26 il Azərbaycan Ordusunda xidmət etmiş veteran qadın Elnarə Mustafayeva, mülki işçi kimi çalışdığı hərbi hissədə qərəzli münasibətlə üzləşdiyini və heç bir əsas olmadan işdən çıxarıldığını iddia edir.

Belə ki, bu iddialarla bağlı Elnarə Mustafayeva Gununsesi.info-ya müraciət edib.

Onun sözlərinə görə, mülki işçi kimi çalışdığı hərbi hissədə uzun müddət qərəzli münasibətlə qarşılaşıb, təzyiqlərə məruz qalıb və nəticədə heç bir əsas olmadan işdən çıxarılıb.

Elnarə Mustafayevə həmçinin qeyd edir ki, xəstəlik səbəbilə bülletendə olduğu vaxt əmək müqaviləsinə əsassız olaraq xitam verilib.

“2020-ci ildə Polkovnik Lətif Mahmudovun komandiri olduğu N saylı hərbi hissədən – Hərbi Hava Qüvvələrindən istefaya buraxılmışam. Həmin hərbi hissədə əsgər yeməkxanasında xadimə kimi fəaliyyətə başladım və 4 ildən artıq müddət ərzində işlədim. İş zamanı qarşılaşdığım haqsızlıqlar və qanunsuz göstərişlər səbəbilə dəfələrlə rəhbərliyə müraciət etsəm də, tədbir görülməyib, əksinə, mənə qarşı təzyiqlər artıb. Təxminən 2 il ərzində, cəmi-cümlətanı 5 ay qazan təminatı oldu, qalan müddətdə isə ümumiyyətlə təminat yox idi. 3-cü dvizyonun komandiri mayor Şahin Qarayev, bu vəziyyətdə belə dvizyona gələn qonaqlar üçün yemək hazırlanmasını biz qadınların üzərinə qoymuşdu. Ərzaqları da öz vəsaitimizlə alırdıq. Gələn yoxlamalara görə məcbur idik – cibimizdən pul xərcləyib yemək bişirirdik. Etiraz etdikdə isə hədə-qorxu ilə üzləşirdik. Şahin Qarayev elə bir qorxu mühiti yaratmışdı ki, deyirdi, təminat olmasa, ştatlarınızı ləğv etdirərəm, yeməkxananı bağlatdıraram, sizi də öz hesabınıza məzuniyyətə göndərərəm. Bu sözləri birbaşa deməsə də, zampolit vasitəsilə bizə çatdırılırdı. Hətta bizə deyilirdi ki, sizə 25% mükafat düşmür, komandir sizə onsuz da hörmət edir. Qadınlar neyləsin, hamısı 350-400 manat maaş alırdı, qorxurdular ki, birdən işlərini itirərlər. Hər dəfə cibimizdən xərc çəkirdik, ərzaq alırdıq, amma səslərini çıxara bilmirdilər. Arxada deyinirdilər, amma üzə heç nə demirdilər. Hər həftənin birinci günü polkovnik Lətif Mahmudov üçün sifarişlə müxtəlif yeməklər bişirirdik. Hamısı da biz qadınların hesabına olurdu. Xəngəldən tutmuş beçə qızartmasına, xaş, dolma, pizza hər cür yemək hazırlanırdı. Biz alırdıq, biz də bişirirdik, ancaq heç bir təşəkkür belə yox idi,” – deyə E.Mustafayeva bildirir.

E.Mustafayeva iddia edir ki, sağlamlıq durumunun ağır olmasına baxmayaraq, gündəlik olaraq kazarma, ayaqyolu və hamam otaqlarının təmizliyinə məcbur edilib:

