Səhiyyə Nazirliyi “Qiymətləri Tarif Şurası müəyyən edir” deyir; iqtisadçı: “Tarif Şurasının gətirdiyi qaydalar nəinki qiymətlərin bahalaşmasına, hətta keyfiyyətin aşağı düşməsinə səbəb oldu”
Azərbaycanda son bir neçə ayda bir sıra dərmanlar 4-5 dəfə bahalaşıb. Kəskin qiymət artımı əsasən qiyməti Tarif Şurası tərəfindən tənzimlənməyən, o cümlədən Rusiya və Ukraynadan gətirilən dərmanlarda müşahidə olunur. Eyni zamanda nisbətən ucuz, lakin keyfiyyətli dərmanlar yoxa çıxıb, əvəzinə daha bahalı analoqları satılmağa başlayıb.

Ekspertlərə görə, Türkiyədən alınan dərmanlarla Azərbaycanda satılan eyni tərkibli dərmanlar arasında, Rusiyadan gətirilən dərmanlar arasında təxminən 8 dəfə qiymət fərqi var. Əvəzində daha bahalı əvəzedicilər təklif olunur ki, bu da əhali arasında narazılıq yaradır. Öskürək əleyhinə dərmanlar və antibiotiklər də azı 40-50 faiz bahalaşıb. Qlükoza və fizioloji məhlul Ukraynadan gətirildiyi üçün müəyyən çətinliklər yaranıb. Apteklərdə satıcılar depolarda yodun məhdud miqdarda verilməsindən şikayətlənirdilər, amma yodun qiyməti qalxan kimi qıtlıq dərhal aradan qalxdı.

“5-HOK” dərmanına tələbat yüksək olsa da, son aylar tədarük edilməyib. Bu dərmanın əvəzinə oxşar dərmanlar baha qiymətə gətirilir. Betoptik göz damcılarına da ciddi tələbat var, lakin hər aptekdə yoxdur. Elə dərmanlar var ki, 6-7 dəfə bahalaşıb. Nəqliyyat xərclərini və vergiləri nəzərə alsaq belə, qiymətlərin bu qədər kəskin artması yenə də ola bilməz. Dövlət Gömrük Komitəsinin hesabatına əsasən, bu ilin yanvar-avqust aylarında Azərbaycana 432 milyon 151,98 min ABŞ dolları dəyərində əczaçılıq məhsulları idxal edilib. Bu, ötən ilin müvafiq dövrü ilə müqayisədə 12,3 faiz çoxdur.

Səhiyyə nazirinin müavini Rasim İsmayılov yerli mətbuata açıqlamasında bildirib ki, Azərbaycanda dərmanların qiymətini Tarif Şurası müəyyən edir. T. İsmayılov bildirib ki, yerli dərman preparatlarının istehsalı sahəsində də xeyli iş aparılır. İsmayılovun sözlərinə görə, “Diamed Co” və “R-Pharm” adlı iki şirkət artıq yerli istehsal qurub. Ələt Azad İqtisadi Zonasında İsrail şirkəti ilə birgə açılacaq yeni istehsal müəssisəsinin yaradılması nəzərdə tutulur. Bu istiqamətdə İqtisadiyyat Nazirliyi ilə əməkdaşlıq güclənir. Yeni investorların cəlb edilməsi ilə dərman istehsalının artırılması və idxaldan asılılığın aradan qaldırılması nəzərdə tutulur. Bununla belə, Azərbaycanda dərman preparatlarının idxalını kimin monopoliyaya alması ilə bağlı sualın cavabı açıq qalır.

TEREF.AZ yazır ki, iqtisadçı-ekspert Natiq Cəfərli mövzu ilə bağlı “Yeni Müsavat”a dedi ki, problemlərin olacağı əvvəldən proqnozlaşdırılırdı: “Əslində ilk gündən Tarif Şurasına bu səlahiyyətlər veriləndən qərarın əleyhinə çıxış edən, bununla bağlı mətbuatda çıxışlarında bunu vurğulayan mütəxəssislərdən biri də mən olmuşam. Çünki bu qərarın belə bir nəticələr doğuracağı öncədən məlum idi. Əgər Azərbaycan özünü bazar iqtisadiyyatı ilə fəaliyyət göstərən ölkə adlandırırsa, dərman preparatlarının qiymət tənzimlənməsinə, dövlət yox, bazar, yəni rəqabət cavab verməli idi. Rəqabətli mühitin yaradılmasına dövlət çalışmalı idi ki, bazarda 10-larla şirkət olsun. Rəqabətli mühit yaransın və qiymətləri bazar tənzimləsin. Tarif Şurasının gətirdiyi qaydalar nəinki qiymətlərin bahalaşmasına, hətta keyfiyyətin aşağı düşməsinə səbəb oldu. Çünki Tarif Şurasının qaydalarına görə dərman preparatlarının adları yox, molekulları və istehsal ölkələrinə görə qiymətləri müəyyənləşir. Nəticə etibarilə də Tarif Şurasının qiymət təyin etdiyi molekulun ən ucuzunu, ən keyfiyyətsizini xaricdən gətirib. Misal üçün, Hindistandan, Asiya ölkələrindən gətirib, daha baha qiymətə satmaq fürsəti yaranıb. Ona görə də bazardan keyfiyyətli, dünyaca tanınmış brendlərin istehsal etdiyi dərmanlar ya yoxa çıxır, ya da çox bahalaşır. Əksəriyyət xaricə gedən qohumundan xahiş edir ki, dərman alıb gətirsin. İstər Türkiyə, istərsə də Avropa ölkəsi olsun, dərmanların bizdən qat-qat ucuz qiymətə olduğunu görürük. Ona görə də Tarif Şurası bu işdən uzaqlaşdırılmalıdır. TŞ-nin tənzimləmə siyasəti ölkədə inhisarçılığı daha da artırdı. Ölkədə bir-iki şirkət var ki, bütün bazarın demək olar ki, 80-90 faizinə nəzarət edir. Bu da TŞ-nin gətirdiyi qaydalara görə inhisarçılığın artmasına səbəb oldu. Ona görə də Tarif Şurasından bu tənzimləmə tamamilə alınmalıdır. Dövlətin borcu tənzimləmədə dərmanların keyfiyyətinə nəzarət etmək, keyfiyyətsiz dərmanların bazarda olmasının qarşısını almaqdır. Yerdə qalan hər şeyi açıqlamaqla, bazarda rəqabəti gücləndirməklə, xarici şirkətlərin bazara daxil olmasına şərait yaratmaqla inhisarçıların deyil, xalqın, vətəndaşların maraqlarına cavab verən yanaşma ilə bu məsələ həllini tapmalıdır. İndiki yanaşma, sistem özünü doğrultmadı. Hər il də davam edir, amma hökumət tutduğu səhv yoldan dönmək istəmir”.

