 |
|
|
"Genişlənən siyasi təsir dairəsi, miqyası və sayca artan iqtisadi əlaqələr, dərinləşən ictimai münasibətlər, tarixi-mədəni irsin canlanması, başqa sözlə, güclənən Türkiyə reallığı sayəsində gözümüzü yummaq və ya dünyada baş verən demək olar ki, hər hansı problemdən üz döndərmək lüksümüz yoxdur".
"TRT Haber"ə istinadla xəbər verilir ki, bunu Türkiyə prezidenti Rəcəb Tayyib Ərdoğan İzmir rayon bələdiyyə sədrliyinə namizədlərin irəli sürülməsi ilə bağlı keçirilən iclasda çıxışı zamanı deyib.
"Rusiya-Ukrayna müharibəsini sülh yolu ilə sona çatdırmaq cəhdlərimizdə həqiqət var. Balkanlarda və Qafqazda hər bir inkişafa diqqət yetirməyimizin və bu proseslərdə fəal iştirakımızın əsasında bu həqiqət dayanır. Bu həqiqət bizim Mərkəzi Asiyadan Cənubi Asiyaya, Avropadan Afrikaya qədər geniş bir ərazidə qurduğumuz geniş əlaqələr şəbəkəsinin əsasını təşkil edir. Qəzza zolağında fələstinlilərə qarşı törədilən zülmə, qırğınlara və qeyri-insani vəhşiliklərə verdiyimiz ən sərt cavabın əsasında da eyni həqiqət dayanır", - deyə Ərdoğan bildirib.
Kolumbiya hökuməti Argentinadakı səfirini məsləhətləşmələr üçün geri çağırmaq qərarına gəlib.
Publika.az xəbər verir ki, bu barədə Kolumbiya Xarici İşlər Nazirliyi məlumat yayıb.
Qeyd olunub ki, buna səbəb Argentina prezidenti Xavyer Mileyin kolumbiyalı həmkarı Qustavo Petro ilə bağlı açıqlamalarıdır:
“Xarici işlər naziri Kolumbiya hökuməti adından Argentinanın prezidenti Xavyer Mileyin yanvarın 25-də yayımlanan müsahibəsi zamanı Prezident Qustavo Petroya qarşı hörmətsiz və məsuliyyətsiz bəyanatlarına qarşı ən kəskin etirazını bildirir. Argentina Prezidentinin bəyanatlarının yaratdığı şərait nəticəsində hökumət dərhal Kolumbiyanın bu ölkədəki nümayəndəsi səfir Kamilo Romeronu məsləhətləşmələr üçün çağırır”, - XİN-in bəyanatında deyilir.
“Bir neçə gün əvvəl Moskva Ermənistanın xarici işlər naziri Ararat Mirzoyana İrəvan və Bakı arasında sülh müqaviləsini müzakirə etmək üçün Rusiya Federasiyasına səfər etmək üçün növbəti dəvət göndərib”.
Yeniavaz.com xəbər verir ki, bu barədə Rusiya Xarici İşlər Nazirliyinin sözçüsü Mariya Zaxarova brifinqdə danışıb.
“Keçən ilin sentyabrından başlayaraq dəfələrlə Ararat Samveloviç Mirzoyana sülh müqaviləsi məsələləri üzrə Moskvada məsləhətləşmələr üçün dəvət göndərilib, digər məsələlərlə yanaşı, müxtəlif səviyyələrdə ikitərəfli təmaslar zamanı da müzakirə olunub”, – Zaxarova bildirib.
Sözcü qeyd edib ki, İrəvana sonuncu siqnal bir neçə gün əvvəl göndərilib.
Ermənistanın Baş naziri Nikol Paşinyan bu gün Gürcüstana işgüzar səfərə gedəcək.
Bu barədə “Sputnik Gürcüstan” məlumat yayıb.
Məlumata görə, Paşinyan Gürcüstanın Baş naziri İrakli Qaribaşvili ilə görüşəcək.
Səfər çərçivəsində Ermənistan-Gürcüstan hökumətlərarası iqtisadi komissiyasının iclası da baş tutacaq.
