 |
|
|
Şabrandakı oxucularımızdan biri bu rayonun keçmiş deputatı Tahir Süleymanovun oğlu (Əslində isə oğulluğa götürdüyü nəvəsi-red.) olan hazırkı deputatı Mahir Süleymanlı ilə bağlı maraqlı bir video göndərib. Videoda deputatın Şabranda evi yanmış bir imkansız, yazıq ailəyə bir maşın “kubik” göndərməsi və sonra da gəlib “vəziyyətlə yerindəcə tanış olması” əks olunub. Görüntülər “Tik-tok” şəbəkəsində paylaşılıb və görünən odur ki, deputatın razılığı və “xeyir-duası” ilə...
Azərbaycanda “sağ əlin verdiyini sol əl bilməməlidir” deyimi, əlbəttə ki, çoxdan gündəmdən və hörmətdən düşüb. Lakin sözügedən deputat bu videodakı hərəkətləri ilə bu deyimin olan-qalan hörmətini də yerlə bir edib...
Bu video M.Süleymanlının az qala şabranlılara qarşı “misilsiz” səxavətinin, əliaçıqlığının, təvazökarlığının, sadəliyinin və s. müsbət cəhətlərin təzahürü kimi təqdim olunub, altdan da yəqin ki, deputatın böyür-başına, qohum-əqrabasına və ştatlı-ştatsız məddahlara aid olan saysız-hesabsız minnətdarlıq şərhləri, “bəy tərifləri” yazılıb. Amma azacıq dünyagörüşü, anlayışı olan izləyici dərhal bu görüntülərdə ədabazlıq, yekəxanalıq, özündən razılıq və ən əsası, görməmişlikdən başqa heç nə görmür...
Bir maşın mişar daşı, lap 5-6 yüz manat da pul Mahir Süleymanlının atası, deputatdan çox iş adamı və Şabran və ətraf rayonların “un kralı” kimi tanınan Tahir Süleymanlı üçün, əlbəttə ki, qəpik-quruşdur. Lakin deputat hətta bunu da “operator” gətirib çəkdirməklə və sonradan yaydırmaqla, etdiyi cüzi yaxşılığı tam dəyərdən salmış oldu...
Videodan göründüyü kimi, M.Süleymanlı öz əsabələri ilə bahalı maşından düşür. Sonra, görünür, yanında “palto daşıyan ştatı” üzrə işə götürdüyü şəxs onun paltosunu geyindirir. Daha sonra deputatdan çox türk seriallarındakı “kabadayı” ədası ilə məhləyə girən deputat bu binəva kasıb evinin bünövrəsinin üzərində dayanaraq, “fəlsəfi məzmunlu” çıxış edir və nə qədər məşğul olduğunu, müxtəlif beynəlxalq və ölkə əhəmiyyətli tədbirlərə qatıldığını, ölkəyə yeni qayıtdığını söyləyir. Eşidən elə bilər ki, parlamentin bütün yükü bu gənc millət vəkilinin çiynindədir...
Məlumat üçün deyək ki, M.Süleymanlı Milli Məclisdə Zimbabve(!) parlamentlərarası əlaqələr üzrə işçi qrupunun rəhbəridir. Amma xəritədə Zimbabvenin yerini belə biməyən bəzi şabranlılar, əlbəttə ki, onların hörmətli deputatının hansı xarici ölkədə səfərdə olduğunu, eləcə də hansı digər vacib tədbirlərdə iştirak etdiyini də bilmirlər...
Nə isə, ev sahibi və özü ilə gətirdiyi adamlarla söhbətdən sonra deputat darvazadan çıxanda adamlarından birini yanına çağırıb ona kameranın qarşısında pul uzadır və evi yanan xanıma verməsini tapşırır. Yəni, etdiyi kiçicik yaxşılığı “üzünə-gözünə bulaşdırmağın” son nöqtəsini qoyur. Hətta özünə reklam qazanmaq, ətrafında kütlə toplamaq üçün telefon paylayan hansısa düşük “tiktoker” belə özünü bu cür aparmır...
Bu tragikomik səhnə nədən xəbər verir? Təbii ki, deputat bu eybəcər mənzərəni bilrəkdən yaratmayıb. Elə bilir ki, belə də olmalıdır, çünki olanı budur! Necə var, elədir! Tək kamera qarşısında yox, həyatda da belədir, budur! Problem nədir? Problem təfəkkür, dünyagörüşü səviyyəsi, ictimai, siyasi mədəniyyət problemidir!
İndi bu deputatdan soruşan lazımdır ki, bu çəkiliş kimin üçündür? Əgər Şabran seçiciləri və gələcəkdə onlardan səs qazanmaq üçündürsə, o qədər də uğurlu gediş deyil. Birincisi, bu mənzərə yəqin ki, şabranlıların çoxunun xoşuna gəlməz. Digər yandan Azərbaycan reallığında çox vaxt deputat olmaq üçün seçici səsi qazanmaqdansa, məsələn, YAP siyahısına düşmək kifayət edir. Özü də bunu həmin deputatın həm atası, həm də özü bilməmiş deyil...