“Hərbi xidmət dövründə 4 dəfə cərrahi əməliyyat keçirmişəm və şəkər xəstəsiyəm. Dəfələrlə sağlamlıq problemlərimlə əlaqədar Hərbi Hospitallarda stasionar müalicə almışam. Həmçinin bronxial problemlərim də var. Mərkəzi Hərbi Həkim Komissiyasının rəyinə əsasən, haqqımda sülh dövrü yararsız, müharibə dövrü məhdud yararlı qərarı verilmişdir. Ş.Qarayev əmək müqaviləsinin şərtlərini kobud şəkildə pozaraq, əsgər kazarmasının ayaqyolusu, hamamı, yataqxanasının təmizliyini hər gün biz qadınların üzərinə qoymuşdu. Halbuki bu, bizim vəzifəmiz deyildi. Sağlamlığım yaxşı olmasa da, bir neçə dəfə məcbur qalıb təmizlədim. Sonuncu dəfə ayaqyolusunu təmizləyərkən xlorun iyisi məni başdan vurdu, halım pisləşdi. Səhəri gün Gəncə şəhər xəstəxanasına getdim, rentgen müayinəsindən keçdim və bronxlarımda problem aşkar olundu. Həkim dərman yazdı, xeyli dərman aldım. Eyni zamanda, xəstəxanada burun-boğaz həkiminə də müraciət etdim və o da dərman yazdı, aldım. Amma işə qayıdanda yenə dedilər ki, mayor Şahin Qarayevin göstərişidir, gedin, əsgər yataqxanasının ayaqyolusunu təmizləyin. Açıq dedim ki, xəstəyəm, bronxlarımda problem var, müalicə alıram, təmizləyə bilmərəm. Səhər növbəni təhvil verəndə Qərargah rəisi əvəzi Rəşad Hacıyev irad bildirdi. Mən də etiraz etdim və bu qanunsuz göstərişlərə tabe olmayacağımı açıq şəkildə dedim. Hətta növbədə olanda bizim hesabımıza hər gün göndərilən 10-15 çaynik çaya da etiraz etdim”.

E.Mustafayeva qeyd edir ki, mayor Şahin Qarayevin təzyiqlərinə qarşı çıxandan sonra ona qarşı qarayaxma kampaniyası başlanıb:

“Adımı ağızpozan qoydular və mənə şər atdılar ki, guya digər hərbi qulluqçunu təhqir etmişəm. Halbuki gigiyenik qaydalara əməl etmədiyi üçün yeməkxanadan çıxarmışdım.”

O əlavə edir ki, məlum vəziyyət ilə bağlı komandir Lətif Mahmudova dəfələrlə yazılı və şifahi şəkildə müraciət etsə də, onun şikayətləri araşdırılmayıb:

“Açıq şəkildə şantaj olundum və məni qərəzli şəkildə işdən çıxardılar. Halbuki mən qanunsuz tapşırıqlardan imtina etmişdim. Hərbi Prokurorluq tərəfindən aparılan araşdırmanın da qeyri-obyektiv olması əlavə haqsızlıqlara səbəb olub. Şahidlər əvvəlcədən mayor tərəfindən təlimatlandırılıb. Mənim fikrim isə heç soruşulmadı.”

Qeyd edək ki, E. Mustafayeva üzləşdiyi təzyiqlərlə bağlı ölkə rəhbərliyinə də müraciət edib.

Etdiyi müraciətdə işinə bərpa olunmasını, eyni zamanda üzləşdiyi təzyiqlərin və qanunsuzluqların araşdırılmasını istəyir:

“Bu gün mən polkovnik Lətif Mahmudov tərəfindən tamamilə günahsız şəkildə cəzalandırılıram. Tək səbəb isə mayor Şahin Qarayevin qanunsuz tapşırıqlarını yerinə yetirməməyimdir. Vətənə sədaqətlə xidmət etmiş bir veteran kimi belə münasibətə layiq deyiləm.”

“Rabitəbank” müştərilərinin yığılmış bonuslarını xəbərdarlıqsız silir.

Tribunainfo.az xəbər verir ki, bu barədə bank müştərisi Ramil Həsənli yazıb. O bildirib ki, 3 ilə yaxındır yığdığı bonusları “Rabitəbank” özbaşına silib:

“Şikayətim “Rabitabank”dandır, 3 ilə yaxındır Kartmane istifadə edirdim və yığılmış 89 AZN bonusum var idi. Bu gün fikir verirəm ki, 13 AZN bonus qalıb. Supporta yazdım, deyirlər mesaj xəbərdarlıq göndərilib, silirik bütün bonusları. Bəlkə məndə push mesaj bağlıdır, mən sizcə o mesajı görüb pulu bonus kimi saxlıyıb silinməyini gözləmişəm?! Adekvat bank olsaydız mənim kartıma köçürərdiz məbləği, silməzdiz.

Bu vətəndaşın cibinə girmək üçün bir variantdır!

Heç kəsə məsləhət görmürəm, “Rabitəbank”ın kartından istifadə etməyi”.

Qeyd edək ki, “Rabitəbank” 1993-cü ildən fəaliyyət göstərir. Bankın Müşahidə Şürasının sədri Zakir Nuriyevdir, İdarə Heyətinin sədri Aydın Hüseynovdur.

Tərəfləri dinləməyə hazırıq.

Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə 2022-ci ildən həyata keçirilən “Bakı şəhərində ağacların qeydiyyatı və nömrələnməsi” layihəsinin növbəti mərhələsinə başlanılır.
Leyla Əliyevanın iştirakı ilə aprelin 13-də Bakı şəhərinin Nərimanov rayonunda yerləşən yeni açılan parkda layihə üzrə ağacların qeydiyyatı aparılıb, üzərinə nömrəli etiketlər vurulub. Eyni zamanda parkın ərazisində 50 ədəd zeytun ağacı əkilib.
IDEA İctimai Birliyi, Ekologiya və Təbii Sərvətlər Nazirliyi, eləcə də yerli icra hakimiyyəti orqanları və bələdiyyələrin birgə əməkdaşlığı ilə həyata keçirilən layihənin əsas məqsədi yaşıllıqların mühafizəsinin dayanıqlığını təmin etmək, müdaxilə hallarının aradan qaldrılmasına, dəqiqləşdirilmiş inventarizasiya və reyestr platformasının formalaşdırılmasına, ictimai nəzarətin gücləndirilməsinə nail olmaqdır.
Qeyd edək ki, layihə çərçivəsində artıq “Şəhər yaşıllıqlarının reyestri” informasiya sistemi yaradılıb və Bakı şəhərinin Səbail rayonu ərazisində 25 minə yaxın ağac uçota alınıb, yaxın aylarda üzərlərinə nömrə lövhələri vurulmaqla inventarlaşma prosesinin tamamlanması nəzərdə tutulub.
Eyni zamanda, layihənin pilot mərhələdə icrası zamanı Nərimanov rayonu ərazisində yerləşən Atatürk parkı və abad həyət komplekslərində 2352 ağac uçota alınaraq inventarlaşdırılıb. İnventarlaşdırılmış ağacların üzərində hər bir ağacı identikləşdirən inventar lövhələri vurulub.
Ağaclar barədə məlumatların ictimaiyyətə açıq formada təqdim edilməsi məqsədilə www.agac.az portalı sınaq rejimində istifadəyə verilib. Təqdim olunan portal, Azərbaycan Respublikasının Prezidentinin 10 yanvar 2025-ci il tarixli, 282 nömrəli Fərmanı ilə Əsasnaməsi təsdiq edilmiş “Rəqəmsal ekologiya” informasiya sisteminin tərkib hissəsi olaraq yaradılmışdır.
Qeydiyyat işləri şəhərin inzibati ərazisində, o cümlədən park, yol kənarı və həyətyanı məhəllələrdə yerləşən bütün yaşıllıqlara şamil edilir. Proses əvvəlcədən təşkil edilmiş qruplar tərəfindən, hər bir ağacın üzərində xüsusi hazırlanmış nömrə etiketləri vurmaqla və həmin ağac barədə dürüst məlumatların elektron bazada yığılması ilə həyata keçirilir. Nömrələnmə ağaclara tam zərərsiz olan üsul ilə aparılır. Ağacın gövdəsinə vurulan etiketlər davamlı materialdan hazırlanır və üzərində ağacın nömrəsi və ağacın fərdi profilinə keçid üçün QR-kod əks olunur.
Bakıda ağacların qeydiyyatı və nömrələnməsi üzrə layihənin tərəfdaşları hər kəsi yaşıllıqların mühafizəsi və artırılmasına dəstək olmağa, təbiətimizin yaşıl gələcəyi naminə birləşməyə çağırır.

2020-ci il avqustun 10-da ürək çatışmazlığından vəfat edən general-leytenant Fuad Məmmədovun əmlaklarının bölünməsi ilə bağlı problem hələ də öz həllini tapmayıb.

Yenicag.az xəbər verir ki, mərhum generalın varisləri arasında əmlak bölgüsü ilə əlaqədar 4 ilə yaxındır davam edən məhkəmə prosesi nəticəsiz qalıb. Generalın həyat yoldaşı Gülsuqra Məmmədovanın sözlərinə görə, hansısa şəxsi maraqlar naminə məhkəmə prosesi süni şəkildə uzadılır:

“4 il ərzində təyin olunan 4 ekspert dəfələrlə baxış keçirmələrinə baxmayaraq, işi qəsdən ləngidir və prosesi süni şəkildə uzadırlar. Onların bu davranışı açıq şəkildə hansısa maraqların güdüldüyündən xəbər verir. Ədalətin bərqərar olmasından çox, şəxsi mənafelərini önə çəkmələri təkcə hüquqi prinsiplərə deyil, cəmiyyətin ədalətə olan inamına da zərbə vurur”.

