Əslində hazırda Bərdəyə rəhbərlik edən Vidadi İsayevlə bağlı - daha dəqiqi onun qanunsuz əməllərindən bir dastan bağlamaq olar. Və bu qeyd edəcəyimiz məqam onun işləkləri arasında son sırada dayananıdır, desək, yanılmarıq. "DİA-AZ" qeyd edir ki, həqiqətən də bu gün Azərbaycandan ən çox valyuta çıxaran icra başçılarından hesab olunan Bərdə rayon icra hakimiyyətinin rəhbəri Vidadi İsayev hansısa sirli qüvvə tərəfindən qorunduğundandır ki, rəsmən istədiyini həyata keçirməkdədir.

Bu gün Bərdədə vətəndaşı dinləyən yoxdur. Hətta olub ki, hansısa problemli Bərdə sakini qonşu rayonun başçısına müraciət edərək ondan kömək istəyib. Bu barədə yerli KİV-də yazı gedib.

İndi isə biz Vidadi İsayevin dəyərlərimizə olan münasibətindən yazacağıq...

Bu foto Bərdədə Bayraq Meydanına aiddir. Həm də bu foto 9 noyabr günü - Dövlət Bayrağı Günü çəkilib. Qeyd edək ki, 8 noyabrda - Zəfər Günündə də durum eyni idi. Yəni bu fotodakı kimi... Bu gün də durum eynidir... yəni bu fotoda əks olunan kimi...

Biz burada nə bayrağımızın anlamını, məna yükünü anlatmayacağıq... nə də bu barədə yoldaş İsayevə moizə oxumayacağıq. Hər halda, dəyərlərimizə olan münasibət ortadadır. Azərbaycan türkü üçün son 200 ildə əgər 8-9 noyabr tarixlərindəki məna yükündən çəkilisi rast gəlinməyibsə, o zaman bu mahiyyətə sayğısızlıq edən və həm də ixtisasca tarixçi olan Vidadi müəllimə möz adımızdan bir "BƏRƏKALLAH" deyirik... Daha "yuxarılar" nə deyər... bunun bizə aidiyyatı yoxdur...

