2001-ci ildə Cahangir Hacıyev Beynəlxalq Bankın sədri təyin olunanda Zamirə Xəqani Bəşirovlə əlbir olub onun başını yeməyə başladı. Dünyanın "McMafia" adlandırdığı Hacıyevanın iki daşın arasında özünə belə "bacarıqlı" maliyyə fırıldaqçısını necə tapdığı və hansı şərtlərdə partnyor seçməsi özlüyündə maraqlıdır.

TEREF yazır ki, bunu müstəqil araşdırmaçı jurnalist Cavanşir Həsənli öz sosial şəbəkə səhifəsində yazır. Cavanşir Həsənli daha sonra yazır:
Zamirə Hacıyeva 2001-ci ildə - Cahangirin onu həbsə aparan təyinatı verildiyi il Parisdə ortaqlıq əsasında ECC MANAGEMENT SYSTEMS şirkətini qeydiyyatdan keçiriblər. Beynəlxalq Bankdan böyük məbləğdə pullar Londona bu şirkət vasitəsilə axıdılıb.

Britaniya məhkəməsi "İzahedilməz Sərvət Sərəncamı" (Unexplained wealth orders,UWO) çərçivəsində keçmiş bankirin arvadı ilə bağlı araşdırmalara başlayana qədər Fransadakı şirkət fəaliyyətdə olub. 2019-cu ildə onun fəaliyyətinə xitam verilib. Sənədlərə görə Zamirə Hacıyeva Parisdəki şirkətinin səhmlərini Londonda qeydiyyatdan keçirdikləri EUROPEAN TECHNOLOGIE LIMITED (hazırda KSANTEX TECHNOLOGIES LTD adlanır) şirkətinə etibar edib.
TEREF

Xəzər rayonu, Şüvəlan qəsəbəsi sakinləri yollarının təmirsiz olmasından şikayətçidirlər. Bununla əlaqədar olaraq, onlar Azərbaycanın birinci vitse-prezidenti, Heydər Əliyev Fondunun prezidenti Mehriban Əliyevaya müraciət ediblər.
Bakupost.az xəbər verir ki, ölkədəki quruculuq işlərini, xüsusən də COP29-a hazırlıqla əlaqədar paytaxt Bakı və ətraf rayonlarda aparılan abadlıq tədbirlərini yüksək qiymətləndirən və təqdir edən müraciət müəllifləri Şüvəlan qəsəbəsinin bağ massivi, Mirmöhsüm Ağa ziyarətgahının yaxınlığı, 90-cı Şüvəlan döngəsi, 1-ci Döngə və digər ərazilərdə ciddi abadlıq işləri aparılmasına ehtiyac olduğunu bildirirlər.
Onların sözlərinə görə, adıçəkilən ərazilərdə yollar tozlu-torpaqlı və keçilməzdir:
"Xeyli vaxtdır ki, bu yollara asfalt döşənməyib. Piyadalar üçünsə ümumiyyətlə, səkilər yoxdur. Bundan başqa, burada bütün yolların ətrafı zibillikdir və üfunət qoxuyur. Bu küçə və yollardan zibillərin yığışdırıldığını görməmişik. Mövcud antisanitariya vəziyyətində yaşamaq dəhşətlidir".
Müraciətin sonunda sakinlər qeyd olunanların nəzərə alınması və tədbir görülməsini xahiş ediblər.