Bu görüntü 17 noyabr 2024-cü il tarixinə aiddir. Belə ki, şikayətçinin sözlərinə görə, həmin tarixdə ekspertiza üçün təyin edilən Amil adlı ekspert sözügedən əmlaka gəlsə də mənim kefim belə istəyir işə baxmıram dedi.

Mövzü ilə bağlı 11 aprel 2025-ci il tarixində saat 15:00 radələrində Mərdəkan ərazisində yerləşən mübahisəli əmlaka baxış keçirilməsi üçün Ədliyyə Nazirliyinin Məhkəmə Ekspertizası Mərkəzi tərəfindən ekspertiza təyin olunub. Lakin ekspertlərlə birgə müşahidə aparmaq üçün əməkdaşımız əraziyə getsə də, gözlənilməz mənzərə ilə qarşılaşıb. Belə ki, saatlarla gözlənilməsinə və dəfələrlə zəng olunmasına baxmayaraq, Təhmasib adlı ekspert hadisə yerinə gəlməyib.

Bildirilir ki, uzun müddət gözlədikdən sonra isə məlum olub ki, ekspertiza prosesi əvvəlcədən hər hansı rəsmi xəbərdarlıq edilmədən ləğv edilib və başqa tarixə təxirə salınıb. Şikayətçi bu durumdan narazılığını belə ifadə edib: “Artıq 4 ildir məsələ öz həllini tapmır. Bilmirəm, niyə? Bəlkə də hansısa maraqlar üçün proses uzadılır? Fikirləşdim ki, Ədliyyə Nazirliyinin Məhkəmə Ekspertizası Mərkəzinin rəisi vəzifəsinə yeni təyin olunan Elşən Albəndovdan sonra vəziyyət dəyişər. Ancaq dəyişən heç bir şey olmadı. Bu gün də təyin olunan ekspertizanın xəbər edilmədən vaxtının dəyişdiyini gördük”.

Son vaxtlar orta məktəblərimizdə yenə də intiharlar, intihara cəhdlər, bıçaqlanmaların və s. sayı artır. Görəsən, bunun əsas səbəbləri nələrdir? Və müvafiq qurumlar belə halların qarşısının alınması, profilaktikası üçün hansı tədbirləri görür? Məsələn, məktəblərdə psixoloq xidmətlərinin durumu nə yerdədir?..

Tanınmış təhsil ekpserti, ADPU-nun dosenti, pedaqoji elmlər üzrə fəlsəfə doktoru İlham Əhmədov mövzu ilə bağlı Moderator.az-a açıqlamasında bunları söyləyib:

“Bəli, təəssüf ki, son dövrlərdə məktəblilər arasında intihar və intihara cəhdlər artıb. 2025-ci ilin əvvəlində ölkənin müxtəlif bölgələrində ard-arda məktəbli intiharları qeydə alınıb. Digər tərəfdən, şagirdlər arasında, hətta şagird və müəllimlır arasında münaqişələr, fiziki zorakılıq halları da artıb. Uşaqlar çox aqressiv olmuş, hətta bir çoxlarının psixi durumlarında problemlər də var. Bunun çox səbəbləri mövcuddur. Ən əsası odur ki, gənc nəslin tərbiyəsi məsələsində ciddi problemlər var...

Bu gün cəmiyyətdə dəyərlər dəyərsizləşib. Bu məsələdə bəzi TV kanalların dağıdıcı rolunu xüsusi qeyd etməliyik. Sosial şəbəkələr, məktəblərdə davamiyyətin zəifləməsi, son illər davamlı olaraq müəllim nüfuzunun, təlim-tərbiyə prosesinin zədələnməsi, məktəb-valideyn əlaqələrinin “votsap-pul yığma” kampaniyası ilə əvəzlənməsi və s. mənfi tendensiyalar illər ərzində öz dağıdıcı təsirini göstərməkdədir. Və təəssüf ki, hazırda məktəblərimiz də Elm və Təhsil Nazirliyi(ETN) kimi qapalı bir quruma çevrilməkdədir. Valideynin məktəbə daxil olması, direktorla görüşməsi problem olmuşdur. Səbəblər aydındır. Amma məktəbdə, cəmiyyətdə tərbiyə işini qaldırmaq istəyiriksə, məktəb-ailə işbirliyini bərpa etməliyik...