İqtisadçı “bir çox işbazlar ucuz başa gəlsin deyə, bəzi xarici ölkələrdəki istehsalçılarla anlaşmaya gedərək, dərmanın tərkibini bahalı edən maddələrin faizini azaltdırır, onu ikiqat ucuz alır və gətirib ikiqat baha satırlar” iddiasına belə cavab verib: “Səbəbi odur ki, dərmanların molekullarına qiymət qoyulur. Misal üçün, həmin dərman molekulu Fransa, İtaliya, Almaniya istehsalı olan dərmanlar keyfiyyətlidir və bahadır. Azərbaycana nisbətən orada ucuzdur. Azərbaycana gətirəndə daha baha başa gəlir. Amma Hindistan, Nepal, Şri-Lanka istehsalı olan həmin eyni molekul dərmanları daha ucuz olur, amma keyfiyyətsizdir. Bura gətiriləndə daha baha satılır, amma keyfiyyətsizdir. Vətəndaşlar da bundan ikiqat əziyyət çəkirlər”.

Farmakoloq, dosent, professor Aydın Əliyev mövzu ilə bağlı “Yeni Müsavat”a dedi ki, dərman istehsalı böyük sənayedir və bunun hazırlanmasında alimlər, bioloqlar, mühəndis, baytar, aqronom, kimyaçı-hər kəs iştirak edir: "Bu, yeni iş yerlərinin açılması deməkdir. Təbii ki, bu, dövlətin problemidir və həll olunmalıdır. Rəqabət sistemi qurulmalıdır. Rəqabət olmayanda ayrı-ayrı işbazlar istənilən sahəni ələ alırlar. Yoxsa bir, ya da beş nəfərdən asılı vəziyyətə düşürük. Dərmanın keyfiyyətsizi o deməkdir ki, o dərmanın vaxtı keçib, o dərmanın tərkibində olan ionlar, atomlar, ayrı-ayrı bioloji aktiv maddələr artıq insan bədənində enerjini dəyişdirə bilmir".

Qeyd edək ki, yaxın günlərdə Səhiyyə Nazirliyi ölkədə bir sıra dərmanların qıtlığının yaranması ilə bağlı məsələyə aydınlıq gətirib. Nazirliyin Analitik Ekspertiza Mərkəzindən mediaya bildirilib ki, “Adrenalin - Zdorovye”, “Adrenalin -Darnitsa”, “Penepin” və “Penepin Jr” (sonuncu ikisi də adrenalin tərkibli dərmanlardır) dövlət qeydiyyatına alınıb. Bildirilib ki, istənilən şirkət bu dərmanları maneəsiz olaraq ölkəyə gətirə bilər: “Bizim laboratoriyada ekspertizadan keçdikdən sonra ölkə ərazisində satışına icazə verilməsi üçün heç bir maneə yoxdur. O ki qaldı "Niyə apteklərdə yoxdur və niyə gətirilmir" sualına, bu məsələ nə Səhiyyə Nazirliyi, nə də Analitik Ekspertiza Mərkəzinin səlahiyyətinə aid məsələ deyil. Belə ki, dərmanları ölkəyə özəl şirkətlər gətirir".

Afaq MİRAYİQ,

Şəmkirin keçmiş icra başçısı, il yarımdır ki, həbsdə olan Alimpaşa Məmmədovun bir sıra əmlaklarının üzərinə həbs qoyulub. Onların arasında özünün və ailə üzvlərinin adına olan biznes obyeklərilə yanaşı, Bakının Nərimanov rayonu ərazisində yerləşən “Sipark” yaşayış kompleksində mənzillər də var.
TEREF.AZ Bizimyol.info-ya istinadla xəbər verir ki, Dövlət Təhlükəsizlik Xidmətinin İstintaq Baş İdarəsində bu evlərin hansı yollarla əldə olunmasıyla bağlı araşdırma aparılıb və rüşvət kimi verildiyi müəyyənləşdirilib. Bütün bunlar Alimpaşa Məmmədovla bağlı cinayət işinin materiallarında da öz əksini tapıb. Elə ona görə də bir sıra başqa daşınmaz əmlaklarla yanaşı, həmin mənzillərin də üzərinə həbs qoyulub, məhkəmədən onların da müsadirə olunması istənilib.

Cinayət işinin materiallarında yazılıb ki, Bakının Nərimanov rayonu, Təbriz küçəsində “Svrostroy S.S” MMC-nin inşa etdiyi “Sipark” yaşayış kompleksində sahəsi 103 kvadrat metr olan 231 saylı və 212 kvadrat metr olan 232 saylı mənzilləri 2018-ci ilin avqust ayında sabiq icra başçısı Hüseynli Nicatın adına rəsmiləşdirərək, şirkətin faktiki sahibi Seymur İsayevdən rüşvət kimi alıb. İstintaq bu mənzilləri 677 min manat dəyərləndirib. İttihama əsasən, bu mənzillərin müqabilində Alimpaşa Məmmədov şirkətin sahibinə Şəmkir şəhərində Nizami küçəsi 2 ünvanında torpaq sahəsi ayırıb. Bu şirkətə və onun sahibi Seymur İsayevə himayədarlıq edib.

Həbs edilən icra başçıları arasında sonuncusu olan Alimpaşa Məmmədov Şəmkir rayon İcra Hakimiyyətində keçirilən satınalmalar zamanı şirkətlərin qalib elan edilməsi üçün rüşvət almaqda, rayonun abadlaşdırılması üçün ayrılan vəsaitlərin yeyintisində və s. əməllərdə ittiham edilir. Cinayət işində ümumilikdə 7 milyon manata yaxın mənimsəmə və rüşvətdən söhbət gedir.

