 |
|
|
Suraxanı rayonu Yeni Günəşli A/B massivi S.Noçuyev küçəsində qanunsuz obyekt tikintisi aparılır.
XALQ.AZ xəbər verir ki, yeni tikilən obyektdə aparılan qanunsuz tikinti işləri davam etdirilir.
Paytaxtın mərkəzindən kənarda bu gün ən çox qanunsuz və tikinti normaları nəzərə alınmadan tikintilər aparılır.
Bunula bağlı Dövlət Şəhərsalma və Arxitektura Komitəsi isə heç bir tədbir görmür.
Apardığımız araşdırma zamanı bəlli oldu ki, sözügedən tikinti işlərinin aparılmasına dair aidiyyəti dövlət qurumlarının heç birindən lazımi icazəverici sənədləri alınmayıb. Qanunsuz formada tikilən obyekt odur ki, ya torpağın sənədi yoxdur, ya tikilməsi üçün qurumdan icazə alınmayıb və yaxud hansısa torpaq sahəsi zəbt olunub, onun üzərində tikinti işləri aparılır.
Bu nəhəng obyektin tikintisi ilə bağlı heç bir rəsmi qurumdan açıqlama ala bilmədik.
İnanrırıq ki, müvafiq qurumlar tərəfindən həmin qanunsuz tikinti ilə bağlı tədbirlər görüləcək.
Qanunsuz tikintinin görüntülərini təqdim edirik:
Hacıyevlərin “qara günləri” hələ qabaqdadır; talanan vəsaitlərin necə çıxarılması gündəmə gəlib
London korrupsioner varlılar üçün sakit cənnət yeri olmağı imtina edəndən - 2018-ci ilin mayından Cahangir və Zamirə Hacıyevlərin adı gündəmdədir. Onun həyat yoldaşı Cahangir Hacıyev Azərbaycanda 16 il 6 ay müddətinə azadlıqdan məhrum edilib. “Azərbaycan Beynəlxalq Bankı”nın (ABB) keçmiş sədri olan Cahangir Hacıyev barəsində 2 məhkəmə hökmü var.
O, ilkin olaraq bir mənimsəmə epizoduna görə mühakimə olunub və 15 il həbs cəzası alıb. Lakin bundan sonra digər cinayət işləri də məhkəməyə göndərilib. Məhkəmə işinin birinci mərhələsində Cahangir Hacıyev bankın 90 milyon manatadək vəsaitini “VİP” kartlar vasitəsilə şəxsi ödənişlərinə, sürdüyü lüks həyata sərf edərək taladığına görə müttəhimlər kürsüsündə oturmuşdusa, sonrakı məhkəmədə söhbət milyonlardan yox, ümumilikdə 4 milyard manatdan yuxarı mənimsəmədən gedirdi. Ona qarşı Cinayət Məcəlləsinin 179.3.2-ci (külli miqdarda mənimsəmə) maddəsi ilə ittiham irəli sürülmüşdü. Cahangir Hacıyev heç bir təminat olmadan, sənədləşmə aparılmadan xaricə səpələnən kreditlər verməkdə ittiham olunurdu. Məlum olmuşdu ki, yarıdan çoxu dövlətə məxsus bankın vəsaitləri hesabına Cahangir Hacıyev Rusiya, Qazaxıstan, Albaniya, qondarma “Abxaz Respublikası”, Dubay və digər yerlərdə ənənəvi energetika və tikinti sahələri ilə yanaşı, yeni “innovativ” layihələrə, şou-biznesə, yalançı xeyriyyəçiliyə, hətta xaricdə “Kral Klubu”nun yaradılması kimi “kreativ” layihələrə “maraq” göstərib. Beynəlxalq Bankın nizamnamə kapitalının qohumların, sürücülərin, xadimələrin, bağbanların adına kreditlər rəsmiləşdirməklə süni şəkildə artırılması, bankın Müşahidə Şurasının qərarlarının icra olunmaması, əvəzində isə İdarə Heyətinin qərarları əsasında rəsmiləşdirilərək 1 milyard manatdan çox vəsaitin ölkədən çıxarılması və talanması kimi faktlar vardı. Cahangir Hacıyev sədr olanda mükafatlara və fəxri adlara xüsusi düşkünlüyü ilə seçilirdi. Monetar payçıların qəpik-quruşunu ödəməkdən yayınır, bunun əvəzində mükafat və fəxri adlar almaq üçün hər il bir neçə milyon xərcləyirdi. Beynəlxalq Bank dövlətə məxsus olduğundan, adətən bu bankın reytinq dərəcəsi də beynəlxalq qiymətləndirmədə həmişə ölkənin reytinqinə uyğun olaraq yüksək olurdu. Və sabiq bankir də bundan sui-istifadə edərək özünü hər yerdə Qafqazın ən böyük bankının rəhbəri kimi təqdim edirdi. Adi vətəndaşın Beynəlxalq Bankdan bir neçə min manat kredit alması üçün həftələrlə get-gələ salındığı, kredit almaq şansının faktiki olaraq mümkünsüz olduğu halda Cahangir Hacıyev şəxsi sürücüsünə, xidmətçisinə milyonlarla dollar kredit yazdıraraq dövlət bankının xəzinəsini öz cibi bilirdi.