Bu çəkiliş ümumilkdə ölkə cəmiyyəti, ictimaiyyət üçündürsə, bu da uğursuz gedişdir. Çünki cəmiyyət hər nə qədər öləzisə, biganələşsə də, bu cür rəzil görüntülərə qarşı həssasdır və bu cür “xeyriyyəçilik” normal insanlarda ikrah hisssindən başqa heç nə yarada bilməz...
Nəhayət, bu çəkiliş parlament rəhbərliyi, hətta daha “yuxarılar” üçündürsə, bu da uğursuz, özü də çox uğursuz gedişdir. İnandırıcı deyil ki, o səviyyələrdə bu cür bayağı, yekəxana, ədalı, düşük reklamlı “xeyriyyəçilik” müsbət qarşılansın. Əksinə, bunun mənfi fəsadları, ciddi “başağrısı” da ola bilər...
Bir də bu millət vəkilnin “Tik-Tok” həvəsi bu yaxınlarda Rumıniyada rusiyapərəst prezidentliyə namizədin başına gələnləri xatırlatdı. “Tik-Tok” hesabına populyarlaşan Corceskunu məlum səbəblərdən tutub polisə gətirəndə, icazə alıb “su başına keçmiş”, oradan da İlon Maska mesaj atmışdı ki, məni tutublar, qurtarın. Amma ona “dayısı” Mask da kömək edə bilmədi.
Biz biləni, M.Süleymanlının heç Mask kimi “dayısı” da yoxdur... (azpolitika.info)
Göyçay rayon Ərəbcəbirli kəndində yaşayan Seyfəddin Yusifov 2018-ci ildə maldarlıqla məşğul olmaq üçün özünəməxsusluq proqramı çərçivəsində müraciət edib. 2020-ci ildə Agentliyin nümayəndələri həmin ünvana gələrək video çəkiliş etsələr də vətəndaşa heç bir cavab gəlməyib.
Vətəndaş bildirir ki,ötən il ona sənəd imzalatdırıblar.
Sonradan məlum olub ki, həmin aktda heyvanların verildiyi bildirilib.
Vətəndaşın sözlərinə görə o, yenidən müraciət ünvanlayıb. Nəticəsini öyrənə bilmir.
Məsələ ilə bağlı Dövlət Məşğulluq Agentliyindən "Xəzər Xəbər"ə bildirdilər ki, Yusibov Seyfəddin Əli oğlunun müraciəti araşdırılıb. Onun şəraitinin ilkin monitorinqi üçün Agentliyin əməkdaşları tərəfindən vətəndaşla əlaqə saxlamağa cəhd edilsə də bu mümkün olmayıb. Növbəlilik qaydasına uyğun olaraq fevral ayında Seyfəddin Yusibovun şəraitinə ilkin baxış keçirilib və hazırda qərar mərhələsindədir. İlkin monitorinqin nəticəsinə uyğun olaraq vətəndaş digər mərhələlərə cəlb edilib edilməməsi müəyyən olunacaq.
Yekun aktda verilməyən heyvanlar niyə qeyd olunub sualına isə agentlikdən cavab verilməyib.
Xezerxeber.az mövzu ilə bağlı daha ətraflı videomaterialı təqdim edir.
Prezident İlham Əliyev 8 Mart - Beynəlxalq Qadınlar Günü münasibətilə "X" hesabında paylaşım edib.
TEREF paylaşımı təqdim edir:
Səhiyyə Nazirliyi tərəfindən “Laser Beauty Klinika”da yoxlama keçirilib.
Globalinfo.az xəbər verir ki, bu barədə APA-ya Səhiyyə Nazirliyi Analitik Ekspertiza Mərkəzindən məlumat verilib.
“Xatırladaq ki, Səhiyyə Nazirliyinin lisenziya şərtlərinin pozulması hallarının aradan qaldırılmasına dair göstərişlərini yerinə yetirmədiyi üçün “Laser Beauty Klinikası”nın həmin filial üzrə lisenziya əlavəsi İqtisadiyyat Nazirliyinin inzibati akti ilə dayandırılmış, müəssisəyə martın 12-dək nöqsanların aradan qaldırılması üçün müddət qoyulub.
Lakin, orada tibbi prosedurların davam etdirilməsi barədə məlumatlar alınıb. Bununla əlaqədar olaraq, baş həkim Rəna Soltanovanın iştirakı və təqdim etdiyi sənədlər əsasında klinikada Səhiyyə Nazirliyi tərəfindən yoxlama keçirilib.
Yoxlamanın nəticəsi olaraq, Azərbaycan Respublikası İnzibati Xətalar Məcəlləsinin 210.1-ci maddəsinə müvafiq olaraq, “LASER BEAUTY ESTETİK KLİNİKASI” MMC-yə inzibati xəta haqqında protokol tərtib edilmiş və Səhiyyə Nazirliyinə növbəti icraata göndərilib”, – məlumatda qeyd edilib.
Azərbaycan Avtomobil Yolları Dövlət Agentliyi 1 №-li Xüsusi Təyinatlı Yol İstismarı” MMC-də kütləvi ixtisarlar gedəcək.
