"Azərlotereya" ASC-nin Kommersiya və planlaşdırma üzrə Baş rəhbəri Emir Türkmenlə bağlı saytımıza maraqlı məlumat yayılıb.
TEREF xəbər verir ki, 32gun.az-ın redaksiyasına daxil olan məlumata görə, sözügedən ASC-nin vəzifəli şəxsi vaxtı ilə (2017) Türkiyədə “Xeyr” (“Hayır”) kampaniyasını dəstəkləyənlərdən olub.

Bununla bağlı qısa bir araşdırma aparmaq qərarına gəldik. Emir Türkmenin sosial şəbəkədəki paylaşımları bəhsi keçən iddianı demək olar ki, təsdiqləyir.

Belə ki, 2017-ci ildə Ərdoğanın qərarına qarşı olanlar "Xeyr" (“Hayır”) kampaniyasına qoşularaq sosial şəbəkədəki hesablarında da "Xeyr" (“Hayır”) sözü yazılmış paylaşımlar edirdi. Elə həmin paylşımlara Emir Türkmen də qoşulub. O "facebook" hesabında profil fotosunu “Hayır” yazısı olan şəkillə dəyişibmiş.

Bunda əlavə 2019-ci ildə İstanbul Böyük Şəhər Bələdiyyəsi sədri vəzifəsinə keçirilən seçkilərdə əsas namizədlər biri olan Cümhuriyyət Xalq Partiyasının (CHP) namizədi Əkrəm İmamoğluna dəstək olub. Seçki nəticələri qəbul edilməyən İmamoğlunun “Hər şey çox gözəl olacaq” şüarını "hashtag"la paylaşıb və öz dəstəyini açıq-aşkar nümayiş etdirib.

Qeyd: Türkiyədə keçirilən referendumlarda "Hayır" kampaniyaları müxtəlif konstitusiya dəyişikliklərinə qarşı aparılan siyasi təbliğat formasıdır. Xüsusilə 2017-ci il referendumunda prezidentlik sisteminə keçidə qarşı çıxan müxalif qüvvələr "Hayır" kampaniyası təşkil etmişdi.

Ərdoğana qarşı müxalifət isə əsasən CHP, İYİ Partiya və digər siyasi qurumlardan ibarətdir. 2023-cü il prezident seçkilərində Kamal Kılıçdaroğlu əsas rəqib kimi çıxış etmişdi. Bundan əlavə, İstanbul Böyükşəhər Bələdiyyə Başçısı Əkrəm İmamoğlu da müxalifət düşərgəsində önəmli fiqurlardan biridir.

“Bank Respublika” kreditini bağlayanlara təmizlik kağızını da pulla satır.

Tribunainfo.az xəbər verir ki, bu barədə sözügedən bank müştərisi olan Elvin Bağışov yazıb. O bildirib ki, krediti ödədikdən sonra bankdan təmizlik kağızı tələb edib. Bank isə bu kağıza görə də əlavə 30 manat ödəniş tələb ediblər:

“Cəlilabad rayonunda yerləşən “Bank Respublika”ya olan bütün kredit borcumu ödədim. Onlardan təmizlik haqqında kağız istədim, onlarsa qiyməti 30 manat dedilər. Bu nə dərəcədə doğrudur?”.

Qeyd edək ki, “Bank Respublika”nın İdarə Heyətinin sədri Tariyel İsmayılovdur.

Azərbaycanda "bazarlar kralı" kimi daha çox məşhur olan Azay Möhnətovla bağlı maraqlı məlumat yayılıb...

Poliqon xəbər verir ki, "EuroHome”in sahibi ətrafında olan yaxın qohumlarına bahalı avtomobildən istifadə etməyi qadağan edib. İş adamının bu tapşırığını onun yanında işləyən qohumları yerinə yetirib. Belə ki, Azay Möhnətovun biznesinə rəhbərlik edən qardaşı oğlu Yalçın Möhnətovun qiyməti yüz min manatlarla ölçülən "Gelanvagen" avtomobilini satıb.

