 |
|
|
Milli Məclisin dekabrın 30-da keçiriləcək iclasının gündəliyinə təklif olunan məsələlər müəyyən olunub. DİA.AZ siyahını təqdim edir:
1. Azərbaycan Respublikası Hesablama Palatasının auditorunun təyin edilməsi haqqında.
2. “Azərbaycan Respublikasının İnsan hüquqları üzrə müvəkkili (ombudsman) haqqında” Azərbaycan Respublikasının Konstitusiya Qanununda dəyişiklik edilməsi barədə Azərbaycan Respublikası Konstitusiya qanununun layihəsi (II səsvermə).
3. “Normativ hüquqi aktlar haqqında” Azərbaycan Respublikasının Konstitusiya Qanununda dəyişiklik edilməsi barədə Azərbaycan Respublikası Konstitusiya qanununun layihəsi (üçüncü oxunuş).
4. “Sosial sığorta haqqında”, “Diplomatik xidmət haqqında” Azərbaycan Respublikasının qanunlarında və Azərbaycan Respublikasının Vergi Məcəlləsində dəyişiklik edilməsi barədə Azərbaycan Respublikası qanununun layihəsi (üçüncü oxunuş).
5. “Cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında” Azərbaycan Respublikası qanununun layihəsi (üçüncü oxunuş).
6. “Hədəfli maliyyə sanksiyaları haqqında” Azərbaycan Respublikası qanununun layihəsi (üçüncü oxunuş).
7. Azərbaycan Respublikasının Cinayət Məcəlləsində və Azərbaycan Respublikasının İnzibati Xətalar Məcəlləsində dəyişiklik edilməsi haqqında Azərbaycan Respublikası qanununun layihəsi (üçüncü oxunuş).
8. Azərbaycan Respublikasının Mülki Prosessual Məcəlləsində və Azərbaycan Respublikasının Cinayət-Prosessual Məcəlləsində dəyişiklik edilməsi haqqında Azərbaycan Respublikası qanununun layihəsi (üçüncü oxunuş).
9. Azərbaycan Respublikasının Mənzil Məcəlləsində, “Valyuta tənzimi haqqında”, “Hüquqi şəxslərin dövlət qeydiyyatı və dövlət reyestri haqqında”, “Banklar haqqında”, “Azərbaycan Respublikasının Korrupsiyaya qarşı mübarizə üzrə Komissiyası haqqında Əsasnamənin təsdiq edilməsi barədə”, “Sığorta fəaliyyəti haqqında”, “İnvestisiya fondları haqqında”, “Qiymətli kağızlar bazarı haqqında” və “Nağdsız hesablaşmalar haqqında” Azərbaycan Respublikasının qanunlarında dəyişiklik edilməsi barədə Azərbaycan Respublikası qanununun layihəsi (üçüncü oxunuş).
10. “Daxili işlər orqanlarında xidmətdə fərqlənməyə görə” Azərbaycan Respublikası medalının təsis edilməsi ilə əlaqədar “Azərbaycan Respublikasının orden və medallarının təsis edilməsi haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (üçüncü oxunuş).
11. Azərbaycan Respublikasının 2002-ci il 29 mart tarixli 283-IIQ nömrəli Qanunu ilə təsdiq edilmiş “Azərbaycan Respublikasının Dövlət Qulluğunu İdarəetmə Şurası haqqında Əsasnamə”də dəyişiklik edilməsi barədə Azərbaycan Respublikası qanununun layihəsi (üçüncü oxunuş).
12. “Dövlət qulluqçularının etik davranış qaydaları haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (üçüncü oxunuş).
13. Azərbaycan Respublikasının Gömrük Məcəlləsində, “İstehlakçıların hüquqlarının müdafiəsi haqqında”, “Dövlət rüsumu haqqında”, “Mülki dövriyyədə olmasına yol verilməyən (mülki dövriyyədən çıxarılmış) əşyaların siyahısı haqqında”, “Mülki dövriyyənin müəyyən iştirakçılarına mənsub ola bilən və dövriyyədə olmasına xüsusi icazə əsasında yol verilən (mülki dövriyyəsi məhdudlaşdırılmış) əşyaların siyahısı haqqında”, “Baytarlıq haqqında”, “Mədəni bitkilərin genetik ehtiyatlarının mühafizəsi və səmərəli istifadəsi haqqında” və “Lisenziyalar və icazələr haqqında” Azərbaycan Respublikasının qanunlarında dəyişiklik edilməsi barədə Azərbaycan Respublikası qanununun layihəsi (üçüncü oxunuş).