Qusar şəhəri, Yeni yaşayış massivi, Ziya Bünyadov küçüəsi, ev 25 A ünvanından yaşayan Xamədov Kamran Xalıq oğlu (Eləcə də qızı Xamədova Yeganə – red.) tərəfindən “Hürriyyət” qəzetinin redaksiyasına şikayət məktubu daxil olub. Şikayətçi bildirir ki, rayon sakini İsrafilov Ruslan Natiq oğlu azyaşlı övladını maşınla vuraraq öldürüb, məhkəmə işə ədalətli baxmır. Şikayətçinin məktubunu olduğu kimi dərc edirik:
“Mən, Xamədov Kamran Xalıq oğlu, yazaraq sizdən xahiş edirik ki, bizim dərdimizi ictimailəşdirəsiniz.
Ailəli olmuşam, həmin nigahdan 1 qızım və 1 oğlum olub. Müəyyən səbəblərdən boşanmışıq. Məhkəmənin qərarı ilə qızım mənimlə, oğlum isə anası ilə qalırdı. Amma oğlumu hər zaman görürdüm.
18.06.2024-cü il tarixində oğlum bizimlə görüşə gələrkən yolda maşın vurması nəticəsində dünyasını dəyişdi. Hadisə gözümüzün qabağında oldu.
Maşını sürən yaxınlıqdakı kafenin sahibi İsrafilov Ruslan Natiq oğlu idi. O, qabağındakı maşını ötmək üçün yolu dəyişdi və oğlumu vəhşicəsinə öldürdü.
Hadisə günü polis çağırıb izahatı alındıqdan sonra atası tərəfindən zamin pulu verilib, azadlığa buraxılıb. Körpə uşaq ölüb, amma onların pulu var deyə polis və məhkəmə tərəfindən cəzalandırılmırlar.
Oğlum ölən gündən heç nə olmamış kimi, öz işlərində, güclərində oldular. Düzdür, dəfələrlə gəlib xeyli miqdarda pul təklif etsələr də, qəbul etməmişik. Mənim dünyam dağılıb, mən o pulu nə edirəm?!
Uşağımın qırxı belə çıxmamışdı, gördüm ki, oğlumu öldürən şəxs işlətdiyi kafenin qabağında özü üçün kef məclisi qurub. Bu, mənə ağır təsir etdi və özümü saxlaya bilməyib gedib dalaşdım. Bunun üstündə polis bizi get-gələ saldı ki, adamın kafesində gedib dava salmısan. Bəs, mənim canım yanır, oğlumu öldürən şəxs gərək gözümün qabağında özünə kef məclisi qura?! Onun kafedə kef çəkməsi bizə təsir edir...
Belə çıxır ki, piyada keçidi yalandan çəkilir. Yüksək surətlə uşaq vurulub öldürülür, lakin cinayəti törədən azadlıqdadır. Hətta özləri bir neçə nəfərə deyiblər ki, külli miqdarda pul verib canımızı qutardıq.
Kamera görüntüsündə də var, qabaqda olan maşın oğluma yol verir ki, keç, bu isə arxadan “avqon” edərək, uşağı vurub.
Cinayəti törədən şəxsin atası deyir ki, “get kimə, hara istəyirsən şikayət et, mənim oğlumu heç kəs cəzalandıra bilməz”.
Daha sonra işə oğlumun anası qarışır və gedir polisə bildirir ki, şikayətçi deyiləm. Yəqin ki, mənə təklif olunan məbləği uşağın anası götürüb. Mən və qızım pul istəmirik, yeganə istəyimiz odur ki, oğlumun qanı yerdə qalmasın, cinayəti törədən şəxs həbs olunsun, cəzasını çəksin.
4 aydan çox keçməsinə baxmayaraq, hələ məhkəmə prosesləri təxirə salınır. Niyə bu qədər insafsız davranırlar? Əlimdə hadisə ilə bağlı çoxlu videolar var. İşimə baxılmasa, məcbur qalıb Prezident Aparatına qəbula yazılacam. Yəqin ki, övladı ilə sınanmış biri çıxar qarşıma və məni başa düşər. Mən kimsədən artıq-əskik heç nə istəmirəm, oğlumu öldürən şəxsə cəza verilməsini istəyirəm”.
Jalə FAMİLQIZI
Redaksiyadan: Yazıda adları qeyd olunan şəxslərin və qurumların mövqeyini dərc etməyə hazırıq.

Naxçıvan Muxtar Respublikası (MR), Babək rayonu, Payız kənd sakini Məmmədov Əsgər Səyyad oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi bildirir ki, Q.Abbasov adına tam orta məktəbin direktoru Babazadə Elmar Hüseyn oğlu qərəzli şəkildə dərs saatlarını azaldır:
“Mən, Məmmədov Əsgər Səyyad oğlu, yazaraq bildirmək istəyirəm ki, Q.Abbasov adına tam orta məktəbin müəllimiyəm. 41 ildir pedoqoji fəaliyyətlə məşğulam.
2023-cü ildə məktəbə yeni direktor təyin etdilər. 2023-2024-cü tədris ilinə qədər mənim 20 saat dərsim olub, keçən il dərslərimi 13 saata endirdi.
Məktəbdə pisxoloq işləyən Cəfərov Niyazi də mənimlə eyni ixtisas müəllimi idi və 12 saat da dərs tədris edirdi. Bu il o, təqaüdə çıxırdı, fikirləşdim ki, yəqin gələn ildən dərslərim düzələr. Amma bu il yenə dərslərim 13 saat oldu.
Mən bu barədə Babək rayon Təhsil Şöbəsinin müdiri Zəhra xanıma mürciət etdim. Oradan da şablon cavablar aldım.
Sonra Naxçıvan MR Təhsil naziri Elxan Nəcəfova müraciət etdim. Bilirsiz, mənə nə dedi? Dedi ki, “dərs bölgüsü drektorun fərasətindən asılıdır, mən heç nə edə bilmərəm”.
Səhərisi gün məktəbə gəldikdə isə direktor bildirdi ki, şikayətə getdiyin üçün dərsindən bir saat da götürüldü.
Mən yenidən Təhsil Nazirliyinə qəbula getdim. Yalnız 3 həftə sonra - 27 sentyabrda qəbula düşə bildim. Əslində, nazir hər həftənin 5-ci günləri saat 16-00-dan 18-00-a qədər pedaqoji işçiləri qəbul edir. Həmin gün qəbula 36 müəllim yazılmışdı,
mən 22-ci adam idim. Mən qəbul otağına daxil oldum, 12 saat dərsimin qaldığını dedikə Elxan müəllim bildirdi ki, “sən yaxşısan, səndən əvvəl gələn müəllim deyir ki, 5 saat dərsim var, heç olmasa 2 saat da verin, 7 saat olsun”. Əlavə etdi ki, sənin dərsin yaxşıdır, çıx sonra çağıracağıq. Mən çıxıb dəhlizdə gözləməyə başladım. Axırıncı iki adam qalırdı, vətəndaşları qəbul sektorunun müdiri gəlib bildirdi ki, “gərək sən gözləməzdin, nazir yorulub ,səni qəbul edə bilməyəcək. Get birinci gün gələrsən”. Beləliklə, məni mədəni şəkildə qəbuldan çıxardılar. Həmin gün qəbuldan razı çıxan olmadı.
Mən 30 sentyabrda yenidən nazirliyə getdim. Məni bu dəfə aparat rəhbəri Şikar müəllim qəbul etdi. Şikayətlərimi bildirdim, amma hələ də heç bir tədbir görülməyib”.