Maraqlıdır ki, bahalı avtomobillərini satan iş adamının qohumları dəyəri 40-50 min manat olan avtomobil nömrələrindən istifadə etməkdədirlər.

Sosial şəbəkədə yayılan məlumatda A. Möhnətovun işlərinin bir hissəsinə nəzarət edən Sarvan adlı bacısıoğlunun 10-??-010 kimi nömrələrdən istifadə etdiyi yazılır.Qeyd edək ki, Azay Möhnətov Bakıda və Rusiyada bazarla sahibdir. EvroHome adlı bazarlar şəbəkəsi A. Möhnətova məxsusdur.

Məsələ ilə bağlı qarşı tərəf mövqe sərgiləyə bilər.

İpoteka və Kredit Zəmanət Fondu sifarişçi olduğu növbəti satınalmaya yekun vurub.

Qlobal.az xəbər verir ki, "yeni inzibati binada təmir-bərpa işləri" lotu üzrə keçirilən satınalmada "Maksimus" (VÖEN: 2900010021) Məhdud Məsuliyyətli Cəmiyyəti qalib elan edilib.

Satınalmanın məbləği 17.804.626 manat təşkil edib.

"Maksimus" MMC 2004-cü ilin aprel ayında təsis edilib. Yüz manat nizamnamə kapitalı olan şirkətin hüquqi ünvanı Sumqayıt şəhəri, Bakı-Dərbənd yolu, ev şimalı, qanuni təmsilçisi isə Gülməmmədov Muxtar Əşrəf oğludur.

"Maksimus" MMC ölkədə fəaliyyət göstərən tikinti şirkətlərindən biridir. Şirkət 2022-ci il maliyyə hesabatında ili zərərlə bitirdiyi audit hesabatında məlum olmuşdu.

Şirkətin qanuni təmsilçisi Muxtar Babayevin adı 2021-ci ildə Bakı şəhəri Atatürk prospektində xeyli sayda ağac və kolları ekspertiza rəyi olmadan budatdırdığı və kökündən çıxartdırdığı üçün mediada gündəmə gəlmişdi.

Dövlət Ekoloji Təhlükəsizlik Xidməti Atatürk prospekti 118A ünvanında yerləşən obyektin qarşısındakı 3 müxtəlif cinsli ağacın qanunsuz olaraq gövdəsinin üst hissəsindən budandığı, 3 zeytun ağacının və bir neçə dekorativ kolun isə kökündən çıxarıldığını aşkarlamış, ağacların müvafiq ekspertiza rəyi olmadan qanunsuz köçürülməsinə və budanmasına göstəriş verən obyekt sahibi Muxtar Gülməmmədov barəsində akt, protokol tərtib edərək vəzifəli şəxs qismində 5000 manat məbləğində cərimə etmişdi.

Xatırladaq ki, İpoteka və Kredit Zəmanət Fondunun İdarə Heyətinin sədri Fəxri Kazımovdur.

Fəxri Kazımov uzun Azərbaycan Sosial Rifah Partiyasının sabiq sədri, sabiq deputat Xanhüseyn Kazımlının oğludur.

Cahandar Laçınlı

Qlobal.az

Dövlət Gömrük Komitəsinin (DGK) ötən il toplam 36 tender keçirib. Tribunainfo.az bildirir ki, bu tenderlər üzrə ümumilikdə, ayrı-ayrı şirkətlərlə 10 milyon 834 min 998 manatlıq satınalma müqaviləsi imzalanıb.

Açıq mənbələr üzərindən apardığımız araşdırma zamanı belə məlum olub ki, DGK keçirdiyi tenderlərdə əsasən qurumun tabeliyində olan Tibbi Xidmət İdarəsinin istəklərini yerinə yetirib. Çünki bu xidmətin tələblərinin ödənilməsinə dair tenderlərin sayı ümumi müsabiqələrin təxminən 70 faizinə yaxın olub.