14. “Təhsil haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (üçüncü oxunuş).
15. “Əmək pensiyaları haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (üçüncü oxunuş).
16. “Ümumi təhsil haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (üçüncü oxunuş).
17. “Əmək pensiyaları haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (üçüncü oxunuş).
18. Dünya azərbaycanlılarının həmrəyliyi günü münasibəti ilə Azərbaycan Respublikası Milli Məclisinin Müraciətinin təsdiq edilməsi haqqında Azərbaycan Respublikası Milli Məclisinin qərarının layihəsi.
Bugünlərdə Bakı-Quba-Rusiya dövlət sərhədi avtomobil yolunun 64 kilometrlik hissəsi istifadəyə verilib. Rəsmi açıqlamada bildirilib ki, Qubadan Bakı istiqamətində yenidən qurulan 67 kilometrlik yolun son 3 kilometrində işlər 2023-cü ilin yanvarında tam başa çatdırılacaq. Yolun pullu olacağı gözlənilir. Bununla bağlı bir müddət öncə bəzi rəsmilərin açıqlaması da olub.
Bakı-Quba-Rusiya Federasiyası istiqamətində yeni yol 2017-ci ildən çəkilir. Bu, həmin istiqamətdə çəkilən artıq ikinci yoldur. Birinci yolun tikintisi isə 2008-ci ildə başlamışdı. O vaxt rəsmilər yolun istismar müddətinin 30 il olacağını demişdi. Amma 2012-ci ildə avtomobil yolunun 132 km-lik Bakı-Gəndov hissəsində çatlar və dağılmış hissələr yaranmışdı. Bu, onda yolun inşası zamanı yol verilən konstruktiv səhvlər, normadan artıq yüklənmiş yük maşınlarının hərəkəti ilə izah edildi.
Rəsmi məlumata görə, 2008-ci ilin mayında başlanan birinci layihəyə ümumilikdə 545 milyon 287 min 800 manat xərclənib. Həmin vəsaitin 281 milyon 861 min 800 manatı Bakı-Quba Rusiya dövlət sərhədi avtomobil yolunun 120 kilometrlik hissəsinin təmirinə sərf olunub. Yerdə qalan 263 milyon 426 min manata isə 180 kilometr uzunluğunda beton örtüklü avtomobil yolu tikildiyi bildirilib.
Azərbaycan Avtomobil Yolları Dövlət Agentliyindən (AAYDA) “Turan”a bildirilib ki, Bakı-Quba-Rusiya dövlət sərhədi avtomobil yolunun Quba-Bakı istiqamətində deformasiyaya uğramış hissənin yenidən qurulması işlərinin böyük hissəsi yekunlaşıb: “Artıq sözügedən yolun yenidən qurulan hissəsi sürücülərin istifadəsinə verilib”.
AAYDA-dan qeyd olunub ki, yolun ödəniş qiyməti ilə bağlı, hələlik, müzakirələr aparılır: “Qiymətlər yük avtomobillər üçün ayrı, sərnişin avtobuslar üçün ayrı, minik avtomobillər üçün ayrı hesablanacaq. Biz beynəlxalq standarta uyğun tarifləri artıq təqdim etmişik. Yəqin ki, tezliklə qərar qəbul ediləcək”.
Əlavə olunub ki, yük avtomobillərinə nəzarət etmək üçün yolun müxtəlif hissələrində elektron tərəzilər quraşdırılacaq: “Pullu yolun dörd məntəqəsində tərəzilər artıq quraşdırılıb”.
