Azərbaycan Televiziya və Radio Verilişləri QSC-də (AzTV) bir totalitarizm mühiti hökm sürür. Xüsusən də Rövşən Məmmədovun sədr təyin olunmasından bir müddət sonra Şimali Koreya rejiminin bir modeli yaradılıb. Rövşən Məmmədovun mövqeyini
möhkəmləndirməsi nəticəsində bu Qapalı Səhmdar Cəmiyyətində öz qaydalarını tətbiq etməyə başladı. Sanki gestapo şəraitidir və bütün kollektiv nəzarət altındadır. Halbuki bir yaradıcı mühitdə, media strukturunda bu dərəcədə əməkdaşların azadlıqları buxovlana bilməz. Ən azı işçilərin sosial şəbəkə paylaşımlarına total nəzarət şəxsi həyata müdaxilədir. Lakin AzTV sədri ən kiçik paylaşıma belə həssaslıqla yanaşır, trol batalyonu saxlayır, o cümlədən əməkdaşlarının nələr paylaşdığına dair nəzarət mexanizmi yaradıb. Yəni onun komandasında sırf işçilərin sosial media paylaşımlarını pusquda dayanıb izləyənlər var və bu haqda Rövşən Məmmədovu məlumatlandırırlar. Elə bunun nəticəsidir ki, AzTV-nin təcrübəli jurnalistlərindən biri olan Günay Novruz absurd bir səbəb göstərilərək ixtisar edilib. Anaxeber.info məlumat verir ki, bu haqda jurnalist özü tik-tok hesabında video paylaşıb. Günay Novruz deyib ki, AzTV sədri Rövşən Məmmədov onu heç kimin adını çəkmədiyi bir statusa görə işdən çıxarıb. Jurnalist postunda yazıb ki, bir ay qabaq həmin statusu paylaşıb. Orada deyib ki, "Allahım mənə düz yol göstərdiyin üçün minnətdaram, böyüksən, varsan..."
Yəni jurnalist heç kəsə replika atmayıb, ad çəkməyib, Allah təşəkkür bildirib. Günay Novruzun sözlərinə görə, onun işdən çıxarılması barədə əmrdə səbəb kimi həmin status göstərilib. Jurnalist deyir ki, AzTV rəhbərliyi bu statusda qurumun maliyyə rəisinə və onun baş redaktor olan həyat yoldaşına söz atıldığı nəticəsi çıxarıb: "Onların övladı rəhmətə gedib və bu statusdan belə qənaətə gəliblər ki, guya mən onlara söz atmışam, Allaha minnətdarlıq etmişəm. Bu dərəcədə absurd bir ittihamla əmr verilərək məni işdən azad ediblər".
Günay Novruz 1985-ci il iyun ayının 14-də Sumqayıt şəhərinin H.Z. Tağıyev qəsəbəsində dünyaya gəlib. Qəsəbənin 6 saylı orta məktəbini bitirib. ABU-nun jurnalistika fakültəsinə daxil olub və 2008-ci ildə oranı bitirib. 2012-2014-ci illərdə isə Bakı Slaviyan universitetinin yaradıcılıq fakültəsində oxuyub. Azərbaycan Jurnalistlər Birliyinin və Yazıçılar Birliyinin üzvüdür. İki kitab müəllifidir. Prezident təqaüdünə layiq görülmüşdür.
Lakin bu ilk belə hal deyil. Zaman-zaman ixtisara salınan AzTV əməkdaşları rəhbərliyi məntiqsiz qərarlarına görə tənqid ediblər. Bu günlərdə isə haqqin.az saytının rəhbəri Eynulla Fətullayev AzTV sədrinin özünü də, dissertasiyasını da “geydirmə” adlandırmışdı.
Deməli, geydirmə AzTV-nin geydirmə sədrinin dissertasiyası da geydirmə imiş. Geydirmənin doktorluq dissertasiyası: “Azərbaycan diasporasının mətbuatı”. Ay səni geydirmə”.
Eynulla Fətullayev bununla da kifayətlənməyib və digər postunda lənət oxuyub: “Ümummilli lənət: Görüm sizi ömrünüzün sonuna kimi AzTV-yə
baxasınız!”.
AzTV isə öz növbəsində “Haqqin.az” saytının əməkdaşlarını “cahil” adlandırıb.
Mətbuatda gedən başqa xəbərlərdə, konkret olaraq konkret.az saytında dərc edilmiş məqalədə isə deyilir ki, işçiləri ilə kobud davranış, işçilərin haqlarının pozulması, yalnız yaxın çevrəsinə yüksək qonorarların yazılması, kollektivin əksəriyyətinin dolanışıq səviyyəsinin getdikcə azalması qurumda gedən özbaşınalığın yalnız bir hissəsidir. Keçirdiyi tenderlər, kotirovka sorğularında kütləvi maxinasiyalar haqqında mətbuatda kifayət qədər məlumat gedib. Əmək Məcəlləsinə uyğun olmayaraq, işçilərin haqsız yerə əməkhaqlarından pul tutulmaları isə başqa bir mövzudur. Həmçinin, yeyintilər haqda da məlumatlar verilir. Bütün bunların Rövşən Məmmədovun dövründə olduğu iddia edilir. Bakuexo.az isə yazmışdı ki, Rövşən Məmmədov yaxın çevrəsinə vəzifələr paylayıb:

