Bakıda Səməd Vurğun küçəsi ilə Filarmoniya bağını birləşdirəcək nəhəng piyada zonası yaradılacaq...

Bunu mediaya müsahibəsində Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyinin İdarə Heyətinin (AYNA) sədri Anar Rzayev deyib. Onun sözlərinə görə, ilk dəfə avtomobillərin hərəkətinin tamamilə məhdudlaşdırılması layihəsi Xaqani bağının ətrafında həyata keçirilib, hazırda isə bu ərazi genişmiqyaslı yenidənqurmadan sonra bütünlüklə piyada zonasına çevrilib: "Hazırda belə zonanın yaradılması metronun “28 May” stansiyasının qarşısındakı meydanda davam edir”.

Əziz Əliyev küçəsində avtomobil hərəkətinin məhdudlaşdırılmasına gəlincə, AYNA-nın sədri bildirib ki, bu, Nizami küçəsindən başlayan piyada zonasının genişləndirilməsinə, mikromobillik xətlərinin çəkilməsi və onların İstiqlaliyyət küçəsindəki mövcud zolaqla birləşdirərək Dənizkənarı Milli Parka doğru uzadılmasına şərait yaradacaq: "Bütün bunlar Bakıda mobilliyin və piyada zonalarının daha da inkişaf etdirilməsinə töhfə verəcək. Turizm aspektindən danışsaq, Əziz Əliyev küçəsinin piyada zonasına çevrilməsi və İçərişəhərin sakinlərin avtomobilləri istisna olmaqla nəqliyyat vasitələri üçün bağlanması turistlərin marağını artıracaq, ziyarətçi axınının çoxalmasına əlverişli şərait yaradacaq".

***

"Təzadlar"dan: biz AYNA rəhbərinin bu arzu və istəklərinə daim dəstək vermişik, yenə də dəstəkləməyə hazırıq. Lakin hazırda AYNA-nın işgüzar nüfuzuna xələl gətirən, ictimai narazılıq yaradan 3 problemi var: harda gəldi parklanma, harda gəldi velosiped və BUS zolağı! Məsələn, bircə nümunə: əməkdaşımız bu gün Xocalı prospektində ("Xətai" metrostansiyasının qarşısı) yol 4 zolaqlıdır və "28 may"dan gələn və Əhmədli, Zığ, Hövsan, Günəşli və s. istiqamətə gedən çoxsaylı avtobusların və digər nəqliyyat vasitələrinin ən çox sıxlığı olan yoldur... AYNA əməkdaşları indi görün neyləyib: yolun bir zolağı bəzək üçün olmayan velosipedçilərə ayrılıb, bir zolağı parklanmaya verilib, bir zolaq da avtobuslara. Qalıb bu qədər sıxlıq yaşanan sürücülərə cəmi bir zolaq!

İndi siz deyin, bu əcaiblikdir, yoxsa nə?! Hansı ki, Xocalı parkının ortasında geniş zolaq var, velosipedçi, əgər varsa, olsa, ordan istifadə edə bilər...

A.Məmmədli

Xəbər verdiyimiz kimi, ötən gün paytaxtın Sabunçu rayonu ərazisində 16 yaşlı yeniyetmə H.Quliyev öz həmyaşıdı Y. Mirzəyev tərəfindən kəsici alətlə qətlə yetirilib.

Bu gün hadisənin həmin rayonda yerləşən 71 nömrəli tam orta məktəbdə şagirdlər arasında baş verməsi ilə bağlı iddialar yayılıb.

“Qafqazinfo”nun əldə etdiyi məlumata görə, hadisə ötən gün 15:30 radələrində dərsdənkənar vaxtda qeydə alınıb. Qətlə yetirilən şəxs 71 nömrəli məktəbin XI sinif şagirdidir. Hadisəni törədən şəxs isə məktəbli deyil, ötən il lX sinifdən sonra təhsilini davam etdirməyib.

