“Sabiq səhiyyə naziri Oqtay Şirəliyevin Azərbaycan səhiyyəsinə güvənmədiyi üçün Türkiyəyə müalicə almağa getdi haqqında səslənən fikirləri düzgün hesab etmirəm. Çünki insan istədiyi yerdə müalicə almaq haqqına sahibdir”.

Bu sözləri Yenisabah.az-a açıqlamasında tanınmış həkim, uroloq-androloq Vasif İsmayıl deyib.

O, Azərbaycanın keçmiş səhiyyə naziri Oqtay Şirəliyevin müalicə almaq üçün təcili şəkildə Türkiyəyə getməsinə toxunub.

Xatırladaq ki, eks-nazirin Türkiyəyə yollanması haqqında məlumatların dərc olunmasından sonra sosial şəbəkələrin Azərbaycan seqmentində bununla bağlı müzakirələr yaranıb. Belə ki, sosial şəbəkə istifadəçilərinin bir çoxu Şirəliyevi uzun illər rəhbərlik etdiyi səhiyyə sisteminə güvənməməkdə ittiham edib.

Məsələyə münasibət bildirən V.İsmayıl əlavə edib ki, sabiq nazirin səhhətindəki hansı problemlərə görə xaricə getdiyi naməlum olaraq qalır:

“Lakin buna baxmayaraq, bu gün Azərbaycanda səhiyyə sahəsində görülməli işlərin çoxu görülüb, amma hamısı deyil. Həmçinin görülən işlərin çoxu hazırda keyfiyyətlə həyata keçirilir ki, bu tərəfdən də heç bir problem yoxdur. Ola bilsin ki, Oqtay Şirəliyev Azərbaycana səhiyyəsinə güvənmir, yəni bu, ola bilər”.

Müsahibimiz onu da diqqətə çatdırıb ki, O.Şirəliyevin bir siyasi keçmişi və duruşu var:

“Ola bilər ki, onun hansısa həkimlərlə konflikti olsun, onlara güvənmisin və buna görə də Türkiyəni seçsin. Amma reallıq budur ki, onun zamanında Azərbaycan səhiyyəsində bir çox işlər görülüb. Hətta deyərdim ki, çox da yaxşı işlər olub. Amma, bununla yanaşı, səhiyyəmizdə nəzarətin zəifləməsi hadisəsi də baş verdi ki, bu da Oqtay müəllimə qarşı yaranan etirazlara səbəb oldu”.

Həmsöhbətimizin fikrincə, bütün bunlara baxmayaraq, Azərbaycan xalqının Azərbaycan səhiyyəsi haqqında söylədiyi iradların əksəriyyəti haqlı və əsaslıdır:

“Amma bu, o demək deyil ki, Oqtay Şirəliyev Azərbaycan səhiyyəsini pis günə qoyub Türkiyəyə qaçıb gedib və s. Biz bunu ümumi bir fikir kimi dilə gətirə bilərik, amma ola bilsin ki, onun xəstəliyinin spesifik xüsusiyyətləri var və buna görə də ölkə xaricinə çıxıb. Məsələn, onun çox ciddi qaraciyər çatışmazlığı varsa, artıq xaricdə müalicə almasına əsaslı səbəbləri ortaya çıxır. Çünki qaraciyər çatışmazlığı ilə bağlı problemi hələ də Azərbaycanda lazımi səviyyədə müalicə edə bilmirik və bu bizim səhiyyəmiz üçün mənfidir. Yəni elə məsələlər var ki, biz bunu yaxşı bacarmırıq. Ona görə də faktları biləndən sonra məsələyə münasibət bildirməyin tərəfdarıyam”.

Tibb elmləri doktoru, professor Adil Qeybullanın sözlərinə görə isə elə situasiyalar var ki, biz bu reallıqları bilmirik:

“Hətta bəzi məsələlər var ki, bunun dəqiqləşməsinə ehtiyac duyulur. Lakin adi prosedurlardan ötrü ölkəni tərk etmək, hər halda yaxşı mənzərə deyil. Hələ nazir olmuş adam üçün heç...

Hesab edirəm ki, Azərbaycan səhiyyəsinin yetərincə imkanları var ki, problemlərini həll etsin. Amma biz reallığı bilsəydik, bu barədə daha detallı və obyektiv danışmaq olardı. Lakin təəssüflər olsun ki, bilmirik.

