Zənnimdə yanılmamışam, həmişə demişəm ki, bu xalqın ən böyük düşmənləri acgöz alimlər, piştaxta təfəkkürlü siyasətçilər və ucuz qələm adamlarıdır. Bilirsiniz ki, Milli Məclisə seçkilərlə bağlı namizədlərin qeydə alınması prosesi gedir. Bu proses zamanı nələr görürük? Baxırsan ki, kimsə deputat olmaq iddiasını ortaya qoyur, qapı-qapı gəzib xalqa söz verərək 500 imza toplayır və son anda, qəfil açıqlama verir ki, seçkidə iştirak etməmək barədə qərar qəbul etdim, namizədliyimi geri çəkirəm. Bu, imza topladığın insanlara, qapısında imza diləndiyin kəndçiyə və ən əsası, öz prinsiplərinə, öz şəxsiyyətinə qarşı həqarətdir, xəyanətdir. Məgər prosesləri əvvəldən bilmirdin? Bilirdinsə, yekə-yekə iddialarla çıxış etmək nəyə lazım idi? Döyüşməyə vicdanın çatmırdısa, öncədən bu prosesə qoşulmazdın.

Məsələn, bu gün 75 saylı Yardımlı-Masallı seçki dairəsində əsl rəzalət hökm sürür. Həmin dairədə 3 əsas favorit namizəd var idi – Əliməmməd Nuriyev, Mərdan Seyidbəyli və Musa Qasımlı. Bu üç şəxsin hər birini rayon əhli çox gözəl tanıyır.

Ə.Nuriyev sosial şəbəkə hesabında seçki yarışını davam etdirməmək barədə qərar qəbul etdiyini yazıb. Amma səbəblərini yazmır, yazmağa cəsarəti çatmır. Bəs, günlərdir qapı-qapı gəzib imza topladığın insanlara nə cavab verəcəksən? Açığı, mən onu qınamıram, ayrı-ayrı məmurlarla o qədər dərin əlaqələrə malikdir və hökumətdən o qədər faydalanır ki, geri çəkilməyə bilməz. Qazandıqlarını itirmək qorxusu çox pis şeydir. Ola bilər ki, Ə.Nuriyev yaxşı insandır, necə ki belə də təsvir edirlər, çox adama faydası toxunub, səmimi və sadə adamdır. Vaxtilə AXCP-dən hökumətə “transfer” olunan Ə.Nuriyev hazırda ictimai sektorda ən çox qazanan şəxslərdəndir və görünür, həqiqətləri tez başa düşərək bacanağı Əli Kərimlinin yanından uzaqlaşan Ə.Nuriyev üçün belə daha yaxşı olub. Eşitmişəm, Ə.Nuriyev cəbhədə ən faydalı şəxslərdən biri olub, açığı, o bataqlıq onun yeri də deyildi. Bəs, əzmini harada itirmisən?

Məlumat aldım ki, Musa Qasımlı bu dəqiqə Yardımlı Rayon İcra Hakimiyyətinin başçısı Ayaz Əsgərovun otağında oturub. Ə.Nuriyevi də namizədliyini geri götürməyə onlar məcbur ediblər, ona min yerdən zəng açılıb, başçı bir tərəfdən, dost-tanış da bir tərəfdən. Hamısı da M.Qasımlını təzyiqi ilə. Musa “əsası”nı işə salıb.

67 yaşlı M.Qasımlı 15 ildir deputatdır, bunun 10 ilini Yardımlının deputatı kimi Parlamentə lövbər salıb. Nə iş görüb? Yaxşı ki, İkinci Qarabağ Müharibəsi olub və bu adamlar üçün yeni “iş yeri” və imitasiya imkanları formalaşıb – şəhid ailələrinin evinə gedib şəkil çəkdirib sosial şəbəkələrdə paylaşmaq!