Redaksiyadan: Yazıda adı çəkilən şəxslərin mövqeyini dərc etməyə hazırıq.

Dövlət başçısı 6 sentyabr 2023-cü ildə "Müddətli həqiqi hərbi xidmətə çağırılan vətəndaşların tibbi şəhadətləndirilməsi sahəsində fəaliyyətin təkmilləşdirilməsi ilə bağlı bəzi tədbirlər haqqında” Fərman imzalayıb.

Fərmana əsasən bir sıra kateqoriya üzrə rəy verilmiş hərbi xidmətə çağırılanlarla bağlı yekun tibbi müayinəni bu ildən Əmək və Əhalinin Sosial Müdafiəsi Nazirliyi həyata keçirir.

Yekun tibbi müayinəni Nazirliyin tabeliyindəki Dövlət Tibbi-Sosial Ekspertiza və Reabilitasiya Agentliyi (DTSERA) hərbi-həkim komissiyalarının tibbi müayinəsinin nəticələri və müddətli həqiqi hərbi xidmətə çağırılan vətəndaşların əyani tibbi müayinəsi əsasında aparır.

Bəs Nazirliyin özündə bu sahədə şəffaflıq hansı səviyyədədir?

"Arqument.az"a verilən məlumata görə, Nazirlik vətəndaşlara bu sahədə xüsusi tələbkarlıqla yanaşsa da, öz işçilərinə, ələxüsus vəzifəli şəxslərinə olduqca yumşaq standartlar tətbiq edir və onlara münasibətdə bu məsələlərə göz yumur.

Bildirilir ki, Nazirliyin tabeliyində Əmək Bazarı və Sosial Müdafiə Məsələləri üzrə Milli Observatoriyanın İdarə Heyətinin 6 fevral 1989-cu il təvəllüdlü sədri Elnur Səfərli Novruz oğlu hətta Azərbaycanın vaxtilə işğalda olmuş Cəbrayıl rayondan olmasına baxmayaraq hərbi xidmətdə olmayıb.