Bu barədə AFN.az-a MMC-də çalışan insanlar məlumat verib. Bildirilir ki, onlara işçilərin 30 faizinin ixtisar olunacağı deyilib: “Bizə deyirlər, gəlin, ərizə yazın. Biz isə ərizə yazmaq istəmirik, deyirik ki, ixtisara düşməyimiz haqqında rəsmi bildiriş göndərin. Göndərmirlər. Dünən də iclas keçirib bizə dedilər ki, tez olun, ərizələrinizi yazın, sizi gözləyirik. MMC-nin rəisi Etibar Kərimov və müavini bizə deyirlər ki, “Azəravtoyol”un büdcəsində pul yoxdur sizə kompensasiya verməyə, ona görə də bildiriş göndərilmir, öz ərizənizlə çıxmalısız”.
Şikayətçilər bildiriblər ki, idarədə “aranı qatanlardan” biri də Yeganə adlı baş mühasibdir: “Rəhbərliyin sözünü o çatdırır bizə. O da deyir ki, büdcədə pul olmadığı üçün bildiriş göndərib ixtisara sala bilmirik. Deyirik, heç olmasa, sənədlərimizi elə verin ki, işsizlik müavinəti ala bilək, ondan da imtina edirlər”.
Qeyd edək ki, həmin idarənin kurasiyası Azərbaycan Avtomobil Yolları Dövlət Agentliyinin sədr müavini Əvəz Qocayevdədir. 1 №-li Xüsusi Təyinatlı Yol İstismarı” MMC-nin rəisi isə Etibar Kərimovdur. Şikayətçilər Etibar Kərimovu Əvəz Qocayevin adamı kimi xarakterizə edirlər. Bildirirlər ki, o, sədr müavininin nəvələrinin kirvəsidir.
Məsələ ilə bağlı 1 №-li Xüsusi Təyinatlı Yol İstismarı” MMC-nin rəhbəri Etibar Kərimov AFN.az-a açıqlamasında bildirdi ki, işçilərə ixtisarla bağlı heş bir söz deyilməyib: "Rəis mənəm, iclası da mən çağırmalıyam. Amma mən elə bir iclas keçirməmişəm. Bizim əksinə, işçiyə ehtiyacımız var, ixtisar söhbəti yoxdur".
Dövlət Turizm Agentliyi (DTA) ətrafında baş verən qalmaqal bu qurumda korrupsia, hüquqpozuntuları barədə məsələləri gündəmə gətirib. Xatırladaq ki, Prezident İlham Əliyev DTA-nın rəhbəri Fuad Nağıyevə şiddətli töhmət verib, habelə qurumun aparat rəhbəri Kənan Qasımov vəzifəsindən uzaqlaşdırılıb.
Fuad Nağıyev istintaqa çağırılıb. Rəsmi məlumatlarda bildirilir ki, Dövlət Turizm Agentliyinin (DTA) vəzifəli şəxsləri ilə bağlı aparılan araşdırma xidməti sənədlərin sızdırılması ilə yanaşı, agentlikdəki korrupsiya faktları ilə bağlıdır.
TEREF xəbər verir ki, "tribunainfo.az" saytı Dövlət Turizm Agentliyinin son bir ildə keçirdiyi tenderləri araşdırıb. Məlum olub ki, Agentlik 2024-cü il ərazində16 milyon 978 min 214 manatı əhatə edən 50 tender keçirib.
DTA ən böyük vəsaiti “Ricon” MMC-yə verib. Ötən il bu şirkətlə dəyəri 4.9 milyon manat olan iki satınalma müqaviləsi bağlanılıb. Həmin vəsait hesabına Agentlik “Lahıc” Dövlət Tarix-Mədəniyyət Qoruğunun abadlaşdırılmasını (1.3 milyon manat) və Daşaltı kəndində turizm infrastrukturunun yaradılmasını (3.6 milyon manat) reallaşdırıb.
“Ricon” MMC-nin hüquqi ünvanı Nərimanov rayonu, Əliyar Əliyev 45, m. 91-də yerləşir. Nizamnamə kapitalı 20 manat olan “Ricon” MMC, 29 dekabr 2003-cü il tarixində dövlət qeydiyyatına alınıb, qanuni təmsilçisi İsmayılov Rəşad Rəhim oğludur. Bu şəxs haqqında açıq mənbələrdə hər hansı məlumat mövcud deyil.Maraqlı məqamlardan biri odur ki, mövcud qanunvericiliyin tələbinə görə, “Ricon” MMCtenderdə iştirak edə bilməz, çünki dövlətə 263 min 918 manat vergi borcu var.Qeyd edək ki, Azərbaycanda vergi borcu olan MMC-lərin səxavətlə “qalib” elan olunması təcrübəsi geniş yayılıb.
Bundan başqa Agentlik ötən il “Vitam” MMC ilə 1 milyon 569 min 814 manat dəyərində 6 satınalma müqaviləsi imzalayıb. DTA bu şirkətdən həm mebel alıb, həm də ona Daşkənd, London, Seul və Moskvada keçirilən sərgilərin stendinin quraşdırılmasını həvalə edib.