İddia olunur ki, o, “Şəmkir-Yeni Göyçə-Dağ Çəyir” avtomobil yolunun çəkilişi üçün satınalma müsabiqəsinin qalibi olmuş idarənin müdirindən 240 min manat pul alıb.

Sabiq icra başçısı həmçinin 2015-2016-cı illərdə icra hakimiyyətinin keçirdiyi satınalmaların qalibi olmuş “Ağstafasutikinti” ASC-nin müdiri Vaqif Məmmədovdan 218 min manat rüşvət almaqda ittiham olunur.

Alimpaşa Məmmədov Bakı-Qazax yolunun 399-cu kilometrliyində yerləşən və 2015-ci ildə Çinarlı bələdiyyəsi tərəfindən təsis edilmiş, faktiki dəyəri 3.4 milyon manat olan “Səbət” ticarət mərkəzini oğlunun və köməkçisinin adına cəmi 40 manata rəsmiləşdirərək mənimsəməkdə də ittiham edilir.

Alimpaşa Məmmədov yeyinti və rüşvətdən əldə etdiyi 6.8 milyon manatı 2017-ci ilin avqustunda oğlu Adil Adilzadənin adına təsis elədiyi “AzFarel” MMC – balıq yetişdirmə və emalı müəssisəsinin yaradılmasına xərcləməkdə təqsirləndirilir. Bu üzdən ona qarşı həm də cinayət yoluyla əldə olunan vəsaitlərin leqallaşdırılması ittihamı irəli sürülüb.

Keçmiş icra başçısı hazırda Gəncədəki 2 saylı istintaq təcridxanasında saxlanılır. Onun işinə Gəncə Ağır Cinayətlər Məhkəməsində hakim Nural Əliyevin sədrliyilə baxılır. Məhkəmə prosesi noyabrın 24-də davam edəcək.

Azərbaycanda icra başçılarının həbs dalğası 2019-cu ilin dekabrında Ağstafa və Yevlax rayonlarının sabiq icra başçılarıyla başlayıb. Daha sonra Neftçala, Biləsuvar, İmişli, Cəlilabad, Kürdəmir, Şəmkirdə davam edib.

Dövlət Gömrük Komitəsinin sabiq sədri, general-polkovnik Səfər Mehdiyevə bağlığı ilə tanınan məşhur "Duty Free" şirkəti ilə bağlı da araşdırmalara başlanılıb.

TEREF.AZ bildirir ki, Qaynarinfo-nun əldə etdiyi məlumata görə, nizamnamə kapitalı 10 manat olmasına baxmayaraq, dövriyəsi milyonlarla manat olan "Duty Free.Az" MMC-nin qanuni təmsilçi Aslanov Cavid Aqil oğludur. "Duty Free" biznesi təyyarə bortunda və hava limanlarında rüsumsuz ticarət sistemidir.


Baş verən maxinasiyalarla bağlı artıq araşdırmalar gedir. Bu işi öz şəxsi biznesinə çevirən gömrük oliqarxları da dindirilir. İşin başında duran əsas adamlardan biri isə gömrük xidməti polkovniki Teymurov Arazxan Əbülfət oğlunun olduğu deyilir. O, sabiq sədrlərin dövründə yaxın qohum-əqrabasını gömrük orqanlarında müxtəlif vəzifələrdə yerləşdirməklə bu biznesi özəlləşdirə bilib.


Apardığımız araşdırmaya əsasən, artıq "Duty Free.Az" MMC-nin şirkəti məcburi auditdən yayınmaya görə cərimə olunmaq üçün məhkəmə iddiası qaldırılıb. Şirkət barəsində İnzibati Xətalar Məcəlləsinin 464-cü maddəsi ilə cərimə protokolu tərtib edilərək, Xəzər Rayon Məhkəməsinə göndərilib. İşə hakim Zaur Tağıyevin sədrliyi ilə baxılacaq.

İXM-nin 464-cü maddəsində "Auditor xidməti haqqında” Azərbaycan Respublikasının Qanunu ilə nəzərdə tutulmuş hallarda həyata keçirilməli olan məcburi auditdən yayınmağa görə cərimlənirlər. Hüquqi şəxslər min beş yüz manatdan iki min beş yüz manatadək məbləğdə cərimə edilir.

“Sumqayıt şəhəri 9-cu mikrorayon, ev 10/27 daxil bütün mikrayon ərazisi illərdir su üzünə həsrətdir. Bəlli olan saatlarda təzyiqlə su verməli olduqları halda elə günlər olur ki, vermirlər. Hətta bəzən su nəinki təzyiqlə gəlir, ümumiyyətlə, gəlmir”.

Bunu Toplum TV-nin qaynar xəttinə Sumqayıt şəhər sakini İlkin Məmmədkərimov yazıb. Onun sözlərinə görə bu problemlə bağlı dəfələrlə “Azərsu” ASC-ə, Sumqayıt Sukanal İdarəsinə müraciət etsə də, müsbət nəticə əldə edə bilməyib.

“9-cu mikrorayondan başqa bütün şəhərdə fasiləsiz su gəlir. Sumqayıtda 9-cu mikrorayon Sumqayıtın ən böyük mərkəzi ərazisi olduğu halda bizdə suyu guya qrafiklə verirlər. Su səhər saat 06:00-dan 10:00-dək, axşam da 18:00-dan 22:00-dək təzyiqlə verilməli olduğu halda heç qrafiklə belə normal su verilmir. Gün ərzində isə ümumiyyətlə, su olmur. Dəfələrlə Sumqayıt Sukanal İdarəsinə zəng edib şikayət etdikdə gah təzyiq aşağıdır, gah qəza var düzəldəcəklər, gah da indi bildirərik suyu verərlər deyib yola verirlər. Nədənsə 9-cu mikrorayonun “Təzyiq problemi”, “Qəza problemi” illərdir bitmir. “Azərsu”nun 955 saylı çağrı mərkəzinə şikayət etdikdə isə operatorlar hər dəfə şikayəti qeydə alıb yönləndirdiklərini bildirirlər, dəyişən isə heç nə yoxdur”.

“Azərsu” ASC-nin mətbuat xidmətinin rəhbəri Anar Cəbrayıllı isə Toplum TV-ə şikayətçinin dediklərinin həqiqəti əks etdirmədiyini dedi: “Həmin ərazi səhər, axşam qrafiklə su alır. Sumqayıt şəhərinin 90 faizi 24 saat su alır. Ola bilər ki, nə vaxtsa su gələn vaxtda hardasa qəza olsun və su kəsilsin. Bu o demək deyil ki, orada ümumiyyətlə, su yoxdur. Bəzən insanlar saxta profillərlə bu cür şikayətlər yazırlar. Həmin şəxslər bəzən nə vaxtsa bizim qurumda işləyib çıxan şəxslər olur və ya Sumqayıtda hansısa su işçisi ilə şəxsi qərəzliyi olur. Ona görə də bu cür şikayətlər edirlər. Araşdıranda isə görürük ki, həmin ərazidə heç elə bir insan yaşamır. Mənim araşdırmama görə, həmin ərazi qrafikə uyğun olaraq problemsiz suyunu alır”.

Şikayətçi İ. Məmmədkərimov həmin ərazidə yaşadığını və telefon nömrəsini də qeyd etməklə qurum rəsmisinə dəfələrlə sosial şəbəkələrdən yazdığını, ancaq bir cavab ala bilmədiyini deyir. O, su probleminin yalnız bugün deyil, illərdir davam etdiyini deyir.

Azərbaycan Respublikasının Prezidenti
cənab İlham Əliyevə

Surəti: Azərbaycan Respublikasının Baş Prokuroru
cənab Kamran Əliyevə

MÜRACİƏT

Çox hörmətli Prezident!
Artıq mən dözə bilmirəm. Bu gün Azərbaycan təhsilində baş verən özbaşınalıqlar, qanunsuzluqlar, ədalətsizliklər və haqsızlıqlar artıq heç bir ölçüyə sığmır. Məlumatınız olsun ki, təhsildə anarxiya və dərəbəylikdir. Xüsusilə Gəncə-Daşkəsən Regional Təhsilin müdiri Anar Qədiməliyev artıq Gəncəbasar təhsilini dədəsinin mülkü kimi tamamilə özəlləşdirib. Özü kimi bütün bank işçilərini təhsil idarəsinə işə götürüb. Bu adamın başlıca məqsədi Gəncədə yalnız çaxnaşma törətməkdir. Gəncədə təhsildən başqa yalnız çirkin əməllərlə məşğuldur. Anar Qədiməliyev ancaq SOROS-un göstərişlərini həyata keçirir. Özü bankir olmaqla yanaşı Regional təhsil üzrə yaxın dostu və qohumu Rövşən Kərimovu müavin, sinif yoldaşı Elnur adlı şəxsi təchizat şöbəsinə işə götürüb. O da bankirdir. Digər SOROS-da bir yerdə oxuduğu Elmir Cəfərovu Daşkəsən Təhsilinə sektor müdiri təyin etdirib. O da Aqrar Universitetinin Mexanikləşdirmə fakültəsini bitirib ixtisasca mexanizatordur. Goranboy rayonunun təhsil sektoruna müdir təyin etdirdiyi Xəyal adlı şəxs Gəncəbasarda maşın alverçisi kimi tanınır. Bunların əksinə olaraq Regional Maliyyə sektoruna qoyduğu özünün yaxın adamı Gülnar Nəbiyeva isə Texnalogiya Universitetinin Qida Məhsulları fakültəsini bitirib. Gəncədə məişət pozğunu kimi tanınan ən yaxın dostu, sinif yoldaşı Elnur Qasımovu əvvəlcə məktəb direktoru, sonra isə onu Göygöl Rayon Təhsilinə sektor müdiri təyin etdirib. Onun qeyri-qanunu eşq macərası yaşadığı müəlliməyə isə müəllimlər günündə “Təşəkkürnamə” verdirdi. Hazırda bu adamın cinayət faktları əsasında Göygöl rayon prokurorluğunda istintaq yekunlaşmaq üzrədir. Bu adamın hər bir hərəkəti özü bir cinayətdir. Amma bu adam Gəncədə özünü Prezident kimi aparır. Başlıca işi intriqa ilə məşğul olmaqdır. Lakin cəzasızlıq şəraitində get-gedə daha da azğınlaşır. Səlahiyyətli qurumlar onun haqqında lazımi tədbir görmürlər. Ona görə də Anar Qədiməliyev deyir ki, mən heç kimdən qorxmuram. Təhsili bilmədiyi təqdirdə Gəncə və Gəncəbasarda təhsili rüşvət mənbəyinə çevirib. Bütün 65 yaşı tamam olan müəllim və məktəb direktorlarını rüşvət verdiyi təqdirdə müqavilə bağlayıb işdə saxlayır. Rüşvət verməyəni dərhal işdən çıxardır. Bunun bariz nümunəsi bu il yenə 4 məktəb direktorları ilə yenə müqavilə bağlayıb işdə saxlamasıdır. Artıq 5 nömrəli məktəbin direktoru Bəhram İmranovla 6-cı dəfədir ki, müqavilə bağlayır. O da öz növbəsində qanunsuzluqlar edərək işləyən müəllimləri boğaza yığıb. Neçə-neçə müəllimlər hətta Prezident Adminstrasiyasına çox saylı şikayətlər edib. O, şikayətlərə də baxan yoxdur. O müəllimlərdən biri, savadlı bir qadın Gülzalə Şükürovadır. Bəhram İmranov Anar Qədiməliyevin əqidə dostudur. Daha sonra Anar Qədiməliyev, Fransada yaşayan idarənin işçisi Məsmə İsmayılovaya maaş yazıb mənimsəmişdir. Ancaq Anar Qədiməliyevə söz kar etmir. Çünki, nazir Emin Əmrullayev onu bərk müdafiə edir. Maraqlıdır ki, heç kəs ona söz demir. Yəni, Anar Qədiməliyev “Kənd Təsərrüfatı” işçisi ola-ola, əsgəri xidmətdə olmaya-olmaya, psixoloji problem yaşadığı halda, təhsildən başı çıxmadığı təqdirdə o qədər əvəzolunmaz şəxsiyyətdir? Bir sözlə Anar Qədiməliyev Gəncəbasar təhsilini sanki dəfn edib.Gəncə təhsilini bank işçilərinin qəbirsanlığına çevirib. Indi də yeni bir bufet əməliyyatına başlayıblar. Bütün bufetləri məcbur edirlər ki, şagirdlərin sayına görə hər bir şagirdə 45 qəpik olmaqla arenda pulu ödəsinlər. Bunların bir məqsədi var, əhalini ölkə prezidentindən narazı salsınlar. Mən isə söz verirəm ki, Gəncə şəhərində bir ziyalı kimi, bir ağsaqqal kimi buna imkan verməyəcəyəm. Cənab Prezident, demirlər ki, biz təmiz işləyirik, o zaman 65 yaşdan yuxarı bütün məktəb direktorlarını işdən azad etsinlər. Məndə deyim ki, halaldı. Yoxsa, məni, əməkdar müəllimi Gəncəbasarda tanınmış ictimai xadimi öz işimə bərpa etsinlər. Yadda saxlasınlar ki, Bəhram İmranov jurnal alıb əlinə sinifə girməyib. Mən isə 25 il bir nəfəsə müəllim işləmişəm. O, zaman hansı obyektivlikdən danışırlar? Bu baxımdan cənab Prezident, Anar Qədiməliyev nə böyük şəxsiyyətdir ki, ona heç kəs söz deyə bilmir. Cənab Prezident, sizdən xahiş edirəm ki, Gəncədə Anar Qədiməliyev barədə ən ciddi tədbirlər görülsün və o, cinayət məsuliyyətinə cəlb olunsun. Əlavə olaraq sizdən xahiş edirəm ki, Təhsil Naziri Emin Əmrullayevin Əli Həsənovun kadrı olması barədə dəqiq və ciddi araşdırma aparılsın. Çünki, bunlar bir kompaniya, bir şəbəkə və bir dəstədirlər. Mən bir onu görürəm ki, bunların törətdikləri əməllər qeyri-qanuni işlər ermənilərdən, xüsusilə Paşinyandan da təhlükəli və qorxuludur. Cənab Prezident, sizi öpürəm, bağrıma basıram, Azərbaycan müstəqilliyi uğrunda yeni-yeni uğurlar arzulayıram.


Hörmətlə: Həsənov İlham Musa oğlu

Azərbaycan Respublikasının Əməkdar müəllimi,
1995-ci ildən YAP-ın üzvü,
8 şeir kitabının müəllifi, Prezident mükafatçısı,
“Qızıl Qələm” mükafatı laureatı,
Gəncə şəhər Veteranlar Şurasının üzvü,
Azərbaycan Yazıçılar, Jurnalistlər, Aşıqlar birliyinin üzvü
Heydər Əliyevin yaxın dostu və silahdaşı

Teref.az yazır ki, Azərbaycanın ilk sahiubkar xanımlarından olan Fatima Aghamirzayeva Alpan kəndində başına acılan oyunlardan yazıb. Fatma xanım yazır:
Dostlar, mən 1988-ci ildən fəaliyyətdə olan Azərbaycanın ilk qadın sahibkarıyam. Müvəffəqiyyətlərim və gördüyüm işlər heç də az olmayıb. Hətta ən çətin şəraitlərdə belə...Lakin indi hərəkət eləmək heç mümkün deyil. Mən sizə bu dəfə bir sahəni deyəcəyəm və məsləhətlərinizə də ehtiyacım var və sonra ardıcıl olaraq nələrdə çətinliklərim olduğunu bölüşəcəyəm. Çünki arada həsəd bürüyür məni ki, tanıdığım xanımların güclü reklamı və bacarıqları tez-tez göstərilir. Görəsən, mənim beynəlxalq səviyyədə belə tanınmağıma baxmayaraq nəyə görə mən öz respublikamızda bacarıqsız görünürəm?!

Birinci - 2017-ci ildə ABŞ Səfirliyi və İqtisadiyyat Nazirliyinin birgə klaster layihəsi mənə tapşırıldı. Bu, Alpan kəndində qadınlar üçün Sənətkarlığı artırmaq və işə cəlb etmək üçün olan çox maraqlı bir layihə idi. Və biz həm bir qrup xanımı tədris etməli idik, həm də bina tikilməli idi. Binanın tikilişinə 3000 AZN xərcləməli idim, 75000 dollar səfirlik, qalan işləri isə bələdiyyə və ictimai şüra üzərinə götürməli idi. Bələdiyyə heç bir köməklik göstərmək istəmədi və hətta onun üzərinə düşən sənədləşmə işini bilərəkdən etmədi. İcmanın büdcəsi yox idi. O səbəbdən yük mənim və səfirliyin üzərində qaldı. Mənim özümdə olan iki böyük yük maşını quru taxta və içəridə olan dəzgahlar, xammal, stol-stullar, qapılar və digər xərclər mənim üzərimə düşdü ki, əvvəllər 42000 AZN hesabladılar, sonra isə onların bağladığı ikinci aktda azaldılaraq 34000 AZN düzəliş etdilər.
·
O vaxtadək ustaların öyrənilməsi üçün 5 növ texnoloq usta 3 ay müddətində maaşları, yol xərcliyi və yemək mənim üzərimə düşdü. Nə yaxşı ki, mən müəllimələrlə razılaşdıq ki, birdən bu pul mənə ödənilməsə, mən pulu tədricən, hissə-hissə ödəyərəm və belə də etdim. Dəzgahların quraşdırılması, xammalın alınması, sonradan işlə təmin etmək üçün ehtiyat xammal və bütün bunlar mənə 52000 AZN xərcləmək məcburiyyətində qoydu. Və 15 nəfər qadın çox yüksək səviyyədə xalça, kilim, verni, sumax texnologiyasını mənimsədilər və işə başladılar. Çox təntənəli açılış oldu. Səfirlik, nazir müavini, tanınmış Qadın Assosiasiyası rəhbərləri, kənd camaatı və s. (bu disk məndə var) bu görünən işlərin nümunələri ilə və xanımlarla tanış oldular. Lakin həmin vaxtda da bizim əsaslı ünvan sənədlərimiz bələdiyyə tərəfindən yerinə yetirilməmişdi. Baxmayaraq ki, məndə onların bağladığı akt var ki, guya torpaq sənədlərinin alımasına 3500 AZN, qazlaşdırmaya 500 AZN, işığa isə 500 AZN xərcləyib. Hamısının imzası var, bircə mən imzalamamışam. Yəni sənəd olmadığı üçün qaz çəkilişi bu günəcən mümkün olmayıb. İşıq pulun isə mən 830 AZN ödəmişəm (qəbz məndədir). Açılışdan sonra isə iş orada davam edib, əməkhaqları alıblar, mən isə sənədləri tələb etmişəm. Kəndin bələdiyyə sədri Seyidov Əziz qızlar haqqında müxtəlif şayiələr yaydıraraq onları işdən çəkindirməyə başladı və sənəd tələb etdikdə "mən bələdiyyə nəzdinə keçməliyəm" kimi bəhanə gətirdi. Hansı ki, bələdiyyənin dövlətə 2 milyondan çox borcu var idi və onun nəzdinə keçdikdə qazanan yer kimi borcu biz ödəməli idik. Bu isə, hamınızın bildiyi kimi, mümkün deyildi, amma biz Danışan İlmələr kollektivinə və onun idarə heyətinə əsasən, sənədi bir nəfərin adına ala bilərdik və beləcə müəssisə öz vergisini özü ödəyə bilərdi. Bina əvvəlki qüsurlarından və sonrakı baxımsızlıqdan ciddi zərər görür. İki ildir ki, oraya baxmaq adı ilə bir mollanı bir ailəsi ilə yerləşdirmiş və bütün müəssisəni mənzilə çevirmişdi. Həmin MOLLA öz evini satarkən deyildiyinə görə 10000 AZN pul alaraq Seyidov Əzizə vermiş və binamın yanında ona həyətinin çəpərlərini sökərək və birləşdirərək torpaq sahəsi vermişdir. Hətta binanın içərisində dəzgahların üstündə çox qiymətli xalçaların yarımçıq qalmağına və sifarişlə düzəltdirdiyim avadanlığın içəridə olmağına baxmayaraq mən o binaya 2 ildir ki, girə bilmirəm. Və son dəfə mən həmin şəxsin odunlarımızı yandırdığına və içəridə bizim bütün işimizi şok vəziyyətinə saldığına görə onun çıxmağını istədikdə Əziz Seyidov və kəndin icra nümayəndəsi çoxlu adam toplayaraq gəldilər və bildirdilər ki, bu adam bu kəndin sakinidir və çıxmayacaq.
İndi, əziz dostlar, siz deyin. Ət budursa, pişik hanı, pişik budursa, ət hanı. Yəni əgər bu bina Əzizin, yanındakı torpaq da mollanındırsa, mənim 86000 AZN pulum hara getdi və səfirliyin 75000 Dollar pulu MOLLAya niyə bağışlandı. Çəkdiyim əziyyəti, əsəbi, yolu demirəm. Bu, bir problem.
Növbəti dəfə çalışacağam (əgər sizə maraqlıdırsa) ikinci problemi də deyim. Yəni mən baş aça bilmirəm, siz nə məsləhət bilirsiniz?!
Fatima Aghamirzayeva
Teref.az olaraq adları çəkilən şəxs və qurumların mövqeyini dərc etməyə hazırıq!
Teref.az

Naxçıvan MR dünyanın ən unikal yeridir. Bu məmləkətə nə koronavirus, nə də cinayət girə bilər. Çünki Naxçıvanın "xan" kimi misilsiz izolyatoru var.

Deyə bilərsiniz ki, koronavirusu başa düşdük. Bəs, cinayəti necə izolyasiya etmək olar?

Çox sadə. "Xan"ın bu məmləkət üçün tətbiq etdiyi möhtəşəm bir resepti var: Cinayəti qeydə alma, o da baş verməsin. Necə ki, eyni məntiqlə gözümüzü yumub "Günəş yoxdur" deyə bilərik.

Şərur rayonunun Arpaçay kəndinin sakini mərhum Mirzəyeva Aysunun başına gələn müsibətlər Naxçıvanın necə "0 cinayət" moduyla idarə olunduğunun ən bariz örnəyidir.

Rəsmi məlumata inansaq, 27 yaşlı Aysun bu ilin iyul ayının 31-da özünü hamamda asıb. Aysunun övladları isə başqa şeylər danışır.

11 yaşlı Sabirin iddiasına görə, anasını gecə axtararkən samanlıqda ölü vəziyyətdə tapıblar. Şərur Prokurorluğu isə onu 10 saat göz altına tutaraq, müxtəlif təzyiqlərlə tamamilə fərqli izahat alıb. Guya, o, atası Sabir, babası Hüseyn kişi ilə birlikdə anasını hamamda asılı vəziyyətdə görüb. Atası ondan qaranlığa batareya tutmağı tələb edib və özünü asmış Aysunun ayağından yapışıb, Hüseyn kişi isə gəlininin boğazındakı ipi kəsib.

Qısası, qətl hadisəsinə intihar süsü verilib.

Ardınca da heç bir səbəb olmadan ailənin saxladığı 140 baş qoyun satışa çıxarılıb. İddialara görə, qoyunlar satılıb kimlərəsə rüşvət də verilə bilər.

Digər müəmmalı məqam qətl və ya intihar hadisəsindən 3 gün əvvəl babanın öz gəlinini və nəvələrini evdən qovmasıdır. Bildirilir ki, evdən qovulan gəlin bir qızı, bir kiçik oğluyla hamamda, ata və böyük oğul isə tövlədə gecələyiblər. Qətlin ana ilə bərabər hamamda yatan 10 yaşlı Zərov tərəfindən görüldüyü də iddialar arasındadır.

Bir başqa müəmma mərhum Aysunun telefondan bəzi səslərin silinməsidir. Aysunun atasının dediyinə görə, hadisədən əvvəl onun telefonuna qızından 3 səs mesajı gəlib və dərhal silinib. O, səsin qızı tərəfindən silinməsinə inanmır.

İddiaların nə dərəcədə haqlı olduğuna, təbii ki, hüquq mühafizə orqanları qərar verə bilər. Di gəl ki, Naxçıvan "xanı" "0 cinayət" moduyla işləyir və bu da hadisənin obyektin qiymətləndirilməsinə mane olur.

Bütün bu şübhələri bir kənara ataraq, məhrumənin oğlu 11 yaşlı Sabirin mənə göndərdiyi imdad çağırışını sizinlə bölüşürük.

Bu lində: https://www.facebook.com/heyder.oguz/videos/846312649741420

Ovqat.com

Naxçıvan - Moskva təyyarə reysini işlədən “Utair” şirkətinin sahibi Andrey Martirosov erməni imiş.

Ovqat.com-a bu barədə məlumat verən etibarlı mənbənin iddiasına görə, Andreyin əvvəlki familiyası Martirosyan olub.

O, bir neçə il əvvəl soyadındakı "yan" şəkilçisini ovla əvəzləyən Andrey, görünür, erməniliyini də bu cür ört-basdır etməyə çalışıb.

Bildirilir ki, Andrey Martiros(yan)ovun Azərbaycandakı rəsmi təmsilçi Zakif İsbatov adlı bir şəxdir. O, Naxçıvan Beynəlxalq Hava Limanının direktoru Gülməmmədli Məşhur Abdulla oğlu ilə əlbir olub real qiyməti 280 manat olan təyyarə biletlərini müştəriyə 450 manata satır. Hər bilet satışından əldə olunan gəlirin cəmi 20-30 manatını (ayda 5000 manat rüşvət) Gülməmmədli Məşhura verən Zakif İsbatov yerdə qalan vəsaiti erməni patronuna göndərir və bunun müqabilində faiz alır.

İddiaya görə, Zakif İsbatovun bu işini Naxçıvanda Ədalət Abdullayev adlı şəxs həyata keçirir. O da təbii ki, öz xidmətləri sayəsində Zakif İsbatovda yaxşı maaş alır.

Maraqlıdır ki, erməni ortaqları təkcə biletdən qazanmırlar. Yüklərin daşınması onlara daha çox pul qazandırır. Təsəvvür edin ki, erməni Andrey Martirosov belə, bu məsələdə azərbaycanlı ortaqlarından 5 dəfə insaflı davranır. Belə ki, Martirosov hər kq. yükə 1 dollar istədiyi halda, Məşhur Gülməmmədli zavallı Naxçıvan sakinlərindən 6 dollar alır. Təbii ki, bunun 1 manatı erməni patrona, 5 dolları isə yerli rəhbərliyin cibinə gedir.

Əlbəttə ki, Məşhur Gülməmmədli bu boyda hoqqanı təkbaşına çıxara bilməz. İddialara inansaq, onun arxasında Vasif “xan” həzrətlərinin böyük oğlu Rza Talıbov dayanır.

Düşünə bilərsiniz ki, binəva Məşhur Gülməmmədli nə etsin? Rusiyada Naxçıvanla işləmək istəyən tək aviaşirkət var, o da “Utair”dir. Məşhur Gülməmmədli də məcburən onunla işləyir.

Mənbəmizin bizə təqdim etdiyi sənədlər isə ayrı mətləblərdən xəbər verir. Sənədlərdən aydın olur ki, 01 avqust 2021-ci ildə Naxçıvan Beynəlxalq Hava Limanının direktoru Məşhur Gülməmmədli ilə “ALFA-TRAVEL” MMC şirkəti arasında əməkdaşlıq müqaviləsi imzalanıb. Şirkətin müdiri Şükür Sailxan oğlu Şahmərdanovun imzaladığı bu müqaviləyə əsasən, o, Naxçıvan-Moskva reysi təşkil etməyi öhdəsinə götürüb. Özü də “Utair”dan xeyli ucuz qiymətə, cəmi 180 manata. Hətta bu xidməti yerinə yetirmək üçün biri Naxçıvan aeroportunda, digəri Ordubad rayonunda 2 ofis də götürüb. Hər ofisə ayda 400 manat kirayə haqqı ödəyib. Halbuki aeropot bu ofisləri ona müftə verməli imiş.

Bütün bu razılaşmalara baxmayaraq, “ALFA-TRAVEL” MMC Naxçıvanda cəmi 2 ay işləyə bilib. Daha sonra nədənsə işini dayandırıb. Mənbəmizin bunu onunla izah edir ki, tərəflər arasında şifahi sövdələşmələr baş tutmayıb. Belə ki, Məşhur Gülməmmədli tərəf-müqabilindən ayda 5 min manat əlavə rüşvət istəyib. Şükür Şahmərdanovun isə bu tələbi yerinə yetirməyə gücü çatmayıb. Beləcə, anlaşma pozulub, Moskvaya uçmaq istəyən Naxçıvan sakinlərinin ümidi “Utair”ə bağlanıb.





Mənbəmizin iddiasına görə, Naxçıvan sakinlərindən hər ay yüzminlərlə manat pul qazanan Andrey Martirosov erməni millətçisidir və Ermənistandakı daşnakları maliyyələşdirir. O da iddia olunur ki, Andrey əslən Bakı ermənisi imiş.

Bu iddialar doğrudursa, qəribə mənzərə ortaya çıxır. Sanki Rza Talıbovun himayəsi altında erməniyə məxsus bir rus aviaşirkətinə Naxçıvanda inhisarçılıq ortamı yaradılır. Və bu inhisardan Rza Talıbov da, Məşhur Gülməmmədli xeyli qazanc əldə edir. Bu isə elə ortaqlıq demək deyilmi?
Ovqat.com

Baş redaktor kollektiv üzvlərini həmkarlarına qarşı çıxış etmək üçün kütləvi şəkildə məhkəməyə göndərib

10 noyabr 2022-ci il tarixində jurnalist Qaşqay Ziyəddinoğlunun (Qaşqay Ziyəddin oğlu Ramazanovun) Yeni Azərbaycan Partiyasının (YAP) rəsmi mətbu orqanı olan “Yeni Azərbaycan” qəzetinə qarşı məhkəmə iddiası əsasında Nərimanov Rayon Məhkəməsinin hakimi Aytən Novruzovanın sədrliyi ilə növbəti hazırlıq iclası keçirilib.

Qaşqay Ziyəddinoğlunun media orqanları üçün yaydığı açıqlamasında qeyd edilir ki, “Yeni Azərbaycan” qəzetinin baş redaktoru Alqış Musayev az qala kollektivin yarısını budəfəki hazırlıq iclasında yalançı şahidlik etmək üçün məhkəməyə göndərib. Hazırlıq iclasında A.Musayevin tutduğu vəkil əvvəlcə iddiaçıya hədə-qorxu gəlməyə başlayıb: “Hələ bu sənin yaxşı günlərindir”. Sonra A.Musayevin qəsdən göndərdiyi və gərginlik yaratmağa çalışan şahidlərin ifadələri dinlənilib, işlə bağlı sənədlər məhkəməyə təqdim edilib.

Daha sonra jurnalistin “Yeni Azərbaycan” qəzetinə qarşı iddiası əsasında məhkəmə prosesinin baxış iclası 30 noyabr 2022-ci il tarixinə təyin olunub.

Xatırladaq ki, məhkəmə iddiası Qaşqay Ziyəddinoğlunun qanunsuz olaraq işdən azad edilməsinə görə qaldırılıb və iddiaçı cavabdeh tərəfdən işə bərpa olunmasını, məcburi işburaxma dövrü üçün əməkhaqqının tam şəkildə ödənilməsini, habelə son 10 ay ərzində peşəkar fəaliyyətinə maneçilik törədildiyinə, işgüzar nüfuzuna xələl gətirildiyinə görə əlavə təzminat tələb edir.

Məlumat üçün onu da bildirək ki, tanınmış jurnalist, siyasi elmlər üzrə fəlsəfə doktoru Qaşqay Ziyəddinoğlu Milli Mətbuatın 145 illik yubileyi ilə əlaqədar olaraq 2020-ci ildə Prezident İlham Əliyevin Sərəncamı ilə Azərbaycanda kütləvi informasiya vasitələrinin inkişafındakı xidmətlərinə görə “Tərəqqi” medalı ilə təltif edilib.

Asif Mehman “Kontakt Home” mağazalar şəbəkəsindən şikayətçi olan yüzlərlə müştəridən biridir.

Teref.Az xəbər verir ki, Asif Mehman şirkətdən şikayətini belə dilə gətirir:

"“Kontakt Home”dan telefon alanda diqqətli olun, geri qaytarmaq mümkün olmayacaq. Deməli, 10 gün əvvəl “Kontakt Home”un “İnşaatçılar” filialından telefon aldıq, dostum üçün. Telefonda heç bir problem yox idi, sadəcə kamerası zəif idi. “Kontakt Home”da eyni qiymətə daha yüksək keyfiyyətli kamerası olan telefonla dəyişmək qərarına gəldik. Amma sağ olsunlar, başa saldılar ki, belə şey mümkün deyil. 14 gün ərzində məhsulun qaytarılması hüququ flan boş söhbətdir".

“Kontakt Home” bu prinsiplə işləyir: “Pulunu ver mənə, itil cəhənnəmə!”

Asif deyir ki, filialın mağaza müdiri telefonun əmtəə görünüşünün pozulduğunu bildirib:

“Daha doğrusu, telefonun arxasında mikroskopla görünən bir cızıq tapdılar. Bunu da əsas gətirdilər ki, məhsulun əmtəə görünüşü pozulub . Bizimlə bərabər digər müştəriyə də eyni sözləri deyib yola saldılar. Yəni, uzun sözü qısası “Kontakt Home”dan mal alanda bilin ki, qaytarmaq və ya dəyişmək mümkün deyil”.

“Bizə “Kontakt Home”dan şikayətlər yağış kimi "yağır". Elə bu gün 3 telefon zəngindən şikayət gəldi və onları dövlət orqanlarına yönəltdim”.

Bu fikirləri Demokrat.az-a açıqlamasında Azad İstehlakçılar Birliyinin (AİB) sədri Eyyub Hüseynov deyib. Birlik sədri etiraf edir ki, bu şirkətl bağlı həddindən artıq böyük problemlər yaşanır:

“Ümumiyyətlə, “Kontakt Home” qanunları ayağının altına alıb gedir. “Kontakt Home”dan gələn şikayətlərin bəzilərinin məzmununu deyə bilərəm. Məsələn, istehlakçı görür ki, “şeş qoşa” oyunu oynanılır. Deyir ki, bəxtimi yoxlayım. “Şeş qoşa“ oynayır, uda bilmir və gedir mal alır. Amma evə gedəndə aldığı mal xarab çıxır, istəyir onu dəyişdirsin. Lakin “Kontakt Home” üz tutanda, ona deyirlər ki, sən “Şeş qoşa” oynamısan, ona görə də aldığım mal qaytarılmır”.

E.Hüseynov iddia edir ki, şirkət istehlakçıları aldatmaqla məşğuldur:

“Bir sözlə, “Kontakt Home” bu prinsiplə işləyir: “Pulunu ver mənə, itil cəhənnəmə!”. Yəni, istehlakçıları aldatmaq üçün böyük yarış gedir. Bunun qarşsını almaq üçün ciddi işlər görmək lazımdır. Hətta, sonuncu ərizədə “Kontakt Home” sahibinin deputat olduğu göstərilir. Həmin deputatın köməkçisinə də zəng vurdum. Dedim, "qardaş, bu işləri həll edin". Heç o da əhəmiyyət vermədi. Axırda şikayəti İqtisadiyyat Nazirliyinə göndərdim. Yaxşı olar ki, bu deputat bir çarə qılsın buna. Bu, biabırçılıqdır. Bütün bunun da səbəbi odur ki, qanunlar zəifdir. İstehlakçıların hüquqların müdafiəsi haqqında qanun 1995-ci ildə qəbul olunub. Ondan bəri qanunda dəyişiliklər aparılıb və hamısı da istehlakçının zərərinədir. Dövlət qurumları, deputatlar buna əhəmiyyət vermir. Xüsusən, “Kontakt Home”dan böyük texniki mallardan şikayətlər gəlir. Şirkət bu şikayətlərə birmənalı şəkildə əhəmiyyət vermir”.\\AMİA.Az