Ranar Musayev, AzTV-nin bədii rəhbəri Məmmədovların ailəvi dostu

Rafael Məmmədov, Bədii rəhbərin müavini-Rövşənin qaynı

İlhamə Hüseynova , Kadrlar Departamentinin rəisi- Rövşənin xanımının rəfiqəsi

Nərgiz Rəfiyeva, Sosial media və ictimaiyyətlə əlaqələr departamentinin rəisi- Rövşənin xanımının rəfiqəsi

Ülfət Rəhimova, Teleradio Akademiyasının prorektoru- Rövşənin xanımının rəfiqəsi

Niyaməddin Quliyev, Maliyyə və Mühasibat uçotu departamentinin rəisi (Rövşənin “qara kassası)- Rövşənin xanımının yaxın qohumu

Turan Babayev ,“Səhər” Musiqi-informasiya redaksiyasının baş redaktoru-Rövşənin ailəvi dostu

Anar Həsənov, “Ekstrim qrup”un rəhbəri- Rövşənin ailəvi dostu

Elnur Əlizadə , Texniki İstehsalat Birliyinin direktoru- Rövşənin ailəvi dostu

Müşviq İbrahimov, Maddi-Texniki Təchizat və İstehsalat Departamentinin rəisi-Rövşənin qohumu və uşaqlıq dostu

Vüqar Bəşirov, Təsərrüfat

AnaXeber.info

04 oktyabr 2024-cü ildə “Reytinq” onlayn qəzetində Bakı sakininə külli məbləğdə zərər vurulması ilə bağlı məqalə dərc etmişdik. Həmin məqalədə Nərimanov rayonu, Aşıq Molla Cümə küçəsi, 26 ünvanında Elxan Qarayevə məxsus qarajın darvazasının və içərisindəki əmlakının oğurlanması, dağıdılması və yararsız hala salınmasından bəhs olunur.

Reyting.az-ın yeni əldə etdiyi məlumata görə, Bakı sakini Elxan Qarayevə məxsus əmlakın qəsdən dağıdılıb talan edilməsində əsas şübhələr vəzifəli şəxslərin üzərinə yönəlir. İddia olunur ki, vətəndaşa məxsus daş qarajın darvazasının, digər dəmir hissələrinin, həmçinin qarajda saxlanılan əmlakın bir hissəsinin oğurlanaraq naməlum istiqamətə aparılmasına, qarajın damının uçurulmasına, nəticədə qarajda saxlanılan digər əmlakın tam yararsız vəziyyətə salınmasına göstərişi Nərimanov rayonunda fəaliyyət göstərən hüquqi şəxs «Gold Residense» MMC-nin direktoru Anar İsazadə və digər vəzifəli şəxslər veriblər. Onlar qanuni əsas olmadan öz vəzifə səlahiyyətlərini aşıb, vəzifələrindən sui-istifadə edərək Aşıq Molla Cümə küçəsi, 26 ünvanında, hələ Sovet dövründə inşa edilmiş və E. Qarayevə məxsus əmlakı dağıtdırıblar.