Bu cür halların artması məktəblərdə psixoloji xidmətlərin də vəziyyətini yenidən qiymətləndirməyi zəruri edir. Təhsil ocaqlarında psixoloji xidmətin əsas məqsədi şagirdlərin psixoloji sağlamlığını qorumaq və onların təhsil müvəffəqiyyətlərini artırmaqdır. Bu xidmətlər şagirdlərin təlim və tərbiyə sahəsindəki çətinliklərini aşkara çıxarmaq, onların şəxsi və intellektual inkişafındakı qüsurları aradan qaldırmaq və sosial cəhətdən fəal şəxsiyyətlərin formalaşdırılmasında dövlət və cəmiyyətə köməklik göstərməkdən ibarətdir...

Onu deyim ki, məktəbdə psixoloji xidmətin səmərəsizliyinin səbəbləri də çoxdur. Əsas səbəb bir nəfər psixoloqun belə ağır bir işin öhdəsindən təkbaşına gəlməkdə çətinlik çəkməsidir. Hesab edirik ki, “Məktəblinin Dostu” kimi əhəmiyyətsiz layihələrə yönələn maliyyəni məktəbdə psixoloji xidmətin gücləndirilməsinə yönəltmək lazımdır. Digər tərəfdən, məktəb psixoloqu ağır iş rejiminin qarşılığında çox aşağı maaş alır...
Axı, tərbiyə də təhsil kimi millətin gələcəyini təyin edir...

Məktəblərdə son vaxtlar baş verən neqativ hadisələr cəmiyyətdə tərbiyə məsələsinin arxa plana keçirilməsi, daha doğrusu başlı-başına buraxılması ilə əlaqədardır. Şagird-müəllim münasibətlərinin neqativ xarakter alması, bu cür xoşagəlməz hadisələrin çoxalması məktəbdə tərbiyə işinin aşağı səviyyəsini göstərir. Sovet dönəmində də məktəblərdə bəzən belə hadisələr baş verərdi. Lakin nadir hallarda... İndi isə təəssüflər olsun ki, belə olaylar sistematik xarakter alıb...

Bu problemin yaranmasında günahların bir qismi məktəbin üzərinə düşür. Hər bir sistemin işinin səmərəsi bu sistemin sükanı arxasında olan kadrın peşəkarlıq səviyyəsindən asılıdır. Məktəblərə son vaxtlar direktor təyinatında səhvlərə yol verilir. Bu məsələ mətbuatda da müzakirə mövzusuna çevrilməkdədir. Heç bir pedaqoji təhsili və pedaqoji stajı olmayan insanların məktəblərə direktor təyin edilməsi halları çoxalıb. Bu, ciddi səhvdir. Məktəbin rəhbərliyi, məktəbin idarəedilməsi, ona nəzarət pedaqoqların əlində olmalıdır, menecerliyi bacaran hər hansı qeyri-pedaqoqun, təlim-tərbiyədən uzaq kadrların yox... Mütləq şəkildə bilməliyik ki, məktəbə təhsilə aidiyyatı olmayan kənar şəxslərin rəhbər vəzifəyə gətirilməsi, birmənalı olaraq təhsilə fəlakət gətirəcəkdir. Artıq ilk simptomlar görünür. Hər peşənin öz sənətkarı var. Hər sahənin idarəedilməsi bu sferada zəngin təcrübə qazanan kadrlara həvalə edilməlidir. Təhsil sahəsində də belədir. Ancaq təəssüflər olsun ki, pedaqoji təhsili olmayanlar məktəblərdə direktor kimi fəaliyyət göstərirlər. Bu çox uğursuz eksperimentdir. Bu amil məktəbdə tərbiyə işini zəiflədən əsas səbəblərdəndir...

Tərbiyə işinin zəifləməsinin digər səbəbi ölkədə, cəmiyyətdə, eləcə də təhsil sistemində ideoloji boşluğun olmasıdır. 30 il müstəqillik təcrübəmiz olsa da, hələ də təhsil sistemində işlək tərbiyə konsepsiyası yoxdur. Yadımdadır, 2000-ci illərdə TN-də tərbiyə şöbəsi vardı. İndi mən bilən belə bir şöbə yoxdur. Ümumiyyətlə hazırkı ETN-nin strukturu hansı şöbələrdən ibarətdir, müdirləri kimlərdir, əməkdaşları kimlərdir, bu məlumatlar çox məxfi saxlanılır sanki. Digər nazirliklərdən fərqli olaraq Elm və Təhsil Nazirliyinin saytından onun strukturunu və orada işləyən insan kapitalının keyfiyyətini müəyyən etmək mümkün deyil, sanki bu dövlət sirridir. Əvvəllər bu qurum daha şəffaf və əlçatan idi ictimaiyyət üçün...