İqtisadçı Natiq Cəfərli isə AzadlıqRadiosuna bildirib ki, bu yolun ilkin çəkilişi kifayət qədər ciddi qanun pozuntuları ilə müşayiət olunub: “Betonla çəkilmiş yola 30 il zəmanət verilmişdi. Ovaxtkı məzənnə ilə götürsək, az qala 1 milyard dollara yaxın xərclənmişdi, amma açılandan bir neçə il sonra yol təmirə bağlanırdı. Təmir adı ilə də ora 10 milyonlarla manat xərclənib, hətta beton yolunun böyük bir hissəsi ləğv edilib və yenidən asfalt yolu ilə əvəz edilib. Müxtəlif adamların adları çəkilsə də, buna görə bugünə qədər heç kim cavabdehlik daşımayıb”.
Pullu yola gəlincə isə, iqtisadçının sözlərinə görə, bu tipli yollar bir çox ölkələrdə var: “Amma orada bu yollar özəl sektor, ya da bələdiyyənin iştirakı ilə çəkilir. Yəni, dövlət-özəl sektor arasında bir müqavilə imzalanır, özəl sektor vəsait yatırır. Vəsait yatırılandan sonra onun geri çıxarılması və yola xidmət etmək üçün həmin yol pullu olur. Bizdə problem ondan ibarətdir ki, biz Azərbaycan vətəndaşı olaraq bu pulu artıq ödəmişik”.
İqtisadçı qeyd edib ki, vətəndaşlar vergi ödəyir və bu vergi nəticəsində infrastruktur layihələri həyata keçirilir: “Dövlət hesabına yolun pullu olması məntiqsizlikdir, çünki həmin yolun çəkilməsində vətəndaş artıq iştirak edib, pul ödəyib. Əgər burada özəl sektorun heç bir iştirakı yoxdursa, sual yaranacaq ki, orada yığılan vəsait nəyə və necə xərclənəcək, kimlər bu vəsaitin yığılmasına nəzarət edəcək? Tariflər necə müəyyən ediləcək və güzəştlər olacaqmı? Həmin yol boyu vətəndaşlar yaşayır, onlar öz evinə niyə pullu gedib-gəlməlidir?”.
N.Cəfərlinin sözlərinə görə, ayrı-ayrı Avropa ölkələrində pullu yollardan istifadə tarifləri fərqlənir: “Bəzi yollarda 1, bəzi yollarda 2, bəzi yollarda isə 3 avro ödənilir. Bu qiymət məsafədən və sürət həddindən asılıdır. Pullu yollarda sürət həddi adətən çox yüksək olur və vətəndaşlara bir nöqtədən digər nöqtəyə daha tez çatmağa şərait yaradır. Amma Azərbaycanda pullu yolların qiymətlərinin beynəlxalq standartlara uyğun olması üçün maaş və təqaüdlər həmin beynəlxalq standartlara uyğun olmalıdır. Avropada maaşların səviyyəsi bizdən bir neçə dəfə çoxdur”.
Süleyman Əsgər oğlu Neymətov Naxçıvan Muxtar Respublikasının daxili işlər naziri təyin edilib.
Naxçıvan Muxtar Respublikası Ali Məclisi Sədrinin birinci müavini Azər Zeynalov dekabrın 28-də bununla bağlı sərəncam imzalayıb.
Qeyd edək ki, polis polkovniki Süleyman Neymətov bu təyinatadək Bakının Suraxanı Rayon Polis İdarəsinin rəisi vəzifəsində xidmət edirdi.
Zorla əllərindən alınaraq Şərurlu İsfəndiyara hədiyyə edilən restoranı Pənahov qardaşları geri ala biləcəkmi?
Naxçıvan hadisələri ölkənin gündəmini zəbt etməkdə davam edir. Muxtar Respublikadan gələn xəbərlər, Talıbovların fəaliyyəti ilə bağlı yeni məlumatlar müzakirə mövzusu olaraq qalır.
Bu arada Valyuta.az-ın redaksiyasına Naxçıvanda baş verməyən, amma Naxçıvanla, daha doğrusu Vasif Talıbovun oğlu Rza Talıbovun biznesi ilə bağlı daha bir xəbər daxil olub.