Xaricdəki tədbirlərdə stendlərin quraşdırılmasını həmçinin “SMARTEXPO” MMC də həyata keçirib. DTA bu şirkətlə də ötən il 666 min 125 manat dəyərində 4 satınalma müqaviləsi bağlayıb. DTA-nın əsas “tərəfdaşlarından” biri də “Admedia.az” MMC-dir. Agentlik bu şirkətə əsasən daxildə keçirilən tədbirləri həvalə edib. Məsələn, Şuşadakı qastranomiyaya aid tədbir və Qarabağın sağlamlıq turizmi tədbirlərini bu şirkət təşkil edib. Ümumilikdə bu şirkətlə toplam dəyəri 674 min 891 min manatlıq 5 tender müqaviləsi imzalanıb.
Turizm Agentliyinin böyük vəsait verdiyi tenderləri sırasında üç başqa şirkətin də adı keçir. Onlardan biri “Baku Holiday” MMC ilə ötən il ərzində iki satınalma müqaviləsi imzalanıb. MMC xaricdə təşkil etdiyi bu tədbirlər üçün Agentlikdən 2.3 milyon manat alıb. Rəsmi qaynaqlarda bu pulun da 2.2 milyon manatı Cənubi Koreyadan Mərəkeşə qədər olan ölkələrdə tədbirlərin keçirilməsinə sərf edildiyi qeyd edilib.
Belə bahalı tədbirlərin təşkilatçılarından biri də “F.S TRAVEL” MMC-dir. Bu şirkət Türkiyə, Küveyt, Oman, Səudiyyə Ərəbistanı, Dubay, Bəhreyn, Qətər, Avstriya, Almaniya, İsveçrə, Polşa, Çexiya, Macarıstan, Böyük Britaniya, Latviya, Litva, Estoniya, İsveç, Bolqarıstan, Cənubi Afrika ölkələrində Azərbaycanı “tanıdıb” və bunun üçün Agentlikdən 1 milyon 296 min 157 manat alıb.
Milyonluq tender anlaşmasında “JP CONECO GROUP” MMC-də iştirak edib. Bu şirkət Basqaldakı “Hacı Bədəl” məscidinin bərpasını 410 min 623 manata, “Kiş”Tarix-Memarlıq Qoruğunda tikinti işlərini isə 693 min 560 manata reallaşdırıb.
Dövlət Turizm Agentliyinin ən “maraqlı” iki tenderi də var. Belə ki, dövlət qurumu “Lahıc” Dövlət Tarix-Mədəniyyət Qoruğunda avtomobil dayanacağının tikintisinə 583 min 416 manat pul xərcləyib. Bu işləri isə “CONSTRUCTION BUSINESS GROUP” MMC-yə tapşırıb
İkinci “maraqlı” tender isə Kulinariya Mərkəzinin əsaslı təmiri və avadanlığın alınması ilə bağlıdır. Təmir işləri “PROMOR” MMC tərəfindən həyata keçirilib və Turizm Agentliyi bu işlərə 638 min 675 manat ayırıb. Mərkəz üçün mətbəx avadanlıqlarının satın alınması isə “RR-2019” MMC-yə həvalə olunub. Bu işlər üçün isə 256 min 632 min manat xərclənib.
AzPolitika.info
Türkiyə vətəndaşı uzman fizioterapevt Musa Kılıç peşə ixtisasının tanınması üçün Səhiyyə Nazirliyində keçirilmiş imtahana dəvət olunub, imtahanda müvafiq keçid balını toplaya bilmədiyi üçün uğursuz nəticə əldə edib və ona TKTA tərəfindən yalnız akademik tanınma şəhadətnaməsi təqdim olunub.
Bu barədə Təhsildə Keyfiyyət Təminatı Agentliyindən məlumat verilib.
Qeyd olunub ki, martın 2-i sosial mediada Türkiyə vətəndaşı Musa Kılıçın bakalavriat səviyyəsi üzrə Tbilisi Dövlət Tibb Universitetindən əldə etdiyi diplomun saxta olduğuna dair məlumat paylaşılıb və müvafiq qurum tərəfindən adıkeçən şəxsin kvalifikasiyasının tanınmadığına dair fərziyyə irəli sürülüb.
