Məlum olduğu kimi, hazırda ölkədəki sənədsiz evlərlə bağlı yeni qanun layihəsi hazırlanır. Hər yaşayış məntəqəsi üçün spesifik şərtlər mövcuddur və bu sahələrdə yerləşən tikililərin hüquqi statusunun müəyyən edilməsi üçün xüsusi standartların təsdiq edilməsi üzərində işlər davam etdirilir. Vahid kadastr sistemi vasitəsilə müvafiq dövlət orqanlarının təqdim etdiyi məlumatlar əsasında hansı tikililərin mühafizə zonalarına düşdüyü müəyyən olunur.
Əmlak məsələləri üzrə ekspert Ramil Osmanlı Bakupost.az -a deyib ki, sənədsiz evlərin qeydiyyatı yalnız yeni hazırlanan qanun layihəsindən sonra mümkün olacaq və müraciətlərin qəbulu elektron qaydada həyata keçiriləcək:
“Torpaqların təyinatının dəyişdirilərək yaşayış məntəqələri təyinatlı torpaqlara çevrilməsindən sonra onların üzərində tikilən evlərə çıxarışların verilməsi mümkün olacaq. İndiyədək bu istiqamətdə müəyyən addımlar atılsa da, real nəticələr olmayıb. Ümid edirik ki, bu dəfə olacaq”.

Ekspert qeyd edib ki, fərdi yaşayış evlərinin müəyyən hissəsi aktiv mədən ərazisində yerləşir:
"Yəni, o ərazilərdən bu gün neft çıxarılır. Lakin bəzi ərazilər var ki, orada artıq istismar dayandırılıb, neft çıxarılmır. Bununla bağlı dəqiqləşdirilmələr aparılmalıdır. Mühafizə zolaqlarına düşən qanunsuz tikililər istisna olmaqla, digər tikililərin sənədləşməsi qanun lahiyəsində öz əksini tapmalıdır".
Əmlak məsələləri üzrə ekspert Elnur Fərzəliyevin sözlərinə görə, hazırda 40 min qeyri-yaşayış obyekti digər təyinatlı torpaqlarda tikildiyindən onlara çıxarış verilməsi mümkün deyil. Bunun üçün həmin obyektlərin yerləşdikləri ərazilərdə torpaqların təyinatı dəyişdirilməlidir.

Ekspert bildirib ki, Bakı və Bakı ətrafında inşa edilmiş obyektlər illərdir ki fəaliyyət göstərir. Onların mütləq əksəriyyəti vergi ödəyicisi kimi qeydiyyata düşüb və qeyri-yaşayış obyekti kimi kommunal xərclərə daha çox rüsum ödəyirlər:
"Amma hələ də o obyektlərə çıxarış verilməyib. Bu problem aradan qaldırılmalıdır".
E.Fərəzliyevin dediyinə görə, kommunikasiya xətlərinin mühafizə zolağında inşa olunmuş qanunusuz tikililərdən başqa normativlərə uyğun inşa edilmiş fərdi evlər də sənədləşdirilməlidir:
“Bələdiyyə qanunvericiliyinə görə, vətəndaş bələdiyyə torpağında 5 ildən artıq yaşayırsa, onun icarə müaqviləsinin rəsmiləşməsinə, yaxud özəlləşməsinə şərait yaradılmalıdır. Hazırda bələdiyyə torpaqları üzərində inşa olunmuş evlərə görə büdcə küllü məbləğdə vəsait itirir”.
Ekspert vurğulayıb ki, dəmir yolu xəttinin arasında tikilmiş mənzilin özəlləşdirilməsini gözləmək doğru deyil:
“Əslində, bu, həmin insanların həyatına təhlükə yaradan amildir. Amma insan sağlamlığına və insan fəaliyyətinə əngəl olmayan bütün sənədsiz evlərə sənəd veriləcək. Kommunikasiya xətlərinin mühafizə zolağında inşa olunmuş qanunusuz tikililərdən başqa normativlərə uyğun inşa edilmiş fərdi evlər də sənədləşdirilməlidir”.
Əmlak eksperti Elnur Azadovun sözlərinə görə, müxtəlif vaxtlarda ayrı-ayrı dövlət qurumları tərəfindən verilmiş sənədlər var. İlkin sənədləri olan əmlaklar var və onların tanınması istiqamətində işlər aprılacaq. İlkin sənədləri olan əmlaklara yaxın vaxtlarda çıxarış veriləcək, yəni leqallaşdırılacaq:
“Sənədləşdırilməmiş evlərin sayı minlərlədir. Bu evlər içərisində gələcəkdə leqallaşdırılması mümkün olmayan daşınmaz əmlaklar var. Söhbət xüsusi mühafizə olunan, kommunikasıya xəttlərinə yaxın ərazilərdə tikilən evlərdən gedir. Həmin evlər leqallaşdırılmayacaq”.