İlkin araşdırmalar zamanı məlum olub ki, onlar arasında sosial şəbəkədə mübahisə yaranıb. Daha sonra yeniyetmələr yer təyin edərək görüşüblər. Bu zaman Y. Mirzəyev həmyaşıdının bud nahiyəsinə bıçaqla zərbə endirib. Xəsarət ölümcül olmasa da, bıçaq zərbəsi digərinin vena damarını kəsib və o, çoxlu qan itirib. 16 yaşlı oğlan xəstəxanaya çatdırılsa da, vəfat edib.

Faktla bağlı Cinayət Məcəlləsinin 126.3-cü (Qəsdən sağlamlığa ağır zərərvurma-ölümlə nəticələndikdə) maddəsi ilə iş başlanılıb. Cinayətdə şübhəli bilinən şəxs polis tərəfindən müəyyən edilərək saxlanılıb.

Sabunçu Rayon prokurorluğu hadisə ilə bağlı məlumat yayıb. Bildirilib ki, oktyabrın 2-də yetkinlik yaşına çatmayan H.Quliyevin almış olduğu xəsarətdən müalicə aldığı xəstəxanada ölməsi barədə rayon prokurorluğuna məlumat daxil olub.

Araşdırmalarla yetkinlik yaşına çatmayan Y.Mirzəyevin Zabrat qəsəbəsi ərazisində aralarında yaranmış mübahisə zamanı bıçaqla bud nahiyəsinə xəsarət yetirməsi nəticəsində onun xəstəxanada ölməsinə əsaslı şübhələr müəyyən edilib.

Faktla bağlı Cinayət Məcəlləsinin 126.3-cü (qəsdən sağlamlığa ağır zərər vurma ehtiyatsızlıqdan zərərçəkmiş şəxsin ölümünə səbəb olduqda) maddəsilə cinayət işi başlanıb, Y.Mirzəyev iş üzrə şübhəli şəxs qismində tutulub.

Hazırda ibtidai istintaq davam edir.

Talassemiyadan əziyyət çəkən uşaqlar üçün toplanmış vəsaitləri dələduzluq yolu ilə ələ keçirməkdə ittiham olunan "Urmedhelp” və “My Doc Tour” adlı şirkətlərin sahibi Nuridə Seyidova və digər iki nəfər – Aynur Bayramova ilə Aysel Məmmədovanın cinayət işi üzrə məhkəmə prosesi keçirilib.

Teleqraf.com xəbər verir ki, Bakı Ağır Cinayətlər Məhkəməsində hakim Azad Məcidovun sədrliyi ilə keçən prosesdə Aynur Bayramova ifadə verib.

O bildirib ki, xəstələr pulu onun yanında Nuridə Seyidovaya verib: “Zərərçəkən Kəmalə Nuriyevanı Talassemiya Mərkəzindən tanıyıram. O, pulu mənim yanımda Nuridəyə verib. Digər zərərçəkən Nüşabə Məmmədovadan 34 min manat alınıb. O, Zaur Baxşəliyevin verilişindən gəlmişdi. Nuridə özü Zaurla danışıb, xəstəni onun verilişindən gətirib. Çek də Zaura təqdim olunub. Bu hadisə Zaur Baxşəliyevin "Bizimləsən" verilişində talassemiyalı xəstələrə pul yığlan zaman baş verib. Nuridə də həmin verilişə gedib, Zaurla görüşüb”.

Aynur Bayramova qeyd edib ki, zərərçəkənlər Taleh Hacı Məmmədov 34 min, Ramin İsmayılov 25 min 500, Elnur İsfəndiyarov 25 min, Vüqar İsayev 30 min, Laura Həsənova isə 51 min manat pulu onun yanında Nuridə Seyidovaya veriblər.