Naxçıvanda 207 min yumurta sahibkarların əllərindən alınıb. Bu yumurtaların hamısı Naxçıvandan kənarda istehsal olunub və yerli sahibkarlar tərəfindən Naxçıvana gətirilib. Rəsmi məlumatda müsadirə olunan yumurtaların keyfiyyətsiz olduğu bildirilur. Lakin, sahibkarlar “Gündəlik Naxçıvan” bildirirlər ki, yumuralar keyfiyyətli olub və standartlara da cavab verib.
Sahibkarlar həm də iddia edirlər ki, onlardan müsadirə olunan yumurtalar Naxçıvan Dövlət Gida Təhlükəsizliyi əməkdaşlarının əli ilə dükanlarda satışa çıxarılır.
Sahibkar K.M. deyir ki, Bakıdan gətirdiyi yumurtaların satışına icazə üçün agentlik əməkdaşları ondan rüşvət tələb ediblər. O, rüşvət verməkdən imtina etdikdən bir gün sonra 50 min ədəd yumurtası zorla əlindən alınıb:
“Yumurtanın maya dəyərinin iki qatın qədər qiymət oxudular. Məqsədləri odur ki, kənardan yumurta gətirilməsin, öz monopoliyalarında olan keyfiyyətsiz yerli yumurtaları satılsın. Bizim gətirdiyimiz yumurtalar həm böyükdü, həm də dadlı. Yerli sakinlər də bəyənirlər. Əgər yarasızdırsa, niyə bizdən müsadirə edib, dükanlarda satdırırlar. 50 min ədəd yumurtamı müsadiə etdilər ki, guya məhv olunacaq. Cəmi 500-600 yumurtanı yandırıb, nümayiş üçün videoya çəkdilər, qalanını satışa çıxardılar. 10 min manata yaxın ziyana saldılar məni. Tək mən deyiləm, başqa sahibkarların da başına eyni oyunu açıblar”.
Yerli sakinlər də kənardan gətirilən yumurtaların bazardan yığışdırılmasından narazıdırlar. Naxçıvan şəhər sakini Validə Babayeva deyir ki, bu yumurtalar daha ucuz və daha keyfiyyətlidirlər:
“Yerli yumurtalar çox keyfiyyətsizdir. Çox vaxt qırırsan, içi xarab çıxır. Dadı yox, qiyməti isə bahadır. Bakıdan gətirilən yumurtalar isə, həm iri, həm də dadlıdır. Hamısı oyundur. Toyuq fermalarının hərəsi bir məmura məxsusdur. Gördülər ki, maları satılmır, tez qıraqdan gələnə qadağa qoydular. Onları insanların güzaranı yox, öz cibləri düşündürür”.

UEFA Millətlər Liqasının qrup mərhələsinin 1-ci turunda Tofiq Bəhramov adına Respublika Stadionunda keçirilən Azərbaycan – İsveç oyununda millimiz hesabı açmağa çox yaxın olub.

“Qafqazinfo” xəbər verir ki, matçın 45+7-ci dəqiqəsində qarşılaşmanın baş hakimi Balaş Berke qonaqların qapısına penalti təyin edib.

Lakin topa yaxınlaşan Ramil Şeydayev ələ düşən şansı qola çevirə bilməyib.

Həmin anın videosunu təqdim edirik:

Vəzifəli şəxslərin, deputatların əksəriyyətinin maaşı az qala hər kəsə məlumdur. Gəliri bəlli olan şəxsin maaşından artıq qiymətə aksesuar, geyim, avtomobil, daşınmaz əmlak alması ictimaiyyətdə birmənalı qarşılanmır. Məsələn, sosial şəbəkələrdə deputat Hicran Hüseynovanın çantası müzakirələrə səbəb olub. Belə ki, onun həmin çantanı 10 min manata aldığı iddia olunur. Lakin H.Hüseynova sözügedən çantanı Çindən ucuz qiymətə aldığını və orijinal olmadığını bildirib.

Sual yaranır: Geyimi, əmlakı maaşı ilə uyğun gəlməyən şəxslərin bu davranışı korrupsiya şübhəsi yaradırmı və onun barəsində istintaq orqanları araşdırma aparmalıdırmı?

Əgər bahalı əşya hədiyyədirsə, o zaman vəzifəli şəxs hansı həddə qədər hədiyyə götürə bilər? Konkret olaraq, qanun buna nə deyir?

Məsələ ilə bağlı danışan siyasi şərhçi Heydər Oğuzun fikrincə, vəzifəli şəxslərin, dövlət məmurlarının az qala göz çıxaran şəxsi əmlakı mütləq anti-korrupsiya tədbirləri çərçivəsində qiymətləndirilməlidir.

