 |
|
|
Azərbaycan Respublikasının Prezidentinə
Cənab İlham Əliyevə
Müraciət edən:
Mirzəyeva Gülgəz Əlbənd qızı,
Kəlbəcər rayonundan məcburi köçkün.
MÜRACİƏT
Hörmətli cənab Prezident,
Mən, məcburi köçkün Mirzəyeva Gülgəz Əlbənd qızı, Sizə böyük ümidlə, bir ana qəlbi ilə müraciət edirəm. Sizin daim ədalətə və insanlıq dəyərlərinə verdiyiniz önəmi bilə-bilə bu məktubu yazıram. Çünki Siz hər zaman xalqın Prezidenti olmuş, onun dərdinə şərik çıxmış, çətin vəziyyətdə olan vətəndaşlarını heç vaxt unutmamısınız.
Oğlum Əliyev Tural Vahid oğlu, ömrünü dövlətinə və xalqına xidmətə həsr etmiş, jurnalist kimi həmişə haqqın, ədalətin, həqiqətin yanında durmuş bir insandır. O, sözünü yalnız həqiqətə dayandırmış, cəmiyyətin və dövlətin maraqlarını qorumağa çalışmışdır. Lakin bu gün həyat onu çox ağır bir sınağa çəkib. Oğlum hazırda məhkum olunub və həbsxanada ağır günlər yaşayır.
Bir ana üçün övladının həsrətini çəkmək dünyanın ən ağır dərdidir. Bir ananın ürəyi, gözü həmişə övladının yolunda olar. Mən bu illər ərzində çox acılar görmüşəm – torpağımdan didərgin düşmüşəm, yurd həsrəti ilə yaşamışam. Amma bu gün çəkdiyim ən ağır dərd övlad həsrətidir. Hər gün, hər gecə ürəyimdə bir nisgil, bir ümidsizlik var. Onun məhkum həyatı yaşaması, azadlığını itirməsi mənim üçün ağır bir yükdür. Üstəlik, onun azyaşlı bir övladı var. O uşaq atasının yolunu gözləyir, onun qayğısına, sevgisinə möhtacdır.
Cənab Prezident, Sizin ədalətli və mərhəmətli bir rəhbər olduğunuzu hər zaman bilmişik. Siz də bir ailə başçısısınız, bir ata kimi bilirsiniz ki, övladının atasız böyüməsi nə qədər çətindir. Mən Sizin humanistliyinizə güvənərək bu məktubu yazıram və yalvarıram – oğlumu əfv edin. O, səhv etmişsə belə, gəncdir, öz səhvini anlamağa, cəmiyyətə yenidən faydalı bir vətəndaş kimi qayıtmağa hazırdır.
Siz həmişə xalqın, xüsusilə də məcburi köçkünlərin yanında olmusunuz. Biz məcburi köçkünlər üçün etdiyiniz hər bir iş üçün minnətdarıq. İndi isə mənim kimi bir məcburi köçkün anasının dərdinə şərik çıxmağınızı xahiş edirəm. Oğlumun azadlığına qovuşması üçün Sizdən mərhəmət istəyirəm.
Cənab Prezident, Sizin ədalətinizə və böyüklüyünüzə güvənərək, bir ana kimi ümid edirəm ki, bu müraciətimə biganə qalmayacaqsınız. Əfv qərarınızı ən böyük minnətdarlıq və dualarla qarşılayacağıq.
Dərin hörmət və ümidlə,
Mirzəyeva Gülgəz Əlbənd qızı
TEREF
Ölkənin iqtisadi inkişafına birbaşa təsir göstərən amillərdən biri də bazarda rəqabət mühitinin səviyyəsidir.
Kommunal xidmətlər və nəqliyyatın müxtəlif sektorlarında fəaliyyət göstərən bir sıra şirkətlər faktiki olaraq monopolist mövqedədir. Bu şirkətlərin bazardakı dominantlığı iqtisadi inkişafa mənfi təsir göstərir. Onların özəlləşdirilməsi ilə bağlı müxtəlif mülahizələr və fikirlər səslənsə də, praktik addımlar atılmır.
Həmin şirkət və qurumlar rəqabətsiz mühitdə fəaliyyət göstərdiyindən, xidmət keyfiyyətini artırmaq üçün heç bir təzyiq hiss etmirlər. Bununla da idarəetmədəki problemlər və innovasiyalara marağın olmaması xidmətlərin keyfiyyətinin aşağı düşməsinə, istehlakçıların əziyyət çəkməsinə səbəb olur.