ETN-nin tərbiyə şöbəsi 2000-ci illərdə tərbiyə konsepsiyası hazırlamışdı. Amma sonralar bu konsepsiyadan, deyəsən, heç istifadə edilmədi. Ümumiyyətlə, sovet illərində tərbiyəyə dair yazılmış kitablardan, tədqiqatların nəticələrindən, konsepsiyalardan müstəqillik illərində istifadə etmək düz deyil. Çünki, cəmiyyətdə son 20-30 ildə çox şey dəyişdi. Müstəqillik illərində tərbiyə mövzusunda diqqəti cəlb edən əsərlər də az oldu, bu sırada yalnız 20 il əvvəl yazılmış professor Zakir Qaralovun "Tərbiyə" trilogiyasını qeyd edə bilərəm. Hələlik tərbiyəyə dair bu kitabdan başqa dəyərli nəsə başqa kitab xatırlamıram...

Tərbiyə məsələsinin zəifləməsinin digər səbəbi KİV, xüsusən telekanallardır. Elə verilişlər var ki, ona baxanda adam dəhşətə gəlir: bu nə mövzudu, bu nə aparıcıdı, bu nə səviyyəsiz verilişlərdi? Hesab edirəm ki, belə verilişlər gənclərin tərbiyəsinin pozulmasına xidmət edir. Maarifləndirici, idraki, vətənpərvərlik istiqamətində verilişlərimiz, əfsuslar olsun ki, azdır. Digər tərəfdən, cəmiyyət bilməlidir ki, tərbiyə təhsildən üstündür. Bilməliyik ki, "İnsanı əxlaqi yox, yalnız intellektual səviyyədə tərbiyə etmək, cəmiyyət üçün təhlükə yaratmaq deməkdir." (Teodor Ruzvelt)...

Uşaqların təhsil proqramlarını mənimsəməsi üçün valideynlər müxtəlif yollar axtarır, xeyli xərc çəkirlər, amma onların tərbiyəli olması barədə elə də narahat olmurlar, sanki, hər şey öz-özünə həll ediləcəkdir. Digər tərəfdən, məktəblərdə tədris prosesi pozulub. Repetitorluq kütləviləşəndən sonra şagirdlərin dərsə davamiyyəti də azalıb. Çünki şagirdlər pul qarşılığında repetitordan bilik alacaqlarını düşünürlər. Onlarda belə təsəvvür yaranır ki, hər işi pulla həll etmək mümkündür. Beləliklə, uşaqların nəzərində pul kultu, sanki pula səcdə xisləti yaranır və nəticədə maddiyyat mənəviyyatı üstələyir. Müəllimin nüfuzu da son onilliklər xeyli aşağı düşüb. Bu gün də müəllimlər sanki hüquqsuz bir zümrədir. Nə qədər imtahan etmək olar müəllimləri? Bir qisim müəllimlər isə şagirdlərə müştəri gözü ilə baxırlar. Şagird də bunu hiss edir. Bütün bu mənfi hallar kompleks halda həm müəllim nüfuzunu, həm də məktəbdə təlim-tərbiyə prosesinə mənfi təsir edir...

Fikirlərimiz XX əsrin əvvəllərində görkəmli maarifçilərimizin nəşr etdiyi “Füyuzat” jurnalından oxuduğum bir fikirlə bitirmək istəyirəm:

"Mənəvi tərbiyəni düzgün quran millət həqiqi mənliyə sahib olacaqdır”...”

Abşeron rayonu , Mazazır qəsəbəsi ərazisində yerləşən duz gölü ilə bağlı narazılıqlar səngimir.

Ərazidə yaşayan sakinlər xalq.az-a bildiriblər ki, gündəlik həyatda istifadə etdiyimiz duzun mənbəyi, Masazır duz gölünə axıdılan kanalizasiya xətləridir. Sakinlərin haqlı narazılıqlarını nəzərə alaraq əməkdaşlarımız sözügedən ərazidə olublar və həqiqətən şahidi olublar ki, kanalizasiya xətləri gölə axıdılır.

Qeyd edək ki, ərazidə “Azərsun Holdinq”-in Masazır Duz Zavodu yerləşir.

Nəsimi rayonu Hüseynbala Əliyev küçəsi, “Memar Əcəmi” metrosunun yaxınlığında ərazini çirkab suları basıb.

Bununla bağlı sosial şəbəkələrdə görüntülər yayılıb.