Elxan Qarayevin əmlakına zərər vurulması ilə bağlı aidiyyəti dövlət qurumlarına etdiyi əsaslı şikayətlərə baxılmır, MMC tərəfindən qaraj bu günədək bərpa edilməyib, ona qəsdən vurulmuş maddi zərər ödənilməyib. Şikayətçi dəfələrlə cəhd etsə də, «Gold Residense» MMC-nin rəsmi sənədlərində direktoru kimi göstərilmiş Anar İsazadə ilə görüşə bilməyib. Hər dəfə ona MMC-nin direktoru kimi fərqli şəxsləri təqdim edirlər: Elnur Hüseynov və Asif İsazadə. Şikayətçi isə iddia edir ki, qarajın söküntüsünə və talan edilməsinə rəhbərlik edən elə bu şəxslərdir.

Reyting.az-ın əməkdaşı isə «Gold Residense» MMC barəsində aşağıda göstərilən rəsmi məlumatları öyrənə bilib:

«Gold Residense» MMC-nin qeydiyyat ünvanı Sumqayıt şəhəri, Novxanı Bağ massivi, ev, 4715Q, direktoru İsazadə Anar Sabir oğlu.(VÖEN: 2905808451)

MMC-nin hazırda yerləşdiyi faktiki ofisi: Bakı şəhəri, Nərimanov rayonu, Fətəli Xan Xoyski prospekti, «Krone» otelinin 1-ci mərtəbəsi.

Bu MMC 2020-ci ilin aprel ayında qeydiyyata alınıb. Rəsmi olaraq direktorları Elnur Hüseynov, Cəmil Qasımov olub və hazırda Anar İsazadə rəhbərlik edir.

Cəmil Qasımova 2023-cü ildə prokurorluq orqanları tərəfindən AR Cinayət Məcəlləsinin 186.2.1 (zərərçəkmiş şəxsə külli miqdarda ziyan vurmaqla əmlakı qəsdən məhv etmə) və 308.2-ci (vəzifə səlahiyyətlərindən sui-istifadə ağır nəticələrə səbəb olduqda) maddələri ilə ittiham elan edilib və cinayət işi baxılması üçün aidiyyəti üzrə Nərimanov Rayon Məhkəməsinə göndərilib.

Elnur Hüseynov isə bu ilin fevral ayında qeydiyyata alınmış «Gold Premium Residence GPR» MMC-nin direktorudur. Bu MMC-nin də hüquqi ünvanı Sumqayıt şəhəri, Novxanı Bağ massivi, ev 4715Q-dir. Hansı işlə məşğul olduğu hələ bəlli deyil. Amma elə bu faktın özü də aidiyyəti hüquq-mühafizə orqanları tərəfindən müvafiq araşdırma aparılması üçün bir siqnaldır. Adətən eyni insanlar tərəfindən oxşar adlarla şirkətlər vergidən yayınmaq və digər qanunsuz işləri həyata keçirmək məqsədi ilə yaradılır.

Müxtəlif rəsmi sənədlərdə «Gold Residense» MMC-nin direktoru kimi müxtəlif şəxslər göstərilir. Bir şirkətin eyni vaxtda bir neçə direktoru necə ola bilər?

Hüquqi şəxs kimi fəaliyyət göstərən «Gold Residense» MMC-nin və onun vəzifəli şəxslərinin öz vəzifə səlahiyyətlərindən sui-istifadə edərək, vəzifə səlahiyyətlərini aşaraq E. Qarayevə külli miqdarda zərər vurmaqla əmlakını qəsdən məhv etmələri, qarajına qanunsuz daxil olaraq oğurluq etmələri və digər cinayət əməllərinə hüquqi qiymət verilməsi, onların cinayət məsuliyyətinə cəlb olunmaları üçün polis və prokurorluq orqanlarına müraciət edilməsinə baxmayaraq bu günədək hər hansı bir tədbir görülməyib, təqsirkar vəzifəli şəxslər barəsində cinayət işi başlanmayıb. Güman edirik ki, «Gold Residense» MMC-nin havadarları buna mane olurlar.

