Azərbaycan Yerüstü Nəqliyyat Agentliyi (AYNA) paytaxt küçələrində parklanma qaydalarını pozan sürücüləri xüsusi texniki vasitədən istifadə etməklə cərimələyir.

AzFakt.com xəbər verir ki, bu barədə görüntülər sosial şəbəkələrdə yayılıb. Bildirilib ki, xüsusi nəqliyyat vasitəsi paytaxt küçələrində hərəkətdə olarkən düzgün parkinq edilməmiş avtomobilləri müəyyən edir və onlar barəsində inzibati protokol tərtib edilərək cərimələnirlər.

Hazırda AYNA tərəfindən pilot layihə kimi həyata keçirilən yenilik kütləvi xarakter daşımasa da, yaxın vaxtlarda bütün paytaxt ərazisini əhatə edəcəyi gözlənilir.

Qeyd edək ki, qanunla müəyyən edilmiş parkinq ərazilərində, yəni “Azparkinq” sistemi üzrə park edilmiş avtomobillər də qaydalara uyğun formada park edilməsə, onlar da cərimələnir.

Xatırladaq ki, parklanma qaydalarının pozulmasına görə 20 manat, əlilliyi olan şəxslərin nəqliyyat vasitələri üçün nəzərdə tutulmuş parklanma yerlərində digərlərinin parklanmasına görə 60 manat cərimə nəzərdə tutulub.

Məsələ ilə bağlı “Xəzər Xəbər”in daha geniş süjetini təqdim edirik:

TEREF

“365 tourism” şirkəti mən də daxil, ümumilikdə 50 nəfərin 132 min 700 manat pulunu mənimsəyib”.

Bu şikayətlə “Qafqazinfo”ya vətəndaş Əbilhəsən Babayev müraciət edib.

Onun sözlərinə görə, şirkət vətəndaşlara müəyyən məbləğ qarşılığında Serbiyada işlə təminata dair vəd verib: “Mən pulları yığıb şirkətin işçisi Mehrab Xələfov adlı şəxsə verdim. Məni aldadaraq 2500 manatlıq müqavilə imzalatdılar. “Tempo trips” və “365 tourism” şirkətləri hər ikisi eyni adama məxsusdur. Müqaviləni də digər şirkətin adı ilə həyata keçirdilər. Daha sonra bizə məlum oldu ki, bunlar dələduzdur. 30-dan çox adam xaricə yollansa da, mənimlə birlikdə 15 nəfər getmədi. Lakin nə mənim, nə də digər vətəndaşların pulu qaytarılır”.

Ə.Babayev deyir ki, şirkət tərəfindən göndərilən şəxslər də digər ölkədə küçədə qalıb: “Gedənlər Serbiyada küçələrdə qalıb, heç bir işlə təmin olunmayıb. Bəziləri evlərindən bilet aldıraraq geri qayıdıb, qalanı isə hələ də orada müəyyən tikinti işlərində məcburiyyətdən işləyirlər. Lakin həmin insanlara heç bir əməkhaqqı verilmir, geri qayıtmağa da pulları yoxdur. Mehrab Xələfov isə yalandan deyir ki, pulları Əbilhəsənə, yəni mənə veriblər. Lakin mən pulları yığıb şirkətə vermişəm, elə mənə də 3 min manat ziyan dəyib”.

Şikayətçi sözügedən şirkətin Ağsu rayonundan deputatlıga namizəd olan Nəcəfov Ruslan İlyas oğluna məxsus olduğunu iddia edir: “Şirkətin baş direktoru, Nəcəfov Ruslandır, biz pulları Mehraba vermişik. İndi isə Sədaqət adlı bir qadın özünü direktor olaraq təqdim edir və deyir ki, pullarınız qayıtmayacaq. Ruslan Nəcəfov isə mənə xarici bir nömrəylə zəng vuraraq bildirdi ki, hara şikayət etsəniz də, nəticəsiz qalacaq. Buna görə də biz iyulun 18-də Şamaxı Rayon Polis Şöbəsinə müraciət etdik”.

50 vətəndaşın pulunun mənimsənilməsi iddiaları ilə bağlı şirkətin işçisi Mehrab Xələfovla əlaqə saxladıq. O, saytımıza açıqlamasında iddiaların əsassız olduğunu bildirib: “Biz heç kəsi aldatmamışıq. 50 nəfər şəxs olmayıb. Xaricə göndərdiklərimiz hər biri işlə təmin olunub. Sözügedən 50 nəfər bizim şirkətlə müqavilə imzalamayıb. Onlar başqa şirkətlə müqavilə imzalayıb. Şirkətin direktoru isə Ruslan Nəcəfov deyil, Sədaqət xanımdır”.