Məsələ ilə bağlı İri Şəhərlərin Birləşmiş Su Təchizatı Xidmətinin mətbuat katibi Ceyhun Musaoğlu bildirib ki, hazırda həmin ərazidəki problem aradan qaldırılıb:

“Ərazidə baş verən tullantı xətlərindəki tıxanma aradan qaldırılıb. Hazırda tullantı suları da sərbəst şəkildə boru ilə axır”.

Piştaxta-kassa uyğunsuzluğu davam edir.
Əslində bunun adına müştərinin aldatmaq deyirlər. XALQ.AZ xəbər verir ki, artıq marketlərimizin piştaxtada bir qiymət, kassadan çıxan qəbzdə isə başqa bir qiyməti göstərməsi ənənə halını alıb.
Günü-gündən artan müştəri gileyləri isə aidiyyatı qurumlar tərəfindən qulaqardına vurulduğundan marketlərimizin də durmaq fikri, hansısa məsuliyyətə gəlmək kimi yanaşması görünmür.
XALQ.AZ növbəti vətəndaş şikayətini təqdim edir. Bu dəfə narazılıq yenədə “Bazarstore” dir.
Belə ki , müştəri super kart ilə aldığı məhsulu endirimsiz qəbzlə vurublar və ödənişinidə alıblar.
“Bazarstore” bu barədə heç bir açıqlama almaq mümkün olmadı. Qarşı tərəfində fikirlərini dərc etməyə hazırıq.

DogruXeber.az: - Nəsimi rayonunun Memar Əcəmi metrosunun yaxınlığında bir neçə gündür qanunsuz tikinti aparılmaqdadır.

Bu barədə mediada dəfələrlə yazılmağına baxmayaraq, aidiyyətı qurumlar Ekologiya və Təbii Sərvətlər Nazirliyi istisna olmaqla məsələyə reaksiya vermirlər.

Ekologiya Nazirliyinin sözügedən məsələ ilə bağlı açıqlamasında deyilir:

“Nəsimi rayonu, Cavadxan küçəsi Şəki kafesinin ərazisində ağacların kəsilməsi ilə bağlı 11 saylı regional ekologiya və təbii sərvətlər idarəsinə daxil olan şikayət araşdırılıb. Məsələ ilə bağlı “Qafqazinfo”ya idarənin rəisi Qafar Ağayev bildirib ki, araşdırma zamanı ağaclar təmir-tikinti işləri aparılan zaman kafe sahibi Famil Səfərovun göstərişi ilə kəsilib. Nəticədə təbiətə 11700 manat məbləğində ziyan dəydiyi müəyyənləşib. Qurum rəsmisinin sözlərinə görə, faktla bağlı aprelin 2-də akt tərtib edilib: “Təbiətə dəymiş ziyanın məbləği cinayət tərkibi yaratdığından məsələyə hüquqi qiymət verilməsi üçün toplanmış materiallar Azərbaycan Respublikasının Baş Prokurorluğuna göndərilib”. Q.Ağayev qeyd edib ki, kəsilmiş ağacların əvəzinə ərazidə yeni yaşıllıqların salınması üçün Nəsimi rayon İcra Hakimiyyəti və Yaşıllaşdırma Təsərrüfatı Birliyinə müraciət edilib”.

Sosial şəbəkə istifadəçiləri nazirliyin açıqlamasını, sahibkara kəsilən cəzanın adekvat olmadığını, bu cəzanın ictimai rəyi susdurmağa hesablandığını bildirirlər.

Mediada yazılan məlumatda isə aparılan tikintinin Eldəniz adlı iş adamına məxsus olduğu yazılır.

Eldəniz adlı sahibkar Memar Əcəmi metrosunun yaxınlığında bir neçə uşaq geyimləri mağazası, Bakının “Gənclik” metrosu, Xətai rayonu, Abşeronun Xırdalan şəhəri və digər ərazilərdə obyektlərə sahibdir.

Sahibkara Əmlak Komitəsindən Taleh Bəşirovun, Nəsimi rayon icra hakimiyyətindən isə Asim Rzayevin dəstək verdiyi vurğulanır.

Məsələ ilə bağlı qarşı tərəfdən mövqe öyrənə bilmədik. /qlobal.az

Vətəndaş banka olan borcunu ödəyə bilmədiyi üçün mənzili hərraca çıxarılıb, o, hərracın keçirilməsindən 1 gün öncə borcunu tam bağlasa da, evi Ədliyyə Nazirliyinin Nəsimi rayon İcra şöbəsi tərəfindən hərracda başqasına satılıb.