Şamaxı Rayon Mərkəzi Xəstəxanasının sabiq direktoru Emin Hüseynin barəsində olan cinayət işi üzrə məhkəmə prosesi başlayır.

Cinayət işi üzrə məhkəmənin hazırlıq iclası fevralın 5-nə təyin edilib.

İşə Sumqayıt Ağır Cinayətlər Məhkəməsində hakim Nurəddin Hüseynlinin sədrliyi ilə baxılacaq.

Məlumata görə, Hüseyn Emin Ramiz oğlu 2022-ci ildə Şamaxı Rayon Mərkəzi Xəstəxanasına direktor vəzifəsinə təyin edilib. Sonradan vəzifəsindən azad olunub.

Onunla bağlı Cinayət Məcəlləsinin 179.3.2-ci (Mənimsəmə və ya israf etmə, külli miqdarda törədildikdə) maddəsi ilə ittiham irəli sürülüb.

Zərərçəkmiş qismində Tibbi Ərazi Bölmələrini İdarəetmə Birliyi (TƏBİB) tanınıb.

Qobustanın Ərəbşalbaş kənd sakinləri məktəb problemi yaşayırlar.
Onlar deyiblər ki, 1000 təsərrüfatı olan kəndin təhsil ocağı köhnə və yararsız binada yerləşir.
Ötən əsrin 50-ci illərindən yadigar qalan məktəb binası nə xaricdən, nə daxildən təhsil ocağına oxşayır.
Sakinlərlə bərabər məktəbin 50 müəllimi və 500 şagirdi də eyni problemlə üz-üzədir.
"Məktəbimiz heyvan fermalarına oxşayır. 50-ci ildən qalma 2 korpus var. 80-ci illərdə isə əlavə bir korpus tikilib. 25-dən çox sinif otağının invertar avadanlıqları belə dəyişilməyib. Divarlar ovulub tökülür, döşəmə köhnədir deyə çürüyür, ayağını qoyursan, aşağı düşür. Çox bərbad vəziyyətdədir. Sanitar qovşağı yox, partalar sınıq, döşəmə çürük, tavan köhnə. 50-ci ildən qalma məktəb necə olar?”, – deyə kənd sakini Vüqar Əhmədov bildirir.
Kənd sakinlərinin sözlərinə görə, soyuq aylarda məktəbdə isinmə ciddi problem olur: "Nəmişlik, dar otaqlar və köhnə invertarlar tədrisin keyfiyyətinə mənfi təsir edir. Yeni məktəb binası arzusu artıq kəndliləri ümüdsiz edir. Aidiyyəti qurumlara edilən çoxsaylı müraciətlərə rəğmən üç korpuslu bir mərtəbəli məktəbin tikintisi isə illərdir ki, yubadılır. Məktəbdə əsaslı təmir adı ilə iş aparılsa da, həm məktəb, həm də sanitar qovşaq bərbaddır”.
Vüqar Əhmədov deyir ki, sanitar qovşaq da bərbad haldadır: "Məktəbin həyətinin mərkəzində bir ayaqyolu var. O ayaqyoluna baxanda mən xəcalət çəkirəm. Aşağı sinif şagirdləri üçün təhlükəlidir. O kişilər üçündür. Qadınlar, qızlar üçün olan o qədər bərbad idi ki, kəndin gəncləri bunu "ayıb” sayıb özləri yenilədilər. Bir neçə il öncə təmir üçün vəsait ayrıldığını dedilər, əvəzində köhnə uçuq-sökük tikintinin materiallarını söküb dam örtüyü edib getdilər. Bizi təmir adı ilə arxayın salıb, vəsaitindən özləri yararlandı. Məktəb isə "köhnə hamam, köhnə tas ” vəziyyətində qalıb. Təmir adı ilə sui istifadə olundu. Ayrılan vəsaitin aqibəti barəsində məlumat da verilmədi".