Xarici kvalifikasiyaların tanınması üzrə məsul qurum olaraq Elm və Təhsil Nazirliyinin tabeliyində Təhsildə Keyfiyyət Təminatı Agentliyinin (TKTA) qeyd olunan məqamı aydınlaşdırmaq zərurəti yaranıb:
“Qeyd etmək istərdik ki, M.Kılıc “Fizioterapiya və tibbi reabilitasiya” ixtisası üzrə əldə etdiyi dövlət nümunəli (həqiqi) ali təhsil sənədi ilə xarici kvalifikasiyasının tanınması üçün TKTA-ya müraciət edib. M.Kılıçın müraciəti üzrə icraat Nazirlər Kabinetinin 2023-cü il 3 fevral tarixli, 34 nömrəli Qərarı ilə təsdiq edilmiş “Xarici dövlətlərin ali təhsilə aid kvalifikasiyalarının tanınması Qaydaları”na əsasən aparılıb. M.Kılıç peşə ixtisasının tanınması üçün Səhiyyə Nazirliyində keçirilmiş imtahana dəvət olunmuş, imtahanda müvafiq keçid balını toplaya bilmədiyi üçün uğursuz nəticə əldə etmiş və ona TKTA tərəfindən yalnız akademik tanınma şəhadətnaməsi təqdim olunub. Sözügedən şəhadətnamədə də qeyd olunduğu kimi akademik tanınma ərizəçiyə yalnız Azərbaycan Respublikası ərazisində təhsilin növbəti pilləsi (səviyyəsi) üzrə təhsilini davam etdirmək hüququ verir”.
Dövlət İmtahan Mərkəzi (DİM) “Enar Taxi” MMC (VÖEN - 1503990801) ilə satınalma müqaviləsi imzalayıb.
Yeniavaz.com xəbər verir ki, müqavilə tender müsabiqəsi keçirilmədən, bir mənbədən satınalma metodu əsasında imzalanıb.
“Enar Taxi” MMC DİM-in sifarişi əsasında imtahanların keçirilməsinə cəlb edilən şəxslərin və imtahan materiallarının Bakı şəhəri ətrafı və şəhərdaxili imtahan binalarına çatdırılması və geri qaytarılması xidmətlərini həyata keçirəcək və qarşılığında 76 min 650 manat alacaq.
Məlumat üçün bildirək ki, bu müqavilə üzrə satınalma proseduru dövlət satınalmalarının vahid internet portalında keçirilməyib.
“Dövlət satınalmaları haqqında” Qanunun 15.1 maddəsində göstərilir ki, məxfi məlumatlar istisana olmaqla bütün dövlət satınalmaları yalnız portal vasitəsilə həyata keçirilir.
Eyni zamanda Qanunun 49-cu maddəsində qeyd olunur ki, bir mənbədən satınalma metodu aşağıdakı hallarda tətbiq olunur:
- Satınalma predmeti yalnız hər hansı konkret təchizatçıda olduqda;
- Satınalma predmetinin əvəzedicisi və alternativi olmadıqda;
- Satınalma predmetinə təcili tələbat yarandıqda;
- Təbii fəlakətlər, texnoloji qəzalar, epidemiyalar baş verdikdə və fövqəladə xarakter daşıyan digər hallarda bilavasitə insanların həyat və sağlamlığına vurulan ziyanın qarşısının təcili alınması məqsədilə;
- Satınalma predmeti kəşfiyyat və əks-kəşfiyyat fəaliyyətini təmin edən tələbata aid olduqda.
Qanunun tələblərindən də göründüyü kimi, taksi xidməti məxfi məlumat hesab oluna bilməz. Bu səbəbdən də DİM-in satınalma prosesini bu şəkildə keçirməsi başa düşülən deyil. Üstəlik müqavilənin hansı səbəbdən bir mənbədən satınalma metodu ilə imzalandığı da aydın deyil.
Onu da bildirək ki, əvvəlki illərdə də DİM-in keçirdiyi analoji tenderlərin qalibi “Enar Taxi” MMC olub. Ötən il açıqlanan məlumatda xidmətin göstəriləcəyi məsafənin ümumi uzunluğunun 55 min 500 km. olduğu bildirilirdi.
Tenderin qalibi olan “Enar Taxi” MMC 2018-ci ildə dövlət qeydiyyatına alınıb. Hüquqi ünvanı Məsud Əlizadə, ev 62-də yerləşən MMC-nin qanuni təmsilçisi Ağacan Abbasov Abbas oğludur.
Qeyd edək ki, “Enar Taxi” MMC ölkənin aparıcı taksi xidmətlərindən bir olan “189 Taxi”yə bağlıdır. “189 Taxi”nin sahibi də Ağacan Abbasovdur. Ağacan Abbasov “Bizim Taksi” MMC və “Call Center” QSC-nin də sahibidir.
Bu gün Azərbaycanda insanların xəbəri olmadan adlarına şirkət açılması, bank krediti götürülməsi və ya vergi borcunun yaranması kimi hallara tez-tez rast gəlinir. İnsanlar təsadüfən – banka kredit üçün müraciət etdikdə, vergi borcu ilə bağlı bildiriş aldıqda və ya məhkəmə çağırışı ilə üzləşdikdə bu cür problemlərdən xəbər tutur. Bəs bu halların baş vermə mexanizmi necədir?