Paşinyanın Gürcüstana getməsini sıradan səfər kimi dəyərləndirən politoloq Turab Rzayev "Sherg.az"a söyləyib ki, Ermənistan rəhbərliyinin səfər edəcəyi bir neçə ölkə var:
"Fransa, Gürcüstan və İran bu ölkələrə nümunədir. Rusiya ilə münasibətləri gərgin olduğuna görə Paşinyan uzun müddət oraya səfər etmir. Gürcüstan və Ermənistan qonşu dövlətlərdir. Eyni zamanda xeyli siyasi cəhətdən əlaqələri mövcuddur. Ermənistana gedən bütün magistral yollar Gürcüstan ərazisindən keçir. İstər limanlara, istərsə də, Rusiyaya gedən yollar Gürcüstan ərazisindən keçir. Ona görə də Gürcüstan, Ermənistan arasında bu cür məsləhətləşmələrin olması normaldır. Eyni zamanda son dönəmlər Qərb tərəfindən Gürcüstana qarşı təzyiqlər var. Gürcüstana Avropa İttifaqına namizəd ölkə statusu vermək məsələsi də var idi. Ermənistanda Gürcüstan ilə münasibətləri yaxşılaşdırmağa çalışır. Ermənistan bu şəkildə çalışır ki, gələcəkdə Avropa İttifaqına üzv olmaq üçün namizəd ölkə statusu alsın. Digər tərəfdən Ermənistanın silahlandırması sahəsində də Gürcüstana qarşı təzyiqlər yaranıb. Qərbin daimi planı İrandan keçməklə Ermənistan və Gürcüstan üzərindən Qara dənizə yol məsələsi idi. İstənilən halda Gürcüstanla müzakirələr Ermənistanın geosiyasi vəziyyətində xususi dəyişikliklər yaratmayacaq. Çünki Ermənistan hazırda Qərb və Şərqin toqquşduğu nöqtədədir. Yəni, Qərb ilə Ermənistan arasında təzyiqlərin yumşalması istiqamətində Gürcüstanın önəmli rolu olmayacaq. Həmçinin, Rusiya təzyiqlərinə qarşı da Gürcüstan Ermənistanı müdafiə edə bilməz".
AŞPA-da Azərbaycan nümayəndə heyətinin fəaliyyətini dayandırmasından sonra Bakının Avropa Şurasından çıxmaq və Avropa İnsan Haqları Məhkəməsinin yurisdiksiyasını tanımaqdan imtina etmək haqda düşündüyü gündəmə gəlib. Mövcud vəziyyətdə Bakı AŞPA-nın ədalətsizliyinə qarşı Avropaya ata biləcəyi addımlar haqda mesaj verir. Lakin bu baş verərsə, radikal gediş olacaq və əsas sual da Azərbaycanın niyə bu qədər kəskin mövqe sərgiləməsidir.
Məsələnin Avropanın insan haqları, demokratik prinsiplərlə bağlı istəklərindən qaynaqlandığını demək diletanlıq olar. Çünki rəsmi Bakı eyni məsələ ilə illərdir üz-üzə qalıb və AŞPA da illərlə eyni məsələləri gündəmə gətirib, amma buna görə Azərbaycana qarşı hansısa addım atılmayıb, yaxud rəsmi Bakı bu qədər kəskin mövqe sərgiləməyib.
İndi baş verənlərin arxasında Avropa, yaxud hansısa dəyərlərin qorunub-qorunmaması yox, Cənubi Qafqazdakı geosiyasi mübarizə dayanır. Konkretləşdirsək: Azərbaycandan Ermənistanın maraqlarının nəzərə almağını, Zəngəzur dəhlizini – Naxçıvana maneəsiz keçid ideyasını unutmağını, delimitasiyanı və sülh sazişini İrəvanın gündəliyinə uyğun qəbul etməsini istəyirlər;
Və baş verənləri insan haqlarına, demokratiyaya bağlayan Azərbaycandakıların əksinə, Avropada bunu gizlətmirlər də. AŞPA Laçın yoluna buraxılmamasını, “Qarabağ ermənilərinin qorunmasını” açıq şəkildə qeyd edir.
Bakının “bütün körpüləri yandırmaq” mesajı da Avropanın nə istədiyini bilməsindən qaynaqlanır. Bütün bunların Azərbaycan üçün sərfəli olmadığı aydındır, amma tərəzinin bir gözündə də Ermənistanın maraqları var və rəsmi Bakı anlayır ki, “qırmızı xətti”ndən geri çəkilsə, Azərbaycana rəhm etməyəcəklər, təcrübə ilə isbat olunub.
axar.az
Türkiyə Prezidenti Rəcəb Tayyib Ərdoğan iranlı həmkarı İbrahim Rəisi ilə görüşündə Suriya, İraq, Əfqanıstan və Cənubi Qafqazdakı vəziyyəti müzakirə edib.