Ay qardaş, Yardımlı rayonu tükənib, reanimasion durumdadır, əhali kəndləri tərk edib, iş yerləri yoxdur, o boyda turizm potensialı olan rayonda bir dənə də olsun şərait yaradılmayıb, rayonda 1 işıqfor var, onun da ancaq sarı işığı yanır. Axı sən alimsən, bu boyda mandat hərisliyi nəyə lazımdır?! Və heç bir Yardımlı əhli mənə M.Qasımlını tanıtdıra bilməz, biz qohumuq, mənim rəhmətlik anamla da bir sinifdə təhsil alıb. Amma dəxli nədir, mənim üçün həqiqət hər şeydən üstündür. Camaat yazıq deyil? Axı səndə Yardımlının problemlərini həll etməyə, rayonun inkişafı üçün inqilabi addımlar atmağa güc-iradə yoxdur, dişə vurulası bircə cəsarətli çıxışın da gözə dəymir. İncimə Musa müəllim, mən digər yardımlılı jurnalistlər kimi sənə heykəl kimi baxıb, qarşında təzim edə bilmirəm. Gedib meşədə, təbitə qoynundan özünə xudmani villa tikdirməklə deyil ki… Səndən əvvəlki Sabir Rüstəmxanlı da, bizim rayonun müxtəlif rayonlardan deputat seçilən mənsubları da – hamınız bir bezin qırağısınız. Hələ Barak Obamanın babasına oxşayan Fəzail İbrahimlini demirəm.

İndi yerdə qalıb iş adamı Mərdan Seyidbəyli! İndi də onun üstünə düşüblər ki, namizədliyini geri çək! Musa əlinə əsanı alıb oturub icra başçısının otağında, bu dəfə dənizi yox, rayonu iki yerə bölür. M.Seyidbəylini dərindən tanımıram, amma sosial şəbəkələrdə baxıram ki, şəhid ailələrinin əlindən öpməklə artistlik eləmir, iş adamlarını, alimləri tez-tez bir yerə yığıb çıxış yolları axtarır. Musanın işi kitab yazmaq, Əliməmmədin işi qrant almaqdırsa, Mərdanın da işi tikmək, qurmaq yaratmaqdır – adamın işi budur. Yeni tendensiyalar da bunu tələb edir, şalvarının ciblərini yeddiqat tikən M.Qasımlının yenidən deputat seçilməsi dövlət üçün ağır yük olacaq, cibi açıq, ömrünü iqtisadiyyata, qurub-yaratmağa sərf edən insanları önə çəkmək lazımdır ki, hər şeydən öncə xalq, dövlət qazansın.

P.S. Yardımlıdan çox pis xəbərlər alıram, Qasımlı “konsert” verir, bütün idarələrin fəaliyyətini iflic edib, hamını min cür fəndlə farağatda saxlayıb, vadar edir ki, onun işlərini görsünlər. Özüm də tez-tez əlaqə saxlayıram, amma xahiş edirəm, kimdə nə məlumat varsa, mənə göndərsin.

Samir Feyruzov

Ötən həftənin sonu VI çağırış Milli Məclisin üzvü Vahid Əhmədov deputatlığa namizədliyini geri götürdüyünü açıqladı.

O bildirib ki, 59 saylı Quba seçki dairəsinə müraciət edərək könüllü şəkildə namizədliyini geri götürüb: "Kifayət qədər yaşım var. Ailəm və yaxınlarım mənə istirahət etməyi tövsiyə ediblər”.

Tribunainfo.az dəqiqləşdirib ki, həmin dairədən YAP-ın namizədi Məhərrəmzadə Əlibala Səttar oğludur.

Qubada anadan olmuş Ə. Məhərrəmzadə 2010-cu ildə Nərimanov rayonundan namizəd olub. O, yazıçı və ixtisasca auditordur.

Sərbəst auditor olan Əlibala Məhərrəmzadə hazırda "Kaspian Audit Kompani” MMC-nin direktorudur.

Bir neçə iqtisadi mövzulu kitabların müəllifidir. Azərbaycan Yazıçılar Birliyinin üzvüdür. Ukrayna Milli Elmlər Akademiyasının və Ukrayna Yazıçılar Birliyinin fəxri üzvüdür.