Bu barədə Moderator.az-a danışan iqtisadçı Günay Hüseynova deyir ki, son dövrlərdə bir çox insanın adına xəbərləri olmadan şirkət açılması və bunun nəticəsində borc yükü ilə üzləşməsi barədə məlumatlar yayılır:
“Lakin burada diqqət edilməli olan məqam odur ki, əslində vətəndaşların böyük əksəriyyəti bu prosesdən xəbərsiz olmur, sadəcə sonradan yaranan vergi və borc öhdəliklərindən yayınmaq üçün bu faktı inkar edirlər. Halbuki, Azərbaycanda və digər ölkələrdə bir şəxsin adına şirkət açmaq üçün onun şəxsiyyət vəsiqəsinin məlumatları və imzası mütləq lazımdır. Adına şirkət açılan şəxslərin əksəriyyəti bu prosesdən xəbərsiz olmur və sadəcə hüquqi məsuliyyətdən yayınmağa çalışır. Bəzi insanlar asan yoldan pul qazanmaq niyyəti ilə şübhəli təkliflərə razı olur və nəticədə dələduzların tələsinə düşürlər. Misal üçün, bir çox hallarda vətəndaşlara yüksək məbləğdə aylıq gəlir vəd edilərək onların adına şirkət açılır. Lakin sonradan bu şirkətlər müxtəlif maliyyə fırıldaqlarında istifadə edildiyi üçün həmin şəxslər böyük məbləğdə borc və vergi öhdəlikləri ilə üzləşirlər. Bu cür hallardan qorunmaq üçün insanlar hər hansı bir təkliflə qarşılaşdıqda onun qanunauyğunluğunu və təhlükəsizliyini araşdırmalı, xüsusilə imza atdıqları sənədlərin məzmununu diqqətlə oxumalıdırlar”
İqtisadçı vurğulayır ki, dələduzlar süni intellektdən, telefon tətbiqlərindən və ya müxtəlif fırıldaq üsullarından istifadə edərək vətəndaşların adına kredit götürə bilirlər:
“Bu halda, həqiqətən də, aldanma halları baş verə bilər. Vətəndaşların şəxsi məlumatlarını, xüsusilə kart və fin kod kimi bilgilərini heç kimlə paylaşmaması vacibdir. Çünki bu cür dələduzluq hallarının qarşısını almağın əsas yollarından biri şəxsi məlumatların qorunmasıdır. Maliyyə fırıldaqlarına qarşı ən yaxşı müdafiə vətəndaşların öz maariflənməsi və ehtiyatlı davranmasıdır. Bəzi rəhbər şəxslər əmlaklarını dövlətə bəyan etməmək üçün yaxın qohumlarının və ya işçilərinin adına keçirirdilər. Onlar notariuslarla əlbir olaraq bu prosesi həyata keçirirdilər. Ona görə də vətəndaşlar bu kimi məsələlərdə daha diqqətli olmalıdırlar”.
Hüquqşünas Ramil Süleymanov isə bildirir ki, insanların xəbəri olmadan adlarına şirkət açılması, bank krediti götürülməsi və ya vergi borcunun yaranması kimi hallar dünyada baş vermir, bu yalnız Azərbaycanda və Azərbaycan kimi ölkələrdə baş verir. Vətəndaşın adından ümumi bir etibarnamə götürülür və həmin etibarnamə əsasında şirkətlər təsis olunur:
“Azərbaycanda artıq şirkətlərin təsis edilməsi elektron qaydada həyata keçirilir. Lakin bəzi şəxslər bundan sui-istifadə edərək “Asan İmza” SİM kartları əldə edir və başqalarının adından etibarnamə olmadan şirkətlər açırlar. Daha sonra özlərini həmin şirkətlərin qanuni təmsilçisi kimi qeydiyyata alır, müxtəlif maliyyə əməliyyatları aparır, dövriyyələr formalaşdırır və kreditlər götürürlər. Nəticədə kreditlər ödənilmədikdə, bütün məsuliyyət şirkətin adında olan şəxsə düşür. Belə halların qurbanı olmamaq üçün şəxslər yaşadıqları ərazi üzrə Vergilər İdarəsinə müraciət edərək adlarında hər hansı bir hüquqi şəxsin təsis olunub-olunmadığını yoxlamalıdırlar. Əgər belə bir fakt aşkar edilərsə, ilk növbədə həmin şirkətin vergi borclarını və dövriyyələrini araşdırmaq vacibdir. Şübhəli məqamlar olduqda, dərhal hüquqşünasa müraciət edərək məsləhət almaq və ya hüquq-mühafizə orqanlarına ərizə ilə müraciət edərək bu əməliyyatların saxta şəkildə həyata keçirildiyini bildirmək lazımdır. Azərbaycanda artıq bir çox insanın adına xəbəri olmadan şirkətlər açılıb və bu şirkətlər vasitəsilə dövriyyələr formalaşdırılıb, kreditlər götürülüb. Bu əməliyyatları həyata keçirən şəxslər gəlir əldə etsələr də, vergiləri ödəməyərək həmin şəxsləri dövlət qarşısında borclu vəziyyətə salıblar. Bu problemlə bağlı bir neçə məhkəmə və istintaq qərarları mövcuddur. Lakin zərərçəkmiş şəxslər şikayət etsələr də, çox vaxt məsuliyyət onların üzərinə qoyulur. Çünki onlar bu prosesin öz adlarından saxta şəkildə həyata keçirildiyini sübut edə bilmədiklərindən, məhkəmələr onların iddialarını qəbul etmir və nəticədə çətin vəziyyətə düşürlər”.