Prokurorluq orqanları tərəfindən qanuni araşdırma aparıldığı halda «Gold Residense» MMC-nin rəhbər vəzifəli işçilərini yol verdikləri bu qanunsuzluqlara görə, Azərbaycan Respublikası Cinayət Məcəlləsinin 186.2.1 (zərərçəkmiş şəxsə külli miqdarda ziyan vurmaqla əmlakı qəsdən məhv etmə), 308.2 (vəzifə səlahiyyətlərindən sui-istifadə ağır nəticələrə səbəb olduqda), 177.2.3 (yaşayış sahəsinə, habelə binaya, anbara və ya başqa saxlanc yerlərinə qanunsuz daxil olmaqla oğurluq törədildikdə) və digər maddələri ilə məsuliyyət gözləyir.

Bakı Şəhər İcra Hakimiyyəti ilə Nərimanov Rayon İcra Hakimiyyəti isə şikayətlərə ümumiyyətlə baxmır və cavab vermir. Hansı ki, «Gold Residense» MMC-nin vəzifəli şəxsləri ərazidə yol verdikləri qanunsuzluqları Bakı Şəhər İcra Hakimiyyətinin 26 yanvar 2024-cü il tarixli sərəncamı ilə əsaslandırırlar. Bu sərəncam qanunsuzdur və ləğv olunmalıdır. Həm də, ləğv olunmalıdır ona görə ki, orada göstərilən bəndlərin tələblərini MMC lazımi səviyyədə icra etmir, tələbləri pozur. Sərəncama əsasən 1,178 ha ərazini icarəyə götürən MMC hazırda 2 ha-dan çox ərazini qanunsuz olaraq hasarlayib. Həmin hasarın arxasında isə istənilən qanunsuzluqlara yol verirlər, özlərini ağa, ərazidəki mülk sahiblərini isə qul sayırlar. Ərazidəki mənzil, obyekt və qaraj sahiblərini zəlil ediblər. Onlara müxtəlif qanunsuz təzyiqlər göstərərək, hədə-qorxu gələrək mülklərini qəpik-quruşa əldə etməyə çalışırlar. Sosial şəbəkələrdə və mətbuatda bu barədə, həmçinin həmin MMC-nin və onun vəzifəli şəxslərinin Nərimanov rayonunda yol verdikləri qanunsuzluqlar barədə kifayət qədər məlumatlar, şikayətlər var, amma onlara baxan yoxdur. Sanki bu MMC toxunulmazdır.

Bakı Şəhər İcra Hakimiyyətinin 26 yanvar 2024-cü il tarixli sərəncamından gördüyünüz kimi (aşağıdakı fotoya baxın:), «Gold Residense» MMC-yə E. Qarayevə aid qarajların ərazisinin icarəyə verilməsi və orada söküntü-tikinti işlərinin aparılması nəzərdə tutulmayıb. MMC özbaşına olaraq E. Qarayevin qarajının bir hissəsini söküb, dağıtmış və əmlakını talan etmişdir.

«Gold Residense» MMC-nin ofislərindən biri E. Qarayevin qarajları ilə üzbəüz «Krone» otelinin 1-ci mərtəbəsində yerləşir. MMC qarajların ərazisinə göz dikib, onları qanunsuz söküb, yerində özünə parkovka, yəni avtomaşınları üçün dayanacaq tikmək niyyətindədir.

Azərbaycan Respublikasının Baş prokuroruna, həmçinin Daxili işlər nazirinə edilmiş şikayətlərin isə heç bir nəticəsi yoxdur. «Gold Residense» MMC-nin vəzifəli şəxsləri barəsində olan şikayətlərə heç bir hüquq-mühafizə və dövlət orqanları baxmır. Hansı ki, bu şəxslərin qanunsuz əməllərində AR CM-nin bir çox maddələrinin tərkibi var. Buna görə də məsələ barədə şikayət ərizələri yazmaqla və mətbuat vasitəsi ilə Azərbaycan Respublikasının Prezidentini məlumatlandırmaq lazımdır. Hesab edirik ki, ölkə rəhbərliyinin müdaxiləsindən sonra «Gold Residense» MMC-nin qanunsuz fəaliyyətinə son qoyular, cinayət törədən vəzifəli şəxsləri isə öz layiqli cəzalarını alarlar.


