ABŞ Vitse Prezidenti və Demokratların prezidentliyə namizədi Kamala Harris Respublikaçı rəqibi Donald Trampı bütün debat boyu mikrofonları açıq saxlamağa çağırıb.
Harris və Tramp sentyabrın 10-da ABC telekanalının təşkil edəcəyi debatda iştirak etməyə razılıq veriblər.
"Donald Tramp onun canlı mikrofonla debat keçirməsinə icazə verməyən məsləhətçilərinə təslim olur. Əgər öz komandasının ona etimadı yoxdursa, Amerika xalqı qətiyyən ona etimad göstərə bilməz," Harris X sosial media platformasına bildirib.
"Biz ABŞ prezidentliyi uğrunda mübarizə aparırıq. Gəlin debatı şəffaf - mikrofonların bütün vaxtı açıq qaldığı şəraitdə keçirək."
Tramp deyib ki, ki, o, öz mikrofonunun açıq qalmasına üstünlük verir və ötən dəfə o vaxtkı rəqibi Co Baydenlə debat zamanı mikrofonunun söndürülməsi xoşuna gəlməmişdi.
“Qızmar mikrofon” kimi tanınan hallar siyasi namizədlərə həm kömək edə, həm də zərər vura bilər. Belə ki, bəzən ictimaiyyət üçün nəzərdə tutulmayan replikalar eşidilə bilər. Qapanmış mikrofonlar həmçinin debatçıların öz opponentinin sözünü kəsməyə imkan vermir.
ABC telekanalının nümayəndəsi məsələyə dərhal şərh verməkdən boyun qaçırıb.
Ötən çərşənbə axşamı debat qaydalarını müəyyənləşdirən ABC bildirib ki, mikrofon yalnız namizədin danışmaq növbəsi çatanda açılacaq, və həmin vaxt rəqibin mikrofonu söndürülmüş olacaq.
Bu, Co Baydenin yarışdan çəkilməsindən sonra Kamala Harislə Donald Tramp arasında ilk debat olacaq. CNN telekanalının iyun ayında təşkil etdiyi debatda Baydenin çıxışı tənqidlərə məruz qalmış və onun əqli qabiliyyəti ilə bağlı şübhələrə yol açmışdı.
Demokrat vitse prezidentliyə namizəd Tim Valz və Respublikaçı vitse prezidentliyə namizəd JD Vans 1 oktyabrda CBS telekanalında keçiriləcək debatda qarşılaşacaqlar.
"NATO və onun Rusiya Federasiyasının sərhədlərinə yaxın ölkələrinin hərbi potensialının artırılması təxribat xarakterlidir". Bu barədə Rusiya Xarici İşlər Nazirliyinin Litvada Bundesver əsgərlərinin yerləşdiriləcəyi hərbi bazanın tikintisi ilə bağlı RİA Novosti-yə şərhində deyilir. Bundan əvvəl mətbuatda Litvanın 2027-ci ilin sonuna qədər 4000 Bundesver əsgərinin yerləşdiriləcəyi hərbi bazanın tikintisinə başladığı barədə xəbərlər yayılmışdı. “Biz daim vurğulayırıq ki, NATO və onun üzvü olan ölkələrin Rusiya sərhədləri yaxınlığında aktivliyi və hərbi potensialının artması təxribat xarakterlidir”, - Rusiya Xarici İşlər Nazirliyinin məlumatında deyilir.
"Bu, hərbi bazaların tikildiyi Litva ərazisində Bundesver briqadasının planlaşdırılan yerləşdirilməsinə də aiddir", - şərhdə bildirilir.
Dia-az.İnfo
Bundesver - Almaniyanın silahlı qüvvələridir, üç xidmət strukturuna malikdir (quru qoşunları, hava qüvvələri və dəniz qüvvələri). Həmçinin, 2000-ci ildə Almaniya Silahlı Qüvvələrinin tərkibində ayrı-ayrı komponentlər kimi birgə dəstək qüvvələri və tibbi xidmət yaradılıb.
Azərbaycan Prezidenti İlham Əliyev, birinci xanım Mehriban Əliyeva və qızları Leyla Əliyeva Bakı şəhərinin 7 saylı Səbail seçki dairəsinin 6 nömrəli orta məktəbdə yerləşən 1 saylı seçki məntəqəsində səs veriblər.