DGK-nın tibb sektoruna sərf etdiyi vəsaitin də təxmini məbləği 7 milyon manatdan çoxdur. Bu yöndə keçirilmi ən yüksək rəqəmli tender isə “SOLAMEDICAL” MMC arasında baş tutub. Dərman preparatlarının satın alınması məqsədi ilə şirkətlə 2 milyon 523 min 114 min manatlıq müqavilə bağlanılıb.

Bu sırada ikinci sırada “tender akulası”ndan biri sayılan “ZEYTUN PHARMACEUTİCALS” MMC-dir. Bu şirkətdən dərman pereparatlarının alınmasına DGK 1 milyon 433 min 404 manat sərf edib.

Bu sırada DGK-nın satınalma müqaviləsi imzaladığı şirkətlərin sayı az deyil. Onların arasında “RASHMED” MMC, “VİTTA ELMİ-TEXNİKİ” MMC, “DIALUR” MMC və digərləri də var.

Tribunainfo.az-ın araşdırması zamanı o da məlum olub ki, DGK keçirdiyi tenderlər üzrə xərclədiyi vəsaitin önəmli hissəsini başqa iki sahəyə də sərf edib. Onlardan biri DGK-nın əməkdaşları üçün geyim forması almasıdır. Bununla bağlı, 2024-cü ildə komitə iki tender keçirib. “İMZA TEKSTİL” MMC ilə bağlanılmış satınalma müqaviləsinin dəyəri 58 min manat olub. “HERMANO” MMC ilə isə bu müqavilənin dəyəri 243 min manat təşkil edib. İşin qəribə tərəfi DGK bir ildə niyə 300 min manat geyimə xərcləməsidir.

Bir başqa məsələ isə DGK-nın avtomobillərə texniki qulluq və təmir xidmətlərinin satın alınmasına böyük vəsait sərf etməsidir. Qəribədir ki, bir ildə iki dəfə keçirilən tenderin qalibi eyni şirkət olub. Belə ki, “İDEAL MOTORS” MMC ilə bağlanılmış birinci müqavilənin dəyəri 847 min 846 manat olub. İkinci müqavilənin dəyəri isə 749 min 966 manat təşkil edib.

Bu rəqəmlərin toplamı ümumi tenderlərdə xərclənən vəsaitin təxminən 16 faizinə yaxındır.

DGK-nın diqqət çəkən tenderlərindən biri isə təsərrüfat mallarına da az olmayan qədər pul xərcləməsidir. Məsələn, “SMCS” MMC ilə bu məqsədlə 387 min 608 manatlıq, “LEKAL” MMC ilə isə 61 min 782 manat sərf olunub.

Bildirək ki, DGK-nın anlaşdığı şirkətlərin heç də hamısı tender sektoruna yabançı deyil. Əksinə, onların arasında əksər dövlət qurumlarının tenderlərinin qalibi olan bir xeyli şirkətlər var.

Ayrı-ayrı təhsil ocaqlarında, xüsusilə də Abşeron rayonu ərazisində təhsil adına müşahidə olunan eybəcərliklər son günlər daha da intensivləşib. Vəziyyət o həddə çatıb ki, artıq valideynlər bir yana, şagirdlərin özləri etiraza qalxıb.

"DİA-AZ" xəbər verir ki, bu barədə məlumatı ekspert Mətləb Salahov paylaşıb.

Onun iddia dolu açıqlamasını təqdim edirik:

"Xırdalanda məktəblilər onlara aşağı qiymət yazan müəllimin telefonunu əlindən alıb sındırıblar.

Şagirddən rüşvət alan müəllim, fironluq edən məktəb direktorları, heç nəyə lazım olmayan təhsil nazirliyi..."

Ötən il fevralın 21-də valideynlərinin Bakı Sağlamlıq Mərkəzində diş həkiminə apardığı 11 yaşlı Xədicə Babazadə o vaxtdan bəri bir ildir komadadır. Anası Şahnaz Mehdiyeva AzadlıqRadiosuna deyir ki, istər yerli, istərsə əcnəbi həkimlər övladının nə vaxt ayıla biləcəyinə dair ümidverici nəsə söyləmirlər.