İlk növbədə, ona şəfa arzulayıram. O cümlədən bizim hər birimiz, xüsusilə də məmurlar çalışmalıdırlar ki, milli səhiyyəmizin imkanlarından yetərincə istifadə etsinlər ki, bu, həm də səhiyyəmizə güvən deməkdir”.

Qeyd edək ki, Oqtay Şirəliyev 2005-2021-ci illərdə Azərbaycanın səhiyyə naziri vəzifəsində çalışıb.

Altı-yeddi il əvvəlin xəbərlərində kərə yağının ölkəyə idxalının azalması, yerli istehsalın artması diqqət çəkirdi. Sonra mənzərə dəyişdi. İdxal kəskin artdı, istehsaldan az söz açılmağa başlandı. Keçən ilin son günlərində yenə ictimaiyyətə istehsalın artmasıyla bağlı məlumatlar ötürülürdü.
Bizimyol.info xəbər verir ki, mütəxəssislər kərə yağı istehsalının baha başa gəldiyini bildirirlər. Xammal istehsalı, daşınma, emal xərcləri böyük rəqəmlər ortaya qoyur. Bu halda yağın maya dəyəri 20 manatdan ucuz olmur.
Sadə hesablama aparaq. Bir kiloqram kərə yağının əmələ gəlməsi üçün azı 18 litr südə ehtiyac var. Deməli, standartlara cavab verən yağın kiloqramı heç bir halda 18 manatdan ucuz başa gələ bilməz. Hələ onu demirik ki, mütəxəssislər 1 kiloqram 82,5 faizlik kərə yağının istehsalı üçün 23 litr təzə inək südündən (3,6 %-li) istifadə olunduğunu xüsusi vurğulayırlar. Yəni yağın maya dəyəri düşündüyümüzdən də baha alınır.

Rəsmi məlumatlarda deyilir ki, guya ölkəyə kərə yağı və süddən hazırlanmış başqa yağların idxalı 11 faiz azalıb. Hökumət bununla istehsalın artdığını bildirmək istəyir. Ola bilər ki, həqiqətən də, idxal azalıb. Amma bu həm də keyfiyyətin aşağı düşməsi anlamına gəlir. İstehlakçıya kiloqramı 15-20 manata müxtəlif yağlar təklif olunub. Bunların heç biri standartıara cavab vermir. Həmin yağları heç alıb yeməyə dəyməz.

İqtisadçı Vahid Məhərrəmli deyir ki, sahibkar kərə yağının istehsalında dövlətin dəstəyini hiss etməlidir: “Digər ölkələrdə, xüsusən Yeni Zelandiyada istehsal olunan kərə yağının xərcinin 50 faizini dövlət öz üzərinə götürür, sahibkara dotasiya və subsidiya verir. Bizim ölkədə süd və yağ istehsalçıları üçün güzəştlər nəzərdə tutulmur. Ona görə də işbazlar ucuz bitki yağlarını, heyvan piyini, marqarini qarışdırıb əldə olunan surraqatı əhaliyə kərə yağı kimi təklif edirlər. Həmçinin Azərbaycana digər ölkələrdən idxal olunan ucuz kərə yağlarının da keyfiyyəti aşağıdır”.

İstehsalın artmasına sevninməkdənsə, keyfiyyətə diqqət yetirmək lazımdır. İnsanlar ucuz və zərərli məhsulla qidalanmaq məcburiyyətində qalırlar. Unutmayaq ki, kərə yağı əhalinin rasionunda vacib yer tutur. Hər şeydən əvvəl keyfiyyət diqqət mərkəzində olmalıdır.

Bakının Suraxanı rayonunda yerləşən “Antalya” restoranının sahibi və mühafizəçilərini döyən mərhum iş adamının oğluna hökm oxunub.

Qaynarinfo-nun məlumatına görə, hadisə Suraxanı rayonu, Hövsan qəsəbəsi, Hövsan-Türkan yolunda yerləşən “Antalya” restoranının çimərlik hissəsindəki 200×50 metr ölçülü əraziyə görə baş verib.

Belə ki, həmin ərazi 1998-ci ildə Suraxanı İcra Hakimiyyətinin sabiq başçısı olan, sonradan uzun illər Bakı Şəhər İcra Hakimiyyətinə başçılıq edən Hacıbala Abutalıbovun 23 iyul 1998-ci il tarixli 1221 saylı sərəncamı ilə sahibkar Hacımurad Rzayevə hədiyyə edilib. Hacıbala Abutalıbov bunun əvəzində sahibkardan Hövsan qəsəbəsindəki çimərliyin bir hissəsini abadlaşdırmağı xahiş edib.