Bu barədə şikayətçi Məhərrəm Əliyev Ajans.az-a müraciət edib. Hərrac olacağını bilən Məhərrəm Əliyev bu il martın 17-də “Unibank”a olan borcunu tam bağlayıb və həm Nəsimi İcra Şöbəsinə, həm də Hərrac Mərkəzinə elektron qaydada “Unibank”ın xitam məktubunu göndərib.

Hərracın keçiriləcəyi gün – 18 martda vətəndaş Ədliyyə Nazirliyinin Nəsimi İcra Şöbəsində olub və borcu bağladığı barədə məlumat verib. Lakin hərrac dayandırılmadığı üçün tanımadığı üçüncü şəxs onun Nəsimi rayonu, Azər Əliyev küçəsində yerləşən 250 min AZN dəyərində olan evini satın alıb.

Şikayətçinin problemlə bağlı icra məmuru ilə də müvafiq yazışmaları mövcuddur. Lakin etik olmadığı üçün həmin yazışmaları işıqlandırmağı uyğun görmürük.

Hüquqşünas bildirib ki, “İpoteka haqqında” qanunun 46.1 maddəsinə əsasən hərrac keçirilənədək və hərrac protokolu imzalanana qədər borclu öhdəliyini yerinə yetibsə, bu zaman əmlakın açıq hərracda satılması qadağandır və işə xitam verilməlidir. Hazırki iş üzrə isə borc 17.03.2025 tarixində bağlanıb və icra qurumuna, hərrac mərkəzinə bu barədə məlumat verilib.

Ədliyyə Nazirliyindən Ajans.az-ın sorğusuna cavab olaraq bildirilib ki, borc (icra ödənişi də daxil olmaqla) tam ödənilmədiyi və yerli icra qurumu bu barədə vaxtında və rəsmi qaydada məlumatlandırılmadığı üçün icra prosesi dayandırılmayıb:

“Bakı şəhəri 14 saylı Notariat ofisinin müvafiq icra qeydinə əsasən 42.817,33 manat pul vəsaiti vətəndaş Əliyev Məhərrəm Müseyib oğlundan tutularaq “Unibank” ASC-nin xeyrinə ödənilməli, borc tələbi ipoteka predmeti olan Bakı şəhəri, Nəsimi rayonu Azər Əliyev küçəsində yerləşən mənzilə yönəldilməlidir. Həmin icra qeydinə əsasən əmlakın ilkin satış qiyməti 125.000 manat müəyyən edilmişdir.

Bakı şəhəri Nəsimi rayon icra şöbəsində aparılmış icraat zamanı borclu tərəfindən icra sənədi üzrə borc könüllü ödənilmədiyindən ipoteka predmetinin (mənzilin) elektron hərracda satılması üçün icra məmuru tərəfindən 05.02.2025-ci il tarixdə sifariş verilmiş, mənzil Elektron Hərrac Portalında (www.herrac.gov.az) 146.250 manata satılmış və onlayn qaydada keçirilən hərrac 18.03.2025-ci il tarixdə saat 10:16-da bitmişdir.

Vətəndaş tərəfindən borcun tam ödənilməsi ilə bağlı iddia ilə əlaqədar bildiririk ki, icra qurumu yalnız rəsmi sənədlər əsasında qərar qəbul edə bilər. Belə ki, “Unibank KB” ASC-nin 17.03.2025-ci il tarixli məktubuna əsasən vətəndaş Məhərrəm Əliyev tərəfindən banka olan borcun ödənildiyi qeyd edilmişdir. Həmin məktub yerli icra qurumunun elektron poçt ünvanına 17.03.2025-ci il tarixdə saat 18:11-də iş vaxtı bitdikdən sonra daxil olmuş, bu səbəbdən növbəti gün qeydiyyata alınmışdır.

Ödənilməli olan icra ödənişi isə borclu tərəfindən ödənilməmiş, həmin ödənişlər yalnız hərrac başa çatdıqdan sonra və hissə-hissə olmaqla (18.03.2025-ci il tarixdə saat 17:07-də 1.000 manat, 19.03.2025-ci il tarixdə saat 12:07-də 500 manat, saat 15:52-də isə 1.497 manat olmaqla, cəmi 2.997 manat) ödənilmişdir.

“İcra haqqında” və “İpoteka haqqında” qanunların müvafiq normalarının tələblərinə əsasən borclunun əmlakı əsas borcla yanaşı icra ödənişi və icra hərəkətlərinin həyata keçirilməsi üçün tələb olunan xərclərin tutulması məqsədilə satılır".