Reyting.az

“Torqovıy”da yolu bağlayıb taksi sürücüsünü döyən 77-AA-019 dövlət qeydiyyat nişanlı avromobilin sahibi və avtomobili idarəetmə hüququ olan şəxsin kimliyi bəlli olub.

TEREF Ajans.az-a istinadən xəbər verir ki, avtomobili idarəetmə hüququ olan Abşeron sakini 1991-ci il təvəllüdlü Mütəllimov Namiq Fərhad oğlu “Mastel Holding” MMC nin sex rəisi vəzifəsində çalışır.

77-AA-019 dövlət qeydiyyat nişanlı avtomobilin sahibi isə “SSMOVİE” MMC-dir

Qeyd edək ki, “SSMOVİE” MMC-yə ötən il gömrük qaydaları əleyhinə olan (Mallar və nəqliyyat vasitələri gətirilərkən və ya aparılarkən müvafiq icra hakimiyyəti orqanına məlumatın verilməməsi və ya təhrif olunmuş məlumatın verilməsi, yaxud əvvəlcədən qısa idxal bəyannaməsinin verilməməsi) inzibati xəta protokolu tərtib edilib.

Bu protokol İnzibati Xətalar Məcəlləsinin 485.2-ci maddəsi ilə iddası ilə irəli sürülüb.

Şirkətin məhkəməyə verilmə məlumatları Fed.az saytından götürülüb

Taksi sürücüsünü kimin döydüyü barədə hələ ki dəqiq açıqlama yoxdur.

Son günlər kərə yağının bahalaşmasından şikayət edirlər. Mən evdə Təbrizin istehsalı olan "Şekilli" və "Pegah" yağlarından istifadə edirəm. Bir ay öncə 15 manata aldığım yağ indi 23-25 manat olub.
İranda müəyyən bahalaşma var. Amma bu 50-60 faiz yox, 10-12 faizdir. Yəni, bir ay bundan öncəyə qədər İranda adlarını yazdığım kərə yağının topdan qiyməti 9,50-10 manat idisə, hazırda bu rəqəm 11-12 manat təşkil edir.
TEREF yazır ki, bunu JAMAZ.info saytının baş redaktoru Fikrət Fəraməzoğlu öz sosial şəbəkə səhifəsində yazıb. Fikrət bəy daha sonra yazır:
Bəs, necə olur ki, cəmi 560 km yol gələn məhsul Azərbaycanda iki dəfədən çox bahaya satılır? Bəziləri sahibkarları möhtəkirlikdə ittiham edə bilər. Əslində isə günahı sahibkarda yox, həşəmətli Gömrük Komitəsi və AQTA-da axtarmaq lazımdır.
Məsələ belədir: AQTA hər mal çeşidi üzrə icazənin verilməsini 400 manatdan 1000 manata qaldırıb. Bu o deməkdir ki, əgər bir maşında 6-7 çeşid mal olarsa, sahibkar əlavə olaraq 6-7 min manat ödəməlidir. Gömrük Komitəsi isə ƏDV və gömrük rüsumlarını toplam 36 faiz saxlasa da, o qədər kənar xərclər yaradıb ki, bu rəqəm 55-60, bəzən 100 faizə qədər yüksəlir. Məsələn, hər maşına görə, tələb olunan 1500-2000 manat pul 4500-6000 manata qədər artırılıb. Bundan başqa, yük maşını gömrüyün həyətində qalarsa, günlük əlavə 150-200 dollar tələb olunur. Əvvəllər bu 100 manat idi.
Bəli, bir də işin içinə Səhiyyə Nazirliyi də daxildir. Nazirlik xaricdən gətirilən bütün mallar üzrə (hər ada görə) illik icazə verməlidir. Bir də kvota müəyyənləşdirmək haqqına sahibdir. Bu işin icrası isə Respublika GEM-ə tapşırılıb. Yəni, sahibkar AQTA, DGK ilə yanaşı SN-in də bığının altından keçməlidir.
Əlaqədar təşkilatlaında mövqeyini dərc etməyə hazırıq!
TEREF

Yeni Ramana kimi tanınan qəsəbədə acınacaqlı vəziyyət hökm sürür. Suraxanı və Sabunçu rayon icra hakimiyətləri isə qəsəbədəki problemləri həll etmək əvəzinə günahı bir-birinin üstünə atır.