"Sakinlər olaraq düşünürük ki, bu artıq məqsədlidir”
Vüqar Əhmədov qeyd edir ki, sakinlər dəfələrlə ölkə başçısından tutmuş Elm və Təhsil Nazirliyinə qədər – hər kəsə müraciət ediblər, amma şikayətləri nəticəsiz qalıb: "Bir jurnalisti dəvət etdik, çəkdi, amma icra hakimiyyəti qoymadı yayımlamağa. Heç kimə də çəkib işıqlandırmağa icazə vermirlər. Yazılı müraciət edirik, şifahi deyirlər ki, düzələcək. Bizim müraciətin üstündə 30-40, 50-70 şagirdi olan məktəblərin yeni binası var. Kəndin hörmətli bir şəxsi hətta Elm və Təhsil Nazirliyinin qəbulunda oldu. Di, gəl ona verilən cavabda belə anlaşıldı ki, gedib oturaq evimizdə, problem düzələn deyil. Düşünürük ki, bu artıq məqsədlidir. Üç şagirdi olan kənddə yeni məktəb, 500 şagirdlik kənddə isə heyvan daxması var. Tək məktəb deyil, kəndin kitabxanası, mədəniyyət klubu, tibb məntəqəsi bərbad vəziyyətdədir”.

Azərbaycan Avtomobil Yolları Dövlət Agentliyinin rayonlarda fəaliyyət göstərən idarələrinin işçiləri dekar ayının əmək haqqını almayıblar...

Yeni il qabağı işçilərin əmək haqqlarının verilməməsi isə Azərbaycan Avtomobil Yolları Dövlət Agentliyinin rayonlarda fəaliyyət göstərən işçilərinin narazılığına səbəb olub.

Bu barədə Poliqon-a daxil olan məlumata görə, AAYDA-nın Bakıda yerləşən idarələrində çalışanlar əmək haqqı alsalarda, əyalət idarələri hələ də dekabr ayının əmək haqqısının verilməsini gözləyirlər.

Bu barad Poliqon-a danışan mənbə biri qeyd edibki, yeni il qabağı işçilərin əmək haqqlarının verilməməsi onlar üçün ciddi problem olub. Yanvar ayının iki iş həftəsinin arxada qalmasına baxmayaraq, yerlərdəki idarə müdirləri hələ də işçilərə maaşlarını nə vaxt ala biləcəkləri barədə heç bir şey deyə bilmir. Çünki idarə rəisləri maaşların gecikməsinin nə səbəbini, nə də vaxtını bilmirlər.

Qeyd edək ki, Azərbaycan Avtomobil Yolları Dövlət Agentliyinin sədri Saleh Məmmədov, Baş Maliyyə İdarəsinin rəisi isə Müseyib Həmzəyevdir.

Rusiya dövlətinin vətəndaşı, azərbaycanlı sahibkar Elxan Əmirxan oğlu Əmirov Sitat.info-ya müraciət edərək, Cəlilabad Rayon İcra hakimiyyəti başçısının müavininin onun başına açdığı oyunlardan danışıb.

Rusiya Azərbaycanlıları Cəmiyyətinin üzvü və Rusiyada sahibkar olan Elxan Əmirov deyir ki, 2015-ci ildə dövlət başçısının xaricdə yaşayan sahibkarlara ölkəmizə gəlib, burada biznes qurmaları ilə bağlı müraciətini eşidib və oradakı işlərini dayandıraraq vətənə dönüb. O, Cəlilabad rayonuna gələrək burada sahibkarlıqla məşğul olmaq istəyib: “Torpaq götürüb fermer təsərrüfatını inkişaf etdirmək istədim. Məni Cəlilabad Rayon İcra hakimiyyətinə yönəltdilər. Cəlilabad rayon icra başçısının müavini- Hüseynov Sabir Ağahüseyn oğlu mənə müxtəlif vədlər verdi. Dedi ki, sahələr artıq taxılla əkilib. Taxıl biçiləndən sonra həmin torpaq sahəsini sənə verəcəm. Mən də onun vəzifəli şəxs olduğuna inanıb, Sabir Hüseynova əvvəlcə 30 min manat, sonra isə 250 min rubl( 5 min manat) pul verdim. O, mənə bildirdi ki, həmin sahəni sənə verəcəm. Təəssüflər olsun ki, 2015-ci ildən bu günə kimi nə torpaq sahəsini ala bilmişəm, nə də öz pulumu geri qaytara bilmişəm”.

