“Bakıdakından daha yaxşı oynamağa çalışacağıq”.

Qaynarinfo “İdman və biz”ə istinadən xəbər verir ki, “Qarabağ”ın baş məşqçisi Qurban Qurbanov Avropa Liqasının 1/8 final mərhələsində qarşılaşacaqları “Bayer” ilə cavab matç üçün Almaniyaya yollanarkən Heydər Əliyev Beynəlxalq Aeroportunda jurnalistlərə açıqlamasında deyib.

Təcrübəli mütəxəssis bildirib ki, şanslarından maksimum istifadə edəcəklər:

“Mütləq şəkildə çalışmalıyıq ki, Bakıdakından daha yaxşı oynayıb, daha çox güc sərf edək. Yaxşı nəticə əldə etməyi çox istəyirik. Sona kimi mübarizə aparacağıq”.

“Qarabağ”ın zədəli və cəzalı futbolçuları barədə də danışan Qurban Qurbanovun sözlərinə görə, oyunun gedişatından asılı olaraq Kevin Medina da meydana çıxa bilər:

“Təbii ki, ehtiyac yaransa, bu addımı atacağıq. Amma o, hələ də öz formasında deyil. Bu cür sürətli matçlarda əziyyət çəkə bilər. Digərlərinin də qayıtması isə əlavə üstünlükdür. İstənilən an bəzi rotasiyalar edə bilərik. Juninyoda vəziyyət ümumi olaraq pis deyil. Dünən və bu gün fərdi məşqlər edib. Yenə də sabah oyun gününə kimi gözləyəcəyik. Həkimlərlə məsləhətləşib, qərar verəcəyik”.

Qeyd edəki, “Bayer” – “Qarabağ “qarşılaşması Bakı vaxtı ilə 00:00-da Liverkuzendə “BayArena”da start götürəcək. İlk görüş 2:2 hesabı ilə başa çatıb.

Almaniya Bundesliqasının 25-ci turunun “Bayer” - “Volfsburq” qarşılaşması başa çatıb. Komandalar Leverkuzen şəhərinin BayArena stadionunda qarşılaşıblar. Görüşün baş hakimi Daniel Siebert olub.

Artıq 28-ci dəqiqədə “canavarlar”ın müdafiəçisi Moritz Jenz meydandan qovulub. Doqquz dəqiqə sonra “Bayer” bu boşluqdan məharətlə yararlanıb - Natan Tella meydan sahiblərini hesabda irəli çıxarıb. 86-cı dəqiqədə “Bayer”in hücumameyilli yarımmüdafiəçisi Florian Virtz matçda son nöqtəni qoyub - 2:0.

“Bayer” bu mövsüm Bundesliqada şəriksiz liderdir. Komanda 25 matçda 67 xal toplayıb. Xabi Alonsonun yetirmələri ikinci yerdə qərarlaşan “Bavariya”nı 10 xal qabaqlayırlar. “Volfsburq” isə 25 xalla 13-cü yerdədir.

Leverkuzenlilər bütün turnirlərdə bugünkü oyun daxil 35 oyundur uduzmurlar. Xabi Alonsonun çalışdırdığı kollektiv bunlardan 31-də qalib gəlib, 4 oyunda heç-heçə edib.
Qeyd edək ki, bu il Avropanın məğlubedilməzi sayılan “Bayer” UEFA Avropa Liqasında “Qarabağ”ın rəqibidir. Bakıda keçirilən ilk oyunda “Köhlən atlar” güclü rəqibi ilə heç-heçə etmişdi. Cavab qarşılaşması isə martın 14-də Leverkuzendə keçiriləcək.

UFC-nin rəhbəri Dana Uayt keçmiş dünya çempionu Entoni Coşua ilə keçmiş UFC çempionu Frensis Nqannu arasında keçirilən ağır çəkidə boks döyüşünün nəticəsinə münasibət bildirib.

Publika.az xəbər verir ki, Coşua ikinci raundda Nqannonu nokaut edib. Daha əvvəl isə Nqannu dünya çempionu Tayson Fyuriyə uduzsa da, britaniyalı boksçunu nokauta salaraq ciddi müqavimət göstərmişdi.

“Mən bunu sosial şəbəkələrdə gördüm. Fyuri döyüşə hazırlaşsaydı və yemiş kimi görünməsəydi, Coşua kimi qalib gələcəkdi.

Çarpaz döyüşlər haqqında mənim fikrimi bilirsiniz. Onların sonu belə olur”, – “talkSPORT” Uaytdan sitat gətirib.

“Red Bull” komandasının niderlandlı pilotu Maks Ferstappen “Formula-1” üzrə Səudiyyə Ərəbistanı Qran-prisində qalib olub.

Onun komanda yoldaşı meksikalı Serxio Peres ikinci yeri tutub. İlk üçlüyü “Ferrari”dən monakolu Çarlz Lekler bağlayıb.

“Ferrari”nin ispan pilotu Karlos Sayns yarışı buraxıb. Cümə günü məlum olub ki, idmançı əməliyyat olunub. Onu 18 yaş 305 gündə “Formula-1”də debüt edən britaniyalı Oliver Berman əvəzləyib.
Qeyd edək ki, “Formula-1”in növbəti mərhələsi martın 22-dən 24-dək Avstraliyada keçiriləcək.

Mənbə: TASS

Çempionlar Liqasında həftənin ən yaxşı futbolçusu müəyyənləşib.

Redaktor.az xəbər verir ki, bu, Kilian Mbappe (PSJ) olub. Hücumçu Villi Orban ("Leyptsiq"), Harri Keyn ("Bavariya") və Manuel Akanjini ("Mançester Siti") qabaqlayıb.

Mbappe ÇL-in 1/8 final mərhələsində "Real Sosyedad"la cavab görüşündə (1:2) dubl edib.

Azərbaycan boksçusu Ümid Rüstəmov İtaliyanın Busto Arsizio şəhərində keçirilən I Dünya Olimpiya Təsnifat Turnirində ikinci qələbəsini qazanıb.

"Unikal" xəbər verir ki, 57 kiloqram çəkidə mübarizə aparan yığma üzvü 1/16 finalda Bakari Hassanı (Keniya) məğlub edib. Hər 3 raundu xeyrinə bitirən Ü.Rüstəmov yekunda 5:0 (30:27, 30:27, 30:27, 30:27, 30:27) hesabı ilə qalib gəlib.


O, növbəti görüşünə martın 10-da çıxacaq. Boksçumuz 1/8 finalda tacikistanlı Asror Vohidovla üz-üzə gələcək.

"Qarabağ" UEFA Avropa Liqasında növbəti oyununu keçirib. "Report"un məlumatına görə, Qurban Qurbanovun baş məşqçisi olduğu komanda Bakıda Almaniyanın "Bayer 04" klubunu qəbul edib.

Tofiq Bəhramov adına Respublika stadionundakı qarşılaşma heç-heçə başa çatıb - 2:2.

26-cı dəqiqədə Yassin Benzia hesabı açıb. 45+2-ci dəqiqədə Olavio Juninyo qonaqları növbəti dəfə məyus edib.

Leverkuzen təmsilçisinin heyətində Florian Virtz 70-ci dəqiqədə fərqi azaldıb. 90+2-ci dəqiqədə Patrik Şik Almaniya klubunu məğlubiyyətdən xilas edib.

Qeyd edək ki, komandalar arasında cavab oyunu martın 14-də Leverkuzen şəhərində gerçəkləşəcək.

UEFA Avropa Liqasının sosial şəbəkə hesabları “Qarabağ” – “Bayer” oyunu ilə bağlı paylaşım edib.

QOL.az xəbər verir ki, paylaşımda bildirilib: “UEFA Avropa Liqasında ən yaxşı formada olan iki komanda cümə axşamı Bakıda görüşəcək”.

Paylaşımda bu mövsüm ölkə çempionatında və Avropa Liqasında ümumilikdə son 5 matçda ən yaxşı nəticələr əldə edən komandalar yer alıb. Leverkuzen təmsilçisi 5 oyundan 5 qələbə ilə siyahının ilk pilləsində qərarlaşıb. “Qarabağ” 5 oyundan 4 qələbə və 1 məğlubiyyətlə 2-ci pillədə yer alıb.

Qeyd edək ki, martın 7-də Tofiq Bəhramov adına Respublika stadionunda keçiriləcək “Qarabağ” – “Bayer” görüşü saat 21:45-də başlayacaq.