Tribunainfo.az xəbər verir ki, illərdir yiyəsiz qalan qəsəbəyə hansı rayon icra hakimiyyətinin baxmalı olduğu müəyyənləşmir. Məhz bu səbəbdən də qəsəbənin problemləri hər gün daha da artır.

Qəsəbə sakinləri bildirib ki, hava limanından cəmi 2-3 km aralıda yerləşən qəsəbədə işıqlandırma yoxdur. 50-dən çox ailə yaşayan qəsəbənin yollar bərbad olduğu üçün əraziyə nəinki taksi, hətta təcili yardım maşını da gəlmir. Sakinlər bildirib ki, asfalt problemi həll edilmir. Zibil qutuları da yoxdur.

Sakinlərin adı çəkilən rayon icra hakimiyyətlərinə, həmçinin aidiyyəti bələdiyyələrə və təsərrüfat xidmətlərinə müraciətləri nəticəsiz qalır.

Qeyd edək ki, evlərin “kupça”sına əsasən ərazi Suraxanı rayonu sayılır, amma kommunal xidmət haqları Sabunçu rayonunun aidiyyəti idarələrinə ödənilir.

Bu günə qədər daha çox bahalı məhsulları ilə diqqətləri cəlb edən və sözün açığı, həm də keyfiyyət normalarına riayət etməsi ilə fərqlənən marketlərdən biri - GRANDMART supermarketlər şəbəkəsinə də deyəsən, göz dəydi... "DİA-AZ" bildirir ki, hər halda, bu gün sözügedən ticarət obyektində "Сладкино" markası adı altında satışa çıxarılan "Südlü Bulka"lar açıq-aşkar təhlükə mənbəyidir. Onu da vurğulayaq edək ki, məhsulun arxasında sifarişçi olaraq GRANDMART şəbəkəsi xüsusi olaraq vurğulanıb.

Bu barədə "Müştəriyəm Şikayətim Var" sosial şəbəkəsində giley edən valideynlərdən biri digər ata-anaları da xəbərdar etməklə yanaşı, hər kəsi ehtiyatlı olmağa da səsləyir.

Narazı vətəndaş yazır: "Balaca övladınız varsa, ehtiyatlı olun...

Saxlama müddəti bitməmiş paketdə kiflənib.

Qeyd edim ki 3 gündür alınıb mağazadan..."

Uyğun fotoları təqdim edirik...




Hər halda, qarşı tərəf iddia edə bilməz ki, müştəridədir günah... onun evindəki şərait səbəbindən kiflənmə baş verib. Narazı vətəndaş aşkar şəkildə qeyd edir ki, paket açılmayıb. Deməli, məsələ yenə də saxlama müddətinin saxta yollarla dəyişdirilməsi ehtimallarına bağlıdır...

Dövlət satınalmalarında fəal iştirak edən və iri məbləğli tenderlərin qalibi seçilən şirkətlərdən biri də "ZN Trade" MMC-dir.

Qaynarinfo-nun məlumatına görə, açıq mənbələrdə barəsində heç bir məlumat olmayan və yerli mediada müəmmalı şirkət kimi təqdim edilən "ZN Trade" MMC təkcə cari ildə 8 tenderin qalibi olub. Bu tenderlər üzrə satınalma müqaviləsinin ümumi maliyyə dəyəri 24 556 359,17 manatdır.

Şirkət sonuncu dəfə Naxçıvan Muxtar Respublikası (MR) Əmək və Əhalinin Sosial Müdafiəsi Nazirliyinin tabeliyində Dövlət Tibbi-Sosial Ekspertiza və Reablitasiya Agentliyinin reabilitasiya vasitələri və yarımfabrikat protez mallarının satın alınması bağlı keçirdiyi tenderin qalibi seçilib. "ZN Trade" MMC-nin bu tender üzrə qiymət təklifi 649 107,23 manatdır.

İqtisadiyyat Nazirliyi yanında Dövlət Vergi Xidmətinin reyestr məlumatlarına görə, "ZN Trade" MMC 09 sentyabr 2022-ci ildə qeydiyyata alınıb. Nizamnamə kapitalı 10 manat olan şirkətin hüquqi ünvanı Bakı şəhəri Xətai rayonu, Oksigen küçəsi, ev 3/8-də yerləşir. MMC-nin qanuni təmsilçisi isə Kərimov Nüsrəddin Yolçu oğludur.