Xüsusilə də tez-tez təmir adı altında kommunal xidmətlərin göstərilməsində yaranan fasilələr, nəqliyyat sistemində olan yüksək qiymət və aşağı xidmət məhz bazarda ciddi rəqabətin olmamasının verdiyi rahatlığın vəətndaşa yox, həmin qurumlara yaratdığı fürsətdir.
Bu isə eyni zamanda qiymət siyasətinə də təsir edir. Alternativ olmadığından, istehlakçılar yüksək qiymətə aşağı keyfiyyətli xidmət almağa məcbur qalırlar. Məsələn, elektrik enerjisi, qaz, su təchizatı və nəqliyyatın müxtəlif sahələrində olan xidmətlər keyfiyyət problemləri, tariflərin baha olması əhalinin sosial rifahına mənfi təsir göstərir.
Bu fonda monopolist dövlət şirkətləri çox vaxt zərərlə işlədiyini açıqlayaraq büdcədən böyük həcmdə subsidiya və maliyyə yardımı alır. Bu, həm də dövlətin maliyyə yükünü artırır və digər prioritet sahələrə ayrılmalı olan vəsaitin səmərəsiz istifadəsinə gətirib çıxarır. Həmçinin, korrupsiya riski yüksək olur və qeyri-şəffaf idarəetmə iqtisadi inkişafı ləngidir.
Rəqabət mühiti olmadığı üçün monopolist şirkətlər texnoloji yeniliklərə investisiya qoymağa maraqlı olmur. Bu isə sektorun inkişafını ləngidir və ölkənin beynəlxalq bazardakı rəqabət qabiliyyətini zəiflədir. Qüvvədə olan Rəqabət Məcəlləsi bazarda tək olduqlarından həmin şirkətlərə tətbiq oluna bilmir.
Zaman-zaman kommunal xidmətlər və nəqliyyatın müxtəlif sektorlarında fəaliyyət göstərən şirkətlərin özəlləşdirilməsi məsələsi gündəmə gəlib, bunun müəyyən üstünlüklər və yeni imkanlar yarada biləcəyi deyilib. Belə ki, özəl şirkətlər bazara daxil olduqda, xidmətlərdə keyfiyyətin artması qaçılmaz olacaq.
Çünki rəqib şirkətlər müştəri qazanmaq üçün daha yaxşı xidmət təqdim etməyə çalışacaq. Bir çox ölkələrdə elektrik enerjisi və nəqliyyat xidmətlərinin özəlləşdirilməsi bu sahələrdə keyfiyyətin yüksəlməsinə səbəb olub. Özəlləşdirilmiş şirkətlərin dövlət büdcəsindən maliyyə almaması ilə dövlət vəsaitinə qənaət edilir və bu vəsait təhsil, səhiyyə, digər vacib infrastrukturlara yönəldilir.
Özəlləşdirilən şirkətlər eyni zamanda, xarici və yerli investorlar üçün də cəlbedici ola bilər. Bu isə əlavə kapital axını yaradaraq iqtisadi inkişafı sürətləndirir. Çünki özəl şirkətlər bazarda öz yerini qorumaq üçün daim istehlakçıları və xidmət göstərdiyi sektorun istifadəçilərini nəzərə alımağa məcburdur. Təbii ki, böyük şirkətlərin özəlləşməsi zamanı müəyyən risklər də nəzərə alınmalıdır.
Bu riskləri belə sistemləşdirmək olar:
*Qiymətlərin artma ehtimalı - Bəzi hallarda daha çox qazanc əldə etmək üçün xidmətlərin qiyməti artıra bilər. Əgər qiymətə nəzarət paketi tamamilə həmin şirkətin öz səlahiyyətinə verilərsə, istehlakçılar üçün əlavə yük yarana bilər.
*İş yerlərinin azalması – Özəlləşdirilmiş şirkətlər səmərəliliyi artırmaq üçün işçi sayını azalda bilər. Bu da işsizliyin artmasına əsas yarada bilər.
*Strateji sahələrin idarəetməsində çətinliklər – Su, enerji və nəqliyyat kimi mühüm sahələrin tam özəlləşdirilməsi dövlətin bu sahələrə nəzarət imkanlarını zəiflədə bilər.
Buna görə də tam olaraq özəlləşdirilmə üçün keçid müddəti və strateji planlama tətbiq olunmalıdır. Paralel fəaliyyət, yəni nəzarət paketinin müəyyən qisminin dövlətdə qalması mexanizmi daha cəlbedici görünür.