Bu mövzuda gununsesi.info yazıb ki, rayonda iş adamı kimi tanınan Əlibala Məhərrəmzadə Qubadakı "Şahdağ Turuskavets” Sanatoriyasının sahibidir: "Araşdırmamız zamanı onun iş adamı olmasına baxmayaraq, külli miqdarda borcunun olduğu da üzə çıxıb. Məlum olub ki, Əlibala Məhərrəmzadənin toplam 10 milyona yaxın borcu var”. Özü deyiblər təkzib edib və bildirib ki, deputat olarsa, biznes fəaliyyətini dayandıracaq.

Əlibala Məhərrəmzadə əslən Qubadan olsa da, rayonla sıx əlaqəsi yoxdur. O, hətta YAP-ın Quba rayon təşkilatının üzvü də deyil. Bakının Səbail rayonunda qeydiyyatda olan Məhərrəmzadənin YAP-ın Quba təşkilatının heç bir toplantısına qatılmadığı deyilir. Bu üzdən də qubalı YAP-çılar onun namizədliyinə soyuq yanaşırlar. Onun müsahibəsini işıqlandırmağa hazırıq.

“Azərbaycan Beynəlxalq Bankı” Tam Kart satışı zamanı kartın gizliliyinə riayət etmir, təhlükəsizlik qaydalarını gözləmir.

Tribunainfo.az xəbər verir ki, bu barədə ABB-dən kart alan müştəri Şahin Bəhramzadə yazıb. O bildirib ki, ona verilən kartın üzərindəki bütün kodları bankın əməkdaşları gördü:

“ABB, siz vətəndaşlara kart təqdim edərkən niyə açıq vəziyyətdə verirsiz və bütün məlumatlar açıq aşkar görsənir? Hətta kartın arxasındakı security 3 rəqəm də görünür. Halbuki onu sizin işçiləriniz də görməməlidir. Qabaq zərfin içində verirdilər. Bu təhlükəli deyilmi?”.

Bankın bir başqa müştərisi Zabil Əliyev də bildirib ki, o da bu problemlə üzləşdiyi üçün kartını bloklayıb:

“ABB mənə kartı təqdim edəndə nəinki açıq şəkildə verdi, üsrəlik əməkdaş kartın kserosürətini də çıxarıb yanına qoydu. Bu səbəbdən kartı bloka atdım”.

Bakı şəhəri, Yasamal rayonu İsmayıl bəy Qutqaşınlı 48 ünvanında yerləşən yarımtikili binada Azərbaycan bayrağına qarşı hörmətsizlik olunub.
APA TV həmin bina ilə bağlı videomaterial hazırlayıb. Həmin videomaterialı sizə təqdim edirik:

Göyçay rayonu Çayarxı kənd sakinləri tərəfindən

"Biz Göyçay rayonu Çayarxı kənd sakinləri olaraq bildirmək istəyirik ki, 25 ildir kəndimizdə içməli su problemi var. Doğrusu çoxsaylı şikayətlərimizdən sonra 2007-ci ildə mövcud su xəttindən bizə su verilmişdi, lakin sevincimiz çox çəkmədi. 2010-cu ildə suyun verilişi dayandırıldı. Hazırda kənddə su xətti olsa da, istifadəmizə icazə verilmir. Hər ay ərzində bir neçə dəfə maşınla su gətizdiririk. Elə vaxtlar olur ki, maddi imkansızlığa görə günlərlə susuz qalırıq. Axı belə olmaz! Evdə yaşlı, xəstə, uşaq var. İsti yay günlərində dözülməz duruma düşürük. Dəfələrlə fərdi və kollektiv şəkildə aidiyyəti qurumlara, o cümlədən Göyçay Rayon İcra Hakimiyyəti başçısına müraciət etsək də bizə köməklik göstərən yoxdur.
Biz sosial şəbəkələr vasitəsilə Azərbaycan Respublikasının Prezidentindən və yuxarı instansiyalardan çox xahiş edirik, bizim içməli su problemimizin həlli üçün tapşırıq verəsiniz."