Nüsrəddin Kərimov haqqında açıq mənbələrdə heç bir məlumata rast gəlinmir. Araşdırmalarımız zamanı məlum olub ki, adıçəkilən şəxs şirkəti təmsil etsə də, sahibi deyil.

"ZN Trade" MMC-nin sahibi kimi olmasa da, himayədarı qismində iki məmurun adı çəkilir. Onlardan biri Naxçıvan MR-nin baş naziri Ceyhun Cəlilov, digər isə Dövlət Tibbi-Sosial Ekspertiza və Reabilitasiya Agentliyinin İdarə Heyətinin sədri Anar Bayramovdur.

Ceyhun Cəlilov

Ceyhun Cəlilov Naxçıvan MR-in baş naziri vəzifəsinə təyinat almazdan əvvəl muxtar respublikanın əmək və əhalinin sosial müdafiəsi naziri olub. Mediada yer alan iddialara görə, məhz onun nazir olduğu dönəmdə "ZN Trade" MMC dövlət satınalmalarında iştirak etməyə başlayıb və 14 tenderin qalibi seçilib. Bu tenderlər üzrə satınalma müqavilələrinin ümumi maliyyə dəyəri 5 943 294 manat təşkil edib.

Şirkətin hazırda da Naxçıvan MR Əmək və Əhalinin Sosial Müdafiəsi Nazirliyinə tabeli qurumların keçirdiyi tenderlərin qalibi seçilməsi Ceyhun Cəlilov faktoru ilə izah edilir.

Anar Bayramova gəlincə, "ZN Trade" MMC ilə onun adının hallanması Protez-Ortopedik İstehsalat və Reablitasiya Mərkəzinin 12 milyonluq tenderində qalib gəlməsindən sonraya təsadüf edir.

Anar Bayramov

Ümumiyyətlə, "ZN Trade" MMC-nin qalib gəldiyi tenderlər əsasən Əmək və Əhalinin Sosial Müdafiəsi Nazirliyi və onun tabeliyində fəaliyyət göstərən qurumların keçirdiyi satınalma müsabiqələrdir. Bütün bunlar "ZN Trade" MMC-nin heç də adi sahibkarlardan birinə məxsus olmadığına dair şübhələri artırır.

Azərbaycanda inhisarçılığın yaranmasında və yaşamasında dövlət qurumlarının, ayrı-ayrı nazirlik və idarələrin, nazir və məmur-oliqarxların xüsusi xidməti var. Özü də bu inhisarçılıq təkcə hansısa mal və materialların, məhsulların idxalı, satışı və istehsalında deyil, həm də xidmət sektorunda özünü göstərir. Bu da dövlət qurumlarının keçirdiyi tenderlər və satınalmalardan açıq şəkildə görünür.

Məsələn, Azərbaycanda “Caspel” adlı İT xidmətləri üzrə “tender kralı” şirkət var. Hazırda sözügedən şirkətin qanuni təmsilçisi Quliyev Ceyhun Məhi oğludur. Bu şəxs sabiq Vergilər naziri, mərhum Fazil Məmmədovun kürəkəni Namiq Quliyevin qardaşıdır. Bu şirkət “Caspel Holdiq”ə bağlıdır.

“Caspel” yarandığı ilk dövrlərdən – 2005-ci ildən F.Məmmədovun şirkəti kimi tanınıb və əsasən ölkəyə kassa aparatlarının gətirilməsi sahəsindəki inhisarçılığı ilə seçilib.

2005-ci ildə yaranması ilə təkcə kassa aparatlarının satışından rəsmi olmayan rəqəmlərə görə, on milyonlarla manat əldə edən “Caspel”in arxasında F.Məmmədovun durduğuna həmin vaxt heç kim şübhə etmirdi. Namiq Quliyev özü isə 2017-ci ilin dekabrına qədər Vergi Cinayətlərinin İbtidai Araşdırma Departamenti rəisinin birinci müavini olub.