"Onun hərbi xidmətdən yayınması səhhətinin buna imkan verməməsi və hərbi xidmətə yararsızlığı ilə əsaslandırılsa da eyni şəxs Nazirlikdə işə qəbul edilərkən tam sağlam və fəaliyyət qabiliyyətli olması ilə bağlı "Forma 86” sağlamlıq haqqında Arayış təqdim edib. Necə olur ki, vətən qarşısında borcunu yerinə yetirmək, kişi cinsindən olan vətəndaş kimi hərbi xidmətini icra etmək lazım olanda Elnur Səfərlinin sağlamlığı buna imkan vermir, amma vəzifəyə, kresloya, işə və imtiyazlara çatanda bu adam tam sağlam şəxsə çevrilir? Babalarının erməni tapdağı altında qalan məzarlarının, doğulub böyüdüyü yurd-yuvasının, ata ocağının təəssübünü, qeyrətini çəkməyən, hərbi xidmətdən yayınan birisi vəzifə məsuliyyətini necə dərk edə bilər?" - deyə məlumatda qeyd olunur.

Təsadüfi deyildir ki, Milli Observatoriyanın adı mediada qurumun keçmiş sürücüsü yaralı qazi Elmar Şərifovun onun gecə-gündüz vəzifəli şəxslər tərəfindən istismar edilməsi ilə hallanmışdı.

Məlumata görə, Elnur Səfərli həmin qurumda çalışan şəhid Ələkbər Məmmədovun övladını şəxsi qisas zəminində inzibati üsullarla təqib edib.

İşğalda olmuş rayondan olmasına baxmayaraq hərbi xidmətdən yayınmış, rəhbərlik etdiyi qurumda yaralı qaziyə və şəhid övladına "qan udduran” Elnur Səfərli Zəfər günü və digər bu kimi bayramlar ərəfəsində hardansa bir şəhid ailəsi tapıb özünü şəkil çəkdirmək üçün ora yetirir. Görünür ki, belələrinə şəhid ailəsi məhz foto çəkdirmək və ucuz reklam üçün lazımdır.

Məlumatda bildirilir ki, heç bir elmi dərəcəsi, iqtisadiyyat, sosial sahə və məşğulluq sahəsində nəinki təhlil və tədqiqatları, hətta təhsili və mütailəsi belə olmayan Elnur Səfərli heç bir əhəmiyyətli idarəetmə təcrübəsi və qabiliyyəti olmadan həmyerlisi Nazirliyin Aparatının Strateji planlaşdırma və innovasiya şöbəsinin müdir müavini Rəşad Zalovun və həmin şöbənin keçmiş müdiri, hazırda Dövlət Məşğulluq Agentliyinin sədri, eyni regiondan olan Sadiq Əliyevin himayəsi ilə sosial sahədə "Beyin Mərkəzi” funksiyası yerinə yetirməli olan bu quruma rəhbər təyin edilib.

Maraqlıdır ki, bu məlumatlar mediada işıqlandırılsa da, sözügedən qurum və Elnur Səfərli hər hansı bir reaksiya bildirmir.

"Azur" Ticarət Mərkəzi insanların həyat və sağlamlığına təhlükə törədən fəaliyyətlə məşğuldur.

TEREF xəbər verir ki, bu barədə Azad İstehlakçılar Birliyi tərəfindən məlumat verilib.

Məlumata görə, “Azur” Ticarət Mərkəzinin sahibləri ilə “FB COMPANY” MMC arasındakı qarşıdurma artıq insanların həyat və sağlamlığına ciddi təhlükə yaradacaq səviyyəyə gəlib çatıb.

Məsələdə MMC-nin direktoru Qəribov Anar Əli oğlu və fərdi sahibkar Əliyev Ağa Ələmdar oğlunun da adı hallanır. Belə ki bir milyon manatdan çox zərərin əvəzini qarşılamaq üçün sahibkarlar insan orqanizmi üçün son dərəcə zərərli olan maddələrin təsirinə məruz qalmış paltarı anbardan çıxarıb satmaq qərarına gəliblər.

Məlumatda qeyd olunur ki, “Azur”un rəhbəri olan Fuad Rzayev (“Azərenerji” ASC-nin prezidenti Baba Rzayevin oğlu) və Babək Babayev (“Yeni Həyat” şirkətlər qrupunun rəhbəri) ilə Anar Qəribov və Ağa Əliyev arasında mübahisə 2020-ci ildə başlayıb.