Daha sonra ifadə verən zərərçəkən Şahbacı İsayeva bildirib ki, Aynur Bayramova ilə Talassemiya Mərkəzində ayrılan ayrıca otaqda görüşüb: “Aynur Bayramova kim idi ki, mərkəzdə ona ayrıca otaq ayırmışdılar. Ona bu şəraiti Talassemiya Mərkəzində baş həkim vəzifəsində işləyən Xuraman xanım yaratmışdı. Aynur Bayramova Zaurun verilişində talassemiyalı uşaqlara pul yığılarkən 60 min manat pulun da onlar tərəfindən qarşılanacağını deyib. Mən ümumilikdə onlara 20 min dollar pul vermişəm, cəmi 3500-nü qaytarıblar. Qalan pulumu tələb edirəm”.

Aynur Bayramova zərərçəkənin sualına cavab olaraq bildirib ki, o "Antalya Medical Park"ın əməkdaşı olub, ona görə də mərkəzdə ona xəstə qəbulu üçün şərait yaradıblar.

Hakim Azad Məcidov bildirib ki, Talassemiya Mərkəzinə bununla bağlı sorğu göndərilib, lakin Aynur Bayramovanı tanımadıqlarını deyiblər. “Aynur sən beş il ərzində Türkiyəyə qan aparmısan, heç soruşan olmayıbmı ki, niyə və hara aparırsan?", - deyə hakim soruşub.

Aynur Bayramova isə Talassemiya Mərkəzində baş həkim vəzifəsində işləyən Xuraman adlı xanımın icazəsi olduğunu bildirib.

Növbəti proses oktyabrın 9-da davam edəcək.

İttihama görə, talassemiyalı xəstələrin valideynlərinin Daxili İşlər Nazirliyinə müraciətindən sonra ötən ilin fevralında cinayət işi başlanılıb.

Müəyyən edilib ki, Nuridə Seyidova digərləri ilə əlbir olaraq 36 talassemiya xəstəsinin valideynlərinin etibarından sui-istifadə edərək həmin şəxslərin övladlarını Türkiyədə müalicə etdirmək adı ilə 1 milyon manata yaxın dələduzluq edib.

Qeyd olunub ki, övladı qan xəstəliyindən əziyyət çəkən bir neçə valideyn Nuridə Seyidovaya ümumulikdə 67 min dollar veriblər. Nuridə Seyidova valideynlərə söz verib ki, sənədlər hazırlanandan sonra azyaşlı xəstələri Türkiyənin Antalya şəhərindəki “Antalya Medical Park” hospitala yollayacaq. Amma pulu alsa da, vədinə əməl etməyib.Bundan başqa, Nuridə Seyidova yalandan bildirib ki, Şəkinin Cumakənd kənd sakini Vüqar İsayevin talasemiyadan əziyyət çəkən qızı Gülbər İsayevanın ilik transplantasiyası üçün tələb olunan laborator müayinələr, donor xərci, cərrahi əməliyyat və digər xərcləri qarşılamaq üçün tələb olunan pulu sponsorlar ödəyəcəkdilər. Guya əməliyyata 70 min dollar tələb olunub, onun da 20 min dollarını “Çinar Plaza”da ofisdə Nuridə Seyidova ondan alıb, qalan məbləği isə yardım olaraq xaricdəki donor təşkilatlar ödəyəcəyinə vəd edib. Sonra zərərçəkmişə məlum olub ki, ortada nə donor var, nə bir şey.

Digər zərərçəkmiş Tural Nəsmiyev iki azyaşlı övladını müalicəsi üçün 2022-ci ilin mayında Nuridə Seyidovaya 35 min dollar verib. Nuridə Seyidova onun övladlarının Türkiyədəki Samsun şəhərində müalicə olunacağını bildirib. Həmin ilin oktyabrında Türkiyəyə gedib xəstəxanada gözləməyi tapşırıb. Tural Nəsmiyev 3 aydan çox həmin xəstəxanada qalsa da, nə donor, nə də əməliyyat olub. Hər dəfə Nuridə Seyidovayla əlaqə saxlayanda, sonuncu ona səbrli olmağı məsləhət görüb.Nəhayət, aldadıldığını başa düşən Tural Nəsmiyev Türkiyədə keçirdiyi aylar ərzində xərclədiyi 8 min manat ziyanla geri dönüb.İttiham aktında göstərilib ki, Nuridə Seyidova vətəndaşlardan pulları əsasən “Çinar Plaza”dakı ofisdə alıb.

İstintaq zərərçəkən kimi 36 nəfəri müəyyən edib. Bunlar azyaşlı övladları talassemiyadan əziyyət çəkənlərdir.

Dəstə üzvləri zərərçəkmişlər Ceyran Musayeva və Elman Nuriyevdən 20 400, Məsumə Hacıyeva, Ömər Məmmədov və Sahid Mövsümovdan 17 000, Mənsur Qarayev, Natiq Qubatov və Elnur İsbəndiyarovdan 25 500, Kəmalə Muliyeva, Nüşabə Məmmədova, Taleh Hacıməmmədov, Şahbacı İsayeva, Xəyal İlmanovdan 34 000 manat məbləğində vəsaiti alaraq dələduzluq ediblər.

Nuridə Seyidova öz qulluq mövqeyindən istifadə etməklə Elxan Əliyevdən 12 min 745 manat və Rasim Cavadovdan 25 min 500 manat alaraq onların övladlarını Türkiyədə əməliyyat olunmasına köməklik göstərəcəyi ilə bağlı yalan vəd verib.Daha sonra Nuridə Seyidova digər təqsirləndirilən Aysel Məmmədova ilə qabaqcadan əlbir olub, Tural Nəsmiyevdən 59 min 500 manat, Zeynəb Cəlilovadan 25 min manat, Kamil Əhmədovdan 23 min manat, Ramin Dadaşovdan 51 min manat, Xəyal İsayevdən 51 min manat, Lamiyə Hüseynovadan 20 min 50 manat, Nərgiz Mahmudovadan 9 min manat, Elnarə Xanmirzəyevadan 25 min manat, Sevinc Səmədovadan 22 min 500 manat, Elvin Fətəliyevdən 25 min manat alıb.O da müəyyən edilib ki, Nuridə Seyidova tanışı Aysel Bayramova ilə əlbir olaraq, Aynur Orucova, Solmaz Eyvazova və Vüqar Eminovdan 25 500, Laura Həsənovadan 51 000, Günay Ağayevadan 25 000, Aytəkin İsayevadan 19 000, Elnaz Hacıyevadan 5 000, Faiq Nəcəfovdan 5 100 manat məbləğində pul alıb.

Övadları xəstəlikdən əziyyət çəkən zərərçəkmişlər – Sevinc Səmədova, Faiq Nəcəfov, Rlnur İsbəndiyarov, Xəyal İlmanov, Kəmalə Muliyeva, Elman Nuriyev, Taleh Hacıməmmədov, Elvin Fətəliyev, Ceyran Musayeva, Mənsumə Hacıyeva, Solmaz Eyvazova, Nüşabə Məmmədova, Mənsur Qarayev, Lamiyə Hüseynova, Sahid Mövsümov, Aysel Abdullayeva, Tural Nəsmiyev, Vüqar İsayev, Elnarə Xanmirzəyeva, Kamil Əhmədov, Elnaz Hacıyeva, Vüqar Eminov, Aytəkin İsayeva, Ramin Dadaşov, Aynur Orucova, Zeynəb Cəlilova, Günay Ağayeva, Ömər Məmmədov, Xəyal İsayev, Laura Həsənova, Rasim Cavadov, Nərgiz Mahmudova, Natiq Qubatov, Şahbacı İsayeva, Ramin İsmayılov və Elxan Əliyevdir.

Bakıda vətəndaşlara qarşı külli miqdarda dələduzluq etməkdə təqsirləndirilən “Instapower”in Azərbaycan üzrə nümayəndəsi Orxan Rasim oğlu Babazadənin cinayət işi üzrə növbəti məhkəmə prosesi keçirilib.

Bizim.Media xəbər verir ki, Bakı Ağır Cinayətlər Məhkəməsinin hakimi Azad Məcidovun sədrliyi ilə keçirilən prosesdə Orxan Babazadənin cinayət işində olan bəzi zərərçəkmiş şəxslərin ibtidai istintaqda verdikləri ifadələr elan olunub.

Məlum olub ki, zərərçəkmişlər "İnstapower"ə müəyyən pullar yatırsalar da, heç bir məbləğ geri qayıtmayıb. Hakim Azad Məcidov Orxanın həyat yoldaşı Leyla Babazadənin məhkəmə prosesində iştirakını zəruri bilib və növbəti prosesdə iştirakı ilə bağlı qərar qəbul edilib:

"Bütün zərərçəkənlər ifadələrində Leyla Babazadənin adını çəkirlər. Onun iştirakı vacibdir. Orxanın və onun həyat yoldaşının açdığı M10 nömrələrindən 76 milyon manat Honkonq şəhərində olan şəxsin adına pul köçürülüb".

Sonra vəkil Mirdamət Qədirli bir neçə əlavə şahidin- qayınatası Kamran Məmmədov, atası Rasim Babazadə və həyat yoldaşı Leyla Babazadənin məhkəməyə çağırılması barədə vəsatət verib.

Həmçinin Cavid Qasımov adlı şəxsin hesabına 100 min manat köçürülə-köcürülə nəyə görə qıraqda qaldığını söyləyib:

"Onun da məhkəmədə əlavə şahid qismində çağırılmasını sizdən xahiş edirik".

Həmçinin Orxan Babazadənin həyat yoldaşı tərəfindən vəkil Aytac Cəfərovaya 46 min pulun verilməsi ilə bağlı məsələ də iclasda müzakirə olunub. Məlum olub ki, həmin nüansla bağlı Səbail rayon Polis İdarəsində araşdırma aparılıb, cinayət işinin başlanması rədd edilib. Belə ki, Aytac Cəfərova Leyla Babazadədən həmin məbləği sayt açmaq adı ilə alıb.

Bir neçə zərərçəkmişin nümayəndəsi M10 hesabından pullar köçürülən şəxslərin məhkəmədə əlavə şahid qismində çağırılmasını zəruri bilib, Orxanın qohumlarının isə məhkəməyə çağırılmasını hakimin mülahizəsinə buraxıb.

Hakim vəkil Mirdamət Qədirlinin vəsatətini təmin edərək mobil operatorlara adıçəkilən nömrələrin kimə məxsus olması ilə bağlı sorğunun verilməsi barədə qərar qəbul olunub.

Xatırladaq ki, həmin şəxslərin adından 4 milyon manat pul dövr edilib.

Məhkəmə prosesi oktyabr ayının 16-na kimi təxirə salınıb.

Qeyd edək ki, cinayət işi üzrə 53 zərərçəkmiş var və ümumi dəymiş ziyan isə 256 min manatdan artıqdır.

Orxan Babazadəyə qarşı Cinayət Məcəlləsinin 178.3.2-ci (dələduzluq, külli miqdarda ziyan vurmaqla) maddəsi ilə ittiham irəli sürülüb.

““Unibank”-dan dan Albalı kartı vasitəsilə 2 min manat kredit götürdüm. Onlar da mənə öncədən deməmişdilər ki, Albalı kartı vasitəsilə kredit götürəndə 30 faizlə ödəyirsən. Düşündüm ki, 100, 200 manatdır da, hər ay ödəyəcəm. Aylığa böldülər, dedilər ki, ayda 100 manat ödəyəcəksən. Mən də razılaşdım. Ümumi 2600 manat pul vermişdilər. Birinci, ikinci və üçüncü ay 100 manat ödədim. Sonra telefonuma “Unibank”-ın tətbiqini yüklədim. Hər ayın 5-də maaşdan-maaşa krediti ödəyirdim. Hər ayın sonunda da görürdüm ki, ödədiyim 100 manat yenidən 100 manat olub. Sən demə ödədiyim kredit yalnız faizə çıxıb. Zəng edib maraqlanandan sonra məlum oldu ki, onlar krediti 30 faizlə veriblər. Mənə şifahi şəkildə faizini aşağı deyiblər, sənədlərdə 30 faiz yazıblar. Məni aldadıblar”

Bunu Moderator.az-a açıqlamasında şikayətçi Taleh Qarayev deyib. O krediti ödəməkdən imtina etdiyini vurğulayıb.

“Pulum olmadığı üçün hazırda krediti ödəmirəm. 2-3 dəfə yığıb soruşublar. Mən də pulumun olmadığını əsas gətirmişəm. Nə vaxt olarsa o zaman da ödəyərəm. Borcum 2700 manatdır. Sonuncu dəfə mənə dedilər ki, 65 manat ödə, faizini silək, sonra qaldığın yerdən ödəyərsən. 65 manatı ödədim. İstəyirlər gəlib maaşımdan tutsunlar, çalışdığım yerə getsinlər.. Nə istəyirlər onu da etsinlər. İcraçı mənə zəng vurub kobud şəkildə bildirdi ki, krediti ödəyə bilməsən maaşından tutulacaq. Mən işdən çıxandan sonra kimdən alacaqsan? Mənə deyirlər ki, axır-əvvəl səndən pulu alacağıq. Mən işsiz olandan sonra pulu kimdən alacaqsan? Pulum yoxdur, oğurluq edib gətirib sənə pul verim? Mənə əvvəldən deyərdin ki, 30 faizlə verirəm, bəlkə heç kredit götürməyəcəkdim?! 10 aya 100 manatdan hesablasaq kreditin min manatı bitməli idi. Çekləri də saxlamışam. İndi min manat boşluqa gedib?! Əgər 10 ayımı hesablayırlarsa, qalan min manatı ödəməyə hazıram. Əks halda ödəməyəcəm. Çünki ödədikcə çoxalır” deyə şikayətçi bildirib.

TƏBİB-in balansında olan iki xəstəxana elan etdiyi tenderin nəticələrini açıqlayıb. Dia-az.Media Tribunainfo.az-a istinadən xəbər verir ki, onlardan biri Fizulu rayon Mərkəzi Xəstəxanasıdır.

Bu qurum müxtəlif çeşiddə mal-material və inventarların satın alınması üçün “VEST SUPPLY” MMC ilə 37.819 manatlıq satınalma müqaviləsi bağlayıb.

İkinci tender isə Masallı Mərkəzi Xəstəxanası tərəfindən reallaşdırılıb. Belə ki, TƏBİB-in tabeliyində olan səhiyyə ocağı yumşaq inventar, yataq ləvazimatları və xüsusi geyimlərin satın alınması məqsədi ilə eyni şirkətlə, yəni “VEST SUPPLY” MMC ilə 24.349,3 manatlıq müqavilə imzalayıb.

Qeyd edək ki, “VEST SUPPLY” MMC TƏBİB-lə yanaşı, Səhiyyə Nazirliyinin də sevimli şirkətlərindədir. Bunu sözügedən şirkətin TƏBİB-in tabeliyində olan xəstəxanaların keçirdiyi tenderlərin siyahılsından da aydın görmək olar. Belə ki, MMC 2021-ci ildən 2023-cü ilə qədər TƏBİB-in keçidriyi 30 tenderin qalibi olub ki, bu zaman 1.5 milyon manatlıq satınalma müqaviləsi imzalayıb.

Nəzərinəz çatdıraq ki, həmin tenderlərdən biri ötən ilin sonlarında reallaşıb. Sözügedən şirkət Bakı Baş Səhiyyə Mərkəzinin tenderinin də qalibi olub. Həmin vaxt MMC Bakı Baş Səhiyyə Mərkəzinə 699 min 985 manat 44 qəpiklik yumşaq inventarlar (döşək ağı, balış üzü ağ, kişi xəstə kastyumu, qadın xəstə kastyumu, balış, döşək qoruyucu və s.) satıb.

Tribunainfo.az-ın araşdırmalarına görə, “Vest Supply” MMC-nin hüquqi ünvanı isə Bakı şəhəri Binəqədi rayonu, Süleyman Sani Axundov, ev 2, m. 115-də yerləşir. Bir çox mənbələrdə aparılan dəqiqləşdirmələr nəticəsində məlum olub ki, bu şirkətə bir yox, bir neçə nəfər rəhbərlik edib. Belə ki, ilk olaraq “Azmed Tekstil” MMC kimi qeydiyata alınan şirkət sonradan “Vest Suply” adını alıb. Bu zaman zaman qanuni təmsilçisi Qurbanov Şahmurad Səfər oğlu olub. Daha sonra şirkətə Eyvazlı Hatəm Pərviz oğlu, Hacıyev Sahib Xamid oğlu, Adışirinli Aslan Xəqani oğlu, Ramazanov Murad Məhəmmədrəsuloviç rəhbərlik ediblər. Hazırda isə “Vest Supply” MMC-nin qanuni təmsilçisi Laçın Xabibullayeva Fətulla qızıdır.

Tribunainfo.az xəbər verir ki, şirkətə rəhbərlik etmiş şəxslərdən yalnız Eyvazlı Hatəm Pərviz oğlu barədə məlumat mövcuddur. Hatəm Eyvazlının şəxsi hesabında paylaşdığı məlumatdan belə görünür ki, “Vest Suplly” MMC-yə rəhbərlik etmiş bu şəxsin böyük iş təcrübəsi yoxdur. 2018-ci ildə universitetdən məzun olan Hatəm Eyvazlı cəmi 3 il sonra “Azmed Tekstil” MMC-yə rəhbərlik etməyə başlayıb. Şirkət dövlət qurumlarının keçirdiyi tender müsabiqələrini də əsasən Hatəm Eyvazlının rəhbərliyi dövründə udub.

Paytaxtın Xətai rayonunun sakinləri sularının kəsilməsindən narazıdırlar.

Onlar qeyd ediblər ki, suları bir neçə həftədir ki, kəsilib və hər dəfə boş vədlər verilsə də, suyun gəlişini bərpa etməyiblər.

Rayonun sakini Xatirə Rzayeva heç kənd evlərində belə bu qədər suyun kəsilmədiyini bildirib. O əlavə edib ki, "Azərsu"ya bir neçə dəfə müraciət ediblər, hər dəfə də onlar bərpa etdiyini deyib, ancaq heç bir dəyişiklik baş verməyib.

Su və kanalizasiya şəbəkələrinin istismarını sahəsinin rəisi Eldar Bəşirov deyib ki, su xəttində tıxanma olduğuna görə sular kəsilib, gün sonuna kimi də yenidən suların gəlişi bərpa olunacaq.

İŞBSTX-nin Mətbuat Xidmətinin əməkdaşı Aydan Xəlilova görülən işlərə yekun vurulduğunu və su probleminin artıq gün ərzində ortadan qaldırılacağını bildirib.

Ətraflı Real TV-nin süjetində:

Bakı şəhəri, Nərimanov rayon sakini Həsənov Əliməmməd Əliağa oğlu tərəfindən “Hürriyyət” qəzetinin redaksiyasına şikayət məktubu daxil olub. Şikayətçi bildirir ki, dövlət tərəfindən şəkər xəstələrinə ayrılan iynə və dərmanı ala bilmir:

“Hörmətli redaksiya!

Bildirim ki, 2003-cü ildən şəkərli diabet xəstəliyindən əziyyət çəkirəm. TƏBB-in Nərimanov Tibb Mərkəzinin tabeliyində olan 1 nömrəli poliklinikanın endokrinoloji kabinetində 2-ci tip şəkərli diabet xəstəsi kimi qeydiyyatdayam. Azərbaycan Respublikası Nazirlər Kabinetinin 13 may 2005-ci il tarixli 87 saylı qərarında şəkərli diabet xəstələrinə dövlət tərəfindən pulsuz verilməli olan şəkərsalıcı dərman preparatlarının, özünə nəzarət vasitələrinin və tibbi xidmətin siyahısı qeyd edilmişdir. Qeydiyyatda olduğum Nərimanov rayon Tibb Mərkəzinin tərkibində olan 1 nömrəli poliklinika Nazirlər Kabinetinin qeyd edilən qərarından irəli gələn öhdəliklərini yerinə yetirmədiyi üçün 18.12.2023-cü il tarixində iddia tələbi ilə Nərimanov Rayon Məhkəməsinə müraciət etdim. İşə baxan hakim Aytən Novruzova iddiamın təmin edilməməsi ilə bağlı qətnamə qəbul etdi.

Hələlik qətnaməni əldə edə bilmədiyim üçün iddiamın təmin edilməməsinin səbəbi haqqında dəqiq heç nə deyə bilmərəm. Baxmayaraq ki, məsələnin mənim xeyrimə həll olunması üçün məhkəməyə kifayət qədər dəlillər təqdim edilmişdir.

Mənim iddia tələbimlə başlanılmış 2(005) -909 /2024- nömrəli mülki iş üzrə məhkəmə 12.03.2024-cü il tarixdə qərardad qəbul edilmişdir. Mənə qlukometr üçün test çubuqlarının (qanda və sidikdə şəkərin miqdarını müəyyən etmək üçün) verilməsinin zəruriliyi qeyd edilsə də, onların aylıq miqdarı barədə tibbi ekspertiza təyin edilmişdir. Halbuki Nazirlər Kabinetinin 13.05.2005-ci il tarixli 87 nömrəli qərarında şəkərli diabet xəstələrinin qanda şəkərinin miqdarına nəzarət etmək üçün (ayda 25 test çubuğu) pulsuz test çubuqlarının verilməsini zəruriliyi, eləcə də miqdarı göstərilmişdir.

Ekpertizanın təyin edilməsi barədə məhkəməyə etiraz ünvanladım. Çünki “normativ hüquqi aktlar haqqında” Azərbaycan Respublikası Nazirlər Kabinetinin qərarları normativ hüquqi aktlar hesab olunur. Konustisiyanın 149-cu, həmçinin yuxarıda qeyd edilən qanunu 88-1-ci maddəsinə də uyğun olaraq ölkə ərazisində icrası bütün hüquqi və fiziki şəxslər üçün məcburidir.

Məhkəmə qərardadı ilə ekspert qismində Patoloji Anatomiya Birliyinə bu məsələ ilə bağlı ekspertizanın təyin edilməsinin qanunsuz olması barədə məktub göndərilmişdir. Buna baxmayaraq ekspertiza idarəsi səlahiyyət həddini aşaraq, yanlış rəy vermişdir.

Ədliyyə Nazirliyinə göndərdiyim sorğuya cavab olaraq nazirliyin qanunvericilik baş idarəsindən aldığım cavab Nazirlər Kabinetinin qərarı ilə bağlı ekspertizanın təyin edilməsinin qanunsuzluğunu təsdiq edir.

Müşahidələrim göstərir ki, şəkərli diabet xəstələrinin böyük əksəriyyəti Nazirlər Kabinetinin qeyd edilən qərarından məlumatsız olduğunu nəzərə alaraq, həmin şəxslərin məlumatlandırılması məqsədilə Nazirlər Kabinetinin 13.05.2005-ci il tarixli 87 nömrəli qərarını surətini sizə göndərməklə, saytınızda və qəzetinizdə yayılmasına yardımçı olmağınız xahiş edirəm”.