Çünki yuxarıda qeyd etdiyimiz kimi, nəzarət imkanlarının tam olaraq verilməsi əlavə problemlərə yol aça bilər. Bu proses tənzimləyici qurumların ciddi nəzarəti altında aparılmalı, qiymət artımı və işsizlik riskləri nəzərə alınmalıdır. Yalnız balanslaşdırılmış və şəffaf özəlləşdirmə strategiyası iqtisadi inkişaf üçün real fayda verə bilər.
Lakin özəlləşmə olmadan da monopoliyanı aradan qaldırmaq mümkün deyil.
Mövzu ilə bağlı “Cebheinfo.az”-a danışan Respublikaçı Alternativ Partiyasının sədri, iqtisadçı-ekspert Natiq Cəfərli deyib ki, Azərbaycan Respublikasının qanunvericiliyinə görə, inhisarçı bazarın üçdə birindən çoxuna nəzarət edən şirkətlərə deyilir:
“Əgər bir şirkət bazarda 33 faizdən çox paya sahibdirsə, o, inhisarçı sayılır. Ölkəmizdə inhisarçılıqla bağlı qanunvericilik bazası var, belə olan halda inhisar qanunvericiliyi ona qarşı işə düşür. Bu nöqteyi-nəzərdən Azərbaycanda rəsmi olaraq bu qaydaların əhatə dairəsinə dövlət şirkətləri düşür.
Amma qeyri-rəsmi olaraq Azərbaycanda inhisarçı şirkətlər çoxdur. Bir neçə şirkət var ki, Azərbaycanda topdansatış bazarına, ölkəyə ərzaq gətirilməsi və ya daxildə ərzaq istehsalına, onların pərakəndə satış mağazalarına paylanılmasına nəzarət edir.
Bu şirkətlərin bazarda inhisarçı mövqedə olması onların bazarlardakı qiymətlərə diqtə etməsinə imkan və fürsətlər yaradır”.
Samux rayonu, Sərkar kənd sakini Bağırova Aytən Çingiz qızı tərəfindən Hurriyyet.az saytının redaksiyasına şikayət məktubu daxil olub. Saytımız vasitəsilə Elm və Təhsil naziri Emin Əmrullayevə müraciət edən şikayətçinin məktubunu olduğu kimi dərc edirik:
"Cənab Nazir!
Mən, Bağırova Aytən Çingiz qızı, öncə qeyd edim ki, keçən ilin iyul ayında Samux rayon Təhsil Şöbəsinin müdiri Nurlana xanıma işlə bağlı müraciət etmişdim. O, sənədlərimi təqdim etməyimi istədi. Sənədlərimi verən zaman isə bildirdilər ki, iş olan kimi sizə xəbər verəcəyik.
Bir müddət sonra, yəni sentyabr ayında Samux rayonu, Ziyadlı kəndində dayə işi olduğunu öyrəndim. Gedib maraqlandım, niyə çağırılmadığımı öyrənməyə çalışdım. Mənim bu sorğu-sualım müdirin xoşuna gəlmədi. Mənə bildirdilər ki, həmin işi şəhidin qardaşının yoldaşına vermişik.
Bu zaman mən də dedim ki, "şəhidin qızı deyil, yoldaşı deyil, qardaşının yoldaşına iş vermək məcbur idi?" Əlavə etdim ki, mən də şəhid qızıyam. Onlardan daha çətin vəziyyətdə olan insanlar var.
Nurlana xanım isə “yaxşı edib işi ona vermişəm, ürəyim kimə istəyir, ona da verəcəm", - dedi.
Keçən ilin oktyabr ayında Gəncə-Daşkəsən Regional Təhsil İdarəsinin müdiri Anar Qədiməliyevun qəbulunda oldum. Anar müəllim dərhal Nurlana xanımla danışdı, bildirdi ki, "baxçada iş olan kimi şəhid qızını işlə təmin edin".
Noyabr ayında yenidən iş oldu. Amma bu dəfə də Nurlana xanım qərəzli şəkildə məni yox, digər vətəndaşı işlə təmin etdi. Yenidən Nurlana xanımın qəbuluna getdim. Bu dəfə də bildirdi ki, “əcəb edib götürmüşəm, kimi istəyirəm, onu da götürəcəm, hara istəyirsən, kimə istəyirsən get şikayət et. Dedi ki, hətta istəyirsən Prezidentə şikayət et”.