Məsələni aydınlaşdırmaq üçün baş direktor olduğu deyilən Ruslan Nəcəfovla da əlaqə saxlamağa çalışdıq. Lakin iddialara R. Nəcəfov yox, onun işçisi cavab verdi: “Ruslan bəy “365 tourism” şirkətinin rəhbəridir. Hazırda da bu vəzifəni icra edir. İddialar absurddur. Bu məsələnin bizim şirkətə aidiyyəti yoxdur”.

Vətəndaşlara qarşı edilmiş dələduzluq iddiaları ilə bağlı Daxili İşlər Nazirliyinə (DİN) sorğu ünvanladıq. Qurumun Mətbuat Xidmətinin Şəki regional qrupunun baş inspektoru Mahir Məsimov sorğuya cavab olaraq bildirib ki, iyulun 18-də Şamaxı Rayon Polis Şöbəsinə bu barədə müraciət daxil olub: “Bir qrup şəxs turizm şirkətlərindən birinin əməkdaşının onları xarici ölkəyə apararaq orada işlə təmin edəcəyi adı ilə 132 700 manat pulu ələ keçirdiyini bildirib. Araşdırma zamanı tərəflərin bir neçə dəfə görüşdükləri və şirkət tərəfindən həmin şəxslərin xarici ölkəyə göndərilərək orada işlə təmin ediləcəkləri barədə aralarında razılaşdıqları məlum olub.

Avqustun ayının əvvəllərində isə şirkət tərəfindən verilən vəd yerinə yetirilərək vətəndaşların 34 nəfəri işləmək üçün həmin ölkəyə göndərilib. Ancaq bəziləri getməkdən imtina edərək şirkətdən ödənilən maddi vəsaitin geri qaytarılmasını tələb ediblər. İstintaq araşdırmaları zamanı əməldə dələduzluq faktı aşkarlanmadığından həmin şəxslərə qeyd olunan məsələ ilə bağlı məhkəməyə müraciət etmələri izah olunub”.

Məlumat üçün bildirək ki, Mehrab Xələfov Ruslan Nəcəfovun şirkətin rəhbəri olduğunu təkzib etsə də, Mərkəzi Seçki Komissiyasının rəsmi saytında da namizədin iş yeri kimi “365 tourism” MMC-nin direktoru olduğu qeyd edilib.

SOCAR Azneft İB Neft Daşlarının 3cü mədənindən işçilər yazır:
-Salam. Biz artığ avqustun 24 -dən dəyişə bilmiriy smeni. Dünən bugünə 1.5-2.0 metr dalğa veribdilər, amma dəyişmədilər. Gəmilər işləmədi. Nə edək? Gələn ay acından qırılaxmı? Sabah o birisigün 2.5 m. olacax dalğa. Qaldıx gələn aya. Oda dəyişsələr. Bu yekə gəmini də vermirlərki dəyişəh. Hələ otpuskaya gedən işçilərə də deyiflər ki, əgər qalsaz işdə sizə gün yazılmayacax. Çünki əmr gəlif artıq. Elə şeymi olar? İşdə olasan gün yazmasınnar??. Gülməlidi vallah. Digər idarələrdə olduğu kimi qrafiki sərbəs dəyişsəydilər, bizdə gün ağlıyardıx. Sağolun.
Qeyd: +mən şikayəti olduğu kimi köçürdüm.Siz isə hesablayın,fikirləşin ölkənin Əmək Məcəlləsinin və Nazirlər Kabinetinin müvafiq qərarlarının hansı maddələri pozulub və buna hansı məsul şəxslər(şəxs) cavabdehdir.
Mirvari Gahramanli
TEREF