O zaman ticarət mərkəzinin rəhbərliyi aralarında bağlanan müqavilənin şərtlərini pozaraq sahibkarlara məxsus 20 min ədəddən artıq paltarı, o cümlədən uşaq geyimlərini “Azur”da icarəyə götürdükləri mağazadan icazəsiz şəkildə çıxararaq, “Grand Hayat” Yaşayış Kompleksinin zirzəmisinə aparılması barədə göstəriş veriblər.

“Azad İstehlakçılar” İB tərəfindən əldə olunan materiallar göstərir ki, mağazadan çıxarılan mallar uzun müddət rütubətli, baxımsız şəraitdə, müvafiq qulluq göstərilmədən saxlanıldığından xarab olub, kiflənib, çürüyüb, üzəri müxtəlif qurd və həşəratların təsirinə (parazit, helment yumurta izi) məruz qalıb.

Qeyd edilib ki, 8 aprel 2022-ci il tarixli məhkəmə iclasına dəvət edilmiş Ədliyyə Nazirliyinin Məhkəmə Ekspertizası Mərkəzinin eksperti Elvin Qəhrəmanov da satış üçün nəzərdə tutulan geyim əşyalarının yararsız, avadanlıqlarda isə qüsurların olmasına dair rəsmi ekspert rəyini təqdim etməklə bildirib.

Amma “Azur” rəhbərləri başladığı işi sona çatdırmaq və sahibkarlara vurduqları ziyanı ödəməkdən yayınmaq üçün paltar və avadanlıqları “təmizləmək” qərarına gəliblər. Bunun üçün isə insan orqanizminə son dərəcə təhlükəli olması səbəbindən beynəlxalq razılaşma əsasında istifadəsinə qadağa qoyulan DDT (DUST) preparatından istifadə edilib.

Təhlükəli maddədən (DDT) istifadə edildiyini Bakı Apellyasiya Məhkəməsinin qərarı əsasında cəlb edilmiş “Az-Ekspertiza” MMC -nin götürdüyü nümunələri təqdim etdiyi Azərbaycan Akkreditasiya Mərkəzində akkreditasiya olunmuş “Chemlab” laboratoriyası 2023-cü ildə sınaq protokolu ilə təsdiq edib.

Bu faktdan sonra növbəti mərhələyə əl atılıb. Eyni təşkilatın, yəni Ədliyyə Nazirliyinin Məhkəmə Ekspertizası Mərkəzinin digər eksperti Kamran Dünyamalıyev növbəti ekspertiza rəyində, nədənsə növbəti məhkəmə baxışında, öz kollegiyası Elvin Qəhramanovun öncə verdiyi ekspert rəyini təksib edərək, həmin mallarının 85%-nin satışa yararlı olması dair ekspert rəyi verib.

Məhkəmə Ekspertiza Mərkəzinin iki ekspertinin bir-birinə zidd olan iki rəsmi sənədi təəccüb və sual doğurur.

Nəticədə, Bakı Apellyasiya Məhkəməsi laboratoriyanın sınaq protokolunun nəticəsini sübut kimi qəbul etməyib və kanserogen tərkibli geyimlərin (o cümlədən uşaq geyimləri) ) 85%-nin satışa yararlı olması barədə qətnamə çıxarıb. Sonradan Ali Məhkəmənin Kommersiya Kollegiyası da həmin qətnaməni dəyişdirmədən qüvvədə saxlayıb.

“FB COMPANY”MMC-nin AİİB-in tələbi əsasında təqdim etdiyi məlumatda qeyd olunur ki, paltarların istifadə üçün tam yararsız olduğunu sübut edən və məhkəmə iclası zamanı məhkəmə zalında quraşdırılmış nəzarət kamerası altında təqdim edilən yüzlərlə foto və videomaterial məhkəmə işinin materialları arasından yoxa çıxıb. AİİB-ə təqdim olunan məlumata görə, bu foto və videomateriallarda paltarların sonradan sağlamlıq üçün son dərəcə təhlükəli olan kimyəvi maddələrlə” təmizlənməklə” onların kif bağlaması, üzərində qurdların olması faktları olub. Əks olunan faktların izinin itirilməsinə yönəlmiş hərəkətlər bu əməllərin qəsdən törədildiyinə dəlalət edir.