Mən şəhid qızıyam və təcili iş axtarıram. Lakin Samux rayon Təhsil Şöbəsinin müdiri Nurlana xanım mənə qarşı qərəzli yanaşaraq, işlə təmin olunmağıma imkan vermir.
Cənab Nazir!
Mən, Sizdən şəhid qızı kimi xahiş edirəm, bu müraciətimi cavabsız qoymayın, işlə təmin olunmağıma dəstək göstərin”.
Jalə FAMİLQIZI
Redaksiyadan: Yazıda adları çəkilən şəxslərin mövqeyini dərc etməyə hazırıq.
Daşkəsən rayonunda kirayədə yaşayan, keçmiş xüsusi təyinatlı Bağırov Vüsal Aqil oğlu tərəfindən Hurriyyet.az saytına şikayət məktubu daxil olub. O bildirir ki, illərdir nə "kəşfiyyat pulu"nu, nə də medallarını ala bilmir:
“Mən, Bağırov Vüsal Aqil oğlu, hərbçi olmuşam. Hazırda 3-cü qrup əlilliyim var.
2 övladım var. İndiyədək ev və torpaq sahəsi ilə təmin olunmamışam. Halbuki, mənim də haqqımdır.
Üstəlik, bu günə qədər "kəşfiyyat pulumu" da ala bilmirəm. Hara müraciət edəcəyimi bilmirəm. Nazirlikdən imtina cavabı verirlər. Bu qədər haqsızlıq olmaz. Mən də haqqım olanı istəyirəm. Başqaları kimi, ailəmi başıma toplayıb, öz evimdə yaşamaq istəyirəm. Çox təəssüf ki, post-müharibə dövründə artıq döyüşən adamlara qarşı biganəlik mövcuddur".
Jalə FAMİLQIZI
Redakiyadan: Yazıda adı çəkilən qurumun mövqeyini dərc etməyə hazırıq.
Energetika Nazirliyi yanında Bərpa Olunan Enerji Mənbələri Dövlət Agentliyi fiziki şəxs Həsənzadə Rəşad Elxan oğlu (VÖEN – 1007616502) ilə satınalma müqaviləsi imzalayıb.
XALQ.AZ açıqlanan rəsmi məlumata istinadən bildirir ki, satınalma müqaviləsi bir mənbədən satınalma metodu əsasında bağlanıb.
Müqaviləyə əsasən, Dövlət Agentliyi Həsənzadə Rəşad Elxan oğlundan ofis sahəsini icarəyə götürəcək və qarşılığında 114 min manat ödəyəcək.
Onu da bildirək ki, Dövlət Agentliyi ötən il ərzində də Rəşad Həsənzadə ilə 84 min və 31 min manat dəyərində 2 satınalma müqaviləsi imzalayıb.
Qeyd edək ki, Bərpa Olunan Enerji Mənbələri Dövlət Agentliyi direktoru Cavid Abdullayevdir
Jurnalist Səbuhi Abbasov sosial şəbəkə hesabından güc strukturlarına müraciət edib. Jurnalistin müraciətini diqqətinizə çatdırırıq:
Əziz dostlar, Binəqədi rayonu tamamilə yiyəsiz qalıb. Elxan Allahverdiyev və başının dəstəsi bu rayonun altını da, üstünü də istismar edib və edir. Rayon Mozambik qaydaları ilə idarə olunur. Kim nə istəyir edir, haranı istəyir qazır, dağıdır, yetər ki, rüşvətini ver, vəssalam.
Deməli, hansısa yeni tikiləcək binaya görə özəl bir şirkət Biləcəri, Rəsulzadə qəsəbəsi, Zəngəzur küçəsinin şüşə kimi olan 4-5 km.lik asvalt yolu düz DSK-ya qədər 4 metrə qədər qazaraq, darmadağın edib. Kanalizasiya xətlərimiz dağıdılıb, bu gün isə su xətlərimizi ekskavatorla dağıdıb, qırıb, elə də tullayıb gediblər. Evə su gəlmir, kombi işləmir, kanalizasiya da öz yerində. ADSEA rəhbəri Zaur Mikayılovdan jurnalist kimi xahiş, vətəndaş kimi tələb edirəm. Bunların dağıtdıqları kanalizasiya xətləri, su boruları sizin ixtiyarınızdadır. O turbadan gələn su sizin sayğaclara qoşulub və aylıq pul ödəyirik. Xahiş edirəm, bu tikinti terrorçularını dahandırın.