Ancaq şirkət yalnız kassa aparatlarının satışı ilə məhdudlaşmayıb və daha böyük işlərə - dövlət satınalmaları və tenderlərə girişib. “Caspel Holdinq” özündə 5 şirkəti birləşdirir. Bunlar “Caspos”(Kassa operatoru kimi fəaliyyət göstərən şirkət yanacaqdoldurma məntəqələri, restoran, hotel, market və digər sahibkarlıq subyektlərinə kassaların satışı və proqram təminatlarının quraşdırılmasını həyata keçirir), “Setclapp”( Biznes proseslərin avtomatlaşdırılması, proqramlaşdırma, İKT konsultasiyası üzrə ixtisaslaşan şirkət, proqram həlləri, mobil tətbiqlərin və veb saytların hazırlanması, rəqəmsal marketinq xidmtlərini təklif edir), Clip TV(İnternet, kabel tv və İP TV xidmətləri təklif edir) və “Telcas” şirkətləridir. Bu şirkətlərdən “Caspos” və “Setclapp” dövlət qurumlarının sifarişi ilə müxtəlif layihələr icra ediblər. Məsələn, “Caspos” SOCAR-ın Şuşa və Ağdam da daxil olmaqla 5 şəhər və rayondakı yanacaq doldurma məntəqələrində kassa aparatı quraşdırıb. “Setclapp” isə İqtisadiyyat Nazirliyi, Azərsu, Milli Depozit Mərkəzi üçün xidmətlər göstərib. Lakin hər iki şirkətin icra etdiyi adıçəkilən layihələrlə bağlı məlumat tapmaq çətindir.

Bundan əvvəl mətbuatda dərc edilən iddialara görə, dövlət satınalmalarının vahid internet portalında “Caspel” MMC-nin qalib gəldiyi bütün tenderlər yoxdur. Buna baxmayaraq, mətbuatda dərc edilən materiallardan aydın olur ki, 2010-2021-ci illər aralığında dövlət satınalmalarının vahid internet portalında olmayan və “Caspel” MMC-nin qalib gəldiyi tenderlərin ümumi məbləği 39 milyon 600 min manatdan artıqdır.

Rəsmi məlumatlara görə isə 2019-2024-cü ilin aprel ayına qədər şirkət dövlət qurumları ilə ümumi dəyəri 43 milyon 680 min manatdan artıq olan tender müqavilələri imzalayıb. O da qeyd olunur ki, “Caspel” bu müqavilələri külli miqdarda vergi borcu ola-ola imzalayıb ki, bu da qanunvericiliyə ziddir.

Məsələnin digər maraqlı tərəfi odur ki, Azərbaycanda çoxsaylı İT şirkətləri və bu sahəyə aid xidmətlər göstərən digər şirkətlər ola-ola əksər qurumların məhz “Caspel”-ə tender qazandırması ilk növbədə İqtisadiyyat Nazirliyini narahat etməlidir. Çünki inhisarçılıq və “kölgəli tenderlər” ilə mübarizə məhz bu nazirliyin əsas vəzifələrindən biri olmalıdır. Lakin nə qədər qəribə görünsə də “Caspel” elə bu nazirliyin özünün tenderlərinin əsas qalibidir. 1 yanvar 2023-cü ildən 2024-cü ilin oktyabr ayına qədər "Caspel" şirkəti İqtisadiyyat Nazirliyinin İT müqavilələrinin 64%-ni (yəni demək olar ki, üçdə ikisini) əldə edib. Bu da ümumilikdə 50 milyon manatın 32 580 000 manatını təşkil edir. Özü də bu, cəmi 1 il 9 ay ərzində olan göstəricidir.

Aşağıda verdiyimiz cədvəldən belə nəticə çıxarmaq olar ki, Azərbaycanda "Caspel"-dən başqa İT şirkəti yoxdur. Tenderlərin şəffaf keçirildiyi halda bir şirkətin bu qədər tenderi udması yumşaq desək, inandırıcı görünmür. Ancaq Azərbaycandakı tender və satınalmalar reallıqlarını nəzərə alanda burada qeyri-adi heç nə yoxdur – kim dövlət qurumları ilə “vaxtında dil tapıbsa”, qalib də odur...





“AzPolitika.info”