Verilən məlumatda o da qeyd olunur ki, bu işdə yeni fiqurlar ortaya çıxıb. Məlum olub ki, zəhərli maddələrlə “təmizlənmiş” paltar və avadanlıqların saxlanıldığı anbar bir xanımın adına sənədləşdirilib. Qəribov və Ağayev yeni sahibkar haqqında indi xəbər tutublar. Xanım sahibkar paltar və avadanlıqların 4 il ərzində onun anbarında saxlanmasına etiraz etməyib, hüquqları ilə bağlı iddia qaldırmayıb. Amma indi o sahibkarların malları tez bir zamanda anbardan çıxarılması və daşınma xərclərinin “FB COMPANY” MMC tərəfindən ödənilməsi ilə bağlı Bakı Şəhər Binəqədi Rayon Məhkəməsinə müraciət edib.

Bu malların bazara çıxarılmasının qarşısını almaq üçün AİİB mediaya müraciət etməklə bərabər, İqtisadiyyat Nazirliyi yanında Antiintisar və İstehlak Bazarına Nəzarət Dövlət Xidmətinə, Daxili İşlər Nazirliyinə, Respublika Prokurorluğuna və Səhiyyə Nazirliyinə rəsmi müraciətlər göndərib.

Demokrat.az

Qalmaqallı “Pilot 16” MMC Nəsimi rayonunda daha bir vətəndaşın evini başına uçuraraq, yerlə-yeksan edib. Bu barədə Editor.az-a evi dağıdılan Novruzov qardaşları küçəsi 55 ünvanında yaşayan Yusif Quliyev məlumat verib. Onun sözlərinə görə, bu gün həyat yoldaşı Məhbubə Quliyevanın adına qeydiyyatda olan ev şirkət tərəfindən yerlə-yeksan edilib:

“Evimin və torpağımın bütün qanuni sənədləri, çıxarışı mövcuddur. Bu artıq şirkət tərəfindən mənim mülkiyyətimə olam üçüncü hücumdur. İlk dəfə 2023-cü il martın 18-də “Pilot 16” MMC tərəfindən ağır texnika ilə dağıdılaraq məhv edildi. Bu faktla bağlı Nəsimi rayon Polis İdarəsində cinayət işi başlanılıb.

Daha sonra işin icraatı Nəsimi rayon prokurorluğuna verilib. Prokurorluqda şirkətin vəzifəli şəxsləri barədə vəzifə səlaahiyyətlərini aşma maddəsi ilə istintaq aparılıb və hazırda iş məhkəmədədir. Buna baxmayaraq, məhkəmə gedə-gedə 31 avqust 2024-cüü il tarixində “Pilot 16″ MMC yenidən evimi dağıtmağa cəhd edib. Evin hasarı ilə darvazası məhv edilib. Bu faktla bağlı da prokurorluq araşdırma aparır”.

Vətəndaş qeyd edir ki, Nəsimi rayon Məhkəməsi “Pilot 16” MMC-yə onların evində və ona aparan yolda tikinti-söküntü işləri aparmağı qadağan edən qərar çıxarıb: “Lakin buna baxmayaraq, bu gün mən işdə olarkən “Pilot 16″ MMC-nin nümayəndəsi İlqar müəllim öz qolçomaqlıları ilə mənim evimi tamamilə söküb, məhv etdilər. Bu işin başında şirkətin direktoru Aslan Quliyev və İlqar müəllim durur. Bunlar məhkəmənin qərarını saya salmır. Şirkətin direktoru Aslan Quliyev və İlqar müəllim dəfələrlə mənə deyiblər ki, boşuna çalışma. Onlar deyir ki, Nəsimi rayonunda hər yerdə bizi görəcəksən, polis də, prokurorluq da bizim sözümüzü deyir. Hazırda bu vəziyyətlə bağlı polis və prokurorluğa müraciət etmişəm”.

Editor.az vətəndaş Yusif Quliyevin iddiaları ilə bağlı “Pilot 16” MMC-nin direktoru Aslan Quliyev və hüquqşünası Nicat Əliyevlə dəfələrlə əlaqə saxlamağa çalışsa da, bu şəxslər telefona cavab verməyiblər.