Üz tuturam Azərbaycan Respublikasının Daxili İşlər Nazirliyinə, şəxsən daxili işlər naziri general-polkovnik cənab Vilayət Eyvazova, tikinti adi ilə bütün qəsəbəni iflic edən bu quldurları məsuliyyətə cəlb edin. Rayonun başçısı çətin ki, yeyib-içməkdən, eyş-işrətdən başını açsın. Artıq 102 xidmətinə müraciət etmişəm.
“Yelo Bank”ın Elmlər Filialında müdir müştərini döyüb.
Musavat.com xəbər verir ki, bu barədə məlumatı tanınmış vəkil Aqil Layıc özünün feysbuk səhifəsində paylaşıb.
Vəkil qeyd edib ki, filial müdiri VüqarXəlilov xidmətin gecikməsinə etiraz edən müştərini döyüb:
“Müdir əvvəlcə müştəriyə “bas bayıra” deyib. Sonra döyərək çənəsini sındırıb. Bu qədər qudurğan adamı hələ də filial müdiri kimi saxlayırsınız?”- deyə vəkil qeyd edib.
Aqil Layıc həmçinin Azərbaycan Respublikasının Mərkəzi Bankına sual ünvanlayaraq soruşub: “Belə şəxsin bank müdiri atestasiyası hələ qüvvədədir?”.
Abşeron rayonu, Məmmədli kəndində yerləşən “Lukoyl” yanacaqdoldurma məntəqəsində vətəndaşın avtomobilinə yanacaq çəninin tutumundan artıq benzin vurulduğu iddia olunur.
XALQ.AZ Oxu.az-a istinadla xəbər verir ki, iddiaçı avtomobilinin yanacaq tutumu 62 litr olduğu halda, məntəqədə çənə 63 litr yanacağın necə vurulduğunu sorğulayıb.
Lukoyl-Azərbaycan QSC-nin Dövlət qurumları ilə iş üzrə meneceri Rahil Ağayev məsələnin araşdırıldığını bildirib:
“Hazırda sözügedən yanacaqdoldurma məntəqəsinin rəhbəri məsələ ilə məşğuldur. Araşdırma aparır. Sürücü ilə əlaqə yaratmağa çalışırıq. Qeyd edim ki, həmin sürücü bizim qaynar xəttə müraciət etməyib. Müştərilərimizdən xahiş edirik ki, hər hansı sualları olsa, bizim 012 497 41 90 qaynar xəttimizə müraciət etsinlər”.
Özünü həkim kimi təqdim edən hər kəs bu məsuliyyəti doğrultmalıdır. Əks halda, bu, yalnız fərdi məsələ deyil, bütövlükdə cəmiyyətin problemidir.
Bu sözləri Axar.az-a açıqlamasında Mətbuat Şurasının İcraçı katibi Əvəz Rüstəmov ixtisasca həkim olmayanların efir və saytlara açıqlama verərkən özlərini həkim olaraq təqdim edən şəxslərlə bağlı danışarkən deyib.
O bildirib ki, bu kimi halların yaranmasına səbəb olan amillər araşdırılmalıdır:
"Media hər bir məsələyə həssas yanaşmalıdır. Jurnalist ictimai maraqların müdafiəçisidirsə, bilməlidir ki, ictimai maraqlar içərisində insanların sağlamlığı da ön planda dayanır. Əgər jurnalistin həkim kimi təqdim etdiyi şəxs məsuliyyətsiz davranır və insanlara ziyan vurursa, bu, jurnalistin də məsuliyyətsizliyindən xəbər verir. Hesab edirəm ki, vicdanlı jurnalistin təqdim etdiyi şəxsi və mövzunu yoxlamaq imkanı genişdir. Ona görə də jurnalistlər dəqiqləşdirilməmiş şəxsi və ya hadisəni təqdim etməməlidirlər".
Məsələyə münasibət bildirən hüquqşünas Yalçın Hacızadə isə qeyd edib ki, bu hallar yalnız səhiyyə sahəsində deyil, digər peşə sahələrində də müşahidə olunur:
"Bəzən müxtəlif şəxslərin dələduzluq və başqalarının vəzifəsini mənimsəmə kimi cinayətlərə yol verdiklərini görürük. Onlar özlərini dövlət işçisi, məmur və ya hansısa yüksək vəzifəli şəxsin yaxını kimi təqdim edərək insanları aldadırlar. Bu tip cinayətlər adətən maddi ziyanla nəticələnir. Lakin tibbi ixtisası olmayan şəxslərin insanların sağlamlığına müdaxilə etməsi təkcə maddi deyil, həm də ciddi sağlamlıq və həyat riski yaradır".