Naxçıvanda insan orqanizmi üçün təhlükə yaradan yarasız ərzaq və ət məhsullarının satışı son vaxtlar artıb. Buna səbəb yerli Qida Təhlükəsizliyi Agentliyinin bəzi sahibkarlardan rüşvət alıb, pozuntulara göz yumması göstərilir. Rüşvət verməyən sahibkarların isə, sağlam məhsulları yararsız adı ilə müsadirə olunur. Daha sonra bu məhsullar rüşvət verən sahibkarların əli ilə yenidən satışa çıxarılır. Bu haqda “Gündəlik Naxçıvan”a bir qrup yerli sakin və sahibkar məlumat verib. Onlar bildirirlər ki, agentlik “kəndxudanı gör, kəndi yar” prinsipi ilə işləyir.
Yerli sakinlər bildirirlər ki, vaxtı keçmiş və zərərli qidalar üzündən tez-tez zəhərlənmələr baş versə də bu cür hallar ictimaiyyətdən gizlədilir. Naxçıvan şəhər sakini Rasim Kərimov deyir ki, bu yaxınlarda onun qohumları da dükandan aldıqları məhsuldan zəhərləniblər:
“Belə ciddi məslələrə niyə göz yumurlar, başa düşmürük. Qohumlarım zəhərlənəndə hədə-qorxu gəldilər ki, heç yerdə danışmasınlar. Deyilənə görə, bu şəraiti yerli Qida Təhlükəsizliyi Agentliyi yaradır. Yəni, agentlik sahibkarlardan rüşvət alıb, yarasız qidaların satışına göz yumur, dolaysıyla bizi zəhərləyir”.
Sahibkar M. Babayev deyir ki, zəhərlənmə hallarının artması bu yaxınlarda polisi bəzi ərzaq dükanlarında əməliyyat keçirməyə məcbur edib:
“Son vaxtlar polislər Babək rayonunda, Naxçıvan şəhərində, Əliabad qəsəbəsində və digər yerlərdə əməliyyat apararaq, vaxtı keçmiş və üzərində saxta tarix olan məhsullar aşkarlayıblar. Əliabad qəsəbəsində aparılan əməliyyat zamanı küllü miqdartada vaxtı keçmiş kolbasa, sosiska və digər ət məhsulları aşkarlanıb. Lakin, Naxçıvan Qida təhlükəsizlik Agentliyinə buna görə gözün üstə qaşın var deyən olmadı. Agentlik ancaq pul yığmaqla məşğuldur. Pul verənlərə yaşıl işıqdır. Nə istəslər sata, dövrüyəyə buraxa bilirlər. Bizim kimi rüşvət erməyənlərin isə günü qaradır. Sağlam məhsulumuzu yarasız kimi aktlaşdırıb, müsadirə edirlər. Üstəlik cərimələyirlər də”.
Naxçıvan şəhərində qəssab işləyən S. Xudiyev deyir ki, rüşvət vermədikləri üçün agentlik onları da gözümçıxdıya salıb:
“Biz rüşvət vermədiyimiz üçün işləməyə imkan vermirlər. Lakin, rüşvət verən qəssablar nə istəsə, sata bilərlər. Onların kəsdiyi əti yoxlama aparmadan möhürləyib, satışa icazə verirlər. Buna görə, muxtar respublikada bürsulyoz və digər xəstəliklərin sayı artıb. Çox zaman isə xəstəlikdən ölmüş heyvanları agentliyin əli ilə kolbasa sexlərinə satırlar. Bunu hər kəs bilir, lakin tədbir görən yoxdur”.
Naxçıvan Qida Təhlükəsizliyi Agentliyindən iddialarla bağlı açıqlama vermək istəmədilər.

Milli Məclisin IV çağırış deputatı Tahir Mirkişiliyə məxsus olduğu bildirilən “Ultra Technologies” MMC daha bir tenderin qalibi seçilib. Qaynarinfo xəbər verir ki, tender Aqrar Sığorta Fondu tərəfindən informasiya texnologiyaları avadanlıqlarının, lisenziyalarının, proqram təminatlarının və ofis avadanlıqlarının satın alınması ilə bağlı keçirilib.

Satınalma müqaviləsinin maliyyə dəyəri 98 180,72 manatdır.

Bu tenderlə şirkətin 2024-cü ildə qalib seçildiyi satınalma müsabiqəsinin sayı 14-ə çatıb. Bu tenderlər üzrə satınalma müqavilələrinin ümumi maliyyə dəyəri 4 242 937, 12 manatdır.

“Ultra Technologies” MMC 11 aprel 2000-ci ildə qeydiyyata alınıb. Nizamnamə kapitalı 1000 manat olan şirkətin hüquqi ünvanı Sumqayıt şəhəri, 1-ci mikrorayon, ev 45V, mənzil 48-də yerləşir. MMC-nin qanuni təmsilçisi Zülfüqarlı Məhəmməd Zülfüqar oğludur.

O, eyni zamanda MSM MMC-nin qanuni təmsilçisidir. Bu şirkət 2 may 2005-ci ildə qeydiyyata alınıb. Nizamnamə kapitalı 1000 manatdır. Şirkətin hüquqi ünvanı Səbail rayonu, Üzeyir Hacıbəyov küçəsi, ev 38, mənzil 25-də yerləşir.

“Ultra Technologies” MMC 2016-cı ilədək “Ultra Computers” MMC adı ilə fəaliyyət göstərib.

