliyinə qarşı soyqırımıdır. Hesab etsək ki, Unversitetə 1 ildə orta hesabla 1000-dən yuxarı tələbə daxil olur, onda onların 10%-ə qədərini qovublar. Qovulmuş tələbələrin bərpası vaxtı, başlarına nə oyunlar açdıqları isə başqa məsələdir. Hələ oxuyan tələbələri dərsə davamiyyətə görə süründərənlər, gör, qovulmuşları bərpada nələr gözləyir. Bir soruşan lazımdır ki, niyə Universitet kimi həssas bir yerdə bu qədər narazılıq yaradırsan?

Bir saat auditoriyada olmayan, təhsil bilikləri olmayan, Vilayət Vəliyevi, özünü iqtisadçı adlandırdığına görə çox vaxt onu “bazardan” gələn adam adlandırılar. Qalstukunu, bərbəzəkli kostyumunu buşlatla əvəz etsən, heç bazarda ona yükdaşıyan “araba” etibar etmək olmaz. Ancaq nə etmək olar, insanları əvvəl-axır etdiyi əməllər üzə çıxardır.

Heç bir narazılığa məhəl qoymur, yaxınları narazılıq edənlərə “eşitdirirlər” ki, onsuz heç nə edə bilməyəcəksiniz, ən uzağı məktub Unversitetə gələcək və komissiya yaradılacaq, komissiyada “bazarkomun” dediyindən kənara çıxmayacaq. Ən maraqlısı isə pul, xərac kimi vəsaitlər danışıq yolu ilə deyil “jest”lərlə izah olunur (birdən səsyazan olar). “Jest”ləridə başa düşməyənə AzTU-da iş yoxdur. Hər dəfə mətbuatda Vilayət Vəliyevin qanunsuzluqlarından yazılanda bir neçə gün özünə gəlir, amma sonra yenə necə deyərlər “qozbeli qəbir düzəldər” məsələsi öz yerini tutur. Bir məsələdə də, AzTU antirekord qırır. Unversitetdə kitabsız kitabxana mövcuddur. İşçilərini dağıtdılar, böyük bir elmi əsərləri olan kitabxanada indi 2-3 işçi saxlanıb (bəzilərini ixtisara, bəzilərini elə-belə yola saldılar), yəni bir “həsir”, birdə “məmmədnəsir” qalıb. İnsanları “manqurtlaşdırmaq” üçün onların yaddaşını təmizləmək lazımdır. Allah Çingiz Aytmatova rəhmət eləsin.

Bircə ümidimiz göydə Uca Allaha, yerdə Möhtərəm Prezidentə qalıb. Biz əminik ki, bu yazılanların çox yox 10%-i onlara gedib çatsa hər şey yaxşı olacaq.

yenixeber.org

Bakının Nərimanov rayonunda özbaşına tikinti halları pik həddə çatıb.

Mia.az-ın məlumatına görə, tikinti şirkətləri yeri İcra Hakimiyyətinin müəmmalı susqunluğu nəticəsində sakinlərin həyatını təhlükəyə atmaqdan çəkinmirlər.

Aşağıda təqdim edilən videofaktdan da bu aydın görünür.

Belə ki, Çapayev küçəsində hündürmərtəbəli bina tikintisi aparan şirkət səkini - piyada yolunu da zəbt edib.

Bu isə piyadaları ölüm təhlükəsinə atıb.

Videofaktla tanış olun:

Xəbər verdiyimiz kimi, yanvarın 21-də Ceyhun Akif oğlu Süleymanov müalicə aldığı "Medilife” klinikasında dünyasını dəyişib.

Milli.Az xəbər verir ki, mərhumun həyat yoldaşı müraciət ünvanlayıb və Ceyhun Süleymanovun ölümü ilə bağlı bəzi məlumatları paylaşıb.

"Yoldaşım 1988-ci il təvəllüdlü Ceyhun Akif oğlu Süleymanov yanvarın 21-də səhər saatlarında Bakıxanov qəsəbəsində yerləşən "Stimul” klinikasına müayinə üçün müraciət edir. Orada olduğu müddətdə təzyiqi aşağı düşür və oranın həkimləri onun özünü dərman almaq üçün aptekə göndərirlər. Yoldaşım "Stimul” klinikasına müayinə olunmaq məqsədilə gedib. Klinikada narkoz həkimi olmadığı üçün onu həmin ərazidə yerləşən "Medilife” klinikasına yönləndirirlər. Həmin klinikada heç bir analiz edilmədən, həkim yoxlanışı aparılmadan dərhal yoldaşımın bağırsağını 3-4 dəfə yuyurlar.

Günorta saat 14:00-15:00 radələrində yoldaşım anasına zəng edib deyib ki, klinikadadır və vəziyyəti yaxşıdır, bağırsaqları tam yuyulandan sonra evə qayıdacaq. Hətta həmin ərəfədə palatada özünü videoya da çəkib. Daha sonra ondan xəbər alınmır. Onunla gedən dostunun dediyinə görə, evlə danışandan sonra yenə bağırsağı yuyulur və bundan sonra klinikanın dəhlizində həkimlər təşvişlə ora-bura qaçırlar ki, bəs, xəstə ayılmır.

21.01.2025 tarixindən bu günə qədər bizə yoldaşımın hansı səbəbdən dünyasını dəyişməsi barədə həmin klinikadan məlumat verilməyib. Aidiyyəti qurumlardan, xüsusilə yoldaşımın ölümü ilə əlaqədər bu işi aparan Sabuncu Rayon Prokurorluğu, Azərbaycan Respublikası Səhiyyə Nazirliyi, TƏBİB-dən və ümumiyyətlə bu işlə bağlı araşdırma apara biləcək qurumlardan artıq dərəcədə təvəqqe edirəm ki, iki azyaşlı övladım və mərhum yoldaşımın hər iki xəstə valideyni ilə düşdüyümüz naəlac vəziyyətimizə etinazsız və laqeyd yanaşılmasın. Bu ölüm işində təqsirkar və səbəbəkar olan hər kəs araşdırılaraq cəzalandırılsın.

Mənim səhhətimlə bağlı problemlərim var, heç bir yerdə işləmirəm. Qayınatam və qayınanam ağır xəstədir. Evimizdə yeganə işləyən şəxs yoldaşım idi. Aidiyyəti qurumlardan çox xahiş edirəm ki, mənə kömək edəsiniz ki, 11-12 yaşlı övladlarımın gözüyaşlı qalmalarının səbəbkarlarının kimliyi müəyyənləşsin”.