Ötən il “Azərsu” Açıq Səhmdar Cəmiyyəti və Azərbaycan Meliorasiya və Su Təsərrüfatı Açıq Səhmdar Cəmiyyəti vahid qurumun, yeni yaradılan Azərbaycan Dövlət Su Ehtiyatları Agentliyinin tərkibində birləşdirildi. Dövlət Su Ehtiyatları Agentliyində aparılan struktur dəyişikliklərindən sonra Meliorasiya və Su Təsərrüfatı ASC-nin Hidrogeoloji-Meliorativ Xidmət və Suların İstifadəsinə-mühafizəsinə Nəzarət İdarəsinin əsasında Agentlik yanında Suların İstifadəsinə və Mühafizəsinə Dövlət Nəzarəti Xidməti, Meliorasiya və Su Təsərrüfatı ASC-nin çevrilmə formasında yenidən təşkili yolu ilə Regional Su Meliorasiya Xidməti, “Azərsu” ASC-nin çevrilmə formasında yenidən təşkili yolu ilə İri Şəhərlərin Birləşmiş Su Təchizatı Xidmət, Meliorasiya və Su Təsərrüfatı ASC-nin Meliorasiya Elmi Tədqiqat İnstitutunun çevrilmə formasında yenidən təşkili yolu ilə Su və Meliorasiya Elmi Tədqiqat İnstitutu, Meliorasiya və Su Təsərrüfatı ASC-nin Tikilməkdə olan meliorasiya və irriqasiya obyektlərinin birləşmiş müdiriyyətinin çevrilmə formasında yenidən təşkili yolu ilə Tikilməkdə Olan Obyektlərin Müdiriyyəti yaradıldı.

Köhnə, hamının tanıdığı dövlət qurumlarının adları dəyişdirilsə də fəaliyyətləri əvvəlki kimi davam etməkdədir. “Azərsu” ASC-nin çevrilmə formasında yenidən təşkili yolu ilə yaradılan İri Şəhərlərin Birləşmiş Su Təchizatı Xidməti tərəfindən energetika sahəsi üçün lazım olan mal-materialların və avadanlıqların satın alınması üzrə 01.10.2024-cü ildə başlanılmış açıq tenderə yekun vurulub və “DELUXE ELECTRİC AZERBAİJAN” Məhdud Məsuliyyətli Cəmiyyəti ilə 1.493.349,64 manat məbləğində satınalma müqaviləsinin bağlanılması planlaşdırılır. Məlumat dövlət satınalmalarının vahid internet portalında 01.11.2024-cü il tarixdə dərc edilib.

Qeyd edək ki, “İri Şəhərlərin Birləşmiş Su Təchizatı Xidməti” tərəfindən nəzərdə tutulmuş mal-materialların və avadanlıqların satın alınması üzrə keçirilmiş açıq tenderdə ehtimal olunan qiyməti 2.444.151,46 manat müəyyən edilib.

Dövlət satınalmalarının vahid internet portalına yerləşdirilmiş bu məlumatdan görsəndiyi kimi satınalan təşkilatın müəyyən etdiyi ehtimal qiyməti ilə təchizatçının təklif etdiyi qiymətlər arasında kəskin fərq var.

Qeyd edək ki, “Dövlət Satınalmaları haqqında” Azərbaycan Respublikasının Qanununda təchizatçıların satınalmadan kənarlaşdırılması müəyyən edilib. Sözügedən Qanunun 35.1.8. maddəsinə görə təchizatçının təqdim etdiyi təklifin qiyməti ehtimal olunan qiymətlə müqayisədə 20 faizdən aşağı olarsa, satınalma komissiyasının sorğusu əsasında təchizatçının təqdim etdiyi izahat və məlumatlar təhlil edildikdən sonra satınalma müqaviləsinin icrasına əsaslı şübhələr qaldıqda təchizatçı müsabiqədən kənarlaşdırılmaldır.