E.Əmirov deyib ki, Sabir Hüseynov onu müxtəlif variantlarla özünə inandırıb: “Mənlə birlikdə olanda telefonla Azərbaycan Respublikasının müxtəlif yüksək vəzifəli məmurlarının adıyla danışırdı. Guya onlarla sıx əlaqədədir. Bununla məni özünə daha çox inandırmağa çalışırdı. Mən Azərbaycan Respublikasının aidiyyatı orqanlarına müraciət etsəm də mənim şikayətimə baxan yoxdur. Şikayətim araşdırılmır. Sabir Hüseynov məni şərləyib tutduracağı ilə hədə-qorxu gəlir. Deyir ki, əgər şikayətindən əl çəkməsən, səni maşınla vurdurub öldürtdürəcəm. Xahiş edirəm ki, mənim səsimi dövlət başçısına, aidiyyatı qurumlara çatdırasınız ki, mənə kömək etsin. Mən, Rusiya dövlətinin vətəndaşıyam, beş nəfərlik ailəm ilə burada qalmışam. Nə çıxıb Rusiyaya gedə bilirəm, nə də pulumu ala bilirəm”.

Şikayətçi Sabir Hüseynovun vəzifədə işlədiyi müddətdə yol verdiyi qanun pozuntularından danışıb: “O vəzifədə ikən Azərbaycan Respublikasına xeyli ziyan vurub. Bakı şəhərində villa, mənzillər alıb, Cəlilabad rayonunda sənədli, sənədsiz 100 hektarlıq torpaqları zəbt edib. Cəlilabad rayonunda həyət evi, mənzili, 2 ədəd mağazası, təndirxanası, öz doğulduğu kənddə şadlıq evi, meyvə bağı, benzindoldurma məntəqəsi var. Cəlilabad rayonunda yüz hektarla torpaqlarını zəbt edib. O, 24 il Cəlilabad Rayonu İcra Hakimiyyətində çalışıb, vəzifəli şəxs olub. Onu çox yaxşı tanıyırlar. Mənim şikayətimi düzgün araşdıran yoxdur. Mən sizdən xahiş edirəm ki, şikayətimin düzgün araşdırılmasında mənə kömək edin. Pulumu da almağa kömək edin ki, çıxıb Rusiyaya gedə bilim”.

E.Əmirov sonda bir daha aidiyyatı qurumlardan məsələ ədalətli yanaşma xahiş edib.

Bir neçə gün öncə "DİA-AZ" olaraq "SOCAR-ın audit rəisi bağ qonşusunu ölümcül döydü – TƏFƏRRÜAT” başlıqlı yazı dərc etmişdik. Yazıda qeyd edilirdi ki, SOCAR-ın Daxili Audit İdarəsinin rəisi Təhmas Rüstəmov Bilgəhdəki villasında olarkən maraqlı hadisə yaşanıb. Belə ki, Təhmas Rüstəmov tutarlı səbəb olmadan öz bağ qonşusu ilə mübahisə edib, ağır bədən cəsarətləri yetirib, ölümcül döyüb.