O, məmurların, deputatların bizneslə məşğul ola bilmədiklərini qeyd edib:

“Dediyiniz kimi, onların maaşları bəllidir və qanunvericiliyə görə dövlət məmurları bizneslə məşğul ola bilməzlər. Əks halda, dövlət resurslarından şəxsi mənafeləri üçün faydalanmaq imkanı əldə edərlər. Bu isə istənilən ölkədə korrupsiyanın çiçəklənməsinə zəmin yarada və iqtisadiyyatı çökdürə bilər. Dünya dövlətləri məhz bu mənfi tendensiyanın qarşısını almaq üçün məmurlara bizneslə məşğul olmaq səlahiyyəti vermir. Əslində, Azərbaycan qanunvericiliyində də bu prinsip imperativ norma kimi təsbit olunub. Məncə, hüquq mühafizə orqanları, xüsusilə korrupsiyaya qarşı mübarizə idarələri qanunun bu tələblərini əldə rəhbər tutub bütün dövlət məmurlarının qazanc mənbələrini yoxlamalı, malik olduqları mülkiyyətin mənbələrini araşdırmalıdır”.

H.Oğuz deyib ki, məmurların əsasən də xaricdəki mülkiyyətləri ciddi şəkildə incələnməli və dövlətdən oğurladıqları pulların xaricə axıdılması ən böyük dövlət cinayəti kimi tövsif olunmalıdır:

“Çünki dövlət məmurlarının bu hərəkət və davranışlarının bir adı var: öz ölkəsinin müstəmləkəyə çevrilməsində və var-dövlətinin mənimsənilməsində imperialistlərlə əməkdaşlıq. Vaxtilə düşmən dövlətlər ələ keçirdikləri ölkələri bu şəkildə sömürüb, qənimət kimi xaricə daşıyırdılar. İndi isə sanki bu müstəmləkə siyasəti bizim korrupsioner məmurlar tərəfindən həyata keçirilir. Ölkəmizə düşməncəsinə yanaşan bütün korrupsionerlər layiqli cəzasını almasalar, vətənimizin tari-mar olunmasının qarşısını almaq mümkün olmayacaq, getdikcə zəifləyən dövlətçiliyimiz mövcudluq problemi ilə üzləşəcək. Bu baxımdan korrupsiyaya qarşı effektiv mübarizə ən ümdə təhlükəsizlik məsələsidir”.

Hüquqşünas Əkrəm Həsənov deyib ki, vəzifəli şəxs 55 manat dəyərində hədiyyə ala bilər:

“Hədiyyənin dəyərinin 55 manatdan yüksək olması artıq qanun pozuntusudur və korrupsiyaya bərabər tutulur. Əgər bahalı hədiyyə alarkən aşkar edilərsə, o zaman həmin şəxslər məsuliyyətə cəlb oluna bilər. Adətən, korrupsiya halları gizlin olur deyə, görə bilmirik. Hətta rüşvət də başqa şəxslər vasitəsilə ödənilir. Burada müxtləif variantlar mövcuddur. Dövlət işçisinin gəlirləri araşdırılmalıdır. Məsələn, dünyada məmurların gəlirləri və xərcləri bəyan edilir və buna bu qayda ilə nəzarət edirlər. Yəni sən hər il bəyan etməlisən ki, özün də daxil olmaqla ailə üzvlərinin gəliri və xərci nə qədərdir. Bizdə isə bu mexanizm yoxdur. 2005-ci ildə Azərbaycanda məmurların gəlirlərinin bəyan olunması haqqında qanun qəbul olunub. Lakin 19 ildir ki, bu qanunun sadəcə, adı var. Bəyannamə forması isə hələ də təsdiq olunmayıb”.

Globalinfo.az

Bakının Yasamal rayonu, Alatava-1 adlanan ərazisində yaşayan sakinlər evlərinin söküləcəyi günü səbirsizliklə gözləyirlər. Onlar illərlə dar, təmirsiz evlərdə yaşamaqdan bezdiklərini, normal şəraitli mənzillərlə təmin olunmaq istədiklərini bildirirlər.

Deyirlər ki, hər il gəlib evlərinin ölçülərini götürürlər, söküntü vəd edirlər, di gəl ki, bir nəticə olmur.