Tahir Mirkişili isə 2000-2011-ci illərdə “Ultra Computers” şirkətində mühəndis, daha sonra isə direktor vəzifəsində çalışıb. Bu baxımdan, mediada şirkətin sahibi kimi onun adı çəkilir. Tahir Mirkişili indiyədək bu iddiaları təkzib etməyib.

Bir neçə gün əvvəl Bakıda yerləşən özəl tibb mərkəzlərindən birində cərrahi əməliyyat zamanı “Tik-tok”da canlı yayım açan həkimlə bağlı maraqlı məlumatlar üzə çıxıb.

Bu haqda “Yeni Sabah”ın əldə etdiyi xəbərə görə, özünü estetik cərrah kimi təqdim edən Rauf Rəhimli adlı həkim əslində təhsilini tam başa vurmayıb.

Xəbərə görə, “instaqram” və “tik-tok” kimi sosial şəbəkələrdə özünü cərrah kimi təqdim edən Rauf Rəhimli əslində Tibb Universitetinin “Ümumi Cərrahiyyə” fakültəsinin rezidentidir. Maraqlıdır ki, nəinki əməliyyat, hətta xəstə müayinə etmək səlahiyyəti olmayan, heç bir həkimlik sertifikatı almayan şəxs “Mərcan” klinikasında estetik əməliyyatlar həyata keçirir. Hətta bu əməliyyatları tik-tok-da canlı paylaşır.

Məlumatları redaksiyamıza verən mənbə onu da qeyd edib ki, Rauf Rəhimli öz instaqram səhifəsində özü əməliyyat edibmiş kimi yerləşdirdiyi şəkillərin əksəriyyəti xarici saytlardan götürülmə və ya ölkənin məşhur cərrahlarının əməliyyat etdiyi insanların şəkilləridir.

Son dövrlər ölkəmizdə sürətlə yayılan və bir növ dəb halını alan bədən şəkilləndirmə, sinə böyütmə və ya kiçiltmə əməliyyatları, o cümlədən digər estetik əməliyyatlar həkimlər üçün çox gəlirli sahə olaraq bilindiyindən əksər həkimlər bu sahəyə meyl edir. Amma bütün hallarda Səhiyyə Nazirliyinin uyğun sertifikatı olmadan, hətta Tibb Universitetini bitirmədən cərrahiyə əməliyyatları etməyin gələcəkdə çox ciddi fəsadları ola biləcəyi, insanların ağır tibbi problemlərlə üz-üzə qalacağı məlum məsələdir.

Xəbərlə bağlı yazıda adı çəkilən şəxsin və qurumların mövqeyini dərc etməyə hazırıq.

Tanınmış sosial şəbəkə fenomeni Elçin Lənbəranski öz “İnstagram” hesabında Bakının Məhəmmədi kəndində asfaltın qaşınaraq satılması ilə bağlı videogörüntülər yayıb.

Görüntülərdə oraya cəlb edilən xüsusi infrasturuktur vasitəsi ilə yolun qaşındığını müşahidə etmək olar. O hətta işçi qüvvələrindən birinə yaxınlaşaraq ondan qaşınan asfaltın hara aparıldığı ilə bağlı soruşduqda onun satıldığı bildirilib.

Xəbər verdiyimiz kimi, Azərbaycan Təhsil İşçiləri Azad Həmkarlar İttifaqına yeni sədr seçilib. İttifaqın yeni sədri Araz Paşayevdir.

Qeyd edək ki, A.Paşayev hazırda Təhsil Tələbə Krediti Fondunun İdarə Heyətinin sədri vəzifəsində çalışır.

TEREF editor.az-a istinadən xəbər verir ki, Elm və Təhsil naziri Emin Əmrullayevin yaxın ətrafına daxil olan Araz Paşayev indiyədək medianın gündəminə mütəmadi olaraq neqativ və qalmaqallı xəbərlərlə gəlib.

Məsələn, Şəki şəhər sakini, 1-ci Qarabağ Müharibəsi qazisi, 2-ci qrup müharibə əlili Rəsulov Abduləli Əhmədəli oğlu media vasitəsi ilə tərəfindən ölkə rəhbərliyinə müraciət edərək, Araz Paşayev və ailə üzvlərini 11 nəfəri işə düzəltmək adı ilə onun 54000 manat vəsaitini mənimsəməkdə ittiham etmişdi.

Bundan başqa Araz Paşayev və onun rəhbərlik etdiyi Təhsil Tələbə Krediti Fondunun adı mediada mütəmadi olaraq, şübhəli tender əməliyyatlarında hallanır.