Bu dəfə mövzu uzun müddət adı müxtəlif qalmaqallarla hallanan “Flamingo” restoranıdır. Söhbət restoranın əsl sahiblərindən – “Laba” ləqəbi ilə tanınan Sədərək Gömrük Komitəsinin keçmiş rəhbəri Mübariz Pənahov və onun qardaşı Səfər Pənahovun əlindən zorla necə alınmasından gedir.
Mənbəmiz bildirir ki, Mübariz Pənahov və Vasif Talıbov arasında münasibətlərin gərginləşməsinin əsl səbəbkarı “Şərurlu İsfəndiyar” kimi tanınan İsfəndiyar Axundov olub. “Laba” Sədərək Gömrük Məntəqəsində “Şərurlu İsfəndiyar”ı sıxışdırdığı və maşınlarının gömrükdən keçməsini qadağan etdiyi vaxt, sonuncu bunun qisasını almaq üçün fürsət axtarır. Nəticədə “Laba”nın yanındakı etibarlı adamlardan birini pulla ələ alır. Və həmin adam İsfəndiyara məlumat sızdırır.
Bir müddət sonra “Flamingo” restoranında iki qardaş arasında elə bir söhbət olur ki, bu söhbət hər iki qardaşın gələcək taleyinə təsir edir. Səfər Pənahovun Vasif Talıbov və qardaşı Məhərrəm Talıbov haqqında Mübariz Pənahovla etdiyi söhbətin səsyazısı “Şərurlu İsfəndiyar”a təqdim edilir. Həmin söhbət zamanı Səfər Pənahov Məhərrəm və Vasif Talıbovları ağır söyüşlərlə təhqir edir.
“Şərurlu İsfəndiyar” səs yazısını Vasif Talıbovun stolunun üstünə qoyur. Nəticədə “Laba” və Vasif Talıbov arasındakı düşmənçiliyin də əsası qoyulur. Bundan sonra Səfər Pənahov heç bir günahı olmadan həbs olunur. Mübariz Pənahov isə vəzifəsindən çıxarılır.
“Flamingo” restoran bir qəpik ödənilmədən qardaşların əlindən alınır və xidmətləri müqabilində “Şərurlu İsfəndiyara” hədiyyə edilir. “Şərurlu İsfəndiyar” isə Sədərək Gömrüyündəki maşınlarının daha bol qazanc gətirməsi naminə böyük addım atır. O, “Flamingo” restoranını Rza Talıbova hədiyyə edir.
“AzPolitika.info”-ya verilən məlumata görə, Naxçıvan polisinə Bakıdan yeni rəis göndərilib. Bu vəzifəyə Bakı şəhəri Suraxanı rayon Polis İdarəsinin rəisi Süleyman Nemətov təyin olunub.
Dəqiqləşdirə bilmədiyimiz məlumata görə, Naxçıvan Muxtar Respublikasının (MR) Daxili İşlər Nazirliyi ləğv edilib. Əvəzində Azərbaycan Respublikası Daxili İşlər Nazirliyinin Naxçıvan MR üzrə Baş İdarəsi yaradılıb.
Masallı Rayon Mərkəzi Xəstəxanasının baş həkimi saxlanılıb.
APA-nın əldə etdiyi xəbərə görə, bu gün Baş prokuror yanında Korrupsiyaya qarşı Mübarizə Baş İdarəsinin əməkdaşları tərəfindən keçirilən əməliyyat zamanı xəstəxananın baş həkimi Eşqin Əliyev tutulub.
Baş Prokurorluğun Mətbuat xidmətindən APA-nın sorğusuna cavab olaraq bildirilib ki, qeyd olunan faktla bağlı ictimaiyyətə əlavə məlumat veriləcək.
Sabirabadda ər arvadını bıçaqlayıb.
Gununsesi.info xəbər verir ki, hadisə rayonun Qalağayın kəndində qeydə alınıb.
Belə ki, kənd sakini, 1994-cü il təvəllüdlü Rüstəmova Fərqanə Yaşar qızı bədənin kəsilmiş-deşilmiş yarası ilə Sabirabad Mərkəzi Rayon Xəstəxanasına yerləşdirilib.
İlkin məlumata görə, aralarında yaranmış mübahisə zamanı F.Rüstəmova əri tərəfindən bıçaqlanaraq xəsarət alıb.