Səhiyyə Nazirliyinin Analitik Tibbi Ekspertiza Mərkəzinin Ajans.az-a ünvanladığı açıqlamada Nazirlər Kabinetinin 2011-ci il 31 oktyabr tarixli Baş Nazir Artur Rəsizadənin təsdiq etdiyi və hazırda qüvvədə olan 178 saylı qərarı sual altına alınıb. Bu qərarda izahın düzgün verilməməsinə işarə edilib.
İlk olaraq xatırladım ki, Ajans.az lazer epilyasiyası və depilyasiya xidməti göstərən 15 mindən çox sahibkarlıq subyektlərinin bağlanma təhlükəsi səbəbindən qadın sahibkarların Azərbaycanın Birinci vitse prezidenti Mehriban Əliyevaya, Baş Nazir Əli Əsədova, İqtisadiyyat Naziri Mikayıl Cabbarova müraciət ünvanlaması barədə məlumat yaymışdı. Xəbərdə vurğulamışdıq ki, “Peşə təhsili üzrə ixtisasların Təsnifatı” təsdiq edilməsi haqqında Nazirlər Kabinetinin 31 oktyabr 2011-ci il tarixli qüvvədə olan qərarı ilə 030210 təsnifat kodunda “Bərbərlik” ixtisas qrupunda lazer epilyasiyası və depilyasiya xidməti ixtiasın adı kimi yer alıb.
Səhiyyə Nazirliyi Analitik Tibbi Ekspertiza Mərkəzinin Ajans.az-a ünvanladığı açıqlamada məndə şəxsən sual doğuran hissəni sizə təqdim edirəm. Oxuyun və deyin, hansı qənaətə gəlirsiz?
Azərbaycan Respublikası Nazirlər Kabinetinin 2011-ci il 31 oktyabr tarixli 178 nömrəli qərarı ilə təsdiq edilmiş “Peşə təhsili üzrə ixtisasların Təsnifatı”na əsasən “Bərbərlik” ixtisas qrupuna aid olan Lazer epilyasiyası və depilyasiya texniki qeyd edilsə də, bu fəaliyyətin izahı və kim tərəfindən həyata keçirilə bilməsi barədə məlumat yoxdur.
Açıqlamanın bu hissəsini oxuyandan sonra belə təəssüat oyandı...
Səhiyyə Nazirliyinin Azərbaycan Respublikası Prezidentinin yuxarı icra orqanı olan Nazirlər Kabinetinin qüvvədə olan qərarını sual altına almasına səbəb nədir?
Maraqlıdır ki, Səhiyyə Nazirliyi bu günə qədər qeyd olunan xidmətlərin kim tərəfindən reallaşdıracağı ilə bağlı yaranan bu sualı necə həll etmək istəyib? Heç bir xəbərdarlıq etmədən 15 mindən yuxarı sahibkarlıq subyektini narazı salmaqla?
İndi Nazirlər Kabinetinin qüvvədə olan qərarında boşluq tapdıqlarını iddia edərək 15 mindən yuxarı sahibkarlıq subyektini niyə incitməyə qərar veriblər? Sahibkarlar tərəfindən çoxsaylı şikayətlər daxil olur və onlara qarşı haqsız addımlar atıldığı, rüşvət alındığı iddia olunur.
Səhiyyə Nazirliyi bu qərarda hər hansı narahatlıq görürdüsə nə üçün Nazirlər Kabinetinin hüquq şöbəsi ilə qarşılıqlı informasiya mübadiləsi həyata keçirmirdi? Yaxud da səhiyyə ilə bağlı qərar verilərkən müzakirələr zamanı Nazirlik ümumiyyətlə necə reaksiya verib? Zamanında etiraz etmədiklər bu bənd necə oldu ki, indi qəbulolunmaz hala düşdü? 2011-ci ildə Baş Nazirin imzaladığı və qüvvədə olan qərara etimadsızlığın səbəbi nədir?
Heç bir xəbərdarlıq edilmədən sahibkalara şok effekti yaşatmaqda və narazı kontingent formalaşdırmaqda kim maraqlıdır?
Nazirliyin rəsmi olaraq Nazirlər Kabinetinin qərarında anlaşılmaz bildiyi məqam indimi yada düşüb? Maraqlıdır Nazirlər Kabinetinin qərarında səhv tapan Səhiyyə Nazirliyinin qanunverici bazası necə təkmilləşibmi? Əgər Səhiyyə Nazirliyi Nazirlər Kabinetinin qərarında səhv tapa biləcək qədər peşəkarlığa malikdirsə biz bu Nazirliyin potensialının itib-batmamasını arzu edərək səhiyyədə məlum problemlərin aradan qaldırılacağına inanmaq istərdik.
Amma son dönəmdə plastik cərrahlarla bağlı yaşanan biabırçı vəziyyət Nazirliyin faktiki fəaliyyəti barədə təsəvvür oyatmış oldu. İllərdir lisenziyasız, saxta diplomlarla “qəssab” rolu oynayan “tibb işçiləri” necə rahat çalışa bilirdi? Məhz ictimai qınaqdan sonra Nazirlik “hərəkətə” keçməli oldu.