Zaqatala Mərkəzi Xəstəxanasının elan etdiyi son tenderə əsasən tibb ocağı 103 min manatlıq dəftərxana və təsərrüfat mallarının satınalmasını həyata keçirəcək. Tribunainfo.az xəbər verir ki, bununla bağlı xəstəxana ilə “PROFMATERIALS” MMMC arasında satınalma müqaviləsi imzalanıb.
Qeyd edək ki, Zaqatala rayonunun əhalisinin sayı 124850 nəfərdir. Tender üçün ayrılmış pulla orta hesabla adambaşı 10 diyircəkli qələm, 2 dəftər, bir o qədər də kağız və digər dəftərxana ləvazimatı almaq mümkündür. Təsərrüfat mallarına gəlincə, xəstəxanaya heç də belə böyük məbləğdə mal və məhsul almağa gərək yoxdur. Çünki xəstəxananın ərazisi elə də böyük deyil. Və lazım olan təsərrüfat mallarının da həcmi bir o qədər böyük ola bilməz.
Sual oluna bilər ki, 124 min insana bu qədər dəftərxana ləvazimatı niyə lazımdır? Adətən tenderlərdə maliyyə maxinasiyaları etmək üçün ən yaxşı vasitələrdən biri dəftərxana ləvazimatlarının alınmasıdır. Əgər xəstəxanalar üzrə elan edilmiş tenderlərə diqqət yetirsək, bu kateqoriya üzrə rəqəmlərin xeyli şişirdildiyinin şahidi ola bilərik.
Xatırladaq ki, Zaqatala Mərkəzi Xəstəxanasının baş həkimi Tamara Nurəliyevayadır. O, 2022-ci ildən etibarən bu postu daşıyır.

“MİDA” MMC Bakı və respublikanın digər şəhər və rayonlarında tikilmiş yaşayış kompleksində tikintinin video və foto arxivi üçün taymlaps çəkilişləri, video və animasiya çarxlarının hazırlanması və sərt disklərdə saxlanmalarının göstərilməsi üzrə tender elan edib.
Tribunainfo.az xəbər verir ki, bu məqsədlə MİDA 112 min manat xərcləməyi qərara alıb. Və “MEDİCAL MEDİA” MMC ilə satınalma müqaviləsi imzalayıb.
Qeyd edək ki, MİDA-nın adı indiyə qədər bir neçə qalmaqala qarışıb. Belə ki, hələ xeyli əvvəl bu MMC-nin bir qrup əməkdaşı qanunsuzluq və kiber yollarla saxtakarlıq etdiklərinə görə, həbs olunmuşdular. Buna səbəb isə MMC-nin bir neçə saniyə içində yüzlərlə mənzili satması barədə şübhələrin yaranması olmuşdu.
İşin qəribə tərəfi odur ki, tenderi udan şirkət “Saf Farma” dərman şirkətinin nəzdində fəaliyyət göstərən MMC-dir. Yəni, tenderi udan şirkətin əsas missiyası dərman pereparatlarının topdan və pərakəndə satışıdır.
“Medical media”nın rəhbəri Sərdar İbrahim oğlu Xudiyevdir. O, həmçinin “Saf Farma” şirkətinin təsisçilərindən biridir. Şirkətin digər təsisçiləri kimi isə Gunay Kazimova və Fəridə Mehdi göstərilir.
Bu şirkətin tibb aləmində baş verən hadisələr və yeniliklərlə bağlı “MedicalMedia.az” adlı saytları da var.
İndi sual yaranır ki, tibb və sağlamlıqla məşğul olan bir şirkət tikintiyə aid hansı əsas və məntiqlə videoçəkiliş aparacaq, reklam hazırlayacaq? Halbuki MİDA bunu ölkədə kifayət qədər peşəkar bir şirkətə həvalə edə bilərdi. Görünür, bu tenderdə hər iki tərəfin maraqlarını təmin edən səbəblər var. Əks təqdirdə, iki bir birinə tərf profilin sahibləri bu işə qol qoymazdılar.