Faktla bağlı araşdırma aparılır.
Bu gün axşam saatlarında Zaqatala rayonunun Lahıc kəndindəki meşəlik ərazidə kənd sakini, 1994-cü il təvəllüdlü Cavidan Muradovun ov tüfəngindən açılan atəşdən ölməsi barədə polisə məlumat daxil olub.
Daxili İşlər Nazirliyinin Mətbuat Xidmətindən verilən məlumata görə, hadisə yerinə və meyitə polis, eləcə də prokurorluq əməkdaşları tərəfindən baxış keçirilib.
İlkin araşdırma zamanı C.Muradovun ov tüfəngi ilə ehtiyatsız davranması nəticəsində silahdan açılan atəşdən öldüyü müəyyən edilib.
Faktla bağlı araşdırma aparılır.
Naxçıvanda bir neçə adda mineral süfrə suyu, limonadlar, meyvə şirələri və kompotlar istehsal olunur. Amma 20 ildən artıqdır ki, azad ticarət rəqabəti olduğu bildirilən bölgədə cəmi iki adda mineral suyun uğurlu istehsalına və satışına rast gəlirik. Bu istehsalçıların fövqəladə uğurlarının arxasında nə durur? Nə üçün başqa istehsalçılar onlarla rəqabət apara bilmir? Bu dəfə həmin “uğurun” sirrinə işıq salmağa çalışacağıq!
Beləliklə, öncə adı dillər əzbəri olan “Badamlı”nın “uğur”larından bəhs edək.
“Badamlı”nın 2004-cü ildən başlayan “uğuru”
Sovet dövründə Azərbaycanın dünyada brendə çevrilən ən böyük istehsalçı şirkətlərindən biri “Badamlı” şirkəti idi. Təməli 1947-ci ildə qoyulan şirkət 1970-80-ci illər arasında istehsal etdiyi məhsulların 90 faizini ölkə xaricində satırdı. Sovet hakimiyyəti dağıldıqdan sonra Badamlı Mineral Sular Zavodunun da başını qara dumanlar aldı. Müstəqilliyin ilk illərindən kənd sakinləri və əvvəlki istehsalçılar sexləri işə salıb, köhnə şüşə butulkalarda badamlını yenidən istehsal edir, bölgə ərazisində satıb, qazancı ilə ailə-uşaqlarını dolandırmağa çalışırdılar. Ta ki, 1999-cu ilə qədər.
1999-cu ildə zavod “Naxçıvan Mineral Sular İstehsalat Birliyi”nin tərkibindən çıxarılır. 2004-cü ildə isə Vasif Talıbov tərəfindən zavod öz yaxın adamlarının adına özəlləşdirilir. Zavodun böyük gəlir mənbəyi olduğunu görən sədr zavoda böyük yatırımlar edərək, Naxçıvan şəhərində daha böyük ərazisi olan Badamlı Mineral Sular Zavodunun açılışını edir. Müəssisəyə Badamlı yatağından suyu nəql edən xəttin uzunluğu 25 kilometr idi. 2008-ci ilin avqust ayında tikintisinə başlanmış zavod 2,1 hektar ərazidə yerləşirdi. Binanın ümumi sahəsi 4 min 590 m², istehsal sahəsi isə 3 min 600 m² idi.
Rza Talıbovun sərəncamında olan zavodun yenidən qurulması üçün 2017-ci ildə Badamlı kəndi ərazisində 4 hektar ərazidə binalarının tikintisinə başlanılıb, 2020-ci ildə 10590 m² olan yeni müəssisənin açılışı olub.
“Badamlı” qazlı və qazsız olmaqla müxtəlif həcmli qablaşmalarda istehsal olunur. Mövcud istehsal müəssisəsində günlük istehsal potensialı 500.000 şərti butulka təşkil edir. “Badamlı” hazırda Azərbaycan bazarı ilə yanaşı, Rusiya Federasiyası, Çin Xalq Respublikası, Birləşmiş Ərəb Əmirlikləri, İraq, Qazaxıstan kimi xarici dövlətlərə ixrac olunur.