Amma göründüyü kimi “İri Şəhərlərin Birləşmiş Su Təchizatı Xidməti” açıq tender müsabiqəsində ehtimal olunan qiymətlə müqayisədə 20 faizdən dəfələrlə aşağı qiymət təqdim etmiş “Deluxe Electric Azerbaijan” MMC ilə satınalma müqaviləsi bağlamışdır ki, bu da “Dövlət Satınalmaları haqqında” Qanunun tələblərinin pozulması deməkdir.

Qeyd edək ki, Dövlət Vergi Xidmətinin hüquqi şəxslərin dövlət reyestrinə daxil edilmiş məlumatlarında “DELUXE ELECTRİC AZERBAİJAN” (VÖEN:8303323391) Məhdud Məsuliyyətli Cəmiyyətinin 22.06.2011-ci il tarixdə 6 saylı Ərazi Vergilər Baş İdarəsində dövlət qeydiyyatına alındığı göstərilir. Reyestr məlumatlarında nizamnamə kapitalı 3500.00 manat olan MMC-nin hüquqi ünvanının CƏLİLABAD RAYONU, GÖYTƏPƏ Ş, HƏSƏNABAD, ev 04, m. 0, qanuni təmsilçisi kimi isə Zamanlı Ceyhun Sarvan oğlu qeyd olunub.

Apardığımız ətraflı araşdırmada məlum oldu ki, şirkət “PROJECTS UNITY” Məhdud Məsuliyyətli Cəmiyyəti kimi təsis edilib. Təsisçisi və ilk qanuni təmsilçisi Ehtibarzadə Eldar Ehtibar oğlu olub. 03.11.2024-cü ildən MMC-nin adı dəyişdirilərək “Deluxe Electric Azerbaijan” olub.

Göründüyü kimi “İri Şəhərlərin Birləşmiş Su Təchizatı Xidməti” ilə “Deluxe Electric Azerbaijan” MMC arasında bağlanmış satınalma müqavilələrində satın alınan malların qiyməti Qanunun tələb etdiyi ehtimal olunan qiymətlə müqayisədə 20 faizdən dəfələrlə aşağı, 50 faizə yaxındır. Bu da keçirilmiş tender prosedurunda saxtakarlıq hallarına yol yerildiyinə əsaslı şübhələr yaratmaqla bərabər, satın alınan malların mənşə və keyfiyyət sertifikatlarının olmadığına da şübhələr yaradır. Bu da öz növbəsində satın alınacaq malların keyfiyyət göstəricilərinin aşağı olma ehtimalını artırır.

Redaksiya bütün bu göstərilənlərə aydınlıq gətirilməsi məqsədi ilə “İri Şəhərlərin Birləşmiş Su Təchizatı Xidməti”nin Satınalma Komissiyasına və “Deluxe Electric Azerbaijan” MMC-yə ünvanladığı sorğu məktubu cavabsız qaldı.

Göründüyü kimi “Azərsu” ASC-nin çevrilərək “İri Şəhərlərin Birləşmiş Su Təchizatı Xidməti” olmasına baxmayaraq burada qanunlara əvvəlki kimi yenə də riayyət olunmur. Elektron mediada “Azərsu” ASC-nin satınalmalarda yol verdiyi qanunsuzluqlarla bağlı kifayət qədər təkzib olunmamış məlumatlar, faktlar var. Bu faktlar da onlardan biri.

Buradan Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyinə sual ünvanlamaq istərdik. “İri Şəhərlərin Birləşmiş Su Təchizatı Xidməti”nin ehtimal olunan qiymətdən 50 faiz aşağı qiymət təklifi edən “Deluxe Electric Azerbaijan” MMC-ni qalib seçməsinə nə ad vermək olar? Qanunsuzluq, yoxsa…

Buna işbirliyindən başqa heç bir ad vermək olmaz. Buna “İri Şəhərlərin Birləşmiş Su Təchizatı Xidməti” sözügedən MMC-dən ucuz, keyfiyyəti məlum olmayan mal-materiallar və avadanlıqlar almaqla dövlət vəsaitinə qənaət adı altında pul silmək də demək olar.

Aktualinfo.org