Sərəncamın qərar verilmiş hissəsinə əsasən, Hövsan Bağları sahəsinin şimal hissəsində dənizkənarı sahədə 200×50 metr ölçüdə torpaq sahəsini abadlaşdırmaq və əhalinin rahatlığını təmin etmək üçün təqdim olunmuş çizgi əsasında təhkim olunub. Həmçinin sahədə kapital tikintinin aparılmasının qadağan edilməsi, Hacımurad Rzayevə çimərlikdə göstərilən bütün xidmət növlərinin pulsuz olması tapşırılıb. İş adam həmin ərazidə sahibkarlıq fəaliyyəti ilə məşğul olub, ərazidə kafe, mağaza, o cümlədən turistlər üçün kiçik qayıqlar fəaliyyət göstərib.

Hacıbala Abutalıbov icra başçısı vəzifəsindən getdikdən sonra qanuni təmsilçisi Mehdiyev Qalib Tücarət oğlu olan “Mars-M” Çoxsahəli Kommersiya Firması tərəfindən “Antalya” restoranı tikilib. 2019-cu ildə həmin ərazidə olan obyektlər də sökülərək restoranın ərzisinə daxil edilib.

Bundan sonra Hacımurad Rzayev ilə “Mars-M” şirkəti arasında mübahisələr baş verib. Bakı Apellyasiya Məhkəməsinin qətnaməsi ilə “Antalya” restoranın qarşısındakı 50×200 metr ərazidəki çimərlik sahəsi möhürlənməklə, mübahisə tərəflərinin istifadəsinə qadağa qoyulub.

20 avqust 2021-ci il tarixdə Hacımurad Rzayevin vəfatından sonra şirkətin qeyri-rəsmi sahibi Qadir Mehdiyev sözügedən ərazini mərhum iş adamından aldığını iddia edib. Hacımurad Rzayevin oğlu, 1984-cü il təvəllüdlü Samir Rzayev ərazidə məhkəmənin qərarı pozularaq Qadir Mehdiyev tərəfindən iş aparıldığını görüb. O, qardaşları Zaur Rzayev və Əlifağa Rzayev ilə əraziyə gedərək, “Mars-M” şirkətinin sahibi Qadir Mehdiyev ilə mübahisə edib. Samir Rzayev əvvəllər hüquq-mühafizə orqanlarında çalışmış və hazırda təqaüddə olan Qadir Mehdiyev və restoranın mühafizəçilərini döyüb.

Mərhum iş adamının oğlu iki gün həbsdə saxlanıldıqdan sonra barəsində Cinayət Məcəlləsinin 128 və 221.3-cü maddələri cinayət işi açılıb və iş məhkəməyə göndərilib. Məhkəmənin hökmü ilə Samir Rzayevə 9 ay 26 gün müddətə azadlığın məhdudlaşdırılması cəzası təyin edilib. Təqsirləndirilən şəxsin üzərinə cəza çəkdiyi müddətdə daimi yaşayış yerini hər gün saat 23:00-dan növbəti gün saat 07:00-dək tərk etməmək, elektron nəzarət vasitəsini gəzdirmək vəzifəsi qoyulub.

Naxçıvan Muxtar Respublikası (MR) Ali Məclisinin keçmiş sədri Vasif Talıbovun biznes imperiyasına daxil olduğu deyilən "Nəxşicahan Med” MMC məhkəməyə verilib.

Qaynarinfo xəbər verir ki, iddiaçılar Həziyev Vüqar Vidadi oğlu, Əsədov Elnur Ramiz oğlu, Quliyev Ramiz Məmməd oğlu, İsmayılov Sadıq Azər oğlu, Məmmədov Fərahim Fehruz oğlu, Vəliyev Orxan Tahir oğlu və Ağayev Elşən Bəhlul oğludur.

İddialara görə, adıçəkilən şəxslər "Nəxşicahan Med” MMC-nin işçiləri olub. Məhkəmə çəkişməsinin də əmək münasibətləri ilə bağlı mübahisələrdən qaynaqlanması bu iddiaların əsassız olmadığına dair şübhələri artırır. Lakin onların iddia tələblərinin konkret nədən ibarət olması barədə məlumat yoxdur.