Hüquqşünas qeyd edib ki, Nazirlər Kabinetinin qərarına əsasən, tibb ixtisasları üzrə ali təhsil alan şəxslər yalnız rezidentura təhsili keçdikdən sonra həkim-mütəxəssis hesab edilirlər:
“Bu təhsil müddəti ixtisasdan asılı olaraq 2 ildən 5 ilə qədər davam edir. Psixiatriya üzrə 2 il, terapiya üzrə 4 il, plastik cərrahiyə üzrə isə 5 il rezidentura təhsili almaq tələb olunur”.
Onun sözlərinə görə, hüquqi baxımdan hazırda tibbi təhsili olmadan özünü həkim kimi təqdim edən şəxslərin fəaliyyəti ilə bağlı konkret bir cəza mexanizmi yoxdur.
Qeyd edək ki, bir müddət öncə jurnalist Qənirə Ataşova özlərini həkim-fizioterapevt kimi təqdim edən şəxsləri ifşa edib. Bundan sonra Azərbaycan Tibb Universitetinin rektoru Gəray Gəraybəyli açıqlama verərək bildirib ki, yalnız 6 il tibb təhsili alan və 4 il rezidentura keçən şəxslər həkim-fizioterapevt hesab edilə bilər. O vurğulayıb ki, sadəcə 4 il bakalavr təhsili alan şəxslər həkim yox, fizioterapist-reabilitoloqdurlar və onlar heç bir xəstəni müalicə edə bilməzlər.
Bu gün Abşeron rayon Məhkəməsində ölkədən külli miqdarda pul çıxarmaqda günahlandırılan Xırdalan Şərab Zavodunu idarə edən “A+CO” ASC ilə bağlı işə baxılacaq.
Tribunainfo.az xəbər verir ki, “A+CO” ASC-nin İnzibati Xətalar Məcəlləsinin iqtisadi fəaliyyət qaydaları əleyhinə olan 430.4-cü maddəsini pozduğu məlum olub. Tələbi pozulan maddəyə əsasən, avans yolu ilə ödənilmiş valyuta vəsaitinin müqabilində müəyyən edilmiş müddətlərdə müvafiq mallar idxal edilmədikdə, işlər görülmədikdə və ya xidmətlər göstərilmədikdə ödənilmiş valyuta vəsaitinin xaricdən geri qaytarılmamasına görə, vəzifəli şəxslər inzibati xətanın bilavasitə obyekti olmuş valyuta vəsaiti məbləğinin on faizindən iyirmi faizinədək məbləğdə, hüquqi şəxslər inzibati xətanın obyekti olmuş valyuta vəsaiti məbləğinin iyirmi faizindən otuz faizinədək məbləğdə cərimə edilir.
ASC ilə bağlı iş hakim Cəmilə Səfiyevanın icraatındadır.
Xatırladaq ki, İXM-nin 430.4-cü maddəsinə əsasən, istənilən şirkət, sahibkar müəyyən mal almaq üçün ölkədən pul çıxarırsa, iki il ərzində həmin mal ölkəyə gəlmədiyi üçün sifarişi verən şirkət cərimələnir. İki il ərzində mal ölkəyə gəlmirsə, bu sahibkarın ölkədən pul çıxarması anlamına gəlir. Bu maddənin qısa mahiyyəti belədir, sahibkarlar xaricə pul köçürür ki, nə isə alacaq. O pulu köçürəndən sonra iki il ərzində həmin malı ölkəyə gətirməlidir. Əgər malı ölkəyə gətirmirsə, sahibkar cərimələnir. Yəni bu halda hesab olunur ki, şirkət, sahibkar ölkədən pul, valyuta çıxarıb. Məlum məsələdir ki, ölkədən heç bir səbəb olmadan pul çıxarmağa məhdudiyyət var.
Qeyd edək ki, Xırdalan Şərab Zavodunu idarə edən “A+CO” ASC 1997-ci ildə MMC kimi təsis edilib. Şirkət şərab, konyak və digər alkoqollu işçilər istehsal edir. “A+CO” ilə “GOLD VİNE” ASC-lər ikisi də eyni ünvanda yerləşir. Hər iki şirkətin qanuni təmsilçisi Qasımov Xanoğlan Məsim oğludur.
Qarşı tərəfi dinləməyə hazırıq.