Rza Talıbovun sərəncamında olan şirkətin müxtəlif yollarla reklamı aparılır. Müğənnilərin maliyyələşdirilməsi, Naxçıvanda təşkil edilən konsertlərdə sponsorluqdan müxtəlif kampaniyalara qədər. “Badamlı”nın sonuncu yadda qalan “uğuru” isə uduş kampaniyası idi. Uduşda iştirak etmək üçün qapaqdakı kodu göndərmək bəs edirdi. Amma uduşun elan olunduğu gün sadəcə kod nümayiş etdirilir, həmin koda bağlı hansısa şəxsi məlumatlar elan olunmayıb.
Uduş kampaniyasının qalibinin kim olduğunu isə yalnız Rza Talıbov və kampaniyanı təşkil edənlər bilib. Maraq üçün “Facebook”da axtarış etdim, “Badamlı” kampaniyalarından “uddum” deyən tapılmadı. Belə görünur ki, nümayiş etdirilən kodlar həqiqətən satışa buraxılmış sulardan çıxan kodlar olmayıb, yoxsa necə ola bilər ki heç kəs udmasın? Uzun sözün qısası, Talıbovların uduşlu lotereyası olan “Badamlı” mineral suyu uzun müddət Talıbovların qızmış nəfsləri qarşısında sərinləyə bilmədi. Ancaq Rəşid Behbudovun ifasında səsləndirdiyi kimi, bundan sonra “Badamlı” öz sərinliyi ilə od qoyulmuş ürəklərə bəlkə də su səpib, sərinlik bəxş edəcək….
Hər damlasında həyat olan “Sirab”
İndi isə gəlin “Sirab”ın “uğurlu tarixi”ni araşdıraq!
Azərbaycanda ən böyük mineral sudoldurma zavodu olan “Sirab” 1968-ci ildə stifadəyə verilib. Bu zavod Babək rayonunun Sirab kəndində yerləşir. Sovet hakimiyyəti dağıldıqdan sonra Sirab Mineral Sular Zavodunda da qara günlər başladı. Öncə zavod dağıdıldı. Sonra kənd sakinləri tərəfindən bir neçə sex olaraq fəaliyyətə başladısa, Vasif Talıbovun “uzaqgörən siyasəti” nəticəsində 1968-ci ildəki zavodun əsasında 2003-cü ildə Sirab Mineral Sular zavodu Açıq Səhmdar Cəmiyyəti yaradıldı. Bundan sonra kənddəki bütün sexlərin fəaliyyəti qadağan edildi.
Əldə olunan gəlirdən Talıbovların payı verilməklə müəssisənin fəaliyyəti təmin edildi və sahibkarlığı Vasif Talıbovun əmri ilə “Ləzzət” firmasına tapşırıldı. Bəzi mənbələr zavodun satıldığını bildirsələr də, ortada alqı-satqı barədə heç bir məlumat yoxdur. Bu prosesin ardından “Sirab”ın qızıl dövrü də başladı. Zavodun istehsal gücü o qədər inkişaf etdi ki, qısa zamanda nəinki Naxçıvanda, hətta Azərbaycanda ən çox satışı olan suya çevrildi. Rusiya, Belarus, Qazaxıstan, Türkiyə, Türkmənistan, Çin, İran, İraq, Qətər, Polşa, Kuveyt, Ukrayna və Baltikyanı ölkələrə ixrac olunan “Sirab” qeyri-neft sektorunda ölkənin ən böyük ixrac şirkətlərindən birinə çevrildi. Amma “Son damlasına qədər” gəlir mənbəyi və biznesə çevrilən “Sirab” sularından sirablıların bir damcı içmək şansı olmadı. Nəinki içmək, hətta ən çox zərər görənlər də elə onlar oldu. Hədə-qorxu ilə əllərindən alınan torpaqlarında Sirab Mineral Sular Zavodu tikilən mineral suyun cəfasını sirablılar, səfasını isə Talıbovlar və onların yaxın adamları gordülər.