Ş.Mehdiyeva həkimlərlə yanaşı, prokurorluq və ekspertizadan da narazıdır. Onun sözlərinə görə, Nərimanov rayon Prokurorluğunda gedən araşdırma obyektiv aparılmır, azyaşlı övladının bir ildir yatağa məhkum olmasına görə məsuliyyət daşıyanlar cəzasız qalıblar.

"Necə ki günahkarlar layiqli cəzasını almır, Xədicə kimi qurbanlar çox olacaq"
"Nə qədər ki, belə hallarla bağlı ədalətli araşdırma aparılmır, günahkarlar layiqli cəzasını almır, Xədicə kimi qurbanların, mənim kimi gözüyaşlı anaların da sayı çox olacaq. Çünki cəzasızlıq mühiti yeni-yeni cinayətlərin artmasına yol açır", - Ş.Mehdiyevanın sözləridir.

Valideynləri 11 yaşlı Xədicəni Bakı Sağlamlıq Mərkəzində diş həkimi Bəhruz Rüstəmovun yanına aparıblarmış. Anası bu həkimin qəbuluna "Instagram" vasitəsilə yazılıbmış.

Ş.Mehdiyevanın sözlərinə görə, ötən il fevralın 21-də uşağı müalicəyə aparılarkən onları bilgiləndirmədən uşağa narkoz verilib. Nəticədə azyaşlı komaya düşüb: "Uşağın analizlərini götürmədən, çəkisini yoxlamadan, başqa müayinələrini aparmadan narkoz verilib, nəticədə orqanizm dözməyib. Beyin uzun müddət oksigensiz qalıb. Beyin hüceyrələri məhv olub".

Ana danışır ki, həyat yoldaşı ilə birlikdə uşağı stomatoloq B.Rüstəmovun yanına aparıblarmış. Öncədən də "Instagram" vasitəsilə həkimin köməkçisinin telefonunu tapıb, onunla danışıblar.

"Bizi çıxardılar bayıra"
"Demişdi ki, sedasiya üsulu ilə müalicə olunacaq. Biz də elə bilirdik ki, ağrı hiss eləməsin deyə, iynə vurulur. Biz narkoz bilməmişik. Kabinetdə olanda da bir xanım gəldi, sonradan bilmişəm ki, adı Fərəh Amanovaymış. Onun anestezeoloq olduğunu bilmədik. Uşağın adını, yaşını soruşdu, bizi çıxardılar bayıra. Əvvəldən də həkim demişdi ki, gigiyena baxımından müalicə vaxtı valideynləri içəridə saxlamırıq".

Valideynlər dörd dişin müalicəsinin, azı, yarım saat çəkəcəyini nəzərə alıb xəstəxananın kafesinə gediblər. Bir qədər sonra diş həkiminin kabinetinə qayıdandasa orada həyəcan yaşandığını görüblər.

Ş.Mehdiyeva deyir ki, övladının başına bir iş gəldiyini dərhal anlayıb, amma qapını bağlayıb, onları içə buraxmayıblar. Əlində elektroşok aparatı ilə təcili kabinetə gələn həkim üçün qapını açanda ata da içəri daxil olub: "Görüb ki, uşağı yerə uzadıblar, ürək masajı edirlər. Yoldaşımı dərhal çıxarıblar. Həmin vaxt dəhlizdə mən də huşumu itirmişəm. Məni xəstəxananın təcili yardım şöbəsinə aparıblar. Sonra Xədicəni də reanimasiyaya köçürmüşdülər. Üç gün orada qaldı. Sonra Mərkəzi Klinik Xəstəxanaya apardıq. Uşaq bir ay öz hesabımıza orada qaldı. Oyanma olmadı...".

20 dəqiqə oksigensiz?
Ananın sözlərinə görə, koma vəziyyətində olan xəstə qidanı özü çeynəyə, uda bilmir. Bu üzdən, aptekdən Xədicə üçün hazır qidalar alırlar, onu uşağın boğazından mədəsinə necə ötürməyi də öyrəniblər. Ümumiyyətdə, Babazadələr ailəsi uşaq üçün evdə xəstəxanaya bənzər şərait yaradıb: "Uzun müddət hərəkətsiz qalan adamda əzələlər yeyilir. Bizə demişdilər ki, özəl xəstəxanalardan birində yaxşı fizioterapevtlər var. Onlar da evə baha gəlir. Qohumlar bizə maddi yardım göstərdilər, bir ay fizioterapiya üçün orada yatırdıq. İstəyirdik ki, heç olmasa, otura bilsin, hamama apara bilək və s. O da olmadı. Heç bir irəliləyiş yoxdur. İlk gün necə idisə, indi də elədir".

Ş.Mehdiyeva müəllimdir, amma övladının durumu üzündən müvəqqəti işləmir, ona qulluq edir. O bildirir ki, hər ay təkcə Xədicənin baxımına 2 min 500 manatadək pul xərclənir. Bura dərmanlar, aptekdən alınan hazır qidalardan tutmuş, əlavə baxım əşyalarına qədər müxtəlif xərclər daxildir. Dövlətsə ona toplam 570 manat pensiya və müavinət kəsib. Anası vurğulayır ki, bu, heç aylıq yeməkpuluna çatmır.

X.Babazadənin müalicəsindən ötrü valideynləri həm yerli, həm də əcnəbi həkimlərlə ünsiyyətdədirlər. Anası İsraildə, Türkiyədə çalışan həkimlərdən məsləhət alır. Beyin müayinəsinin nəticələrini İsraildəki həkimlərə göndəriblər: "Dedilər ki, rəydə beyinin beş dəqiqə oksigensiz qaldığı yazılıb, amma, azı, 20 dəqiqə oksigensiz qalmalıdır ki beyin bu vəziyyətə düşsün. Diskdəki beyin görüntüləri bunu deməyə əsas verir. Sadəcə, uşaq o qədər sağlam olub ki, ürək masajı ilə onu dayanmış ürəyinin fəaliyyətini reanimotoloq Rauf Paşayev bərpa edib. Tibbə görə, beyin hüceyrələri, uzağı, dörd dəqiqə oksigensiz qala bilər. Sağlam orqanizmdir, amma beyin yoxdur. Digər orqanlar işləyir, beyin yox".

Ş.Mehdiyevanın sözlərinə görə, türkiyəli həkimlər də onlara eyni sözləri deyiblər. Onlar hətta evlərini satıb uşağı müalicəyə aparmaq istəsələr də, həkimlər bunun bir faydası olmayacağını bildiriblər.

Cinayət işi başlanıb
Ş.Mehdiyeva iddia edir ki, Səhiyyə Nazirliyinin Məhkəmə Tibbi Ekspertiza və Patoloji Anatomiya Birliyi qızının başına gələnlərlə bağlı obyektiv rəy vermir.

Faktla bağlı Nərimanov rayon Prokurorluğunda Cinayət Məcəlləsinin 314.2-ci (səhlənkarlıq, ağır nəticələrə səbəb olduqda) maddəsiylə cinayət işi başlanıb. İstər stomatoloq B.Rüstəmov, istərsə anestezioloq F.Amanova yaşananlara görə özlərini günahkar saymırlar.

Üç dəfə ekspertiza təyin olunub. Ekspert rəylərində də iddia edilir ki, "göstərilmiş ambulator tibbi xidmət səhiyyə sistemində qüvvədə olan müvafiq qaydalara uyğun olub".

Ekspertlər yazırlar ki, tibbi xidmətdən öncə bütün lazımi müayinələr - qanın ümumi analizi, kardioloji müayinə aparılıb, rentgen olunub və s.

"Xədicə Babazadənin vəziyyətinin ağırlaşmasına səbəb anesteziya zamanı istifadə olunan anestetikə qarşı hiperhəssaslıq kimi dəyərləndirilir, xəstənin aldığı psixotrop dərmanlar risk faktoru hesab olunur", - ekspertizanın rəyi belədir.

Hər dəfə zərərçəkmiş tərəf rəydən narazı qalıb, yenidən ekspertiza təyin olunsa da, nəticə dəyişməyib.

İstintaq davam edir
Ş.Mehdiyeva rəydə yazılanların yalan olduğunu deyir, məqsəd də övladını bu duruma salan həkimləri qorumaq, məsuliyyətdən kənarda saxlamaqdır: "Müstəntiqin əlində bizim xəstəxanaya getdiyimiz günə aid bütün görüntülər var. Qoysunlar ortaya nə vaxt Xədicədən qan analizi götürülüb, nə vaxt rentgenə aparılıb? Sonradan saxta sənəd hazırlayıb işin içinə tikməyə nə var?! Görüntü qoysunlar ortaya. Ekspert yazıb ki, psixiatr yanına gedib, psixatrop dərman içib. Birincisi, hiperaktiv uşaq olduğuna görə iki il əvvəl getmişdi, o vaxt içilən dərmanın təsiri qalmır. İkincisi, Fərəh Amanova niyə yoxlamadan narkoz verib?".

11 yaşlı Xədicənin başına gələnlərlə bağlı Nərimanov rayon Prokurorluğunda istintaq davam edir.

Binəqədi rayonu Ağasadıq Gəraybəyli küçəsi, 41 A saylı binanın sakinləri Binəqədi rayonu İcra Hakimiyyətinin təhdidləri ilə üz-üzədir. Artıq bir aya yaxındır ki, Binəqədi rayonu İcra Hakimiyyətinin göstərişi ilə 34 ailənin yaşadığı bu binaya nə su, nə qaz, nə də elektrik enerjisi verilmir.

Səbəb olduqca ilgincdir. Bina sakinlərinin saytımıza verdiyi məlumata görə 34 ailənin yaşadığı bina İcra Hakimiyyəti tərəfindən qəzalı bina kimi qeydiyyata salınıb. İcra Hakimiyyəti sakinlərin binanı tərk etməsini tələb edir. Məhkəmə qərarı olmadan Binəqədi rayon İcra Hakimiyyətinin başçısı Elxan Allahverdiyevin göstərişi ilə binada bütün komunal xidmətlər dayandırılıb. Ən gülməlisi odur ki, Binəqədi rayon İcra Hakimiyyəti çıxarışlı mənzillərə cəmi 32 min AZN məbləğ təklif edir. Binadan çıxmaq istəməyən sakinlər artıq 25 gündür ki, qaranlıq və soyuq otaqları tərk etmirlər. Hal- hazırda Bakıda havanın olduqca soyuq olması belə Binəqədi rayon İcra Hakimiyyətinin başçısı Elxan Allahverdiyevin yumşaltmayıb. Bina sakinlərinin saytımıza təqdim etdiyi videonu sizə təqdim edirik:

Veteninfo.az

Adi bir qədər əvvəl qalmaqala qarışan və sosial şəbəkələrdə “bir saniyəyə 100 min ev satan” kimi təqdim olunan “MİDA” MMC ötən il sayca az, amma məbləğcə çox böyük tenderlər keçirib. Tribunainfo.az xəbər verir ki, şirkət 14 tenderdə 77 milyon 844 min 442 manatlıq satınalma müqaviləsi imzalayıb.

“MİDA”nın ötən il üçün ən bahalı müsabaqiəsi Şirvan şəhəri, Naxçıvan küçəsində yerləşən yaşayış kompleksinin elektrik xətti, kanalizasiya və digər bu qəbildən görülən işləri ilə bağlı olub. “ENERJİ QRUP” MMC ilə bununla əlaqədar 10 milyon 185 min 018 manatlıq satınalma müqaviləsi imzalanıb.

Xatırladaq ki, “MİDA” sözügedən şirkətlə bu ilin ilk ayında da anlaşıb. Belə ki, Şirvan şəhəri, Naxçıvan küçəsində inşa olunan yaşayış kompleksinin sahəxarici və sahədaxili qaz təminatı işlərini həyata keçirən “Enerji Group” b unun müqabilində MMC-dən 1 milyon 509 min 75 manat daha alacaq.

Bahalılıq dərəcəsinə görə, ikinci ən iriməbləğli tender “T.T.Ş.-İNŞAAT” MMC ilə razılaşdırılıb. MİDA Binqədidəki binasının csu-kanalizasiya şəbəkəsinin və drenaj sisteminin tikintisi işlərinə görə, sözügedən şirkətə 8 milyon 448 min 852 manat ödəyib.

Bahalı layihələr sırasında Şirvan şəhəridə 960 yerlik tam orta məktəbin tikintisi də var. “İDEAL TM” QSC ilə bağlanmış müqavilənin dəyəri 6 milyon 951 min 997 manat təşkil edib.

Cəbrayıl şəhərində 7,87 ha torpaq sahəsində inşa olunan yaşayış kompleksinin sahədaxili şəbəkəsinin tikintisi işləri də ucuz olmayıb. “İNTEGRAS” MMC ilə bağlanılan müqavilənin dəyəri 4,7 milyon manat olub.

MİDA-nın say baxımından ən çox müqavilə bağladığı şirkət isə “R.İ.S.K. ELMİ İSTEHSALAT ŞİRKƏTİ”dir. Ötən il MMC və QSC 3 tender sazişi imzalayıblar. Bu müqavilələrin toplam dəyəri isə 2 milyon 438 min 092 manat olub.

MİDA bu ilin ilk 3 iki ayı ərazində təxminən 29 milyon manatlıq daha üç tender keçirib. Bu tenderlərdən biri Hövsan qəsəbəsində 5 çoxmənzilli yaşayış binasının və mühəndis-kommunikasiya şəbəkəsinin tikintisi, ərazinin abadlaşdırılması və yaşıllaşdırılması ilə bağlıdır. “AMAL GROUP” MMC ilə bu məqsədlə 27 milyon 285 min 107 manatlıq müqavilə imzalanıb.

MİDA-nın ən qəribə işlərindən biri davamlı olaraq, eyni şirkətlə gördüyü işləri reklam etməsidir. Belə ki, MMC “Medical Media” ilə iki ildir davamlı olaraq çalışır. Tibb sahəsində çalışan və bu sahə üzrə reklamda elə də ciddi uğur qazanmamış sözügedən şirkətlə MİDA-nın ötən il üçün 112 min manatlıq növbəti satınalma müqavilə bağlaması da təəccübə səbəb olub.

İkinci maraqlı məsələ isə MİDA-nın ötən illə nisbətdə bu il dəftərxana ləvazimatına olan tələbatının artmasıdır. Belə ki, ötən il “DOSTLUQ TRADİNG” MMC-dən 102 min 971 manatlıq dəftərxana ləvazimatı alan MİDA, bu ilin yanvarında “LEKAL” MMC ilə eyni məqsəd üçün 134 min 948 manatlıq satınalma müqaviləsi imzalayıb.

Lakin MİDA-nın ən müəmmalı və qəribə işlərindən biri odur ki, şirkətin satınalma saytında keçirdiyi tenderlərin tarixçəsi 2024-cü ilin may ayını keçməməsidir. Yəni, MMC-nin may ayından ötən ilin əvvəlinə qədər olan müddətdə keçirdiyi tenderlərlə bağlı heç bir məlumat yoxdur.

Bu məlumatlar gizlədilibmi, yoxsa, saytın bazasından çıxarılıbmı və ya bunun məqsədli olub olmadığı, habelə texniki məsələ olması barədə heç bir məlumat yoxdur.

Necə ola bilər ki, eyni saytda bu ilin yanvar və fevral ayları üçün MİDA-nın keçirdiyi tenderlərlə bağlı məlumat var, amma ötən ilin yanvar-may ayları üçün heç bir bilgi yoxdur? Bunun özü kifayət qədər qəribə və təəccüblüdür.