Məlumatda qeyd edilir ki, məsələyə Sabunçu rayon hüquq-mühavizə orqanları qarışıb. Təhmas Rüstəmov bütün gücünü ortaya qoyub hüquq-mühavizə orqanlarına təsir göstərmək istəsə də, şikayətçi sona qədər ədalətin bərpa olunması üçün mübarizə aparacağında israrlıdır. Məlumatda o da qeyd edilir ki, bu Təhmas Rüstəmovun ilk kriminal addımı deyil. Belə ki, o bütün bağ qonşularına qənim kəsildiyi, özünü Bilgəhin hamisi elan etdiyi deyilir. Məsələ ilə bağlı müvafiq qurumlara sorğu göndərəcəyik. Eyni zamanda, qeyd olunur ki, döyülən şəxs də ölkədə sayılıb-seçilən, hörmətli şəxslərdəndir.
Məsələ ilə bağlı AZƏRBAYCAN RESPUBLİKASININ CİNAYƏT MƏCƏLLƏSİ nə deyir? Cinayət məcəlləsinin 126.1 , 126.2.2, 126.2.4 maddələrinə görə bu əməli törədən şəxs doqquz ildən on iki ilədək müddətə azadlıqdan məhrum etmə ilə cəzalandırılır. Mövzunu diqqətdə saxlayacağıq.

/7NEWS.az

"20 yanvar tarixində "Crescent mall"da yerləşən "Karaca" mağazasına alış-veriş etmək üçün rəfiqəmlə daxil olmuşdum. Məhsullara baxış keçirən zaman tava şöbəsində iki tava alt-üst şəkildə sərgilənmişdi... aşağıdakı məhsula baxdığım zaman yuxarıdakı məhsula toxunmadığım halda, vitrinə səhv yerləşdirilmə ucbatından yuxarıdakı tava yerə düşdü və mağaza meneceri Mahirə xanım yaxınlaşaraq, kobud bir ifadə ilə "məhsula ziyan vurdunuz, dərhal onu ödəməlisiz... kassaya gəl" deyə bildirdi". "DİA-AZ" xəbər verir ki, bunu "Müştəriyəm Şkiayətim Var" sosial qrupundakı paylaşımında Ofelya Hümbətzadə adlı istifadəçi qeyd edib.
Narazı vətəndaşın başına gələnləri öz qələmi ilə - heş bir düzəliş etmədən, olduğu kimi təqdim edirik: "İstehlakçı olaraq xanıma məhsulda öncədən hər hansı bir əzik olmadığını sübüt edəcəyi halda ödəyəciyimi bildirdim lakin xanım şifahi olaraq yalnızca hər gün vitrin yoxlanılır o məhsul əzik deyildi vitrində bizdə heç bir məhsul əzik deyil dedi. Bütün mağazalarınızda vitrində əzik,cızıq, az qüsurlu məhsullarınızın olmasını dəfələrlə müşahidə etmişəm bu da təbii olaraq başa düşülən haldır ki, müştəri məhsulu vitrində görür yenisi varsa qutuda başqa məhsil təhvil verilir yoxdursa da vitrin məhsulu. Özüm də eyni qayda da vitrində az qüsurlu olub,stokda olmayan məhsullar almışam sizdən. Xanımın özü ilə yaxınlaşaraq bir neçə eyni şöbədəki məhsullarda da eyni əziklərinin olmasını göstərsəm də qəbul etməyərək təkzib etdi. Sözü gedən əməkdaş məsələni heç bir halda sübut etmədi əvəzində isə 1,5 saat məni və yanımdakı şəxsi mağazada girov saxlayaraq azadlığımı pozdu. Sübuta yetirmədiyi məsələyə görə alıcını mağazada girov saxlamaq azadlığı məhdudlaşdırmaq faktıdır və sahibkarın qanunla törətdiyi əmələ görə ciddi məsuliyyət daşıması qanunda əks olunmuşdur, lakin görünür sözü gedən əməkdaş bu qanundan xəbərsizdir. Mağazada gözlədiyim müddət ərzində xanım dəfələrlə mənlə konfliktə girmiş, “sizi kimi müştərilərə belə davranmaq lazımdır” “ mənim vaxtımı alırsız pulunu ödə çıx get “ əlavə olaraq da xanıma heç bir təhqir etmədiyim halda rəfiqəmlə məni günahlandıraraq yalandan siz məni də, işçilərimi də təhqir etdiz bildirərək hər dəfə məni özümdən çıxartmağa çalışdı. Sözün əsl mənasında ömrümdə birinci dəfədir belə mağaza meneceri görürəm hansı ki, müştəri ilə danışığını bilməyib, bütün etik normaları pozan istehlakçı hüququnu bu qədər istismar edən. Xanıma dəfələrlə mən sizi əgər dediyiniz kimi təhqir etdimsə sübut edin bunu bildirdiyim halda “nədir mən sənə elə hər şeyi sübut etməliyəm?” Mənim sözüm sübutdur işçilərimdə lazım olsa mən deyəni deyər bildirdi. Artıq başa düşürsüz bu şər atmaq deməkdir.
Xanıma mağazada məni saxladığı müddət ərzində sən yox siz sözünü öyrədə bilmədim. Çox acınacaqlı bir haldır ki, illərlə sevərək alış veriş etdiyim bu mağazada bu formada rəftar görmək məni hədsiz dərəcədə narahat etdi. Mühafizə əməkdaşları və Crescent Mall meneceri olan Samirə xanıma göstərdikləri hər bir köməklik üçün minnətdaram. Mall meneceri Samirə xanım yaxınlaşıb, xanımla danışdıqdan və əlaqə məlumatlarımı götürüb, araşdırıb geri dönüş edəcəm bildirdikdən sonra yalnız çıxa bildim mağazadan. Qeyd olunan məsələ ilə bağlı mağazada məni girov saxlayıb, azadlığımı məhrum edən, mənə şər atan Mahirə xanımdan şikayətçiyəm lazımı üzrə bütün aidiyyatı orqanlara rəsmi şikayət məktubumu bildirmişəm sözün əsl mənasında insan əsəbi ilə bu qədər oynayan, danışığını bilməyən, şər atan insanlardan Allah hər birimizi uzaq etsin..."