Bəxtinə gün doğmayan zavodlar
Naxçıvanda “Badamlı” və “Sirab” sularından başqa mineral sular da istehsal olunur. Bu zavodların rəhbərləri Talıbovlara yaxın olmadıqlarına görə, onların yalnız adları var. Fəaliyyətləri isə sex səviyyəsindən o tərəfə keçmir. Bunlardan “Çınqıllı”, “Darıdağ”, “Böyrək suyu” və s. adlarını çəkə bilərik.
Başıbəlalı “Gülüstan”
Sovet hakimiyyəti dağıldıqda sonra, müstəqilliyin ilk illərində Naxçıvanda ən çox tanınan və ilk dəfə istehsal olunan “Gülüstan” (limonad) suyu idi. Vaxtilə istehsalçıları tərəfindən Bakıya ixrac olunan və hər kəs tərəfindən sevilən bu su birdən-birə bütün ölkə bazarından, ardından isə Naxçıvan bazarından yoxa çıxdı.
O dövrdə el arasında gəzən söz-söhbətlərə görə, zavodun rəhbərliyi Talıbovlara yaxın qohum olmadığından məcbur edilir ki, zavodu satışa çıxarsın. Həmin şəxs bu qərarla rəzılaşmır. Son anda əgər qərarla razılaşmasa, həbs olunacağını anlayan zavod rəhbəri məcburi şəkildə onu Naxçıvan rəhbərliyinə satır. Ancaq əl dəyişdikdən sonra zavodda əvvəlki qaydada istehsal prosesi yerinə yetirilmir, satışları zəifləyən limonad zavodunun taleyinə qapısına qıfıl vurulmaq yazılır.
Xalqın cəfası, Talıbovların səfası
Talıbovlar 27 ildə Naxçıvanda qazanc gələn bütün deşiklərə öz papaqlarını tıxayıblar. Naxçıvanda elə bir sahə olmaz ki, ora rəhbərlik tərəfindən müdaxilə edilməsin. Qazanc gətirən bütün sahələr ya zorla sahibkarın əlindən alınıb, ya da sahibkarın iş sahəsinə şərik kimi daxil olublar. Nəticədə, Talıbovlar hakimiyyətdə olduqları 27 ildə təkcə dövlət tərəfindən ayrılan dostasiyanı yeməyiblər. Onlar sahibkarların qazandıqlarına da şərik olublar, ya da sahibkar tərəfindən min bir əzab-əziyyətlə qurulan işə sahib çıxıblar. Xalqın min bir əzab-əziyyət bahasına çəkdiyi cəfa Talıbovların səfasına xidmət göstərib. İndi isə İlahi ədalət bərpa olunub. Xalqa zülm edərək, onun əlindən alınanlar, yenidən öz sahiblərinə, xalqa və dövlətə qaytarılmalıdır.
Valyuta.az
Azərbaycan ümumtəhsil məktəblərində valideyn-məktəb, məktəb-valideyn fəaliyyətini tənzimləyən komitələr var.
Lakin "valideyn komitəsi" kimi tanınan qrupların fəaliyyəti heç də ürəkaçan deyil. Vəzifəsinin ancaq bayramlar, müxtəlif tədbirlər, ad günlərinin təşkilindən ibarət olduğunu düşünən valideynlərin özləri də komitələrin fəaliyyətindən narazıdılar. Ancaq əlamətdar günlərdə fəallaşan komitələr valideynlərdən pul yığmaqla məşğuldurlar. Cəmiyyətdə neqativ məsələlərdə adı hallanan valideyn komitələrinin sədr seçiminin də nəyə əsaslandığı məlum deyil. Ümumiyyətlə, məktəb və valideyn arasında əlaqə yaratmaq üçün bu komitələrə ehtiyac varmı?
Komitənin vəzifəsi nədən ibarətdir?
DİA.AZ-ın məlumatına görə, təhsil eksperti Elşən Qafarov məsələ barədə Cebhe.info-ya bildirib ki, məktəblərdə valideynlərlə işləyən ayrıca direktor müavini olmalıdır:
"Bu, beynəlxalq təcrübədə və təhsili inkişaf etmiş ölkələrdə də var. Həmin müavinin işi valideyn komitələri və valideynlərlə iş qurmaqdır. İndi “Azərbaycan Valideyn-Müəllim Assosiasiyası” adlı qeyri-hökumət təşkilatı var. Həmin QHT ölkə üzrə baxanda, böyük sayda olmayan yəni 100-dən aşağıdır, onların da yarıdan çoxu fəaliyyətsizdir. Məktəblərdə özəkləri var. Məktəblərdə yerli valideyn komitələri başqa anlayışdır, bütün valideyn komitələri “Valideyn-Müəllim Assosiasiyası”nın qruplaşması deyil".