Bu barədə Prezidentin Mətbuat xidməti məlumat yayıb.
Ermənistan tərəfi Azərbaycanla sərhədlərin delimitasiyası üzrə komissiyaların avqustun 30-da imzalanmış əsasnamənin təsdiqinin daxili prosedurlarını açıqlayıb.
“Cebheinfo.az”-ın məlumatına görə, Ermənistan Xarici İşlər Nazirliyi təfərrüatlara varmadan yalnız prinsipləri müəyyən edən əsasnamənin imzalandığını və sənədin ölkədaxili təsdiqi prosesinə artıq başlanıldığını bildirib.
“Qərar Ermənistan qanunvericiliyi ilə müəyyən edilmiş qaydada hökumətin müzakirəsinə çıxarılacaq, bundan sonra onun Milli Məclisdə ratifikasiyası proseduruna başlanılacaq. Bunun üçün sənəd əvvəlcə Konstitusiya Palatasına göndəriləcək. Məhkəmə onun Konstitusiyaya uyğunluğunu müəyyən edəcək”, - Ermənistan Respublikası Baş nazirinin Aparatından verilən məlumatda belə qeyd edilir.
Xarici İşlər Nazirliyinin açıqlamasından yarım saat sonra Ermənistan Nazirlər Kabineti qərarın diplomatik kanallar vasitəsilə sənədlərin əslinin mübadiləsi yolu ilə imzalandığını açıqlayıb.
Amma nə Xarici İşlər Nazirliyi, nə də Baş Nazirlik əsasnaməni kimin imzaladığına və üzbəüz görüşün niyə baş tutmadığına aydınlıq gətirməyib.
Bundan sonra Milli Məclisin Xarici Əlaqələr Komitəsinin sədri sənədi Ermənistanın və Azərbaycanın baş nazirlərinin müavinləri Mher Qriqoryan və Şahin Mustafayevin imzaladığını deyib.
Əsasnamənin parlamentə nə vaxt təqdim olunacağına gəlincə, Sarkis Xandanyanın fikrincə, bu, ali məhkəmənin qərarından asılıdır.
“Müsbət nəticə olarsa, hökumət artıq onu Milli Məclisə göndərəcək. Milli Məclis isə müəyyən olunmuş qaydada müzakirə edib qərar qəbul edəcək.
İstənilən saziş və ya beynəlxalq sənəd kimi, bu sənəd də, səhv etmirəmsə, deputatların ümumi sayının səs çoxluğu ilə bir oxunuşda müzakirə edilərək qəbul edilir”, - Xandanyan belə deyib.
İmzalanmış sənədin məzmunu hələ də məlum deyil. Baş nazirlik onu gələn bazar ertəsi dərc edəcəyini vəd edir. Bu arada Baş nazirin dəftərxanası sənədin siyasi məzmununun bir neçə ay əvvəl açıqlandığını vurğulamağı zəruri hesab edir.
Söhbət baş nazirlərin müavinlərinin 2024-cü il 19 aprel tarixli görüşündən gedir. Məhz həmin gün Ermənistan və Azərbaycanın sərhəd delimitasiyası komissiyaları delimitasiya prosesində Almatı Bəyannaməsini rəhbər tutması barədə razılığa gəliblər.
“Sərhədin demarkasiyası eyni prinsiplə davam edəcəkmi” sualına Ermənistan Baş nazirinin dəftərxanası yalnız əvvəl əldə edilmiş razılaşmaya istinad edərək dəqiq cavab verməyib.
“Həmin danışıqlar zamanı (19 aprel - red.) İrəvan və Bakı nümayəndələri reqlamenti təsdiq edildikdən sonra onlar sektorların, o cümlədən anklavların və eksklavların delimitasiyası prosedurunu razılaşdırmaq qərarına gəliblər. Bu gün nə Xarici İşlər Nazirliyi, nə də Baş nazirin dəftərxanası sonra hansı ərazilərin demarkasiyasına qərar verilib-verilmədiyinə aydınlıq gətirməyib” - “Azadlıq” radiosunun Ermənistan xidməti belə yazır.
“Növbəti mərhələdə sərhədin hansı hissələrinin müəyyən ediləcəyi, demarkasiya işlərinin ardıcıllığı müəyyən ediləcək. Ermənistan tərəfi eyni səylərlə işi davam etdirməyə hazırdır”, - deyə Sarkis Xandanyan əlavə edib.