AzVision.az xəbər verir ki, bu barədə Türkiyə lideri görüşdən sonra keçirilən mətbuat konfransında deyib.
Kirmanda baş vermiş terror aktını pisləyən Ərdoğan Türkiyənin bu sahədə mübarizədə İranın yanında olduğunu vurğulayıb:
"Biz qonşumuz İranla qarşılıqlı etimad və ümumi maraqlar əsasında münasibətlərimizin dərinləşməsinə önəm veririk. Biz görüşlərimizdə bu iradəni bir daha təsdiqlədik. Qəbul etdiyimiz qərarlar da bölgəmizin rifahı üçün böyük əhəmiyyət kəsb edir".
Prezidentlər eyni zamanda regional və beynəlxalq hadisələri, xüsusilə İsrailin Qəzzaya hücumlarını müzakirə edibçər.
Qeyd edək ki, mətbuat konfransından sonra Türkiyə ilə İran arasında enerji, azad zonalar, media, mədəniyyət, dəmir yolu nəqliyyatı və sürücülük vəsiqələrinin qarşılıqlı tanınması kimi məsələləri əhatə edən 10 müqavilə imzalanıb.
Azərbaycan nümayəndə heyəti AŞPA ilə əməkdaşlığı və təşkilatda iştirakını dayandırıb - BƏYANAT
Azərbaycan Respublikasının Avropa Şurası Parlament Assambleyasındakı (AŞPA) nümayəndə heyəti yanvarın 24-də qurumun iclasında bəyanatla çıxış edib.
Bəynatda deyilir:
“Azərbaycan Respublikası qürurlu, müstəqil, suveren, demokratik və multikultural bir dövlətdir. Demokratiya bizim şüurlu seçimimizdir və biz 1991-ci ildə müstəqilliyimizi bərpa etdikdən sonra Azərbaycanda insan hüquqlarının müdafiəsi və qanunun aliliyinin təmin edilməsi istiqamətində böyük irəliləyişlərə nail olmuşuq.
Avropa Şurası Parlament Assambleyasının (AŞPA) əsas məqsədi müxtəlif ölkələrin parlamentariləri arasında qarşılıqlı hörmət və bərabər hüquqlara əsaslanan dialoq üçün platforma olmaqdan ibarətdir.
Azərbaycan 2001-ci ildə Avropa Şurasına üzv olanda insan haqlarını və qanunun aliliyini müdafiə etmək məqsədi daşıyan bu təşkilatın Azərbaycanın beynəlxalq səviyyədə tanınmış ərazilərinin bir hissəsinin Ermənistan tərəfindən hərbi təcavüzə və işğala məruz qalması nəticəsində hüquqları pozulmuş yüz minlərlə azərbaycanlının hüquqlarının bərpasında Azərbaycana kömək edəcəyi və beləliklə regionda davamlı sülhün əldə olunması naminə ədalətin öz yerini tutacağı barədə səmimi bir ümid və gözlənti var idi.
2001-ci ildən 2020-ci ilə qədər olan 19 il ərzində AŞPA işğalçı dövləti - Ermənistanı Avropa Şurasının əsas dəyər və prinsiplərinə zidd hərəkətlərinə görə cavab vermək barədə qınamayıb. Burada söhbət xüsusilə etnik təmizləməyə məruz qalmış azərbaycanlı qaçqın və məcburi köçkünlərin insan haqlarına qarşı açıq-aşkar hörmətsizlikdən gedir.
Azərbaycanın təcavüz, işğal və zorakı separatizm üzərində tarixi Qələbəsindən, ərazi bütövlüyünün və suverenliyinin bərpa olunmasından sonra biz Azərbaycanı ləkələmək, Azərbaycan xalqına uzun müddətdir inkar edilən ədalətin bərpası istiqamətində ölkənin əldə etdiyi nailiyyətlərə kölgə salmaq üçün təşkil olunmuş qarayaxma kampaniyası ilə üz-üzəyik. Təxminən 20 ilə yaxın müddətdə Azərbaycan nümayəndə heyəti erməni işğalının ağır nəticələrini gündəmə gətirərkən bizə deyirdilər ki, AŞPA münaqişə ilə bağlı məsələlərin müzakirəsi üçün düzgün format deyil. İndi isə həmin AŞPA və həmin deputatlar bunun əksini deyir və Azərbaycana hücum etmək üçün heç bir fürsəti əldən vermirlər. Beynəlxalq hüququn selektiv şərhi, dövlətlərin ərazi bütövlüyü və suverenliyi ilə bağlı məsələlərə fərqli yanaşma bu biabırçı təklifin müəlliflərinin rüsvayçı və ikiüzlü xarakterini nümayiş etdirir.
Təəssüf ki, AŞPA-dan bəzi üzv dövlətləri hədəfə almaq üçün platforma kimi istifadə olunur. Müəyyən qərəzli qruplar AŞPA-nın əsas prinsiplərindən öz dar maraqlarının təmini məqsədilə sui-istifadə edirlər. AŞPA-da siyasi korrupsiya, ayrı-seçkilik, etnik və dini nifrət, ikili standartlar, təkəbbürlülük, şovinizm hökm sürən praktikaya çevrilib.
Biz Azərbaycanın AŞPA-dakı nümayəndə heyətinin etimadnaməsinə etiraz etmək təşəbbüsünü bu çirkin kampaniyanın tərkib hissəsi kimi dəyərləndiririk. Biz, həmçinin bu təşəbbüsü Azərbaycanda hazırda gedən seçki prosesinə əsassız müdaxiləyə yönəlmiş məqsədyönlü və qəbuledilməz cəhd, ölkəmizdə demokratik təsisatların fəaliyyətinə xələl gətirən məkrli addımların bariz nümunəsi kimi qiymətləndiririk. Nümayəndə heyətimizin etimadnaməsini ratifikasiya etməkdən imtina ilə bağlı təklif bütövlükdə Avropa Şurasının etibarlılığına və qərəzsizliyinə ciddi zərbə olacaq, bunun ciddi və geri dönməz nəticələrinə görə məsuliyyət tamamilə onun təşəbbüskarlarının üzərinə düşəcək.
Dünyada heç kim, o cümlədən bu zalda əyləşənlər Azərbaycanla təhdid və şantaj dili ilə danışa bilməzlər. AŞPA-nın tarixində heç vaxt bu təşkilat özünü belə biabırçı şəkildə aparmayıb.
AŞPA-da mövcud olan dözülməz irqçilik, Azərbaycanofobiya və İslamofobiya mühiti fonunda Azərbaycan nümayəndə heyəti AŞPA ilə əməkdaşlığı və təşkilatda iştirakını qeyri-müəyyən müddətə dayandırmaq qərarına gəlib”.
Nümayəndə heyəti bəyanatı səsləndirəndən sonra məkanı tərk edib.
İranla Pakistan arasında yaşanan gərginlik səngidi. İki ölkənin bir-birinin ərazisinə raket zərbələri endirməsinin ardından diplomatik kriz meydana gəlmişdi. Lakin bu, uzunmüddətli gərginliyə çevrilmədi. Artıq tərəflər səfirlərini də geri göndərmək barədə qərar qəbul ediblər. Həmçinin, İranın xarici işlər nazirinin yanvarın 29-da Pakistana səfər edəcəyi açıqlanıb.
Maraqlıdır, İranla Pakistan arasındakı gərginliyin qısa çəkməsinə səbəb nədir?
Mövzu ilə bağlı Hit.az-a açıqlama verən politoloq Elçin Abdullayev bildirib ki, İranla Pakistan arasındakı münasibətlər zaman-zaman gərgin hal alır:
"Düşünürəm ki, nüvə dövləti olan Pakistanla nüvə dövləti olmaq iddiasında olan və o istiqamətdə addımlar atan İran arasında müharibə olma ehtimalı yoxdur. Çünki bu müharibənin başlaması bütün regionu fəlakətə sürükləyə bilər. Müəyyən diplomatlar arasında gərginlik olsa da, iki ölkə arasında hərbi toqquşma olmayacaq".
Ekspert hesab edir ki, Pakistanın İrana cavabı müharibə mesajı deyildi:
"Burada 2 məqama diqqət çəkmək lazımdır. Birincisi, Pakistanda seçkilərin keçiriləcəyini nəzərə almaq lazımdır. Seçkilər ərəfəsində rəsmi İslamabadın bu cür etiraz bildirməsinə səbəb əhalinin indiki hökumətə yenidən etimad göstərməsi məqsədi daşıyırdı. Yəni buna görə də Pakistan mütləq şəkildə İrana sərt cavab verməli idi.
Pakistanın sərt ritorikasının ikinci səbəbi isə İranın daha çox üzərinə gəlməsinin qarşısını almaq idi. Amma indiki vəziyyətdə tərəflərin heç biri müharibənin başlamasında maraqlı deyil. Təbii ki, bəzi böyük güclər bu dövlətləri müharibəyə sürükləməyə çalışırlar. Lakin hər iki dövlətin siyasətçilərinin yaranmış gərginliyin tez bir zamanda aradan qaldırmağa çalışacaqlarını düşünürəm".
"Növbədənkənar Prezident seçkilərində bu gün İlham Əliyevə alternativ yoxdur".
Bunu Modern.az-a açıqlamasında tanınmış siyasətçi, ləğv edilmiş Azərbaycan Liberal Partiyasının keçmiş lideri Lalə Şövkət bildirib.
"Mən həmişə qaraya qara, ağa ağ demişəm. Qarabağın azad olunması İlham Əliyevin böyük tarixi nailiyyətidir. Bunu heç kim dana bilməz. Ələlxüsus, Şuşanın azad olunması hər bir azərbaycanlının əlçatmaz və ən böyük arzusu idi. Şuşanın hər birimiz üçün mistik əhəmiyyəti var. Azərbaycan Qarabağsız, Şuşasız tam canlı ola bilməzdi. Bu çox çətin işi İlham Əliyev milləti səfərbər edərək həll etdi. Şəhidlərimizin qanı yerdə qalmadı. Onların ruhu daim bizimlə olacaq. Bu məsələnin həllinin hərbi, xüsusən də geosiyasi razılıq baxımından nə qədər müşkül olduğunu mən bir siyasətçi kimi yaxşı bilirəm. Bu labirintdən Azərbaycan məharətlə çıxdı. Bu da sözsüz ki, İlham Əliyevin böyük diplomatik uğurudur", - deyə Lalə Şövkət vurğulayıb.
O, hazırda ölkəni təhlükədən qorumağın olduqca böyük məsuliyyət tələb etdiyini bildirib:
"Amma bununla bərabər Azərbaycanın daxili siyasətində problemlər çoxdur. Onların arasında təxirəsalınmaz məsələlər də var. İstərdim ki, bunlar da tezliklə həll olunsun. İndiki ədalətsiz, qəddar, alovlanan dünyada ölkəni hər təhlükədən qorumaq böyük məsuliyyət və məharət tələb edir. Ona görə də, biz millət olaraq hər şeyə hazır olmalıyıq. Sayıq və ehtiyatlı davranmalıyıq. Bu bizim hər birimizdən asılıdır”.
Xatırladaq ki, Lalə Şövkət 1993-cü il də iyulun 7-də Azərbaycanın dövlət katibi vəzifəsinə təyin edilib. 1994-cü ilin yanvarında istefa verib və ilk dəfə Azərbaycan tarixində ali dövlət vəzifəsindən könüllü istefa presedenti yaradıb. Dövlət katibi vəzifəsindən istefaya getdikdən sonra ona fövqəladə və səlahiyyətli səfir rütbəsi verilib və Azərbaycanın BMT-də daimi nümayəndəsi təyin edilib. Lakin bundan imtina edib.
3 iyun 1995-ci ildə Lalə Şövkətin rəhbərliyi ilə Azərbaycan Liberal Partiyasının təsis konfransı keçirlib. Təsis konfransında Lalə Şövkət ALP-nin sədri seçilib. 7 iyun 2003-də partiya sədrliyindən istefa verib.
Azərbaycan Liberal Partiyası 24 iyun 2023-cü ildə özünü buraxdığını elan edib.
Rusiya xarici işlər nazirinin müavini Mixail Qaluzin Türkiyənin Moskvadakı səfiri Tanju Bilgiç ilə Cənubi Qafqaz regionundakı vəziyyəti müzakirə edib.
Bu barədə Rusiya XİN-dən məlumat verilib.
Bildirilir ki, görüşdə Mərkəzi Asiya və Ukraynadakı mövcud vəziyyətlə bağlı da fikir mübadiləsi aparılıb, həmçinin ilk növbədə Cənubi Qafqazda sülhün və sabitliyin möhkəmləndirilməsi üçün atılacaq addımların bundan sonra da koordinasiyası barədə razılıq təsdiq edilib.
“Tərəflər regional və beynəlxalq məsələlər üzrə ikitərəfli əməkdaşlığın səmərəliliyini qeyd ediblər”, - deyə bəyanatda vurğulanıb.
Rusiya diplomatik xidmətinin məlumatına görə, Türkiyə səfiri ilə Rusiya xarici işlər nazirinin müavini Andrey Rudenko da görüşüb. Görüşdə qarşılıqlı maraq doğuran ikitərəfli və regional gündəliyə dair fikir mübadiləsi aparılıb.
Mənbə: TASS