"Balakhani Operating Company LTD" şirkətinin Azərbaycandakı filialı məhkəməyə verilib.

TEREF-ın Pravda.az-a istinadən verdiyi xəbərə görə, şirkətlə bağlı Yasamal Rayon Məhkəməsinə müraciəti qurumun keçmiş prezidenti Walker James Alan edib.

Mahiyyəti işə bərpa və əmək haqqı tələbi üzrə mübahisə olan iş hakim Aydan Oruclunun icraatındadır. Növbəti baxış iclası yanvarın 28-də keçiriləcək.

Qeyd: 2011-ci ildə dövlət qeydiyyatına alınan "Balakhani Operating Company LTD"nin hazırki qanuni təmsilçisi Rövşən Cəlil oğlu Rzayevdir.
TEREF olaraq sorğumuza cavab verən "Balakhani Operating Company LTD" şirkətinin İctimaiyyətlə Əlaqələr şöbəsinin rəhbəri Günel Həsənovanın mövqeyini təqdim edirik:
Göndərdiyiniz sorğuya cavab olaraq bildiririk ki, Kanada vətəndaşı Ceyms Alan Volker 2023-cü ilin 16 yanvar tarixindən etibarən Azərbaycan Respublikasının əmək qanunvericiliyinin müvafiq tələblərinə əsasən “Balakhani Operating Company LTD” şirkətində çalışmışdır. Ölkəmizdə müvəqqəti yaşayış icazəsi əsasında qalan əməkdaşın əmək müqaviləsinə 2023-cü ilin 01 dekabr tarixində müqavilə müddətinin bitdiyinə görə xitam verilmişdir.

Tovuz rayonu, Yuxar Öysüzlü kənd sakini, ağır xəstə, əmək qabiliyyətsiz Qasımov Tapdıq Əliheydar oğlu tərəfindən ölkə rəhbərliyinə müraciət ünvanlanıb. Bir nüsxəsi də "DİA-AZ"a daxil olan müraciətdə deyilir:

"Çox hörmətli cənab Prezident. Xatırlatmaq istəyirəm ki, mən uzun müddətdir ki, həm ağır dərəcəli kəllə-beyin travması almışam, həm də hər iki qulağımda eşitmə dərəcəm 4-cü dərəcəlidir. Dəfələrlə müxtəlif müalicələr almağıma baxmayaraq bu xətəliklərdən indiyə qədər əziyyət çəkirəm.

Doğrudur, son illərdə yaşadığım zona üzrə ƏƏSMN-nin 16 saylı Tibbi Sosial Ekspertiza Komisiyası tərəfindən məni müayinə etmiş və forma 88 tərtib edərək təsdiq edilməsi üçün ƏƏSMN-nə göndərilmişdir.Çünki qanunvericiliyə əsasən Xəstəliyimin sağalmaz olduğunu nəzərə alan 16 saylı TSEK komisiayası çox düzgün qərar qəbul etmişlər.