Ekspert hesab edir ki, valideyn komitələrinin işi qanunvericiliyə əsaslanmalıdır:
"Düşünürəm ki, bununla bağlı Elm və Təhsil Nazirliyi əsasnamə qəbul etməlidir. Yəni valideyn komitələrinin vəzifələri, hüquqları, məsuliyyəti açıq şəkildə göstərilməlidir. Həmişə bu haqda danışırıq, amma valideyn komitələrinin əsasnaməsini təsdiqləyə bilmirik. Hazırda siniflərdə sinif valideyn komitələrinin böyük əksəriyyəti məktəbdəki müəyyən neqativ hallarda əsas aparıcı rol oynayır, hər hansı məsələdə pul yığmalar və s. Əslində, valideyn komitələrinin işi məktəblə valideynlər arasındakı əlaqələri möhkəmləndirmək, əməkdaşlığı genişləndirməkdən ibarətdir. Şagirdlərin istər tədris, istər təlim prosesində inkişafı üçün valideynlərlə məktəbin əməkdaşlığını qurmalıdır. Yəni bu əməkdaşlıq son nəticədə şagirdin istər təlim nəaliyyətlərinin, istərsə də tədris prosesinin inkişafına gətirib çıxarmalıdır".
Elşən Qafaraov komitəyə daha çox üzdə olan, lazım olanda digər valideynlərdən pul tələb etməyi bacaran, bu şəkildə təşkilatçılığı bacaran insanların seçildiyini vurğulayıb:
"Təəssüf olsun ki, bizdə valideyn komitələri adətən pul yığmağı bacaran insanlardan seçilir. Amma valideyn komitəsinin sədrləri elə insanlar olmalıdır ki, ziyalılığı, tərbiyəsi, məktəbə, müəllimə olan münasibəti ilə fərqli bir baxış sərgiləyə və digər valideynləri də arxasınca apara bilsinlər. Çox təssüf ki, bu yoxdur. Yox sözü də yenə nazirlikdən gəlir. Çox vaxt məktəb və müəllimin adı hallanmasın deyə onun təhsilli olması, valideynlər arasında nə dərəcədə nüfuzlu olması önəm daşımır. Həmin valideynin bacarığı lazım olanda müəyyən yığımları yığıb-yığmaması ilə ölçülür. Valideyn komitəsinin sədrləri və üzvləri üçün müəyyən meyarlar olmalıdır ki, kimlər komitə sədri ola bilər. Bunun üçün də əsasnamə olmalıdır. Bizim ümumtəhsil məktəblərində isə valideyn komitəsinin fəaliyyəti ilə bağlı nizamnamələr yoxdur".
Ekspert qeyri-hökumət təşkilatlarının məktəb rəhbəri ilə müqavilə bağlayaraq birgə fəaliyyətinin mümkün olduğunu deyib:
“"Valideyn -Müəllim Assosiasiyası” məktəbdə fəaliyyət göstərəcəksə, məktəb rəhbərliyi ilə müqavilə bağlamalıdır. Qanunvericilikdə də var ki, hər bir təhsil müəssisəsi fiziki və hüquqi şəxslərlə qanunvericilik çərçivəsində əməkdaşlıq edə bilər. Lakin bizdə bu məsələ fərqli prizamadan qurulur. Assosiasiyası olsun, valideyn komitəsi olsun bunların işi təkcə pul yığmaq deyil, bunların işi istər mənəvi, istər psixoloji, yeri gələndə maddi məsələlərlə bağlı müəllim və məktəblə əməkdaşlıq etməkdən ibarətdir. Biz yalnız bir parametri götürürük. O da məktəbin, müəllimin adına, nüfuzuna ciddi xələl gətirir".