Həbsindən sonra onunla bərabər talançılıqda iştirak edənlər də istintaqa cəlb olundular. Tutulanlardan biri də Cahangir Hacıyevin ən yaxın adamlarından hesab olunan Emin Sadiq idi. Emin Sadiq Cahangir Hacıyevin və Beynəlxalq Bank işi üzrə əsas fiqurlarından biri idi. Bankın talanmasına yönəlmiş maliyyə maxinasiyalarının birbaşa iştirakçısı hesab olunurdu. O, Qazaxıstanda neft yatağının istismarına yönəlmiş investisiyanı mənimsəməkdə ittiham olunurdu. Söhbət Azərbaycan Beynəlxalq Bankının Rusiyadakı törəmə bankı “MBA-Moskva” tərəfindən ayrılmış 60 milyon dolların mənimsənilməsindən gedir. Habelə Emin Sadiq “MBA-Moskva” bankına veksellərin satışında dələduzluq əməlinə yol verib. Həbs olunanlardan biri də sabiq milli təhlükəsizlik naziri, Cahangir Hacıyevin qudası və biznes şəriki Eldar Mahmudovun ortaqlarından biri Sahib Ağayev idi. O da Cahangir Hacıyevlə birgə mənimsəmələrə görə tutulmuşdu.
Beynəlxalq Bankda baş verən talamalar nəticə etibarı ilə Azərbaycan dövlətini 3 milyard dollarlıq borca saldı. Bu məbləğ Beynəlxalq Bankın xilası üçün ayrıldığı günlərdə Ermənistanın dövlət büdcəsinin xərclərindən çox idi. 2018-ci ildə Ermənistanın dövlət büdcəsinin xərcləri təxminən 3 milyard dollar idi. Cahangir Hacıyev başının dəstə ilə 4 milyarddan artıq vəsaiti Beynəlxalq Bankdan “xortumlayıb” ofşorlara daşımışdlar.
Cahangir Hacıyev Azərbaycanda məhkəmə önündə dayandığı günlərdə London Ali Məhkəməsi onun keçmiş dövlət bankiri Cahangir Hacıyevin həyat yoldaşı Zamirə Hacıyevaya sorğu göndərdi. Zamirə Hacıyevadan 10 il ərzində Londonun məşhur dükanı Harrods-da xərclədiyi 21 milyon dollar pulu haradan aldığını açıqlaması tələb olundu.
Məlum oldu ki, Zamirə Hacıyeva Londonda alış-verişlərini Beynəlxalq Bankın 35 ədəd kredit kartı və Harrods-un üç ədəd mağaza kartı ilə ödəyib. Bundan əlavə, məhkəmə işlərindən məlum olub ki, 2013-cü ildə Zamirə Hacıyevanın nəzarət etdiyi başqa bir şirkət Berkshire qraflığında, Ascot kəndinin yaxınlığında təmtəraqlı qolf kursu və əmlakını - "Mill Ride Golf Club"u almaq üçün 10 milyon funt (13.15 milyon dollar) xərcləyib. Rəsmi məlumatlar cütlüyün Harrods-ın avtomobil parkında iki xüsusi yerə sahib olduqlarını və Zamirə Hacıyevanın 42 milyon funta (55.24 milyon dollar) Gulfstream G550 jet təyyarəsini aldığını da ortaya çıxarıb. Artıq Zamirə Hacıyevanın Londondakı malikanəsi və qolf klubu satışa çıxarılıb. Mal-mülkə ilkin olaraq 19 milyon 500 min funt sterlinq qiymət qoyulub. Zamirə Hacıyeva Milli Cinayətkarlıqla Mübarizə Agentliyinin (NCA) 6 illik təhqiqatından sonra Askotdakı qolf klubun və Naytsbricdəki evinin müsadirəsinə razılaşıb. Ötən ilin payızında bu aktivlərin satışa çıxarılacağı bilinib. Zamirə Hacıyevaya əmlakların hərracla satışından əldə edilən məbləğin 30 faizi veriləcək. 70 faizdən isə Milli Cinayət Agentliyinin xərcləri çıxılacaq və sonra yerdə qalan vəsait Azərbaycana qaytarılacaq.
E.MƏMMƏDƏLİYEV,
“Yeni Müsavat”
Amma bir ümumi AYNAmız da var.....
Bu AYNA o aynadan deyil. Bu ad Ayna ilə bağlı xoş təəssüratlarımızı alt-üst edən qurumun adıdır. Narazı olmayan çox az adam tapılar bu qurumdan. Uzaq olmayan keçmişdə qalstuklu müəllimlərin əlini-qolunu sallaya-sallaya bulvara velosiped sürməyə getməsi barədə hazırladıqları biabırçı videoçarxı yəqin ki, unutmamısız. Baxmayanlar mənim şəxsi "facebook", "tiktok", "instagram", "youtube" platformalarımda “AYNA-nın Velosiped zolağı” başlıqlı detallı izahlı video ilə tanış ola bilərlər.
Bir qrup AYNA əməkdaşının “nümunə” olmaq üçün bulvara gedib velosiped sürməsi, yol hərəkəti qaydalarını pozaraq avtomobili qanunsuz park etməsi, yuyulub təmizlənmiş, AYNA əməkdaşlarından ibarət 2 nəfər sərnişinin əyləşdiyi avtobusu şəxsi xidməti avtomobili kimi istifadə edən iki nəfər qalstuklu rəsmi AYNA əməkdaşının velosiped sürməyə getməsi və sair gülünc kadrları ilə yaddaşlara həkk olan qurum niyə rəğbət qazana bilmir?
Çünki bizə velosiped sürməyi diktə edən AYNA rəhbəri hörmətli Anar Rzayevi bir dəfə də olsun velosipedlə işə gələn görmədik. Əməkdaşları belə hazırladıqları video çarxda şəhərdə süni tıxac yaradan velosiped zolaqlarında hərəkət etməyi özlərinə rəva bilmədilər. Bilmirlər də.
Bu zolaqlar nə üçündür? Bir küçədə başlayıb mənasız bir istiqamətdə yarımçıq qalan velosiped zolaqlarını çəkəndə yoların zamanında hansı sayda avtomobillərin intensivliyi üçün nəzərdə tutulduğu unudulub deyəsən. Axı, bu yollar çəkiləndə, küçələr salınanda nəinki avtobus heç velosiped zolağı da yada düşməmişdi. İndi avtomobil sayı da artıb. Küçələr isə yeni deyil. Dar küçələrdə avtobus zolaqlarına dözmək olar. Amma əlavə olaraq bu velosiped zolağını niyə belə xaotik etmisiz? Nə əldə etmişik? Hansı əsaslı statistika var?
Velosiped zolaqlarında yalnız piyadalar gəzir. Görüntü xatirinə bu qədər insana zülm etməyə dəyərmi? Həqiqətən də bu zolaqlardan səmərəli formada niyə istifadə olunmur? Velosiped zolaqları çəkiləndə necə araşdırma aparılır və qərar verilir?
Əgər bir qurumun gördüyü iş əsaslı, köklü deyilsə, hər addımı səhvlərlə doludursa, sürücü və sərnişinlər niyə AYNA rəhbəliyinin məlum yanlış qərarlarından əziyyət çəkməlidirlər. Bu qurumda dövlətin inventarlarını, resurslarını xərcləyən şəxslərdən hesabat istəniləndə nə cavab verəcəklər? Hər gün bir qara ideya ilə şəhəri rəngləyən AYNA hansı istiqaməti hədəf götürüb? Neçə-neçə zolağın yararsız olduğunu görüb rəngləri silən AYNA dövlətə, vətəndaşa dəyən zərəri necə ödəyəcək?
Bu axı, qardaşının şirkətini rəhbərik etidyi qurumda daşımacılığa cəlb etmək qədər asan iş deyil. Yollarda əziyyət çəkən sürücülərə yazılan cərimələr, keçirdikləri stress, yaşanan gərginlikdən sonra bir sıra ərazilərdə zolaqları ləğv etmək fəaliyyətinizdə mövcud olan fəaliyyətsizliyin göstəricisidir. Siz, axı, paytaxtı laboratoriya, insanları da təcrübə siçanı hesab edə bilməzsiz.
Suallar çoxdur. Amma kim bu suallara cavab verəcək?
Suallara cavab verməli olan AYNA rəhbəri Anar müəllimin media ilə görüşü az qala bağlı qapılar arxasında keçir. Videoları da səssiz yayımlanır. İnterşumu belə söndürülər. Görüşüldü, danışıldı, müzakirə olundu və sair...
Anar müəllimdən müsahibə almaq xoşbəxtliyi mənə nəsib olmuşdu. Anar Rzayev DANX rəhbəri olanda müsahibə zamanı özünün rəhbərlik etdiyi qurumda qardaşına məxsus şirkətin fəaliyyətinə şərait yaradıldığını da etiraf etmişdi. Bu barədə səhv etmirəmsə brifinqlərin birində açıqlaması da olmuşdu. AYNA rəhbəri olaraq bizi yollarda sıxan müəllimin yalnız foto əksini görə bilirik. Suallar isə açıq olaraq qalır.
Cənab Rzayev, AYNAda əksiniz yaxşı görünür. Olduğunuz kimi görünürsüz.
Tural Müseyibov
ajans.az
Bakıda Hollivud filmlərinin süjetini geridə qoyan hadisə baş verib. Üst-üstə iki dəfə dələduzluğa məruz qaldığını iddia edən şəxs redaksiyamıza müraciət edib.
Oxu.Az-a danışan şikayətçi Asəf İlqar oğlu Ramazanov qeyd edib ki, əvvəlcə kriptovalyuta birjası kimi tanınan "Azebirja" şirkəti tərəfindən aldadılıb.
O, şikayətini belə izah edib:
"2024-cü ilin iyul ayından etibarən "Azebirja" adlı şirkətə kreditor kimi 128 min manat yatırım etmişəm. Həmin şirkətin rəhbəri Ali Aksun mənə gündəlik 512 manat yatırım faizi ödəməli idi. Lakin oktyabr ayının 24-ü kütləvi şikayət olduğuna görə Azərbaycan Respublikasının Baş Prokuroru yanında Korrupsiyaya qarşı Mübarizə Baş İdarəsi tərəfindən Ali Aksun saxlanıldı, ona möhlət verildi ki, dekabrın sonuna qədər şikayətçilərin pulunu ödəsin. Ancaq həmin şəxs daha sonra, dekabrın 15-də evində müəmmalı şəkildə ölü tapıldı.
Hadisənin bir az əvvəlinə qayıdaq, çünki başqa bir dələduz tərəfindən aldanılmışam. Sözügedən "Azebirja" adlı şirkətin pulumu ödəmədiyini görəndə problemin həll edilməsi üçün sosial şəbəkə vasitəsilə vəkil axtardım. Qarşıma Səbiyyə İlham qızı Panəliyevaya aid olan səhifə çıxdı. Özünü vəkil kimi təqdim edən Səbiyyə Panəliyeva ilə əlaqə saxladım. O mənə dedi ki, şirkət sahibi ölkədən çıxmamış tez işə başlamalıyıq. Mən də ona güvəndim. Aramızda çoxsaylı "WhatsApp" yazışmaları mövcuddur. Etibarımdan sui-istifadə edərək cəmi iki gün müddətində məndən xidmət haqqı olaraq ümumilikdə 12 min 96 manat aldı. Sentyabr ayının əvvəlində həmin vəkilə müraciət etmişdim. İki gün sonra mən həmin şəxsdən bağlanılmış müqavilələrin fotosunu istədim. Müqavilələrin və iş vəsiqəsinin fotosunu atmayanda bildim ki, növbəti dələduzluğa məruz qalmışam".
Şikayətçi əlavə edib ki, Səbiyyə Panəliyevanın sonradan bir neçə şəxsi də bu formada aldatdığını və pullarını mənimsədiyini öyrənib:
"Hətta bizim S.Panəliyeva tərəfindən zərərçəkənlər kimi 12 nəfərlik "WhatsApp" qrupumuz var. Ən çox da mənim vəsaitim mənimsənilib. Sonuncu dəfə həmin xanıma yazanda mənə bildirdi ki, get, hara şikayət edirsən et, mən heç kimdən qorxmuram.
Həmin vəsaiti bankdan kredit götürərək bu şəxsə vermişəm. Hər gün həmin vəsaitin üzərinə faiz gəlir. Ailəmizdə maddi və mənəvi durumumuz çox ağırdır".
A.Ramazanov qeyd edib ki, məsələ ilə bağlı əvvəlcə Daxili İşlər Nazirliyinin "102" Çağrı Mərkəzinə şikayət edib:
"İşə ilk olaraq Bakı şəhəri, Suraxanı Rayon Polis İdarəsinin 30-cu Polis Şöbəsində baxılıb, sonra isə istintaqa yönəldilib. Məndən izahat alınıb. Bu şəxs hər gün müxtəlif insanları dələduzluq yolu ilə aldadır. Amma şikayətimdən yeddi ay keçməsinə baxmayaraq, S.Panəliyevaya cinayət işi açılmayıb".
Məsələ ilə bağlı adı hallanan Səbiyyə Panəliyevanın mövqeyini öyrənmək üçün özü ilə əlaqə saxladıq.
O, Oxu.Az-a açıqlamasında iddiaları təkzib etmədiyini bildirib, lakin bu məsələlərin özünə bağlı olmadığını deyib:
"Mən özüm də bu məsələ ilə bağlı zərərçəkən tərəfəm. İş artıq məhkəmədədir. Altı min manat Asəfdən, digər altı min manatı isə onun dostundan almışam. Həmin pulu Məhəmməd Akif oğlu İsgəndərova vermişəm. Həmin oğlan oktyabrın 2-də həbs edilib, indi Kürdəxanı cəzaçəkmə müəssisəsindədir. Məhəmməd İsgəndərov əvvəl mənim nişanlım olub. Mən onunla vətəndaş işləri görürdüm və çox güvənirdim. Sən demə, mənim özümü də aldadırmış. İntihara qədər cəhd etdim.
270 min manatı şikayətçi vətəndaşlara özüm qaytardım ki, təki sakitlik olsun. Asəflə də bu yaxınlarda dedim ki, mart ayının axırına qədər məni gözlə, pulu tam formada sənə ödəyəcəyəm. O Məhəmməd mənim evimi yıxdı. Oğlan məndən başqa 10 nəfəri də aldadıb. İyun ayının 19-u nikah bağlamalı idik. Amma dələduz olduğunu görəndən sonra imtina etdim".
Qeyd edək ki, Azərbaycan Vəkillər Kollegiyası (VK) vətəndaşlara özünü vəkil kimi təqdim edərək pul aldığı iddia edilən şəxslə bağlı yayılan məlumatlara münasibət bildirib. Barəsində şikayət olunan Səbiyyə İlham qızı Panəliyevanın Kollegiyanın üzvü olmadığı qeyd olunub.
Sözügedən məsələni Səbiyyə Panəliyevadan soruşduqda məlumatı təsdiqlədi:
"Bəli, Vəkillər Kollegiyasının üzvü deyiləm. Sadəcə, rəsmi sənədlərlə Beynəlxalq Hüquq Mərkəzinin hüquqşünasıyam".
Daxili İşlər Nazirliyinin (DİN) Mətbuat Xidmətinin baş inspektoru polis leytenantı Lumu İsrəfilli məsələ ilə bağlı Oxu.Az-ın sorğusuna cavab olaraq bildirib ki, vətəndaş Səbiyyə Panəliyeva tərəfindən bir neçə şəxsin hüquqazidd hərəkətlərə məruz qalması barədə ayrı-ayrı rayon polis orqanlarında müraciətlər var:
"Həmin müraciətlər əsasında araşdırmalar aparılır".
Son aylarda praktik tibb fəaliyyəti ilə məşğul olan plastik cərrahların peşə fəaliyyətinin qanuni əsasları ilə bağlı mediada ziddiyyətli məlumatlar yayıldıqdan sonra Azərbaycan Respublikasının Səhiyyə Nazirliyi və Baş Prokurorluq tərəfindən araşdırmalara başlanıldı.
Bununla bağlı 2024-cü ilin dekabr ayında Səhiyyə Nazirliyi plastik cərrahların peşə fəaliyyətinin qanuni əsaslarının yoxlanılması məqsədilə Xüsusi Təftiş Komissiyası yaratdı və onlardan 2025-ci il 31 yanvar tarixinədək müvafiq sənədləri təqdim etmələrini tələb etdi. Bu yoxlamalar nəticəsində 2025-ci ilin fevral ayında bir neçə plastik cərrahın sertifikasiya şəhadətnamələri ləğv edildi.
Proses hələ davam etsə də, tələblərə cavab verməyən bəzilərinin bu sektordan çıxarılması həm cərrahların, həm də klinikaların fəaliyyətinə ciddi təsir göstərir. Belə ki, yoxlamalar və cəzalar səbəbindən artıq bu sahədə fəaliyyət göstərənlərin sayı azalıb. Məlumata görə, bunun nəticəsində isə plastik və estetik xidmətlərin qiymətləri əhəmiyyətli dərəcədə bahalaşıb.
Dərman və tibbi vasitələrin qiyməti stabil qalsa da, kosmetoloqlar, plastik cərrahlar öz xidmət haqlarını artırıblar. Bunun əsas səbəbi isə sektorda daha az sayda mütəxəssisin qalması və onların “mən saxta deyiləm” mesajı vermək istəməsidir.
“Cebheinfo.az” plastik cərrah və kosmetoloqlarla əlaqə saxlayaraq məsələyə münasibət öyrənmək istəsə də, 3 məşhur mütəxəssis sualı cavablandırmaqdan imtina edib. Adının açıqlanmasını istəməyən tanınmış estetik doktor isə bildirib ki, proses hələ tam yekunlaşmayıb və vəziyyətin necə olacağı yaxın günlərdə daha aydın görünəcək. Onun sözlərinə görə, qiymətlərin artması ilə bağlı yayılan məlumatlarda bir məntiq var:
"Hələ dəqiq bilinmir ki, kimlər qalacaq, kimlər gedəcək. Rəsmi siyahı açıqlanmayıb, yoxlamalar davam edir. Ancaq məntiqi baxımdan qiymət artımı mümkündür. Kimlərin sektorda qalacağı məsələsi də yaxın günlərdə bilinəcək.
Bəzi sənədsiz olanlar var ki, işi daha yaxşı görür, amma sənədi olan bəzi mütəxəssislər eyni nəticəni əldə edə bilmirlər. Qiymətlərin artması ilə bağlı yayılan xəbərlərdə müəyyən qədər həqiqət ola bilər. Bu tendensiya önümüzdəki günlərdə və aylarda daha aydın görünəcək”.
“AzerTelecom” şirkətinin Direktorlar şurasının sabiq sədri, “Ailə TV”, “Caspian Telecom” MMC şirkətlərinin təsisçisi Fuad Allahverdiyevə hökm oxunub.
TEREF “qafqazinfo.az”a istinadən xəbər verir ki, məşhur iş adamı Cinayət Məcəlləsinin 133 və 151-ci (Əzab vermə və seksual xarakterli hərəkətlərə məcbur etmə) maddələri üzrə ittiham edilərək həbs olunub.
Xəzər Rayon Məhkəməsində keçirilən prosesdə bildirilib ki, iş üzrə zərərçəkmiş şəxs F. Allahverdiyevin keçmiş həyat yoldaşı G. Allahverdiyevadır.
Əvvəllər “Azərreyl” voleybol klubunun üzvü olmuş G. Allahverdiyeva bildirib ki, 2022-ci ilədək evli olduğu Fuad ona qarşı mütəmadi fiziki zorakılıq edib, müxtəlif qadınlarla birgə seksual xarakterli hərəkətlər etməyə vadar edib. O iddia edib ki, keçmiş əri yaşadıqları Şüvəlan qəsəbəsindəki villada çoxsaylı məclislər təşkil edib, həmin məclislərə rəqqasələr və sevgi münasibətində olduğu qadınları da dəvət edib.
F. Allahverdiyev isə G. Allahverdiyevanın əxlaqsız həyat tərzi sürdüyünü, ona böhtan atdığını deyib. Daha sonra keçmiş arvadının ondan 400 min manat oğurladığını iddia edib.
Xəzər Rayon Məhkəməsinin hökmü ilə Fuad Allahverdiyevə 133-cü (əzab vermə) maddəsi üzrə 2 il azadlığın məhdudlaşdırılması cəzası verilib.
Məhkəmə ona Cinayət Məcəlləsinin 151-ci (seksual xarakterli hərəkətlərə məcbur etmə) maddəsi üzrə bəraət verib. İş adamının həbsdə saxlanıldığı 10 ay 18 gün müddət cəzadan çıxılıb və onun üzərində qəti olaraq 2 ay 24 gün müddətə azadlığın məhdudlaşdırılması cəzası saxlanılıb.
Üzərinə elektron qolbaq taxılan məşhur biznesmen məhkəmə zalından sərbəst buraxılıb.
Bir aydan çoxdur “Elektron məhkəmə” informasiya sistemi ilə bağlı yeni məhdudiyyətlər tətbiq edilib.
Musavat.com xəbər verir ki, hazırda sistemdə məhkəmə işləri üzrə tərəflərin adları göstərilmir.
Bu isə şəffaflığın pozulması ilə yanaşı, sistemdən mütəmadi istifadə edənlərin işini çətinləşdirir.
Məlumatların açıq olmaması səbəbindən media nümayəndələri məhkəmə işlərinin araşdırılması və ictimaiyyətə dəqiq məlumat çatdırılması istiqamətində ciddi maneələrlə üzləşirlər.
Problemin həlli məqsədilə bir qrup jurnalist Məhkəmə-Hüquq Şurasının sədri İnam Kərimova müraciət ünvanlayıblar.
Müraciətdə qeyd olunur ki, “Elektron məhkəmə” sistemi məhkəmə proseslərinin daha şəffaf və əlçatan olması üçün yaradılıb. Lakin hazırkı məhdudiyyətlər ictimai maraq doğuran işlərə dair məlumatların əldə edilməsinə əngəl yaradır.
Jurnalistlər məhkəmə sistemindəki islahatlar və müsbət dəyişikliklər fonunda bu kimi problemin yaranmasını düzgün hesab etmir, tezliklə həllini arzulayırlar.
Musavat.com-un əməkdaşı, jurnalist İlkin Muradov uzun illərdir məhkəmə proseslərini işıqlandırır.
EMS-də son məhdudiyyətlər onun da fəaliyyətinə təsir edir. Jurnalist artıq günün böyük hissəsini Bakı Ağır Cinayətlər Məhkəməsində keçirir. Amma bununla o, yalnız bir məhkəmədəki işlərdən məlumat toplayıb təqdim edə bilir.
İlkin Muradov deyir ki, Dünya Bankının maliyyəsi ilə yaradılmış elektron sistemin ictimaiyyət üçün yalnız adı qalıb:
“XXI əsrdə biz irəli getməkdən geri gedirik? Bu sistem yaradılarkən əsas məqsəd sistemin hər kəsə açıq olması, şəffaflığın daha da artırılması idi. Bir çox hallarda məhkəmə bildirişləri ünvana gec gəlib çatır. Belə olan halda “Elektron məhkəmə” sistemi önəmli rol oynayırdı. Jurnalistlər məhkəmə proseslərinin vaxtı və məkanı haqda məlumat əldə edə bilirdi. İndi bu, mümkünsüz olub.
Məhdudiyyətin səbəbi kimi xüsusilə komersiya işləri ilə bağlı şirkətlərin şikayətlərini göstərirlər. Amma bu, əsas deyil. Bəzən də ayrı-ayrı şəxslər, xüsusilə də vəzifəli şəxslər məhkəmələrdə adlarının keçməsinin mətbuata çıxmasından narazı qalaraq şikayətlər edirlər.
Belə çıxır ki, hansısa şirkətin, vəzifəli şəxsin mənafeyi bütün cəmiyyətin mənafeyindən üstün tutulmamalıdır. Bu, mənim fikrimdir. Çünki “Elektron məhkəmə” sistemindən istifadəyə mədudiyyətin yaradılmasını izah etmək üçün başqa səbəb görmürəm.
Düşünürəm ki, məhkəmə şəffaflığı istiqamətində addımlar atmağa çalışıldığı bir məqamda bu qadağanın gətirilməsinin izahı ola bilməz”.
Tanınmış vəkil Cavad Cavadovun sözlərinə görə, “Elektron məhkəmə” sistemi hələ mövcud olmadığı vaxtlarda və hətta SSRİ dövründə belə məhkəmədə baxılan işlərin həftəlik siyahısı məhkəmələrin önünə hər kəsin görə biləcəyi lövhəyə vurulurdu:
“Diqqət yetirsək görərik ki, Cinayət Prosessual Məcəlləsinin 384.3 və 393.2. maddəsində elanlar lövhəsi anlayışı hələ də qalıb, harda ki, baxılan işlərlə bağlı məlumatlar, hətta nəticələr yerləşdirilməsi nəzərdə tutulub.
“Elektron məhkəmə” sisteminin yaranmasının səbəbi ədalət mühakiməsinə əlçatanlığın, şəffaflığın artırılmasına və ümumilikdə bu məlumatların internet vasitəsi ilə əldə edilməsinin asanlaşdırılmasına yönəlib.
Azərbaycan Respublikasının Konstitusiyasında da deyilir ki, məhkəmə iclasları açıq keçirilir, qapalı keçirilən iclaslar üçün məhdud əsaslar nəzərdə tutulub. Bu prinsip həmçinin Mülki Prosessual və Cinayət Prosessual Məcəlləsində də öz əksini tapıb.
Son dövrlər məlumatların bir-bir bu sistemdən yığışdırılması, son nəticədə isə baxılan işlərlə bağlı məlumatların çıxarılması təəssüf doğurur”.
Mövzu ilə bağlı aidiyyəti qurumların hansı addımlar atacağı hələlik məlum deyil. Məsələnin nə dərəcədə həll ediləcəyini isə qarşıdakı günlər göstərəcək.
Qeyd edək ki, məhkəmə jurnalistləri yaranmış vəziyyətlə bağlı Ali Məhkəmənin sədri İnam Kərimova müraciət hazırlayıblar.
Elşən Məmmədəliyev
Musavat.com
“Azərsu” ASC-nin keçirdiyi tender müsabiqəsinin qalibləri müəyyən olub.
DogruXeber.az: - Rəsmi mənbələr xəbər verir ki, qalib şirkətlər “Arko Təmir Tikinti Şirkəti” MMC və “Maqro Construction MMC-nin Azərbaycan Respublikasındaki filialı və AKM Yapı Taahhüt Sanayti ve Ticaret Şirketi” Birgə Müəssisəsi olub.
Belə ki, açıqlanan məlumatda “Azərsu” ASC Bakı şəhəri üzrə su təchizatı və kanalizasiya sisteminin bir hissəsinin yenidən qurulması işlərinin satın alınması xidmətinə görə “Arko Təmir Tikinti Şirkəti” MMC-yə 511 milyon 505 min 76 manat ödəyəcəyi qeyd olunub.