İddiaya Naxçıvan Şəhər Məhkəməsində baxılacaq. İş hakim Gülsüm Əliyevanın icraatındadır.

"Nəxşicahan Med” MMC 17 aprel 2014-cü ildə qeydiyyata alınıb. Nizamnamə kapitalı 8 AZN olan şirkətin qanuni təmsilçisi Yusifov Arif Yusif oğludur.

"Nəqşicahan Holdinq”ə daxil olan "Nəxşicahan Med” Muxtar Respublika əczaçılıq sahəsində monopolist şirkət kimi tanınıb. Ötən ilin oktyabrında "Nəxşicahan Med” MMC ləğv olunduğunu elan edib.

Bu arada qeyd edək ki, hazırda şirkətin vergi borcu 98 718, 81 AZN-dir.

Şirkətin Vasif Talıbovun nəzarətində olması barədə iddialara gəlincə, mediada gedən məlumatlarda bildirilir ki, şirkətin daxil olduğu "Nəqşicahan Holdinq”in rəhbəri Rıfat Mahmudovdur. O, Sədərək gömrüyünün keçmiş sədri Nicat Mahmudovun qardaşıdır.

Mahmudov qardaşları Vasif Talıbovun kadrı kimi tanınır.

Qədim Şəkiyə yeni su xətti çəkilir.

Qafqaz sıra dağlarının ətəyindən iki istiqamətdə mənbəyini götürən “Kiş” çayı dövlət lahiyəsi əsasında Şəki şəhərini içməli su ilə təmin edəcək.

Bu lahiyədən 800 minə yaxın insan faydalanacaq.
Ətraflı AZTV-nin süjetində:

Qəhramanmaraşda mikroavtobusda halı pisləşən, daha sonra ürəyi dayanan və bədəni soyumağa başlayan sərnişin 54 yaşlı Hüseyn Açıkgözün "öldüyü" düşünülsə də, xəstəxanaya aparılıb.

Həkimlərin səyi nəticəsində 20 dəqiqədən sonra həyata qaytarılan xəstənin verdiyi sual hər kəsi şoka salıb.

Belə ki, xəstə "Özümə gələndə deyirdim ki, kosmosdayam, yoxsa evdəyəm?" deyə soruşduğunu qeyd edib.

Həkim isə "Bura gələndə ürəyi dayanmışdı. 5 damarını dəyişdik. Çox şükür ki, tez hərəkət etdiyimiz üçün beyninə təsir etmədi" deyib. \\32gun.az

Keçmiş deputat Mahir Aslanov barəsində inzibati iş başlanıb.

Qaynarinfo xəbər verir ki, deputat İnzibati Xətalar Məcəlləsinin 602.4-cü maddəsi ilə ittiham edilir.

Bu maddədə qeyd edilir ki, sahibkar tərəfindən yoxlama prosesində yoxlamaya aid sənədlərin yoxlayıcıya təqdim edilməməsinə, yoxlama zamanı yaranan suallara şifahi və (və ya) yazılı izahatlar verilməməsinə, təhrif olunmuş, yanlış məlumatın verilməsinə və ya sahibkarlıq fəaliyyəti üçün istifadə olunan əraziyə, istehsal və emal müəssisələrinə, anbarlara, satış sahələrinə, nəqliyyat vasitələrinə, habelə sahibkarlıq fəaliyyəti üçün istifadə olunan digər yerlərə baxış keçirilməsinə mane olmağa görə vəzifəli şəxslər 1000 manatdan 1500 manatadək məbləğdə cərimə edilir.

İş baxılması üçün Nəsimi Rayon Məhkəməsinə göndərilib. Anar İbadzadə iş üzrə hakim təyin edilib.

Mahir Aslanov 96 saylı Goranboy-Naftalan seçki dairəsindən Milli Məclisin dördüncü çağırış deputatı olub.

Zığda yerləşən köhnə həyət evləri və 5 mərtəbəli binalar sökülərək, yerində hündür mərtəbəli binalar tikiləcək.

Valyuta.az-ın əldə etdiyi məlumata görə, buna səbəb yeni təqdim olunan Bakının Baş palanına əsasən Bakı bulvarının cənub istiqamətində uzadılmasıdır.