Dəfələrlə plastik cərrahiyyələr zamanı ölüm hallarının olması mediada işıqlandırılsa da Səhiyyə Nazirliyi tərəfindən reaksiya olmurdu. Plastik cərrahlar sıradan çıxan kimi yeni bir istiqamətdə sahibkarlara “hücum” planı işə düşüb. Şikayətçilərin iddiasına görə bu hal korrupsiyaya yol açıb. “Saxta” diplomlu “cərrah”lara göz yuman Nazirliyin bir anda "Bərbərlik" ixtisas qrupunda olan lazer epilyasiyasiyası üçün xüsusi qaydalar fikirləşib bu sahəni hədəfə alaraq sıxışdırması düşüncüləri qarışdırır.
Bu arada qeyd edim ki, lazer epilyasiyası üçün istifadə olunan avadanlıqlar tibbi avadanlıq sayılmır. Gömrükdən bu adda keçmir.
Suallar çoxdur. Köklü cavablara ehtiyac var Cənab Nazir.
Nazirliyin Analitik Tibbi Ekspertiza Mərkəzinin açıqlamasını tam olaraq təqdim edirik. Bu açıqlamanın ilk abzasında sual meydana çıxır.
Necə olur ki Əmək və Əhalinin Sosial Müdafiəsi Nazirliyinin kollegiyasında qəbul olunan qərarla Nazirlər Kabinetinin qüvvədə olan qərarına təsir etmək istəyirsiz? Bu nə həyəcanlı geri dönüşdür. Kollegiya 2022-ci ildə olub. 2025-ci ildir axı. 3 il sonra yada düşdü? Yoxsa yeni sahələrdə boşluq tapıb maraqları təmin etmək üçün istinad nöqtəsi lazım idi?
Açıqlamaya keçid etməzdən öncə qeyd edim ki, məlumata görə Səhiyyə Nazirliyinin nəzdində 200-ə yaxın sertifikasiya alan dermotoloq var. 200 dermotoloqla 15 mindən yuxarı sahibkarlıq subyektinin gördüyü işi mənimsəmək və bu sahəni "ələ keçirmək" mümkün olacaq?
Səhiyyə Nazirliyinin Analitik Tibbi Ekspertiza Mərkəzinin açıqlamasının tam mətni belədi:
“Lisenziyalar və icazələr haqqında” Azərbaycan Respublikasının Qanuna əsasən özəl tibb fəaliyyəti lisenziya tələb olunan fəaliyyət növlərinin siyahısına daxildir. Lisenziya tələb olunan özəl tibb fəaliyyətlərinin Nazirlər Kabinetinin 15 may 2017-ci il tarixli 206 nömrəli Qərarı ilə “Özəl tibb fəaliyyəti üzrə lisenziyalaşdırılan xidmətlərin və işlərin Siyahısı”nın 1 nömrəli əlavəsinin 2.13.2-ci yarımbəndinə əsasən kosmetoloji fəaliyyət dermotologiyanın tərkibi kimi təsdiq olunub.
Lazer dermatologiyası və prosedurları “Dermatovenerologiya” ixtisasının rezidentura səviyyəsinin təhsil proqramına daxil olduğundan, müvafiq sertifikata malik həkim mütəxəssis tərəfindən icra olunmalıdır. Həmçinin, Azərbaycan Respublikasının Əmək və Əhalinin Sosial Müdafiəsi Nazirliyinin Kollegiyasının 10 iyun 2022-ci il 2205000022 nömrəli Qərarı ilə təsdiq edilən “Kosmetoloq” kvalifikasiya standartında “lazer epilyasiyası” və digər kosmetoloji prosedurların anlayışları verilib və bu işlərin sertifikatlı tibb mütəxəssisi olan “kosmetoloq” tərəfindən icra edilməsi qeyd olunub. Azərbaycan Respublikasının Dövlət Statistika Komitəsi tərəfindən verilən “Əhaliyə göstərilən pullu xidmətlərin həcminin tam hesablanması” metodoloji izahatında “kosmetologiya” xidməti səhiyyə xidmətlərinə daxil edilərək tibbi xidmətlərin uçotuna aid edilib.
Qeyd edilənlər onu deməyə əsas verir ki, lazer prosedurları bu sahədə praktiki tibbi fəaliyyət üzrə müvafiq sertifikatı olan həkim-dermatoloqlar və tibbi kosmetologiya üzrə ixtisaslaşmış mütəxəssislər tərəfindən icra edilə bilər.
Azərbaycan Respublikası Nazirlər Kabinetinin 2011-ci il 31 oktyabr tarixli 178 nömrəli qərarı ilə təsdiq edilmiş “Peşə təhsili üzrə ixtisasların Təsnifatı”na əsasən “Bərbərlik” ixtisas qrupuna aid olan Lazer epilyasiyası və depilyasiya texniki qeyd edilsə də, bu fəaliyyətin izahı və kim tərəfindən həyata keçirilə bilməsi barədə məlumat yoxdur.
Tural Müseyibov