Kreml Monqolustanın Beynəlxalq Cinayət Məhkəməsində (BCM) iştirakından narahat deyil, çünki Moskvanın Ulan-Batorla "əla dialoqu" var.
Oxu.Az TASS-a istinadən xəbər verir ki, bu barədə Rusiya Prezidentinin mətbuat katibi Dmitri Peskov məlumat verib.
Rusiya dövlət başçısı sentyabrın 3-də Monqolustana rəsmi səfər etməyi planlaşdırır. Peskov bu səfərin bütün aspektlərinin diqqətlə hazırlandığını vurğulayıb.
"Narahatlıq yoxdur, Monqolustanda olan dostlarımızla "əla dialoqumuz" var", - deyə o, müvafiq sualı cavablandırıb.
Xatırladaq ki, 2023-cü il martın 17-də BCM Putin və Rusiya Prezidentinin Uşaq Hüquqları üzrə Müvəkkili Mariya Lvova-Belovanı "əhalinin, o cümlədən uşaqların qeyri-qanuni deportasiyası və onların qanunsuz olaraq Rusiyaya köçürülməsindən ibarət olan" hərbi cinayətlərdə iştirakda ittiham edərək həbsə order verib. Bir il sonra, iyunun 25-də BCM-in İstintaq Palatası həmçinin Rusiya Təhlükəsizlik Şurasının katibi Sergey Şoyqu və Rusiya Silahlı Qüvvələrinin Baş Qərargah rəisi Valeri Gerasimovun həbsinə order verib.
Rusiyalı generalların "düşməni darmadağın etmək" vədlərinə rəğmən Ukrayna ordusunun Kursk bölgəsinə hücumu üç həftədən çoxdur davam edir. Burda baş verənlər müharibənin əvvəlindən bəri Vladimir Putinin reytinqinə vurulan ən güclü zərbə olub.
Bakupost.az xarici KİV-ə istinadın xəbər verir ki, Rusiya cəmiyyətində prezidentin fəaliyyətini bəyənilmə səviyyəsi 72,4% -ə düşüb. Rusiya ictimai rəyin öyrənilməsi mərkəzinin məlumatına görə, bu, müharibənin ilk həftəsindən indiyədək ən aşağı göstəricidir.
Qeyd edək ki, bundna əvvəl kütləvi səfərbərliyə görə Putinə inam 78% -ə qədər (2022-ci ilin noyabrında), "Vaqner"in üsyanından sonra isə 76,8% faizə düşmüşdü.
Qərbi Azərbaycan Xronikası layihəsi çərçivəsində növbəti analitik süjet hazırlanıb.
Oxu.Az xəbər verir ki, "Rusiya Zəngəzur dəhlizinin açılması üçün Ermənistana təzyiqlərini artıracaq" adlı süjetdə Rusiya Prezidenti Vladimir Putinin Bakıya səfərinə, Moskvanın Ermənistanda və bölgədəki maraqlarına, geosiyasi mübarizənin regiona təsirinə və Zəngəzur dəhlizi ətrafında intriqaların kəskinləşməsinə dair məsələlərə toxunulub.
Bildirilib ki, indiki diplomatik mübarizə tarixi torpaqlarımız olan Qərbi Azərbaycan məsələsini aktuallaşdırır: "Çünki Zəngəzur dəhlizinin açılması tarixi torpaqlarımıza qayıdış strategiyasının əsas komponentlərindən biridir. Hazırda müşahidə edilən prosesləri nəqliyyat dəhlizləri üzərindəki mübarizə adlandırmaq mümkündür. Bu mübarizədə Zəngəzur dəhlizi açar mövqeyə malikdir. ABŞ Cənubi Qafqazdakı kommunikasiyanı Rusiya və Çinin iştirakı olmadan öz planına uyğun açarsa, Orta dəhlizi nəzarətə götürəcək və Moskva üçün həyati əhəmiyyət kəsb edən Şimal-Cənub nəqliyyat layihəsinə problem yaradacaq. Rusiya önə çıxarsa, həm regiondankənar qüvvələri oyundan çıxaracaq, həm regionun kommunikasiyasında iştirak imkanı əldə edərək Orta dəhlizdə mövqelərini gücləndirəcək, həm də Şimal-Cənub layihəsinin işləkliyini təmin edəcək".