İstər Bakıda ATU-nin Tədris Cərrahiyə Klinikasında həkim Afaq Şadlinskayanın 21 .12.2022-ci il tarixində xəstəliyimlə bağlı verdiyi rəydə qeyd edilir:

“ Mediakamentoz yuxu altında BERA testi aparıldı. 33.1 rate 2000 sveep click şiddətində aparılan BERA testi zamanı sağ qulaqda 70 dBnHL intensivlikdə V dalğa əldə edildi, sol qulaqds 90 dBnHL intensivlikdə V dalğa əldə edilmədi. “ Nəticə olaraq sol qulaqda 4-cü dərəcə neyrosensor ağıreşitmə -karlıq, sağ qulaqda 3-4 –cü dərəcəli neyrosensor tip ağıreşitmə qeyd olunur.” Eyni rəyi İcbari Tibbi Sığorta üzrə Dövlət Agentliyin Mirqasımov ad. Respublika Klinik Xəstəxanası da Ambulator xəstənin 9965 N –li Tibb vərəqində də həkim Poladova TSEK təqdim etmək üçün 29.12.2022-də diaqnoz qoymuşdur ki, “ İki tərəfli karlıq neyrosensor ağıreşitmə “ qeyd edilmişdir.

Növbəti dəfə mənə 2024-cü il oktyabrın 1-də növbəti baxış keçirilmişdir. Və yenə də Berra müayinəsi keçirilmişdir. Və yenə də diaqnoz yenə qoyulub ki, hər iki qulaq 4-cü dərəcəli eşitmə zəifliyi vardır. Yəni karlıq təsdiq edilib.

Budur, 10 yanvar 2024-cü il tarixinə ƏƏSMN-nin Dövlət Tibbi-Sosial Ekspertiza Agentliyinin həkim komissiyasında adını bilmədiyim qadın həkim məni təhqirlər edərək bildirdi ki, “ Ə sən sərxoşsan, ya ağlını itirmisən? Sənin qulağın kəskin formada zəif olmasa da sənə əlillik düşmür. Bəsdir, bura gəlib bizi bezdirdin.” Bu abırsız və qanacaqsız – tərbiyəsiz həkim qadın o qədər harınlayıb ki, mənə qəbul zamanı kasıb olduğumu görüb ağzına gələn sözlərlə təhqir edir. Kim buna səlahiyyət verib ki, dövlət müəssisəsi olan bir DA-də 63 yaşlı bir xəstə adama qarşı belə bir vicdansızlığa yol verir. O zaman niyə məni özləri dəvət etmişdilər? Yəni görüblər ki, nəzərdə tutulan rüşvəti gətirmədiyimə görə başlayıblar məni səviyyəsiz zəkaları ilə aşağılayırlar ki, niyə mən onların vaxtını boş yerə alırammış.

Xahiş edirəki, Siz bu ƏƏSMN-nin həkim komissiyasının üzvlərinizə göstəriş verəsiniz ki, sağalmaz xəstəlik diaqnozu qoyulan xəstəyə qarşı əlllik təyin etmək əvəzinə məni təhqir edən yaramazlara qarşı qanunvericiliyin tələbləri daxilində cəza verilsin.

Cənab Prezident! Sizdən çox xahiş edirəm. Mənim təqdim etdiyim sənədərin əvvəlcə əsaslar üzrə müstəqil həkim komissiyası tərəfindən bir daha yoxlanılaraq əlilliyin müəyyən edilməsi üçün

ƏƏSMN-nin Dövlət Tibbi-Sosial Ekspertiza Agentliyinin tərbiyəsiz həkim komissiyasının qadın üzvünün və verdikləri saxta və əsassız rəyi Daxili Nəzarət və Audit şöbəsi tərəfindən araşdırılaraq qiymət verilsin. Və tərbiyəsiz həkimin cəzalanması üçün hüquq –mühafizə orqanlarına təqdimat yazılması barədə göstərişlər verməyinizi xahiş edir və əvvəlcədən minnətdarlığımı bildirirəm..."