“Maqro Construction MMC-nin Azərbaycan Respublikasındaki filialı və AKM Yapı Taahhüt Sanayti ve Ticaret Şirketi” Birgə Müəssisəsi isə Gəncə şəhərinin su təchizatı və kanalizasiya sisteminin yenidən qurulması işlərinin satın alınmasına görə “Azərsu” ASC-dən 4 milyard 947 milyon 605 min 986 manat alacağı bildirilib.
Qeyd edək ki, 10 manat nizamnamə kapitalı olan “Arko Təmir Tikinti Şirkəti” MMC-nin qanuni təmsilçisi Əhmədov Rasim Qazməmməd oğludur. Şirkət 25 fevral 2011-ci ildə təsis edilib.
“Maqro Construction MMC-nin Azərbaycan Respublikasındaki filialı və AKM Yapı Taahhüt Sanayti ve Ticaret Şirketi” Birgə Müəssisəsi isə 7 may 2021-ci ildə dövlət qeydiyyatına alınıb. Şirkətin qanuni təmsilçisi Emrah Ucardı.
"DogruXeber.az" bildirir ki, bu xəbər 2022-ci ilin avqust ayının 6-da yayımlanıb.
Həmin dövrdə "Azərsu" ASC-nə mərhum Köçərli Həsənov müvəqqəti rəhbərlik edirdi.
İndi haqq dünyasındadır deyə rəhmətliyin dövlət qurumunu necə yağmaladığı barəsindəki məlumatlara geniş yer ayırmırıq.
Təbii ki, onun bu qədər talanı təkbaşına etməsi mümkün deyildi. Özü də elə bir ərəfədə ki, qurumun Zaur Mikayılovun tabeliyinə verilməsi üzərində işlər aparılırdı.
Beləliklə, bir neçə ay sonra (2023) bu qurum Dövlət Su Ehtiyatları Agentliyinin tabeliyinə verildi və bundan sonra İri Şəhərlərin Birləşmiş Su Təchizatı Xidməti adlandırıldı.
Əlqərəz...
Yuxarıda, Gəncə şəhərinin su təchizatının yenilənməsi üçün xərclənməsi nəzərdə tutulan məbləği gördünüz.
Rəsmi xəbərlərdə qeyd olunur ki, "Gəncə şəhər Sukanal İdarəsinin rəisi Şöhrəddin Verdiyevin sözlərinə görə, şəhərdə bu il ərzində 12 min metr içməli su, 10 min metr kanalizasiya xətti çəkilib: “Həmçinin 1 500 ədəd su sayğacının quraşdırılması nəzərdə tutulub. Hazırda işlər yekunlaşmaq üzrədir. 47 % su xətti, 44 % kanalizasiya xətti çəkilib. Gəncə şəhərinin 71 500 abonentinin 40 mini dayanıqlı içməli su ilə təmin olunur”."
Gəncə sakinləri isə bildirir ki, buvaxta qədər şəhərin cəmi 3-4 mərkəzi küçələrində su təchizatı yenilənib vəssalam. Yəni, görülən işlər rəsmi xəbərlərdə həddindən ziyadə şişirdilmiş formada yayımlanıb.
Etibarlı mənbədən redaksiyamıza verilən məlumata görə, hətta cəmi 3-4 küçədə yenilənən su boruları nəzərdə tutulduğundan ucuz qiymətə satılan materialdandır və diametri də nəzərdə tutulduğundan nisbətən kiçik istifadə olunub ki, bu da yeyinti metodlarından biridir.
Yeri gəlmişkən, onu da qeyd edək ki, bu ilin yanvar ayının 23-də Azərbaycan və Avropa Yenidənqurma və İnkişaf Bankı (EBRD) arasında “Gəncə şəhərinin su təchizatı və kanalizasiya sisteminin yenidən qurulması üçün kredit Sazişi” imzalandı.
İmzalanma Davosda Azərbaycan Prezidenti İlham Əliyevin EBRD-nin prezidenti Odile Reno-Basso ilə keçirdiyi görüş çərçivəsində baş tutdu.
Belə olan halda sual yaranır: bəs 4 milyard 947 milyon 605 min 986 manatın aqibəti necə oldu ki, bu işlər üçün bir də ölkə xaricdən kredit almaq məcburiyyətində qaldı?
Ümumiyyətlə, DSEA-nin sədri Zaur Mikayılov təhvil aldığı külli miqdarda məbləğdən bəhs edən bu işləri hansı formada təhvil alıb, necə icra edib?
Təbii ki, mövcud məsələdə Gəncə şəhər icra hakimiyyətinin başçısı Niyazi Bayramov və Su kanal İdarəsinin rəisi Şöhrəddin Verdiyevin də rolu böyükdür.
Eləcə də Bakı şəhər icra hakimiyyətinin başçısı Eldar Əzizov və DSEA sədri Zaur Mikayılov 5.4 milyard manatın "taleyini yazan" və cavabdehlik daşıyan şəxslərdirlər.
Üstəlik İri Şəhərlərin Birləşmiş Su Təchizatı Xidmətinin kütləvi ixtisarlar aparmasına və digər tədbirlər görməsinə rəğmən ötən ili yüksək məbləğdə zərərlə başa vurduğu barəsində də rəsmi məlumat dərc olunub.
Paytaxtın, Binəqədi rayonunda iki küçədə, Xətai rayonunda 8 noyabr prospektində və Səbayıl rayonunda - Bibiheybət ərazisində bir küçədə yenilənən su təchizatının yenilənməsinə 5,4 milyar manat vəsait xərclənməsi absurddur.
2022-ci ildən bugünə qədər Bakı və Gəncənin su təchizatının yenilənməsinə ümumilikdə təqribən 10 milyard manat xərclənməsi məsələsi əsaslı şübhə doğurur. Düşünürük ki, aidiyyatı qurumların bu məsələni ciddi şəkildə araşdırmaları mütləqdir.
Xatırladaq ki, DSEA-nin tabeliyində olan Su kanal idarələrinin də ayrı-ayrılıqda mütəmadi olaraq keçirdikləri tenderlər, icarəyə verilən idarə texnikaları və sair barəsində qurum rəhbəri Zaur Mikayılov xəbərdardır və bu barədəki məlumatlara, şikayətlərə ümumiyyətlə məhəl qoymur, qanun pozuntusuna yol verən şəxslərə "gözün üstə qaşın var" demir. Bu da belə düşünməyə əsas verir ki, Zaur Mikayılov özü də bu qanun pozuntularından "məmnundur".
Bəs Eldar Əzizov ilə Niyazı Bayramov bu işin harasındadır? Bu barədə növbəti yazıda ətraflı bəhs edəcəyik.
Hər iki müəmmalı tender barəsində əlavə məlumatlarımız olacaq.
Redaksiamız hər kəsin söz haqqını tanıyır.
DogruXeber.az
Mərkəzi Aran Reqional Təhsil İdarəsinin Ucar rayon Təhsil sektorunun müdiri Rahib Burcəliyev cəzalandırılıb.
Musavat.com unikal.az-a istinadən xəbər verir ki, sektor müdirinə Təhsil İdarəsi tərəfindən şiddətli töhmət verilib.
Bundan başqa, Ucar rayonu Rəstəcə kənd tam orta məktəbinin direktoru Rahib Rəsulova da eyni cəza verilib.
Buna səbəb bir müddət öncə məktəbdə 9-cu sinif şagirdinin sinif yoldaşını bıçaqlaması olub.
“3 il ərzində bir neçə dəfə müsahibələrimdə, paylaşımlarımda Fuad Nağıyevin etdikləri ilə mübarizə aparırdım, sadəcə, ad çəkmirdim. Amma Dövlət Turizm Agentliyi deyiləndə onun sədri, müavini, oradakı funksionerlər nəzərdə tutulurdu”.
Bu sözləri Globalinfo.az-a Azərbaycan Milli Kulinariya Assosiasiyasının sədri Tahir Əmiraslanov Dövlət Turizm Agentliyinin sədri Fuad Nağıyevin məhz vəzifədən azad olunmasından sonra onunla bağlı danışmasına aydınlıq gətirərkən deyib.
O, bəzi məsələlərin hər zaman gizli qalacağını bildirib:
“Bəlkə də, deyilməyən sözlər bir neçə ilə açıqlana, ya açıqlanmaya. Çünki bunlar 3 ildə Azərbaycan mətbəxini dünyada elə çökdürdülər ki, bundan sonra onu yerinə qaytarmaq üçün bizə 30 il lazımdır. Ermənistana elə rövnəq verdilər ki, ermənilər artıq Dünya Kulinariya təşkilatlarına getməyə başladılar, yarışa qatılıb, medal əldə etdilər. Mart ayında işdən çıxdım, artıq dekabrda Ermənistanın rəsmi saytına bizim 250 xörəyimiz yerləşdirildi. Onlar bunu dünyaya çıxardılar. Ötən il 31 oktyabrda Nikol Paşinyan çıxışı zamanı böyük proyektlərindən danışdı. Çünki qarşılarında daha işləri müdafiə edən qurum yox idi”.
T.Əmiraslanov qurumda külli miqdarda yeyintinin olduğunu qeyd edib:
“Baxın, bir il ərzindən büdcədən 2.9 milyon manat pul siliblər. 200 kv metrlik yerdə 17 adam əyləşir, ora isə 400 kv metrlik evin pulunu yazıblar. Guya təmir ediblər və s. Təsəvvür edin, balaca bir yer üçün 2 restoranın mətbəx avadanlığının pulunu siliblər. Ofisdə mətbəx avadanlığı nə gəzir?! Tahir Əmiraslanovu ordan uzaqlaşdırmaq həm rahat pul yemək üçün idi, həm də digər məsələlər var. Bunların 1 ildə Axərbaycan mətbəxi üçün “xərclədikləri” 2.9 milyon pul Milli Kulinariya Mərkəzinin 15 illik büdcəsinin puludur”.
Tahir Əmiraslanov ona qarşı olan münasibətə toxunub:
“Mən elə pozisiyada idim ki, mənimlə büdcənin talanması mümkün deyildi. Bu məsələdə kimə xeyir oldu? Ermənilərə! Deməli, burda onların əli var. Ermənilərin bizim təbliğat mexanizmimizi dağıtmaq planı onların (Dövlət Turizm Agentliyi -red.) əli ilə baş verdi. Agentlik yaranan gündən festivalların keçirilməsi qadağan edildi, təbliğatın qarşısı alındı. Məni 2 ayda işə götürüb, işdən çıxardılar. Bir çox tədbirlərə də buraxılmırdım. Hətta ordan çıxdıqdan sonra mənimlə düşmənçilik etdilər və bu günə qədər də bu, davam edir. Düşünün, 4 milyon pulu yeyiblər, kitab çap etdirməyə 17 min manat tapılmadı. Başladılar təzyiq etməyə”.