Qeyd olunub ki, pərdəarxası proseslərdə Zəngəzur dəhlizi ətrafında intriqalar kəskinləşib və Rusiya dəhlizin 2020-ci il 10 noyabr razılaşmasının 9-cu bəndinə uyğun, yəni Federal Təhlükəsizlik Xidmətinin (FTX) iştirakı ilə açılmasında israrlıdır. Bunun üçün Ermənistana təzyiqlərini artıracaq. Ermənistanın təzyiqdən yayınmaq üçün iki istiqamətdə addım atacağı mümkün variantlardandır. Birincisi, İrandan dəstək istəyəcəklər. İkincisi, Qərbdən praktiki dəstək almağa çalışacaqlar. Bu, Qərb qüvvələrinin bölgədə yerləşdirilməsini sürətləndirə, hətta buna zəmin yaratmaq üçün Azərbaycanla sərhəddə təxribat hücumlarını genişləndirə bilər. Bu təxribatların məsuliyyəti Ermənistan və onu dəstəkləyən ölkələrin üzərinə düşür".
Sonda vurğulanıb ki, mümkün təxribatlar Azərbaycan Ordusunun hərəkətə keçməsi və şərti sərhədlərin tarixi torpaqlarımızın - Qərbi Azərbaycanın dərinliklərinə qədər irəli çəkilməsi ilə nəticələnə bilər: "Ermənistan təxribata əl atanda iki dəfə düşünməlidir".
Xatırladaq ki, Qərbi Azərbaycan Xronikası layihəsinin məqsədi tarixi qədim torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulmasından, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri - qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, xaçdaşlar, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.
Həmçinin Prezident İlham Əliyevin Qərbi Azərbaycanla bağlı dediyi "XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin", - fikrini əsas tutaraq Qərbi Azərbaycan İcmasının hazırladığı Qayıdış Konsepsiyasından irəli gələn vəzifələrin təbliğidir.
Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.
Xəbər verdiyimiz kimi, avqustun 28-də Azərbaycan Prezidenti İlham Əliyev, birinci xanım Mehriban Əliyeva və qızları Leyla Əliyeva Bakıda “Sea Breeze” istirahət mərkəzinin ərazisində yaradılan LANDAU Məktəbinin və “The Grand” apart hotelinin açılışında iştirak ediblər.
Tribunainfo.az-ın məlumatına görə, “Agalarov Development” şirkətinin təsisçisi Emin Ağalarov Prezident və ailəsinin “Sea Breez”ə səfərini əks etdirən görüntülər paylaşıb.
“Mən həmişə deyirəm ki, mənim üçün “Sea Breeze”in inkişafı və təkmilləşdirilməsi doğma Azərbaycanın inkişafı ilə bərabərdir. Bu özünəməxsus tarix və mədəniyyətə malik, müasir və mütərəqqi və gözəl ölkədir.
Bizim üçün vacibdir ki, bütün aspektlərə əməl edək və öz layihəmizlə sakinlərin perspektivli gələcəyi, xoşbəxtliyi, sevinci və rifahına xidmət edək. Ölkəmizin Prezidentinə və Birinci vitse-prezidentinə, Heydər Əliyev Fondunun vitse-prezidentinə göstərdikləri etimada görə təşəkkür edirik”, – paylaşımda qeyd olunub.
NATO-nun baş katibi Yens Stoltenberq Kiyevin xahişi ilə Ukrayna-NATO Şurasının iclasını çağırır. “Reuters“ xəbər verir ki, bu barədə Alyansın sözçüsü Farah Dahlallah bildirib.
Onun sözlərinə görə, iclas avqustun 28-də baş tutacaq.
“Görüş səfirlər səviyyəsində baş tutacaq. Ukraynanın müdafiə naziri Rustem Umerovun videobağlantı vasitəsilə Alyans üzvlərini döyüş meydanındakı vəziyyət, qüvvə və imkanlara dair prioritet ehtiyaclar barədə məlumatlandırması gözlənilir”, - Dahlallah vurğulayıb.
Qeyd olunur ki, Ukrayna-NATO Şurası ötən il Alyans ilə Kiyev arasında daha sıx koordinasiyanı təmin etmək üçün yaradılıb. Şuranın iclasında adətən NATO-ya üzv ölkələrin səfirləri və Ukrayna rəsmiləri iştirak edirlər.