Alatavalılar uzun müddətdir ki, gələnin-gedənin ağzına baxır, xoş bir xəbər eşidəcəklərinə ümid edirlər. Amma nə fayda…

“Mən 23 ildir ki, burada yaşayıram. İllərlə deyilir ki, Alatava sökülür. Gəlib ölçüb, gedirlər. Ancaq bir xəbər yoxdur. Gəlib söksünlər, biz də normal şəraitli mənzildə yaşayaq da”, -sakinlərdən biri deyir.

Doğrudur, rayonun bir hissəsində söküntüyə başlanılıb. Amma bu, çox da geniş ərazini əhatə etmir. Ən böyük problem isə budur ki, sakinlər onlara verilən kompensasiya ilə razılaşmırlar. Deyirlər ki, hər kvadrat metrə 1400-1500 manat təklif olunur ki, bu da onlara yeni ev almaq üçün sərf etmir. Elə bu səbəbdən də evləri nisbətən kiçik və dar olanlar satıb oradan çıxırlar.

“Elə pul versinlər ki, heç olmasa gedib özümüzə şərait qura bilək. İllərlə övladlarım kirayədə qalırlar. Heç olmasa balalarımla bir evə yığışa bilim. Nə qədər dar evdə kök salıb qalmaq olar”, -xanım sakin bildirir.

Mənzilləri yaxşı yerdə yerləşən və geniş olanlar isə şirkətlərlə mübarizədədirlər. Məhz elə bu səbəbdən də vətəndaşlar ərazidəki evlərini tərk etsin deyə tikinti şirkəti müxtəlif yollara əl atır.

Sakinlərin dediyinə görə, onların evlərinin ətrafını qazırlar və yaxud da ev yiyələri mənzildə ola-ola söküntü aparırlar.

“Ötən gün Alatavanın digər hissəsində sakin evdə olarkən söküntü aparmışdılar. Çox qorxmuşdu. Özləri qəsdən edirlər”.

Qısa desək, sakinlər rahat mənzilləri, sahibkarlar isə üzü yola, ucuz pulla razılaşan ev yiyələrini əl-əl axtarırlar. Onlar arasında razılığın isə izi-tozu görünmür.

Musavat.com sözügedən video-reportajı təqdim edir:

Bakı şəhər sakini, əslən Ağdam rayonunun Üçoğlan kəndindən olan Süleymanov Vasif Qazı oğlu “Hürriyyət”in redaksiyasına gələrək, qarşılaşdığı haqsızlıqlardan danışıb. Uzun müddət Rusiyada yaşadığını deyən V.Süleymanov bildirir ki, 2004-cü ildə Novosibirsk şəhərində həmyerlisi, qohumu (yeznəsinin qardaşı) Ərgənov İmran Kamran oğlu ilə ortaq tikinti şirkəti təsis edərək, ticarətlə məşğul olublar. V.Süleymanovun sözlərinə görə, şirkət onun adına olsa da, bank əməliyyatlarını şəriki həyata keçirib.

Şikayətçi deyir ki, bir müddət sonra ortağının maliyyə məsələlərində onu aldatdığnı hiss edib. Lakin hər dəfə aşkara çıxarılan məbləğlər kiçik olduğundan, oğurluq faktını üzə vurmamağa çalışıb. Düşünüb ki, qohumu nə vaxtsa öz əməlindən əl çəkər. Lakin bu alicənablıq sonra ona baha başa gəlib.

Vasif Süleymanov deyir ki, təxminən 2005-ci ildə Novosibirskdə dəmiryolu relsi istehsal olunan zavodla müqavilə bağlayaraq, böyük bir sexin təmir-tikinti işlərini görməyə başlayıblar. Öncədən tərəflər arasında Rusiya valyutası ilə 10 milyon rublluq (həmin dövr üçün 230 min dollarlıq) müqavilə bağlanıb. Bu vəsaitin 230 min dolları müəyyən zəruru xərclərə sərf olunsa da, 200 min dollar iki nəfər arasında bölünməli olub.

V.Süleymanov bildirir ki, tikinti işləri vaxtında başa çatıb, fəhlələrin zəhmət haqqı və digər xərclər şəxsi vəsaiti hesabına ödənildikdən sonra şərikindən zavodun şirkətə ödəməli olduğu 200 min dolları hesaba köçürüb-köçürmədiyini soruşub. İmran Ərgənov cavab verib ki, zavod hələ həmin vəsaiti köçürməyib.