Yeni layihəyə əsasən, bulvarın keçdiyi ərazilərdə söküntü işləri aparılacaq. Bulvarın keçdiyi ətraf ərazilərdə isə müasir tələblərə cavab verən binalar tikiləcək.

Bakı şəhərinin 2040-cı ilədək inkişafına dair Baş planına əsasən bulvar cənub istiqamətində uzadılacaq. Bu da uzunluğu təqribən 5,7 km olan 10,7 ha əlavə ictimai yaşıllığın təmin edilməsinə imkan verəcək.

Qeyd edək ki, Bakı bulvarının “Ağ şəhər”dən Zığa doğru uzadılması uzunluğu təqribən 8 km, sahəsi isə 247,8 ha olan əlavə bulvar sahəsinin yaradılmasına imkan verəcək.

Ötən gün “Bravo” supermarketində çalışan əməkdaşlardan birinin lazımsız məhsulları zibil qabına atmasını əks etdirən video sosial şəbəkələrdə müzakirələrə səbəb olub. Şəbəkə istifadəçiləri məsələyə birmənalı yanaşmayıblar. Yaranan suallardan biri: “Niyə supermarketlərdə bu məhsullar atılır, onları zibil qutularının yanına ayrıca qoymaq olmazmı ki, ehtiyacı olan götürsün?” - olub. Bəziləri isə bildiriblər ki, zibil qabına atılması nəzərdə tutulan məhsullar istifadə üçün təhlükəlidir. Həmçinin zibil qabından kənara qoyulan istənilən tullantılar isə ilk növbədə ətrafın çirklənməsi, zibillərin ətrafa yayılması deməkdir. Atılan məhsullar yararsız olduğu üçün onu başqasına vermək heç bir halda doğru deyil.

Məsələ ilə bağlı yaranan sualları “Bravo” supermarketlər şəbəkəsinə ünvanladıq. Şəbəkənin PR meneceri Pərvanə Mədətli Oxu.Az-ın sorğusuna cavab olaraq bildirib ki, şəbəkə fəaliyyətə başladığı ilk gündən qida təhlükəsizliyi qaydalarına ciddi şəkildə riayət edir:

“Qida təhlükəsizliyi qaydaları, məhsulların saxlanma şəraiti ilə bağlı mütəmadi olaraq əməkdaşlarımıza təlimlər keçirilir.

Qeyd olunan məsələ ilə bağlı bildirmək istəyirik ki, şəbəkəmizə aid mağazalarda gün ərzində bütün kateqoriyalara baxış keçirilir. Təbii ki, istehsal müddəti bitmiş, istifadəyə yararsız məhsullar rəflərdən mütəmadi olaraq yığışdırılır.

Meyvə-tərəvəzin yoxlanılması zamanı çürümə, kiflənmə, qurdlanma və s. kimi problemlər varsa, onlar istehlaka yararsız olduğundan tullantı olaraq dəyərləndirilir.

İnsanların sağlamlığı bizim şəbəkə üçün prioritetdir. İstehlaka yararsız məhsulların insanlar tərəfindən istifadəsinə icazə verilməsi isə birbaşa qanun pozuntusudur. “Bravo” bu məsuliyyəti anlayır və bu kimi halların qarşısını almaq üçün əlindən gələni edir.

Əlavə olaraq onu da qeyd edək ki, şəbəkəmiz müxtəlif KSM (korporativ sosial məsuliyyət) layihələrinin birbaşa təşkilatçısı və əsas dəstəkçisidir. Marketlər şəbəkəsi bu kimi layihələrdə həm təşkilatçı, həm də dəstək göstərən qurum kimi iştirak edəndə ümumi strategiya ənənəsini saxlayır - daim keyfiyyətli, təzə məhsulların təqdimatını əsas götürür”.

Bakıda “Şamaxinka” körpüsü qəzalı vəziyyətdədir.

Oxu.Az xəbər verir ki, bu barədə görüntülər İTV-nin efirində yayımlanıb.

Belə ki, daş parçası körpüdən qoparaq hərəkətdə olan “Toyota Prius” markalı avtomobilin üzərinə düşüb.

Zərərçəkən Asiman Nuriyev bildirib ki, hadisə nəticəsində maşının arxa şüşəsi tamamilə sınıb.
Həmçinin, daşın onun çiyninə düşdüyünü də qeyd edib.

Ətraflı süjetdə: