 |
|
|
Argentina millisinin Amerika kuboku üçün heyəti açıqlanıb.
Musavat.com İdman.biz-ə istinadən xəbər verir ki, baş məşqçi Lionel Skaloni yarışda güvənəcəyi 24 futbolçunu müəyyənləşdirib.
Lionel Messi və Anxel Di Maria da “albiselesta”nın heyətində yer alıblar.
Qapıçılar: Franko Armani (“River Pleyt”), Valter Benitez (PSV, Niderland), Emilyano Martinez (“Aston Villa”, İngiltərə);
Müdafiəçilər: Nehuen Perez (“Udineze”, İtaliya), Nikolas Taqliafiko (“Lion”, Fransa), Nauel Molina (“Atletiko”, İspaniya), German Pezelya (“Betis”, İspaniya), Kristian Romero (“Tottenhem”, İngiltərə), Nikolas Otamendi (“Benfika”, Portuqaliya), Nikolas Valentini (“Boka Xunyors”), Valentin Barko (“Brayton”, İngiltərə);
Yarımmüdafiəçilər: Leandro Paredes (“Roma”, İtaliya), Rodriqo De Paul (“Atletiko”, İspaniya), Enzo Fernandez (“Çelsi”, İngiltərə), Fakundo Buonanotte (“Brayton”, İngiltərə), Covani Lo Selso (“Tottenhem”, İngiltərə), Quido Rodriges (“Betis”, İspaniya), Aleks Mak Alister (“Liverpul”, İngiltərə), Valentin Karboni (“Monza”, İtaliya)
Hücumçular: Xulian Alvarez (“Mançester Siti”, İngiltərə), Anxel Di Mariya (“Benfika”, Portuqaliya), Nikolas Qonzales (“Fiorentina”, İtaliya), Alexandro Qarnaço (“Mançester Yunayted”, İngiltərə), Lautaro Martinez (“İnter”, İtaliya).
Qeyd edək ki, Amerika kuboku iyunun 20-dən iyulun 14-ə kimi ABŞ-da keçiriləcək.
Futbol üzrə Avropa çempionatının açılış matçı başa çatıb.
Oxu.Az xəbər verir ki, A qrupu çərçivəsində ev sahibi Almaniya ilə Şotlandiya qarşılaşıb.
Münhendəki Allianz Arenada keçirilən ilk matçda almanlar rəqiblərini darmadağın edərək, indiyədək Avropa çempionatları tarixində özlərinin ən böyükhesablı qələbələrini qazanıblar - 5:1.
Virtz (10), Musiala (19), Haverts (pen.45+1), Füllkruq (68), Emre Can (90+3) və Rudiger (avtoqol 87) fərqləniblər.
Qeyd edək ki, 45-ci dəqiqədə Şotlandiyanın müdafiəçisi Rayan Porteus yarımmüdafiəçi İlkay Gündoğana qarşı kobud oyuna görə birbaşa qırmızı vərəqə alıb.
Qrupun digər matçı Macarıstan və İsveçrə arasında oynanılacaq.
Braziliya millisinin “Əl-Hilal” hücumçusu Neymar ölkəsinin “Flamenqo” klubunda oynamaq arzusundadır.
Qol.az “RMC Sport”a istinadən xəbər verir ki, bu barədə 32 yaşlı hücumçu özü danışıb. O deyib:
“Mən həmişə deyirdim ki, “Flamenqo”da oynamaq istəyirəm. Təbii ki, bu mənim “Santos”dan sonra ikinci sevimli komandamdır. “Flamenqo”nu həqiqətən sevirəm.
Bir gün burada oynaya bilsəm, əlbəttə ki, çox məmnun olaram. Bunun nə vaxtsa olub-olmayacağını bilmirəm, ancaq Tanrı bilir. Hələ də “Əl-Hilal”la müqaviləm var, amma heç kim bizi gələcəkdə nəyin gözlədiyini bilmir”.
Braziliyalı futbolçu “Santos” akademiyasının yetirməsidir. O, bu komandada 183 oyun keçirib, 107 qol vurub və 51 qolun ötürməsini verib. Hücumçu 2023-cü ilin yayında PSJ-dən “Əl-Hilal”a keçib.
Bu gün AFFA-da Apellyasiya Arbitraj Tribunalının iclası keçirilib.
Tribunainfo.az xəbər verir ki, I Liqada “İrəvan” klubunda çıxış edən Fəhmin Muradbəylinin danışılmış oyunlarda iştirakına görə ömürlük müddətdə futbol ilə əlaqədar hər hansı fəaliyyətlə məşğul olmaq hüququndan məhrum edilməsi barədə AFFA-nın İntizam Komitəsinin 18 mart 2024-cü il tarixli qərarı dəyişdirilmədən qüvvədə saxlanılıb.
Bundan əlavə, “Azərbaycan Qartalları” uşaq futbol klubunda məşqçi işləyən Rüfət Həsənova da eyni cəza verilərək ömürlük futboldan uzaqlaşdırılıb.
Argentinalı hücumçu Lionel Messi Fransanın PSJ klubunda çıxış etdiyi zaman qonşuları ilə problemlərlə üzləşdiyini deyib.
Gununsesi.info xəbər verir ki, o bu haqda ESPN-ə danışıb.
“Parisdə qonşular axşam saat doqquz-onda qapını döyürdülər. Deyirdilər ki, mənim uşaqlarım futbol oynamasın. Qonşular bizi narahat edirdi. Bu, meydandakı çıxışlara təsir etdi”, – deyə Messi bildirib.
Qeyd edək ki, Messi 2021-2023-cü illərdə PSJ-də çıxış edib. O, ikiqat Fransa çempionu olub. Futbolçu karyerasını ABŞ-nin “İnter Mayami” klubunda davam etdirir.
Səudiyyə Ərəbistanı “Əl-Nəsr”inin və Portuqaliya yığmasının hücumçusu Kriştianu Ronaldu dünya rekordu qırıb.
Fanat.az xəbər verir ki, bu barədə Beynəlxalq Futbol Tarixi və Statistikaları Federasiyasının (IFFHS) saytında məlumat paylaşılıb.
Xəbərə görə, ötən gün İrlandiya millisi ilə baş tutan qarşılaşma portuqaliyalı ulduzun 1226-cı oyunu olub. Forvard bu göstəriciyə görə Braziliya millisinin sabiq qapıçısı Rojerio Senini üstələyib.
Ronaldu Portuqaliya, İngiltərə, İspaniya, İtaliya və Səudiyyə Ərəbistanı çempionatlarında 698, bu ölkələrin kubok turnirlərində və Superkubok uğrunda matçlarında daha 101 oyun keçirib. Kriştianu həmçinin beynəlxalq klub turnirlərində 220 oyun keçirib. O, milli komandada 207 oyuna çıxıb.
Türkiyə millisinin aparıcı üzvü İrfan Can Kahveci AVRO-2024-dən kənarda qala bilər.
"Report" "Sport Digitale'yə istinadən xəbər verir ki, 28 yaşlı futbolçu zədələnib və heyətdən çıxarılma ehtimalı var.
Bundan başqa, "Fənərbağça"nın yarımmüdafiəçisi riskə atılmamaq üçün komandanın son məşqində iştirak etməyib.
Qeyd edək ki, Türkiyə Futbol Federasiyası İrfan Can Kahvecinin son durumu ilə bağlı yaxın müddətdə məlumat verəcək.
“Krasnodar”ın futbolçusu Kadi Borjes “Qarabağ”dan təklif alıb.
Tribunainfo.az xəbər verir ki, bu haqda futbolçunun meneceri Xelsio Alisk bildirib.
“Qarabağ” həqiqətən də Kadiyə görə “Krasnodar”a təklif göndərib. Amma bundan artıq nəsə deyə bilmərəm. “Krasnodar”ın qərarını gözləyirik” – deyə o qeyd edib.
Kadi 2023-cü ilin yanvarında “Krasnodar”a “Qarabağ”dan keçib. O, 2023/24 mövsümü Rusiya klubunun tərkibində bütün turnirlərdə 33 oyun keçirib, 4 qol vurub, 3 qolun isə ötürməsini edib.
Beynəlxalq İdman Araşdırmaları Mərkəzi "CIES Football Observatory" 2024-cü il Avropa çempionatında qələbəyə dörd əsas iddiaçının adını açıqlayıb.
Favoritləri müəyyən etmək üçün milli komandaların tərkibinə əsasən bir sıra mürəkkəb düsturlar, indekslər və hesablamalardan istifadə edilib.
Beləliklə, CIES-in məlumatına görə, AVRO-2024-ün favoritləri Fransa, İngiltərə, Almaniya və İspaniya komandalarıdır.
Xatırladaq ki, 2024-cü ildə Avropa çempionatı Almaniyada baş tutacaq. Turnir iyunun 14-dən iyulun 14-dək keçiriləcək. Qruplarda birinci və ikinci yerləri tutan komandalar, həmçinin dörd ən yaxşı üçüncü yeri tutan komandalar 1/8 finala yüksələcəklər. Turnirin pley-off oyunları olimpiya sistemi üzrə uduzan komandaların turnirdən kənarlaşdırılması prinsipi ilə keçiriləcək.
Mənbə: championat.com
Futbolçularımız xarakter nümayiş etdirdi.
Report xəbər verir ki, bunu Azərbaycan milli komandasının məşqçisi Arif Əsədov Qazaxıstan ilə keçirilən yoldaşlıq görüşündən sonra baş tutan mətbuat konfransında deyib.
53 yaşlı mütəxəssis qarşılaşmanın çətin keçdiyini söyləyib: “Futbolçularımı təbrik edirəm. Mövsümün sonu olduğundan, həm psixoloji, həm də fiziki yorğunluq var. Buna baxmayaraq, oyunçularımız xarakter nümayiş etdirərək, geridönüş etməyi bacardılar. Təəssüf ki, ilk standart vəziyyətdən qol buraxdıq. Ardınca rəqib əks-hücumdan daha bir dəfə fərqləndi. Ancaq komandamız toparlanaraq qələbə qazandı. Albaniya ilə görüşü də yaxşı keçirmişdik. Ən azı heç-heçəyə layiq idik. Həmin matçdan sonra da görürdük ki, azarkeşlər və ictimaiyyət komandaya inanır. Bu amil futbolçulara müsbət təsir göstərmişdi”.
Qeyd edək ki, Azərbaycan – Qazaxıstan görüşü yığmamızın 3:2 hesablı qələbəsi ilə yekunlaşıb.