Bir neçə gün sonra şəriki yenə pulun köçmədiyini dedikdə, Vasif Süleymanov ondan şübhələnərək, zavodun mühasibi ilə danışıb. Mühasib zavodun şirkətə ödəməli olduğu vəsaitin tam şəkildə 10 gün əvvəl hesaba köçürüldüyünü bildirib.

V.Süleymanov şərikindən ona çatan 100 min dolları tələb etdikdə, qarşı tərəf müxtəlif bəhanələr gətirərək, həmin pulu verməkdən imtina edib. Bundan sonra qohumlar arasında qalmaqal olub. Hətta iş o yerə çatıb ki, İmran Ərgənov Vasifin qardaşının üstünə silah da çəkib.

“Sonra İmranın böyük qardaşı ilə mənim aramda mübahisə oldu. Bu zaman onu yüngülvari itələdim, çəlimsiz adam idi, gedib divara dəydi, qolu cızıldı. Bu işi böyüdüb, məni axtarışa verdiilər”, - deyən şikayətçi bildirir ki, axtarışa verildikdə Qazaxıstanda olub. Təxminən, ay yarım sonra Qazaxıstandan Rusiyaya qayıdanda xüsusi xidmət orqanlarının əməkdaşları onun saxlayıb. “1 həftə sonra məni bir şərtlə buraxdılar ki, bu adamla işin olmayacaq”, - deyə V.Süleymanov bildirir.

Beləliklə, bir müddət sonra İmranın böyük qardaşı Müseyib rəhmətə gedir və onun cənazəsini ölkəyə gətirməli olurlar. Müseyibin də ona təxminən 15 min dollar borcu olduğu üçün Vasif Süleymanov Azərbaycana gəlib, yaxınlarından borcunu istəməyi düşünür. Onun kəndə gəlib borcunu tələb edəcəyini bilən mərhumun yaxınları, o cümlədən qardaşı İmran V.Süleymanovun dayısı vasitəsilə ondan xahiş edir ki, kəndə gəlməsin, yas mərasimini yola verdikdən sonra borcu qaytarılacaq. “Deyiblər ki, mərhumun “yeddisi”ndən sonra oturub araşdırarıq, borcu varsa, veriləcək”, - deyən şikayətçinin sözlərinə görə, Müseyib Ərgənovun 7-si günü ona məlumat gəlir ki, İmran və digər yaxınları kəndi tərk edir. Vasif Süleymanov dərhal bu işdə vasitəçi olan dayısına məlumat verir. Bundan sonra, dayısının müdaxiləsi ilə qarşı tərəf Müseyib Ərgənovun ona borclu olduğu 15 min dolları qaytarmağa məcbur olur. Bu zaman İmran Ərgənovun da ona borclu olmadığı haqda sənəd imzalatmağa çalışırlar. Lakin V.Süleymanov bundan imtina edir: “Dedim ki, mənə qaytarılan 15 min dollar Ərgənov Müseyib Kamran oğlunun borclu olduğu vəsaitdir, İmranın mənə olan 100 min dollar borcu qalır”.

Vasif Süleymanov onu da vurğuladı ki, 2-3 ay əvvəl İmran Ərgənovun Bakıya gələcəyini bildikdə, Azərbaycan xüsusi xidmət orqanlarına müraciət edib. Bu müraciətdən təxminən ay yarım sonra o, Türkiyədən Bakıya gələrkən hava limanında saxlanılıb. Lakin, bir neçə saat sorğu-sual edilsə də, borcunu boynuna almayıb və bu səbəbdən də sərbəst buraxılıb. Şikayətçi deyir ki, bu zaman onu üzləşdirməyə belə, ehtiyac görməyiblər.

Sonda aidiyyəti qurumlara müraciətə edən Vasif Süleymanov borcunun qaytarılmasına dəstək olmalarını xahiş edir.

Hazırladı: Jalə FAMİLQIZI

Hurriyyet.az

Redaksiaydan: Qarşı tərəfin mövqeyini dərc etməyə hazırıq.